༦. བཱ་ཧི་ཡ་ཏྠེ་ར་ཨ་པ་དཱ་ནཾ
༡༧༨. ‘‘ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ;
མ་ཧ་པྤ་བྷོ ཏི་ལོ་ཀ་གྒོ, ནཱ་མེ་ན པ་དུ་མུ་ཏྟ་རོ.
༡༧༩. ‘‘ཁི་པྤཱ་བྷི་ཉྙ་སྶ བྷི་ཀྑུ་སྶ, གུ་ཎཾ ཀི་ཏྟ་ཡ་ཏོ མུ་ནེ;
སུ་ཏྭཱ ཨུ་ད་གྒ་ཙི་ཏྟོ་ཧཾ, ཀཱ་རཾ ཀ་ཏྭཱ མ་ཧེ་སི་ནོ.
༡༨༠. ‘‘ད་ཏྭཱ ས་ཏྟཱ་ཧི་ཀཾ དཱ་ནཾ, ས་སི་སྶ་སྶ མུ་ནེ ཨ་ཧཾ;
ཨ་བྷི་ཝཱ་དི་ཡ ས་མྦུ་དྡྷཾ, ཏཾ ཋཱ་ནཾ པ་ཏྠ་ཡིཾ ཏ་དཱ.
༡༨༡. ‘‘ཏ་ཏོ མཾ བྱཱ་ཀ་རི བུ་དྡྷོ, ‘ཨེ་ཏཾ པ་སྶ་ཐ བྲཱ་ཧྨ་ཎཾ;
པ་ཏི་ཏཾ པཱ་ད་མཱུ་ལེ མེ, ཙ་རི་ཡཾ པ་ཙྩ་ཝེ་ཀྑ་ཎཾ [པ་ས་ནྣ་ན་ཡ་ནཱ་ན་ནཾ (སཱི.), པཱི་ན་ས་མྤ་ནྣ་ཝེ་ཀྑ་ཎཾ (སྱཱ.), པཱི་ཎཾ་སཾ པ་ཙྩ་ཝེ་ཀྑ་ཎཾ (པཱི.)].
༡༨༢. ‘‘‘ཧེ་མ་ཡ་ཉྙོ་པ་ཙི་ཏ་ངྒཾ, ཨ་ཝ་དཱ་ཏ་ཏ་ནུ་ཏྟ་ཙཾ;
པ་ལ་མྦ་བི་མྦ་ཏ་མྦོ་ཊྛཾ, སེ་ཏ་ཏི་ཎྷ་ས་མཾ དི་ཛཾ.
༡༨༣. ‘‘‘གུ་ཎ་ཐཱ་མ་བ་ཧུ་ཏ་རཾ, ས་མུ་གྒ་ཏ་ཏ་ནཱུ་རུ་ཧཾ;
གུ་ཎོ་གྷཱ་ཡ་ཏ་ནཱི་བྷཱུ་ཏཾ, པཱི་ཏི་ས་མྥུ་ལླི་ཏཱ་ན་ནཾ.
༡༨༤. ‘‘‘ཨེ་སོ པ་ཏྠ་ཡ་ཏེ ཋཱ་ནཾ, ཁི་པྤཱ་བྷི་ཉྙ་སྶ བྷི་ཀྑུ་ནོ;
ཨ་ནཱ་ག་ཏེ མ་ཧཱ་ཝཱི་རོ, གོ་ཏ་མོ ནཱ་མ ཧེ་སྶ་ཏི.
༡༨༥. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
བཱ་ཧི་ཡོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༡༨༦. ‘‘ཏ་དཱ ཧི ཏུ་ཊྛོ ཝུ་ཊྛཱ་ཡ, ཡཱ་ཝ་ཛཱི་ཝཾ མ་ཧཱ་མུ་ནེ;
ཀཱ་རཾ ཀ་ཏྭཱ ཙུ་ཏོ ས་གྒཾ, ཨ་གཾ ས་བྷ་ཝ་ནཾ ཡ་ཐཱ.
༡༨༧. ‘‘དེ་ཝ་བྷཱུ་ཏོ མ་ནུ་སྶོ ཝཱ, སུ་ཁི་ཏོ ཏ་སྶ ཀ་མྨུ་ནོ;
ཝཱ་ཧ་སཱ སཾ་ས་རི་ཏྭཱ་ན, ས་མྤ་ཏྟི་མ་ནུ་བྷོ་མ་ཧཾ.
༡༨༨. ‘‘པུ་ན ཀ་སྶ་པ་ཝཱི་ར་སྶ, ཨ་ཏྠ་མེ་ནྟ་མྷི [ཨ་ཏྠ་ངྒ་ཏ་མྷི (སྱཱ.)] སཱ་ས་ནེ;
ཨཱ་རུ་ཡ྄ཧ སེ་ལ་སི་ཁ་རཾ, ཡུ་ཉྫི་ཏྭཱ ཛི་ན་སཱ་ས་ནཾ.
༡༨༩. ‘‘ཝི་སུ་དྡྷ་སཱི་ལོ ས་པྤ་ཉྙོ, ཛི་ན་སཱ་ས་ན་ཀཱ་ར་ཀོ;
ཏ་ཏོ ཙུ་ཏཱ པ་ཉྩ ཛ་ནཱ, དེ་ཝ་ལོ་ཀཾ ཨ་ག་མྷ་སེ.
༡༩༠. ‘‘ཏ་ཏོ་ཧཾ བཱ་ཧི་ཡོ ཛཱ་ཏོ, བྷཱ་རུ་ཀ་ཙྪེ པུ་རུ་ཏྟ་མེ;
ཏ་ཏོ ནཱ་ཝཱ་ཡ པ་ཀྑ་ནྡོ [པ་ཀྑ་ནྟོ (སཱི.), པ་ཀྐ་ནྟོ (པཱི.)], སཱ་ག་རཾ ཨ་པྤ་སི་དྡྷི་ཡཾ [ཨ་ཏྠ་སི་དྡྷི་ཡཾ (ཀ.)].
༡༩༡. ‘‘ཏ་ཏོ ནཱ་ཝཱ ཨ་བྷི་ཛྫི་ཏྠ, ག་ནྟྭཱ་ན ཀ་ཏི་པཱ་ཧ་ཀཾ;
ཏ་དཱ བྷཱི་ས་ན་ཀེ གྷོ་རེ, པ་ཏི་ཏོ མ་ཀ་རཱ་ཀ་རེ.
༡༩༢. ‘‘ཏ་དཱ་ཧཾ ཝཱ་ཡ་མི་ཏྭཱ་ན, ས་ནྟ་རི་ཏྭཱ མ་ཧོ་ད་དྷིཾ;
སུ་པྤཱ་ད་པ་ཊྚ་ན་ཝ་རཾ [སུ་པྤཱ་ར་པ་ཊྚ་ན་ཝ་རཾ (སཱི. པཱི.)], ས་མྤ་ཏྟོ མ་ནྡ་ཝེ་དྷི་ཏོ [མ་ནྡ་མེ་དྷི་ཀོ (སཱི.), མ་ནྡ་ཝེ་དི་ཏོ (སྱཱ.), མ་དྡ་ཝེ་ར་ཏཾ (ཀ.)].
༡༩༣. ‘‘དཱ་རུ་ཙཱི་རཾ ནི་ཝཱ་སེ་ཏྭཱ, གཱ་མཾ པི་ཎྜཱ་ཡ པཱ་ཝི་སིཾ;
ཏ་དཱ་ཧ སོ ཛ་ནོ ཏུ་ཊྛོ, ཨ་ར་ཧཱ་ཡ་མི་དྷཱ་ག་ཏོ.
༡༩༤. ‘‘ཨི་མཾ ཨ་ནྣེ་ན པཱ་ནེ་ན, ཝ་ཏྠེ་ན ས་ཡ་ནེ་ན ཙ;
བྷེ་ས་ཛྫེ་ན ཙ ས་ཀྐ་ཏྭཱ, ཧེ་སྶཱ་མ སུ་ཁི་ཏཱ མ་ཡཾ.
༡༩༥. ‘‘པ་ཙྩ་ཡཱ་ནཾ ཏ་དཱ ལཱ་བྷཱི, ཏེ་ཧི ས་ཀྐ་ཏ་པཱུ་ཛི་ཏོ;
ཨ་ར་ཧཱ་ཧ་ནྟི ས་ངྐ་པྤཾ, ཨུ་པྤཱ་དེ་སིཾ ཨ་ཡོ་ནི་སོ.
༡༩༦. ‘‘ཏ་ཏོ མེ ཙི་ཏྟ་མ་ཉྙཱ་ཡ, ཙོ་ད་ཡཱི པུ་བྦ་དེ་ཝ་ཏཱ;
‘ན ཏྭཾ ཨུ་པཱ་ཡ་མ་གྒ་ཉྙཱུ, ཀུ་ཏོ ཏྭཾ ཨ་ར་ཧཱ བྷ་ཝེ’.
༡༩༧. ‘‘ཙོ་དི་ཏོ ཏཱ་ཡ སཾ་ཝི་གྒོ, ཏ་དཱ་ཧཾ པ་རི་པུ་ཙྪི ཏཾ;
‘ཀེ ཝཱ ཨེ་ཏེ ཀུ་ཧིཾ ལོ་ཀེ, ཨ་ར་ཧ་ནྟོ ན་རུ་ཏྟ་མཱ.
༡༩༨. ‘‘‘སཱ་ཝ་ཏྠི་ཡཾ ཀོ་ས་ལ་མ་ནྡི་རེ ཛི་ནོ, པ་ཧཱུ་ཏ་པ་ཉྙོ ཝ་ར་བྷཱུ་རི་མེ་དྷ་སོ;
སོ ས་ཀྱ་པུ་ཏྟོ ཨ་ར་ཧཱ ཨ་ནཱ་ས་ཝོ, དེ་སེ་ཏི དྷ་མྨཾ ཨ་ར་ཧ་ཏྟ་པ་ཏྟི་ཡཱ.
༡༩༩. ‘‘‘ཏ་ད་སྶ སུ་ཏྭཱ ཝ་ཙ་ནཾ སུ་པཱི་ཎི་ཏོ [པཱི་ཎི་ཏྭཱ (ཀ.)], ནི་དྷིཾ་ཝ ལ་དྡྷཱ ཀ་པ་ཎོ་ཏི ཝི་མྷི་ཏོ;
ཨུ་ད་གྒ་ཙི་ཏྟོ ཨ་ར་ཧ་ཏྟ་མུ་ཏྟ་མཾ, སུ་ད་སྶ་ནཾ ད་ཊྛུ་མ་ན་ནྟ་གོ་ཙ་རཾ.
༢༠༠. ‘‘‘ཏ་དཱ ཏ་ཏོ ནི་ཀྑ་མི་ཏྭཱ་ན ས་ཏྠུ་ནོ [ནི་ཀྑ་མི་ཏུ་ན ས་ཏྠུ་ཝ་རཾ (སཱི.)], ས་དཱ ཛི་ནཾ པ་སྶཱ་མི ཝི་མ་ལཱ་ན་ནཾ [པ་རཱ་ཛི་ནཾ པ་སྶཱ་མི ཀ་མ་ལཱ་ན་ནཾ (ཀ.)];
ཨུ་པེ་ཙྩ ར་མྨཾ ཝི་ཛི་ཏ་ཝ྄ཧ་ཡཾ ཝ་ནཾ, དི་ཛེ ཨ་པུ་ཙྪིཾ ཀུ་ཧིཾ ལོ་ཀ་ན་ནྡ་ནོ.
༢༠༡. ‘‘‘ཏ་ཏོ ཨ་ཝོ་ཙུཾ ན་ར་དེ་ཝ་ཝ་ནྡི་ཏོ, པུ་རཾ པ་ཝི་ཊྛོ ཨ་ས་ནེ་ས་ནཱ་ཡ སོ;
ས་སོ་ཝ [པ་ཙྩེ་ཧི (སཱི. སྱཱ.)] ཁི་པྤཾ མུ་ནི་ད་སྶ་ནུ་སྶུ་ཀོ, ཨུ་པེ་ཙྩ ཝ་ནྡཱ་ཧི ཏ་མ་གྒ་པུ་གྒ་ལཾ’.
༢༠༢. ‘‘ཏ་ཏོ་ཧཾ ཏུ་ཝ་ཊཾ ག་ནྟྭཱ, སཱ་ཝ་ཏྠིཾ པུ་ར་མུ་ཏྟ་མཾ;
ཝི་ཙ་ར་ནྟཾ ཏ་མ་དྡ་ཀྑིཾ, པི་ཎྜ་ཏྠཾ ཨ་པི་ཧཱ་གི་དྷཾ.
༢༠༣. ‘‘པ་ཏྟ་པཱ་ཎིཾ ཨ་ལོ་ལ་ཀྑཾ, པཱ་ཙ་ཡ་ནྟཾ པཱི་ཏཱ་ཀ་རཾ [བྷཱ་ཛ་ཡ་ནྟཾ ཝི་ཡཱ་མ་ཏཾ (སཱི.), ཛོ་ཏ་ཡ་ནྟཾ ཨི་དྷཱ་མ་ཏཾ (སྱཱ.), བྷཱ་ཛ་ཡ་ནྟཾ ཨི་དཾ་མ་ཏཾ (པཱི.)];
སི་རཱི་ནི་ལ་ཡ་ས་ངྐཱ་སཾ, ར་ཝི་དི་ཏྟི་ཧ་རཱ་ན་ནཾ.
༢༠༤. ‘‘ཏཾ ས་མེ་ཙྩ ནི་པ་ཙྩཱ་ཧཾ, ཨི་དཾ ཝ་ཙ་ན་མ་བྲ་ཝིཾ;
‘ཀུ་པ་ཐེ ཝི་པྤ་ན་ཊྛ་སྶ, ས་ར་ཎཾ ཧོ་ཧི གོ་ཏ་མ.
༢༠༥. ‘‘‘པཱ་ཎ་ས་ནྟཱ་ར་ཎ་ཏྠཱ་ཡ, པི་ཎྜཱ་ཡ ཝི་ཙ་རཱ་མ་ཧཾ;
ན ཏེ དྷ་མྨ་ཀ་ཐཱ་ཀཱ་ལོ, ཨི་ཙྩཱ་ཧ མུ་ནི་ས་ཏྟ་མོ’.
༢༠༦. ‘‘ཏ་དཱ པུ་ན་པྤུ་ནཾ བུ་དྡྷཾ, ཨཱ་ཡཱ་ཙིཾ དྷ་མྨ་ལཱ་ལ་སོ;
ཡོ མེ དྷ་མྨ་མ་དེ་སེ་སི, ག་མྦྷཱི་རཾ སུ་ཉྙ་ཏཾ པ་དཾ.
༢༠༧. ‘‘ཏ་སྶ དྷ་མྨཾ སུ་ཎི་ཏྭཱ་ན, པཱ་པུ་ཎིཾ ཨཱ་ས་ཝ་ཀྑ་ཡཾ;
པ་རི་ཀྑཱི་ཎཱ་ཡུ་ཀོ ས་ནྟོ, ཨ་ཧོ ས་ཏྠཱ་ནུ་ཀ་མྤ་ཀོ.
༢༠༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༠༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༡༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ.
༢༡༡. ‘‘ཨེ་ཝཾ ཐེ་རོ ཝི་ཡཱ་ཀཱ་སི, བཱ་ཧི་ཡོ དཱ་རུ་ཙཱི་རི་ཡོ;
ས་ངྐཱ་ར་ཀཱུ་ཊེ པ་ཏི་ཏོ, བྷཱུ་ཏཱ་ཝི་ཊྛཱ་ཡ གཱ་ཝི་ཡཱ.
༢༡༢. ‘‘ཨ་ཏྟ་ནོ པུ་བྦ་ཙ་རི་ཡཾ, ཀི་ཏྟ་ཡི་ཏྭཱ མ་ཧཱ་མ་ཏི;
པ་རི་ནི་བྦཱ་ཡི སོ ཐེ་རོ [ཝཱི་རོ (སཱི.), དྷཱི་རོ (སྱཱ.)], སཱ་ཝ་ཏྠི་ཡཾ པུ་རུ་ཏྟ་མེ.
༢༡༣. ‘‘ན་ག་རཱ ནི་ཀྑ་མ་ནྟོ ཏཾ, དི་སྭཱ་ན ཨི་སི་ས་ཏྟ་མོ;
དཱ་རུ་ཙཱི་ར་དྷ་རཾ དྷཱི་རཾ, བཱ་ཧི་ཡཾ བཱ་ཧི་ཏཱ་ག་མཾ.
༢༡༤. ‘‘བྷཱུ་མི་ཡཾ པ་ཏི་ཏཾ ད་ནྟཾ, ཨི་ནྡ་ཀེ་ཏཱུ་ཝ པཱ་ཏི་ཏཾ;
ག་ཏཱ་ཡུཾ སུ་ཀྑ་ཀི་ལེ་སཾ [ག་ཏཱ་ཡུ སཾ་ག་ཏ་ཀླེ་སཾ (སཱི. པཱི.), ཏ་དཱ་ཡུ ས་ངྐ་ཏཱ་ལེ་སཾ (ཀ.)], ཛི་ན་སཱ་ས་ན་ཀཱ་ར་ཀཾ.
༢༡༥. ‘‘ཏ་ཏོ ཨཱ་མ་ནྟ་ཡཱི ས་ཏྠཱ, སཱ་ཝ་ཀེ སཱ་ས་ནེ ར་ཏེ;
‘ག་ཎྷ་ཐ ནེ་ཏྭཱ [ཧུ་ཏྭཱ (སྱཱ. པཱི. ཀ.)] ཛྷཱ་པེ་ཐ, ཏ་ནུཾ ས་བྲ་ཧྨ་ཙཱ་རི་ནོ.
༢༡༦. ‘‘‘ཐཱུ་པཾ ཀ་རོ་ཐ པཱུ་ཛེ་ཐ, ནི་བྦུ་ཏོ སོ མ་ཧཱ་མ་ཏི;
ཁི་པྤཱ་བྷི་ཉྙཱ་ན་མེ་ས་གྒོ, སཱ་ཝ་ཀོ མེ ཝ་ཙོ་ཀ་རོ.
༢༡༧. ‘‘‘ས་ཧ་སྶ་མ་པི ཙེ གཱ་ཐཱ, ཨ་ན་ཏྠ་པ་ད་ས་ཉྷི་ཏཱ;
ཨེ་ཀཾ གཱ་ཐཱ་པ་དཾ སེ་ཡྻོ, ཡཾ སུ་ཏྭཱ ཨུ་པ་ས་མྨ་ཏི.
༢༡༨. ‘‘‘ཡ་ཏྠ ཨཱ་པོ ཙ པ་ཐ་ཝཱི, ཏེ་ཛོ ཝཱ་ཡོ ན གཱ་དྷ་ཏི;
ན ཏ་ཏྠ སུ་ཀྐཱ ཛོ་ཏ་ནྟི, ཨཱ་དི་ཙྩོ ན པ་ཀཱ་ས་ཏི.
༢༡༩. ‘‘‘ན ཏ་ཏྠ ཙ་ནྡི་མཱ བྷཱ་ཏི, ཏ་མོ ཏ་ཏྠ ན ཝི་ཛྫ་ཏི;
ཡ་དཱ ཙ ཨ་ཏྟ་ནཱ ཝེ་དི, མུ་ནི་མོ་ནེ་ན བྲཱ་ཧྨ་ཎོ.
༢༢༠. ‘‘‘ཨ་ཐ རཱུ་པཱ ཨ་རཱུ་པཱ ཙ, སུ་ཁ་དུ་ཀྑཱ ཝི་མུ་ཙྩ་ཏི’;
ཨི་ཙྩེ་ཝཾ ཨ་བྷ་ཎཱི ནཱ་ཐོ, ཏི་ལོ་ཀ་ས་ར་ཎོ མུ་ནི’’.
ཨི་ཏྠཾ སུ་དཾ ཨཱ་ཡ་སྨཱ བཱ་ཧི་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
བཱ་ཧི་ཡ་ཏྠེ་ར་སྶཱ་པ་དཱ་ནཾ ཚ་ཊྛཾ.