༣. སཱི་ཝ་ལི་ཏྠེ་ར་ཨ་པ་དཱ་ནཾ
༥༤. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨེ་སུ ཙ་ཀྑུ་མཱ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༥༥. ‘‘སཱི་ལཾ ཏ་སྶ ཨ་ས་ངྑེ་ཡྻཾ, ས་མཱ་དྷི ཝ་ཛི་རཱུ་པ་མོ;
ཨ་ས་ངྑེ་ཡྻཾ ཉཱ་ཎ་ཝ་རཾ, ཝི་མུ་ཏྟི ཙ ཨ་ནོ་པ་མཱ.
༥༦. ‘‘མ་ནུ་ཛཱ་མ་ར་ནཱ་གཱ་ནཾ, བྲ་ཧྨཱ་ན་ཉྩ ས་མཱ་ག་མེ;
ས་མ་ཎ་བྲཱ་ཧྨ་ཎཱ་ཀི་ཎྞེ, དྷ་མྨཾ དེ་སེ་སི ནཱ་ཡ་ཀོ.
༥༧. ‘‘ས་སཱ་ཝ་ཀཾ མ་ཧཱ་ལཱ་བྷིཾ, པུ་ཉྙ་ཝ་ནྟཾ ཛུ་ཏི་ནྡྷ་རཾ;
ཋ་པེ་སི ཨེ་ཏ་ད་གྒ་མྷི, པ་རི་སཱ་སུ ཝི་སཱ་ར་དོ.
༥༨. ‘‘ཏ་དཱ་ཧཾ ཁ་ཏྟི་ཡོ ཨཱ་སིཾ, ན་ག་རེ ཧཾ་ས་ས་ཝ྄ཧ་ཡེ;
སུ་ཏྭཱ ཛི་ན་སྶ ཏཾ ཝཱ་ཀྱཾ, སཱ་ཝ་ཀ་སྶ གུ་ཎཾ བ་ཧུཾ.
༥༩. ‘‘ནི་མ་ནྟ་ཡི་ཏྭཱ ས་ཏྟཱ་ཧཾ, བྷོ་ཛ་ཡི་ཏྭཱ ས་སཱ་ཝ་ཀཾ;
མ་ཧཱ་དཱ་ནཾ ད་དི་ཏྭཱ་ན, ཏཾ ཋཱ་ན་མ་བྷི་པ་ཏྠ་ཡིཾ.
༦༠. ‘‘ཏ་དཱ མཾ ཝི་ན་ཏཾ པཱ་དེ, དི་སྭཱ་ན པུ་རི་སཱ་ས་བྷོ;
ས་རེ་ན མ་ཧ་ཏཱ ཝཱི་རོ [སུ་སྶ་རེ་ན མ་ཧཱ་ཝཱི་རོ (སཱི. པཱི.)], ཨི་དཾ ཝ་ཙ་ན་མ་བྲ་ཝི.
༦༡. ‘‘‘ཏ་ཏོ ཛི་ན་སྶ ཝ་ཙ་ནཾ, སོ་ཏུ་ཀཱ་མཱ མ་ཧཱ་ཛ་ནཱ;
དེ་ཝ་དཱ་ན་ཝ་ག་ནྡྷ་བྦཱ, བྲ་ཧྨཱ་ནོ ཙ མ་ཧི་དྡྷི་ཀཱ’.
༦༢. ‘‘ས་མ་ཎ་བྲཱ་ཧྨ་ཎཱ ཙེ་ཝ, ན་མ་སྶིཾ་སུ ཀ་ཏ་ཉྫ་ལཱི;
‘ན་མོ ཏེ པུ་རི་སཱ་ཛ་ཉྙ, ན་མོ ཏེ པུ་རི་སུ་ཏྟ་མ.
༦༣. ‘‘‘ཁ་ཏྟི་ཡེ་ན མ་ཧཱ་དཱ་ནཾ, དི་ནྣཾ ས་ཏྟཱ་ཧི་ཀ་མྤི ཝོ [ས་ཏྟ་ཧི་ཀཾ མི ཝོ (སཱི.), ས་ཏྟ་ཧི་ཀཱ་དྷི་ཀཾ (སྱཱ.), ས་ཏྟ་ཧི་ཀཾ ཝི་བྷོ (པཱི.)];
སོ་ཏུ་ཀཱ་མཱ ཕ་ལཾ ཏ་སྶ, བྱཱ་ཀ་རོ་ཧི མ་ཧཱ་མུ་ནེ’.
༦༤. ‘‘ཏ་ཏོ ཨ་ཝོ་ཙ བྷ་ག་ཝཱ, ‘སུ་ཎཱ་ཐ མ་མ བྷཱ་སི་ཏཾ;
ཨ་པྤ་མེ་ཡྻ་མྷི བུ་དྡྷ་མྷི, ས་ས་ངྒྷ་མྷི པ་ཏི་ཊྛི་ཏཱ [སཾ་གྷ་མྷི སུ་པྤ་ཏི་ཊྛི་ཏཱ (སཱི. པཱི.)].
༦༥. ‘‘‘ད་ཀྑི་ཎཱ ཏཱ་ཡ [ད་ཀྑི་ཎཱ་དཱ་ཡ (སྱཱ. པཱི.)] ཀོ ཝ་ཏྟཱ, ཨ་པྤ་མེ་ཡྻ་ཕ་ལཱ ཧི སཱ;
ཨ་པི ཙེ ས མ་ཧཱ་བྷོ་གོ, ཋཱ་ནཾ པ་ཏྠེ་ཏི ཨུ་ཏྟ་མཾ.
༦༦. ‘‘‘ལཱ་བྷཱི ཝི་པུ་ལ་ལཱ་བྷཱ་ནཾ, ཡ་ཐཱ བྷི་ཀྑུ སུ་ད་སྶ་ནོ;
ཏ་ཐཱ་ཧ་མྤི བྷ་ཝེ་ཡྻ་ནྟི, ལ་ཙྪ་སེ ཏཾ ཨ་ནཱ་ག་ཏེ.
༦༧. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༦༨. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
སཱི་ཝ་ལི ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༦༩. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་སཱུ་པ་གོ ཨ་ཧཾ.
༧༠. ‘‘ཨེ་ཀ་ན་ཝུ་ཏི་ཏོ ཀ་པྤེ, ཝི་པ་སྶཱི ལོ་ཀ་ནཱ་ཡ་ཀོ;
ཨུ་པྤ་ཛྫི ཙཱ་རུ་ད་སྶ་ནོ, ས་བྦ་དྷ་མྨ་ཝི་པ་སྶ་ཀོ.
༧༡. ‘‘ཏ་དཱ་ཧཾ བ་ནྡྷུ་མ་ཏི་ཡཾ, ཀུ་ལ་སྶ་ཉྙ་ཏ་ར་སྶ ཙ;
ད་ཡི་ཏོ པ་སྶི་ཏོ ཙེ་ཝ, ཨཱ་སིཾ ཀ་མྨ་ནྟ་ཝཱ་ཝ་ཊོ [ཀ་མྨ་ནྟ་བྱཱ་ཝ་ཊོ (སཱི. སྱཱ. ཀ.)].
༧༢. ‘‘ཏ་དཱ ཨ་ཉྙ་ཏ་རོ པཱུ་གོ, ཝི་པ་སྶི་སྶ མ་ཧེ་སི་ནོ;
པ་རི་ཝེ་སཾ ཨ་ཀཱ་ར་ཡི, མ་ཧ་ནྟ་མ་ཏི་ཝི་སྶུ་ཏཾ.
༧༣. ‘‘ནི་ཊྛི་ཏེ ཙ མ་ཧཱ་དཱ་ནེ, ད་དུཾ ཁ་ཛྫ་ཀ་ས་ཉྷི་ཏཾ;
ན་ཝཾ ད་དྷིཾ མ་དྷུ་ཉྩེ་ཝ, ཝི་ཙི་ནཾ ནེ་ཝ ཨ་དྡ་སུཾ.
༧༤. ‘‘ཏ་དཱ་ཧཾ ཏཾ ག་ཧེ་ཏྭཱ་ན, ན་ཝཾ ད་དྷིཾ མ་དྷུ་མྤི ཙ;
ཀ་མྨ་སྶཱ་མི་གྷ་རཾ ག་ཙྪིཾ, ཏ་མེ་ས་ནྟཱ མ་མ་དྡ་སུཾ.
༧༥. ‘‘ས་ཧ་སྶ་མ་པི ད་ཏྭཱ་ན, ནཱ་ལ་བྷིཾ་སུ ཙ ཏཾ དྭ་ཡཾ;
ཏ་ཏོ་ཧཾ ཨེ་ཝཾ ཙི་ནྟེ་སིཾ, ‘ནེ་ཏཾ ཧེ་སྶ་ཏི ཨོ་ར་ཀཾ.
༧༦. ‘‘‘ཡ་ཐཱ ཨི་མེ ཛ་ནཱ ས་བྦེ, ས་ཀྐ་རོ་ནྟི ཏ་ཐཱ་ག་ཏཾ;
ཨ་ཧ་མྤི ཀཱ་རཾ ཀ་སྶཱ་མི, ས་ས་ངྒྷེ ལོ་ཀ་ནཱ་ཡ་ཀེ’.
༧༧. ‘‘ཏ་དཱ་ཧ་མེ་ཝཾ ཙི་ནྟེ་ཏྭཱ, ད་དྷིཾ མ་དྷུ་ཉྩ ཨེ་ཀ་ཏོ;
མ་དྡི་ཏྭཱ ལོ་ཀ་ནཱ་ཐ་སྶ, ས་ས་ངྒྷ་སྶ ཨ་དཱ་ས་ཧཾ.
༧༨. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༧༩. ‘‘པུ་ནཱ་ཧཾ བཱ་རཱ་ཎ་སི་ཡཾ, རཱ་ཛཱ ཧུ་ཏྭཱ མ་ཧཱ་ཡ་སོ;
ས་ཏྟུ་ཀ་སྶ ཏ་དཱ དུ་ཊྛོ, དྭཱ་ར་རོ་དྷ་མ་ཀཱ་ར་ཡིཾ.
༨༠. ‘‘ཏ་དཱ ཏ་པ་སྶི་ནོ རུ་དྡྷཱ, ཨེ་ཀཱ་ཧཾ ར་ཀྑི་ཏཱ ཨ་ཧུཾ;
ཏ་ཏོ ཏ་སྶ ཝི་པཱ་ཀེ་ན, པཱ་པ་ཏིཾ [པཱ་པི་ཊྛཾ (སྱཱ.) པཱ་པ་ཏྟཾ (ཀ.)] ནི་ར་ཡཾ བྷུ་སཾ.
༨༡. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏོ་ཧཾ ཀོ་ལི་ཡེ པུ་རེ;
སུ་པྤ་ཝཱ་སཱ ཙ མེ མཱ་ཏཱ, མ་ཧཱ་ལི ལི་ཙྪ་ཝཱི པི་ཏཱ.
༨༢. ‘‘ཁ་ཏྟི་ཡེ པུ་ཉྙ་ཀ་མྨེ་ན, དྭཱ་ར་རོ་དྷ་སྶ ཝཱ་ཧ་སཱ;
ས་ཏྟ ཝ་སྶཱ་ནི ནི་ཝ་སིཾ, མཱ་ཏུ་ཀུ་ཙྪི་མྷི དུ་ཀྑི་ཏོ.
༨༣. ‘‘ས་ཏྟཱ་ཧཾ དྭཱ་ར་མཱུ་ལ༹ྷོ་ཧཾ, མ་ཧཱ་དུ་ཀྑ་ས་མ་པྤི་ཏོ;
མཱ་ཏཱ མེ ཚ་ནྡ་དཱ་ནེ་ན, ཨེ་ཝཾ ཨཱ་སི སུ་དུ་ཀྑི་ཏཱ.
༨༤. ‘‘སུ་ཝ་ཏྠི་ཏོ་ཧཾ ནི་ཀྑ་ནྟོ, བུ་དྡྷེ་ན ཨ་ནུ་ཀ་མྤི་ཏོ;
ནི་ཀྑ་ནྟ་དི་ཝ་སེ་ཡེ་ཝ, པ་བྦ་ཛིཾ ཨ་ན་གཱ་རི་ཡཾ.
༨༥. ‘‘ཨུ་པ་ཛ྄ཛྷཱ སཱ་རི་པུ་ཏྟོ མེ, མོ་གྒ་ལླཱ་ནོ མ་ཧི་དྡྷི་ཀོ;
ཀེ་སེ ཨོ་རོ་པ་ཡ་ནྟོ མེ, ཨ་ནུ་སཱ་སི མ་ཧཱ་མ་ཏི.
༨༦. ‘‘ཀེ་སེ་སུ ཚི་ཛྫ་མཱ་ནེ་སུ, ཨ་ར་ཧ་ཏྟ་མ་པཱ་པུ་ཎིཾ;
དེ་ཝཱ ནཱ་གཱ མ་ནུ་སྶཱ ཙ, པ་ཙྩ་ཡེ ཨུ་པ་ནེ་ནྟི མེ.
༨༧. ‘‘པ་དུ་མུ་ཏྟ་ར་ནཱ་ཐ་ཉྩ, ཝི་པ་སྶི་ཉྩ ཝི་ནཱ་ཡ་ཀཾ;
ཡཾ པཱུ་ཛ་ཡིཾ པ་མུ་དི་ཏོ, པ་ཙྩ་ཡེ་ཧི ཝི་སེ་ས་ཏོ.
༨༨. ‘‘ཏ་ཏོ ཏེ་སཾ ཝི་སེ་སེ་ན, ཀ་མྨཱ་ནཾ ཝི་པུ་ལུ་ཏྟ་མཾ;
ལཱ་བྷཾ ལ་བྷཱ་མི ས་བྦ་ཏྠ, ཝ་ནེ གཱ་མེ ཛ་ལེ ཐ་ལེ.
༨༩. ‘‘རེ་ཝ་ཏཾ ད་སྶ་ན་ཏྠཱ་ཡ, ཡ་དཱ ཡཱ་ཏི ཝི་ནཱ་ཡ་ཀོ;
ཏིཾ་ས་བྷི་ཀྑུ་ས་ཧ་སྶེ་ཧི, ས་ཧ ལོ་ཀ་གྒ་ནཱ་ཡ་ཀོ.
༩༠. ‘‘ཏ་དཱ དེ་ཝོ་པ་ཎཱི་ཏེ་ཧི, མ་མ་ཏྠཱ་ཡ མ་ཧཱ་མ་ཏི;
པ་ཙྩ་ཡེ་ཧི མ་ཧཱ་ཝཱི་རོ, ས་ས་ངྒྷོ ལོ་ཀ་ནཱ་ཡ་ཀོ.
༩༡. ‘‘ཨུ་པ་ཊྛི་ཏོ མ་ཡཱ བུ་དྡྷོ, ག་ནྟྭཱ རེ་ཝ་ཏ་མ་དྡ་ས;
ཏ་ཏོ ཛེ་ཏ་ཝ་ནཾ ག་ནྟྭཱ, ཨེ་ཏ་ད་གྒེ ཋ་པེ་སི མཾ.
༩༢. ‘‘‘ལཱ་བྷཱི་ནཾ སཱི་ཝ་ལི ཨ་གྒོ, མ་མ སི་སྶེ་སུ བྷི་ཀྑ་ཝོ’;
ས་བྦ་ལོ་ཀ་ཧི་ཏོ ས་ཏྠཱ, ཀི་ཏྟ་ཡཱི པ་རི་སཱ་སུ མཾ.
༩༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༩༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༩༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སཱི་ཝ་ལི་ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
སཱི་ཝ་ལི་ཏྠེ་ར་སྶཱ་པ་དཱ་ནཾ ཏ་ཏི་ཡཾ.