༥. ཀུ་མཱ་ར་ཀ་སྶ་པ་ཏྠེ་ར་ཨ་པ་དཱ་ནཾ
༡༥༠. ‘‘ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ;
ས་བྦ་ལོ་ཀ་ཧི་ཏོ ཝཱི་རོ, པ་དུ་མུ་ཏྟ་ར་ནཱ་མ་ཀོ.
༡༥༡. ‘‘ཏ་དཱ་ཧཾ བྲཱ་ཧྨ་ཎོ ཧུ་ཏྭཱ, ཝི་སྶུ་ཏོ ཝེ་ད་པཱ་ར་གཱུ;
དི་ཝཱ་ཝི་ཧཱ་རཾ ཝི་ཙ་རཾ, ཨ་དྡ་སཾ ལོ་ཀ་ནཱ་ཡ་ཀཾ.
༡༥༢. ‘‘ཙ་ཏུ་ས་ཙྩཾ པ་ཀཱ་སེ་ནྟཾ, བོ་དྷ་ཡ་ནྟཾ ས་དེ་ཝ་ཀཾ;
ཝི་ཙི་ཏྟ་ཀ་ཐི་ཀཱ་ན་གྒཾ, ཝ་ཎྞ་ཡ་ནྟཾ མ་ཧཱ་ཛ་ནེ.
༡༥༣. ‘‘ཏ་དཱ མུ་དི་ཏ་ཙི་ཏྟོ་ཧཾ, ནི་མ་ནྟེ་ཏྭཱ ཏ་ཐཱ་ག་ཏཾ;
ནཱ་ནཱ་ར་ཏྟེ་ཧི ཝ་ཏྠེ་ཧི, ཨ་ལ་ངྐ་རི་ཏྭཱ་ན མ་ཎྜ་པཾ.
༡༥༤. ‘‘ནཱ་ནཱ་ར་ཏ་ན་པ་ཛྫོ་ཏཾ, ས་ས་ངྒྷཾ བྷོ་ཛ་ཡིཾ ཏ་ཧིཾ;
བྷོ་ཛ་ཡི་ཏྭཱ་ན ས་ཏྟཱ་ཧཾ, ནཱ་ན་གྒ་ར་ས་བྷོ་ཛ་ནཾ.
༡༥༥. ‘‘ནཱ་ནཱ་ཙི་ཏྟེ་ཧི [ནཱ་ནཱ་ཝ་ཎྞེ་ཧི (སཱི.)] པུ་པྥེ་ཧི, པཱུ་ཛ་ཡི་ཏྭཱ ས་སཱ་ཝ་ཀཾ [མ་ཧཱ་ཝཱི་རཾ (ཀ.)];
ནི་པ་ཙྩ པཱ་ད་མཱུ་ལ་མྷི, ཏཾ ཋཱ་ནཾ པ་ཏྠ་ཡིཾ ཨ་ཧཾ.
༡༥༦. ‘‘ཏ་དཱ མུ་ནི་ཝ་རོ ཨཱ་ཧ, ཀ་རུ་ཎེ་ཀ་ར་སཱ་ས་ཡོ [ཀ་རུ་ཎོ ཀ་རུ་ཎཱ་ལ་ཡོ (སྱཱ.)];
‘པ་སྶ་ཐེ་ཏཾ དི་ཛ་ཝ་རཾ, པ་དུ་མཱ་ན་ན་ལོ་ཙ་ནཾ.
༡༥༧. ‘‘‘པཱི་ཏི་པཱ་མོ་ཛྫ་བ་ཧུ་ལཾ, ས་མུ་གྒ་ཏ་ཏ་ནཱུ་རུ་ཧཾ;
ཧཱ་ས་མྷི་ཏ་ཝི་སཱ་ལ་ཀྑཾ, མ་མ སཱ་ས་ན་ལཱ་ལ་སཾ.
༡༥༨. ‘‘‘པ་ཏི་ཏཾ པཱ་ད་མཱུ་ལེ མེ, ཨེ་ཀཱ་ཝ་ཏྠ་སུ་མཱ་ན་སཾ [ཨེ་ཀ་ཝ་ཏྠཾ སུ་མཱ་ན་སཾ (སྱཱ. ཀ.)];
ཨེ་ས པ་ཏྠེ་ཏི ཏཾ ཋཱ་ནཾ, ཝི་ཙི་ཏྟ་ཀ་ཐི་ཀ་ཏྟ་ནཾ [ཝི་ཙི་ཏྟ་ཀ་ཐི་ཀ་ཏྟ་དཾ (སཱི. པཱི.)].
༡༥༩. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༦༠. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཀུ་མཱ་ར་ཀ་སྶ་པོ ནཱ་མ, ཧེ་སྶ་ཏི ས་ཏྠུ སཱ་ཝ་ཀོ.
༡༦༡. ‘‘‘ཝི་ཙི་ཏྟ་པུ་པྥ་དུ་སྶཱ་ནཾ, ར་ཏ་ནཱ་ན་ཉྩ ཝཱ་ཧ་སཱ;
ཝི་ཙི་ཏྟ་ཀ་ཐི་ཀཱ་ནཾ སོ, ཨ་གྒ་ཏཾ པཱ་པུ་ཎི་སྶ་ཏི’.
༡༦༢. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༦༣. ‘‘པ་རི་བྦྷ་མཾ བྷ་ཝཱ་བྷ་ཝེ [བྷ་ཝཱ་ཀཱ་སེ (སཱི. པཱི.)], ར་ངྒ་མ་ཛ྄ཛྷེ ཡ་ཐཱ ན་ཊོ;
སཱ་ཁ་མི་ག་ཏྲ་ཛོ ཧུ་ཏྭཱ, མི་གི་ཡཱ ཀུ་ཙྪི་མོ་ཀྐ་མིཾ.
༡༦༤. ‘‘ཏ་དཱ མ་ཡི ཀུ་ཙྪི་ག་ཏེ, ཝ་ཛ྄ཛྷ་ཝཱ་རོ ཨུ་པ་ཊྛི་ཏོ;
སཱ་ཁེ་ན ཙ་ཏྟཱ མེ མཱ་ཏཱ, ནི་གྲོ་དྷཾ ས་ར་ཎཾ ག་ཏཱ.
༡༦༥. ‘‘ཏེ་ན སཱ མི་ག་རཱ་ཛེ་ན, མ་ར་ཎཱ པ་རི་མོ་ཙི་ཏཱ;
པ་རི་ཙྩ་ཛི་ཏྭཱ ས་པཱ་ཎཾ [སཾ་པཱ་ཎཾ (སཱི. པཱི.)], མ་མེ་ཝཾ ཨོ་ཝ་དཱི ཏ་དཱ.
༡༦༦. ‘‘‘ནི་གྲོ་དྷ་མེ་ཝ སེ་ཝེ་ཡྻ, ན སཱ་ཁ་མུ་པ་སཾ་ཝ་སེ;
ནི་གྲོ་དྷ་སྨིཾ མ་ཏཾ སེ་ཡྻོ, ཡ་ཉྩེ སཱ་ཁ་མྷི ཛཱི་ཝི་ཏཾ’.
༡༦༧. ‘‘ཏེ་ནཱ་ནུ་སི་ཊྛཱ མི་ག་ཡཱུ་ཐ་པེ་ན, ཨ་ཧ་ཉྩ མཱ་ཏཱ ཙ ཏ་ཐེ་ཏ་རེ ཙ [ཙི་ཏ་རེ ཙ (སྱཱ.), ཏ་སྶོ་ཝཱ་དེ་ན (པཱི.), ཙི་ཏ་རེ ཙ ཏ་སྶོ་ཝཱ་དཾ (ཀ.)];
ཨཱ་ག་མྨ ར་མྨཾ ཏུ་སི་ཏཱ་དྷི་ཝཱ་སཾ, ག་ཏཱ པ་ཝཱ་སཾ ས་གྷ་རཾ ཡ་ཐེ་ཝ.
༡༦༨. ‘‘པུ་ནོ ཀ་སྶ་པ་ཝཱི་ར་སྶ, ཨ་ཏྠ་མེ་ནྟ་མྷི སཱ་ས་ནེ;
ཨཱ་རུ་ཡ྄ཧ སེ་ལ་སི་ཁ་རཾ, ཡུ་ཉྫི་ཏྭཱ ཛི་ན་སཱ་ས་ནཾ.
༡༦༩. ‘‘ཨི་དཱ་ནཱ་ཧཾ རཱ་ཛ་ག་ཧེ, ཛཱ་ཏོ སེ་ཊྛི་ཀུ་ལེ ཨ་ཧུཾ;
ཨཱ་པ་ནྣ་ས་ཏྟཱ མེ མཱ་ཏཱ, པ་བྦ་ཛི ཨ་ན་གཱ་རི་ཡཾ.
༡༧༠. ‘‘ས་ག་བྦྷཾ ཏཾ ཝི་དི་ཏྭཱ་ན, དེ་ཝ་ད་ཏྟ་མུ་པཱ་ན་ཡུཾ;
སོ ཨ་ཝོ་ཙ ‘ཝི་ནཱ་སེ་ཐ, པཱ་པི་ཀཾ བྷི་ཀྑུ་ནིཾ ཨི་མཾ’.
༡༧༡. ‘‘ཨི་དཱ་ནི་པི མུ་ནི་ནྡེ་ན, ཛི་ནེ་ན ཨ་ནུ་ཀ་མྤི་ཏཱ;
སུ་ཁི་ནཱི ཨ་ཛ་ནཱི མ་ཡ྄ཧཾ, མཱ་ཏཱ བྷི་ཀྑུ་ནུ་པ་སྶ་ཡེ.
༡༧༢. ‘‘ཏཾ ཝི་དི་ཏྭཱ མ་ཧཱི་པཱ་ལོ, ཀོ་ས་ལོ མཾ ཨ་པོ་ས་ཡི;
ཀུ་མཱ་ར་པ་རི་ཧཱ་རེ་ན, ནཱ་མེ་ནཱ་ཧ་ཉྩ ཀ་སྶ་པོ.
༡༧༣. ‘‘མ་ཧཱ་ཀ་སྶ་པ་མཱ་ག་མྨ, ཨ་ཧཾ ཀུ་མཱ་ར་ཀ་སྶ་པོ;
ཝ་མྨི་ཀ་ས་དི་སཾ ཀཱ་ཡཾ, སུ་ཏྭཱ བུ་དྡྷེ་ན དེ་སི་ཏཾ.
༡༧༤. ‘‘ཏ་ཏོ ཙི་ཏྟཾ ཝི་མུ་ཙྩི མེ, ཨ་ནུ་པཱ་དཱ་ཡ ས་བྦ་སོ;
པཱ་ཡཱ་སིཾ ད་མ་ཡི་ཏྭཱ་ཧཾ, ཨེ་ཏ་ད་གྒ་མ་པཱ་པུ་ཎིཾ.
༡༧༥. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༧༦. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༧༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀུ་མཱ་ར་ཀ་སྶ་པོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཀུ་མཱ་ར་ཀ་སྶ་པ་ཏྠེ་ར་སྶཱ་པ་དཱ་ནཾ པ་ཉྩ་མཾ.
ཙ་ཏུ་ཝཱི་ས་ཏི་མཾ བྷཱ་ཎ་ཝཱ་རཾ.