༩. སུ་བྷ་དྡ་ཏྠེ་ར་ཨ་པ་དཱ་ནཾ
༡༠༡. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཛ་ན་ཏཾ ཨུ་དྡྷ་རི་ཏྭཱ་ན, ནི་བྦཱ་ཡ་ཏི མ་ཧཱ་ཡ་སོ.
༡༠༢. ‘‘ནི་བྦཱ་ཡ་ནྟེ ཙ ས་མྦུ་དྡྷེ, ད་ས་ས་ཧ་སྶི ཀ་མྤ་ཐ;
ཛ་ན་ཀཱ་ཡོ མ་ཧཱ ཨཱ་སི, དེ་ཝཱ ས་ནྣི་པ་ཏུཾ ཏ་དཱ.
༡༠༣. ‘‘ཙ་ནྡ་ནཾ པཱུ་ར་ཡི་ཏྭཱ་ན, ཏ་ག་རཱ་མ་ལླི་ཀཱ་ཧི ཙ;
ཧ་ཊྛོ ཧ་ཊྛེ་ན ཙི་ཏྟེ་ན, ཨཱ་རོ་པ་ཡིཾ [ཨཱ་ལེ་པེ་སིཾ (སཱི.), ཨཱ་རོ་པེ་སིཾ (སྱཱ.)] ན་རུ་ཏྟ་མཾ.
༡༠༤. ‘‘མ་མ ས་ངྐ་པྤ་མ་ཉྙཱ་ཡ, ས་ཏྠཱ ལོ་ཀེ ཨ་ནུ་ཏྟ་རོ;
ནི་པ་ནྣ་ཀོ་ཝ ས་མྦུ་དྡྷོ, ཨི་མཱ གཱ་ཐཱ ཨ་བྷཱ་ས་ཐ.
༡༠༥. ‘‘‘ཡོ མེ པ་ཙྪི་མ་ཀེ ཀཱ་ལེ, ག་ནྡྷ་མཱ་ལེ་ན [ག་ནྡྷ་མ་ལླེ་ན (སྱཱ. ཀ.) ན་པུཾ་ས་ཀེ་ཀ་ཏྟཾ མ་ན་སི་ཀཱ་ཏ་བྦཾ] ཚཱ་ད་ཡི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༡༠༦. ‘‘‘ཨི་ཏོ ཙུ་ཏོ ཨ་ཡཾ པོ་སོ, ཏུ་སི་ཏ་ཀཱ་ཡཾ ག་མི་སྶ་ཏི;
ཏ་ཏྠ ར་ཛྫཾ ཀ་རི་ཏྭཱ་ན, ནི་མྨཱ་ནཾ སོ ག་མི་སྶ་ཏི.
༡༠༧. ‘‘‘ཨེ་ཏེ་ནེ་ཝ ཨུ་པཱ་ཡེ་ན, ད་ཏྭཱ མཱ་ལཾ [མ་ལྱཾ (སཱི.), མ་ལླཾ (སྱཱ. ཀ.)] ཝ་རུ་ཏྟ་མཾ;
ས་ཀ་ཀ་མྨཱ་བྷི་ར་དྡྷོ སོ, ས་མྤ་ཏྟིཾ ཨ་ནུ་བྷོ་སྶ་ཏི.
༡༠༨. ‘‘‘པུ་ནཱ་པི ཏུ་སི་ཏེ ཀཱ་ཡེ, ནི་བྦ་ཏྟི་སྶ་ཏི་ཡཾ ན་རོ;
ཏ་མྷཱ ཀཱ་ཡཱ ཙ་ཝི་ཏྭཱ་ན, མ་ནུ་སྶ་ཏྟཾ ག་མི་སྶ་ཏི.
༡༠༩. ‘‘‘ས་ཀྱ་པུ་ཏྟོ མ་ཧཱ་ནཱ་གོ, ཨ་གྒོ ལོ་ཀེ ས་དེ་ཝ་ཀེ;
བོ་དྷ་ཡི་ཏྭཱ བ་ཧཱུ ས་ཏྟེ, ནི་བྦཱ་ཡི་སྶ་ཏི ཙ་ཀྑུ་མཱ.
༡༡༠. ‘‘‘ཏ་དཱ སོ་པ་ག་ཏོ ས་ནྟོ, སུ་ཀྐ་མཱུ་ལེ་ན ཙོ་དི་ཏོ;
ཨུ་པ་ས་ངྐ་མྨ ས་མྦུ་དྡྷཾ, པ་ཉྷཾ པུ་ཙྪི་སྶ་ཏི ཏ་དཱ.
༡༡༡. ‘‘‘ཧཱ་ས་ཡི་ཏྭཱ་ན ས་མྦུ་དྡྷོ, ས་བྦ་ཉྙཱུ ལོ་ཀ་ནཱ་ཡ་ཀོ;
པུ་ཉྙ་ཀ་མྨཾ པ་རི་ཉྙཱ་ཡ, ས་ཙྩཱ་ནི ཝི་ཝ་རི་སྶ་ཏི.
༡༡༢. ‘‘‘ཨཱ་ར་དྡྷོ ཙ ཨ་ཡཾ པ་ཉྷོ, ཏུ་ཊྛོ ཨེ་ཀ་གྒ་མཱ་ན་སོ;
ས་ཏྠཱ་རཾ ཨ་བྷི་ཝཱ་དེ་ཏྭཱ, པ་བྦ་ཛྫཾ ཡཱ་ཙ་ཡི་སྶ་ཏི.
༡༡༣. ‘‘‘པ་ས་ནྣ་མཱ་ན་སཾ དི་སྭཱ, ས་ཀ་ཀ་མྨེ་ན ཏོ་སི་ཏཾ;
པ་བྦཱ་ཛེ་སྶ་ཏི སོ བུ་དྡྷོ, ཨ་གྒ་མ་གྒ་སྶ ཀོ་ཝི་དོ.
༡༡༤. ‘‘‘ཝཱ་ཡ་མི་ཏྭཱ་ན་ཡཾ པོ་སོ, ས་མྨཱ་ས་མྦུ་དྡྷ་སཱ་ས་ནེ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
པ་ཉྩ་མ་བྷཱ་ཎ་ཝཱ་རཾ.
༡༡༥. ‘‘པུ་བྦ་ཀ་མྨེ་ན སཾ་ཡུ་ཏྟོ, ཨེ་ཀ་གྒོ སུ་ས་མཱ་ཧི་ཏོ;
བུ་དྡྷ་སྶ ཨོ་ར་སོ པུ་ཏྟོ, དྷ་མྨ་ཛོ་མྷི སུ་ནི་མྨི་ཏོ.
༡༡༦. ‘‘དྷ་མྨ་རཱ་ཛཾ ཨུ་པ་ག་མྨ, ཨ་པུ་ཙྪིཾ པ་ཉྷ་མུ་ཏྟ་མཾ;
ཀ་ཐ་ཡ་ནྟོ ཙ མེ པ་ཉྷཾ, དྷ་མྨ་སོ་ཏཾ ཨུ་པཱ་ན་ཡི.
༡༡༧. ‘‘ཏ་སྶཱ་ཧཾ དྷ་མྨ་མ་ཉྙཱ་ཡ, ཝི་ཧཱ་སིཾ སཱ་ས་ནེ ར་ཏོ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༡༡༨. ‘‘ས་ཏ་ས་ཧ་སྶི་ཏོ ཀ་པྤེ, ཛ་ལ་ཛུ་ཏྟ་མ་ནཱ་ཡ་ཀོ;
ནི་བྦཱ་ཡི ཨ་ནུ་པཱ་དཱ་ནོ, དཱི་པོ་ཝ ཏེ་ལ་ས་ངྑ་ཡཱ.
༡༡༩. ‘‘ས་ཏྟ་ཡོ་ཛ་ནི་ཀཾ ཨཱ་སི, ཐཱུ་པ་ཉྩ ར་ཏ་ནཱ་མ་ཡཾ;
དྷ་ཛཾ ཏ་ཏྠ ཨ་པཱུ་ཛེ་སིཾ, ས་བྦ་བྷ་དྡཾ མ་ནོ་ར་མཾ.
༡༢༠. ‘‘ཀ་སྶ་པ་སྶ ཙ བུ་དྡྷ་སྶ, ཏི་སྶོ ནཱ་མ་གྒ་སཱ་ཝ་ཀོ;
པུ་ཏྟོ མེ ཨོ་ར་སོ ཨཱ་སི, དཱ་ཡཱ་དོ ཛི་ན་སཱ་ས་ནེ.
༡༢༡. ‘‘ཏ་སྶ ཧཱི་ནེ་ན མ་ན་སཱ, ཝཱ་ཙཾ བྷཱ་སིཾ ཨ་བྷ་དྡ་ཀཾ;
ཏེ་ན ཀ་མྨ་ཝི་པཱ་ཀེ་ན, པ་ཙྪཱ མེ ཨཱ་སི བྷ་དྡ་ཀཾ [པ་ཙྪི་མེ ཨ་དྡ་སཾ ཛི་ནཾ (སཱི.)].
༡༢༢. ‘‘ཨུ་པ་ཝ་ཏྟ་ནེ སཱ་ལ་ཝ་ནེ, པ་ཙྪི་མེ ས་ཡ་ནེ མུ་ནི;
པ་བྦཱ་ཛེ་སི མ་ཧཱ་ཝཱི་རོ, ཧི་ཏོ ཀཱ་རུ་ཎི་ཀོ ཛི་ནོ.
༡༢༣. ‘‘ཨ་ཛྫེ་ཝ དཱ་ནི པ་བྦ་ཛྫཱ, ཨ་ཛྫེ་ཝ ཨུ་པ་ས་མྤ་དཱ;
ཨ་ཛྫེ་ཝ པ་རི་ནི་བྦཱ་ནཾ, ས་མྨུ་ཁཱ དྭི་པ་དུ་ཏྟ་མེ.
༡༢༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སུ་བྷ་དྡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སུ་བྷ་དྡ་ཏྠེ་ར་སྶཱ་པ་དཱ་ནཾ ན་ཝ་མཾ.