༡. ཨ་ཝ་ཊ་ཕ་ལ་དཱ་ཡ་ཀ་ཏྠེ་ར་ཨ་པ་དཱ་ནཾ

༡. ‘‘ས་ཏ་རཾ་སི ནཱ་མ བྷ་ག་ཝཱ, ས་ཡ་མྦྷཱུ ཨ་པ་རཱ་ཛི་ཏོ;

ཝི་ཝེ་ཀ་ཀཱ་མོ ས་མྦུ་དྡྷོ, གོ་ཙ་རཱ་ཡཱ་བྷི་ནི་ཀྑ་མི.

༢. ‘‘ཕ་ལ་ཧ་ཏྠོ ཨ་ཧཾ དི་སྭཱ, ཨུ་པ་ག་ཙྪིཾ ན་རཱ་ས་བྷཾ;

པ་ས་ནྣ་ཙི་ཏྟོ སུ་མ་ནོ, ཨ་ཝ་ཊཾ [ཨ་ཝ་ཎྚཾ (སཱི.), ཨ་མྦ་ཊཾ (སྱཱ.)] ཨ་ད་དིཾ ཕ་ལཾ.

༣. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཕ་ལ་མ་ད་དིཾ ཨ་ཧཾ;

དུ་གྒ་ཏིཾ ནཱ་བྷི་ཛཱ་ནཱ་མི, ཕ་ལ་དཱ་ན་སྶི་དཾ ཕ་ལཾ.

༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;

ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.

༥. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.

༦. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;

ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ ཨ་ཝ་ཊ་ཕ་ལ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.

ཨ་ཝ་ཊ་ཕ་ལ་དཱ་ཡ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.