༡༨. ཀུ་མུ་ད་ཝ་གྒོ
༡. ཀུ་མུ་ད་མཱ་ལི་ཡ་ཏྠེ་ར་ཨ་པ་དཱ་ནཾ
༡. ‘‘པ་བྦ་ཏེ ཧི་མ་ཝ་ནྟ་མྷི, མ་ཧཱ་ཛཱ་ཏ་སྶ་རོ ཨ་ཧུ;
ཏ་ཏྠ་ཛོ ར་ཀྑ་སོ ཨཱ་སིཾ, གྷོ་ར་རཱུ་པོ མ་ཧ་བྦ་ལོ.
༢. ‘‘ཀུ་མུ་དཾ པུ་པྥ་ཏེ ཏ་ཏྠ, ཙ་ཀྐ་མ་ཏྟཱ་ནི ཛཱ་ཡ་རེ;
ཨོ་ཙི་ནཱ་མི ཙ ཏཾ པུ་པྥཾ, བ་ལི་ནོ ས་མི་ཏིཾ ཏ་དཱ.
༣. ‘‘ཨ་ཏྠ་ད་སྶཱི ཏུ བྷ་ག་ཝཱ, དྭི་པ་དི་ནྡོ ན་རཱ་ས་བྷོ;
པུ་པྥ་ས་ངྐོ་ཙི་ཏཾ [པུ་པྥཾ ས་ངྐོ་ཙི་ཏཾ (སཱི. སྱཱ.), པུ་པྥཾ ས་མོ་ཙི་ཏཾ (?)] དི་སྭཱ, ཨཱ་ག་ཙྪི མ་མ ས་ནྟི་ཀཾ.
༤. ‘‘ཨུ་པཱ་ག་ཏ་ཉྩ ས་མྦུ་དྡྷཾ, དེ་ཝ་དེ་ཝཾ ན་རཱ་ས་བྷཾ;
ས་བྦ་ཉྩ པུ་པྥཾ པ་གྒ་ཡ྄ཧ, བུ་དྡྷ་སྶ ཨ་བྷི་རོ་པ་ཡིཾ.
༥. ‘‘ཡཱ་ཝ་ཏཱ ཧི་མ་ཝ་ནྟ་ནྟཱ, པ་རི་སཱ སཱ [ཧི་མ་ཝ་ནྟ་སྨིཾ, ཡཱ་ཝ མཱ་ལཱ (སྱཱ.)] ཏ་དཱ ཨ་ཧུ;
ཏཱ་ཝ་ཙྪ་ད་ན་ས་མྤ་ནྣོ, ཨ་ག་མཱ་སི ཏ་ཐཱ་ག་ཏོ.
༦. ‘‘ཨ་ཊྛཱ་ར་སེ ཀ་པྤ་ས་ཏེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༧. ‘‘ཨི་ཏོ པ་ནྣ་ར་སེ ཀ་པྤེ, ས་ཏྟཱ་ཧེ་སུཾ ཛ་ནཱ་དྷི་པཱ;
ས་ཧ་སྶ་ར་ཐ་ནཱ་མཱ ཏེ, ཙ་ཀྐ་ཝ་ཏྟཱི མ་ཧ་བྦ་ལཱ.
༨. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀུ་མུ་ད་མཱ་ལི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀུ་མུ་ད་མཱ་ལི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ནི་སྶེ་ཎི་དཱ་ཡ་ཀ་ཏྠེ་ར་ཨ་པ་དཱ་ནཾ
༩. ‘‘ཀོ་ཎྜ་ཉྙ་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
ཨཱ་རོ་ཧ་ཏྠཱ་ཡ པཱ་སཱ་དཾ, ནི་སྶེ་ཎཱི ཀཱ་རི་ཏཱ མ་ཡཱ.
༡༠. ‘‘ཏེ་ན ཙི་ཏྟ་པྤ་སཱ་དེ་ན, ཨ་ནུ་བྷོ་ཏྭཱ་ན ས་མྤ་དཱ;
དྷཱ་རེ་མི ཨ་ནྟི་མཾ དེ་ཧཾ, ས་མྨཱ་ས་མྦུ་དྡྷ་སཱ་ས་ནེ.
༡༡. ‘‘ཨེ་ཀ་ཏྟིཾ་ས་མྷི ཀ་པྤཱ་ནཾ, ས་ཧ་སྶ་མྷི ཏ་ཡོ ཨ་ཧུཾ [མ་ཧཱ (སཱི. སྱཱ.)];
ས་མྦ་ཧུ་ལཱ ནཱ་མ རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༡༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ནི་སྶེ་ཎི་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ནི་སྶེ་ཎི་དཱ་ཡ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ར་ཏྟི་པུ་པྥི་ཡ་ཏྠེ་ར་ཨ་པ་དཱ་ནཾ
༡༣. ‘‘མི་ག་ལུ་དྡོ པུ་རེ ཨཱ་སིཾ, ཨ་ར་ཉྙེ ཀཱ་ན་ནེ ཨ་ཧཾ;
ཝི་པ་སྶིཾ ཨ་དྡ་སཾ བུ་དྡྷཾ, དེ་ཝ་དེ་ཝཾ ན་རཱ་ས་བྷཾ.
༡༤. ‘‘ར་ཏྟི་ཀཾ པུ་པྥི་ཏཾ དི་སྭཱ, ཀུ་ཊ་ཛཾ དྷ་ར་ཎཱི་རུ་ཧཾ;
ས་མཱུ་ལཾ པ་གྒ་ཧེ་ཏྭཱ་ན, ཨུ་པ་ནེ་སིཾ མ་ཧེ་སི་ནོ.
༡༥. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་པྥ་དཱ་ན་སྶི་དཾ ཕ་ལཾ.
༡༦. ‘‘ཨི་ཏོ ཙ ཨ་ཊྛ་མེ ཀ་པྤེ, སུ་པྤ་ས་ནྣ་ས་ནཱ་མ་ཀོ;
ས་ཏྟ་ར་ཏ་ན་ས་མྤ་ནྣོ, རཱ་ཛཱ་ཧོ་སིཾ མ་ཧ་བྦ་ལོ.
༡༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ར་ཏྟི་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ར་ཏྟི་པུ་པྥི་ཡ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཨུ་ད་པཱ་ན་དཱ་ཡ་ཀ་ཏྠེ་ར་ཨ་པ་དཱ་ནཾ
༡༨. ‘‘ཝི་པ་སྶི་ནོ བྷ་ག་ཝ་ཏོ, ཨུ་ད་པཱ་ནོ ཀ་ཏོ མ་ཡཱ;
པི་ཎྜ་པཱ་ཏ་ཉྩ ད་ཏྭཱ་ན [ག་ཧེ་ཏྭཱ་ན (སྱཱ.)], ནི་ཡྻཱ་དེ་སི་མ་ཧཾ ཏ་དཱ.
༡༩. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་ད་པཱ་ན་སྶི་དཾ ཕ་ལཾ.
༢༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་ད་པཱ་ན་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་ད་པཱ་ན་དཱ་ཡ་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. སཱི་ཧཱ་ས་ན་དཱ་ཡ་ཀ་ཏྠེ་ར་ཨ་པ་དཱ་ནཾ
༢༡. ‘‘ནི་བྦུ་ཏེ ལོ་ཀ་ནཱ་ཐ་མྷི, པ་དུ་མུ་ཏྟ་ར་ནཱ་ཡ་ཀེ;
པ་ས་ནྣ་ཙི་ཏྟོ སུ་མ་ནོ, སཱི་ཧཱ་ས་ན་མ་དཱ་ས་ཧཾ.
༢༢. ‘‘བ་ཧཱུ་ཧི ག་ནྡྷ་མཱ་ལེ་ཧི, དི་ཊྛ་དྷ་མྨ་སུ་ཁཱ་ཝ་ཧེ;
ཏ་ཏྠ པཱུ་ཛ་ཉྩ ཀ་ཏྭཱ་ན, ནི་བྦཱ་ཡ་ཏི བ་ཧུ་ཛྫ་ནོ.
༢༣. ‘‘པ་ས་ནྣ་ཙི་ཏྟོ སུ་མ་ནོ, ཝ་ནྡི་ཏྭཱ བོ་དྷི་མུ་ཏྟ་མཾ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༢༤. ‘‘པ་ནྣ་ར་ས་ས་ཧ་སྶ་མྷི, ཀ་པྤཱ་ནཾ ཨ་ཊྛ ཨཱ་སུ ཏེ [ཨ་ཊྛ ཨཱ་ས་ཡུཾ (ཀ.)];
སི་ལུ་ཙྩ་ཡ་ས་ནཱ་མཱ ཙ, རཱ་ཛཱ་ནོ ཙ་ཀྐ་ཝ་ཏྟི་ནོ.
༢༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སཱི་ཧཱ་ས་ན་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
སཱི་ཧཱ་ས་ན་དཱ་ཡ་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. མ་གྒ་ད་ཏྟི་ཀ་ཏྠེ་ར་ཨ་པ་དཱ་ནཾ
༢༦. ‘‘ཨ་ནོ་མ་ད་སྶཱི བྷ་ག་ཝཱ, དྭི་པ་དི་ནྡོ ན་རཱ་ས་བྷོ;
དི་ཊྛ་དྷ་མྨ་སུ་ཁ་ཏྠཱ་ཡ, ཨ་བྦྷོ་ཀཱ་ས་མྷི ཙ་ངྐ་མི.
༢༧. ‘‘ཨུ་དྡྷ་ཏེ པཱ་དེ པུ་པྥཱ་ནི, སོ་བྷཾ མུ་དྡྷ་ནི ཏི་ཊྛ་རེ;
པ་ས་ནྣ་ཙི་ཏྟོ སུ་མ་ནོ, ཝ་ནྡི་ཏྭཱ པུ་པྥ་མོ་ཀི་རིཾ.
༢༨. ‘‘ཝཱི་ས་ཀ་པྤ་ས་ཧ་སྶ་མྷི, ཨི་ཏོ པ་ཉྩ ཛ་ནཱ ཨ་ཧུཾ;
པུ་པྥ་ཙྪ་ད་ནི་ཡཱ ནཱ་མ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་གྒ་ད་ཏྟི་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་གྒ་ད་ཏྟི་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. ཨེ་ཀ་དཱི་པི་ཡ་ཏྠེ་ར་ཨ་པ་དཱ་ནཾ
༣༠. ‘‘པ་དུ་མུ་ཏྟ་ར་སྶ མུ་ནི་ནོ, ས་ལ༹་ལེ བོ་དྷི་མུ་ཏྟ་མེ;
པ་ས་ནྣ་ཙི་ཏྟོ སུ་མ་ནོ, ཨེ་ཀ་དཱི་པཾ ཨ་དཱ་ས་ཧཾ.
༣༡. ‘‘བྷ་ཝེ ནི་བྦ་ཏྟ་མཱ་ན་མྷི, ནི་བྦ་ཏྟེ པུ་ཉྙ་ས་ཉྩ་ཡེ;
དུ་གྒ་ཏིཾ ནཱ་བྷི་ཛཱ་ནཱ་མི, དཱི་པ་དཱ་ན་སྶི་དཾ ཕ་ལཾ.
༣༢. ‘‘སོ་ལ༹་སེ ཀ་པྤ་ས་ཧ་སྶེ, ཨི་ཏོ ཏེ ཙ་ཏུ་རོ ཛ་ནཱ;
ཙ་ནྡཱ་བྷཱ ནཱ་མ ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལཱ.
༣༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་དཱི་པི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་དཱི་པི་ཡ་ཏྠེ་ར་སྶཱ་པ་དཱ་ནཾ ས་ཏྟ་མཾ.
ན་ཝ་མཾ བྷཱ་ཎ་ཝཱ་རཾ.
༨. མ་ཎི་པཱུ་ཛ་ཀ་ཏྠེ་ར་ཨ་པ་དཱ་ནཾ
༣༤. ‘‘ཨོ་རེ་ན ཧི་མ་ཝ་ནྟ་སྶ, ན་དི་ཀཱ ས་མྤ་ཝ་ཏྟ་ཐ;
ཏ་སྶཱ ཙཱ་ནུ་པ་ཁེ་ཏྟ་མྷི, ས་ཡ་མྦྷཱུ ཝ་ས་ཏེ ཏ་དཱ.
༣༥. ‘‘མ་ཎིཾ པ་གྒ་ཡ྄ཧ པ་ལླ་ངྐཾ, སཱ་དྷུ་ཙི་ཏྟཾ མ་ནོ་ར་མཾ;
པ་ས་ནྣ་ཙི་ཏྟོ སུ་མ་ནོ, བུ་དྡྷ་སྶ ཨ་བྷི་རོ་པ་ཡིཾ.
༣༦. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ མ་ཎིཾ ཨ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༣༧. ‘‘ཨི་ཏོ ཙ དྭཱ་ད་སེ ཀ་པྤེ, ས་ཏ་རཾ་སཱི་ས་ནཱ་མ་ཀཱ;
ཨ་ཊྛ ཏེ ཨཱ་སུཾ རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༣༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་ཎི་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་ཎི་པཱུ་ཛ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. ཏི་ཀི་ཙྪ་ཀ་ཏྠེ་ར་ཨ་པ་དཱ་ནཾ
༣༩. ‘‘ན་ག་རེ བ་ནྡྷུ་མ་ཏི་ཡཱ, ཝེ་ཛྫོ ཨཱ་སིཾ སུ་སི་ཀྑི་ཏོ;
ཨཱ་ཏུ་རཱ་ནཾ ས་དུ་ཀྑཱ་ནཾ, མ་ཧཱ་ཛ་ན་སུ་ཁཱ་ཝ་ཧོ.
༤༠. ‘‘བྱཱ་དྷི་ཏཾ ས་མ་ཎཾ དི་སྭཱ, སཱི་ལ་ཝ་ནྟཾ མ་ཧཱ་ཛུ་ཏིཾ;
པ་ས་ནྣ་ཙི་ཏྟོ སུ་མ་ནོ, བྷེ་ས་ཛྫ་མ་ད་དིཾ ཏ་དཱ.
༤༡. ‘‘ཨ་རོ་གོ ཨཱ་སི ཏེ་ནེ་ཝ, ས་མ་ཎོ སཾ་ཝུ་ཏི་ནྡྲི་ཡོ;
ཨ་སོ་ཀོ ནཱ་མ ནཱ་མེ་ན, ཨུ་པ་ཊྛཱ་ཀོ ཝི་པ་སྶི་ནོ.
༤༢. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཨོ་ས་དྷ་མ་དཱ་ས་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, བྷེ་ས་ཛྫ་སྶ ཨི་དཾ ཕ་ལཾ.
༤༣. ‘‘ཨི་ཏོ ཙ ཨ་ཊྛ་མེ ཀ་པྤེ, ས་བྦོ་ས་དྷ་ས་ནཱ་མ་ཀོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༤༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་ཀི་ཙྪ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་ཀི་ཙྪ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. ས་ངྒྷུ་པ་ཊྛཱ་ཀ་ཏྠེ་ར་ཨ་པ་དཱ་ནཾ
༤༥. ‘‘ཝེ་སྶ་བྷུ་མྷི བྷ་ག་ཝ་ཏི, ཨ་ཧོ་སཱ་རཱ་མི་ཀོ ཨ་ཧཾ;
པ་ས་ནྣ་ཙི་ཏྟོ སུ་མ་ནོ, ཨུ་པ་ཊྛིཾ ས་ངྒྷ་མུ་ཏྟ་མཾ.
༤༦. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་པ་ཊྛཱ་ན་སྶི་དཾ ཕ་ལཾ.
༤༧. ‘‘ཨི་ཏོ ཏེ ས་ཏྟ་མེ ཀ་པྤེ, ས་ཏྟེ་ཝཱ་སུཾ ས་མོ་ད་ཀཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༤༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་ངྒྷུ་པ་ཊྛཱ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་ངྒྷུ་པ་ཊྛཱ་ཀ་ཏྠེ་ར་སྶཱ་པ་དཱ་ནཾ ད་ས་མཾ.
ཀུ་མུ་ད་ཝ་གྒོ ཨ་ཊྛཱ་ར་ས་མོ.