༡༤. སོ་བྷི་ཏ་ཝ་གྒོ
༡. སོ་བྷི་ཏ་ཏྠེ་ར་ཨ་པ་དཱ་ནཾ
༡. ‘‘པ་དུ་མུ་ཏྟ་རོ ནཱ་མ ཛི་ནོ, ལོ་ཀ་ཛེ་ཊྛོ ན་རཱ་ས་བྷོ;
མ་ཧ་ཏོ ཛ་ན་ཀཱ་ཡ་སྶ, དེ་སེ་ཏི ཨ་མ་ཏཾ པ་དཾ.
༢. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, ཝཱ་ཙཱ་ས་བྷི་མུ་དཱི་རི་ཏཾ [ཝཱ་ཙཱ་ས་བྷི་མུ་དཱི་ར་ཡིཾ (?)];
ཨ་ཉྫ་ལིཾ པ་གྒ་ཧེ་ཏྭཱ་ན, ཨེ་ཀ་གྒོ ཨཱ་ས་ཧཾ ཏ་དཱ.
༣. ‘‘ཡ་ཐཱ ས་མུ་དྡོ ཨུ་ད་དྷཱི་ན་མ་གྒོ, ནེ་རཱུ ན་གཱ་ནཾ པ་ཝ་རོ སི་ལུ་ཙྩ་ཡོ;
ཏ་ཐེ་ཝ ཡེ ཙི་ཏྟ་ཝ་སེ་ན ཝ་ཏྟ་རེ, ན བུ་དྡྷ་ཉཱ་ཎ་སྶ ཀ་ལཾ ཨུ་པེ་ནྟི ཏེ.
༤. ‘‘དྷ་མྨ་ཝི་དྷིཾ [དྷ་མྨེ ཝི་དྷིཾ (སཱི.)] ཋ་པེ་ཏྭཱ་ན, བུ་དྡྷོ ཀཱ་རུ་ཎི་ཀོ ཨི་སི;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༥. ‘‘‘ཡོ སོ ཉཱ་ཎཾ པ་ཀི་ཏྟེ་སི, བུ་དྡྷ་མྷི ལོ་ཀ་ནཱ་ཡ་ཀེ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ན ག་མི་སྶ་ཏི.
༦. ‘‘‘ཀི་ལེ་སེ ཛྷཱ་པ་ཡི་ཏྭཱ་ན, ཨེ་ཀ་གྒོ སུ་ས་མཱ་ཧི་ཏོ;
སོ་བྷི་ཏོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༧. ‘‘པ་ཉྙཱ་སེ ཀ་པྤ་ས་ཧ་སྶེ, ས་ཏྟེ་ཝཱ་སུཾ ཡ་སུ་གྒ་ཏཱ [ས་མུ་གྒ་ཏཱ (སྱཱ.)];
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༩. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སོ་བྷི་ཏོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སོ་བྷི་ཏ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. སུ་ད་སྶ་ན་ཏྠེ་ར་ཨ་པ་དཱ་ནཾ
༡༠. ‘‘ཝི་ན་ཏཱ ན་དི་ཡཱ [ཝི་ཏྠ་ཏཱ་ཡ ན་དི་ཡཱ (སྱཱ.)] ཏཱི་རེ, པི་ལ་ཀྑུ [པི་ལ་ཀྑོ (སཱི. ཐེ་ར་གཱ་ཐཱ ཨ་ཊྛ.)] ཕ་ལི་ཏོ ཨ་ཧུ;
ཏཱ་ཧཾ རུ་ཀྑཾ ག་ཝེ་ས་ནྟོ, ཨ་དྡ་སཾ ལོ་ཀ་ནཱ་ཡ་ཀཾ.
༡༡. ‘‘ཀེ་ཏ་ཀཾ པུ་པྥི་ཏཾ དི་སྭཱ, ཝ་ཎྚེ ཚེ་ཏྭཱ་ན་ཧཾ ཏ་དཱ;
བུ་དྡྷ་སྶ ཨ་བྷི་རོ་པེ་སིཾ, སི་ཁི་ནོ ལོ་ཀ་བ་ནྡྷུ་ནོ.
༡༢. ‘‘ཡེ་ན ཉཱ་ཎེ་ན པ་ཏྟོ་སི, ཨ་ཙྩུ་ཏཾ ཨ་མ་ཏཾ པ་དཾ;
ཏཾ ཉཱ་ཎཾ ཨ་བྷི་པཱུ་ཛེ་མི, བུ་དྡྷ་སེ་ཊྛ མ་ཧཱ་མུ་ནི.
༡༣. ‘‘ཉཱ་ཎ་མྷི པཱུ་ཛཾ ཀ་ཏྭཱ་ན, པི་ལ་ཀྑུ་མ་དྡ་སཾ ཨ་ཧཾ;
པ་ཊི་ལ་དྡྷོ་མྷི ཏཾ པ་ཉྙཾ [ཏཾ ས་ཉྙཾ (སྱཱ.), ཏཾ པུ་ཉྙཾ (ཀ.)], ཉཱ་ཎ་པཱུ་ཛཱ་ཡི་དཾ ཕ་ལཾ.
༡༤. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཉཱ་ཎ་པཱུ་ཛཱ་ཡི་དཾ ཕ་ལཾ.
༡༥. ‘‘ཨི་ཏོ ཏེ་ར་ས་ཀ་པྤ་མྷི, དྭཱ་ད་སཱ་སུཾ ཕ་ལུ་གྒ་ཏཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་པྥ་ལཱ.
༡༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སུ་ད་སྶ་ནོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སུ་ད་སྶ་ན་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ཙ་ནྡ་ན་པཱུ་ཛ་ན་ཀ་ཏྠེ་ར་ཨ་པ་དཱ་ནཾ
༡༧. ‘‘ཙ་ནྡ་བྷཱ་གཱ་ན་དཱི་ཏཱི་རེ, ཨ་ཧོ་སིཾ ཀི་ནྣ་རོ ཏ་དཱ;
པུ་པྥ་བྷ་ཀྑོ ཙ་ཧཾ ཨཱ་སིཾ, པུ་པྥཱ་ནི་ཝ་ས་ནོ ཏ་ཐཱ [པུ་པྥཱ་ནཾ ཝ་ས་ནོ ཨ་ཧཾ (སྱཱ.)].
༡༨. ‘‘ཨ་ཏྠ་ད་སྶཱི ཏུ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
ཝི་པི་ན་གྒེ་ན ནི་ཡྻཱ་སི, ཧཾ་ས་རཱ་ཛཱ་ཝ ཨ་མྦ་རེ.
༡༩. ‘‘ན་མོ ཏེ པུ་རི་སཱ་ཛ་ཉྙ, ཙི་ཏྟཾ ཏེ སུ་ཝི་སོ་དྷི་ཏཾ;
པ་ས་ནྣ་མུ་ཁ་ཝ་ཎྞོ་སི, ཝི་པྤ་ས་ནྣ་མུ་ཁི་ནྡྲི་ཡོ.
༢༠. ‘‘ཨོ་རོ་ཧི་ཏྭཱ་ན ཨཱ་ཀཱ་སཱ, བྷཱུ་རི་པ་ཉྙོ སུ་མེ་དྷ་སོ;
ས་ངྒྷཱ་ཊིཾ པ་ཏྠ་རི་ཏྭཱ་ན, པ་ལླ་ངྐེ་ན ཨུ་པཱ་ཝི་སི.
༢༡. ‘‘ཝི་ལཱི་ནཾ ཙ་ནྡ་ནཱ་དཱ་ཡ, ཨ་ག་མཱ་སིཾ ཛི་ན་ནྟི་ཀཾ;
པ་ས་ནྣ་ཙི་ཏྟོ སུ་མ་ནོ, བུ་དྡྷ་སྶ ཨ་བྷི་རོ་པ་ཡིཾ.
༢༢. ‘‘ཨ་བྷི་ཝཱ་དེ་ཏྭཱ་ན ས་མྦུ་དྡྷཾ, ལོ་ཀ་ཛེ་ཊྛཾ ན་རཱ་ས་བྷཾ;
པཱ་མོ་ཛྫཾ ཛ་ན་ཡི་ཏྭཱ་ན, པ་ཀྐཱ་མིཾ ཨུ་ཏྟ་རཱ་མུ་ཁོ.
༢༣. ‘‘ཨ་ཊྛཱ་ར་སེ ཀ་པྤ་ས་ཏེ, ཙ་ནྡ་ནཾ ཡཾ ཨ་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༤. ‘‘ཙ་ཏུ་དྡ་སེ ཀ་པྤ་ས་ཏེ, ཨི་ཏོ ཨཱ་སིཾ་སུ ཏེ ཏ་ཡོ;
རོ་ཧ་ཎཱི ནཱ་མ [རོ་ཧི་ཏཱ ནཱ་མ (སཱི.), རོ་ཧི་ཎཱི ནཱ་མ (སྱཱ.)] ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལཱ.
༢༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཙ་ནྡ་ན་པཱུ་ཛ་ན་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཙ་ནྡ་ན་པཱུ་ཛ་ན་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
ཨ་ཊྛ་མ་བྷཱ་ཎ་ཝཱ་རཾ.
༤. པུ་པྥ་ཙྪ་ད་ནི་ཡ་ཏྠེ་ར་ཨ་པ་དཱ་ནཾ
༢༦. ‘‘སུ་ན་ནྡོ ནཱ་མ ནཱ་མེ་ན, བྲཱ་ཧྨ་ཎོ མ་ནྟ་པཱ་ར་གཱུ;
ཨ་ཛ྄ཛྷཱ་ཡ་ཀོ ཡཱ་ཙ་ཡོ་གོ, ཝཱ་ཛ་པེ་ཡྻཾ ཨ་ཡཱ་ཛ་ཡི.
༢༧. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨ་གྒོ ཀཱ་རུ་ཎི་ཀོ ཨི་སི;
ཛ་ན་ཏཾ ཨ་ནུ་ཀ་མྤ་ནྟོ, ཨ་མྦ་རེ ཙ་ངྐ་མཱི ཏ་དཱ.
༢༨. ‘‘ཙ་ངྐ་མི་ཏྭཱ་ན ས་མྦུ་དྡྷོ, ས་བྦ་ཉྙཱུ ལོ་ཀ་ནཱ་ཡ་ཀོ;
མེ་ཏྟཱ་ཡ ཨ་ཕ་རི ས་ཏྟེ, ཨ་པྤ་མཱ་ཎེ [ཨ་པྤ་མཱ་ཎཾ (སཱི. སྱཱ.)] ནི་རཱུ་པ་དྷི.
༢༩. ‘‘ཝ་ཎྚེ ཚེ་ཏྭཱ་ན པུ་པྥཱ་ནི, བྲཱ་ཧྨ་ཎོ མ་ནྟ་པཱ་ར་གཱུ;
ས་བྦེ སི་སྶེ ས་མཱ་ནེ་ཏྭཱ, ཨཱ་ཀཱ་སེ ཨུ་ཀྑི་པཱ་པ་ཡི.
༣༠. ‘‘ཡཱ་ཝ་ཏཱ ན་ག་རཾ ཨཱ་སི, པུ་པྥཱ་ནཾ ཚ་ད་ནཾ ཏ་དཱ;
བུ་དྡྷ་སྶ ཨཱ་ནུ་བྷཱ་ཝེ་ན, ས་ཏྟཱ་ཧཾ ན ཝི་ག་ཙྪ་ཐ.
༣༡. ‘‘ཏེ་ནེ་ཝ སུ་ཀྐ་མཱུ་ལེ་ན, ཨ་ནུ་བྷོ་ཏྭཱ་ན ས་མྤ་དཱ;
ས་བྦཱ་ས་ཝེ པ་རི་ཉྙཱ་ཡ, ཏི་ཎྞོ ལོ་ཀེ ཝི་ས་ཏྟི་ཀཾ.
༣༢. ‘‘ཨེ་ཀཱ་ར་སེ ཀ་པྤ་ས་ཏེ, པ་ཉྩ་ཏིཾ་སཱ་སུ ཁ་ཏྟི་ཡཱ;
ཨ་མྦ་རཾ་ས་ས་ནཱ་མཱ ཏེ, ཙ་ཀྐ་ཝ་ཏྟཱི མ་ཧ་བྦ་ལཱ.
༣༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་པྥ་ཙྪ་ད་ནི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པུ་པྥ་ཙྪ་ད་ནི་ཡ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ར་ཧོ་ས་ཉྙ་ཀ་ཏྠེ་ར་ཨ་པ་དཱ་ནཾ
༣༤. ‘‘ཧི་མ་ཝ་ནྟ་སྶཱ་ཝི་དཱུ་རེ, ཝ་ས་བྷོ ནཱ་མ པ་བྦ་ཏོ;
ཏ་སྨིཾ པ་བྦ་ཏ་པཱ་ད་མྷི, ཨ་སྶ་མོ ཨཱ་སི མཱ་པི་ཏོ.
༣༥. ‘‘ཏཱི་ཎི སི་སྶ་ས་ཧ་སྶཱ་ནི, ཝཱ་ཙེ་སིཾ བྲཱ་ཧྨ་ཎོ [བྲཱ་ཧྨ་ཎེ (སཱི.)] ཏ་དཱ;
སཾ་ཧ་རི་ཏྭཱ་ན [སཾ་སཱ་ཝི་ཏྭཱ་ན (སྱཱ.)] ཏེ སི་སྶེ, ཨེ་ཀ་མ་ནྟཾ ཨུ་པཱ་ཝི་སིཾ.
༣༦. ‘‘ཨེ་ཀ་མ་ནྟཾ ནི་སཱི་དི་ཏྭཱ, བྲཱ་ཧྨ་ཎོ མ་ནྟ་པཱ་ར་གཱུ;
བུ་དྡྷ་ཝེ་དཾ ག་ཝེ་ས་ནྟོ [པ་ཝེ་ས་ནྟོ (ཀ.)], ཉཱ་ཎེ ཙི་ཏྟཾ པ་སཱ་ད་ཡིཾ.
༣༧. ‘‘ཏ་ཏྠ ཙི་ཏྟཾ པ་སཱ་དེ་ཏྭཱ, ནི་སཱི་དིཾ པ་ཎྞ་ས་ནྠ་རེ;
པ་ལླ་ངྐཾ ཨཱ་བྷུ་ཛི་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.
༣༨. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ ས་ཉྙ་མ་ལ་བྷིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཉཱ་ཎ་ས་ཉྙཱ་ཡི་དཾ ཕ་ལཾ.
༣༩. ‘‘ས་ཏྟ་ཝཱི་ས་ཏི་ཀ་པྤ་མྷི, རཱ་ཛཱ སི་རི་དྷ་རོ ཨ་ཧུ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༤༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ར་ཧོ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ར་ཧོ་ས་ཉྙ་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཙ་མྤ་ཀ་པུ་པྥི་ཡ་ཏྠེ་ར་ཨ་པ་དཱ་ནཾ
༤༡. ‘‘ཀ་ཎི་ཀཱ་རཾ་ཝ ཛོ་ཏ་ནྟཾ, ནི་སི་ནྣཾ པ་བྦ་ཏ་ནྟ་རེ;
ཨོ་བྷཱ་སེ་ནྟཾ དི་སཱ ས་བྦཱ, ཨོ་ས་དྷིཾ ཝི་ཡ ཏཱ་ར་ཀཾ [ཨོ་ས་དྷཱི ཝི་ཡ ཏཱ་ར་ཀཱ (ཀ.)].
༤༢. ‘‘ཏ་ཡོ མཱ་ཎ་ཝ་ཀཱ ཨཱ་སུཾ, ས་ཀེ སི་པྤེ སུ་སི་ཀྑི་ཏཱ;
ཁཱ་རི་བྷཱ་རཾ ག་ཧེ་ཏྭཱ་ན, ཨ་ནྭེ་ནྟི མ་མ པ་ཙྪ་ཏོ.
༤༣. ‘‘པུ་ཊ་ཀེ ས་ཏྟ པུ་པྥཱ་ནི, ནི་ཀྑི་ཏྟཱ་ནི ཏ་པ་སྶི་ནཱ;
ག་ཧེ་ཏྭཱ ཏཱ་ནི ཉཱ་ཎ་མྷི, ཝེ་སྶ་བྷུ་སྶཱ་བྷི་རོ་པ་ཡིཾ.
༤༤. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཉཱ་ཎ་པཱུ་ཛཱ་ཡི་དཾ ཕ་ལཾ.
༤༥. ‘‘ཨེ་ཀཱུ་ན་ཏིཾ་ས་ཀ་པྤ་མྷི, ཝི་པུ་ལཱ་བྷ [ཝི་ཧ་ཏཱ་བྷཱ (སྱཱ.)] ས་ནཱ་མ་ཀོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི [རཱ་ཛཱ ཧོ་སི (ཀ.)] མ་ཧ་བྦ་ལོ.
༤༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཙ་མྤ་ཀ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཙ་མྤ་ཀ་པུ་པྥི་ཡ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. ཨ་ཏྠ་ས་ནྡ་སྶ་ཀ་ཏྠེ་ར་ཨ་པ་དཱ་ནཾ
༤༧. ‘‘ཝི་སཱ་ལ་མཱ་ལེ༹ ཨཱ་སཱི་ནོ, ཨ་དྡ་སཾ ལོ་ཀ་ནཱ་ཡ་ཀཾ;
ཁཱི་ཎཱ་ས་ཝཾ བ་ལ་པྤ་ཏྟཾ, བྷི་ཀྑུ་ས་ངྒྷ་པུ་ར་ཀྑ་ཏཾ.
༤༨. ‘‘ས་ཏ་ས་ཧ་སྶཱ ཏེ་ཝི་ཛྫཱ, ཚ་ལ༹་བྷི་ཉྙཱ མ་ཧི་དྡྷི་ཀཱ;
པ་རི་ཝཱ་རེ་ནྟི ས་མྦུ་དྡྷཾ, ཀོ དི་སྭཱ ན་པྤ་སཱི་ད་ཏི.
༤༩. ‘‘ཉཱ་ཎེ ཨུ་པ་ནི་དྷཱ ཡ་སྶ, ན ཝི་ཛྫ་ཏི ས་དེ་ཝ་ཀེ;
ཨ་ན་ནྟ་ཉཱ་ཎཾ ས་མྦུ་དྡྷཾ, ཀོ དི་སྭཱ ན་པྤ་སཱི་ད་ཏི.
༥༠. ‘‘དྷ་མྨ་ཀཱ་ཡ་ཉྩ དཱི་པེ་ནྟཾ, ཀེ་ཝ་ལཾ ར་ཏ་ནཱ་ཀ་རཾ;
ཝི་ཀ་པྤེ་ཏུཾ [ཝི་ཀོ་པེ་ཏུཾ (སཱི. སྱཱ.)] ན ས་ཀྐོ་ནྟི, ཀོ དི་སྭཱ ན་པྤ་སཱི་ད་ཏི.
༥༡. ‘‘ཨི་མཱ་ཧི ཏཱི་ཧི གཱ་ཐཱ་ཧི, ནཱ་ར་དོ་ཝ྄ཧ་ཡ་ཝ་ཙྪ་ལོ [ས་ར་ག་ཙྪི་ཡོ (སཱི.), པུ་ར་ག་ཙྪི་ཡོ (སྱཱ.)];
པ་དུ་མུ་ཏྟ་རཾ ཐ་ཝི་ཏྭཱ་ན, ས་མྦུ་དྡྷཾ ཨ་པ་རཱ་ཛི་ཏཾ.
༥༢. ‘‘ཏེ་ན ཙི་ཏྟ་པྤ་སཱ་དེ་ན, བུ་དྡྷ་ས་ནྠ་ཝ་ནེ་ན ཙ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ, ནུ་པ་པ་ཛྫ་ཧཾ.
༥༣. ‘‘ཨི་ཏོ ཏིཾ་ས་ཀ་པྤ་ས་ཏེ, སུ་མི་ཏྟོ ནཱ་མ ཁ་ཏྟི་ཡོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༥༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་ཏྠ་ས་ནྡ་སྶ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་ཏྠ་ས་ནྡ་སྶ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ཨེ་ཀ་པ་སཱ་ད་ནི་ཡ་ཏྠེ་ར་ཨ་པ་དཱ་ནཾ
༥༥. ‘‘ནཱ་ར་དོ ཨི་ཏི མེ ནཱ་མཾ [ནཱ་ར་དོ ཨི་ཏི ནཱ་མེ་ན (སྱཱ. ཀ.) ཨུ་པ་རི ཏེ་ཝཱི་ས་ཏི་མ་ཝ་གྒེ པ་ན ཚ་ཊྛཱ་པ་དཱ་ནེ ‘‘མེ ནཱ་མཾ‘‘ཨི་ཙྩེ་ཝ དི་སྶ་ཏི], ཀེ་ས་ཝོ ཨི་ཏི མཾ ཝི་དཱུ;
ཀུ་ས་ལཱ་ཀུ་ས་ལཾ ཨེ་སཾ, ཨ་ག་མཾ བུ་དྡྷ་ས་ནྟི་ཀཾ.
༥༦. ‘‘མེ་ཏྟ་ཙི་ཏྟོ ཀཱ་རུ་ཎི་ཀོ, ཨ་ཏྠ་ད་སྶཱི མ་ཧཱ་མུ་ནི;
ཨ་སྶཱ་ས་ཡ་ནྟོ ས་ཏྟེ སོ, དྷ་མྨཾ དེ་སེ་ཏི ཙ་ཀྑུ་མཱ.
༥༧. ‘‘ས་ཀཾ ཙི་ཏྟཾ པ་སཱ་དེ་ཏྭཱ, སི་རེ ཀ་ཏྭཱ་ན ཨ་ཉྫ་ལིཾ;
ས་ཏྠཱ་རཾ ཨ་བྷི་ཝཱ་དེ་ཏྭཱ, པ་ཀྐཱ་མིཾ པཱ་ཙི་ནཱ་མུ་ཁོ.
༥༨. ‘‘ས་ཏྟ་ར་སེ ཀ་པྤ་ས་ཏེ, རཱ་ཛཱ ཨཱ་སི མ་ཧཱི་པ་ཏི;
ཨ་མི་ཏྟ་ཏཱ་པ་ནོ ནཱ་མ, ཙ་ཀྐ་ཝ་ཏྟཱི མ་ཧ་བྦ་ལོ.
༥༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་པ་སཱ་ད་ནི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀ་པ་སཱ་ད་ནི་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. སཱ་ལ་པུ་པྥ་དཱ་ཡ་ཀ་ཏྠེ་ར་ཨ་པ་དཱ་ནཾ
༦༠. ‘‘མི་ག་རཱ་ཛཱ ཏ་དཱ ཨཱ་སིཾ, ཨ་བྷི་ཛཱ་ཏོ སུ་ཀེ་ས་རཱི;
གི་རི་དུ་གྒཾ ག་ཝེ་ས་ནྟོ, ཨ་དྡ་སཾ ལོ་ཀ་ནཱ་ཡ་ཀཾ.
༦༡. ‘‘ཨ་ཡཾ ནུ ཁོ མ་ཧཱ་ཝཱི་རོ, ནི་བྦཱ་པེ་ཏི མ་ཧཱ་ཛ་ནཾ;
ཡཾ་ནཱུ་ནཱ་ཧཾ ཨུ་པཱ་སེ་ཡྻཾ, དེ་ཝ་དེ་ཝཾ ན་རཱ་ས་བྷཾ.
༦༢. ‘‘སཱ་ཁཾ སཱ་ལ་སྶ བྷ་ཉྫི་ཏྭཱ, ས་ཀོ་སཾ པུ་པྥ་མཱ་ཧ་རིཾ;
ཨུ་པ་ག་ནྟྭཱ་ན ས་མྦུ་དྡྷཾ, ཨ་དཱ་སིཾ པུ་པྥ་མུ་ཏྟ་མཾ.
༦༣. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་པྥ་དཱ་ན་སྶི་དཾ ཕ་ལཾ.
༦༤. ‘‘ཨི་ཏོ ཙ ན་ཝ་མེ ཀ་པྤེ, ཝི་རོ་ཙ་ན་ས་ནཱ་མ་ཀཱ;
ཏ་ཡོ ཨཱ་སིཾ་སུ རཱ་ཛཱ་ནོ, ཙ་ཀྐ་ཝ་ཏྟཱི མ་ཧ་བྦ་ལཱ.
༦༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སཱ་ལ་པུ་པྥ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.