༢༤. ཨུ་ད་ཀཱ་ས་ན་ཝ་གྒོ
༡. ཨུ་ད་ཀཱ་ས་ན་དཱ་ཡ་ཀ་ཏྠེ་ར་ཨ་པ་དཱ་ནཾ
༡. ‘‘ཨཱ་རཱ་མ་དྭཱ་རཱ ནི་ཀྑ་མྨ, ཕ་ལ་ཀཾ ས་ནྠ་རིཾ ཨ་ཧཾ;
ཨུ་ད་ཀ་ཉྩ ཨུ་པ་ཊྛཱ་སིཾ, ཨུ་ཏྟ་མ་ཏྠ་སྶ པ་ཏྟི་ཡཱ.
༢. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨཱ་ས་ནེ ཙོ་ད་ཀེ ཕ་ལཾ.
༣. ‘‘ཨི་ཏོ པ་ནྣ་ར་སེ ཀ་པྤེ, ཨ་བྷི་སཱ་མ་ས་མ་ཝ྄ཧ་ཡོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༤. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་ད་ཀཱ་ས་ན་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་ད་ཀཱ་ས་ན་དཱ་ཡ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. བྷཱ་ཛ་ན་པཱ་ལ་ཀ་ཏྠེ་ར་ཨ་པ་དཱ་ནཾ
༥. ‘‘ན་ག་རེ བ་ནྡྷུ་མ་ཏི་ཡཱ, ཀུ་མྦྷ་ཀཱ་རོ ཨ་ཧཾ ཏ་དཱ;
བྷཱ་ཛ་ནཾ ཨ་ནུ་པཱ་ལེ་སིཾ, བྷི་ཀྑུ་ས་ངྒྷ་སྶ ཏཱ་ཝ་དེ.
༦. ‘‘ཨེ་ཀ་ན་ཝུ་ཏི་ཏོ ཀ་པྤེ, བྷཱ་ཛ་ནཾ ཨ་ནུ་པཱ་ལ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བྷཱ་ཛ་ན་སྶ ཨི་དཾ ཕ་ལཾ.
༧. ‘‘ཏེ་པ་ཉྙཱ་སེ ཨི་ཏོ ཀ་པྤེ, ཨ་ན་ནྟ་ཛཱ་ལི་ནཱ་མ་ཀོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བྷཱ་ཛ་ན་པཱ་ལ་ཀོ [བྷཱ་ཛ་ན་དཱ་ཡ་ཀོ (སཱི. སྱཱ.)] ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བྷཱ་ཛ་ན་པཱ་ལ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. སཱ་ལ་པུ་པྥི་ཡ་ཏྠེ་ར་ཨ་པ་དཱ་ནཾ
༩. ‘‘ཨ་རུ་ཎ་ཝ་ཏི་ཡཱ ན་ག་རེ, ཨ་ཧོ་སིཾ པཱུ་པི་ཀོ ཏ་དཱ;
མ་མ དྭཱ་རེ་ན ག་ཙྪ་ནྟཾ, སི་ཁི་ནཾ ཨ་དྡ་སཾ ཛི་ནཾ.
༡༠. ‘‘བུ་དྡྷ་སྶ པ་ཏྟཾ པ་གྒ་ཡ྄ཧ, སཱ་ལ་པུ་པྥཾ ཨ་དཱ་ས་ཧཾ;
ས་མྨ་གྒ་ཏ་སྶ བུ་དྡྷ་སྶ, ཝི་པྤ་ས་ནྣེ་ན ཙེ་ཏ་སཱ.
༡༡. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་དཱ་ས་ཧཾ [ཡཾ ཁ་ཛྫ་ཀ་མ་དཱ་ས་ཧཾ (སཱི.), ཡཾ ཁ་ཛྫ་མ་བྷི་དཱ་ས་ཧཾ (ཀ.) སཱ་ལ་པུ་པྥ་ནཱ་མ་ཀཾ ཁ་ཛྫ་ཀཾ ཝཱ བྷ་ཝེ་ཡྻ];
དུ་གྒ་ཏིཾ ནཱ་བྷི་ཛཱ་ནཱ་མི, སཱ་ལ་པུ་པྥ་སྶི་དཾ ཕ་ལཾ.
༡༢. ‘‘ཨི་ཏོ ཙུ་དྡ་ས་ཀ་པྤ་མྷི, ཨ་ཧོ་སིཾ ཨ་མི་ཏ་ཉྫ་ལོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༡༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སཱ་ལ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སཱ་ལ་པུ་པྥི་ཡ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཀི་ལ་ཉྫ་དཱ་ཡ་ཀ་ཏྠེ་ར་ཨ་པ་དཱ་ནཾ
༡༤. ‘‘ཏི་ཝ་རཱ་ཡཾ པུ་རེ ར་མྨེ, ན་ལ༹་ཀཱ་རོ ཨ་ཧཾ ཏ་དཱ;
སི་དྡྷ་ཏྠེ ལོ་ཀ་པ་ཛྫོ་ཏེ, པ་ས་ནྣཱ ཛ་ན་ཏཱ ཏ་ཧིཾ.
༡༥. ‘‘པཱུ་ཛ་ཏྠཾ ལོ་ཀ་ནཱ་ཐ་སྶ, ཀི་ལ་ཉྫཾ པ་རི་ཡེ་ས་ཏི;
བུ་དྡྷ་པཱུ་ཛཾ ཀ་རོ་ནྟཱ་ནཾ, ཀི་ལ་ཉྫཾ ཨ་ད་དིཾ ཨ་ཧཾ.
༡༦. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཀི་ལ་ཉྫ་སྶ ཨི་དཾ ཕ་ལཾ.
༡༧. ‘‘ས་ཏྟ་ས་ཏྟ་ཏི་ཀ་པྤ་མྷི, རཱ་ཛཱ ཨཱ་སིཾ ཛ་ལ་དྡྷ་རོ [ཛུ་ཏི་ནྡྷ་རོ (སཱི.)];
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༡༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀི་ལ་ཉྫ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀི་ལ་ཉྫ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ཝེ་དི་ཀཱ་ར་ཀ་ཏྠེ་ར་ཨ་པ་དཱ་ནཾ
༡༩. ‘‘ཝི་པ་སྶི་ནོ བྷ་ག་ཝ་ཏོ, བོ་དྷི་ཡཱ པཱ་ད་པུ་ཏྟ་མེ;
པ་ས་ནྣ་ཙི་ཏྟོ སུ་མ་ནོ, ཀཱ་རེ་སིཾ ཝེ་དི་ཀཾ ཨ་ཧཾ.
༢༠. ‘‘ཨེ་ཀ་ན་ཝུ་ཏི་ཏོ ཀ་པྤེ, ཀཱ་རེ་སིཾ ཝེ་དི་ཀཾ ཨ་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཝེ་དི་ཀཱ་ཡ ཨི་དཾ ཕ་ལཾ.
༢༡. ‘‘ཨི་ཏོ ཨེ་ཀཱ་ད་སེ ཀ་པྤེ, ཨ་ཧོ་སིཾ སཱུ་རི་ཡ་སྶ་མོ;
ས་ཏྟ་ར་ཏྟ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༢༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝེ་དི་ཀཱ་ར་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝེ་དི་ཀཱ་ར་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཝ་ཎྞ་ཀཱ་ར་ཏྠེ་ར་ཨ་པ་དཱ་ནཾ
༢༣. ‘‘ན་ག་རེ ཨ་རུ་ཎ་ཝ་ཏི་ཡཱ, ཝ་ཎྞ་ཀཱ་རོ ཨ་ཧཾ ཏ་དཱ;
ཙེ་ཏི་ཡེ དུ་སྶ་བྷ་ཎྜཱ་ནི, ནཱ་ནཱ་ཝ་ཎྞཾ ར་ཛེ་ས་ཧཾ [ར་ཛིཾ ཨ་ཧཾ (ཀ.), ར་ཛེ་མ་ཧཾ (སྱཱ.)].
༢༤. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ ཝ་ཎྞཾ ར་ཛ་ཡིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཝ་ཎྞ་དཱ་ན་སྶི་དཾ ཕ་ལཾ.
༢༥. ‘‘ཨི་ཏོ ཏེ་ཝཱི་ས་ཏི་ཀ་པྤེ, ཝ་ཎྞ་ས་མ [ཙ་ནྡུ་པ་མ (སཱི.), ཙ་ནྡ་ས་མ (སྱཱ.)] ས་ནཱ་མ་ཀོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༢༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ཎྞ་ཀཱ་རོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝ་ཎྞ་ཀཱ་ར་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. པི་ཡཱ་ལ་པུ་པྥི་ཡ་ཏྠེ་ར་ཨ་པ་དཱ་ནཾ
༢༧. ‘‘མི་ག་ལུ་དྡོ པུ་རེ ཨཱ་སིཾ, ཨ་ར་ཉྙེ ཀཱ་ན་ནེ ཨ་ཧཾ;
པི་ཡཱ་ལཾ པུ་པྥི་ཏཾ དི་སྭཱ, ག་ཏ་མ་གྒེ ཁི་པིཾ ཨ་ཧཾ.
༢༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པི་ཡཱ་ལ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པི་ཡཱ་ལ་པུ་པྥི་ཡ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ཨ་མྦ་ཡཱ་ག་དཱ་ཡ་ཀ་ཏྠེ་ར་ཨ་པ་དཱ་ནཾ
༣༠. ‘‘ས་ཀེ སི་པྤེ ཨ་པ་ཏྠ་དྡྷོ, ཨ་ག་མཾ ཀཱ་ན་ནཾ ཨ་ཧཾ;
ས་མྦུ་དྡྷཾ ཡ་ནྟཾ དི་སྭཱ་ན, ཨ་མྦ་ཡཱ་གཾ ཨ་དཱ་ས་ཧཾ.
༣༡. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ དཱ་ན་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨ་མྦ་ཡཱ་ག་སྶི་དཾ ཕ་ལཾ.
༣༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་མྦ་ཡཱ་ག་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་མྦ་ཡཱ་ག་དཱ་ཡ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. ཛ་ག་ཏི་ཀཱ་ར་ཀ་ཏྠེ་ར་ཨ་པ་དཱ་ནཾ
༣༣. ‘‘ནི་བྦུ་ཏེ ལོ་ཀ་ནཱ་ཐ་མྷི, ཨ་ཏྠ་ད་སྶི ན་རུ་ཏྟ་མེ;
ཛ་ག་ཏཱི ཀཱ་རི་ཏཱ མ་ཡ྄ཧཾ, བུ་དྡྷ་སྶ ཐཱུ་པ་མུ་ཏྟ་མེ.
༣༤. ‘‘ཨ་ཊྛཱ་ར་སེ ཀ་པྤ་ས་ཏེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཛ་ག་ཏི་ཡཱ ཨི་དཾ ཕ་ལཾ.
༣༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཛ་ག་ཏི་ཀཱ་ར་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཛ་ག་ཏི་ཀཱ་ར་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. ཝཱ་སི་དཱ་ཡ་ཀ་ཏྠེ་ར་ཨ་པ་དཱ་ནཾ
༣༦. ‘‘ཀ་མྨཱ་རོ་ཧཾ པུ་རེ ཨཱ་སིཾ, ཏི་ཝ་རཱ་ཡཾ པུ་རུ་ཏྟ་མེ;
ཨེ་ཀཱ ཝཱ་སི མ་ཡཱ དི་ནྣཱ, ས་ཡ་མྦྷུཾ ཨ་པ་རཱ་ཛི་ཏཾ [ས་ཡ་མྦྷུ་མྷི་པ་རཱ་ཛི་ཏེ (?)].
༣༧. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཝཱ་སི་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཝཱ་སི་དཱ་ན་སྶི་དཾ ཕ་ལཾ.
༣༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝཱ་སི་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝཱ་སི་དཱ་ཡ་ཀ་ཏྠེ་ར་སྶཱ་པ་དཱ་ནཾ ད་ས་མཾ.
ཨུ་ད་ཀཱ་ས་ན་ཝ་གྒོ ཙ་ཏུ་ཝཱི་ས་ཏི་མོ.