ཨ་ཊྛ པ་རི་སཱ
༡༧༢. ‘‘ཨ་ཊྛ ཁོ ཨི་མཱ, ཨཱ་ན་ནྡ, པ་རི་སཱ. ཀ་ཏ་མཱ ཨ་ཊྛ? ཁ་ཏྟི་ཡ་པ་རི་སཱ, བྲཱ་ཧྨ་ཎ་པ་རི་སཱ, ག་ཧ་པ་ཏི་པ་རི་སཱ, ས་མ་ཎ་པ་རི་སཱ, ཙཱ་ཏུ་མ་ཧཱ་རཱ་ཛི་ཀ་པ་རི་སཱ [ཙཱ་ཏུ་མྨ་ཧཱ་རཱ་ཛི་ཀ་པ་རི་སཱ (སཱི. སྱཱ. ཀཾ. པཱི.)], ཏཱ་ཝ་ཏིཾ་ས་པ་རི་སཱ, མཱ་ར་པ་རི་སཱ, བྲ་ཧྨ་པ་རི་སཱ. ཨ་བྷི་ཛཱ་ནཱ་མི ཁོ པ་ནཱ་ཧཾ, ཨཱ་ན་ནྡ, ཨ་ནེ་ཀ་ས་ཏཾ ཁ་ཏྟི་ཡ་པ་རི་སཾ ཨུ་པ་ས་ངྐ་མི་ཏཱ. ཏ་ཏྲ་པི མ་ཡཱ ས་ནྣི་སི་ནྣ་པུ་བྦཾ ཙེ་ཝ ས་ལླ་པི་ཏ་པུ་བྦ་ཉྩ སཱ་ཀ་ཙྪཱ ཙ ས་མཱ་པ་ཛྫི་ཏ་པུ་བྦཱ. ཏ་ཏྠ ཡཱ་དི་ས་ཀོ ཏེ་སཾ ཝ་ཎྞོ ཧོ་ཏི, ཏཱ་དི་ས་ཀོ མ་ཡ྄ཧཾ ཝ་ཎྞོ ཧོ་ཏི. ཡཱ་དི་ས་ཀོ ཏེ་སཾ ས་རོ ཧོ་ཏི, ཏཱ་དི་ས་ཀོ མ་ཡ྄ཧཾ ས་རོ ཧོ་ཏི. དྷ་མྨི་ཡཱ ཀ་ཐཱ་ཡ ས་ནྡ་སྶེ་མི ས་མཱ་ད་པེ་མི ས་མུ་ཏྟེ་ཛེ་མི ས་མྤ་ཧཾ་སེ་མི. བྷཱ་ས་མཱ་ན་ཉྩ མཾ ན ཛཱ་ན་ནྟི – ‘ཀོ ནུ ཁོ ཨ་ཡཾ བྷཱ་ས་ཏི དེ་ཝོ ཝཱ མ་ནུ་སྶོ ཝཱ’ཏི? དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨ་ནྟ་ར་དྷཱ་ཡཱ་མི. ཨ་ནྟ་ར་ཧི་ཏ་ཉྩ མཾ ན ཛཱ་ན་ནྟི – ‘ཀོ ནུ ཁོ ཨ་ཡཾ ཨ་ནྟ་ར་ཧི་ཏོ དེ་ཝོ ཝཱ མ་ནུ་སྶོ ཝཱ’ཏི? ཨ་བྷི་ཛཱ་ནཱ་མི ཁོ པ་ནཱ་ཧཾ, ཨཱ་ན་ནྡ, ཨ་ནེ་ཀ་ས་ཏཾ བྲཱ་ཧྨ་ཎ་པ་རི་སཾ…པེ… ག་ཧ་པ་ཏི་པ་རི་སཾ… ས་མ་ཎ་པ་རི་སཾ… ཙཱ་ཏུ་མ་ཧཱ་རཱ་ཛི་ཀ་པ་རི་སཾ… ཏཱ་ཝ་ཏིཾ་ས་པ་རི་སཾ… མཱ་ར་པ་རི་སཾ… བྲ་ཧྨ་པ་རི་སཾ ཨུ་པ་ས་ངྐ་མི་ཏཱ. ཏ་ཏྲ་པི མ་ཡཱ ས་ནྣི་སི་ནྣ་པུ་བྦཾ ཙེ་ཝ ས་ལླ་པི་ཏ་པུ་བྦ་ཉྩ སཱ་ཀ་ཙྪཱ ཙ ས་མཱ་པ་ཛྫི་ཏ་པུ་བྦཱ. ཏ་ཏྠ ཡཱ་དི་ས་ཀོ ཏེ་སཾ ཝ་ཎྞོ ཧོ་ཏི, ཏཱ་དི་ས་ཀོ མ་ཡ྄ཧཾ ཝ་ཎྞོ ཧོ་ཏི. ཡཱ་དི་ས་ཀོ ཏེ་སཾ ས་རོ ཧོ་ཏི, ཏཱ་དི་ས་ཀོ མ་ཡ྄ཧཾ ས་རོ ཧོ་ཏི. དྷ་མྨི་ཡཱ ཀ་ཐཱ་ཡ ས་ནྡ་སྶེ་མི ས་མཱ་ད་པེ་མི ས་མུ་ཏྟེ་ཛེ་མི ས་མྤ་ཧཾ་སེ་མི. བྷཱ་ས་མཱ་ན་ཉྩ མཾ ན ཛཱ་ན་ནྟི – ‘ཀོ ནུ ཁོ ཨ་ཡཾ བྷཱ་ས་ཏི དེ་ཝོ ཝཱ མ་ནུ་སྶོ ཝཱ’ཏི? དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨ་ནྟ་ར་དྷཱ་ཡཱ་མི. ཨ་ནྟ་ར་ཧི་ཏ་ཉྩ མཾ ན ཛཱ་ན་ནྟི – ‘ཀོ ནུ ཁོ ཨ་ཡཾ ཨ་ནྟ་ར་ཧི་ཏོ དེ་ཝོ ཝཱ མ་ནུ་སྶོ ཝཱ’ཏི? ཨི་མཱ ཁོ, ཨཱ་ན་ནྡ, ཨ་ཊྛ པ་རི་སཱ.