༡༠. ཙུ་ནྡ་ཏྠེ་ར་ཨ་པ་དཱ་ནཾ
༡༢༥. ‘‘སི་དྡྷ་ཏྠ་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
ཨ་གྒྷི་ཡཾ ཀཱ་ར་ཡི་ཏྭཱ་ན, ཛཱ་ཏི་པུ་པྥེ་ཧི ཚཱ་ད་ཡིཾ.
༡༢༦. ‘‘ནི་ཊྛཱ་པེ་ཏྭཱ་ན ཏཾ པུ་པྥཾ, བུ་དྡྷ་སྶ ཨུ་པ་ནཱ་མ་ཡིཾ;
པུ་པྥཱ་ཝ་སེ་སཾ པ་གྒ་ཡ྄ཧ, བུ་དྡྷ་སྶ ཨ་བྷི་རོ་པ་ཡིཾ.
༡༢༧. ‘‘ཀ་ཉྩ་ན་གྒྷི་ཡ་ས་ངྐཱ་སཾ, བུ་དྡྷཾ ལོ་ཀ་གྒ་ནཱ་ཡ་ཀཾ;
པ་ས་ནྣ་ཙི་ཏྟོ སུ་མ་ནོ, པུ་པྥ་གྒྷི་ཡ་མུ་པཱ་ན་ཡིཾ.
༡༢༨. ‘‘ཝི་ཏི་ཎྞ་ཀ་ངྑོ ས་མྦུ་དྡྷོ, ཏི་ཎྞོ་གྷེ་ཧི པུ་ར་ཀྑ་ཏོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༡༢༩. ‘‘‘དི་བྦ་ག་ནྡྷཾ པ་ཝཱ་ཡ་ནྟཾ, ཡོ མེ པུ་པྥ་གྒྷི་ཡཾ ཨ་དཱ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༡༣༠. ‘‘‘ཨི་ཏོ ཙུ་ཏོ ཨ་ཡཾ པོ་སོ, དེ་ཝ་ས་ངྒྷ་པུ་ར་ཀྑ་ཏོ;
ཛཱ་ཏི་པུ་པྥེ་ཧི པ་རི་ཀི་ཎྞོ, དེ་ཝ་ལོ་ཀཾ ག་མི་སྶ་ཏི.
༡༣༡. ‘‘‘ཨུ་བྦི་དྡྷཾ བྷ་ཝ་ནཾ ཏ་སྶ, སོ་ཝ་ཎྞ་ཉྩ མ་ཎཱི་མ་ཡཾ;
བྱ་མྷཾ པཱ་ཏུ་བྷ་ཝི་སྶ་ཏི, པུ་ཉྙ་ཀ་མྨ་པྤ་བྷཱ་ཝི་ཏཾ.
༡༣༢. ‘‘‘ཙ་ཏུ་ས་ཏྟ་ཏི་ཀྑ་ཏྟུཾ སོ, དེ་ཝ་ར་ཛྫཾ ཀ་རི་སྶ་ཏི;
ཨ་ནུ་བྷོ་སྶ་ཏི ས་མྤ་ཏྟིཾ, ཨ་ཙྪ་རཱ་ཧི པུ་ར་ཀྑ་ཏོ.
༡༣༣. ‘‘‘པ་ཐ་བྱཱ ར་ཛྫཾ ཏི་ས་ཏཾ, ཝ་སུ་དྷཾ ཨཱ་ཝ་སི་སྶ་ཏི;
པ་ཉྩ་ས་ཏྟ་ཏི་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི.
༡༣༤. ‘‘‘དུ་ཛྫ་ཡོ ནཱ་མ ནཱ་མེ་ན, ཧེ་སྶ་ཏི མ་ནུ་ཛཱ་དྷི་པོ;
ཨ་ནུ་བྷོ་ཏྭཱ་ན ཏཾ པུ་ཉྙཾ, ས་ཀ་ཀ་མྨཾ ཨ་པ་སྶི་ཏོ [ས་ཀ་ཀ་མྨཱུ་པ་སཾ་ཧི་ཏོ (སྱཱ.)].
༡༣༥. ‘‘‘ཝི་ནི་པཱ་ཏཾ ཨ་ག་ནྟྭཱ་ན, མ་ནུ་སྶ་ཏྟཾ ག་མི་སྶ་ཏི;
ཧི་ར་ཉྙཾ ཏ་སྶ [ཧི་ར་ཉྙ་སྶ ཙ (སཱི. ཀ.)] ནི་ཙི་ཏཾ, ཀོ་ཊི་ས་ཏ་མ་ན་པྤ་ཀཾ.
༡༣༦. ‘‘‘ནི་བྦ་ཏྟི་སྶ་ཏི ཡོ་ནི་མྷི, བྲཱ་ཧྨ་ཎེ སོ བྷ་ཝི་སྶ་ཏི;
ཝ་ངྒ་ནྟ་སྶ སུ་ཏོ དྷཱི་མཱ, སཱ་རི་ཡཱ ཨོ་ར་སོ པི་ཡོ.
༡༣༧. ‘‘‘སོ ཙ པ་ཙྪཱ པ་བྦ་ཛི་ཏྭཱ, ཨ་ངྒཱི་ར་ས་སྶ སཱ་ས་ནེ;
ཙཱུ་ལ༹་ཙུ་ནྡོ་ཏི [ཙཱུ་ལ་ཙུ་ནྡོ་ཏི (སཱི.)] ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ.
༡༣༨. ‘‘‘སཱ་མ་ཎེ་རོ་ཝ སོ ས་ནྟོ, ཁཱི་ཎཱ་ས་ཝོ བྷ་ཝི་སྶ་ཏི;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
༡༣༩. ‘‘ཨུ་པ་ཊྛ་ཧིཾ མ་ཧཱ་ཝཱི་རཾ, ཨ་ཉྙེ ཙ པེ་ས་ལེ བ་ཧཱུ;
བྷཱ་ཏ་རཾ མེ ཙུ་པ་ཊྛཱ་སིཾ, ཨུ་ཏྟ་མ་ཏྠ་སྶ པ་ཏྟི་ཡཱ.
༡༤༠. ‘‘བྷཱ་ཏ་རཾ མེ ཨུ་པ་ཊྛི་ཏྭཱ, དྷཱ་ཏུཾ པ་ཏྟ་མྷི ཨོ་ཧི་ཡ [ཨོ་པི་ཡ (སཱི.), ཨོ་ཙི་ཡ (སྱཱ.)];
ས་མྦུ་དྡྷཾ ཨུ་པ་ནཱ་མེ་སིཾ, ལོ་ཀ་ཛེ་ཊྛཾ ན་རཱ་ས་བྷཾ.
༡༤༡. ‘‘ཨུ་བྷོ ཧ་ཏྠེ་ཧི པ་གྒ་ཡ྄ཧ, བུ་དྡྷོ ལོ་ཀེ ས་དེ་ཝ་ཀེ;
ས་ནྡ་སྶ་ཡ་ནྟོ ཏཾ དྷཱ་ཏུཾ, ཀི་ཏྟ་ཡི ཨ་གྒ་སཱ་ཝ་ཀཾ.
༡༤༢. ‘‘ཙི་ཏྟ་ཉྩ སུ་ཝི་མུ་ཏྟཾ མེ, ས་དྡྷཱ མ་ཡ྄ཧཾ པ་ཏི་ཊྛི་ཏཱ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༡༤༣. ‘‘པ་ཊི་ས་མྦྷི་དཱ་ནུ་པྤ་ཏྟཱ, ཝི་མོ་ཀྑཱ་པི ཙ ཕ་སྶི་ཏཱ [པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ (སྱཱ.)];
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཙུ་ནྡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཙུ་ནྡ་ཏྠེ་ར་སྶཱ་པ་དཱ་ནཾ ད་ས་མཾ.
ཨུ་པཱ་ལི་ཝ་གྒོ པ་ཉྩ་མོ.