༡༠. མོ་གྷ་རཱ་ཛ་ཏྠེ་ར་ཨ་པ་དཱ་ནཾ
༣༢༧. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་ལོ་ཀ་ཝི་དཱུ མུ་ནི;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ཙ་ཀྑུ་མཱ.
༣༢༨. ‘‘ཨོ་ཝཱ་ད་ཀོ ཝི་ཉྙཱ་པ་ཀོ, ཏཱ་ར་ཀོ ས་བྦ་པཱ་ཎི་ནཾ;
དེ་ས་ནཱ་ཀུ་ས་ལོ བུ་དྡྷོ, ཏཱ་རེ་སི ཛ་ན་ཏཾ བ་ཧུཾ.
༣༢༩. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, ཧི་ཏེ་སཱི ས་བྦ་པཱ་ཎི་ནཾ;
ས་མྤ་ཏྟེ ཏི་ཏྠི་ཡེ ས་བྦེ, པ་ཉྩ་སཱི་ལེ པ་ཏི་ཊྛ་པི.
༣༣༠. ‘‘ཨེ་ཝཾ ནི་རཱ་ཀུ་ལཾ ཨཱ་སི, སུ་ཉྙ་ཏཾ ཏི་ཏྠི་ཡེ་ཧི ཙ;
ཝི་ཙི་ཏྟཾ ཨ་ར་ཧ་ནྟེ་ཧི, ཝ་སཱི་བྷཱུ་ཏེ་ཧི ཏཱ་དི་བྷི.
༣༣༡. ‘‘ར་ཏ་ནཱ་ན་ཊྛ་པ་ཉྙཱ་སཾ, ཨུ་གྒ་ཏོ སོ མ་ཧཱ་མུ་ནི;
ཀ་ཉྩ་ན་གྒྷི་ཡ་ས་ངྐཱ་སོ, བཱ་ཏྟིཾ་ས་ཝ་ར་ལ་ཀྑ་ཎོ.
༣༣༢. ‘‘ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༣༣. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཀུ་ལེ ཨ་ཉྙ་ཏ་རེ ཨ་ཧུཾ;
པ་ར་ཀ་མྨཱ་ཡ་ནེ ཡུ་ཏྟོ, ན་ཏྠི མེ ཀི་ཉྩི སཾ་དྷ་ནཾ.
༣༣༤. ‘‘པ་ཊི་ཀྐ་མ་ན་སཱ་ལཱ་ཡཾ, ཝ་ས་ནྟོ ཀ་ཏ་བྷཱུ་མི་ཡཾ;
ཨ་གྒིཾ ཨུ་ཛྫཱ་ལ་ཡིཾ ཏ་ཏྠ, ད་ལ༹ྷཾ ཀ་ཎྷཱ་སི སཱ [ཀ་ཎྷཱ སི་ཡཱ (སཱི. པཱི.), ཌ་ཡ྄ཧ་ཀ་ཎྷཱ སི་ལཱ (སྱཱ.)] ཧཱི.
༣༣༥. ‘‘ཏ་དཱ པ་རི་ས་ཏིཾ ནཱ་ཐོ, ཙ་ཏུ་ས་ཙྩ་པ་ཀཱ་ས་ཀོ;
སཱ་ཝ་ཀཾ ས་མྤ་ཀི་ཏྟེ་སི, ལཱུ་ཁ་ཙཱི་ཝ་ར་དྷཱ་ར་ཀཾ.
༣༣༦. ‘‘ཏ་སྶ ཏ་མྷི གུ་ཎེ ཏུ་ཊྛོ, པ་ཎི་པ་ཙྩ [པ་ཏི་པ་ཛྫ (སྱཱ.)] ཏ་ཐཱ་ག་ཏཾ;
ལཱུ་ཁ་ཙཱི་ཝ་ར་དྷཱ་ར་གྒཾ, པ་ཏྠ་ཡིཾ ཋཱ་ན་མུ་ཏྟ་མཾ.
༣༣༧. ‘‘ཏ་དཱ ཨ་ཝོ་ཙ བྷ་ག་ཝཱ, སཱ་ཝ་ཀེ པ་དུ་མུ་ཏྟ་རོ;
‘པ་སྶ་ཐེ་ཏཾ པུ་རི་ས་ཀཾ, ཀུ་ཙེ་ལཾ ཏ་ནུ་དེ་ཧ་ཀཾ.
༣༣༨. ‘‘‘པཱི་ཏི་པྤ་ས་ནྣ་ཝ་ད་ནཾ, ས་དྡྷཱ་དྷ་ན་ས་མ་ནྭི་ཏཾ [ས་དྡྷཱ་སྣེ་ཧ་ས་མ་ནྭ་ཏཾ (ཀ.)];
ཨུ་ད་གྒ་ཏ་ནུ་ཛཾ ཧ་ཊྛཾ, ཨ་ཙ་ལཾ སཱ་ལ་པི་ཎྜི་ཏཾ.
༣༣༩. ‘‘‘ཨེ་སོ པ་ཏྠེ་ཏི ཏཾ ཋཱ་ནཾ, ས་ཙྩ་སེ་ན་སྶ བྷི་ཀྑུ་ནོ;
ལཱུ་ཁ་ཙཱི་ཝ་ར་དྷཱ་རི་སྶ, ཏ་སྶ ཝ་ཎྞ་སི་ཏཱ་ས་ཡོ [ཝ་ཎྞ་ག་ཏཱ་ས་ཡོ (སཱི. སྱཱ. པཱི.)].
༣༤༠. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ནི་པ་ཙྩ སི་ར་སཱ ཛི་ནཾ;
ཡཱ་ཝ་ཛཱི་ཝཾ སུ་བྷཾ ཀ་མྨཾ, ཀ་རི་ཏྭཱ ཛི་ན་སཱ་ས་ནེ.
༣༤༡. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་སཱུ་པ་གོ ཨ་ཧཾ.
༣༤༢. ‘‘པ་ཊི་ཀྐ་མ་ན་སཱ་ལཱ་ཡཾ, བྷཱུ་མི་དཱ་ཧ་ཀ་ཀ་མྨུ་ནཱ;
ས་མ་ས་ཧ་སྶཾ ནི་ར་ཡེ, ཨ་ད་ཡ྄ཧིཾ ཝེ་ད་ནཱ་ཊྚི་ཏོ.
༣༤༣. ‘‘ཏེ་ན ཀ་མྨཱ་ཝ་སེ་སེ་ན, པ་ཉྩ ཛཱ་ཏི་ས་ཏཱ་ནི་ཧཾ;
མ་ནུ་སྶོ ཀུ་ལ་ཛོ ཧུ་ཏྭཱ, ཛཱ་ཏི་ཡཱ ལ་ཀྑ་ཎ་ངྐི་ཏོ.
༣༤༤. ‘‘པ་ཉྩ ཛཱ་ཏི་ས་ཏཱ་ནེ་ཝ, ཀུ་ཊྛ་རོ་ག་ས་མ་པྤི་ཏོ;
མ་ཧཱ་དུ་ཀྑཾ ཨ་ནུ་བྷ་ཝིཾ, ཏ་སྶ ཀ་མྨ་སྶ ཝཱ་ཧ་སཱ.
༣༤༥. ‘‘ཨི་མ་སྨིཾ བྷ་དྡ་ཀེ ཀ་པྤེ, ཨུ་པ་རི་ཊྛཾ ཡ་ས་སྶི་ནཾ;
པི་ཎྜ་པཱ་ཏེ་ན ཏ་པྤེ་སིཾ, པ་ས་ནྣ་མཱ་ན་སོ ཨ་ཧཾ.
༣༤༦. ‘‘ཏེ་ན ཀ་མྨ་ཝི་སེ་སེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༣༤༧. ‘‘པ་ཙྪི་མེ བྷ་ཝེ ས་མྤ་ཏྟེ, ཨ་ཛཱ་ཡིཾ ཁ་ཏྟི་ཡེ ཀུ་ལེ;
པི་ཏུ་ནོ ཨ་ཙྩ་ཡེ་ནཱ་ཧཾ, མ་ཧཱ་ར་ཛྫ་ས་མ་པྤི་ཏོ.
༣༤༨. ‘‘ཀུ་ཊྛ་རོ་གཱ་དྷི་བྷཱུ་ཏོ་ཧཾ, ན ར་ཏིཾ ན སུ་ཁཾ ལ་བྷེ;
མོ་གྷཾ ར་ཛྫཾ སུ་ཁཾ ཡ་སྨཱ, མོ་གྷ་རཱ་ཛཱ ཏ་ཏོ ཨ་ཧཾ.
༣༤༩. ‘‘ཀཱ་ཡ་སྶ དོ་སཾ དི་སྭཱ་ན, པ་བྦ་ཛིཾ ཨ་ན་གཱ་རི་ཡཾ;
བཱ་ཝ་རི་སྶ དི་ཛ་གྒ་སྶ, སི་སྶ་ཏྟཾ ཨ་ཛ྄ཛྷུ་པཱ་ག་མིཾ.
༣༥༠. ‘‘མ་ཧ་ཏཱ པ་རི་ཝཱ་རེ་ན, ཨུ་པེ་ཙྩ ན་ར་ནཱ་ཡ་ཀཾ;
ཨ་པུ་ཙྪིཾ ནི་པུ་ཎཾ པ་ཉྷཾ, ཏཾ ཝཱི་རཾ ཝཱ་དི་སཱུ་ད་ནཾ.
༣༥༡. ‘‘‘ཨ་ཡཾ ལོ་ཀོ པ་རོ ལོ་ཀོ, བྲ་ཧྨ་ལོ་ཀོ ས་དེ་ཝ་ཀོ;
དི་ཊྛིཾ ནོ [དི་ཊྛཱ ནོ (སཱི.), དི་ཊྛཾ ནོ (པཱི.), དི་ཊྛིཾ ཏེ (སྱཱ.)] ནཱ་བྷི་ཛཱ་ནཱ་མི, གོ་ཏ་མ་སྶ ཡ་ས་སྶི་ནོ.
༣༥༢. ‘‘‘ཨེ་ཝཱ་བྷི་ཀྐ་ནྟ་ད་སྶཱ་ཝིཾ, ཨ་ཏྠི པ་ཉྷེ་ན ཨཱ་ག་མཾ;
ཀ་ཐཾ ལོ་ཀཾ ཨ་ཝེ་ཀྑ་ནྟཾ, མ་ཙྩུ་རཱ་ཛཱ ན པ་སྶ་ཏི’.
༣༥༣. ‘‘‘སུ་ཉྙ་ཏོ ལོ་ཀཾ ཨ་ཝེ་ཀྑ་སྶུ, མོ་གྷ་རཱ་ཛ ས་དཱ ས་ཏོ;
ཨ་ཏྟཱ་ནུ་དི་ཊྛིཾ ཨུ་ཧ་ཙྩ, ཨེ་ཝཾ མ་ཙྩུ་ཏ་རོ སི་ཡཱ.
༣༥༤. ‘‘‘ཨེ་ཝཾ ལོ་ཀཾ ཨ་ཝེ་ཀྑ་ནྟཾ, མ་ཙྩུ་རཱ་ཛཱ ན པ་སྶ་ཏི’;
ཨི་ཏི མཾ ཨ་བྷ་ཎི བུ་དྡྷོ, ས་བྦ་རོ་ག་ཏི་ཀི་ཙྪ་ཀོ.
༣༥༥. ‘‘ས་ཧ གཱ་ཐཱ་ཝ་སཱ་ནེ་ན, ཀེ་ས་མ་སྶུ་ཝི་ཝ་ཛྫི་ཏོ;
ཀཱ་སཱ་ཝ་ཝ་ཏྠ་ཝ་ས་ནོ, ཨཱ་སིཾ བྷི་ཀྑུ ཏ་ཐཱ་ར་ཧཱ.
༣༥༦. ‘‘ས་ངྒྷི་ཀེ་སུ ཝི་ཧཱ་རེ་སུ, ན ཝ་སིཾ རོ་ག་པཱི་ལི༹་ཏོ;
མཱ ཝི་ཧཱ་རོ པ་དུ་སྶཱི་ཏི, ཝཱ་ཏ་རོ་གེ་ཧི པཱི་ལི༹་ཏོ [ཝཱ་ཙཱ་ཡཱ་བྷི་སུ་པཱི་ལི༹་ཏོ (སྱཱ. པཱི.), ཝཱ་ཏ་རོ་གཱི སུ་པཱི་ལི༹་ཏོ (ཀ.)].
༣༥༧. ‘‘ས་ངྐཱ་ར་ཀཱུ་ཊཱ ཨཱ་ཧི་ཏྭཱ, སུ་སཱ་ནཱ ར་ཐི་ཀཱ་ཧི ཙ;
ཏ་ཏོ ས་ངྒྷཱ་ཊིཾ ཀ་རི་ཏྭཱ, དྷཱ་ར་ཡིཾ ལཱུ་ཁ་ཙཱི་ཝ་རཾ.
༣༥༨. ‘‘མ་ཧཱ་བྷི་ས་ཀྐོ ཏ་སྨིཾ མེ, གུ་ཎེ ཏུ་ཊྛོ ཝི་ནཱ་ཡ་ཀོ;
ལཱུ་ཁ་ཙཱི་ཝ་ར་དྷཱ་རཱི་ནཾ, ཨེ་ཏ་ད་གྒེ ཋ་པེ་སི མཾ.
༣༥༩. ‘‘པུ་ཉྙ་པཱ་པ་པ་རི་ཀྑཱི་ཎོ, ས་བྦ་རོ་ག་ཝི་ཝ་ཛྫི་ཏོ;
སི་ཁཱི་ཝ ཨ་ནུ་པཱ་དཱ་ནོ, ནི་བྦཱ་ཡི་སྶ་མ་ནཱ་ས་ཝོ.
༣༦༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༣༦༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༦༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མོ་གྷ་རཱ་ཛཱ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
མོ་གྷ་རཱ་ཛ་ཏྠེ་ར་སྶཱ་པ་དཱ་ནཾ ད་ས་མཾ.
ཀ་ཙྩཱ་ཡ་ན་ཝ་གྒོ ཙ་ཏུ་པ་ཉྙཱ་ས་མོ.