༡. ཨེ་ཀ་པ་དུ་མི་ཡ་ཏྠེ་ར་ཨ་པ་དཱ་ནཾ
༡. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
བྷ་ཝཱ་བྷ་ཝེ ཝི་བྷཱ་ཝེ་ནྟོ, ཏཱ་རེ་སི ཛ་ན་ཏཾ བ་ཧུཾ.
༢. ‘‘ཧཾ་ས་རཱ་ཛཱ ཏ་དཱ ཧོ་མི, དི་ཛཱ་ནཾ པ་ཝ་རོ ཨ་ཧཾ;
ཛཱ་ཏ་སྶ་རཾ ས་མོ་ག་ཡ྄ཧ, ཀཱི་ལཱ༹་མི ཧཾ་ས་ཀཱི་ལི༹་ཏཾ.
༣. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཛཱ་ཏ་སྶ་ར་སྶ ཨུ་པ་རི, ཨཱ་ག་ཙྪི ཏཱ་ཝ་དེ ཛི་ནོ.
༤. ‘‘དི་སྭཱ་ན་ཧཾ དེ་ཝ་དེ་ཝཾ, ས་ཡ་མྦྷུཾ ལོ་ཀ་ནཱ་ཡ་ཀཾ;
ཝ་ཎྚེ ཚེ་ཏྭཱ་ན པ་དུ་མཾ, ས་ཏ་པ་ཏྟཾ མ་ནོ་ར་མཾ.
༥. ‘‘མུ་ཁ་ཏུ་ཎྜེ་ན པ་གྒ་ཡ྄ཧ, པ་ས་ནྣོ ལོ་ཀ་ནཱ་ཡ་ཀེ [ཝི་པྤ་ས་ནྣེ་ན ཙེ་ཏ་སཱ (སྱཱ.)];
ཨུ་ཀྑི་པི་ཏྭཱ་ན ག་ག་ཎེ [ཨུ་ཀྑི་པི་ཏྭཱ ན་ལཱ་ཊེ་ན (ཀ.)], བུ་དྡྷ་སེ་ཊྛཾ ཨ་པཱུ་ཛ་ཡིཾ.
༦. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཨ་ནྟ་ལི་ཀྑེ ཋི་ཏོ ས་ཏྠཱ, ཨ་ཀཱ མེ ཨ་ནུ་མོ་ད་ནཾ.
༧. ‘‘‘ཨི་མི་ནཱ ཨེ་ཀ་པ་དུ་མེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཀ་པྤཱ་ནཾ ས་ཏ་ས་ཧ་སྶཾ, ཝི་ནི་པཱ་ཏཾ ན ག་ཙྪ་སི’.
༨. ‘‘ཨི་དཾ ཝ་ཏྭཱ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ;
མ་མ ཀ་མྨཾ པ་ཀི་ཏྟེ་ཏྭཱ, ཨ་ག་མཱ ཡེ་ན པ་ཏྠི་ཏཾ.
༩. ‘‘ས་ཏ་ས་ཧ་སྶི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༠. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་པ་དུ་མི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་པ་དུ་མི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.