༡༥. ཚ་ཏྟ་ཝ་གྒོ
༡. ཨ་ཏི་ཚ་ཏྟི་ཡ་ཏྠེ་ར་ཨ་པ་དཱ་ནཾ
༡. ‘‘པ་རི་ནི་བྦུ་ཏེ བྷ་ག་ཝ་ཏི, ཨ་ཏྠ་ད་སྶཱི་ན་རུ་ཏྟ་མེ;
ཚ་ཏྟཱ་ཏི་ཚ་ཏྟཾ [ཚ་ཏྟཱ་དྷི་ཚ་ཏྟཾ (སཱི.)] ཀཱ་རེ་ཏྭཱ, ཐཱུ་པ་མྷི ཨ་བྷི་རོ་པ་ཡིཾ.
༢. ‘‘ཀཱ་ལེ་ན ཀཱ་ལ་མཱ་ག་ནྟྭཱ, ན་མ་སྶིཾ ལོ་ཀ་ནཱ་ཡ་ཀཾ [ས་ཏྠུ ཙེ་ཏི་ཡཾ (སཱི.)];
པུ་པྥ་ཙྪ་ད་ནཾ ཀ་ཏྭཱ་ན, ཚ་ཏྟ་མྷི ཨ་བྷི་རོ་པ་ཡིཾ.
༣. ‘‘ས་ཏྟ་ར་སེ ཀ་པྤ་ས་ཏེ, དེ་ཝ་ར་ཛྫ་མ་ཀཱ་ར་ཡིཾ;
མ་ནུ་སྶ་ཏྟཾ ན ག་ཙྪཱ་མི, ཐཱུ་པ་པཱུ་ཛཱ་ཡི་དཾ ཕ་ལཾ.
༤. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་ཏི་ཚ་ཏྟི་ཡོ [ཨ་དྷི་ཚ་ཏྟི་ཡོ (སཱི. སྱཱ.)] ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་ཏི་ཚ་ཏྟི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ཐ་མྦྷཱ་རོ་པ་ཀ་ཏྠེ་ར་ཨ་པ་དཱ་ནཾ
༥. ‘‘ནི་བྦུ་ཏེ ལོ་ཀ་ནཱ་ཐ་མྷི, དྷ་མྨ་ད་སྶཱི་ན་རཱ་ས་བྷེ;
ཨཱ་རོ་པེ་སིཾ དྷ་ཛ་ཏྠ་མྦྷཾ, བུ་དྡྷ་སེ་ཊྛ་སྶ ཙེ་ཏི་ཡེ.
༦. ‘‘ནི་སྶེ་ཎིཾ མཱ་པ་ཡི་ཏྭཱ་ན, ཐཱུ་པ་སེ་ཊྛཾ ས་མཱ་རུ་ཧིཾ;
ཛཱ་ཏི་པུ་པྥཾ ག་ཧེ་ཏྭཱ་ན, ཐཱུ་པ་མྷི ཨ་བྷི་རོ་པ་ཡིཾ.
༧. ‘‘ཨ་ཧོ བུ་དྡྷོ ཨ་ཧོ དྷ་མྨོ, ཨ་ཧོ ནོ ས་ཏྠུ ས་མྤ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཐཱུ་པ་པཱུ་ཛཱ་ཡི་དཾ ཕ་ལཾ.
༨. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཐཱུ་པ་སཱི་ཁ་ས་ནཱ་མ་ཀཱ;
སོ་ལ༹་སཱ་སིཾ་སུ རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཐ་མྦྷཱ་རོ་པ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཐ་མྦྷཱ་རོ་པ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ཝེ་དི་ཀཱ་ར་ཀ་ཏྠེ་ར་ཨ་པ་དཱ་ནཾ
༡༠. ‘‘ནི་བྦུ་ཏེ ལོ་ཀ་ནཱ་ཐ་མྷི, པི་ཡ་ད་སྶཱི་ན་རུ་ཏྟ་མེ;
པ་ས་ནྣ་ཙི་ཏྟོ སུ་མ་ནོ, མུ་ཏྟཱ་ཝེ་དི་མ་ཀཱ་ས་ཧཾ.
༡༡. ‘‘མ་ཎཱི་ཧི པ་རི་ཝཱ་རེ་ཏྭཱ, ཨ་ཀཱ་སིཾ ཝེ་དི་མུ་ཏྟ་མཾ;
ཝེ་དི་ཀཱ་ཡ མ་ཧཾ ཀ་ཏྭཱ, ཏ་ཏྠ ཀཱ་ལ་ངྐ་ཏོ ཨ་ཧཾ.
༡༢. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
མ་ཎཱི དྷཱ་རེ་ནྟི ཨཱ་ཀཱ་སེ, པུ་ཉྙ་ཀ་མྨ་སྶི་དཾ ཕ་ལཾ.
༡༣. ‘‘སོ་ལ༹་སི་ཏོ ཀ་པྤ་ས་ཏེ, མ་ཎི་པྤ་བྷཱ་ས་ནཱ་མ་ཀཱ;
ཚ་ཏྟིཾ་སཱ་སིཾ་སུ [བཱ་ཏྟིཾ་སཱ་སིཾ་སུ (སཱི. སྱཱ.)] རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༡༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝེ་དི་ཀཱ་ར་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝེ་དི་ཀཱ་ར་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ས་པ་རི་ཝཱ་རི་ཡ་ཏྠེ་ར་ཨ་པ་དཱ་ནཾ
༡༥. ‘‘པ་དུ་མུ་ཏྟ་རོ ནཱ་མ ཛི་ནོ, ལོ་ཀ་ཛེ་ཊྛོ ན་རཱ་ས་བྷོ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ, ས་མྦུ་དྡྷོ པ་རི་ནི་བྦུ་ཏོ.
༡༦. ‘‘ནི་བྦུ་ཏེ ཙ མ་ཧཱ་ཝཱི་རེ, ཐཱུ་པོ ཝི་ཏྠཱ་རི་ཀོ ཨ་ཧུ;
དཱུ་ར་ཏོ་ཝ [ཨ་ཧོ་ར་ཏྟཾ (སཱི.), ཐཱུ་པ་ད་ཏྟཾ (སྱཱ.)] ཨུ་པ་ཊྛེ་ནྟི, དྷཱ་ཏུ་གེ་ཧ་ཝ་རུ་ཏྟ་མེ.
༡༧. ‘‘པ་ས་ནྣ་ཙི་ཏྟོ སུ་མ་ནོ, ཨ་ཀཾ ཙ་ནྡ་ན་ཝེ་དི་ཀཾ;
དི་སྶ་ཏི ཐཱུ་པ་ཁ་ནྡྷོ ཙ [དཱི་ཡ་ཏི དྷཱུ་མ་ཀྑ་ནྡྷོ ཙ (སཱི.), དཱི་ཡ་ཏི དྷཱུ་པ་ག་ནྡྷོ ཙ (སྱཱ.)], ཐཱུ་པཱ་ནུ་ཙྪ་ཝི་ཀོ ཏ་དཱ.
༡༨. ‘‘བྷ་ཝེ ནི་བྦ་ཏྟ་མཱ་ན་མྷི, དེ་ཝ་ཏྟེ ཨ་ཐ མཱ་ནུ་སེ;
ཨོ་མ་ཏྟཾ མེ ན པ་སྶཱ་མི, པུ་བྦ་ཀ་མྨ་སྶི་དཾ ཕ་ལཾ.
༡༩. ‘‘པ་ཉྩ་ད་ས་ཀ་པྤ་ས་ཏེ, ཨི་ཏོ ཨ་ཊྛ ཛ་ནཱ ཨ་ཧུཾ;
ས་བྦེ ས་མ་ཏྟ་ནཱ་མཱ ཏེ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་པ་རི་ཝཱ་རི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་པ་རི་ཝཱ་རི་ཡ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ཨུ་མཱ་པུ་པྥི་ཡ་ཏྠེ་ར་ཨ་པ་དཱ་ནཾ
༢༡. ‘‘ནི་བྦུ་ཏེ ལོ་ཀ་མ་ཧི་ཏེ [ལོ་ཀ་ནཱ་ཐ་མྷི (སཱི.)], ཨཱ་ཧུ་ཏཱི་ནཾ པ་ཊི་གྒ་ཧེ;
སི་དྡྷ་ཏྠ་མྷི བྷ་ག་ཝ་ཏི, མ་ཧཱ་ཐཱུ་པ་མ་ཧོ ཨ་ཧུ.
༢༢. ‘‘མ་ཧེ པ་ཝ་ཏྟ་མཱ་ན་མྷི, སི་དྡྷ་ཏྠ་སྶ མ་ཧེ་སི་ནོ;
ཨུ་མཱ་པུ་པྥཾ [ཨུ་མྨཱ་པུ་པྥཾ (ས་བྦ་ཏྠ)] ག་ཧེ་ཏྭཱ་ན, ཐཱུ་པ་མྷི ཨ་བྷི་རོ་པ་ཡིཾ.
༢༣. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཐཱུ་པ་པཱུ་ཛཱ་ཡི་དཾ [པུ་པྥ་པཱུ་ཛཱ་ཡི་དཾ (སྱཱ.), བུ་དྡྷ་པཱུ་ཛཱ་ཡི་དཾ (ཀ.)] ཕ་ལཾ.
༢༤. ‘‘ཨི་ཏོ ཙ ན་ཝ་མེ ཀ་པྤེ, སོ་མ་དེ་ཝ་ས་ནཱ་མ་ཀཱ;
པ་ཉྩཱ་སཱི་ཏི་སུ རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་མཱ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་མཱ་པུ་པྥི་ཡ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཨ་ནུ་ལེ་པ་དཱ་ཡ་ཀ་ཏྠེ་ར་ཨ་པ་དཱ་ནཾ
༢༦. ‘‘ཨ་ནོ་མ་ད་སྶཱི་མུ་ནི་ནོ, བོ་དྷི་ཝེ་དི་མ་ཀཱ་ས་ཧཾ;
སུ་དྷཱ་ཡ པི་ཎྜཾ ད་ཏྭཱ་ན, པཱ་ཎི་ཀ་མྨཾ ཨ་ཀཱ་ས་ཧཾ.
༢༧. ‘‘དི་སྭཱ ཏཾ སུ་ཀ་ཏཾ ཀ་མྨཾ, ཨ་ནོ་མ་ད་སྶཱི ན་རུ་ཏྟ་མོ;
བྷི་ཀྑུ་ས་ངྒྷེ ཋི་ཏོ ས་ཏྠཱ, ཨི་མཾ གཱ་ཐཾ ཨ་བྷཱ་ས་ཐ.
༢༨. ‘‘‘ཨི་མི་ནཱ སུ་དྷ་ཀ་མྨེ་ན, ཙེ་ཏ་ནཱ་པ་ཎི་དྷཱི་ཧི ཙ;
ས་མྤ་ཏྟིཾ ཨ་ནུ་བྷོ་ཏྭཱ་ན, དུ་ཀྑ་སྶ་ནྟཾ ཀ་རི་སྶ་ཏི’.
༢༩. ‘‘པ་ས་ནྣ་མུ་ཁ་ཝ་ཎྞོ་མྷི, ཨེ་ཀ་གྒོ སུ་ས་མཱ་ཧི་ཏོ;
དྷཱ་རེ་མི ཨ་ནྟི་མཾ དེ་ཧཾ, ས་མྨཱ་ས་མྦུ་དྡྷ་སཱ་ས་ནེ.
༣༠. ‘‘ཨི་ཏོ ཀ་པྤ་ས་ཏེ ཨཱ་སིཾ, པ་རི་པུ་ཎྞེ ཨ་ནཱུ་ན་ཀེ [པ་རི་པུ་ཎྞོ ཨ་ནཱུ་ན་ཀོ (སྱཱ.)];
རཱ་ཛཱ ས་བྦ་གྷ་ནོ ནཱ་མ, ཙ་ཀྐ་ཝ་ཏྟཱི མ་ཧ་བྦ་ལོ.
༣༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་ནུ་ལེ་པ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་ནུ་ལེ་པ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. མ་གྒ་དཱ་ཡ་ཀ་ཏྠེ་ར་ཨ་པ་དཱ་ནཾ
༣༢. ‘‘ཨུ་ཏྟ་རི་ཏྭཱ་ན ན་དི་ཀཾ, ཝ་ནཾ ག་ཙྪ་ཏི ཙ་ཀྑུ་མཱ;
ཏ་མ་དྡ་སཱ་སིཾ ས་མྦུ་དྡྷཾ, སི་དྡྷ་ཏྠཾ ཝ་ར་ལ་ཀྑ་ཎཾ.
༣༣. ‘‘ཀུ་དཱ་ལ [ཀུ་དྡཱ་ལ (སཱི. སྱཱ.)] པི་ཊ་ཀ་མཱ་དཱ་ཡ, ས་མཾ ཀ་ཏྭཱ་ན ཏཾ པ་ཐཾ;
ས་ཏྠཱ་རཾ ཨ་བྷི་ཝཱ་དེ་ཏྭཱ, ས་ཀཾ ཙི་ཏྟཾ པ་སཱ་ད་ཡིཾ.
༣༤. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, མ་གྒ་དཱ་ན་སྶི་དཾ ཕ་ལཾ.
༣༥. ‘‘ས་ཏྟ་པ་ཉྙཱ་ས་ཀ་པྤ་མྷི, ཨེ་ཀོ ཨཱ་སིཾ ཛ་ནཱ་དྷི་པོ;
ནཱ་མེ་ན སུ་པྤ་བུ་དྡྷོ་ཏི, ནཱ་ཡ་ཀོ སོ ན་རི་སྶ་རོ.
༣༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་གྒ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་གྒ་དཱ་ཡ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ཕ་ལ་ཀ་དཱ་ཡ་ཀ་ཏྠེ་ར་ཨ་པ་དཱ་ནཾ
༣༧. ‘‘ཡཱ་ན་ཀཱ་རོ པུ་རེ ཨཱ་སིཾ, དཱ་རུ་ཀ་མྨེ སུ་སི་ཀྑི་ཏོ;
ཙ་ནྡ་ནཾ ཕ་ལ་ཀཾ ཀ་ཏྭཱ, ཨ་དཱ་སིཾ ལོ་ཀ་བ་ནྡྷུ་ནོ.
༣༨. ‘‘པ་བྷཱ་ས་ཏི ཨི་དཾ བྱ་མྷཾ, སུ་ཝ་ཎྞ་སྶ སུ་ནི་མྨི་ཏཾ;
ཧ་ཏྠི་ཡཱ་ནཾ ཨ་སྶ་ཡཱ་ནཾ, དི་བྦ་ཡཱ་ནཾ ཨུ་པ་ཊྛི་ཏཾ.
༣༩. ‘‘པཱ་སཱ་དཱ སི་ཝི་ཀཱ ཙེ་ཝ, ནི་བྦ་ཏྟ་ནྟི ཡ་དི་ཙྪ་ཀཾ;
ཨ་ཀྑུ་བྦྷཾ [ཨ་ཀྑོ་བྷཾ (སཱི.)] ར་ཏ་ནཾ མ་ཡ྄ཧཾ, ཕ་ལ་ཀ་སྶ ཨི་དཾ ཕ་ལཾ.
༤༠. ‘‘ཨེ་ཀ་ན་ཝུ་ཏི་ཏོ ཀ་པྤེ, ཕ་ལ་ཀཾ ཡ་མ་ཧཾ ད་དིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཕ་ལ་ཀ་སྶ ཨི་དཾ ཕ་ལཾ.
༤༡. ‘‘ས་ཏྟ་པ་ཉྙཱ་ས་ཀ་པྤ་མྷི, ཙ་ཏུ་རོ ནི་མྨི་ཏཱ་ཝ྄ཧ་ཡཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༤༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཕ་ལ་ཀ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཕ་ལ་ཀ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. ཝ་ཊཾ་ས་ཀི་ཡ་ཏྠེ་ར་ཨ་པ་དཱ་ནཾ
༤༣. ‘‘སུ་མེ་དྷོ ནཱ་མ ནཱ་མེ་ན, ས་ཡ་མྦྷཱུ ཨ་པ་རཱ་ཛི་ཏོ;
ཝི་ཝེ་ཀ་མ་ནུ་བྲཱུ་ཧ་ནྟོ, ཨ་ཛ྄ཛྷོ་ག་ཧི མ་ཧཱ་ཝ་ནཾ.
༤༤. ‘‘ས་ལ༹་ལཾ པུ་པྥི་ཏཾ དི་སྭཱ, ག་ནྠི་ཏྭཱ་ན [བ་ནྡྷི་ཏྭཱ་ན (སཱི.)] ཝ་ཊཾ་ས་ཀཾ;
བུ་དྡྷ་སྶ ཨ་བྷི་རོ་པེ་སིཾ, ས་མྨུ་ཁཱ ལོ་ཀ་ནཱ་ཡ་ཀཾ.
༤༥. ‘‘ཏིཾ་ས་ཀ་པྤ་ས་ཧ་སྶ་མྷི, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤༦. ‘‘ཨཱུ་ན་ཝཱི་སེ ཀ་པྤ་ས་ཏེ, སོ་ལ༹་སཱ་སུཾ སུ་ནི་མྨི་ཏཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༤༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ཊཾ་ས་ཀི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཝ་ཊཾ་ས་ཀི་ཡ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. པ་ལླ་ངྐ་དཱ་ཡ་ཀ་ཏྠེ་ར་ཨ་པ་དཱ་ནཾ
༤༨. ‘‘སུ་མེ་དྷ་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
པ་ལླ་ངྐོ ཧི མ་ཡཱ དི་ནྣོ, ས་ཨུ་ཏྟ་ར་ས་པ་ཙྪ་དོ.
༤༩. ‘‘ས་ཏྟ་ར་ཏ་ན་ས་མྤ་ནྣོ, པ་ལླ་ངྐོ ཨཱ་སི སོ ཏ་དཱ;
མ་མ ས་ངྐ་པྤ་མ་ཉྙཱ་ཡ, ནི་བྦ་ཏྟ་ཏི ས་དཱ མ་མ.
༥༠. ‘‘ཏིཾ་ས་ཀ་པྤ་ས་ཧ་སྶ་མྷི, པ་ལླ་ངྐ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པ་ལླ་ངྐ་སྶ ཨི་དཾ ཕ་ལཾ.
༥༡. ‘‘ཝཱི་ས་ཀ་པྤ་ས་ཧ་སྶ་མྷི, སུ་ཝ་ཎྞཱ་བྷཱ ཏ་ཡོ ཛ་ནཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༥༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པ་ལླ་ངྐ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་ལླ་ངྐ་དཱ་ཡ་ཀ་ཏྠེ་ར་སྶཱ་པ་དཱ་ནཾ ད་ས་མཾ.
ཚ་ཏྟ་ཝ་གྒོ པ་ནྣ་ར་ས་མོ.