༢༦. ཐོ་མ་ཀ་ཝ་གྒོ
༡. ཐོ་མ་ཀ་ཏྠེ་ར་ཨ་པ་དཱ་ནཾ
༡. ‘‘དེ་ཝ་ལོ་ཀེ ཋི་ཏོ ས་ནྟོ, ཝི་པ་སྶི་སྶ མ་ཧེ་སི་ནོ;
དྷ་མྨཾ སུ་ཎི་ཏྭཱ མུ་དི་ཏོ, ཨི་མཾ ཝཱ་ཙཾ ཨ་བྷཱ་ས་ཧཾ.
༢. ‘‘‘ན་མོ ཏེ པུ་རི་སཱ་ཛ་ཉྙ, ན་མོ ཏེ པུ་རི་སུ་ཏྟ་མ;
བ་ཧུ་ཛྫ་ནཾ [བ་ཧུཾ ཛ་ནཾ (སཱི.)] ཏཱ་ར་ཡ་སི, དེ་སེ་ནྟོ ཨ་མ་ཏཾ པ་དཾ’.
༣. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཝཱ་ཙ་མ་བྷ་ཎིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཐོ་མ་ནཱ་ཡ ཨི་དཾ ཕ་ལཾ.
༤. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཐོ་མ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཐོ་མ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ཨེ་ཀཱ་ས་ན་དཱ་ཡ་ཀ་ཏྠེ་ར་ཨ་པ་དཱ་ནཾ
༥. ‘‘ཝི་ཛ་ཧི་ཏྭཱ དེ་ཝ་ཝ་ཎྞཾ, ས་བྷ་རི་ཡོ ཨི་དྷཱ་ག་མིཾ;
ཨ་དྷི་ཀཱ་རཾ ཀ་ཏྟུ་ཀཱ་མོ, བུ་དྡྷ་སེ་ཊྛ་སྶ སཱ་ས་ནེ.
༦. ‘‘དེ་ཝ་ལོ ནཱ་མ ནཱ་མེ་ན, པ་དུ་མུ་ཏྟ་ར་སཱ་ཝ་ཀོ;
ཏ་སྶ བྷི་ཀྑཱ མ་ཡཱ དི་ནྣཱ, ཝི་པྤ་ས་ནྣེ་ན ཙེ་ཏ་སཱ.
༧. ‘‘ས་ཏ་ས་ཧ་སྶི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པི་ཎྜ་པཱ་ཏ་སྶི་དཾ ཕ་ལཾ.
༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀཱ་ས་ན་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀཱ་ས་ན་དཱ་ཡ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ཙི་ཏ་ཀ་པཱུ་ཛ་ཀ་ཏྠེ་ར་ཨ་པ་དཱ་ནཾ
༩. ‘‘ཨཱ་ན་ནྡོ ནཱ་མ ས་མྦུ་དྡྷོ, ས་ཡ་མྦྷཱུ ཨ་པ་རཱ་ཛི་ཏོ;
ཨ་ར་ཉྙེ པ་རི་ནི་བྦཱ་ཡི, ཨ་མ་ནུ་སྶ་མྷི ཀཱ་ན་ནེ.
༡༠. ‘‘དེ་ཝ་ལོ་ཀཱ ཨི་དྷཱ་ག་ནྟྭཱ, ཙི་ཏཾ ཀ་ཏྭཱ་ན་ཧཾ ཏ་དཱ;
ས་རཱི་རཾ ཏ་ཏྠ ཛྷཱ་པེ་སིཾ, ས་ཀྐཱ་ར་ཉྩ ཨ་ཀཱ་ས་ཧཾ.
༡༡. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཙི་ཏ་ཀ་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཙི་ཏ་ཀ་པཱུ་ཛ་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཏི་ཙ་མྤ་ཀ་པུ་པྥི་ཡ་ཏྠེ་ར་ཨ་པ་དཱ་ནཾ
༡༣. ‘‘ཧི་མ་ཝ་ནྟ་སྶཱ་ཝི་དཱུ་རེ, ཝི་ཀ་ཏོ [ཝི་ཀ་ནོ (སཱི. སྱཱ.)] ནཱ་མ པ་བྦ་ཏོ;
ཏ་སྶ ཝེ་མ་ཛ྄ཛྷེ ཝ་ས་ཏི, ས་མ་ཎོ བྷཱ་ཝི་ཏི་ནྡྲི་ཡོ.
༡༤. ‘‘དི་སྭཱ་ན ཏ་སྶོ་པ་ས་མཾ, ཝི་པྤ་ས་ནྣེ་ན ཙེ་ཏ་སཱ;
ཏཱི་ཎི ཙ་མྤ་ཀ་པུ་པྥཱ་ནི, ག་ཧེ་ཏྭཱ་ན ས་མོ་ཀི་རིཾ.
༡༥. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་ཙ་མྤ་ཀ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་ཙ་མྤ་ཀ་པུ་པྥི་ཡ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ས་ཏྟ་པཱ་ཊ་ལི་ཡ་ཏྠེ་ར་ཨ་པ་དཱ་ནཾ
༡༧. ‘‘ཀ་ཎི་ཀཱ་རཾ་ཝ ཛོ་ཏ་ནྟཾ, ནི་སི་ནྣཾ པ་བྦ་ཏ་ནྟ་རེ;
ས་ཏྟ པཱ་ཊ་ལི་པུ་པྥཱ་ནི, བུ་དྡྷ་སྶ ཨ་བྷི་རོ་པ་ཡིཾ.
༡༨. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་ཏྟ་པཱ་ཊ་ལི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་ཏྟ་པཱ་ཊ་ལི་ཡ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཨུ་པཱ་ཧ་ན་དཱ་ཡ་ཀ་ཏྠེ་ར་ཨ་པ་དཱ་ནཾ
༢༠. ‘‘ཨ་ཧོ་སིཾ ཙ་ནྡ་ནོ ནཱ་མ, ས་མྦུ་དྡྷ་སྶ་ཏྲ་ཛོ ཏ་དཱ;
ཨེ་ཀོ་པཱ་ཧ་ནོ མ་ཡཱ དི་ནྣོ, བོ་དྷིཾ ས་མྤ་ཛྫ མེ ཏུ་ཝཾ.
༢༡. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པཱ་ན་དྷིཾ [ཡ་མུ་པཱ་ཧ་ནཾ (སཱི.), ཡཾ པཱ་དུཾ (སྱཱ.)] ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་པཱ་ཧ་ན་སྶི་དཾ ཕ་ལཾ.
༢༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་པཱ་ཧ་ན་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་པཱ་ཧ་ན་དཱ་ཡ་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. མ་ཉྫ་རི་པཱུ་ཛ་ཀ་ཏྠེ་ར་ཨ་པ་དཱ་ནཾ
༢༣. ‘‘མ་ཉྫ་རི་ཀཾ ཀ་རི་ཏྭཱ་ན, ར་ཐི་ཡཾ པ་ཊི་པ་ཛྫ་ཧཾ;
ཨ་དྡ་སཾ ས་མ་ཎཱ་ན་གྒཾ, བྷི་ཀྑུ་ས་ངྒྷ་པུ་ར་ཀྑ་ཏཾ.
༢༤. ‘‘པ་ས་ནྣ་ཙི་ཏྟོ སུ་མ་ནོ, པ་ར་མཱ་ཡ ཙ པཱི་ཏི་ཡཱ;
ཨུ་བྷོ ཧ་ཏྠེ་ཧི པ་གྒ་ཡ྄ཧ, བུ་དྡྷ་སྶ ཨ་བྷི་རོ་པ་ཡིཾ.
༢༥. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་པྥ་པཱུ་ཛཱ་ཡི་དཾ ཕ་ལཾ.
༢༦. ‘‘ཨི་ཏོ ཏེ་ས་ཏྟ་ཏི་ཀ་པྤེ, ཨེ་ཀོ ཨཱ་སིཾ མ་ཧཱི་པ་ཏི;
ཛོ་ཏི་ཡོ ནཱ་མ ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལོ.
༢༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་ཉྫ་རི་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་ཉྫ་རི་པཱུ་ཛ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. པ་ཎྞ་དཱ་ཡ་ཀ་ཏྠེ་ར་ཨ་པ་དཱ་ནཾ
༢༨. ‘‘པ་བྦ་ཏེ ཧི་མ་ཝ་ནྟ་མྷི, ཝཱ་ཀ་ཙཱི་ར་དྷ་རོ ཨ་ཧཾ;
ཨ་ལོ་ཎ་པ་ཎྞ་བྷ་ཀྑོ་མྷི, ནི་ཡ་མེ་སུ ཙ སཾ་ཝུ་ཏོ.
༢༩. ‘‘པཱ་ཏ་རཱ་སེ ཨ་ནུ་པྤ་ཏྟེ, སི་དྡྷ་ཏྠོ ཨུ་པ་ག་ཙྪི མཾ;
ཏཱ་ཧཾ བུ་དྡྷ་སྶ པཱ་དཱ་སིཾ, པ་ས་ནྣོ སེ་ཧི པཱ་ཎི་བྷི.
༣༠. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པ་ཎྞ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པ་ཎྞ་དཱ་ན་སྶི་དཾ ཕ་ལཾ.
༣༡. ‘‘ས་ཏྟ་ཝཱི་ས་ཏི་ཀ་པྤ་མྷི, རཱ་ཛཱ ཨཱ་སིཾ ས་ད་ཏྠི་ཡོ [ཡ་ད་ཏྠི་ཡོ (སཱི. སྱཱ.)];
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༣༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པ་ཎྞ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་ཎྞ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. ཀུ་ཊི་དཱ་ཡ་ཀ་ཏྠེ་ར་ཨ་པ་དཱ་ནཾ
༣༣. ‘‘ཝི་པི་ན་ཙཱ་རཱི ས་མྦུ་དྡྷོ, རུ་ཀྑ་མཱུ་ལེ ཝ་སཱི ཏ་དཱ;
པ་ཎྞ་སཱ་ལཾ ཀ་རི་ཏྭཱ་ན, ཨ་དཱ་སིཾ ཨ་པ་རཱ་ཛི་ཏེ.
༣༤. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པ་ཎྞ་ཀུ་ཊི་ཀཾ ཨ་དཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཀུ་ཊི་དཱ་ན་སྶི་དཾ ཕ་ལཾ.
༣༥. ‘‘ཨ་ཊྛ་ཝཱི་སེ [ཨ་ཊྛ་ཏིཾ་སེ (སྱཱ.)] ཨི་ཏོ ཀ་པྤེ, སོ་ལ༹་སཱ་སིཾ་སུ རཱ་ཛཱ་ནོ;
ས་བྦ་ཏྠ ཨ་བྷི་ཝ་སྶཱི་ཏི, ཝུ་ཙྩ་རེ ཙ་ཀྐ་ཝ་ཏྟི་ནོ.
༣༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀུ་ཊི་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀུ་ཊི་དཱ་ཡ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. ཨ་གྒ་པུ་པྥི་ཡ་ཏྠེ་ར་ཨ་པ་དཱ་ནཾ
༣༧. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ནི་སི་ནྣཾ པ་བྦ་ཏ་ནྟ་རེ;
ཨོ་བྷཱ་ས་ཡ་ནྟཾ རཾ་སེ་ན [རཾ་སི་ཡཱ (སྱཱ.)], སི་ཁི་ནཾ སི་ཁི་ནཾ ཡ་ཐཱ.
༣༨. ‘‘ཨ་གྒ་ཛཾ པུ་པྥ་མཱ་དཱ་ཡ, ཨུ་པཱ་ག་ཙྪིཾ ན་རུ་ཏྟ་མཾ;
པ་ས་ནྣ་ཙི་ཏྟོ སུ་མ་ནོ, བུ་དྡྷ་སྶ ཨ་བྷི་རོ་པ་ཡིཾ.
༣༩. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤༠. ‘‘པ་ཉྩ་ཝཱི་ས་ཏི་ཀ་པྤ་མྷི, ཨ་ཧོ་སི ཨ་མི་ཏོ་ག་ཏོ [ཨ་མི་ཏ་ཝ྄ཧ་ཡོ (སཱི.)];
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༤༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་གྒ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་གྒ་པུ་པྥི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
ཐོ་མ་ཀ་ཝ་གྒོ ཚ་བྦཱི་ས་ཏི་མོ.