༣༤. ག་ནྡྷོ་ད་ཀ་ཝ་གྒོ
༡. ག་ནྡྷ་དྷཱུ་པི་ཡ་ཏྠེ་ར་ཨ་པ་དཱ་ནཾ
༡. ‘‘སི་དྡྷ་ཏྠ་སྶ བྷ་ག་ཝ་ཏོ, ག་ནྡྷ་དྷཱུ་པཾ ཨ་དཱ་ས་ཧཾ;
སུ་མ་ནེ་ཧི པ་ཊི་ཙྪ་ནྣཾ, བུ་དྡྷཱ་ནུ་ཙྪ་ཝི་ཀ་ཉྩ ཏཾ.
༢. ‘‘ཀ་ཉྩ་ན་གྒྷི་ཡ་ས་ངྐཱ་སཾ, བུ་དྡྷཾ ལོ་ཀ་གྒ་ནཱ་ཡ་ཀཾ;
ཨི་ནྡཱི་ཝ་རཾ་ཝ ཛ་ལི་ཏཾ, ཨཱ་དི་ཏྟཾ་ཝ ཧུ་ཏཱ་ས་ནཾ.
༣. ‘‘བྱ་གྒྷུ་ས་བྷཾ་ཝ པ་ཝ་རཾ, ཨ་བྷི་ཛཱ་ཏཾ་ཝ ཀེ་ས་རིཾ;
ནི་སི་ནྣཾ ས་མ་ཎཱ་ན་གྒཾ, བྷི་ཀྑུ་ས་ངྒྷ་པུ་ར་ཀྑ་ཏཾ.
༤. ‘‘དི་སྭཱ ཙི་ཏྟཾ པ་སཱ་དེ་ཏྭཱ, པ་གྒ་ཧེ་ཏྭཱ་ན ཨ་ཉྫ་ལིཾ;
ཝ་ནྡི་ཏྭཱ ས་ཏྠུ་ནོ པཱ་དེ, པ་ཀྐཱ་མིཾ ཨུ་ཏྟ་རཱ་མུ་ཁོ.
༥. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ག་ནྡྷ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ག་ནྡྷ་པཱུ་ཛཱ་ཡི་དཾ ཕ་ལཾ.
༦. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ག་ནྡྷ་དྷཱུ་པི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ག་ནྡྷ་དྷཱུ་པི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ཨུ་ད་ཀ་པཱུ་ཛ་ཀ་ཏྠེ་ར་ཨ་པ་དཱ་ནཾ
༧. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ག་ཙྪ་ནྟཾ ཨ་ནི་ལ་ཉྫ་སེ;
གྷ་ཏཱ་ས་ནཾ་ཝ ཛ་ལི་ཏཾ, ཨཱ་དི་ཏྟཾ་ཝ ཧུ་ཏཱ་ས་ནཾ.
༨. ‘‘པཱ་ཎི་ནཱ ཨུ་ད་ཀཾ ག་ཡ྄ཧ, ཨཱ་ཀཱ་སེ ཨུ་ཀྑི་པིཾ ཨ་ཧཾ;
ས་མྤ་ཊི་ཙྪི མ་ཧཱ་ཝཱི་རོ, བུ་དྡྷོ ཀཱ་རུ་ཎི་ཀོ ཨི་སི.
༩. ‘‘ཨ་ནྟ་ལི་ཀྑེ ཋི་ཏོ ས་ཏྠཱ, པ་དུ་མུ་ཏྟ་ར་ནཱ་མ་ཀོ;
མ་མ ས་ངྐ་པྤ་མ་ཉྙཱ་ཡ, ཨི་མཾ གཱ་ཐ་མ་བྷཱ་ས་ཐ.
༡༠. ‘‘‘ཨི་མི་ནཱ ད་ཀ་དཱ་ནེ་ན, པཱི་ཏི་ཨུ་པྤཱ་ད་ནེ་ན ཙ;
ཀ་པྤ་ས་ཏ་ས་ཧ་སྶ་མྤི, དུ་གྒ་ཏིཾ ནུ་པ་པ་ཛྫ་སི’.
༡༡. ‘‘ཏེ་ན ཀ་མྨེ་ན དྭི་པ་དི་ནྡ, ལོ་ཀ་ཛེ་ཊྛ ན་རཱ་ས་བྷ;
པ་ཏྟོ་མྷི ཨ་ཙ་ལཾ ཋཱ་ནཾ, ཧི་ཏྭཱ ཛ་ཡ་པ་རཱ་ཛ་ཡཾ.
༡༢. ‘‘ས་ཧ་སྶ་རཱ་ཛ་ནཱ་མེ་ན, ཏ་ཡོ ཙ ཙ་ཀྐ་ཝ་ཏྟི་ནོ;
པ་ཉྩ་ས་ཊྛི་ཀ་པྤ་ས་ཏེ, ཙཱ་ཏུ་ར་ནྟཱ ཛ་ནཱ་དྷི་པཱ.
༡༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་ད་ཀ་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་ད་ཀ་པཱུ་ཛ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. པུ་ནྣཱ་ག་པུ་པྥི་ཡ་ཏྠེ་ར་ཨ་པ་དཱ་ནཾ
༡༤. ‘‘ཀཱ་ན་ནཾ ཝ་ན་མོ་ག་ཡ྄ཧ, ཝ་སཱ་མི ལུ་དྡ་ཀོ ཨ་ཧཾ;
པུ་ནྣཱ་གཾ པུ་པྥི་ཏཾ དི་སྭཱ, བུ་དྡྷ་སེ་ཊྛཾ ཨ་ནུ་སྶ་རིཾ.
༡༥. ‘‘ཏཾ པུ་པྥཾ ཨོ་ཙི་ནི་ཏྭཱ་ན, སུ་ག་ནྡྷཾ ག་ནྡྷི་ཏཾ སུ་བྷཾ;
ཐཱུ་པཾ ཀ་ཏྭཱ་ན པུ་ལི་ནེ, བུ་དྡྷ་སྶ ཨ་བྷི་རོ་པ་ཡིཾ.
༡༦. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༧. ‘‘ཨེ་ཀ་མྷི ན་ཝུ་ཏེ ཀ་པྤེ, ཨེ་ཀོ ཨཱ་སིཾ ཏ་མོ་ནུ་དོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༡༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་ནྣཱ་ག་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པུ་ནྣཱ་ག་པུ་པྥི་ཡ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཨེ་ཀ་དུ་སྶ་དཱ་ཡ་ཀ་ཏྠེ་ར་ཨ་པ་དཱ་ནཾ
༡༩. ‘‘ན་ག་རེ ཧཾ་ས་ཝ་ཏི་ཡཱ, ཨ་ཧོ་སིཾ ཏི་ཎ་ཧཱ་ར་ཀོ;
ཏི་ཎ་ཧཱ་རེ་ན ཛཱི་ཝཱ་མི, ཏེ་ན པོ་སེ་མི དཱ་ར་ཀེ.
༢༠. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཏ་མ་ནྡྷ་ཀཱ་རཾ ནཱ་སེ་ཏྭཱ, ཨུ་པྤ་ཛྫི ལོ་ཀ་ནཱ་ཡ་ཀོ.
༢༡. ‘‘ས་ཀེ གྷ་རེ ནི་སཱི་དི་ཏྭཱ, ཨེ་ཝཾ ཙི་ནྟེ་ས་ཧཾ ཏ་དཱ;
‘བུ་དྡྷོ ལོ་ཀེ ས་མུ་པྤ་ནྣོ, དེ་ཡྻ་དྷ་མྨོ ཙ ན་ཏྠི མེ.
༢༢. ‘‘‘ཨི་དཾ མེ སཱ་ཊ་ཀཾ ཨེ་ཀཾ, ན་ཏྠི མེ ཀོ་ཙི དཱ་ཡ་ཀོ;
དུ་ཀྑོ ནི་ར་ཡ་ས་མྥ་སྶོ, རོ་པ་ཡི་སྶཱ་མི ད་ཀྑི་ཎཾ’.
༢༣. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, ས་ཀཾ ཙི་ཏྟཾ པ་སཱ་ད་ཡིཾ;
ཨེ་ཀཾ དུ་སྶཾ ག་ཧེ་ཏྭཱ་ན, བུ་དྡྷ་སེ་ཊྛ་སྶ་དཱ་ས་ཧཾ.
༢༤. ‘‘ཨེ་ཀཾ དུ་སྶཾ ད་དི་ཏྭཱ་ན, ཨུ་ཀྐུ་ཊྛིཾ ས་མྤ་ཝ་ཏྟ་ཡིཾ;
ཡ་དི བུ་དྡྷོ ཏུ་ཝཾ ཝཱི་ར, ཏཱ་རེ་ཧི མཾ མ་ཧཱ་མུ་ནི.
༢༥. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མ དཱ་ནཾ པ་ཀི་ཏྟེ་ནྟོ, ཨ་ཀཱ མེ ཨ་ནུ་མོ་ད་ནཾ.
༢༦. ‘‘‘ཨི་མི་ནཱ ཨེ་ཀ་དུ་སྶེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཀ་པྤ་ས་ཏ་ས་ཧ་སྶཱ་ནི, ཝི་ནི་པཱ་ཏཾ ན ག་ཙྪ་ཏི.
༢༧. ‘‘‘ཚ་ཏྟིཾ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;
ཏེ་ཏྟིཾ་ས་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༢༨. ‘‘‘དེ་ཝ་ལོ་ཀེ མ་ནུ་སྶེ ཝཱ, སཾ་ས་ར་ནྟོ ཏུ་ཝཾ བྷ་ཝེ;
རཱུ་པ་ཝཱ གུ་ཎ་ས་མྤ་ནྣོ, ཨ་ན་ཝ་ཀྐ་ནྟ་དེ་ཧ་ཝཱ;
ཨ་ཀྑོ་བྷཾ ཨ་མི་ཏཾ དུ་སྶཾ, ལ་བྷི་སྶ་སི ཡ་དི་ཙྪ་ཀཾ’.
༢༩. ‘‘ཨི་དཾ ཝ་ཏྭཱ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ;
ན་བྷཾ ཨ་བྦྷུ་གྒ་མཱི དྷཱི་རོ, ཧཾ་ས་རཱ་ཛཱ་ཝ ཨ་མྦ་རེ.
༣༠. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
བྷོ་གེ མེ ཨཱུ་ན་ཏཱ ན་ཏྠི, ཨེ་ཀ་དུ་སྶ་སྶི་དཾ ཕ་ལཾ.
༣༡. ‘‘པ་དུ་དྡྷཱ་རེ པ་དུ་དྡྷཱ་རེ, དུ་སྶཾ ནི་བྦ་ཏྟ་ཏེ མ་མཾ;
ཧེ་ཊྛཱ དུ་སྶ་མྷི ཏི་ཊྛཱ་མི, ཨུ་པ་རི ཚ་ད་ནཾ མ་མ.
༣༢. ‘‘ཙ་ཀྐ་ཝཱ་ལ༹་མུ་པཱ་དཱ་ཡ, ས་ཀཱ་ན་ནཾ ས་པ་བྦ་ཏཾ;
ཨི་ཙྪ་མཱ་ནོ ཙ་ཧཾ ཨ་ཛྫ, དུ་སྶེ་ཧི ཚཱ་ད་ཡེ་ཡྻ་ཧཾ.
༣༣. ‘‘ཏེ་ནེ་ཝ ཨེ་ཀ་དུ་སྶེ་ན, སཾ་ས་ར་ནྟོ བྷ་ཝཱ་བྷ་ཝེ;
སུ་ཝ་ཎྞ་ཝ་ཎྞོ ཧུ་ཏྭཱ་ན, སཾ་ས་རཱ་མི བྷ་ཝཱ་བྷ་ཝེ.
༣༤. ‘‘ཝི་པཱ་ཀཾ ཨེ་ཀ་དུ་སྶ་སྶ, ན་ཛ྄ཛྷ་གཾ ཀ་ཏྠ་ཙི་ཀྑ་ཡཾ;
ཨ་ཡཾ མེ ཨ་ནྟི་མཱ ཛཱ་ཏི, ཝི་པ་ཙྩ་ཏི ཨི་དྷཱ་པི མེ.
༣༥. ‘‘ས་ཏ་ས་ཧ་སྶི་ཏོ ཀ་པྤེ, ཡཾ དུ་སྶ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨེ་ཀ་དུ་སྶ་སྶི་དཾ ཕ་ལཾ.
༣༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༣༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་དུ་སྶ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་དུ་སྶ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ཕུ་སི་ཏ་ཀ་མྤི་ཡ་ཏྠེ་ར་ཨ་པ་དཱ་ནཾ
༣༨. ‘‘ཝི་པ་སྶཱི ནཱ་མ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི]
ས་མྦུ་དྡྷོ, ལོ་ཀ་ཛེ་ཊྛོ ན་རཱ་ས་བྷོ.
ཁཱི་ཎཱ་ས་ཝེ་ཧི ས་ཧི་ཏོ, ས་ངྒྷཱ་རཱ་མེ ཝ་སཱི ཏ་དཱ.
༣༩. ‘‘ཨཱ་རཱ་མ་དྭཱ་རཱ ནི་ཀྑ་མྨ, ཝི་པ་སྶཱི [ས་བྦ་ཏྠ་པི ཨེ་ཝ་མེ་ཝ དི་སྶ་ཏི] ལོ་ཀ་ནཱ་ཡ་ཀོ;
ས་ཧ ས་ཏ་ས་ཧ་སྶེ་ཧི, ཨ་ཊྛ [ས་ཧ་སྶ་ས་ཏ་སི་སྶེ་ཧི, ཨ་ཊྛ (ཀ.), ཨ་ཊྛ ས་ཏ་ས་ཧ་སྶེ་ཧི, ས་ཧ (?)] ཁཱི་ཎཱ་ས་ཝེ་ཧི སོ.
༤༠. ‘‘ཨ་ཛི་ནེ་ན ནི་ཝ་ཏྠོ་ཧཾ, ཝཱ་ཀ་ཙཱི་ར་དྷ་རོ་པི ཙ;
ཀུ་སུ་མོ་ད་ཀ་མཱ་དཱ་ཡ [ཀུ་སུ་མྦྷོ་ད་ཀ… (སཱི. སྱཱ.)], ས་མྦུ་དྡྷཾ ཨུ་པ་ས་ངྐ་མིཾ.
༤༡. ‘‘ས་ཀཾ ཙི་ཏྟཾ པ་སཱ་དེ་ཏྭཱ, ཝེ་ད་ཛཱ་ཏོ ཀ་ཏ་ཉྫ་ལཱི;
ཀུ་སུ་མོ་ད་ཀ་མཱ་དཱ་ཡ, བུ་དྡྷ་མ་བྦྷུ་ཀྐི་རིཾ ཨ་ཧཾ.
༤༢. ‘‘ཏེ་ན ཀ་མྨེ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི];
མ་མ ཀ་མྨཾ པ་ཀི་ཏྟེ་ཏྭཱ, ཨ་ག་མཱ ཡེ་ན པ་ཏྠི་ཏཾ.
༤༣. ‘‘ཕུ་སི་ཏཱ པ་ཉྩ་ས་ཧ་སྶཱ, ཡེ་ཧི པཱུ་ཛེ་ས་ཧཾ ཛི་ནཾ;
ཨ་ཌྜྷ་ཏེ་ཡྻ་ས་ཧ་སྶེ་ཧི, དེ་ཝ་ར་ཛྫཾ ཨ་ཀཱ་ར་ཡིཾ.
༤༤. ‘‘ཨ་ཌྜྷ་ཏེ་ཡྻ་ས་ཧ་སྶེ་ཧི, ཙ་ཀྐ་ཝ་ཏྟཱི ཨ་ཧོ་ས་ཧཾ;
ཨ་ཝ་སེ་སེ་ན ཀ་མྨེ་ན, ཨ་ར་ཧ་ཏྟ་མ་པཱ་པུ་ཎིཾ.
༤༥. ‘‘དེ་ཝ་རཱ་ཛཱ ཡ་དཱ ཧོ་མི [ཨ་ཧོ་སིཾ (སྱཱ. ཀ.)], མ་ནུ་ཛཱ་དྷི་པ་ཏཱི ཡ་དཱ [ཏ་དཱ (སྱཱ. ཀ.)];
ཏ་མེ་ཝ ནཱ་མ་དྷེ་ཡྻཾ མེ, ཕུ་སི་ཏོ ནཱ་མ ཧོ་མ་ཧཾ.
༤༦. ‘‘དེ་ཝ་བྷཱུ་ཏ་སྶ ས་ནྟ་སྶ, ཨ་ཐཱ་པི མཱ་ནུ་ས་སྶ ཝཱ;
ས་མ་ནྟཱ བྱཱ་མ་ཏོ མ་ཡ྄ཧཾ, ཕུ་སི་ཏཾ་ཝ པ་ཝ་སྶ་ཏི.
༤༧. ‘‘བྷ་ཝཱ ཨུ་གྒྷཱ་ཊི་ཏཱ མ་ཡ྄ཧཾ, ཀི་ལེ་སཱ ཛྷཱ་པི་ཏཱ མ་མ;
ས་བྦཱ་ས་ཝ་པ་རི་ཀྑཱི་ཎོ, ཕུ་སི་ཏ་སྶ ཨི་དཾ ཕ་ལཾ.
༤༨. ‘‘ཙ་ནྡ་ན་སྶེ་ཝ མེ ཀཱ་ཡཱ, ཏ་ཐཱ ག་ནྡྷོ པ་ཝཱ་ཡ་ཏི;
ས་རཱི་ར་ཏོ མ་མ ག་ནྡྷོ, ཨ་ཌྜྷ་ཀོ་སེ པ་ཝཱ་ཡ་ཏི.
༤༩. ‘‘དི་བྦ་ག་ནྡྷཾ ས་མྤ་ཝ་ནྟཾ, པུ་ཉྙ་ཀ་མྨ་ས་མ་ངྒི་ནཾ;
ག་ནྡྷཾ གྷ་ཏྭཱ་ན ཛཱ་ན་ནྟི, ཕུ་སི་ཏོ ཨཱ་ག་ཏོ ཨི་དྷ.
༥༠. ‘‘སཱ་ཁཱ་པ་ལཱ་ས་ཀ་ཊྛཱ་ནི, ཏི་ཎཱ་ནི་པི ཙ ས་བྦ་སོ;
མ་མ ས་ངྐ་པྤ་མ་ཉྙཱ་ཡ, ག་ནྡྷོ ས་མྤ་ཛྫ་ཏེ ཁ་ཎེ.
༥༡. ‘‘ས་ཏ་ས་ཧ་སྶི་ཏོ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི] ཀ་པྤེ, ཙ་ནྡ་ནཾ ཨ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཕུ་སི་ཏ་སྶ ཨི་དཾ ཕ་ལཾ.
༥༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཕུ་སི་ཏ་ཀ་མྤི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཕུ་སི་ཏ་ཀ་མྤི་ཡ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. པ་བྷ་ངྐ་ར་ཏྠེ་ར་ཨ་པ་དཱ་ནཾ
༥༣. ‘‘པ་དུ་མུ་ཏྟ་ར་བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
ཝི་པི་ནེ ཙེ་ཏི་ཡཾ ཨཱ་སི, ཝཱ་ལ༹་མི་ག་ས་མཱ་ཀུ་ལེ.
༥༤. ‘‘ན ཀོ་ཙི ཝི་ས་ཧི ག་ནྟུཾ, ཙེ་ཏི་ཡཾ ཨ་བྷི་ཝ་ནྡི་ཏུཾ;
ཏི་ཎ་ཀ་ཊྛ་ལ་ཏོ་ན་དྡྷཾ, པ་ལུ་གྒཾ ཨཱ་སི ཙེ་ཏི་ཡཾ.
༥༥. ‘‘ཝ་ན་ཀ་མྨི་ཀོ ཏ་དཱ ཨཱ་སིཾ, པི་ཏུ་མཱ་ཏུ་མ་ཏེ་ན་ཧཾ [པི་ཏུ་པེ་ཏཱ་མ་ཧེ་ན་ཧཾ (སཱི.), པི་ཏཱ་པེ་ཏཱ་མ་ཧེ་ན་ཧཾ (སྱཱ.)];
ཨ་དྡ་སཾ ཝི་པི་ནེ ཐཱུ་པཾ, ལུ་གྒཾ ཏི་ཎ་ལ་ཏཱ་ཀུ་ལཾ.
༥༦. ‘‘དི་སྭཱ་ནཱ་ཧཾ བུ་དྡྷ་ཐཱུ་པཾ, ག་རུ་ཙི་ཏྟཾ ཨུ་པ་ཊྛ་ཧིཾ;
བུ་དྡྷ་སེ་ཊྛ་སྶ ཐཱུ་པོ་ཡཾ, པ་ལུ་གྒོ ཨ་ཙྪ་ཏཱི ཝ་ནེ.
༥༧. ‘‘ན་ཙྪ་ནྣཾ ན་པྤ་ཏི་རཱུ་པཾ, ཛཱ་ན་ནྟ་སྶ གུ་ཎཱ་གུ་ཎཾ;
བུ་དྡྷ་ཐཱུ་པཾ ཨ་སོ་དྷེ་ཏྭཱ, ཨ་ཉྙཾ ཀ་མྨཾ པ་ཡོ་ཛ་ཡེ.
༥༨. ‘‘ཏི་ཎ་ཀ་ཊྛ་ཉྩ ཝ་ལླི་ཉྩ, སོ་དྷ་ཡི་ཏྭཱ་ན ཙེ་ཏི་ཡེ;
ཝ་ནྡི་ཏྭཱ ཨ་ཊྛ ཝཱ་རཱ་ནི [ཨ་ཊྛ ཋཱ་ནཱ་ནི (ཀ.)], པ་ཊི་ཀུ་ཊི་ཀོ ཨ་ག་ཙྪ་ཧཾ.
༥༩. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༦༠. ‘‘ཏ་ཏྠ མེ སུ་ཀ་ཏཾ བྱ་མྷཾ, སོ་ཝ་ཎྞཾ ས་པ་བྷ་སྶ་རཾ;
ས་ཊྛི་ཡོ་ཛ་ན་མུ་བྦི་དྡྷཾ, ཏིཾ་ས་ཡོ་ཛ་ན་ཝི་ཏྠ་ཏཾ.
༦༡. ‘‘ཏི་ས་ཏཱ་ནི ཙ ཝཱ་རཱ་ནི, དེ་ཝ་ར་ཛྫ་མ་ཀཱ་ར་ཡིཾ;
པ་ཉྩ་ཝཱི་ས་ཏི་ཀྑ་ཏྟུ་ཉྩ, ཙ་ཀྐ་ཝ་ཏྟཱི ཨ་ཧོ་ས་ཧཾ.
༦༢. ‘‘བྷ་ཝཱ་བྷ་ཝེ སཾ་ས་ར་ནྟོ, མ་ཧཱ་བྷོ་གཾ ལ་བྷཱ་མ་ཧཾ;
བྷོ་གེ མེ ཨཱུ་ན་ཏཱ ན་ཏྠི, སོ་དྷ་ནཱ་ཡ ཨི་དཾ ཕ་ལཾ.
༦༣. ‘‘སི་ཝི་ཀཱ ཧ་ཏྠི་ཁ་ནྡྷེ་ན, ཝི་པི་ནེ ག་ཙྪ་ཏོ མ་མ;
ཡཾ ཡཾ དི་སཱ་ཧཾ ག་ཙྪཱ་མི, ས་ར་ཎཾ ས་མྤ་ཏེ [སི་ཛ྄ཛྷ་ཏེ (ཀ.)] ཝ་ནཾ.
༦༤. ‘‘ཁཱ་ཎུཾ ཝཱ ཀ་ཎྚ་ཀཾ ཝཱ་པི, ནཱ་ཧཾ པ་སྶཱ་མི ཙ་ཀྑུ་ནཱ;
པུ་ཉྙ་ཀ་མྨེ་ན སཾ་ཡུ་ཏྟོ, ས་ཡ་མེ་ཝཱ་པ་ནཱི་ཡ་རེ.
༦༥. ‘‘ཀུ་ཊྛཾ ག་ཎྜོ ཀི་ལཱ་སོ ཙ, ཨ་པ་མཱ་རོ ཝི་ཏ་ཙྪི་ཀཱ;
ད་དྡུ ཀ་ཙྪུ [ཀ་ཎྜུ (སྱཱ.)] ཙ མེ ན་ཏྠི, སོ་དྷ་ནཱ་ཡ ཨི་དཾ ཕ་ལཾ.
༦༦. ‘‘ཨ་ཉྙ་མྤི མེ ཨ་ཙྪ་རི་ཡཾ, བུ་དྡྷ་ཐཱུ་པ་སྶ སོ་དྷ་ནེ [བུ་དྡྷ་ཐཱུ་པ་མྷི སོ་དྷི་ཏེ (སྱཱ.)];
ནཱ་བྷི་ཛཱ་ནཱ་མི མེ ཀཱ་ཡེ, ཛཱ་ཏཾ པི་ལ༹་ཀ་བི་ནྡུ་ཀཾ.
༦༧. ‘‘ཨ་ཉྙ་མྤི མེ ཨ་ཙྪ་རི་ཡཾ, བུ་དྡྷ་ཐཱུ་པ་མྷི སོ་དྷི་ཏེ [ས་བྦ་ཏྠ་པི ཨེ་ཝ་མེ་ཝ དི་སྶ་ཏི, ཏ་ཐཱ ཨུ་པ་རི་པི];
དུ་ཝེ བྷ་ཝེ སཾ་ས་རཱ་མི, དེ་ཝ་ཏྟེ ཨ་ཐ མཱ་ནུ་སེ.