༧. མ་ཧཱ་ཀོ་ཊྛི་ཀ་ཏྠེ་ར་ཨ་པ་དཱ་ནཾ
༢༢༡. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་ལོ་ཀ་ཝི་དཱུ མུ་ནི;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ཙ་ཀྑུ་མཱ.
༢༢༢. ‘‘ཨོ་ཝཱ་ད་ཀོ ཝི་ཉྙཱ་པ་ཀོ, ཏཱ་ར་ཀོ ས་བྦ་པཱ་ཎི་ནཾ;
དེ་ས་ནཱ་ཀུ་ས་ལོ བུ་དྡྷོ, ཏཱ་རེ་སི ཛ་ན་ཏཾ བ་ཧུཾ.
༢༢༣. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, ཧི་ཏེ་སཱི ས་བྦ་པཱ་ཎི་ནཾ;
ས་མྤ་ཏྟེ ཏི་ཏྠི་ཡེ ས་བྦེ, པ་ཉྩ་སཱི་ལེ པ་ཏི་ཊྛ་པི.
༢༢༤. ‘‘ཨེ་ཝཾ ནི་རཱ་ཀུ་ལཾ ཨཱ་སི, སུ་ཉྙ་ཏཾ ཏི་ཏྠི་ཡེ་ཧི ཙ;
ཝི་ཙི་ཏྟཾ ཨ་ར་ཧ་ནྟེ་ཧི, ཝ་སཱི་བྷཱུ་ཏེ་ཧི ཏཱ་དི་བྷི.
༢༢༥. ‘‘ར་ཏ་ནཱ་ན་ཊྛ་པ་ཉྙཱ་སཾ, ཨུ་གྒ་ཏོ སོ མ་ཧཱ་མུ་ནི;
ཀ་ཉྩ་ན་གྒྷི་ཡ་ས་ངྐཱ་སོ, བཱ་ཏྟིཾ་ས་ཝ་ར་ལ་ཀྑ་ཎོ.
༢༢༦. ‘‘ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༢༧. ‘‘ཏ་དཱ་ཧཾ ཧཾ་ས་ཝ་ཏི་ཡཾ, བྲཱ་ཧྨ་ཎོ ཝེ་ད་པཱ་ར་གཱུ;
ཨུ་པེ་ཙྩ ས་བྦ་ལོ་ཀ་གྒཾ [ས་བྦ་སཱ་ར་གྒཾ (སཱི.), ས་ཏྟ་པཱ་ར་གཾ (པཱི.)], ཨ་སྶོ་སིཾ དྷ་མྨ་དེ་ས་ནཾ.
༢༢༨. ‘‘ཏ་དཱ སོ སཱ་ཝ་ཀཾ ཝཱི་རོ, པ་བྷི་ནྣ་མ་ཏི་གོ་ཙ་རཾ;
ཨ་ཏྠེ དྷ་མྨེ ནི་རུ་ཏྟེ ཙ, པ་ཊི་བྷཱ་ནེ ཙ ཀོ་ཝི་དཾ.
༢༢༩. ‘‘ཋ་པེ་སི ཨེ་ཏ་ད་གྒ་མྷི, ཏཾ སུ་ཏྭཱ མུ་དི་ཏོ ཨ་ཧཾ;
ས་སཱ་ཝ་ཀཾ ཛི་ན་ཝ་རཾ, ས་ཏྟཱ་ཧཾ བྷོ་ཛ་ཡིཾ ཏ་དཱ.
༢༣༠. ‘‘དུ་སྶེ་ཧ་ཙྪཱ་ད་ཡི་ཏྭཱ་ན, ས་སི་སྶཾ བུ་དྡྷི་སཱ་ག་རཾ [བུ་དྡྷ་སཱ་ག་རཾ (ཀ.)];
ནི་པ་ཙྩ པཱ་ད་མཱུ་ལ་མྷི, ཏཾ ཋཱ་ནཾ པ་ཏྠ་ཡིཾ ཨ་ཧཾ.
༢༣༡. ‘‘ཏ་ཏོ ཨ་ཝོ་ཙ ལོ་ཀ་གྒོ, ‘པ་སྶ་ཐེ་ཏཾ དི་ཛུ་ཏྟ་མཾ;
ཝི་ན་ཏཾ པཱ་ད་མཱུ་ལེ མེ, ཀ་མ་ལོ་ད་ར་ས་པྤ་བྷཾ.
༢༣༢. ‘‘‘བུ་དྡྷ་སེ་ཊྛ་སྶ [སེ་ཊྛཾ བུ་དྡྷ་སྶ (སྱཱ. ཀ.)] བྷི་ཀྑུ་སྶ, ཋཱ་ནཾ པ་ཏྠ་ཡ་ཏེ ཨ་ཡཾ;
ཏཱ་ཡ ས་དྡྷཱ་ཡ ཙཱ་གེ་ན, ས་དྡྷ་མྨ་སྶ་ཝ་ནེ་ན [ཏེ་ན དྷ་མྨ་སྶ་ཝེ་ན (སཱི. པཱི. ཀ.)] ཙ.
༢༣༣. ‘‘‘ས་བྦ་ཏྠ སུ་ཁི་ཏོ ཧུ་ཏྭཱ, སཾ་ས་རི་ཏྭཱ བྷ་ཝཱ་བྷ་ཝེ;
ཨ་ནཱ་ག་ཏ་མྷི ཨ་དྡྷཱ་ནེ, ལ་ཙྪ་སེ ཏཾ མ་ནོ་ར་ཐཾ.
༢༣༤. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༢༣༥. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཀོ་ཊྛི་ཀོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༢༣༦. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟོ པ་རི་ཙ་རིཾ, ས་ཏོ པ་ཉྙཱ་ས་མཱ་ཧི་ཏོ.
༢༣༧. ‘‘ཏེ་ན ཀ་མྨ་ཝི་པཱ་ཀེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༢༣༨. ‘‘ས་ཏཱ་ནཾ ཏཱི་ཎི་ཀྑ་ཏྟུ་ཉྩ, དེ་ཝ་ར་ཛྫ་མ་ཀཱ་ར་ཡིཾ;
ས་ཏཱ་ནཾ པ་ཉྩ་ཀྑ་ཏྟུ་ཉྩ, ཙ་ཀྐ་ཝ་ཏྟཱི ཨ་ཧོ་ས་ཧཾ.
༢༣༩. ‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ;
ས་བྦ་ཏྠ སུ་ཁི་ཏོ ཨཱ་སིཾ, ཏ་སྶ ཀ་མྨ་སྶ ཝཱ་ཧ་སཱ.
༢༤༠. ‘‘དུ་ཝེ བྷ་ཝེ སཾ་ས་རཱ་མི, དེ་ཝ་ཏྟེ ཨ་ཐ མཱ་ནུ་སེ;
ཨ་ཉྙཾ ག་ཏིཾ ན ག་ཙྪཱ་མི, སུ་ཙི་ཎྞ་སྶ ཨི་དཾ ཕ་ལཾ.
༢༤༡. ‘‘དུ་ཝེ ཀུ་ལེ པ་ཛཱ་ཡཱ་མི, ཁ་ཏྟི་ཡེ ཨ་ཐ བྲཱ་ཧྨ་ཎེ;
‘‘ནཱི་ཙེ ཀུ་ལེ ན ཛཱ་ཡཱ་མི, སུ་ཙི་ཎྞ་སྶ ཨི་དཾ ཕ་ལཾ.
༢༤༢. ‘‘པ་ཙྪི་མེ བྷ་ཝེ ས་མྤ་ཏྟེ, བྲ་ཧྨ་བ་ནྡྷུ ཨ་ཧོ་ས་ཧཾ;
སཱ་ཝ་ཏྠི་ཡཾ ཝི་པྤ་ཀུ་ལེ, པ་ཙྩཱ་ཛཱ་ཏོ མ་ཧ་དྡྷ་ནེ.
༢༤༣. ‘‘མཱ་ཏཱ ཙ་ནྡ་ཝ་ཏཱི ནཱ་མ, པི་ཏཱ མེ ཨ་སྶ་ལཱ་ཡ་ནོ;
ཡ་དཱ མེ པི་ཏ་རཾ བུ་དྡྷོ, ཝི་ན་ཡཱི ས་བྦ་སུ་དྡྷི་ཡཱ.
༢༤༤. ‘‘ཏ་དཱ པ་ས་ནྣོ སུ་ག་ཏེ, པ་བྦ་ཛིཾ ཨ་ན་གཱ་རི་ཡཾ;
མོ་གྒ་ལླཱ་ནོ ཨཱ་ཙ་རི་ཡོ, ཨུ་པ་ཛ྄ཛྷཱ སཱ་རི་ས་མྦྷ་ཝོ.
༢༤༥. ‘‘ཀེ་སེ་སུ ཚི་ཛྫ་མཱ་ནེ་སུ, དི་ཊྛི ཚི་ནྣཱ ས་མཱུ་ལི་ཀཱ;
ནི་ཝཱ་སེ་ནྟོ ཙ ཀཱ་སཱ་ཝཾ, ཨ་ར་ཧ་ཏྟ་མ་པཱ་པུ་ཎིཾ.
༢༤༦. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཙ མེ མ་ཏི;
པ་བྷི་ནྣཱ ཏེ་ན ལོ་ཀ་གྒོ, ཨེ་ཏ་ད་གྒེ ཋ་པེ་སི མཾ.
༢༤༧. ‘‘ཨ་ས་ནྡི་ཊྛཾ ཝི་ཡཱ་ཀཱ་སིཾ, ཨུ་པ་ཏི་སྶེ་ན པུ་ཙྪི་ཏོ;
པ་ཊི་ས་མྦྷི་དཱ་སུ ཏེ་ནཱ་ཧཾ, ཨ་གྒོ ས་མྦུ་དྡྷ་སཱ་ས་ནེ.
༢༤༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༤༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༥༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་ཧཱ་ཀོ་ཊྛི་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
མ་ཧཱ་ཀོ་ཊྛི་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.