༨. པུ་ལི་ན་ཐཱུ་པི་ཡ་ཏྠེ་ར་ཨ་པ་དཱ་ནཾ
༥༧. ‘‘ཧི་མ་ཝ་ནྟ་སྶཱ་ཝི་དཱུ་རེ, ཡ་མ་ཀོ ནཱ་མ པ་བྦ་ཏོ;
ཨ་སྶ་མོ སུ་ཀ་ཏོ མ་ཡ྄ཧཾ, པ་ཎྞ་སཱ་ལཱ སུ་མཱ་པི་ཏཱ.
༥༨. ‘‘ནཱ་ར་དོ ནཱ་མ ནཱ་མེ་ན, ཛ་ཊི་ལོ ཨུ་གྒ་ཏཱ་པ་ནོ;
ཙ་ཏུ་དྡ་ས་ས་ཧ་སྶཱ་ནི, སི་སྶཱ པ་རི་ཙ་ར་ནྟི མཾ.
༥༩. ‘‘པ་ཊི་ས་ལླཱི་ན་ཀོ ས་ནྟོ, ཨེ་ཝཾ ཙི་ནྟེ་ས་ཧཾ ཏ་དཱ;
‘ས་བྦོ ཛ་ནོ མཾ པཱུ་ཛེ་ཏི, ནཱ་ཧཾ པཱུ་ཛེ་མི ཀི་ཉྩ་ནཾ.
༦༠. ‘‘‘ན མེ ཨོ་ཝཱ་ད་ཀོ ཨ་ཏྠི, ཝ་ཏྟཱ ཀོ་ཙི ན ཝི་ཛྫ་ཏི;
ཨ་ནཱ་ཙ་རི་ཡུ་པ་ཛ྄ཛྷཱ་ཡོ, ཝ་ནེ ཝཱ་སཾ ཨུ་པེ་མ་ཧཾ.
༦༡. ‘‘‘ཨུ་པཱ་ས་མཱ་ནོ ཡ་མ་ཧཾ, ག་རུ་ཙི་ཏྟཾ ཨུ་པ་ཊྛ་ཧེ;
སོ མེ ཨཱ་ཙ་རི་ཡོ ན་ཏྠི, ཝ་ན་ཝཱ་སོ ནི་ར་ཏྠ་ཀོ.
༦༢. ‘‘‘ཨཱ་ཡཱ་གཾ མེ ག་ཝེ་སི་སྶཾ, ག་རུཾ བྷཱ་ཝ་ནི་ཡཾ ཏ་ཐཱ;
སཱ་ཝ་སྶ་ཡོ ཝ་སི་སྶཱ་མི, ན ཀོ་ཙི ག་ར་ཧི་སྶ་ཏི’.
༦༣. ‘‘ཨུ་ཏྟཱ་ན་ཀཱུ་ལཱ ན་དི་ཀཱ, སུ་པ་ཏི་ཏྠཱ མ་ནོ་ར་མཱ;
སཾ་སུ་དྡྷ་པུ་ལི་ནཱ་ཀི་ཎྞཱ, ཨ་ཝི་དཱུ་རེ མ་མ་སྶ་མཾ.
༦༤. ‘‘ན་དིཾ ཨ་མ་རི་ཀཾ ནཱ་མ, ཨུ་པ་ག་ནྟྭཱ་ན་ཧཾ ཏ་དཱ;
སཾ་ཝ་ཌྜྷ་ཡི་ཏྭཱ པུ་ལི་ནཾ, ཨ་ཀཾ པུ་ལི་ན་ཙེ་ཏི་ཡཾ.
༦༥. ‘‘ཡེ ཏེ ཨ་ཧེ་སུཾ ས་མྦུ་དྡྷཱ, བྷ་ཝ་ནྟ་ཀ་ར་ཎཱ མུ་ནཱི;
ཏེ་སཾ ཨེ་ཏཱ་དི་སོ ཐཱུ་པོ, ཏཾ ནི་མི་ཏྟཾ ཀ་རོ་མ་ཧཾ.
༦༦. ‘‘ཀ་རི་ཏྭཱ པུ་ལི་ནཾ [པུ་ལི༹་ནེ (སཱི. སྱཱ. པཱི.)] ཐཱུ་པཾ, སོ་ཝ་ཎྞཾ མཱ་པ་ཡིཾ ཨ་ཧཾ;
སོ་ཎྞ་ཀི་ངྐ་ཎི་པུ་པྥཱ་ནི, ས་ཧ་སྶེ ཏཱི་ཎི པཱུ་ཛ་ཡིཾ.
༦༧. ‘‘སཱ་ཡ་པཱ་ཏཾ ན་མ་སྶཱ་མི, ཝེ་ད་ཛཱ་ཏོ ཀ་ཏ་ཉྫ་ལཱི;
ས་མྨུ་ཁཱ ཝི་ཡ ས་མྦུ་དྡྷཾ, ཝ་ནྡིཾ པུ་ལི་ན་ཙེ་ཏི་ཡཾ.
༦༨. ‘‘ཡ་དཱ ཀི་ལེ་སཱ ཛཱ་ཡ་ནྟི, ཝི་ཏ་ཀྐཱ གེ་ཧ་ནི་སྶི་ཏཱ;
ས་རཱ་མི སུ་ཀ་ཏཾ ཐཱུ་པཾ, པ་ཙྩ་ཝེ་ཀྑཱ་མི ཏཱ་ཝ་དེ.
༦༩. ‘‘ཨུ་པ་ནི་སྶཱ་ཡ ཝི་ཧ་རཾ, ས་ཏྠ་ཝཱ་ཧཾ ཝི་ནཱ་ཡ་ཀཾ;
ཀི་ལེ་སེ སཾ་ཝ་སེ་ཡྻཱ་སི, ན ཡུ་ཏྟཾ ཏ་ཝ མཱ་རི་ས.
༧༠. ‘‘ས་ཧ ཨཱ་ཝ་ཛྫི་ཏེ ཐཱུ་པེ, གཱ་ར་ཝཾ ཧོ་ཏི མེ ཏ་དཱ;
ཀུ་ཝི་ཏ་ཀྐེ ཝི་ནོ་དེ་སིཾ, ནཱ་གོ ཏུ་ཏྟ་ཊྚི་ཏོ ཡ་ཐཱ.
༧༡. ‘‘ཨེ་ཝཾ ཝི་ཧ་ར་མཱ་ནཾ མཾ, མ་ཙྩུ་རཱ་ཛཱ་བྷི་མ་དྡ་ཐ;
ཏ་ཏྠ ཀཱ་ལ་ངྐ་ཏོ ས་ནྟོ, བྲ་ཧྨ་ལོ་ཀ་མ་ག་ཙྪ་ཧཾ.
༧༢. ‘‘ཡཱ་ཝ་ཏཱ་ཡུཾ ཝ་སི་ཏྭཱ་ན, ཏི་དི་ཝེ [ཏི་ད་སེ (སཱི. པཱི.)] ཨུ་པ་པ་ཛྫ་ཧཾ;
ཨ་སཱི་ཏི་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫ་མ་ཀཱ་ར་ཡིཾ.
༧༣. ‘‘ས་ཏཱ་ནཾ ཏཱི་ཎི་ཀྑ་ཏྟུ་ཉྩ, ཙ་ཀྐ་ཝ་ཏྟཱི ཨ་ཧོ་ས་ཧཾ;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༧༤. ‘‘སོ་ཎྞ་ཀི་ངྐ་ཎི་པུ་པྥཱ་ནཾ [ཏེ་སཾ ཀི་ངྐ་ཎི་པུ་པྥཱ་ནཾ (སཱི.)], ཝི་པཱ་ཀཾ ཨ་ནུ་བྷོ་མ་ཧཾ;
དྷཱ་ཏཱི་ས་ཏ་ས་ཧ་སྶཱ་ནི, པ་རི་ཝཱ་རེ་ནྟི མཾ [མེ (ཀ.)] བྷ་ཝེ.
༧༥. ‘‘ཐཱུ་པ་སྶ པ་རི་ཙི་ཎྞ་ཏྟཱ, ར་ཛོ་ཛ་ལླཾ ན ལི་མྤ་ཏི;
ག་ཏྟེ སེ་དཱ ན མུ་ཙྩ་ནྟི, སུ་པྤ་བྷཱ་སོ བྷ་ཝཱ་མ་ཧཾ.
༧༦. ‘‘ཨ་ཧོ མེ སུ་ཀ་ཏོ ཐཱུ་པོ, སུ་དི་ཊྛཱ་མ་རི་ཀཱ ན་དཱི;
ཐཱུ་པཾ ཀ་ཏྭཱ་ན པུ་ལི་ནཾ, པ་ཏྟོ་མྷི ཨ་ཙ་ལཾ པ་དཾ.
༧༧. ‘‘ཀུ་ས་ལཾ ཀ་ཏྟུ་ཀཱ་མེ་ན, ཛ་ནྟུ་ནཱ སཱ་ར་གཱ་ཧི་ནཱ;
ན་ཏྠི ཁེ་ཏྟཾ ཨ་ཁེ་ཏྟཾ ཝཱ, པ་ཊི་པ་ཏྟཱི་ཝ སཱ་དྷ་ཀཱ [སཱ་རི་ཀཱ (པཱི.), སཱ་ར་ཀཱ (སྱཱ.), སཱ་ར་ཏཱ (ཀ.)].
༧༨. ‘‘ཡ་ཐཱ་པི བ་ལ་ཝཱ པོ་སོ, ཨ་ཎྞ་ཝཾ ཏ་རི་ཏུ་སྶ་ཧེ;
པ་རི་ཏྟཾ ཀ་ཊྛ་མཱ་དཱ་ཡ, པ་ཀྑ་ནྡེ་ཡྻ མ་ཧཱ་ས་རཾ.
༧༩. ‘‘ཨི་མཱ་ཧཾ ཀ་ཊྛཾ ནི་སྶཱ་ཡ, ཏ་རི་སྶཱ་མི མ་ཧོ་ད་དྷིཾ;
ཨུ་སྶཱ་ཧེ་ན ཝཱི་རི་ཡེ་ན, ཏ་རེ་ཡྻ ཨུ་ད་དྷིཾ ན་རོ.
༨༠. ‘‘ཏ་ཐེ་ཝ མེ ཀ་ཏཾ ཀ་མྨཾ, པ་རི་ཏྟཾ ཐོ་ཀ་ཀ་ཉྩ ཡཾ;
ཏཾ ཀ་མྨཾ ཨུ་པ་ནི་སྶཱ་ཡ, སཾ་སཱ་རཾ ས་མ་ཏི་ཀྐ་མིཾ.
༨༡. ‘‘པ་ཙྪི་མེ བྷ་ཝེ ས་མྤ་ཏྟེ, སུ་ཀྐ་མཱུ་ལེ་ན ཙོ་དི་ཏོ;
སཱ་ཝ་ཏྠི་ཡཾ པུ་རེ ཛཱ་ཏོ, མ་ཧཱ་སཱ་ལེ སུ་ཨ་ཌྜྷ་ཀེ.
༨༢. ‘‘ས་དྡྷཱ མཱ་ཏཱ པི་ཏཱ མ་ཡ྄ཧཾ, བུ་དྡྷ་སྶ ས་ར་ཎཾ ག་ཏཱ;
ཨུ་བྷོ དི་ཊྛ་པ་དཱ ཨེ་ཏེ, ཨ་ནུ་ཝ་ཏྟ་ནྟི སཱ་ས་ནཾ.
༨༣. ‘‘བོ་དྷི་པ་པ་ཊི་ཀཾ ག་ཡ྄ཧ, སོ་ཎྞ་ཐཱུ་པ་མ་ཀཱ་ར་ཡུཾ;
སཱ་ཡ་པཱ་ཏཾ [སཱ་ཡཾ པཱ་ཏཾ (སྱཱ. ཀ.)] ན་མ་སྶ་ནྟི, ས་ཀྱ་པུ་ཏྟ་སྶ ས་མྨུ་ཁཱ.
༨༤. ‘‘ཨུ་པོ་ས་ཐ་མྷི དི་ཝ་སེ, སོ་ཎྞ་ཐཱུ་པཾ ཝི་ནཱི་ཧ་རུཾ;
བུ་དྡྷ་སྶ ཝ་ཎྞཾ ཀི་ཏྟེ་ནྟཱ, ཏི་ཡཱ་མཾ ཝཱི་ཏི་ནཱ་མ་ཡུཾ.
༨༥. ‘‘ས་ཧ དི་སྭཱ་ན་ཧཾ [པ་སཱ་དེ་ཏྭཱ་ན་ཧཾ (ཀ.)] ཐཱུ་པཾ, ས་རིཾ པུ་ལི་ན་ཙེ་ཏི་ཡཾ;
ཨེ་ཀཱ་ས་ནེ ནི་སཱི་དི་ཏྭཱ, ཨ་ར་ཧ་ཏྟ་མ་པཱ་པུ་ཎིཾ.
དྭཱ་ཝཱི་ས་ཏི་མཾ བྷཱ་ཎ་ཝཱ་རཾ.
༨༦. ‘‘ག་ཝེ་ས་མཱ་ནོ ཏཾ ཝཱི་རཾ, དྷ་མྨ་སེ་ནཱ་པ་ཏི་དྡ་སཾ;
ཨ་གཱ་རཱ ནི་ཀྑ་མི་ཏྭཱ་ན, པ་བྦ་ཛིཾ ཏ་སྶ ས་ནྟི་ཀེ.
༨༧. ‘‘ཛཱ་ཏི་ཡཱ ས་ཏྟ་ཝ་སྶེ་ན, ཨ་ར་ཧ་ཏྟ་མ་པཱ་པུ་ཎིཾ;
ཨུ་པ་ས་མྤཱ་ད་ཡཱི བུ་དྡྷོ, གུ་ཎ་མ་ཉྙཱ་ཡ ཙ་ཀྑུ་མཱ.
༨༨. ‘‘དཱ་ར་ཀེ་ནེ་ཝ ས་ནྟེ་ན, ཀི་རི་ཡཾ ནི་ཊྛི་ཏཾ མ་ཡཱ;
ཀ་ཏཾ མེ ཀ་ར་ཎཱི་ཡ་ཛྫ, ས་ཀྱ་པུ་ཏྟ་སྶ སཱ་ས་ནེ.
༨༩. ‘‘ས་བྦ་ཝེ་ར་བྷ་ཡཱ་ཏཱི་ཏོ, ས་བྦ་ས་ངྒཱ་ཏི་གོ [ས་བྦ་ས་ངྐཱ་ཏི་ཏོ (ཀ.)] ཨི་སི;
སཱ་ཝ་ཀོ ཏེ མ་ཧཱ་ཝཱི་ར, སོ་ཎྞ་ཐཱུ་པ་སྶི་དཾ ཕ་ལཾ.
༩༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༩༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༩༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་ལི་ན་ཐཱུ་པི་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
པུ་ལི་ན་ཐཱུ་པི་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.