༡༦. བ་ནྡྷུ་ཛཱི་ཝ་ཀ་ཝ་གྒོ
༡. བ་ནྡྷུ་ཛཱི་ཝ་ཀ་ཏྠེ་ར་ཨ་པ་དཱ་ནཾ
༡. ‘‘ཙ་ནྡཾ་ཝ ཝི་མ་ལཾ སུ་དྡྷཾ, ཝི་པྤ་ས་ནྣ་མ་ནཱ་ཝི་ལཾ;
ན་ནྡཱི་བྷ་ཝ་པ་རི་ཀྑཱི་ཎཾ, ཏི་ཎྞཾ ལོ་ཀེ ཝི་ས་ཏྟི་ཀཾ.
༢. ‘‘ནི་བྦཱ་པ་ཡ་ནྟཾ ཛ་ན་ཏཾ, ཏི་ཎྞཾ [དི་སྭཱ (?)] ཏཱ་ར་ཡ་ཏཾ ཝ་རཾ [ཏཱ་ར་ཡ་ཏཾ མུ་ནིཾ (སྱཱ.)];
མུ་ནིཾ ཝ་ན་མྷི ཛྷཱ་ཡ་ནྟཾ [ཝ་ན་སྨིཾ ཛྷཱ་ཡ་མཱ་ནཾ ཏཾ (སཱི. སྱཱ.)], ཨེ་ཀ་གྒཾ སུ་ས་མཱ་ཧི་ཏཾ.
༣. ‘‘བ་ནྡྷུ་ཛཱི་ཝ་ཀ་པུ་པྥཱ་ནི, ལ་གེ་ཏྭཱ སུ་ཏྟ་ཀེ་ན་ཧཾ;
བུ་དྡྷ་སྶ ཨ་བྷི་རོ་པ་ཡིཾ, སི་ཁི་ནོ ལོ་ཀ་བ་ནྡྷུ་ནོ.
༤. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༥. ‘‘ཨི་ཏོ ས་ཏྟ་མ་ཀེ ཀ་པྤེ, མ་ནུ་ཛི་ནྡོ མ་ཧཱ་ཡ་སོ;
ས་མ་ནྟ་ཙ་ཀྑུ ནཱ་མཱ་སི, ཙ་ཀྐ་ཝ་ཏྟཱི མ་ཧ་བྦ་ལོ.
༦. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བ་ནྡྷུ་ཛཱི་ཝ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བ་ནྡྷུ་ཛཱི་ཝ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ཏ་མྦ་པུ་པྥི་ཡ་ཏྠེ་ར་ཨ་པ་དཱ་ནཾ
༧. ‘‘པ་ར་ཀ་མྨཱ་ཡ་ནེ ཡུ་ཏྟོ, ཨ་པ་རཱ་དྷཾ ཨ་ཀཱ་ས་ཧཾ;
ཝ་ན་ནྟཾ ཨ་བྷི་དྷཱ་ཝི་སྶཾ, བྷ་ཡ་ཝེ་ར་ས་མ་པྤི་ཏོ.
༨. ‘‘པུ་པྥི་ཏཾ པཱ་ད་པཾ དི་སྭཱ, པི་ཎྜི་བ་ནྡྷཾ སུ་ནི་མྨི་ཏཾ;
ཏ་མྦ་པུ་པྥཾ ག་ཧེ་ཏྭཱ་ན, བོ་དྷི་ཡཾ ཨོ་ཀི་རིཾ ཨ་ཧཾ.
༩. ‘‘ས་མྨ་ཛྫི་ཏྭཱ་ན ཏཾ བོ་དྷིཾ, པཱ་ཊ་ལིཾ པཱ་ད་པུ་ཏྟ་མཾ;
པ་ལླ་ངྐཾ ཨཱ་བྷུ་ཛི་ཏྭཱ་ན, བོ་དྷི་མཱུ་ལེ ཨུ་པཱ་ཝི་སིཾ.
༡༠. ‘‘ག་ཏ་མ་གྒཾ ག་ཝེ་ས་ནྟཱ, ཨཱ་ག་ཙྪུཾ མ་མ ས་ནྟི་ཀཾ;
ཏེ ཙ དི་སྭཱ་ན་ཧཾ ཏ་ཏྠ, ཨཱ་ཝ་ཛྫིཾ བོ་དྷི་མུ་ཏྟ་མཾ.
༡༡. ‘‘ཝ་ནྡི་ཏྭཱ་ན ཨ་ཧཾ བོ་དྷིཾ, ཝི་པྤ་ས་ནྣེ་ན ཙེ་ཏ་སཱ;
ཨ་ནེ་ཀ་ཏཱ་ལེ པ་པ་ཏིཾ, གི་རི་དུ་གྒེ བྷ་ཡཱ་ན་ཀེ.
༡༢. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བོ་དྷི་པཱུ་ཛཱ་ཡི་དཾ ཕ་ལཾ.
༡༣. ‘‘ཨི་ཏོ ཙ ཏ་ཏི་ཡེ ཀ་པྤེ, རཱ་ཛཱ སུ་ས་ཉྙ་ཏོ ཨ་ཧཾ [སཾ་ཐུ་སི་ཏོ ཨ་ཧུཾ (སཱི.)];
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༡༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏ་མྦ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏ་མྦ་པུ་པྥི་ཡ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ཝཱི་ཐི་ས་མྨ་ཛྫ་ཀ་ཏྠེ་ར་ཨ་པ་དཱ་ནཾ
༡༥. ‘‘ཨུ་དེ་ནྟཾ ས་ཏ་རཾ་སིཾ་ཝ, པཱི་ཏ་རཾ་སིཾ་ཝ [སི་ཏ་རཾ་སིཾ་ཝ (སཱི. སྱཱ.)] བྷཱ་ཎུ་མཾ;
པ་ནྣ་ར་སེ ཡ་ཐཱ ཙ་ནྡཾ, ནི་ཡྻ་ནྟཾ ལོ་ཀ་ནཱ་ཡ་ཀཾ.
༡༦. ‘‘ཨ་ཊྛ་ས་ཊྛི་ས་ཧ་སྶཱ་ནི, ས་བྦེ ཁཱི་ཎཱ་ས་ཝཱ ཨ་ཧུཾ;
པ་རི་ཝཱ་རིཾ་སུ ས་མྦུ་དྡྷཾ, དྭི་པ་དི་ནྡཾ ན་རཱ་ས་བྷཾ.
༡༧. ‘‘ས་མྨ་ཛྫི་ཏྭཱ་ན ཏཾ ཝཱི་ཐིཾ, ནི་ཡྻ་ནྟེ ལོ་ཀ་ནཱ་ཡ་ཀེ;
ཨུ་སྶཱ་པེ་སིཾ དྷ་ཛཾ ཏ་ཏྠ, ཝི་པྤ་ས་ནྣེ་ན ཙེ་ཏ་སཱ.
༡༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ དྷ་ཛཾ ཨ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, དྷ་ཛ་དཱ་ན་སྶི་དཾ ཕ་ལཾ.
༡༩. ‘‘ཨི་ཏོ ཙ་ཏུ་ཏྠ་ཀེ ཀ་པྤེ, རཱ་ཛཱ་ཧོ་སིཾ མ་ཧ་བྦ་ལོ;
ས་བྦཱ་ཀཱ་རེ་ན ས་མྤ་ནྣོ, སུ་དྷ་ཛོ ཨི་ཏི ཝི་སྶུ་ཏོ.
༢༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝཱི་ཐི་ས་མྨ་ཛྫ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝཱི་ཐི་ས་མྨ་ཛྫ་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཀ་ཀྐཱ་རུ་པུ་པྥ་པཱུ་ཛ་ཀ་ཏྠེ་ར་ཨ་པ་དཱ་ནཾ
༢༡. ‘‘དེ་ཝ་པུ་ཏྟོ ཨ་ཧཾ ས་ནྟོ, པཱུ་ཛ་ཡིཾ སི་ཁི་ནཱ་ཡ་ཀཾ;
ཀ་ཀྐཱ་རུ་པུ་པྥཾ པ་གྒ་ཡ྄ཧ, བུ་དྡྷ་སྶ ཨ་བྷི་རོ་པ་ཡིཾ.
༢༢. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༣. ‘‘ཨི་ཏོ ཙ ན་ཝ་མེ ཀ་པྤེ, རཱ་ཛཱ ས་ཏྟུ་ཏྟ་མོ ཨ་ཧུཾ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༢༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀ་ཀྐཱ་རུ་པུ་པྥ་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀ་ཀྐཱ་རུ་པུ་པྥ་པཱུ་ཛ་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. མ་ནྡཱ་ར་ཝ་པུ་པྥ་པཱུ་ཛ་ཀ་ཏྠེ་ར་ཨ་པ་དཱ་ནཾ
༢༥. ‘‘དེ་ཝ་པུ་ཏྟོ ཨ་ཧཾ ས་ནྟོ, པཱུ་ཛ་ཡིཾ སི་ཁི་ནཱ་ཡ་ཀཾ;
མ་ནྡཱ་ར་ཝེ་ན པུ་པྥེ་ན, བུ་དྡྷ་སྶ ཨ་བྷི་རོ་པ་ཡིཾ.
༢༦. ‘‘ས་ཏྟཱ་ཧཾ ཚ་ད་ནཾ ཨཱ་སི, དི་བྦཾ མཱ་ལཾ ཏ་ཐཱ་ག་ཏེ;
ས་བྦེ ཛ་ནཱ ས་མཱ་ག་ནྟྭཱ, ན་མ་སྶིཾ་སུ ཏ་ཐཱ་ག་ཏཾ.
༢༧. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༨. ‘‘ཨི་ཏོ ཙ ད་ས་མེ ཀ་པྤེ, རཱ་ཛཱ་ཧོ་སིཾ ཛུ་ཏི་ནྡྷ་རོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༢༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་ནྡཱ་ར་ཝ་པུ་པྥ་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་ནྡཱ་ར་ཝ་པུ་པྥ་པཱུ་ཛ་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཀ་ད་མྦ་པུ་པྥི་ཡ་ཏྠེ་ར་ཨ་པ་དཱ་ནཾ
༣༠. ‘‘ཧི་མ་ཝ་ནྟ་སྶཱ་ཝི་དཱུ་རེ, ཀུ་ཀྐུ་ཊོ ནཱ་མ པ་བྦ་ཏོ;
ཏ་མྷི པ་བྦ་ཏ་པཱ་ད་མྷི, ས་ཏྟ བུ་དྡྷཱ ཝ་ས་ནྟི ཏེ.
༣༡. ‘‘ཀ་ད་མྦཾ པུ་པྥི་ཏཾ དི་སྭཱ, དཱི་པ་རཱ་ཛཾ་ཝ ཨུ་གྒ་ཏཾ;
ཨུ་བྷོ ཧ་ཏྠེ་ཧི པ་གྒ་ཡ྄ཧ, ས་ཏྟ བུ་དྡྷེ ས་མོ་ཀི་རིཾ.
༣༢. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༣༣. ‘‘དྭེ་ན་ཝུ་ཏེ ཨི་ཏོ ཀ་པྤེ, ས་ཏྟཱ་སུཾ པུ་པྥ་ནཱ་མ་ཀཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༣༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀ་ད་མྦ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཀ་ད་མྦ་པུ་པྥི་ཡ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. ཏི་ཎ་སཱུ་ལ་ཀ་ཏྠེ་ར་ཨ་པ་དཱ་ནཾ
༣༥. ‘‘ཧི་མ་ཝ་ནྟ་སྶཱ་ཝི་དཱུ་རེ, བྷཱུ་ཏ་ག་ཎོ ནཱ་མ པ་བྦ་ཏོ;
ཝ་ས་ཏེ་ཀོ ཛི་ནོ ཏ་ཏྠ, ས་ཡ་མྦྷཱུ ལོ་ཀ་ནི་སྶ་ཊོ.
༣༦. ‘‘ཏི་ཎ་སཱུ་ལཾ ག་ཧེ་ཏྭཱ་ན, བུ་དྡྷ་སྶ ཨ་བྷི་རོ་པ་ཡིཾ;
ཨེ་ཀཱུ་ན་ས་ཏ་ས་ཧ་སྶཾ, ཀ་པྤཾ ན ཝི་ནི་པཱ་ཏི་ཀོ.
༣༧. ‘‘ཨི་ཏོ ཨེ་ཀཱ་ད་སེ ཀ་པྤེ, ཨེ་ཀོ་སིཾ དྷ་ར་ཎཱི་རུ་ཧོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༣༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་ཎ་སཱུ་ལ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་ཎ་སཱུ་ལ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ནཱ་ག་པུ་པྥི་ཡ་ཏྠེ་ར་ཨ་པ་དཱ་ནཾ
༣༩. ‘‘སུ་ཝ་ཙྪོ ནཱ་མ ནཱ་མེ་ན, བྲཱ་ཧྨ་ཎོ མ་ནྟ་པཱ་ར་གཱུ;
པུ་ར་ཀྑ་ཏོ ས་སི་སྶེ་ཧི, ཝ་ས་ཏེ པ་བྦ་ཏ་ནྟ་རེ.
༤༠. ‘‘པ་དུ་མུ་ཏྟ་རོ ནཱ་མ ཛི་ནོ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ས་ནྟི་ཀཾ.
༤༡. ‘‘ཝེ་ཧཱ་ས་མྷི ཙ་ངྐ་མ་ཏི, དྷཱུ་པཱ་ཡ་ཏི ཛ་ལ་ཏེ ཏ་ཐཱ;
ཧཱ་སཾ མ་མཾ ཝི་དི་ཏྭཱ་ན, པ་ཀྐཱ་མི པཱ་ཙི་ནཱ་མུ་ཁོ.
༤༢. ‘‘ཏ་ཉྩ ཨ་ཙྪ་རི་ཡཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
ནཱ་ག་པུ་པྥཾ ག་ཧེ་ཏྭཱ་ན, ག་ཏ་མ་གྒ་མྷི ཨོ་ཀི་རིཾ.
༤༣. ‘‘ས་ཏ་ས་ཧ་སྶི་ཏོ ཀ་པྤེ, ཡཾ པུ་པྥཾ ཨོ་ཀི་རིཾ ཨ་ཧཾ;
ཏེ་ན ཙི་ཏྟ་པྤ་སཱ་དེ་ན, དུ་གྒ་ཏིཾ ནུ་པ་པ་ཛྫ་ཧཾ.
༤༤. ‘‘ཨེ་ཀ་ཏྟིཾ་སེ ཀ་པྤ་ས་ཏེ [ཨེ་ཀ་ཏིཾ་སེ ཨི་ཏོ ཀ་མྨེ (སྱཱ.)], རཱ་ཛཱ ཨཱ་སི མ་ཧཱ་ར་ཧོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༤༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ནཱ་ག་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ནཱ་ག་པུ་པྥི་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. པུ་ནྣཱ་ག་པུ་པྥི་ཡ་ཏྠེ་ར་ཨ་པ་དཱ་ནཾ
༤༦. ‘‘ཀཱ་ན་ནཾ ཝ་ན་མོ་ག་ཡ྄ཧ, ཝ་སཱ་མི ལུ་དྡ་ཀོ ཨ་ཧཾ;
པུ་ནྣཱ་གཾ པུ་པྥི་ཏཾ དི་སྭཱ, བུ་དྡྷ་སེ་ཊྛཾ ཨ་ནུ་སྶ་རིཾ.
༤༧. ‘‘ཏཾ པུ་པྥཾ ཨོ་ཙི་ནི་ཏྭཱ་ན, སུ་ག་ནྡྷཾ ག་ནྡྷི་ཏཾ སུ་བྷཾ;
ཐཱུ་པཾ ཀ་རི་ཏྭཱ པུ་ལི་ནེ, བུ་དྡྷ་སྶ ཨ་བྷི་རོ་པ་ཡིཾ.
༤༨. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤༩. ‘‘ཨེ་ཀ་མྷི ན་ཝུ་ཏེ ཀ་པྤེ, ཨེ་ཀོ ཨཱ་སིཾ ཏ་མོ་ནུ་དོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༥༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་ནྣཱ་ག་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པུ་ནྣཱ་ག་པུ་པྥི་ཡ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. ཀུ་མུ་ད་དཱ་ཡ་ཀ་ཏྠེ་ར་ཨ་པ་དཱ་ནཾ
༥༡. ‘‘ཧི་མ་ཝ་ནྟ་སྶཱ་ཝི་དཱུ་རེ, མ་ཧཱ་ཛཱ་ཏ་སྶ་རོ ཨ་ཧུ;
པ་དུ་མུ་པྤ་ལ་ས་ཉྪ་ནྣོ, པུ་ཎྜ་རཱི་ཀ་ས་མོ་ཏྠ་ཊོ.
༥༢. ‘‘ཀུ་ཀུ་ཏྠོ ནཱ་མ ནཱ་མེ་ན, ཏ་ཏྠཱ་སིཾ ས་ཀུ་ཎོ ཏ་དཱ;
སཱི་ལ་ཝཱ བུ་དྡྷི་ས་མྤ་ནྣོ, པུ་ཉྙཱ་པུ་ཉྙེ་སུ ཀོ་ཝི་དོ.
༥༣. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཛཱ་ཏ་སྶ་ར་སྶཱ་ཝི་དཱུ་རེ, ས་ཉྩ་རི་ཏྠ མ་ཧཱ་མུ་ནི.
༥༤. ‘‘ཛ་ལ་ཛཾ ཀུ་མུ་དཾ ཚེ་ཏྭཱ, ཨུ་པ་ནེ་སིཾ མ་ཧེ་སི་ནོ;
མ་མ ས་ངྐ་པྤ་མ་ཉྙཱ་ཡ, པ་ཊི་གྒ་ཧི མ་ཧཱ་མུ་ནི.
༥༥. ‘‘ཏ་ཉྩ དཱ་ནཾ ད་དི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༥༦. ‘‘སོ་ལ༹་སེ་ཏོ ཀ་པྤ་ས་ཏེ, ཨཱ་སུཾ ཝ་རུ་ཎ་ནཱ་མ་ཀཱ;
ཨ་ཊྛ ཨེ་ཏེ ཛ་ནཱ་དྷི་པཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༥༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀུ་མུ་ད་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀུ་མུ་ད་དཱ་ཡ་ཀ་ཏྠེ་ར་སྶཱ་པ་དཱ་ནཾ ད་ས་མཾ.
བ་ནྡྷུ་ཛཱི་ཝ་ཀ་ཝ་གྒོ སོ་ལ༹་ས་མོ.