༧. བུ་དྡྷ་ས་ཉྙ་ཀ་ཏྠེ་ར་ཨ་པ་དཱ་ནཾ

༥༧. ‘‘ཡ་དཱ ཝི་པ་སྶཱི ལོ་ཀ་གྒོ, ཨཱ་ཡུ་ས་ངྑཱ་ར་མོ་སྶ་ཛི;

པ་ཐ་ཝཱི ས་མྤ་ཀ་མྤི་ཏྠ, མེ་ད་ནཱི ཛ་ལ་མེ་ཁ་ལཱ.

༥༨. ‘‘ཨོ་ཏ་ཏཾ ཝི་ཏྠ་ཏཾ [ཨོ་ཏ་ཏཾ ཝི་ཏ་ཏཾ (སྱཱ.)] མ་ཡ྄ཧཾ, སུ་ཝི་ཙི་ཏྟ་ཝ་ཊཾ་ས་ཀཾ [སུ་ཙི་ཙི་ཏྟཾ པ་པ་ཉྩ་ཀཾ (སྱཱ.)];

བྷ་ཝ་ན་མྤི པ་ཀ་མྤི་ཏྠ, བུ་དྡྷ་སྶ ཨཱ་ཡུ་ས་ངྑ་ཡེ.

༥༩. ‘‘ཏཱ་སོ མ་ཡ྄ཧཾ ས་མུ་པྤ་ནྣོ, བྷ་ཝ་ནེ ས་མྤ་ཀ་མྤི་ཏེ;

ཨུ་པྤཱ་དོ [ཨུ་པྤཱ་ཏོ (?)] ནུ ཀི་མ་ཏྠཱ་ཡ, ཨཱ་ལོ་ཀོ ཝི་པུ་ལོ ཨ་ཧུ.

༦༠. ‘‘ཝེ་སྶ་ཝ་ཎོ ཨི་དྷཱ་ག་མྨ, ནི་བྦཱ་པེ་སི མ་ཧཱ་ཛ་ནཾ;

པཱ་ཎ་བྷཱུ་ཏེ [པཱ་ཎ་བྷུ་ཏཾ (སྱཱ.), པཱ་ཎ་བྷཱུ་ནཾ (སཱི. ཀ.)] བྷ་ཡཾ ན་ཏྠི, ཨེ་ཀ་གྒཱ ཧོ་ཐ སཾ་ཝུ་ཏཱ [ས་གཱ་ར་ཝཱ (སྱཱ.)].

༦༡. ‘‘ཨ་ཧོ བུ་དྡྷོ ཨ་ཧོ དྷ་མྨོ, ཨ་ཧོ ནོ ས་ཏྠུ ས་མྤ་དཱ;

ཡ་སྨིཾ ཨུ་པྤ་ཛྫ་མཱ་ན་མྷི, པ་ཐ་ཝཱི [པ་ཋ་ཝཱི (སཱི. སྱཱ.)] ས་མྤ་ཀ་མྤ་ཏི.

༦༢. ‘‘བུ་དྡྷཱ་ནུ་བྷཱ་ཝཾ ཀི་ཏྟེ་ཏྭཱ, ཀ་པྤཾ ས་གྒ་མྷི མོ་ད་ཧཾ;

ཨ་ཝ་སེ་སེ་སུ ཀ་པྤེ་སུ, ཀུ་ས་ལཾ ཙ་རི་ཏཾ [ཀ་རི་ཏཾ (སཱི. སྱཱ.), ཀཱ་རི་ཏཾ (ཀ.)] མ་ཡཱ.

༦༣. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ས་ཉྙ་མ་ལ་བྷིཾ ཏ་དཱ;

དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་ས་ཉྙཱ་ཡི་དཾ ཕ་ལཾ.

༦༤. ‘‘ཨི་ཏོ ཙུ་དྡ་ས་ཀ་པྤ་མྷི, རཱ་ཛཱ ཨཱ་སིཾ པ་ཏཱ་པ་ཝཱ;

ས་མི་ཏོ ནཱ་མ ནཱ་མེ་ན, ཙ་ཀྐ་ཝ་ཏྟཱི མ་ཧ་བྦ་ལོ.

༦༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ བུ་དྡྷ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.

བུ་དྡྷ་ས་ཉྙ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.