༡. བྷ་དྡཱ་ལི་ཏྠེ་ར་ཨ་པ་དཱ་ནཾ
༡. ‘‘སུ་མེ་དྷོ ནཱ་མ ས་མྦུ་དྡྷོ, ཨ་གྒོ ཀཱ་རུ་ཎི་ཀོ མུ་ནི;
ཝི་ཝེ་ཀ་ཀཱ་མོ ལོ་ཀ་གྒོ, ཧི་མ་ཝ་ནྟ་མུ་པཱ་ག་མི.
༢. ‘‘ཨ་ཛ྄ཛྷོ་གཱ་ཧེ་ཏྭཱ ཧི་མ་ཝཾ, སུ་མེ་དྷོ ལོ་ཀ་ནཱ་ཡ་ཀོ;
པ་ལླ་ངྐཾ ཨཱ་བྷུ་ཛི་ཏྭཱ་ན, ནི་སཱི་དི པུ་རི་སུ་ཏྟ་མོ.
༣. ‘‘ས་མཱ་དྷིཾ སོ ས་མཱ་པ་ནྣོ, སུ་མེ་དྷོ ལོ་ཀ་ནཱ་ཡ་ཀོ;
ས་ཏྟ་ར་ཏྟི་ནྡི་ཝཾ བུ་དྡྷོ, ནི་སཱི་དི པུ་རི་སུ་ཏྟ་མོ.
༤. ‘‘ཁཱ་རི་བྷཱ་རཾ [ཁཱ་རི་ཀཱ་ཛཾ (སཱི.)] ག་ཧེ་ཏྭཱ་ན, ཝ་ན་མ་ཛ྄ཛྷོ་ག་ཧིཾ ཨ་ཧཾ;
ཏ་ཏྠ་དྡ་སཱ་སིཾ ས་མྦུ་དྡྷཾ, ཨོ་གྷ་ཏི་ཎྞ་མ་ནཱ་ས་ཝཾ.
༥. ‘‘ས་མྨ་ཛྫ་ནིཾ ག་ཧེ་ཏྭཱ་ན, ས་མྨ་ཛྫི་ཏྭཱ་ན ཨ་སྶ་མཾ;
ཙ་ཏུ་ད་ཎྜེ ཋ་པེ་ཏྭཱ་ན, ཨ་ཀཱ་སིཾ མ་ཎྜ་པཾ ཏ་དཱ.
༦. ‘‘སཱ་ལ་པུ་པྥཾ ཨཱ་ཧ་རི་ཏྭཱ, མ་ཎྜ་པཾ ཚཱ་ད་ཡིཾ ཨ་ཧཾ;
པ་ས་ནྣ་ཙི་ཏྟོ སུ་མ་ནོ, ཨ་བྷི་ཝ་ནྡིཾ ཏ་ཐཱ་ག་ཏཾ.
༧. ‘‘ཡཾ ཝ་ད་ནྟི སུ་མེ་དྷོ་ཏི, བྷཱུ་རི་པ་ཉྙཾ སུ་མེ་དྷ་སཾ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༨. ‘‘‘བུ་དྡྷ་སྶ གི་ར་མ་ཉྙཱ་ཡ, ས་བྦེ དེ་ཝཱ ས་མཱ་ག་མུཾ;
ཨ་སཾ་ས་ཡཾ བུ་དྡྷ་སེ་ཊྛོ, དྷ་མྨཾ དེ་སེ་ཏི ཙ་ཀྑུ་མཱ.
༩. ‘‘‘སུ་མེ་དྷོ ནཱ་མ ས་མྦུ་དྡྷོ, ཨཱ་ཧུ་ཏཱི་ནཾ པ་ཊི་གྒ་ཧོ;
དེ་ཝ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༡༠. ‘‘‘ཡོ མེ ས་ཏྟཱ་ཧཾ མ་ཎྜ་པཾ, དྷཱ་ར་ཡཱི སཱ་ལ་ཚཱ་དི་ཏཾ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༡༡. ‘‘‘དེ་ཝ་བྷཱུ་ཏོ མ་ནུ་སྶོ ཝཱ, ཧེ་མ་ཝ་ཎྞོ བྷ་ཝི་སྶ་ཏི;
པ་ཧཱུ་ཏ་བྷོ་གོ ཧུ་ཏྭཱ་ན, ཀཱ་མ་བྷོ་གཱི བྷ་ཝི་སྶ་ཏི.
༡༢. ‘‘‘ས་ཊྛི ནཱ་ག་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
སུ་ཝ་ཎྞ་ཀ་ཙྪཱ མཱ་ཏ་ངྒཱ, ཧེ་མ་ཀ་པྤ་ན་ཝཱ་ས་སཱ.
༡༣. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཏོ་མ་ར་ངྐུ་ས་པཱ་ཎི་བྷི;
སཱ་ཡཾ པཱ་ཏོ [སཱ་ཡ་པཱ་ཏོ (པཱི.)] ཨུ་པ་ཊྛཱ་ནཾ, ཨཱ་ག་མི་སྶ་ནྟི་མཾ ན་རཾ;
ཏེ་ཧི ནཱ་གེ་ཧི པ་རི་ཝུ་ཏོ, ར་མི་སྶ་ཏི ཨ་ཡཾ ན་རོ.
༡༤. ‘‘‘ས་ཊྛི ཨ་སྶ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
ཨཱ་ཛཱ་ནཱི་ཡཱ་ཝ ཛཱ་ཏི་ཡཱ, སི་ནྡྷ་ཝཱ སཱི་གྷ་ཝཱ་ཧི་ནོ.
༡༥. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཨི་ལླི་ཡཱ་ཙཱ་པ་དྷཱ་རི་བྷི;
པ་རི་ཝཱ་རེ་སྶ་ནྟི་མཾ ནི་ཙྩཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༦. ‘‘‘ས་ཊྛི ར་ཐ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
དཱི་པཱ ཨ་ཐོ་པི ཝེ་ཡ་གྒྷཱ, ས་ནྣ་དྡྷཱ ཨུ་སྶི་ཏ་དྡྷ་ཛཱ.
༡༧. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཙཱ་པ་ཧ་ཏྠེ་ཧི ཝ་མྨི་བྷི;
པ་རི་ཝཱ་རེ་སྶ་ནྟི་མཾ ནི་ཙྩཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༨. ‘‘‘ས་ཊྛི གཱ་མ་ས་ཧ་སྶཱ་ནི, པ་རི་པུ་ཎྞཱ་ནི ས་བྦ་སོ;
པ་ཧཱུ་ཏ་དྷ་ན་དྷ་ཉྙཱ་ནི, སུ་ས་མི་དྡྷཱ་ནི ས་བྦ་སོ;
ས་དཱ པཱ་ཏུ་བྷ་ཝི་སྶ་ནྟི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༩. ‘‘‘ཧ་ཏྠཱི ཨ་སྶཱ ར་ཐཱ པ་ཏྟཱི, སེ་ནཱ ཙ ཙ་ཏུ་ར་ངྒི་ནཱི;
པ་རི་ཝཱ་རེ་སྶ་ནྟི་མཾ ནི་ཙྩཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༢༠. ‘‘‘ཨ་ཊྛཱ་ར་སེ ཀ་པྤ་ས་ཏེ, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི.
༢༡. ‘‘‘ས་ཏཱ་ནཾ ཏཱི་ཎི་ཀྑ་ཏྟུ་ཉྩ, དེ་ཝ་ར་ཛྫཾ ཀ་རི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༢༢. ‘‘‘ཏིཾ་ས་ཀ་པྤ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༢༣. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རི་སྶ་ཏི་ནཱ་ས་ཝོ’.
༢༤. ‘‘ཏིཾ་ས་ཀ་པྤ་ས་ཧ་སྶ་མྷི, ཨ་དྡ་སཾ ལོ་ཀ་ནཱ་ཡ་ཀཾ;
ཨེ་ཏྠ་ནྟ་ར་མུ་པཱ་དཱ་ཡ, ག་ཝེ་སིཾ ཨ་མ་ཏཾ པ་དཾ.
༢༥. ‘‘ལཱ་བྷཱ མ་ཡ྄ཧཾ སུ་ལ་དྡྷཾ མེ, ཡ་མ་ཧ་ཉྙཱ་སི སཱ་ས་ནཾ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༢༦. ‘‘ན་མོ ཏེ པུ་རི་སཱ་ཛ་ཉྙ, ན་མོ ཏེ པུ་རི་སུ་ཏྟ་མ;
ཏ་ཝ ཉཱ་ཎཾ པ་ཀི་ཏྟེ་ཏྭཱ, པ་ཏྟོ་མྷི ཨ་ཙ་ལཾ པ་དཾ.
༢༧. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
ས་བྦ་ཏྠ སུ་ཁི་ཏོ ཧོ་མི, ཕ་ལཾ མེ ཉཱ་ཎ་ཀི་ཏྟ་ནེ.
༢༨. ‘‘ཨི་དཾ པ་ཙྪི་མ་ཀཾ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༢༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༣༠. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༣༡. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བྷ་དྡཱ་ལི་ཏྠེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བྷ་དྡཱ་ལི་ཏྠེ་ར་སྶཱ་པ་དཱ་ནཾ པ་ཋ་མཾ.