༡༩. ཀུ་ཊ་ཛ་པུ་པྥི་ཡ་ཝ་གྒོ
༡. ཀུ་ཊ་ཛ་པུ་པྥི་ཡ་ཏྠེ་ར་ཨ་པ་དཱ་ནཾ
༡. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ས་ཏ་རཾ་སིཾ་ཝ ཨུ་གྒ་ཏཾ;
དི་སཾ ཨ་ནུ་ཝི་ལོ་ཀེ་ནྟཾ, ག་ཙྪ་ནྟཾ ཨ་ནི་ལ་ཉྫ་སེ.
༢. ‘‘ཀུ་ཊ་ཛཾ པུ་པྥི་ཏཾ དི་སྭཱ, སཾ་ཝི་ཏྠ་ཏ་ས་མོ་ཏྠ་ཏཾ;
རུ་ཀྑ་ཏོ ཨོ་ཙི་ནི་ཏྭཱ་ན, ཕུ་སྶ་སྶ ཨ་བྷི་རོ་པ་ཡིཾ.
༣. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤. ‘‘ཨི་ཏོ ས་ཏྟ་ར་སེ ཀ་པྤེ, ཏ་ཡོ ཨཱ་སུཾ སུ་པུ་པྥི་ཏཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༥. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀུ་ཊ་ཛ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀུ་ཊ་ཛ་པུ་པྥི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. བ་ནྡྷུ་ཛཱི་ཝ་ཀ་ཏྠེ་ར་ཨ་པ་དཱ་ནཾ
༦. ‘‘སི་དྡྷ་ཏྠོ ནཱ་མ ས་མྦུ་དྡྷོ, ས་ཡ་མྦྷཱུ ས་བྦྷི ཝ་ཎྞི་ཏོ;
ས་མཱ་དྷིཾ སོ ས་མཱ་པ་ནྣོ, ནི་སཱི་དི པ་བྦ་ཏ་ནྟ་རེ.
༧. ‘‘ཛཱ་ཏ་སྶ་རེ ག་ཝེ་ས་ནྟོ, ད་ཀ་ཛཾ པུ་པྥ་མུ་ཏྟ་མཾ;
བ་ནྡྷུ་ཛཱི་ཝ་ཀ་པུ་པྥཱ་ནི, ཨ་དྡ་སཾ ས་མ་ན་ནྟ་རཾ.
༨. ‘‘ཨུ་བྷོ ཧ་ཏྠེ་ཧི པ་གྒ་ཡ྄ཧ, ཨུ་པཱ་ག་ཙྪིཾ མ་ཧཱ་མུ་ནིཾ;
པ་ས་ནྣ་ཙི་ཏྟོ སུ་མ་ནོ, སི་དྡྷ་ཏྠ་སྶཱ་བྷི་རོ་པ་ཡིཾ.
༩. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༠. ‘‘ཨི་ཏོ ཙཱ་ཏུ་དྡ་སེ ཀ་པྤེ, ཨེ་ཀོ ཨཱ་སིཾ ཛ་ནཱ་དྷི་པོ;
ས་མུ་དྡ་ཀ་པྤོ ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལོ.
༡༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བ་ནྡྷུ་ཛཱི་ཝ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བ་ནྡྷུ་ཛཱི་ཝ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ཀོ་ཊུ་མྦ་རི་ཡ་ཏྠེ་ར་ཨ་པ་དཱ་ནཾ
༡༢. ‘‘ཀ་ཎི་ཀཱ་རཾ་ཝ ཛོ་ཏ་ནྟཾ, ནི་སི་ནྣཾ པ་བྦ་ཏ་ནྟ་རེ;
ཨ་པྤ་མེ་ཡྻཾ་ཝ ཨུ་ད་དྷིཾ, ཝི་ཏྠ་ཏཾ དྷ་ར་ཎིཾ ཡ་ཐཱ.
༡༣. ‘‘པཱུ་ཛི་ཏཾ [པ་རེ་ཏཾ (སཱི.)] དེ་ཝ་ས་ངྒྷེ་ན, ནི་ས་བྷཱ་ཛཱ་ནི་ཡཾ ཡ་ཐཱ;
ཧ་ཊྛོ ཧ་ཊྛེ་ན ཙི་ཏྟེ་ན, ཨུ་པཱ་ག་ཙྪིཾ ན་རུ་ཏྟ་མཾ.
༡༤. ‘‘ས་ཏྟ་པུ་པྥཱ་ནི པ་གྒ་ཡ྄ཧ, ཀོ་ཊུ་མྦ་ར་ས་མཱ་ཀུ་ལཾ;
བུ་དྡྷ་སྶ ཨ་བྷི་རོ་པེ་སིཾ, སི་ཁི་ནོ ལོ་ཀ་བ་ནྡྷུ་ནོ.
༡༥. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༦. ‘‘ཨི་ཏོ ཝཱི་ས་ཏི་ཀ་པྤ་མྷི, མ་ཧཱ་ནེ་ལ་ས་ནཱ་མ་ཀོ;
ཨེ་ཀོ ཨཱ་སི མ་ཧཱ་ཏེ་ཛོ, ཙ་ཀྐ་ཝ་ཏྟཱི མ་ཧ་བྦ་ལོ.
༡༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀོ་ཊུ་མྦ་རི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀོ་ཊུ་མྦ་རི་ཡ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. པ་ཉྩ་ཧ་ཏྠི་ཡ་ཏྠེ་ར་ཨ་པ་དཱ་ནཾ
༡༨. ‘‘ཏི་སྶོ ནཱ་མཱ་སི བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
པུ་ར་ཀྑ་ཏོ སཱ་ཝ་ཀེ་ཧི, ར་ཐི་ཡཾ པ་ཊི་པ་ཛྫ་ཐ.
༡༩. ‘‘པ་ཉྩ ཨུ་པྤ་ལ་ཧ་ཏྠཱ ཙ, ཙཱ་ཏུ་རཱ ཋ་པི་ཏཱ མ་ཡཱ;
ཨཱ་ཧུ་ཏིཾ དཱ་ཏུ་ཀཱ་མོ་ཧཾ, པ་གྒ་ཎྷིཾ ཝ་ཏ་སི་དྡྷི་ཡཱ [པུ་ཏྟོ་མྷི ཧི་ཏ་སི་དྡྷི་ཡཱ (སྱཱ.)].
༢༠. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ག་ཙྪ་ནྟཾ ཨ་ནྟ་རཱ་པ་ཎེ;
བུ་དྡྷ་རཾ་སཱི་ཧི ཕུ་ཊྛོ་སྨི [བུ་དྡྷ་རཾ་སྱཱ་བྷི་ཕུ་ཊྛོ་མྷི (སཱི.), བུ་དྡྷ་རཾ་སཱ་བྷི་གྷུ་ཊྛོ་སྨི (ཀ.)], པཱུ་ཛེ་སིཾ དྭི་པ་དུ་ཏྟ་མཾ.
༢༡. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༢. ‘‘ཨི་ཏོ ཏེ་ར་ས་ཀ་པྤ་མྷི, པ་ཉྩ སུ་ས་བྷ་ས་མྨ་ཏཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པ་ཉྩ་ཧ་ཏྠི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་ཉྩ་ཧ་ཏྠི་ཡ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ཨི་སི་མུ་གྒ་དཱ་ཡ་ཀ་ཏྠེ་ར་ཨ་པ་དཱ་ནཾ
༢༤. ‘‘ཨུ་དེ་ནྟཾ ས་ཏ་རཾ་སིཾ་ཝ, པཱི་ཏ་རཾ་སིཾ་ཝ [སི་ཏ་རཾ་སིཾ་ཝ (སཱི.)] བྷཱ་ཎུ་མཾ;
ཀ་ཀུ་དྷཾ ཝི་ལ་ས་ནྟཾ་ཝ, པ་དུ་མུ་ཏྟ་ར་ནཱ་ཡ་ཀཾ.
༢༥. ‘‘ཨི་སི་མུ་གྒཱ་ནི པི་སི་ཏྭཱ [ཨི་སི་སུ་གྒཱ་ནི པིཾ་སེ་ཏྭཱ (སཱི.), ཨི་སི་མུ་གྒཾ ནི་མ་ནྟེ་ཏྭཱ (སྱཱ.)], མ་དྷུ་ཁུ་དྡེ ཨ་ནཱི་ལ༹་ཀེ;
པཱ་སཱ་དེ་ཝ ཋི་ཏོ ས་ནྟོ, ཨ་དཱ་སིཾ ལོ་ཀ་བ་ནྡྷུ་ནོ.
༢༦. ‘‘ཨ་ཊྛ་ས་ཏ་ས་ཧ་སྶཱ་ནི, ཨ་ཧེ་སུཾ བུ་དྡྷ་སཱ་ཝ་ཀཱ;
ས་བྦེ་སཾ པ་ཏྟ་པཱུ་རེ་ནྟཾ [པ་ཏྟ་པཱུ་རཾ ཏཾ (སཱི.)], ཏ་ཏོ ཙཱ་པི བ་ཧུ་ཏྟ་རཾ.
༢༧. ‘‘ཏེ་ན ཙི་ཏྟ་པྤ་སཱ་དེ་ན, སུ་ཀྐ་མཱུ་ལེ་ན ཙོ་དི་ཏོ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༢༨. ‘‘ཙ་ཏྟཱ་ལཱི་ས་མྷི ས་ཧ་སྶེ, ཀ་པྤཱ་ནཾ ཨ་ཊྛ་ཏིཾ་ས ཏེ;
ཨི་སི་མུ་གྒ་ས་ནཱ་མཱ [མ་ཧི་ས་མ་ནྟ་ནཱ་མཱ (སྱཱ.)] ཏེ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨི་སི་མུ་གྒ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨི་སི་མུ་གྒ་དཱ་ཡ་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. བོ་དྷི་ཨུ་པ་ཊྛཱ་ཀ་ཏྠེ་ར་ཨ་པ་དཱ་ནཾ
༣༠. ‘‘ན་ག་རེ ར་མྨ་ཝ་ཏི་ཡཱ, ཨཱ་སིཾ མུ་ར་ཛ་ཝཱ་ད་ཀོ;
ནི་ཙྩུ་པ་ཊྛཱ་ན་ཡུ་ཏྟོ་མྷི, ག་ཏོ་ཧཾ བོ་དྷི་མུ་ཏྟ་མཾ.
༣༡. ‘‘སཱ་ཡཾ པཱ་ཏཾ ཨུ་པ་ཊྛི་ཏྭཱ, སུ་ཀྐ་མཱུ་ལེ་ན ཙོ་དི་ཏོ;
ཨ་ཊྛཱ་ར་ས་ཀ་པྤ་ས་ཏེ, དུ་གྒ་ཏིཾ ནུ་པ་པ་ཛྫ་ཧཾ.
༣༢. ‘‘པ་ནྣ་ར་སེ ཀ་པྤ་ས་ཏེ, ཨི་ཏོ ཨཱ་སིཾ ཛ་ནཱ་དྷི་པོ;
མུ་ར་ཛོ [ད་མ་ཐོ (སྱཱ.)] ནཱ་མ ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལོ.
༣༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བོ་དྷི་ཨུ་པ་ཊྛཱ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བོ་དྷི་ཨུ་པ་ཊྛཱ་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. ཨེ་ཀ་ཙི་ནྟི་ཀ་ཏྠེ་ར་ཨ་པ་དཱ་ནཾ
༣༤. ‘‘ཡ་དཱ དེ་ཝོ [དེ་ཝཱ (ཀ.)] དེ་ཝ་ཀཱ་ཡཱ, ཙ་ཝ་ཏེ [ཙ་ཝ་ནྟི (ཀ.)] ཨཱ་ཡུ་ས་ངྑ་ཡཱ;
ཏ་ཡོ ས་དྡཱ ནི་ཙྪ་ར་ནྟི, དེ་ཝཱ་ནཾ ཨ་ནུ་མོ་ད་ཏཾ.
༣༥. ‘ཨི་ཏོ བྷོ སུ་ག་ཏིཾ ག་ཙྪ, མ་ནུ་སྶཱ་ནཾ ས་ཧ་བྱ་ཏཾ;
མ་ནུ་སྶ་བྷཱུ་ཏོ ས་དྡྷ་མྨེ, ལ་བྷ ས་དྡྷཾ ཨ་ནུ་ཏྟ་རཾ.
༣༦. ‘‘‘སཱ ཏེ ས་དྡྷཱ ནི་ཝི་ཊྛཱ་སྶ, མཱུ་ལ་ཛཱ་ཏཱ པ་ཏི་ཊྛི་ཏཱ;
ཡཱ་ཝ་ཛཱི་ཝཾ ཨ་སཾ་ཧཱི་རཱ, ས་དྡྷ་མྨེ སུ་པྤ་ཝེ་དི་ཏེ.
༣༧. ‘‘‘ཀཱ་ཡེ་ན ཀུ་ས་ལཾ ཀ་ཏྭཱ, ཝཱ་ཙཱ་ཡ ཀུ་ས་ལཾ བ་ཧུཾ;
མ་ན་སཱ ཀུ་ས་ལཾ ཀ་ཏྭཱ, ཨ་བྱཱ་པ་ཛྫཾ [ཨ་བྱཱ་པ་ཛ྄ཛྷཾ (སྱཱ.), ཨ་པྤ་མཱ་ཎཾ (ཨི་ཏི་ཝུ་ཏྟ་ཀེ ༨༣)] ནི་རཱུ་པ་དྷིཾ.
༣༨. ‘‘‘ཏ་ཏོ ཨོ་པ་དྷི་ཀཾ པུ་ཉྙཾ, ཀ་ཏྭཱ དཱ་ནེ་ན ཏཾ བ་ཧུཾ;
ཨ་ཉྙེ་པི མ་ཙྩེ ས་དྡྷ་མྨེ, བྲ་ཧྨ་ཙ་རི་ཡེ ནི་ཝེ་ས་ཡ’.
༣༩. ‘‘ཨི་མཱ་ཡ ཨ་ནུ་ཀ་མྤཱ་ཡ, དེ་ཝཱ དེ་ཝཾ ཡ་དཱ ཝི་དཱུ;
ཙ་ཝ་ནྟཾ ཨ་ནུ་མོ་ད་ནྟི, ཨེ་ཧི དེ་ཝ པུ་ན་པྤུ་ནཾ [དེ་ཝ་པུ་རཾ པུ་ན (སྱཱ.)].
༤༠. ‘‘སཾ་ཝེ་གོ མེ [སཾ་ཝི་གྒོ་ཧཾ (སྱཱ.)] ཏ་དཱ ཨཱ་སི, དེ་ཝ་ས་ངྒྷེ ས་མཱ་ག་ཏེ;
ཀཾ་སུ ནཱ་མ ཨ་ཧཾ ཡོ་ནིཾ, ག་མི་སྶཱ་མི ཨི་ཏོ ཙུ་ཏོ.
༤༡. ‘‘མ་མ སཾ་ཝེ་ག་མ་ཉྙཱ་ཡ, ས་མ་ཎོ བྷཱ་ཝི་ཏི་ནྡྲི་ཡོ;
མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ས་ནྟི་ཀཾ.
༤༢. ‘‘སུ་མ་ནོ ནཱ་མ ནཱ་མེ་ན, པ་དུ་མུ་ཏྟ་ར་སཱ་ཝ་ཀོ;
ཨ་ཏྠ་དྷ་མྨཱ་ནུ་སཱ་སི་ཏྭཱ, སཾ་ཝེ་ཛེ་སི མ་མཾ ཏ་དཱ.
༤༣. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, བུ་དྡྷེ ཙི་ཏྟཾ པ་སཱ་ད་ཡིཾ;
ཏཾ དྷཱི་རཾ ཨ་བྷི་ཝཱ་དེ་ཏྭཱ, ཏ་ཏྠ ཀཱ་ལཾ་ཀ་ཏོ ཨ་ཧཾ.
༤༤. ‘‘ཨུ་པ་པ་ཛྫིཾ ས [ཨུ་པ་པ་ཛྫི་སྶཾ (སཱི.)] ཏ་ཏྠེ་ཝ, སུ་ཀྐ་མཱུ་ལེ་ན ཙོ་དི་ཏོ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༤༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་ཙི་ནྟི་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་ཙི་ནྟི་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ཏི་ཀ་ཎྞི་པུ་པྥི་ཡ་ཏྠེ་ར་ཨ་པ་དཱ་ནཾ
༤༦. ‘‘དེ་ཝ་བྷཱུ་ཏོ ཨ་ཧཾ ས་ནྟོ, ཨ་ཙྪ་རཱ་ཧི པུ་ར་ཀྑ་ཏོ;
པུ་བྦ་ཀ་མྨཾ ས་རི་ཏྭཱ་ན, བུ་དྡྷ་སེ་ཊྛཾ ཨ་ནུ་སྶ་རིཾ.
༤༧. ‘‘ཏི་ཀ་ཎྞི་པུ་པྥཾ [ཀིཾ་ཀ་ཎི་པུ་པྥཾ (ཀ.)] པ་གྒ་ཡ྄ཧ, ས་ཀཾ ཙི་ཏྟཾ པ་སཱ་ད་ཡིཾ;
བུ་དྡྷ་མྷི ཨ་བྷི་རོ་པེ་སིཾ, ཝི་པ་སྶི་མྷི ན་རཱ་ས་བྷེ.
༤༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤༩. ‘‘ཏེ་ས་ཏྟ་ཏི་མྷི་ཏོ ཀ་པྤེ, ཙ་ཏུ་རཱ་སུཾ ར་མུ་ཏྟ་མཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༥༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་ཀ་ཎྞི་པུ་པྥི་ཡོ [ཀིཾ་ཀ་ཎི་ཀ་པུ་པྥི་ཡོ (ཀ.)] ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་ཀ་ཎྞི་པུ་པྥི་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. ཨེ་ཀ་ཙཱ་རི་ཡ་ཏྠེ་ར་ཨ་པ་དཱ་ནཾ
༥༡. ‘‘ཏཱ་ཝ་ཏིཾ་སེ་སུ དེ་ཝེ་སུ, མ་ཧཱ་གྷོ་སོ ཏ་དཱ ཨ་ཧུ;
བུ་དྡྷོ ཙ ལོ་ཀེ ནི་བྦཱ་ཏི, མ་ཡ་ཉྩ་མྷ ས་རཱ་གི་ནོ.
༥༢. ‘‘ཏེ་སཾ སཾ་ཝེ་ག་ཛཱ་ཏཱ་ནཾ, སོ་ཀ་ས་ལླ་ས་མ་ངྒི་ནཾ;
ས་བ་ལེ་ན ཨུ་པ་ཏྠ་དྡྷོ, ཨ་ག་མཾ བུ་དྡྷ་ས་ནྟི་ཀཾ.
༥༣. ‘‘མ་ནྡཱ་ར་ཝཾ ག་ཧེ་ཏྭཱ་ན, ས་ངྒཱི་ཏི [ས་ཎྷི་ཏཾ (སཱི.), ས་ངྒི་ཏཾ (སྱཱ.)] ཨ་བྷི་ནི་མྨི་ཏཾ;
པ་རི་ནི་བྦུ་ཏ་ཀཱ་ལ་མྷི, བུ་དྡྷ་སྶ ཨ་བྷི་རོ་པ་ཡིཾ.
༥༤. ‘‘ས་བྦེ དེ་ཝཱ་ནུ་མོ་དིཾ་སུ, ཨ་ཙྪ་རཱ་ཡོ ཙ མེ ཏ་དཱ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༥༥. ‘‘ས་ཊྛི་ཀ་པྤ་ས་ཧ་སྶ་མྷི, ཨི་ཏོ སོ་ལ༹་ས ཏེ ཛ་ནཱ;
མ་ཧཱ་མ་ལླ་ཛ་ནཱ ནཱ་མ, ཙ་ཀྐ་ཝ་ཏྟཱི མ་ཧ་བྦ་ལཱ.
༥༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་ཙཱ་རི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་ཙཱ་རི་ཡ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. ཏི་ཝ་ཎྚི་པུ་པྥི་ཡ་ཏྠེ་ར་ཨ་པ་དཱ་ནཾ
༥༧. ‘‘ཨ་བྷི་བྷཱུ་ཏཾ པ་ནི་ཛ྄ཛྷ་ནྟི [ཨ་བྷི་བྷཱུ་ཏོ་པ་ནི་ཛ྄ཛྷ་ནྟི (སཱི.)], ས་བྦེ ས་ངྒ་མྨ ཏེ མ་མཾ [ཨ་བྷི་བྷུཾ ཐེ་རཾ པ་ནི་ཛ྄ཛྷཱ་མ, ས་བྦེ ས་ངྒ་མྨ ཏེ མ་ཡཾ (སྱཱ.)];
ཏེ་སཾ ནི་ཛ྄ཛྷཱ་ཡ་མཱ་ནཱ་ནཾ, པ་རི་ལཱ༹་ཧོ ཨ་ཛཱ་ཡ་ཐ.
༥༨. ‘‘སུ་ན་ནྡོ ནཱ་མ ནཱ་མེ་ན, བུ་དྡྷ་སྶ སཱ་ཝ་ཀོ ཏ་དཱ;
དྷ་མྨ་ད་སྶི་སྶ མུ་ནི་ནོ, ཨཱ་ག་ཙྪི མ་མ ས་ནྟི་ཀཾ.
༥༩. ‘‘ཡེ མེ བ་དྡྷ་ཙ་རཱ ཨཱ་སུཾ, ཏེ མེ པུ་པྥཾ ཨ་དུཾ ཏ་དཱ;
ཏཱ་ཧཾ པུ་པྥཾ ག་ཧེ་ཏྭཱ་ན, སཱ་ཝ་ཀེ ཨ་བྷི་རོ་པ་ཡིཾ.
༦༠. ‘‘སོ་ཧཾ ཀཱ་ལཾ་ཀ་ཏོ ཏ་ཏྠ, པུ་ནཱ་པི ཨུ་པ་པ་ཛྫ་ཧཾ;
ཨ་ཊྛཱ་ར་སེ ཀ་པྤ་ས་ཏེ, ཝི་ནི་པཱ་ཏཾ ན ག་ཙྪ་ཧཾ.
༦༡. ‘‘ཏེ་ར་སེ་ཏོ ཀ་པྤ་ས་ཏེ, ཨ་ཊྛཱ་སུཾ དྷཱུ་མ་ཀེ་ཏུ་ནོ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༦༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་ཝ་ཎྚི་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཏི་ཝ་ཎྚི་པུ་པྥི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
ཀུ་ཊ་ཛ་པུ་པྥི་ཡ་ཝ་གྒོ ཨེ་ཀཱུ་ན་ཝཱི་ས་ཏི་མོ.