༢. ཝ་ཀྐ་ལི་ཏྠེ་ར་ཨ་པ་དཱ་ནཾ
༢༨. ‘‘ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ;
ཨ་ནོ་མ་ནཱ་མོ ཨ་མི་ཏོ, ནཱ་མེ་ན པ་དུ་མུ་ཏྟ་རོ.
༢༩. ‘‘པ་དུ་མཱ་ཀཱ་ར་ཝ་ད་ནོ, པ་དུ་མཱ་མ་ལ་སུ་ཙྪ་ཝཱི;
ལོ་ཀེ་ནཱ་ནུ་པ་ལི་ཏྟོ་ཝ ཏོ་ཡེ་ན པ་དུ་མཾ ཡ་ཐཱ.
༣༠. ‘‘ཝཱི་རོ པ་དུ་མ་པ་ཏྟ་ཀྑོ, ཀ་ནྟོ ཙ པ་དུ་མཾ ཡ་ཐཱ;
པ་དུ་མུ་ཏྟ་ར་ག་ནྡྷོ་ཝ, ཏ་སྨཱ སོ པ་དུ་མུ་ཏྟ་རོ.
༣༡. ‘‘ལོ་ཀ་ཛེ་ཊྛོ ཙ ནི་མྨཱ་ནོ, ཨ་ནྡྷཱ་ནཾ ན་ཡ་ནཱུ་པ་མོ;
ས་ནྟ་ཝེ་སོ གུ་ཎ་ནི་དྷི, ཀ་རུ་ཎཱ་མ་ཏི་སཱ་ག་རོ.
༣༢. ‘‘ས ཀ་དཱ་ཙི མ་ཧཱ་ཝཱི་རོ, བྲ་ཧྨཱ་སུ་ར་སུ་ར་ཙྩི་ཏོ;
ས་དེ་ཝ་མ་ནུ་ཛཱ་ཀི་ཎྞེ, ཛ་ན་མ་ཛ྄ཛྷེ ཛི་ནུ་ཏྟ་མོ [ཛ་ནུ་ཏྟ་མོ (སྱཱ. པཱི.), ཨ་ནུ་ཏྟ་མོ (ཀ.) ཝ་ངྒཱི་ས་ཏྠེ་རཱ་པ་དཱ་ནེ་པི].
༣༣. ‘‘ཝ་ད་ནེ་ན སུ་ག་ནྡྷེ་ན, མ་དྷུ་རེ་ན རུ་ཏེ་ན ཙ;
ར་ཉྫ་ཡཾ པ་རི་སཾ ས་བྦཾ, ས་ནྠ་ཝཱི སཱ་ཝ་ཀཾ ས་ཀཾ.
༣༤. ‘‘ས་དྡྷཱ་དྷི་མུ་ཏྟོ སུ་མ་ཏི, མ་མ ད་སྶ་ན་ལཱ་ལ་སོ [ད་སྶ་ན་སཱ་ལ་ཡོ (སྱཱ.)];
ན་ཏྠི ཨེ་ཏཱ་དི་སོ ཨ་ཉྙོ, ཡ་ཐཱ་ཡཾ བྷི་ཀྑུ ཝ་ཀྐ་ལི.
༣༥. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ན་ག་རེ བྲཱ་ཧྨ་ཎ་ཏྲ་ཛོ;
ཧུ་ཏྭཱ སུ་ཏྭཱ ཙ ཏཾ ཝཱ་ཀྱཾ, ཏཾ ཋཱ་ན་མ་བྷི་རོ་ཙ་ཡིཾ.
༣༦. ‘‘ས་སཱ་ཝ་ཀཾ ཏཾ ཝི་མ་ལཾ, ནི་མ་ནྟེ་ཏྭཱ ཏ་ཐཱ་ག་ཏཾ;
ས་ཏྟཱ་ཧཾ བྷོ་ཛ་ཡི་ཏྭཱ་ན, དུ་སྶེ་ཧ་ཙྪཱ་ད་ཡིཾ ཏ་དཱ.
༣༧. ‘‘ནི་པ་ཙྩ སི་ར་སཱ ཏ་སྶ, ཨ་ན་ནྟ་གུ་ཎ་སཱ་ག་རེ;
ནི་མུ་གྒོ པཱི་ཏི་ས་མྤུ་ཎྞོ, ཨི་དཾ ཝ་ཙ་ན་མ་བྲ་ཝིཾ.
༣༨. ‘‘‘ཡོ སོ ཏ་ཡཱ ས་ནྠ་ཝི་ཏོ, ཨི་ཏོ ས་ཏྟ་མ་ཀེ མུ་ནི [ཨི་དྷ ས་དྡྷཱ་དྷི་མུ་ཏྟོ ཨི་སི (སྱཱ.), ཨི་ཏོ ས་ཏྟ་མ་ཀེ་ཧ་ནི (སཱི. པཱི.)];
བྷི་ཀྑུ ས་དྡྷཱ་ཝ་ཏཾ ཨ་གྒོ, ཏཱ་དི་སོ ཧོ་མ་ཧཾ མུ་ནེ’.
༣༩. ‘‘ཨེ་ཝཾ ཝུ་ཏྟེ མ་ཧཱ་ཝཱི་རོ, ཨ་ནཱ་ཝ་ར་ཎ་ད་སྶ་ནོ;
ཨི་མཾ ཝཱ་ཀྱཾ ཨུ་དཱི་རེ་སི, པ་རི་སཱ་ཡ མ་ཧཱ་མུ་ནི.
༤༠. ‘‘‘པ་སྶ་ཐེ་ཏཾ མཱ་ཎ་ཝ་ཀཾ, པཱི་ཏ་མ་ཊྛ་ནི་ཝཱ་ས་ནཾ;
ཧེ་མ་ཡ་ཉྙོ་པ་ཙི་ཏ་ངྒཾ [ཧེ་མ་ཡ་ཉྙོ་པ་ཝཱི་ཏ་ངྒཾ (སཱི.)], ཛ་ན་ནེ་ཏྟ་མ་ནོ་ཧ་རཾ.
༤༡. ‘‘‘ཨེ་སོ ཨ་ནཱ་ག་ཏ་དྡྷཱ་ནེ, གོ་ཏ་མ་སྶ མ་ཧེ་སི་ནོ;
ཨ་གྒོ ས་དྡྷཱ་དྷི་མུ་ཏྟཱ་ནཾ, སཱ་ཝ་ཀོ་ཡཾ བྷ་ཝི་སྶ་ཏི.
༤༢. ‘‘‘དེ་ཝ་བྷཱུ་ཏོ མ་ནུ་སྶོ ཝཱ, ས་བྦ་ས་ནྟཱ་པ་ཝ་ཛྫི་ཏོ;
ས་བྦ་བྷོ་ག་པ་རི་བྱཱུ་ལ༹ྷོ, སུ་ཁི་ཏོ སཾ་ས་རི་སྶ་ཏི.
༤༣. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༤༤. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཝ་ཀྐ་ལི ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༤༥. ‘‘ཏེ་ན ཀ་མྨ་ཝི་སེ་སེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༤༦. ‘‘ས་བྦ་ཏྠ སུ་ཁི་ཏོ ཧུ་ཏྭཱ, སཾ་ས་ར་ནྟོ བྷ་ཝཱ་བྷ་ཝེ;
སཱ་ཝ་ཏྠི་ཡཾ པུ་རེ ཛཱ་ཏོ, ཀུ་ལེ ཨ་ཉྙ་ཏ་རེ ཨ་ཧཾ.
༤༧. ‘‘ནོ་ནཱི་ཏ་སུ་ཁུ་མཱ་ལཾ མཾ, ཛཱ་ཏ་པ་ལླ་ཝ་ཀོ་མ་ལཾ;
མ་ནྡཾ ཨུ་ཏྟཱ་ན་ས་ཡ་ནཾ, པི་སཱ་ཙ་བྷ་ཡ་ཏ་ཛྫི་ཏཱ.
༤༨. ‘‘པཱ་ད་མཱུ་ལེ མ་ཧེ་སི་སྶ, སཱ་ཡེ་སུཾ དཱི་ན་མཱ་ན་སཱ;
ཨི་མཾ ད་དཱ་མ ཏེ ནཱ་ཐ, ས་ར་ཎཾ ཧོ་ཧི ནཱ་ཡ་ཀ.
༤༩. ‘‘ཏ་དཱ པ་ཊི་གྒ་ཧི སོ མཾ, བྷཱི་ཏཱ་ནཾ ས་ར་ཎོ མུ་ནི;
ཛཱ་ལི་ནཱ ཙ་ཀྐ་ངྐི་ཏེ་ན [ས་ངྐ་ལ་ངྐེ་ན (སཱི.)], མུ་དུ་ཀོ་མ་ལ་པཱ་ཎི་ནཱ.
༥༠. ‘‘ཏ་དཱ པ་བྷུ་ཏི ཏེ་ནཱ་ཧཾ, ཨ་ར་ཀྑེ་ཡྻེ་ན ར་ཀྑི་ཏོ;
ས་བྦ་ཝེ་ར་ཝི་ནི་མུ་ཏྟོ [ས་བྦ་བྱཱ་དྷི་ཝི་ནི་མུ་ཏྟོ (སྱཱ.), ས་བྦཱུ་པ་དྷི་ཝི་ནི་མུ་ཏྟོ (པཱི.)], སུ་ཁེ་ན པ་རི་ཝུ་དྡྷི་ཏོ.
༥༡. ‘‘སུ་ག་ཏེ་ན ཝི་ནཱ བྷཱུ་ཏོ, ཨུ་ཀྐ་ཎྛཱ་མི མུ་ཧུ་ཏྟ་ཀཾ;
ཛཱ་ཏི་ཡཱ ས་ཏྟ་ཝ་སྶོ་ཧཾ, པ་བྦ་ཛིཾ ཨ་ན་གཱ་རི་ཡཾ.
༥༢. ‘‘ས་བྦ་པཱ་ར་མི་ས་མྦྷཱུ་ཏཾ, ནཱི་ལ་ཀྑི་ན་ཡ་ནཾ [ལ་ངྐི་ནཱི་ལ་ཡ་ནཾ (སཱི.)] ཝ་རཾ;
རཱུ་པཾ ས་བྦ་སུ་བྷཱ་ཀི་ཎྞཾ, ཨ་ཏི་ཏྟོ ཝི་ཧ་རཱ་མ་ཧཾ [ཝི་ཧ་ཡཱ་མ་ཧཾ (སཱི. པཱི.)].
༥༣. ‘‘བུ་དྡྷ་རཱུ་པ་ར་ཏིཾ [བུ་དྡྷོ རཱུ་པ་ར་ཏིཾ (སཱི.)] ཉ་ཏྭཱ, ཏ་དཱ ཨོ་ཝ་དི མཾ ཛི་ནོ;
‘ཨ་ལཾ ཝ་ཀྐ་ལི ཀིཾ རཱུ་པེ, ར་མ་སེ བཱ་ལ་ན་ནྡི་ཏེ.
༥༤. ‘‘‘ཡོ ཧི པ་སྶ་ཏི ས་དྡྷ་མྨཾ, སོ མཾ པ་སྶ་ཏི པ་ཎྜི་ཏོ;
ཨ་པ་སྶ་མཱ་ནོ ས་དྡྷ་མྨཾ, མཾ པ་སྶ་མྤི ན པ་སྶ་ཏི.
༥༥. ‘‘‘ཨ་ན་ནྟཱ་དཱི་ན་ཝོ ཀཱ་ཡོ, ཝི་ས་རུ་ཀྑ་ས་མཱུ་པ་མོ;
ཨཱ་ཝཱ་སོ ས་བྦ་རོ་གཱ་ནཾ, པུ་ཉྫོ དུ་ཀྑ་སྶ ཀེ་ཝ་ལོ.
༥༦. ‘‘‘ནི་བྦི་ནྡི་ཡ ཏ་ཏོ རཱུ་པེ, ཁ་ནྡྷཱ་ནཾ ཨུ་ད་ཡ་བྦ་ཡཾ;
པ་སྶ ཨུ་པ་ཀྐི་ལེ་སཱ་ནཾ, སུ་ཁེ་ན་ནྟཾ ག་མི་སྶ་ཏི’.
༥༧. ‘‘ཨེ་ཝཾ ཏེ་ནཱ་ནུ་སི་ཊྛོ་ཧཾ, ནཱ་ཡ་ཀེ་ན ཧི་ཏེ་སི་ནཱ;
གི་ཛ྄ཛྷ་ཀཱུ་ཊཾ ས་མཱ་རུ་ཡ྄ཧ, ཛྷཱ་ཡཱ་མི གི་རི་ཀ་ནྡ་རེ.
༥༨. ‘‘ཋི་ཏོ པ་བྦ་ཏ་པཱ་ད་མྷི, ཨ་སྶཱ་ས་ཡི [མ་མཱ་ཧ་སོ (སཱི.)] མ་ཧཱ་མུ་ནི;
ཝ་ཀྐ་ལཱི་ཏི ཛི་ནོ ཝཱ་ཙཾ, ཏཾ སུ་ཏྭཱ མུ་དི་ཏོ ཨ་ཧཾ.
༥༩. ‘‘པ་ཀྑ་ནྡིཾ སེ་ལ་པ་བྦྷཱ་རེ, ཨ་ནེ་ཀ་ས་ཏ་པོ་རི་སེ;
ཏ་དཱ བུ་དྡྷཱ་ནུ་བྷཱ་ཝེ་ན, སུ་ཁེ་ནེ་ཝ མ་ཧིཾ ག་ཏོ.
༦༠. ‘‘པུ་ནོ་པི [པུ་ནཱ་པི (སྱཱ.), མུ་ནི མཾ (ཀ.)] དྷ་མྨཾ དེ་སེ་ཏི, ཁ་ནྡྷཱ་ནཾ ཨུ་ད་ཡ་བྦ་ཡཾ;
ཏ་མ་ཧཾ དྷ་མྨ་མ་ཉྙཱ་ཡ, ཨ་ར་ཧ་ཏྟ་མ་པཱ་པུ་ཎིཾ.
༦༡. ‘‘སུ་མ་ཧཱ་པ་རི་ས་མ་ཛ྄ཛྷེ, ཏ་དཱ མཾ ཙ་ར་ཎ་ནྟ་གོ;
ཨ་གྒཾ ས་དྡྷཱ་དྷི་མུ་ཏྟཱ་ནཾ, པ་ཉྙ་པེ་སི མ་ཧཱ་མ་ཏི.
༦༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༦༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༦༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༦༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ཀྐ་ལི་ཏྠེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཝ་ཀྐ་ལི་ཏྠེ་ར་སྶཱ་པ་དཱ་ནཾ དུ་ཏི་ཡཾ.