༢. ཨེ་ཀ་ཚ་ཏྟི་ཡ་ཏྠེ་ར་ཨ་པ་དཱ་ནཾ
༣༢. ‘‘ཙ་ནྡ་བྷཱ་གཱ་ན་དཱི་ཏཱི་རེ, ཨ་སྶ་མོ སུ་ཀ་ཏོ མ་མ;
སུ་སུ་དྡྷ་པུ་ལི་ནཱ་ཀི་ཎྞོ, པ་ནྣ་སཱ་ལཱ སུ་མཱ་པི་ཏཱ.
༣༣. ‘‘ཨུ་ཏྟཱ་ན་ཀཱུ་ལཱ ན་དི་ཀཱ, སུ་པ་ཏི་ཏྠཱ མ་ནོ་ར་མཱ;
མ་ཙྪ་ཀ་ཙྪ་པ་ས་མྤ་ནྣཱ [… ས་ཉྪ་ནྣཱ (ཀ.)], སུ་སུ་མཱ་ར་ནི་སེ་ཝི་ཏཱ.
༣༤. ‘‘ཨ་ཙྪཱ དཱི་པཱི ཙ མ་ཡཱུ་རཱ, ཀ་ར་ཝཱི་ཀཱ ཙ སཱ་ལི༹་ཀཱ;
ཀཱུ་ཛ་ནྟི ས་བྦ་དཱ ཨེ་ཏེ, སོ་བྷ་ཡ་ནྟཱ མ་མ་སྶ་མཾ.
༣༥. ‘‘ཀོ་ཀི་ལཱ མ་ཉྫུ་བྷཱ་ཎཱི ཙ, ཧཾ་སཱ ཙ མ་དྷུ་ར་སྶ་རཱ;
ཨ་བྷི་ཀཱུ་ཛ་ནྟི ཏེ ཏ་ཏྠ, སོ་བྷ་ཡ་ནྟཱ མ་མ་སྶ་མཾ.
༣༦. ‘‘སཱི་ཧཱ བྱ་གྒྷཱ ཝ་རཱ་ཧཱ ཙ, ཨ་ཙྪ [ཝ་ཀ (སཱི. པཱི.), བ་ཀཱ (སྱཱ.), ཝ་ཀཱ (ཀ.)] ཀོ་ཀ་ཏ་ར་ཙྪ་ཀཱ;
གི་རི་དུ་གྒ་མྷི ནཱ་དེ་ནྟི, སོ་བྷ་ཡ་ནྟཱ མ་མ་སྶ་མཾ.
༣༧. ‘‘ཨེ་ཎཱི་མི་གཱ ཙ ས་ར་བྷཱ, བྷེ་ར་ཎྜཱ སཱུ་ཀ་རཱ བ་ཧཱུ;
གི་རི་དུ་གྒ་མྷི ནཱ་དེ་ནྟི, སོ་བྷ་ཡ་ནྟཱ མ་མ་སྶ་མཾ.
༣༨. ‘‘ཨུ་དྡཱ་ལ་ཀཱ ཙ་མྤ་ཀཱ ཙ, པཱ་ཊ་ལཱི སི་ནྡུ་ཝཱ་ར་ཀཱ;
ཨ་ཏི་མུ་ཏྟཱ ཨ་སོ་ཀཱ ཙ, སོ་བྷ་ཡ་ནྟི མ་མ་སྶ་མཾ [པུ་པྥ་ནྟི མ་མ ཨ་སྶ་མེ (སཱི. པཱི.)].
༣༩. ‘‘ཨ་ངྐོ་ལཱ ཡཱུ་ཐི་ཀཱ ཙེ་ཝ, ས་ཏྟ་ལཱི བི་མྦི་ཛཱ་ལི་ཀཱ;
ཀ་ཎི་ཀཱ་རཱ ཙ པུ་པྥ་ནྟི, སོ་བྷ་ཡ་ནྟཱ མ་མ་སྶ་མཾ [ཀ་ཎི་ཀཱ་ཀ་ཎི་ཀཱ་རཱ ཙ, པུ་པྥ་ནྟི མ་མ ཨ་སྶ་མེ (སཱི. སྱཱ. པཱི.)].
༤༠. ‘‘ནཱ་གཱ སཱ་ལཱ ཙ ས་ལ༹་ལཱ, པུ་ཎྜ་རཱི་ཀེ་ཏྠ པུ་པྥི་ཏཱ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
༤༡. ‘‘ཨ་ཛྫུ་ནཱ ཨ་ས་ནཱ ཙེ་ཏྠ, མ་ཧཱ་ནཱ་མཱ ཙ པུ་པྥི་ཏཱ;
སཱ་ལཱ ཙ ཀ་ངྒུ་པུ་པྥཱ ཙ, སོ་བྷ་ཡ་ནྟི མ་མ་སྶ་མཾ.
༤༢. ‘‘ཨ་མྦཱ ཛ་མྦཱུ ཙ ཏི་ལ་ཀཱ, ནི་མྦཱ ཙ སཱ་ལ་ཀ་ལྱཱ་ཎཱི;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
༤༣. ‘‘ཨ་སོ་ཀཱ ཙ ཀ་པི་ཊྛཱ ཙ, གི་རི་མཱ་ལེ་ཏྠ [བྷ་གི་ནི་མཱ་ལེ་ཏྠ (སཱི. པཱི.), བྷ་གི་ནི་མཱ་ལཱ ཙ (སྱཱ.)] པུ་པྥི་ཏཱ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
༤༤. ‘‘ཀ་ད་མྦཱ ཀ་ད་ལཱི ཙེ་ཝ, ཨི་སི་མུ་གྒཱ ཙ རོ་པི་ཏཱ;
དྷུ་ཝཾ ཕ་ལཱ་ནི དྷཱ་རེ་ནྟི, སོ་བྷ་ཡ་ནྟཱ མ་མ་སྶ་མཾ.
༤༥. ‘‘ཧ་རཱི་ཏ་ཀཱ ཨཱ་མ་ལ་ཀཱ, ཨ་མྦ་ཛ་མྦུ་ཝི་བྷཱི་ཏ་ཀཱ;
ཀོ་ལཱ བྷ་ལླཱ་ཏ་ཀཱ བི་ལླཱ, ཕ་ལི་ནོ མ་མ ཨ་སྶ་མེ.
༤༦. ‘‘ཨ་ཝི་དཱུ་རེ པོ་ཀྑ་ར་ཎཱི, སུ་པ་ཏི་ཏྠཱ མ་ནོ་ར་མཱ;
མ་ནྡཱ་ལ་ཀེ་ཧི ས་ཉྪ་ནྣཱ, པ་དུ་མུ་པྤ་ལ་ཀེ་ཧི ཙ.
༤༧. ‘‘ག་བྦྷཾ ག་ཎྷ་ནྟི པ་དུ་མཱ, ཨ་ཉྙེ པུ་པྥ་ནྟི ཀེ་ས་རཱི;
ཨོ་པ་ཏྟ་ཀ་ཎྞི་ཀཱ ཙེ་ཝ, པུ་པྥ་ནྟི མ་མ ཨ་སྶ་མེ.
༤༨. ‘‘པཱ་ཋཱི་ནཱ པཱ་ཝུ་སཱ མ་ཙྪཱ, བ་ལ་ཛཱ མུ་ཉྫ་རོ་ཧི་ཏཱ;
ཨ་ཙྪོ་ད་ཀ་མྷི ཝི་ཙ་རཾ, སོ་བྷ་ཡ་ནྟི མ་མ་སྶ་མཾ.
༤༩. ‘‘ན་ཡི་ཏཱ ཨ་མྦ་ག་ནྡྷཱི ཙ, ཨ་ནུ་ཀཱུ་ལེ ཙ ཀེ་ཏ་ཀཱ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
༥༠. ‘‘མ་དྷུ བྷི་ས་མྷཱ ས་ཝ་ཏི, ཁཱི་ར་ས་པྤི མུ་ལཱ༹་ལི་བྷི;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
༥༡. ‘‘པུ་ལི་ནཱ སོ་བྷ་ནཱ ཏ་ཏྠ, ཨཱ་ཀི་ཎྞཱ ཛ་ལ་སེ་ཝི་ཏཱ;
ཨོ་པུ་པྥཱ པུ་པྥི་ཏཱ སེ་ནྟི, སོ་བྷ་ཡ་ནྟཱ མ་མ་སྶ་མཾ.
༥༢. ‘‘ཛ་ཊཱ་བྷཱ་རེ་ན བྷ་རི་ཏཱ, ཨ་ཛི་ནུ་ཏྟ་ར་ཝཱ་ས་ནཱ;
ཝཱ་ཀ་ཙཱི་ར་དྷ་རཱ ས་བྦེ, སོ་བྷ་ཡ་ནྟི མ་མ་སྶ་མཾ.
༥༣. ‘‘ཡུ་ག་མ་ཏྟ་མ་པེ་ཀྑ་ནྟཱ, ནི་པ་ཀཱ ས་ནྟ་ཝུ་ཏྟི་ནོ;
ཀཱ་མ་བྷོ་གེ ཨ་ན་པེ་ཀྑཱ, ཝ་ས་ནྟི མ་མ ཨ་སྶ་མེ.
༥༤. ‘‘པ་རཱུ་ལ༹ྷ་ཀ་ཙྪ་ན་ཁ་ལོ་མཱ, པ་ངྐ་ད་ནྟཱ ར་ཛ་སྶི་རཱ;
ར་ཛོ་ཛ་ལླ་དྷ་རཱ ས་བྦེ, ཝ་ས་ནྟི མ་མ ཨ་སྶ་མེ.
༥༥. ‘‘ཨ་བྷི་ཉྙཱ་པཱ་ར་མི་པྤ་ཏྟཱ, ཨ་ནྟ་ལི་ཀྑ་ཙ་རཱ ཙ ཏེ;
ཨུ་གྒ་ཙྪ་ནྟཱ ན་བྷཾ ཨེ་ཏེ, སོ་བྷ་ཡ་ནྟི མ་མ་སྶ་མཾ.
༥༦. ‘‘ཏེ་ཧི སི་སྶེ་ཧི པ་རི་ཝུ་ཏོ, ཝ་སཱ་མི ཝི་པི་ནེ ཏ་དཱ;
ར་ཏྟི་ནྡི་ཝཾ ན ཛཱ་ནཱ་མི, ས་དཱ ཛྷཱ་ན་ས་མ་པྤི་ཏོ.
༥༧. ‘‘བྷ་ག་ཝཱ ཏ་མྷི ས་མ་ཡེ, ཨ་ཏྠ་ད་སྶཱི མ་ཧཱ་མུ་ནི;
ཏ་མ་ནྡྷ་ཀཱ་རཾ ནཱ་སེ་ནྟོ, ཨུ་པྤ་ཛྫི ལོ་ཀ་ནཱ་ཡ་ཀོ.
༥༨. ‘‘ཨ་ཐ ཨ་ཉྙ་ཏ་རོ སི་སྶོ, ཨཱ་ག་ཙྪི མ་མ ས་ནྟི་ཀཾ;
མ་ནྟེ ཨ་ཛ྄ཛྷེ་ཏུ་ཀཱ་མོ སོ, ཚ་ལ༹་ངྒཾ ནཱ་མ ལ་ཀྑ་ཎཾ.
༥༩. ‘‘བུ་དྡྷོ ལོ་ཀེ ས་མུ་པྤ་ནྣོ, ཨ་ཏྠ་ད་སྶཱི མ་ཧཱ་མུ་ནི;
ཙ་ཏུ་ས་ཙྩཾ པ་ཀཱ་སེ་ནྟོ, དེ་སེ་ཏི ཨ་མ་ཏཾ པ་དཾ.
༦༠. ‘‘ཏུ་ཊྛ་ཧ་ཊྛོ པ་མུ་དི་ཏོ, དྷ་མྨ་ནྟ་ར་ག་ཏཱ་ས་ཡོ;
ཨ་སྶ་མཱ ཨ་བྷི་ནི་ཀྑ་མྨ, ཨི་དཾ ཝ་ཙ་ན་མ་བྲ་ཝིཾ.
༦༡. ‘‘‘བུ་དྡྷོ ལོ་ཀེ ས་མུ་པྤ་ནྣོ, དྭ་ཏྟིཾ་ས་ཝ་ར་ལ་ཀྑ་ཎོ;
ཨེ་ཐ ས་བྦེ ག་མི་སྶཱ་མ, ས་མྨཱ་ས་མྦུ་དྡྷ་ས་ནྟི་ཀཾ’.
༦༢. ‘‘ཨོ་ཝཱ་ད་པ་ཊི་ཀ་རཱ ཏེ, ས་དྷ་མྨེ པཱ་ར་མིཾ ག་ཏཱ;
སཱ་དྷཱུ་ཏི ས་མྤ་ཊི་ཙྪིཾ་སུ, ཨུ་ཏྟ་མ་ཏྠ་ག་ཝེ་ས་ཀཱ.
༦༣. ‘‘ཛ་ཊཱ་བྷཱ་ར་བྷ་རི་ཏཱ ཏེ [ཛ་ཊཱ་བྷཱ་རེ་ན བྷ་རི་ཏཱ (ཀ.)], ཨ་ཛི་ནུ་ཏྟ་ར་ཝཱ་ས་ནཱ;
ཨུ་ཏྟ་མ་ཏྠཾ ག་ཝེ་ས་ནྟཱ, ནི་ཀྑ་མིཾ་སུ ཝ་ནཱ ཏ་དཱ.
༦༤. ‘‘བྷ་ག་ཝཱ ཏ་མྷི ས་མ་ཡེ, ཨ་ཏྠ་ད་སྶཱི མ་ཧཱ་ཡ་སོ;
ཙ་ཏུ་ས་ཙྩཾ པ་ཀཱ་སེ་ནྟོ, དེ་སེ་ཏི ཨ་མ་ཏཾ པ་དཾ.
༦༥. ‘‘སེ་ཏ་ཙྪ་ཏྟཾ ག་ཧེ་ཏྭཱ་ན, བུ་དྡྷ་སེ་ཊྛ་སྶ དྷཱ་ར་ཡིཾ;
ཨེ་ཀཱ་ཧཾ དྷཱ་ར་ཡི་ཏྭཱ་ན, བུ་དྡྷ་སེ་ཊྛཾ ཨ་ཝ་ནྡ་ཧཾ.
༦༦. ‘‘ཨ་ཏྠ་ད་སྶཱི ཏུ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༦༧. ‘‘‘ཡོ མེ ཚ་ཏྟཾ ཨ་དྷཱ་རེ་སི, པ་ས་ནྣོ སེ་ཧི པཱ་ཎི་བྷི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༦༨. ‘‘‘ཨི་མ་སྶ ཛཱ་ཡ་མཱ་ན་སྶ, དེ་ཝ་ཏྟེ ཨ་ཐ མཱ་ནུ་སེ;
དྷཱ་རེ་སྶ་ཏི ས་དཱ ཚ་ཏྟཾ, ཚ་ཏྟ་དཱ་ན་སྶི་དཾ ཕ་ལཾ.
༦༩. ‘‘‘ས་ཏྟ་ས་ཏྟ་ཏི་ཀ་པྤཱ་ནི, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི.
༧༠. ‘‘‘ས་ཏྟ་ས་ཏྟ་ཏི་ཀྑ་ཏྟུ་ཉྩ, དེ་ཝ་ར་ཛྫཾ ཀ་རི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༧༡. ‘‘‘ཨ་ཊྛཱ་ར་སེ ཀ་པྤ་ས་ཏེ, གོ་ཏ་མོ ས་ཀྱ་པུ་ངྒ་ཝོ;
ཏ་མ་ནྡྷ་ཀཱ་རཾ ནཱ་སེ་ནྟོ, ཨུ་པྤ་ཛྫི་སྶ་ཏི ཙ་ཀྑུ་མཱ.
༧༢. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རི་སྶ་ཏི་ནཱ་ས་ཝོ’.
༧༣. ‘‘ཡ་ཏོ ཨ་ཧཾ ཀ་མྨ་མ་ཀཾ, ཚ་ཏྟཾ བུ་དྡྷ་སྶ དྷཱ་ར་ཡཾ;
ཨེ་ཏྠ་ནྟ་རེ ན ཛཱ་ནཱ་མི, སེ་ཏ་ཙྪ་ཏྟཾ ཨ་དྷཱ་རི་ཏཾ.
༧༤. ‘‘ཨི་དཾ པ་ཙྪི་མ་ཀཾ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཚ་ཏྟ་དྷཱ་ར་ཎ་མ་ཛྫཱ་པི, ཝ་ཏྟ་ཏེ ནི་ཙྩ་ཀཱ་ལི་ཀཾ.
༧༥. ‘‘ཨ་ཧོ མེ སུ་ཀ་ཏཾ ཀ་མྨཾ, ཨ་ཏྠ་ད་སྶི་སྶ ཏཱ་དི་ནོ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༧༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༧༧. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༧༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་ཚ་ཏྟི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཨེ་ཀ་ཚ་ཏྟི་ཡ་ཏྠེ་ར་སྶཱ་པ་དཱ་ནཾ དུ་ཏི་ཡཾ.