༩. རཱ་དྷ་ཏྠེ་ར་ཨ་པ་དཱ་ནཾ
༢༩༦. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་ལོ་ཀ་ཝི་དཱུ མུ་ནི;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ཙ་ཀྑུ་མཱ.
༢༩༧. ‘‘ཨོ་ཝཱ་ད་ཀོ ཝི་ཉྙཱ་པ་ཀོ, ཏཱ་ར་ཀོ ས་བྦ་པཱ་ཎི་ནཾ;
དེ་ས་ནཱ་ཀུ་ས་ལོ བུ་དྡྷོ, ཏཱ་རེ་སི ཛ་ན་ཏཾ བ་ཧུཾ.
༢༩༨. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, ཧི་ཏེ་སཱི ས་བྦ་པཱ་ཎི་ནཾ;
ས་མྤ་ཏྟེ ཏི་ཏྠི་ཡེ ས་བྦེ, པ་ཉྩ་སཱི་ལེ པ་ཏི་ཊྛ་པི.
༢༩༩. ‘‘ཨེ་ཝཾ ནི་རཱ་ཀུ་ལཾ ཨཱ་སི, སུ་ཉྙ་ཏཾ ཏི་ཏྠི་ཡེ་ཧི ཙ;
ཝི་ཙི་ཏྟཾ ཨ་ར་ཧ་ནྟེ་ཧི, ཝ་སཱི་བྷཱུ་ཏེ་ཧི ཏཱ་དི་བྷི.
༣༠༠. ‘‘ར་ཏ་ནཱ་ན་ཊྛ་པ་ཉྙཱ་སཾ, ཨུ་གྒ་ཏོ སོ མ་ཧཱ་མུ་ནི;
ཀ་ཉྩ་ན་གྒྷི་ཡ་ས་ངྐཱ་སོ, བཱ་ཏྟིཾ་ས་ཝ་ར་ལ་ཀྑ་ཎོ.
༣༠༡. ‘‘ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༠༢. ‘‘ཏ་དཱ་ཧཾ ཧཾ་ས་ཝ་ཏི་ཡཾ, བྲཱ་ཧྨ་ཎོ མ་ནྟ་པཱ་ར་གཱུ;
ཨུ་པེ་ཙྩ ཏཾ ན་ར་ཝ་རཾ, ཨ་སྶོ་སིཾ དྷ་མྨ་དེ་ས་ནཾ.
༣༠༣. ‘‘པ་ཉྙ་པེ་ནྟཾ མ་ཧཱ་ཝཱི་རཾ, པ་རི་སཱ་སུ ཝི་སཱ་ར་དཾ;
པ་ཊི་བྷཱ་ནེ་ཡྻ་ཀཾ བྷི་ཀྑུཾ, ཨེ་ཏ་ད་གྒེ ཝི་ནཱ་ཡ་ཀཾ.
༣༠༤. ‘‘ཏ་དཱ་ཧཾ ཀཱ་རཾ ཀ་ཏྭཱ་ན, ས་ས་ངྒྷེ ལོ་ཀ་ནཱ་ཡ་ཀེ;
ནི་པ་ཙྩ སི་ར་སཱ པཱ་དེ, ཏཾ ཋཱ་ནཾ ཨ་བྷི་པ་ཏྠ་ཡིཾ.
༣༠༥. ‘‘ཏ་ཏོ མཾ བྷ་ག་ཝཱ ཨཱ་ཧ, སི་ངྒཱི་ནི་ཀྑ་ས་མ་པྤ་བྷོ;
ས་རེ་ན ར་ཛ་ནཱི་ཡེ་ན, ཀི་ལེ་ས་མ་ལ་ཧཱ་རི་ནཱ.
༣༠༦. ‘‘‘སུ་ཁཱི བྷ་ཝ་སྶུ དཱི་གྷཱ་ཡུ, སི་ཛ྄ཛྷ་ཏུ པ་ཎི་དྷཱི ཏ་ཝ;
ས་ས་ངྒྷེ མེ ཀ་ཏཾ ཀཱ་རཾ, ཨ་ཏཱི་ཝ ཝི་པུ་ལཾ ཏ་ཡཱ.
༣༠༧. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༣༠༨. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
རཱ་དྷོ་ཏི ནཱ་མ་དྷེ་ཡྻེ་ན, ཧེ་སྶ་ཏི ས་ཏྠུ སཱ་ཝ་ཀོ.
༣༠༩. ‘‘‘ས ཏེ ཧེ་ཏུ་གུ་ཎེ ཏུ་ཊྛོ, ས་ཀྱ་པུ་ཏྟོ ན་རཱ་ས་བྷོ [ཨི་དཾ པཱ་ད་དྭ་ཡཾ སྱཱ་མ་མཱུ་ལེ ན་ཏྠཱི];
པ་ཊི་བྷཱ་ནེ་ཡྻ་ཀཱ་ན་གྒཾ, པ་ཉྙ་པེ་སྶ་ཏི ནཱ་ཡ་ཀོ’.
༣༡༠. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟོ པ་རི་ཙ་རིཾ, ས་ཏོ པ་ཉྙཱ་ས་མཱ་ཧི་ཏོ.
༣༡༡. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༣༡༢. ‘‘ས་ཏཱ་ནཾ ཏཱི་ཎི་ཀྑ་ཏྟུ་ཉྩ, དེ་ཝ་ར་ཛྫ་མ་ཀཱ་ར་ཡིཾ;
ས་ཏཱ་ནཾ པ་ཉྩ་ཀྑ་ཏྟུ་ཉྩ, ཙ་ཀྐ་ཝ་ཏྟཱི ཨ་ཧོ་ས་ཧཾ.
༣༡༣. ‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ;
ས་བྦ་ཏྠ སུ་ཁི་ཏོ ཨཱ་སིཾ, ཏ་སྶ ཀ་མྨ་སྶ ཝཱ་ཧ་སཱ.
༣༡༤. ‘‘པ་ཙྪི་མེ བྷ་ཝེ ས་མྤ་ཏྟེ, གི་རི་བྦ་ཛ་པུ་རུ་ཏྟ་མེ;
ཛཱ་ཏོ ཝི་པྤ་ཀུ་ལེ ནི་དྡྷེ, ཝི་ཀ་ལ་ཙྪཱ་ད་ནཱ་ས་ནེ.
༣༡༥. ‘‘ཀ་ཊ་ཙྪུ་བྷི་ཀྑཾ པཱ་དཱ་སིཾ, སཱ་རི་པུ་ཏྟ་སྶ ཏཱ་དི་ནོ;
ཡ་དཱ ཛི་ཎྞོ ཙ ཝུ་དྡྷོ ཙ, ཏ་དཱ་རཱ་མ་མུ་པཱ་ག་མིཾ.
༣༡༦. ‘‘པ་བྦ་ཛ་ཏི ན མཾ ཀོ་ཙི [པ་བྦཱ་ཛེ་ནྟི ན མཾ ཀེ་ཙི (སཱི. སྱཱ པཱི.)], ཛི་ཎྞ་དུ་བྦ་ལ་ཐཱ་མ་ཀཾ;
ཏེ་ན དཱི་ནོ ཝི་ཝ་ཎྞ་ངྒོ [ཝི་ཝ་ཎྞ་ཀོ (ཀ.)], སོ་ཀོ ཙཱ་སིཾ ཏ་དཱ ཨ་ཧཾ.
༣༡༧. ‘‘དི་སྭཱ མ་ཧཱ་ཀཱ་རུ་ཎི་ཀོ, མ་མ་མཱ་ཧ [མ་མཱ་ཧ སོ (སཱི.), མ་མཱ་ཧ ཙ (པཱི.)] མ་ཧཱ་མུ་ནི;
‘ཀི་མ་ཏྠཾ པུ་ཏྟ་སོ་ཀ་ཊྚོ, བྲཱུ་ཧི ཏེ ཙི་ཏྟ་ཛཾ རུ་ཛཾ’.
༣༡༨. ‘‘‘པ་བྦ་ཛྫཾ ན ལ་བྷེ ཝཱི་ར, སྭཱ་ཀྑཱ་ཏེ ཏ་ཝ སཱ་ས་ནེ;
ཏེ་ན སོ་ཀེ་ན དཱི་ནོ་སྨི, ས་ར་ཎཾ ཧོ་ཧི ནཱ་ཡ་ཀ’.
༣༡༩. ‘‘ཏ་དཱ བྷི་ཀྑཱུ ས་མཱ་ནེ་ཏྭཱ, ཨ་པུ་ཙྪི མུ་ནི་ས་ཏྟ་མོ;
‘ཨི་མ་སྶ ཨ་དྷི་ཀཱ་རཾ ཡེ, ས་ར་ནྟི བྱཱ་ཧ་ར་ནྟུ ཏེ’.
༣༢༠. ‘‘སཱ་རི་པུ་ཏྟོ ཏ་དཱ་ཝོ་ཙ, ‘ཀཱ་ར་མ་སྶ ས་རཱ་མ་ཧཾ;
ཀ་ཊ་ཙྪུ་བྷི་ཀྑཾ དཱ་པེ་སི, པི་ཎྜཱ་ཡ ཙ་ར་ཏོ མ་མ’.
༣༢༡. ‘‘‘སཱ་དྷུ སཱ་དྷུ ཀ་ཏ་ཉྙཱུ་སི, སཱ་རི་པུ་ཏྟ ཨི་མཾ ཏུ་ཝཾ;
པ་བྦཱ་ཛེ་ཧི དི་ཛཾ ཝུ་ཌྜྷཾ, ཧེ་སྶ་ཏཱ་ཛཱ་ནི་ཡོ ཨ་ཡཾ’.
༣༢༢. ‘‘ཏ་ཏོ ཨ་ལ་ཏྠཾ པ་བྦ་ཛྫཾ, ཀ་མྨ་ཝཱ་ཙོ་པ་ས་མྤ་དཾ;
ན ཙི་རེ་ནེ་ཝ ཀཱ་ལེ་ན, པཱ་པུ་ཎིཾ ཨཱ་ས་ཝ་ཀྑ་ཡཾ.
༣༢༣. ‘‘ས་ཀྐ་ཙྩཾ མུ་ནི་ནོ ཝཱ་ཀྱཾ, སུ་ཎཱ་མི མུ་དི་ཏོ ཡ་ཏོ;
པ་ཊི་བྷཱ་ནེ་ཡྻ་ཀཱ་ན་གྒཾ, ཏ་ཏོ མཾ ཋ་པ་ཡཱི ཛི་ནོ.
༣༢༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༣༢༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༢༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ རཱ་དྷོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
རཱ་དྷ་ཏྠེ་ར་སྶཱ་པ་དཱ་ནཾ ན་ཝ་མཾ.