༨. བོ་དྷི་ས་མྨ་ཛྫ་ཀ་ཏྠེ་ར་ཨ་པ་དཱ་ནཾ
༤༨. ‘‘ཨ་ཧཾ པུ་རེ བོ་དྷི་པ་ཏྟཾ, ཨུ་ཛ྄ཛྷི་ཏཾ ཙེ་ཏི་ཡ་ངྒ་ཎེ;
ཏཾ ག་ཧེ་ཏྭཱ་ན ཚ་ཌྜེ་སིཾ, ཨ་ལ་བྷིཾ ཝཱི་ས་ཏཱི་གུ་ཎེ.
༤༩. ‘‘ཏ་སྶ ཀ་མྨ་སྶ ཏེ་ཛེ་ན, སཾ་ས་ར་ནྟོ བྷ་ཝཱ་བྷ་ཝེ;
དུ་ཝེ བྷ་ཝེ སཾ་ས་རཱ་མི, དེ་ཝ་ཏྟེ ཙཱ་པི མཱ་ནུ་སེ.
༥༠. ‘‘དེ་ཝ་ལོ་ཀཱ ཙ་ཝི་ཏྭཱ་ན, ཨཱ་ག་ནྟྭཱ མཱ་ནུ་སཾ བྷ་ཝཾ;
དུ་ཝེ ཀུ་ལེ པ་ཛཱ་ཡཱ་མི, ཁ་ཏྟི་ཡེ ཙཱ་པི བྲཱ་ཧྨ་ཎེ.
༥༡. ‘‘ཨ་ངྒ་པ་ཙྩ་ངྒ་ས་མྤ་ནྣོ, ཨཱ་རོ་ཧ་པ་རི་ཎཱ་ཧ་ཝཱ;
ཨ་བྷི་རཱུ་པོ སུ་ཙི ཧོ་མི, ས་མྤུ་ཎྞ་ངྒོ ཨ་ནཱུ་ན་ཀོ.
༥༢. ‘‘དེ་ཝ་ལོ་ཀེ མ་ནུ་སྶེ ཝཱ, ཛཱ་ཏོ ཝཱ ཡ་ཏྠ ཀ་ཏྠ་ཙི;
བྷ་ཝེ སུ་ཝ་ཎྞ་ཝ་ཎྞོ ཙ, ཨུ་ཏྟ་ཏྟ་ཀ་ན་ཀཱུ་པ་མོ.
༥༣. ‘‘མུ་དུ་ཀཱ མ་དྡ་ཝཱ སྣི་དྡྷཱ [མུ་དུ མ་དྡ་ཝཱ སི་ནི་དྡྷཱ (སྱཱ.)], སུ་ཁུ་མཱ སུ་ཀུ་མཱ་རི་ཀཱ;
ཚ་ཝི མེ ས་བྦ་དཱ ཧོ་ཏི, བོ་དྷི་པ་ཏྟེ སུ་ཚ་ཌྜི་ཏེ [སུ་ཚ་ཌྜི་ནེ (སཱི.)].
༥༤. ‘‘ཡ་ཏོ ཀུ་ཏོ་ཙི ག་ཏཱི་སུ, ས་རཱི་རེ ས་མུ་དཱ་ག་ཏེ;
ན ལི་མྤ་ཏི ར་ཛོ་ཛ་ལླཾ, ཝི་པཱ་ཀོ པ་ཏྟ་ཚ་ཌྜི་ཏེ.
༥༥. ‘‘ཨུ་ཎྷེ ཝཱ་ཏཱ་ཏ་པེ ཏ་སྶ, ཨ་གྒི་ཏཱ་པེ་ན ཝཱ པ་ན;
ག་ཏྟེ སེ་དཱ ན མུ་ཙྩ་ནྟི, ཝི་པཱ་ཀོ པ་ཏྟ་ཚ་ཌྜི་ཏེ.
༥༦. ‘‘ཀུ་ཊྛཾ ག་ཎྜོ ཀི་ལཱ་སོ ཙ, ཏི་ལ་ཀཱ པི་ལ༹་ཀཱ ཏ་ཐཱ;
ན ཧོ་ནྟི ཀཱ་ཡེ ད་དྡུ ཙ, ཝི་པཱ་ཀོ པ་ཏྟ་ཚ་ཌྜི་ཏེ.
༥༧. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
རོ་གཱ ན ཧོ་ནྟི ཀཱ་ཡ་སྨིཾ, ཝི་པཱ་ཀོ པ་ཏྟ་ཚ་ཌྜི་ཏེ.
༥༨. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
ན ཧོ་ཏི ཙི་ཏྟ་ཛཱ པཱི་ལཱ༹, ཝི་པཱ་ཀོ པ་ཏྟ་ཚ་ཌྜི་ཏེ.
༥༩. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
ཨ་མི་ཏྟཱ ན བྷ་ཝ་ནྟ་སྶ, ཝི་པཱ་ཀོ པ་ཏྟ་ཚ་ཌྜི་ཏེ.
༦༠. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
ཨ་ནཱུ་ན་བྷོ་གོ བྷ་ཝ་ཏི, ཝི་པཱ་ཀོ པ་ཏྟ་ཚ་ཌྜི་ཏེ.
༦༡. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
ཨ་གྒི་རཱ་ཛཱུ་ཧི ཙོ་རེ་ཧི, ན ཧོ་ཏི ཨུ་ད་ཀེ བྷ་ཡཾ.
༦༢. ‘‘ཨ་པ་ར་མྤི གུ་ཎཾ ཏ་སྶ, ནི་བྦ་ཏྟ་ཏི བྷ་ཝཱ་བྷ་ཝེ;
དཱ་སི་དཱ་སཱ ཨ་ནུ་ཙ་རཱ, ཧོ་ནྟི ཙི་ཏྟཱ་ནུ་ཝ་ཏྟ་ཀཱ.
༦༣. ‘‘ཡ་མྷི ཨཱ་ཡུ་པྤ་མཱ་ཎ་མྷི, ཛཱ་ཡ་ཏེ མཱ་ནུ་སེ བྷ་ཝེ;
ཏ་ཏོ ན ཧཱ་ཡ་ཏེ ཨཱ་ཡུ, ཏི་ཊྛ་ཏེ ཡཱ་ཝ་ཏཱ་ཡུ་ཀཾ.
༦༤. ‘‘ཨ་བྦྷ་ནྟ་རཱ ཙ བཱ་ཧི་རཱ [བ་ཧི་ཙ་རཱ (སཱི. པཱི. ཀ.)], ནེ་ག་མཱ ཙ ས་ར་ཊྛ་ཀཱ;
ནུ་ཡུ་ཏྟཱ ཧོ་ནྟི ས་བྦེ་པི, ཝུ་དྡྷི་ཀཱ་མཱ སུ་ཁི་ཙྪ་ཀཱ.
༦༥. ‘‘བྷོ་ག་ཝཱ ཡ་ས་ཝཱ ཧོ་མི, སི་རི་མཱ ཉཱ་ཏི་པ་ཀྑ་ཝཱ;
ཨ་པེ་ཏ་བྷ་ཡ་ས་ནྟཱ་སོ, བྷ་ཝེ་ཧཾ ས་བྦ་ཏོ བྷ་ཝེ.
༦༦. ‘‘དེ་ཝཱ མ་ནུ་སྶཱ ཨ་སུ་རཱ, ག་ནྡྷ་བྦཱ ཡ་ཀྑ་ར་ཀྑ་སཱ;
ས་བྦེ ཏེ པ་རི་ར་ཀྑ་ནྟི, བྷ་ཝེ སཾ་ས་ར་ཏོ ས་དཱ.
༦༧. ‘‘དེ་ཝ་ལོ་ཀེ མ་ནུ་སྶེ ཙ, ཨ་ནུ་བྷོ་ཏྭཱ ཨུ་བྷོ ཡ་སེ;
ཨ་ཝ་སཱ་ནེ ཙ ནི་བྦཱ་ནཾ, སི་ཝཾ པ་ཏྟོ ཨ་ནུ་ཏྟ་རཾ.
༦༨. ‘‘ས་མྦུ་དྡྷ་མུ་དྡི་སི་ཏྭཱ་ན, བོ་དྷིཾ ཝཱ ཏ་སྶ ས་ཏྠུ་ནོ;
ཡོ པུ་ཉྙཾ པ་ས་ཝེ པོ་སོ, ཏ་སྶ ཀིཾ ནཱ་མ དུ་ལླ་བྷཾ.
༦༩. ‘‘མ་གྒེ ཕ་ལེ ཨཱ་ག་མེ ཙ, ཛྷཱ་ནཱ་བྷི་ཉྙཱ་གུ་ཎེ་སུ ཙ;
ཨ་ཉྙེ་སཾ ཨ་དྷི་ཀོ ཧུ་ཏྭཱ, ནི་བྦཱ་ཡཱ་མི ཨ་ནཱ་ས་ཝོ.
༧༠. ‘‘པུ་རེ་ཧཾ བོ་དྷི་ཡཱ པ་ཏྟཾ, ཚ་ཌྜེ་ཏྭཱ ཧ་ཊྛ་མཱ་ན་སོ;
ཨི་མེ་ཧི ཝཱི་ས་ཏ་ངྒེ་ཧི, ས་མ་ངྒཱི ཧོ་མི ས་བྦ་དཱ.
༧༡. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༧༢. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༧༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བོ་དྷི་ས་མྨ་ཛྫ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
བོ་དྷི་ས་མྨ་ཛྫ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.