༡. ཙཱུ་ལ༹་གོ་སི་ངྒ་སུ་ཏྟ་ཝ་ཎྞ་ནཱ
༣༢༥. ཨེ་ཝཾ མེ སུ་ཏནྟི ཙཱུ་ལ༹་གོ་སི་ངྒ་སུ་ཏྟཾ. ཏ་ཏྠ ནཱ་ཏི་ཀེ ཝི་ཧ་ར་ཏཱིཏི ནཱ་ཏི་ཀཱ ནཱ་མ ཨེ་ཀཾ ཏ་ལཱ༹་ཀཾ ནི་སྶཱ་ཡ དྭི་ནྣཾ ཙཱུ་ལ༹་པི་ཏི་མ་ཧཱ་པི་ཏི་པུ་ཏྟཱ་ནཾ དྭེ གཱ་མཱ, ཏེ་སུ ཨེ་ཀ་སྨིཾ གཱ་མེ. གི་ཉྫ་ཀཱ་ཝ་ས་ཐེཏི ཨི་ཊྛ་ཀཱ་མ་ཡེ ཨཱ་ཝ་ས་ཐེ. ཨེ་ཀ་སྨིཾ ཀི་ར ས་མ་ཡེ བྷ་ག་ཝཱ མ་ཧཱ་ཛ་ན་ས་ངྒ་ཧཾ ཀ་རོ་ནྟོ ཝ་ཛྫི་ར་ཊྛེ ཙཱ་རི་ཀཾ ཙ་ར་མཱ་ནོ ནཱ་ཏི་ཀཾ ཨ་ནུ་པྤ་ཏྟོ. ནཱ་ཏི་ཀ་ཝཱ་སི་ནོ མ་ནུ་སྶཱ བྷ་ག་ཝ་ཏོ མ་ཧཱ་དཱ་ནཾ ད་ཏྭཱ དྷ་མྨ་ཀ་ཐཾ སུ་ཏྭཱ པ་ས་ནྣ་ཧ་ད་ཡཱ, ‘‘ས་ཏྠུ ཝ་ས་ན་ཊྛཱ་ནཾ ཀ་རི་སྶཱ་མཱ’’ཏི མ་ནྟེ་ཏྭཱ ཨི་ཊྛ་ཀཱ་ཧེ་ཝ བྷི་ཏྟི་སོ་པཱ་ན་ཏྠ་མྦྷེ ཝཱ་ལ༹་རཱུ་པཱ་དཱི་ནི ད་སྶེ་ནྟོ པཱ་སཱ་དཾ ཀ་ཏྭཱ སུ་དྷཱ་ཡ ལི་མྤི་ཏྭཱ མཱ་ལཱ་ཀ་མྨ་ལ་ཏཱ་ཀ་མྨཱ་དཱི་ནི ནི་ཊྛཱ་པེ་ཏྭཱ བྷུ་མྨ་ཏྠ་ར་ཎ་མ་ཉྩ་པཱི་ཋཱ་དཱི་ནི པ་ཉྙ་པེ་ཏྭཱ ས་ཏྠུ ནི་ཡྻཱ་ཏེ་སུཾ. ཨ་པ་རཱ་པ་རཾ པ་ནེ་ཏྠ མ་ནུ་སྶཱ བྷི་ཀྑུ་ས་ངྒྷ་སྶ ར་ཏྟི་ཊྛཱ་ན་དི་ཝཱ་ཊྛཱ་ན་མ་ཎྜ་པ་ཙ་ངྐ་མཱ་དཱི་ནི ཀཱ་ར་ཡིཾ་སུ. ཨི་ཏི སོ ཝི་ཧཱ་རོ མ་ཧཱ ཨ་ཧོ་སི. ཏཾ ས་ནྡྷཱ་ཡ ཝུ་ཏྟཾ ‘‘གི་ཉྫ་ཀཱ་ཝ་ས་ཐེ’’ཏི.
གོ་སི་ངྒ་སཱ་ལ་ཝ་ན་དཱ་ཡེཏི ཏ་ཏྠ ཨེ་ཀ་སྶ ཛེ་ཊྛ་ཀ་རུ་ཀྑ་སྶ ཁ་ནྡྷ་ཏོ གོ་སི་ངྒ་ས་ཎྛཱ་ནཾ ཧུ་ཏྭཱ ཝི་ཊ་པཾ ཨུ་ཊྛ་ཧི, ཏཾ རུ་ཀྑཾ ཨུ་པཱ་དཱ་ཡ ས་བྦ་མྤི ཏཾ ཝ་ནཾ གོ་སི་ངྒ་སཱ་ལ་ཝ་ནནྟི ས་ངྑཾ ག་ཏཾ. དཱ་ཡོཏི ཨ་ཝི་སེ་སེ་ན ཨ་ར་ཉྙ་སྶེ་ཏཾ ནཱ་མཾ. ཏ་སྨཱ གོ་སི་ངྒ་སཱ་ལ་ཝ་ན་དཱ་ཡེཏི གོ་སི་ངྒ་སཱ་ལ་ཝ་ན་ཨ་ར་ཉྙེ་ཏི ཨ་ཏྠོ. ཝི་ཧ་ར་ནྟཱིཏི སཱ་མ་གྒི་ར་སཾ ཨ་ནུ་བྷ་ཝ་མཱ་ནཱ ཝི་ཧ་ར་ནྟི. ཨི་མེ་ས་ཉྷི ཀུ་ལ་པུ་ཏྟཱ་ནཾ ཨུ་པ་རི་པ་ཎྞཱ་ས་ཀེ པུ་ཐུ་ཛྫ་ན་ཀཱ་ལོ ཀ་ཐི་ཏོ, ཨི་དྷ ཁཱི་ཎཱ་ས་ཝ་ཀཱ་ལོ. ཏ་དཱ ཧི ཏེ ལ་དྡྷ་སྶཱ་དཱ ལ་དྡྷ་པ་ཏི་ཊྛཱ ཨ་དྷི་ག་ཏ་པ་ཊི་ས་མྦྷི་དཱ ཁཱི་ཎཱ་ས་ཝཱ ཧུ་ཏྭཱ སཱ་མ་གྒི་ར་སཾ ཨ་ནུ་བྷ་ཝ་མཱ་ནཱ ཏ་ཏྠ ཝི་ཧ་རིཾ་སུ. ཏཾ ས་ནྡྷཱ་ཡེ་ཏཾ ཝུ་ཏྟཾ.
ཡེ་ན གོ་སི་ངྒ་སཱ་ལ་ཝ་ན་དཱ་ཡོ ཏེ་ནུ་པ་ས་ངྐ་མཱིཏི དྷ་མྨ་སེ་ནཱ་པ་ཏི་མ་ཧཱ་མོ་གྒ་ལླཱ་ན་ཏྠེ་རེ་སུ ཝཱ ཨ་སཱི་ཏི་མ་ཧཱ་སཱ་ཝ་ཀེ་སུ ཝཱ, ཨ་ནྟ་མ་སོ དྷ་མྨ་བྷ་ཎྜཱ་གཱ་རི་ཀ་ཨཱ་ན་ནྡ་ཏྠེ་ར་མྤི ཀ་ཉྩི ཨ་ནཱ་མ་ནྟེ་ཏྭཱ ས་ཡ་མེ་ཝ པ་ཏྟ་ཙཱི་ཝ་རཾ ཨཱ་དཱ་ཡ ཨ་ནཱི་ཀཱ ནི་སྶ་ཊོ ཧ་ཏྠཱི ཝི་ཡ, ཡཱུ་ཐཱ ནི་སྶ་ཊོ ཀཱ་ལ༹་སཱི་ཧོ ཝི་ཡ, ཝཱ་ཏ་ཙྪི་ནྣོ ཝ་ལཱ་ཧ་ཀོ ཝི་ཡ ཨེ་ཀ་ཀོ་ཝ ཨུ་པ་ས་ངྐ་མི. ཀ་སྨཱ པ་ནེ་ཏྠ བྷ་ག་ཝཱ ས་ཡཾ ཨ་ག་མཱ་སཱི་ཏི? ཏ་ཡོ ཀུ་ལ་པུ་ཏྟཱ སཱ་མ་གྒི་ར་སཾ ཨ་ནུ་བྷ་ཝ་ནྟཱ ཝི་ཧ་ར་ནྟི, ཏེ་སཾ པ་གྒ་ཎྷ་ན་ཏོ, པ་ཙྪི་མ་ཛ་ན་ཏཾ ཨ་ནུ་ཀ་མྤ་ན་ཏོ དྷ་མྨ་ག་རུ་བྷཱ་ཝ་ཏོ ཙ. ཨེ་ཝཾ ཀི་ར་སྶ ཨ་ཧོ་སི – ‘‘ཨ་ཧཾ ཨི་མེ ཀུ་ལ་པུ་ཏྟེ པ་གྒ་ཎྷི་ཏྭཱ ཨུ་ཀྐཾ་སི་ཏྭཱ པ་ཊི་ས་ནྠཱ་རཾ ཀ་ཏྭཱ དྷ་མྨཾ ནེ་སཾ དེ་སེ་སྶཱ་མཱི’’ཏི. ཨེ་ཝཾ ཏཱ་ཝ པ་གྒ་ཎྷ་ན་ཏོ ཨ་ག་མཱ་སི. ཨ་པ་ར་མྤི་སྶ ཨ་ཧོ་སི – ‘‘ཨ་ནཱ་ག་ཏེ ཀུ་ལ་པུ་ཏྟཱ ས་མྨཱ་ས་མྦུ་དྡྷོ ས་མ་གྒ་ཝཱ་སཾ ཝ་ས་ནྟཱ་ནཾ ས་ནྟི་ཀཾ ས་ཡཾ ག་ནྟྭཱ པ་ཊི་ས་ནྠཱ་རཾ ཀ་ཏྭཱ དྷ་མྨཾ ཀ་ཐེ་ཏྭཱ ཏ་ཡོ ཀུ་ལ་པུ་ཏྟེ པ་གྒ་ཎྷི, ཀོ ནཱ་མ ས་མ་གྒ་ཝཱ་སཾ ན ཝ་སེ་ཡྻཱ་ཏི ས་མ་གྒ་ཝཱ་སཾ ཝ་སི་ཏ་བྦཾ མ་ཉྙ་མཱ་ནཱ ཁི་པྤ་མེ་ཝ དུ་ཀྑ་སྶ་ནྟཾ ཀ་རི་སྶ་ནྟཱི’’ཏི. ཨེ་ཝཾ པ་ཙྪི་མ་ཛ་ན་ཏཾ ཨ་ནུ་ཀ་མྤ་ན་ཏོ་པི ཨ་ག་མཱ་སི. བུ་དྡྷཱ ཙ ནཱ་མ དྷ་མྨ་ག་རུ་ནོ ཧོ་ནྟི, སོ ཙ ནེ་སཾ དྷ་མྨ་ག་རུ་བྷཱ་ཝོ ར་ཐ་ཝི་ནཱི་ཏེ ཨཱ་ཝི་ཀ་ཏོ་ཝ. ཨི་ཏི ཨི་མ་སྨཱ དྷ་མྨ་ག་རུ་བྷཱ་ཝ་ཏོ་པི དྷ་མྨཾ པ་གྒ་ཎྷི་སྶཱ་མཱི་ཏི ཨ་ག་མཱ་སི.
དཱ་ཡ་པཱ་ལོཏི ཨ་ར་ཉྙ་པཱ་ལོ. སོ ཏཾ ཨ་ར་ཉྙཾ ཡ་ཐཱ ཨི་ཙྪི་ཏི་ཙྪི་ཏ་པྤ་དེ་སེ་ན མ་ནུ་སྶཱ པ་ཝི་སི་ཏྭཱ ཏ་ཏྠ པུ་པྥཾ ཝཱ ཕ་ལཾ ཝཱ ནི་ཡྻཱ་སཾ ཝཱ ད་བྦ་ས་མྦྷཱ་རཾ ཝཱ ན ཧ་ར་ནྟི, ཨེ་ཝཾ ཝ་ཏི་ཡཱ པ་རི་ཀྑི་ཏྟ་སྶ ཏ་སྶ ཨ་ར་ཉྙ་སྶ ཡོ་ཛི་ཏེ དྭཱ་རེ ནི་སཱི་དི་ཏྭཱ ཏཾ ཨ་ར་ཉྙཾ ར་ཀྑ་ཏི, པཱ་ལེ་ཏི. ཏ་སྨཱ ‘‘དཱ་ཡ་པཱ་ལོ’’ཏི ཝུ་ཏྟོ. ཨ་ཏྟ་ཀཱ་མ་རཱུ་པཱཏི ཨ་ཏྟ་ནོ ཧི་ཏཾ ཀཱ་མ་ཡ་མཱ་ན་ས་བྷཱ་ཝཱ ཧུ་ཏྭཱ ཝི་ཧ་ར་ནྟི. ཡོ ཧི ཨི་མ་སྨིཾ སཱ་ས་ནེ པ་བྦ་ཛི་ཏྭཱ་པི ཝེ་ཛྫ་ཀ་མྨ་དཱུ་ཏ་ཀ་མྨ་པ་ཧི་ཎ་ག་མ་ནཱ་དཱི་ནཾ ཝ་སེ་ན ཨེ་ཀ་ཝཱི་ས་ཏི་ཨ་ནེ་ས་ནཱ་ཧི ཛཱི་ཝི་ཀཾ ཀ་པྤེ་ཏི, ཨ་ཡཾ ན ཨ་ཏྟ་ཀཱ་མ་རཱུ་པོ ནཱ་མ. ཡོ པ་ན ཨི་མ་སྨིཾ སཱ་ས་ནེ པ་བྦ་ཛི་ཏྭཱ ཨེ་ཀ་ཝཱི་ས་ཏི་ཨ་ནེ་ས་ནཾ པ་ཧཱ་ཡ ཙ་ཏུ་པཱ་རི་སུ་དྡྷི་སཱི་ལེ པ་ཏི་ཊྛཱ་ཡ བུ་དྡྷ་ཝ་ཙ་ནཾ ཨུ་གྒ་ཎྷི་ཏྭཱ ས་པྤཱ་ཡ་དྷུ་ཏ་ངྒཾ ཨ་དྷི་ཊྛཱ་ཡ ཨ་ཊྛ་ཏིཾ་སཱ་ཡ ཨཱ་ར་མྨ་ཎེ་སུ ཙི་ཏྟ་རུ་ཙི་ཡཾ ཀ་མྨ་ཊྛཱ་ནཾ ག་ཧེ་ཏྭཱ གཱ་མ་ནྟཾ པ་ཧཱ་ཡ ཨ་ར་ཉྙཾ པ་ཝི་སི་ཏྭཱ ས་མཱ་པ་ཏྟི་ཡོ ནི་བྦ་ཏྟེ་ཏྭཱ ཝི་པ་སྶ་ནཱ་ཡ ཀ་མྨཾ ཀུ་རུ་མཱ་ནོ ཝི་ཧ་ར་ཏི, ཨ་ཡཾ ཨ་ཏྟ་ཀཱ་མོ ནཱ་མ. ཏེ་པི ཏ་ཡོ ཀུ་ལ་པུ་ཏྟཱ ཨེ་ཝ་རཱུ་པཱ ཨ་ཧེ་སུཾ. ཏེ་ན ཝུ་ཏྟཾ – ‘‘ཨ་ཏྟ་ཀཱ་མ་རཱུ་པཱ ཝི་ཧ་ར་ནྟཱི’’ཏི.
མཱ ཏེ་སཾ ཨ་ཕཱ་སུ་མ་ཀཱ་སཱིཏི ཏེ་སཾ མཱ ཨ་ཕཱ་སུ་ཀཾ ཨ་ཀཱ་སཱི་ཏི བྷ་ག་ཝ་ནྟཾ ཝཱ་རེ་སི. ཨེ་ཝཾ ཀི་ར་སྶ ཨ་ཧོ་སི – ‘‘ཨི་མེ ཀུ་ལ་པུ་ཏྟཱ ས་མ་གྒཱ ཝི་ཧ་ར་ནྟི, ཨེ་ཀ་ཙྩ་སྶ ཙ ག་ཏ་ཊྛཱ་ནེ བྷ་ཎྜ་ན་ཀ་ལ་ཧ་ཝི་ཝཱ་དཱ ཝ་ཏྟ་ནྟི, ཏི་ཁི་ཎ་སི་ངྒོ ཙ་ཎྜ་གོ་ཎོ ཝི་ཡ ཨོ་ཝི་ཛ྄ཛྷ་ནྟོ ཝི་ཙ་ར་ཏི, ཨ་ཐེ་ཀ་མ་གྒེ་ན དྭི་ནྣཾ ག་མ་ནཾ ན ཧོ་ཏི, ཀ་དཱ་ཙི ཨ་ཡ་མྤི ཨེ་ཝཾ ཀ་རོ་ནྟོ ཨི་མེ་སཾ ཀུ་ལ་པུ་ཏྟཱ་ནཾ ས་མ་གྒ་ཝཱ་སཾ བྷི་ནྡེ་ཡྻ. པཱ་སཱ་དི་ཀོ ཙ པ་ནེ་ས སུ་ཝ་ཎྞ་ཝ་ཎྞོ སུ་ར་ས་གི་དྡྷོ མ་ཉྙེ, ག་ཏ་ཀཱ་ལ་ཏོ པ་ཊྛཱ་ཡ པ་ཎཱི་ཏ་དཱ་ཡ་ཀཱ་ནཾ ཨ་ཏྟ་ནོ ཨུ་པ་ཊྛཱ་ཀཱ་ན་ཉྩ ཝ་ཎྞ་ཀ་ཐ་ནཱ་དཱི་ཧི ཨི་མེ་སཾ ཀུ་ལ་པུ་ཏྟཱ་ནཾ ཨ་པྤ་མཱ་ད་ཝི་ཧཱ་རཾ བྷི་ནྡེ་ཡྻ. ཝ་ས་ན་ཊྛཱ་ནཱ་ནི ཙཱ་པི ཨེ་ཏེ་སཾ ཀུ་ལ་པུ་ཏྟཱ་ནཾ ནི་བ་དྡྷཱ་ནི པ་རི་ཙྪི་ནྣཱ་ནི ཏི་སྶོ ཙ པ་ཎྞ་སཱ་ལཱ ཏ་ཡོ ཙ་ངྐ་མཱ ཏཱི་ཎི དི་ཝཱ་ཊྛཱ་ནཱ་ནི ཏཱི་ཎི མ་ཉྩ་པཱི་ཋཱ་ནི. ཨ་ཡཾ པ་ན ས་མ་ཎོ མ་ཧཱ་ཀཱ་ཡོ ཝུ་ཌྜྷ་ཏ་རོ མ་ཉྙེ བྷ་ཝི་སྶ་ཏི. སོ ཨ་ཀཱ་ལེ ཨི་མེ ཀུ་ལ་པུ་ཏྟེ སེ་ནཱ་ས་ནཱ ཝུ་ཊྛཱ་པེ་སྶ་ཏི. ཨེ་ཝཾ ས་བྦ་ཐཱ་པི ཨེ་ཏེ་སཾ ཨ་ཕཱ་སུ བྷ་ཝི་སྶ་ཏཱི’’ཏི. ཏཾ ཨ་ནི་ཙྪ་ནྟོ, ‘‘མཱ ཏེ་སཾ ཨ་ཕཱ་སུ་ཀ་མ་ཀཱ་སཱི’’ཏི བྷ་ག་ཝ་ནྟཾ ཝཱ་རེ་སི.
ཀིཾ པ་ནེ་ས ཛཱ་ན་ནྟོ ཝཱ་རེ་སི, ཨ་ཛཱ་ན་ནྟོ་ཏི? ཨ་ཛཱ་ན་ནྟོ. ཀི་ཉྩཱ་པི ཧི ཏ་ཐཱ་ག་ཏ་སྶ པ་ཊི་ས་ནྡྷི་གྒ་ཧ་ཎ་ཏོ པ་ཊྛཱ་ཡ ད་ས་ས་ཧ་སྶ་ཙ་ཀྐ་ཝཱ་ལ༹་ཀ་མྤ་ནཱ་དཱི་ནི པཱ་ཊི་ཧཱ་རི་ཡཱ་ནི པ་ཝ་ཏྟིཾ་སུ, ཨ་ར་ཉྙ་ཝཱ་སི་ནོ པ་ན དུ་བྦ་ལ་མ་ནུ་སྶཱ ས་ཀ་མྨ་པྤ་སུ་ཏཱ ཏཱ་ནི ས་ལླ་ཀྑེ་ཏུཾ ན ས་ཀྐོ་ནྟི. ས་མྨཱ་ས་མྦུ་དྡྷོ ཙ ནཱ་མ ཡ་དཱ ཨ་ནེ་ཀ་བྷི་ཀྑུ་ས་ཧ་སྶ་པ་རི་ཝཱ་རོ བྱཱ་མ་པྤ་བྷཱ་ཡ ཨ་སཱི་ཏི་ཨ་ནུ་བྱ་ཉྫ་ནེ་ཧི དྭ་ཏྟིཾ་ས་མ་ཧཱ་པུ་རི་ས་ལ་ཀྑ་ཎ་སི་རི་ཡཱ ཙ བུ་དྡྷཱ་ནུ་བྷཱ་ཝཾ ད་སྶེ་ནྟོ ཝི་ཙ་ར་ཏི, ཏ་དཱ ཀོ ཨེ་སོ་ཏི ཨ་པུ་ཙྪི་ཏྭཱ་ཝ ཛཱ་ནི་ཏ་བྦོ ཧོ་ཏི. ཏ་དཱ པ་ན བྷ་ག་ཝཱ ས་བྦ་མྤི ཏཾ བུ་དྡྷཱ་ནུ་བྷཱ་ཝཾ ཙཱི་ཝ་ར་ག་བྦྷེ་ན པ་ཊི་ཙྪཱ་དེ་ཏྭཱ ཝ་ལཱ་ཧ་ཀ་ག་བྦྷེ་ན པ་ཊི་ཙྪ་ནྣོ པུ་ཎྞ་ཙ་ནྡོ ཝི་ཡ ས་ཡ་མེ་ཝ པ་ཏྟ་ཙཱི་ཝ་ར་མཱ་དཱ་ཡ ཨ་ཉྙཱ་ཏ་ཀ་ཝེ་སེ་ན ཨ་ག་མཱ་སི. ཨི་ཏི ནཾ ཨ་ཛཱ་ན་ནྟོ་ཝ དཱ་ཡ་པཱ་ལོ ནི་ཝཱ་རེ་སི.
ཨེ་ཏ་ད་ཝོ་ཙཱཏི ཐེ་རོ ཀི་ར མཱ ས་མ་ཎཱ་ཏི དཱ་ཡ་པཱ་ལ་སྶ ཀ་ཐཾ སུ་ཏྭཱ་ཝ ཙི་ནྟེ་སི – ‘‘མ་ཡཾ ཏ་ཡོ ཛ་ནཱ ཨི་དྷ ཝི་ཧ་རཱ་མ, ཨ་ཉྙེ པ་བྦ་ཛི་ཏཱ ནཱ་མ ན་ཏྠི, ཨ་ཡ་ཉྩ དཱ་ཡ་པཱ་ལོ པ་བྦ་ཛི་ཏེ་ན ཝི་ཡ ས་དྡྷིཾ ཀ་ཐེ་ཏི, ཀོ ནུ ཁོ བྷ་ཝི་སྶ་ཏཱི’’ཏི དི་ཝཱ་ཊྛཱ་ན་ཏོ ཝུ་ཊྛཱ་ཡ དྭཱ་རེ ཋ་ཏྭཱ མ་གྒཾ ཨོ་ལོ་ཀེ་ནྟོ བྷ་ག་ཝ་ནྟཾ ཨ་དྡ་ས. བྷ་ག་ཝཱ་པི ཐེ་ར་སྶ ས་ཧ ད་སྶ་ནེ་ནེ་ཝ ས་རཱི་རོ་བྷཱ་སཾ མུ་ཉྩི, ཨ་སཱི་ཏི་ཨ་ནུ་བྱ་ཉྫ་ན་ཝི་རཱ་ཛི་ཏཱ བྱཱ་མ་པྤ་བྷཱ པ་སཱ་རི་ཏ་སུ་ཝ་ཎྞ་པ་ཊོ ཝི་ཡ ཝི་རོ་ཙི་ཏྠ. ཐེ་རོ, ‘‘ཨ་ཡཾ དཱ་ཡ་པཱ་ལོ ཕ་ཎ་ཀ་ཏཾ ཨཱ་སི་ཝི་སཾ གཱི་ཝཱ་ཡ ག་ཧེ་ཏུཾ ཧ་ཏྠཾ པ་སཱ་རེ་ནྟོ ཝི་ཡ ལོ་ཀེ ཨ་གྒ་པུ་གྒ་ལེ་ན ས་དྡྷིཾ ཀ་ཐེ་ནྟོ་ཝ ན ཛཱ་ནཱ་ཏི, ཨ་ཉྙ་ཏ་ར་བྷི་ཀྑུ་ནཱ ཝི་ཡ ས་དྡྷིཾ ཀ་ཐེ་ཏཱི’’ཏི ནི་ཝཱ་རེ་ནྟོ ཨེ་ཏཾ, ‘‘མཱ, ཨཱ་ཝུ་སོ དཱ་ཡ་པཱ་ལཱ’’ཏི་ཨཱ་དི་ཝ་ཙ་ནཾ ཨ་ཝོ་ཙ.
ཏེ་ནུ་པ་ས་ངྐ་མཱིཏི ཀ་སྨཱ བྷ་ག་ཝ་ཏོ པ་ཙྩུ་གྒ་མ་ནཾ ཨ་ཀ་ཏྭཱ ཨུ་པ་ས་ངྐ་མི? ཨེ་ཝཾ ཀི་ར་སྶ ཨ་ཧོ་སི – ‘‘མ་ཡཾ ཏ་ཡོ ཛ་ནཱ ས་མ་གྒ་ཝཱ་སཾ ཝ་སཱ་མ, ས་ཙཱ་ཧཾ ཨེ་ཀ་ཀོ་ཝ པ་ཙྩུ་གྒ་མ་ནཾ ཀ་རི་སྶཱ་མི, ས་མ་གྒ་ཝཱ་སོ ནཱ་མ ན བྷ་ཝི་སྶ་ཏཱི’’ཏི པི་ཡ་མི་ཏྟེ ག་ཧེ་ཏྭཱ་ཝ པ་ཙྩུ་གྒ་མ་ནཾ ཀ་རི་སྶཱ་མི. ཡ་ཐཱ ཙ བྷ་ག་ཝཱ མ་ཡ྄ཧཾ པི་ཡོ, ཨེ་ཝཾ ས་ཧཱ་ཡཱ་ན་མྤི མེ པི་ཡོ་ཏི, ཏེ་ཧི ས་དྡྷིཾ པ་ཙྩུ་གྒ་མ་ནཾ ཀཱ་ཏུ་ཀཱ་མོ ས་ཡཾ ཨ་ཀ་ཏྭཱ་ཝ ཨུ་པ་ས་ངྐ་མི. ཀེ་ཙི པ་ན ཏེ་སཾ ཐེ་རཱ་ནཾ པ་ཎྞ་སཱ་ལ་དྭཱ་རེ ཙ་ངྐ་མ་ན་ཀོ་ཊི་ཡཱ བྷ་ག་ཝ་ཏོ ཨཱ་ག་མ་ན་མ་གྒོ ཧོ་ཏི, ཏ་སྨཱ ཐེ་རོ ཏེ་སཾ ས་ཉྙཾ ད་ད་མཱ་ནོ་ཝ ག་ཏོ་ཏི. ཨ་བྷི་ཀྐ་མ་ཐཱཏི ཨི་ཏོ ཨཱ་ག་ཙྪ་ཐ. པཱ་དེ པ་ཀྑཱ་ལེ་སཱིཏི ཝི་ཀ་སི་ཏ་པ་དུ་མ་ས་ནྣི་བྷེ་ཧི ཛཱ་ལ་ཧ་ཏྠེ་ཧི མ་ཎི་ཝ་ཎྞཾ ཨུ་ད་ཀཾ ག་ཧེ་ཏྭཱ སུ་ཝ་ཎྞ་ཝ་ཎྞེ་སུ པི་ཊྛི་པཱ་དེ་སུ ཨུ་ད་ཀ་མ་བྷི་སི་ཉྩི་ཏྭཱ པཱ་དེ་ན པཱ་དཾ གྷཾ་ས་ནྟོ པ་ཀྑཱ་ལེ་སི. བུ་དྡྷཱ་ནཾ ཀཱ་ཡེ ར་ཛོ་ཛ་ལླཾ ནཱ་མ ན ཨུ་པ་ལི་མྤ་ཏི, ཀ་སྨཱ པ་ཀྑཱ་ལེ་སཱི་ཏི? ས་རཱི་ར་སྶ ཨུ་ཏུ་གྒ་ཧ་ཎ་ཏྠཾ, ཏེ་ས་ཉྩ ཙི་ཏྟ་ས་མྤ་ཧཾ་ས་ན་ཏྠཾ. ཨ་མྷེ་ཧི ཨ་བྷི་ཧ་ཊེ་ན ཨུ་ད་ཀེ་ན བྷ་ག་ཝཱ པཱ་དེ པ་ཀྑཱ་ལེ་སི, པ་རི་བྷོ་གཾ ཨ་ཀཱ་སཱི་ཏི ཏེ་སཾ བྷི་ཀྑཱུ་ནཾ བ་ལ་ཝ་སོ་མ་ན་སྶ་ཝ་སེ་ན ཙི་ཏྟཾ པཱི་ཎི་ཏཾ ཧོ་ཏི, ཏ་སྨཱ པ་ཀྑཱ་ལེ་སི. ཨཱ་ཡ་སྨ་ནྟཾ ཨ་ནུ་རུ་དྡྷཾ བྷ་ག་ཝཱ ཨེ་ཏ་ད་ཝོ་ཙཱཏི སོ ཀི་ར ཏེ་སཾ ཝུ་ཌྜྷ་ཏ་རོ.
༣༢༦. ཏ་སྶ ས་ངྒ་ཧེ ཀ་ཏེ སེ་སཱ་ནཾ ཀ་ཏོ་ཝ ཧོ་ཏཱི་ཏི ཐེ་ར་ཉྙེ་ཝ ཨེ་ཏཾ ཀ་ཙྩི ཝོ ཨ་ནུ་རུ་དྡྷཱཏི་ཨཱ་དི་ཝ་ཙ་ནཾ ཨ་ཝོ་ཙ. ཏ་ཏྠ ཀ་ཙྩཱིཏི པུ་ཙྪ་ན་ཏྠེ ནི་པཱ་ཏོ. ཝོཏི སཱ་མི་ཝ་ཙ་ནཾ. ཨི་དཾ ཝུ་ཏྟཾ ཧོ་ཏི – ཀ་ཙྩི ཨ་ནུ་རུ་དྡྷཱ ཏུ་མྷཱ་ཀཾ ཁ་མ་ནཱི་ཡཾ, ཨི་རི་ཡཱ་པ་ཐོ ཝོ ཁ་མ་ཏི? ཀ་ཙྩི ཡཱ་པ་ནཱི་ཡཾ, ཀ་ཙྩི ཝོ ཛཱི་ཝི་ཏཾ ཡཱ་པེ་ཏི གྷ་ཊི་ཡ་ཏི? ཀ་ཙྩི པི་ཎྜ་ཀེ་ན ན ཀི་ལ་མ་ཐ, ཀ་ཙྩི ཏུ་མྷཱ་ཀཾ སུ་ལ་བྷ་པི་ཎྜཾ, ས་མྤ་ཏྟེ ཝོ དི་སྭཱ མ་ནུ་སྶཱ ཨུ་ལུ༹་ངྐ་ཡཱ་གུཾ ཝཱ ཀ་ཊ་ཙྪུ་བྷི་ཀྑཾ ཝཱ དཱ་ཏ་བྦཾ མ་ཉྙ་ནྟཱི་ཏི བྷི་ཀྑཱ་ཙཱ་ར་ཝ་ཏྟཾ པུ་ཙྪ་ཏི. ཀ་སྨཱ? པ་ཙྩ་ཡེ་ན ཨ་ཀི་ལ་མ་ནྟེ་ན ཧི ས་ཀྐཱ ས་མ་ཎ་དྷ་མྨོ ཀཱ་ཏུཾ, ཝ་ཏྟ་མེ་ཝ ཝཱ ཨེ་ཏཾ པ་བྦ་ཛི་ཏཱ་ནཾ. ཨ་ཐ ཏེ་ན པ་ཊི་ཝ་ཙ་ནེ དི་ནྣེ, ‘‘ཨ་ནུ་རུ་དྡྷཱ, ཏུ་མྷེ རཱ་ཛ་པ་བྦ་ཛི་ཏཱ མ་ཧཱ་པུ་ཉྙཱ, མ་ནུ་སྶཱ ཏུ་མྷཱ་ཀཾ ཨ་ར་ཉྙེ ཝ་ས་ནྟཱ་ནཾ ཨ་ད་ཏྭཱ ཀ་སྶ ཨ་ཉྙ་སྶ དཱ་ཏ་བྦཾ མ་ཉྙི་སྶ་ནྟི, ཏུ་མྷེ པ་ན ཨེ་ཏཾ བྷུ་ཉྫི་ཏྭཱ ཀིཾ ནུ ཁོ མི་ག་པོ་ཏ་ཀཱ ཝི་ཡ ཨ་ཉྙ་མ་ཉྙཾ ས་ངྒྷ་ཊྚེ་ནྟཱ ཝི་ཧ་ར་ཐ, ཨུ་དཱ་ཧུ སཱ་མ་གྒི་བྷཱ་ཝོ ཝོ ཨ་ཏྠཱི’’ཏི སཱ་མ་གྒི་ར་སཾ པུ་ཙྪ་ནྟོ, ཀ་ཙྩི པ་ན ཝོ, ཨ་ནུ་རུ་དྡྷཱ, ས་མ་གྒཱཏི་ཨཱ་དི་མཱ་ཧ.
ཏ་ཏྠ ཁཱི་རོ་ད་ཀཱི་བྷཱུ་ཏཱཏི ཡ་ཐཱ ཁཱི་ར་ཉྩ ཨུ་ད་ཀ་ཉྩ ཨ་ཉྙ་མ་ཉྙཾ སཾ་ས་ནྡ་ཏི, ཝི་སུཾ ན ཧོ་ཏི, ཨེ་ཀ་ཏྟཾ ཝི་ཡ ཨུ་པེ་ཏི, ཀ་ཙྩི ཨེ་ཝཾ སཱ་མ་གྒི་ཝ་སེ་ན ཨེ་ཀ་ཏྟཱུ་པ་ག་ཏ་ཙི་ཏྟུ་པྤཱ་དཱ ཝི་ཧ་ར་ཐཱ་ཏི པུ་ཙྪ་ཏི. པི་ཡ་ཙ་ཀྑཱུ་ཧཱིཏི མེ་ཏྟ་ཙི་ཏྟཾ པ་ཙྩུ་པ་ཊྛ་པེ་ཏྭཱ ཨོ་ལོ་ཀ་ན་ཙ་ཀྑཱུ་ནི པི་ཡ་ཙ་ཀྑཱུ་ནི ནཱ་མ. ཀ་ཙྩི ཏ་ཐཱ་རཱུ་པེ་ཧི ཙ་ཀྑཱུ་ཧི ཨ་ཉྙ་མ་ཉྙཾ ས་མྤ་སྶ་ནྟཱ ཝི་ཧ་ར་ཐཱ་ཏི པུ་ཙྪ་ཏི. ཏ་གྒྷཱཏི ཨེ་ཀཾ་ས་ཏྠེ ནི་པཱ་ཏོ. ཨེ་ཀཾ་སེ་ན མ་ཡཾ, བྷ་ནྟེ་ཏི ཝུ་ཏྟཾ ཧོ་ཏི. ཡ་ཐཱ ཀ་ཐཾ པ་ནཱཏི ཨེ་ཏྠ ཡ་ཐཱཏི ནི་པཱ་ཏ་མ་ཏྟཾ. ཀ་ཐནྟི ཀཱ་ར་ཎ་པུ་ཙྪཱ. ཀ་ཐཾ པ་ན ཏུ་མྷེ ཨེ་ཝཾ ཝི་ཧ་ར་ཐ, ཀེ་ན ཀཱ་ར་ཎེ་ན ཝི་ཧ་ར་ཐ, ཏཾ མེ ཀཱ་ར་ཎཾ བྲཱུ་ཐཱ་ཏི ཝུ་ཏྟཾ ཧོ་ཏི. མེ་ཏྟཾ ཀཱ་ཡ་ཀ་མྨནྟི མེ་ཏྟ་ཙི་ཏྟ་ཝ་སེ་ན པ་ཝ་ཏྟཾ ཀཱ་ཡ་ཀ་མྨཾ. ཨཱ་ཝི ཙེ་ཝ ར་ཧོ ཙཱཏི ས་མྨུ་ཁཱ ཙེ་ཝ པ་ར་མྨུ་ཁཱ ཙ. ཨི་ཏ་རེ་སུ་པི ཨེ་སེ་ཝ ན་ཡོ.
ཏ་ཏྠ ས་མྨུ་ཁཱ ཀཱ་ཡ་ཝ་ཙཱི་ཀ་མྨཱ་ནི ས་ཧ་ཝཱ་སེ ལ་བྦྷ་ནྟི, ཨི་ཏ་རཱ་ནི ཝི་པྤ་ཝཱ་སེ. མ་ནོ་ཀ་མྨཾ ས་བྦ་ཏྠ ལ་བྦྷ་ཏི. ཡ་ཉྷི ས་ཧ་ཝ་ས་ནྟེ་སུ ཨེ་ཀེ་ན མ་ཉྩ་པཱི་ཋཾ ཝཱ དཱ་རུ་བྷ་ཎྜཾ ཝཱ མ་ཏྟི་ཀཱ་བྷ་ཎྜཾ ཝཱ བ་ཧི དུ་ནྣི་ཀྑི་ཏྟཾ ཧོ་ཏི, ཏཾ དི་སྭཱ ཀེ་ནི་དཾ ཝ་ལ༹་ཉྫི་ཏ་ནྟི ཨ་ཝ་ཉྙཾ ཨ་ཀ་ཏྭཱ ཨ་ཏྟ་ནཱ དུ་ནྣི་ཀྑི་ཏྟཾ ཝི་ཡ ག་ཧེ་ཏྭཱ པ་ཊི་སཱ་མེ་ནྟ་སྶ པ་ཊི་ཛ་གྒི་ཏ་བྦ་ཡུ་ཏྟཾ ཝཱ པ་ན ཋཱ་ནཾ པ་ཊི་ཛ་གྒ་ནྟ་སྶ ས་མྨུ་ཁཱ མེ་ཏྟཾ ཀཱ་ཡ་ཀ་མྨཾ ནཱ་མ ཧོ་ཏི. ཨེ་ཀ་སྨིཾ པ་ཀྐ་ནྟེ ཏེ་ན དུ་ནྣི་ཀྑི་ཏྟཾ སེ་ནཱ་ས་ན་པ་རི་ཀྑཱ་རཾ ཏ་ཐེ་ཝ ནི་ཀྑི་པ་ནྟ་སྶ པ་ཊི་ཛ་གྒི་ཏ་བྦ་ཡུ་ཏྟ་ཊྛཱ་ནཾ ཝཱ པ་ན པ་ཊི་ཛ་གྒ་ནྟ་སྶ པ་ར་མྨུ་ཁཱ མེ་ཏྟཾ ཀཱ་ཡ་ཀ་མྨཾ ནཱ་མ ཧོ་ཏི. ས་ཧ་ཝ་ས་ནྟ་སྶ པ་ན ཏེ་ཧི ས་དྡྷིཾ མ་དྷུ་རཾ ས་མྨོ་ད་ནཱི་ཡཾ ཀ་ཐཾ པ་ཊི་ས་ནྠཱ་ར་ཀ་ཐཾ སཱ་ར་ཎཱི་ཡ་ཀ་ཐཾ དྷ་མྨཱི་ཀ་ཐཾ ས་ར་བྷ་ཉྙཾ སཱ་ཀ་ཙྪཾ པ་ཉྷ་པུ་ཙྪ་ནཾ པ་ཉྷ་ཝི་སྶ་ཛྫ་ན་ནྟི ཨེ་ཝ་མཱ་དི་ཀ་ར་ཎེ ས་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ ཧོ་ཏི. ཐེ་རེ་སུ པ་ན པ་ཀྐ་ནྟེ་སུ མ་ཡ྄ཧཾ པི་ཡ་ས་ཧཱ་ཡོ ན་ནྡི་ཡ་ཏྠེ་རོ ཀི་མི་ལ་ཏྠེ་རོ ཨེ་ཝཾ སཱི་ལ་ས་མྤ་ནྣོ, ཨེ་ཝཾ ཨཱ་ཙཱ་ར་ས་མྤ་ནྣོ་ཏི་ཨཱ་དི་གུ་ཎ་ཀ་ཐ་ནཾ པ་ར་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ ཧོ་ཏི. མ་ཡ྄ཧཾ པི་ཡ་མི་ཏྟོ ན་ནྡི་ཡ་ཏྠེ་རོ ཀི་མི་ལ་ཏྠེ་རོ ཨ་ཝེ་རོ ཧོ་ཏུ, ཨ་བྱཱ་པ་ཛྫོ སུ་ཁཱི ཧོ་ཏཱུ་ཏི ཨེ་ཝཾ ས་མ་ནྣཱ་ཧ་ར་ཏོ པ་ན ས་མྨུ་ཁཱ་པི པ་ར་མྨུ་ཁཱ་པི མེ་ཏྟཾ མ་ནོ་ཀ་མྨཾ ཧོ་ཏི་ཡེ་ཝ.
ནཱ་ནཱ ཧི ཁོ ནོ, བྷ་ནྟེ, ཀཱ་ཡཱཏི ཀཱ་ཡ་ཉྷི པི་ཊྛཾ ཝི་ཡ མ་ཏྟི་ཀཱ ཝི་ཡ ཙ ཨོ་མ་དྡི་ཏྭཱ ཨེ་ཀ་ཏོ ཀཱ་ཏུཾ ན ས་ཀྐཱ. ཨེ་ཀ་ཉྩ པ་ན མ་ཉྙེ ཙི་ཏྟནྟི ཙི་ཏྟཾ པ་ན ནོ ཧི་ཏ་ཊྛེ་ན ནི་ར་ནྟ་ར་ཊྛེ་ན ཨ་ཝི་གྒ་ཧ་ཊྛེ་ན ས་མ་གྒ་ཊྛེ་ན ཨེ་ཀ་མེ་ཝཱ་ཏི ད་སྶེ་ཏི. ཀ་ཐཾ པ་ནེ་ཏཾ ས་ཀཾ ཙི་ཏྟཾ ནི་ཀྑི་པི་ཏྭཱ ཨི་ཏ་རེ་སཾ ཙི་ཏྟ་ཝ་སེ་ན ཝ་ཏྟིཾ་སཱུ་ཏི? ཨེ་ཀ་སྶ པ་ཏྟེ མ་ལཾ ཨུ་ཊྛ་ཧ་ཏི, ཨེ་ཀ་སྶ ཙཱི་ཝ་རཾ ཀི་ལི་ཊྛཾ ཧོ་ཏི, ཨེ་ཀ་སྶ པ་རི་བྷ་ཎྜ་ཀ་མྨཾ ཧོ་ཏི. ཏ་ཏྠ ཡ་སྶ པ་ཏྟེ མ་ལཾ ཨུ་ཊྛི་ཏཾ, ཏེ་ན མ་མཱ་ཝུ་སོ, པ་ཏྟེ མ་ལཾ ཨུ་ཊྛི་ཏཾ པ་ཙི་ཏུཾ ཝ་ཊྚ་ཏཱི་ཏི ཝུ་ཏྟེ ཨི་ཏ་རེ མ་ཡ྄ཧཾ ཙཱི་ཝ་རཾ ཀི་ལི་ཊྛཾ དྷོ་ཝི་ཏ་བྦཾ, མ་ཡ྄ཧཾ པ་རི་བྷ་ཎྜཾ ཀཱ་ཏ་བྦ་ནྟི ཨ་ཝ་ཏྭཱ ཨ་ར་ཉྙཾ པ་ཝི་སི་ཏྭཱ དཱ་རཱུ་ནི ཨཱ་ཧ་རི་ཏྭཱ ཚི་ནྡི་ཏྭཱ པ་ཏྟ་ཀ་ཊཱ་ཧེ པ་རི་བྷ་ཎྜཾ ཀ་ཏྭཱ ཏ་ཏོ པ་རཾ ཙཱི་ཝ་རཾ ཝཱ དྷོ་ཝ་ནྟི, པ་རི་བྷ་ཎྜཾ ཝཱ ཀ་རོ་ནྟི. མ་མཱ་ཝུ་སོ, ཙཱི་ཝ་རཾ ཀི་ལི་ཊྛཾ དྷོ་ཝི་ཏུཾ ཝ་ཊྚ་ཏི, མ་མ པ་ཎྞ་སཱ་ལཱ ཨུ་ཀླཱ་པཱ པ་རི་བྷ་ཎྜཾ ཀཱ་ཏུཾ ཝ་ཊྚ་ཏཱི་ཏི པ་ཋ་མ་ཏ་རཾ ཨཱ་རོ་ཙི་ཏེ་པི ཨེ་སེ་ཝ ན་ཡོ.
༣༢༧. སཱ་དྷུ སཱ་དྷུ, ཨ་ནུ་རུ་དྡྷཱཏི བྷ་ག་ཝཱ ཧེ་ཊྛཱ ན ཙ མ་ཡཾ, བྷ་ནྟེ, པི་ཎྜ་ཀེ་ན ཀི་ལ་མི་མྷཱ་ཏི ཝུ་ཏྟེ ན སཱ་དྷུ་ཀཱ་ར་མ་དཱ་སི. ཀ་སྨཱ? ཨ་ཡ་ཉྷི ཀ་བ་ལཱི༹་ཀཱ་རོ ཨཱ་ཧཱ་རོ ནཱ་མ ཨི་མེ་སཾ ས་ཏྟཱ་ནཾ ཨ་པཱ་ཡ་ལོ་ཀེ་པི དེ་ཝ་མ་ནུ་སྶ་ལོ་ཀེ་པི ཨཱ་ཙི་ཎྞ་ས་མཱ་ཙི་ཎྞོ་ཝ. ཨ་ཡཾ པ་ན ལོ་ཀ་ས་ནྣི་ཝཱ་སོ ཡེ་བྷུ་ཡྻེ་ན ཝི་ཝཱ་ད་པ་ཀྑ་ནྡོ, ཨ་པཱ་ཡ་ལོ་ཀེ དེ་ཝ་མ་ནུ་སྶ་ལོ་ཀེ་པི ཨི་མེ ས་ཏྟཱ པ་ཊི་ཝི་རུ་དྡྷཱ ཨེ་ཝ, ཨེ་ཏེ་སཾ སཱ་མ་གྒི་ཀཱ་ལོ དུ་ལླ་བྷོ, ཀ་དཱ་ཙི་དེ་ཝ ཧོ་ཏཱི་ཏི ས་མ་གྒ་ཝཱ་ས་སྶ དུ་ལླ་བྷ་ཏྟཱ ཨི་དྷ བྷ་ག་ཝཱ སཱ་དྷུ་ཀཱ་ར་མ་དཱ་སི. ཨི་དཱ་ནི ཏེ་སཾ ཨ་པྤ་མཱ་ད་ལ་ཀྑ་ཎཾ པུ་ཙྪ་ནྟོ ཀ་ཙྩི པ་ན ཝོ, ཨ་ནུ་རུ་དྡྷཱཏི་ཨཱ་དི་མཱ་ཧ. ཏ་ཏྠ ཝོཏི ནི་པཱ་ཏ་མ་ཏྟཾ པ་ཙྩ་ཏྟ་ཝ་ཙ་ནཾ ཝཱ, ཀ་ཙྩི ཏུ་མྷེ་ཏི ཨ་ཏྠོ. ཨ་མྷཱ་ཀནྟི ཨ་མྷེ་སུ ཏཱི་སུ ཛ་ནེ་སུ. པི་ཎྜཱ་ཡ པ་ཊི་ཀྐ་མ་ཏཱིཏི གཱ་མེ པི་ཎྜཱ་ཡ ཙ་རི་ཏྭཱ པ་ཙྩཱ་ག་ཙྪ་ཏི. ཨ་ཝ་ཀྐཱ་ར་པཱ་ཏིནྟི ཨ་ཏི་རེ་ཀ་པི་ཎྜ་པཱ་ཏཾ ཨ་པ་ནེ་ཏྭཱ ཋ་པ་ན་ཏྠཱ་ཡ ཨེ་ཀཾ ས་མུ་གྒ་པཱ་ཏིཾ དྷོ་ཝི་ཏྭཱ ཋ་པེ་ཏི.
ཡོ པ་ཙྪཱཏི ཏེ ཀི་ར ཐེ་རཱ ན ཨེ་ཀ་ཏོ་ཝ བྷི་ཀྑཱ་ཙཱ་རཾ པ་ཝི་ས་ནྟི, ཕ་ལ་ས་མཱ་པ་ཏྟི་ར་ཏཱ ཧེ་ཏེ. པཱ་ཏོ་ཝ ས་རཱི་ར་པྤ་ཊི་ཛ་གྒ་ནཾ ཀ་ཏྭཱ ཝ་ཏྟ་པྤ་ཊི་པ་ཏྟིཾ པཱུ་རེ་ཏྭཱ སེ་ནཱ་ས་ནཾ པ་ཝི་སི་ཏྭཱ ཀཱ་ལ་པ་རི་ཙྪེ་དཾ ཀ་ཏྭཱ ཕ་ལ་ས་མཱ་པ་ཏྟིཾ ཨ་པྤེ་ཏྭཱ ནི་སཱི་ད་ནྟི. ཏེ་སུ ཡོ པ་ཋ་མ་ཏ་རཾ ནི་སི་ནྣོ ཨ་ཏྟ་ནོ ཀཱ་ལ་པ་རི་ཙྪེ་ད་ཝ་སེ་ན པ་ཋ་མ་ཏ་རཾ ཨུ་ཊྛཱ་ཏི; སོ པི་ཎྜཱ་ཡ ཙ་རི་ཏྭཱ པ་ཊི་ནི་ཝ་ཏྟོ བྷ་ཏྟ་ཀི་ཙྩ་ཊྛཱ་ནཾ ཨཱ་ག་ནྟྭཱ ཛཱ་ནཱ་ཏི – ‘‘དྭེ བྷི་ཀྑཱུ པ་ཙྪཱ, ཨ་ཧཾ པ་ཋ་མ་ཏ་རཾ ཨཱ་ག་ཏོ’’ཏི. ཨ་ཐ པ་ཏྟཾ པི་ད་ཧི་ཏྭཱ ཨཱ་ས་ན་པ་ཉྙཱ་པ་ནཱ་དཱི་ནི ཀ་ཏྭཱ ཡ་དི པ་ཏྟེ པ་ཊི་ཝི་ས་མ་ཏྟ་མེ་ཝ ཧོ་ཏི, ནི་སཱི་དི་ཏྭཱ བྷུ་ཉྫ་ཏི. ཡ་དི ཨ་ཏི་རེ་ཀཾ ཧོ་ཏི, ཨ་ཝ་ཀྐཱ་ར་པཱ་ཏི་ཡཾ པ་ཀྑི་པི་ཏྭཱ པཱ་ཏིཾ པི་དྷཱ་ཡ བྷུ་ཉྫ་ཏི. ཀ་ཏ་བྷ་ཏྟ་ཀི་ཙྩོ པ་ཏྟཾ དྷོ་ཝི་ཏྭཱ ཝོ་ད་ཀཾ ཀ་ཏྭཱ ཐ་ཝི་ཀཱ་ཡ ཨོ་སཱ་པེ་ཏྭཱ པ་ཏྟ་ཙཱི་ཝ་རཾ ག་ཧེ་ཏྭཱ ཨ་ཏྟ་ནོ ཝ་ས་ན་ཊྛཱ་ནཾ པ་ཝི་ས་ཏི. དུ་ཏི་ཡོ་པི ཨཱ་ག་ནྟྭཱ་ཝ ཛཱ་ནཱ་ཏི – ‘‘ཨེ་ཀོ པ་ཋ་མཾ ཨཱ་ག་ཏོ, ཨེ་ཀོ པ་ཙྪ་ཏོ’’ཏི. སོ ས་ཙེ པ་ཏྟེ བྷ་ཏྟཾ པ་མཱ་ཎ་མེ་ཝ ཧོ་ཏི, བྷུ་ཉྫ་ཏི. ས་ཙེ མ་ནྡཾ, ཨ་ཝ་ཀྐཱ་ར་པཱ་ཏི་ཏོ ག་ཧེ་ཏྭཱ བྷུ་ཉྫ་ཏི. ས་ཙེ ཨ་ཏི་རེ་ཀཾ ཧོ་ཏི, ཨ་ཝ་ཀྐཱ་ར་པཱ་ཏི་ཡཾ པ་ཀྑི་པི་ཏྭཱ པ་མཱ་ཎ་མེ་ཝ བྷུ་ཉྫི་ཏྭཱ པུ་རི་མ་ཏྠེ་རོ ཝི་ཡ ཝ་ས་ན་ཊྛཱ་ནཾ པ་ཝི་ས་ཏི. ཏ་ཏི་ཡོ་པི ཨཱ་ག་ནྟྭཱ་ཝ ཛཱ་ནཱ་ཏི – ‘‘དྭེ པ་ཋ་མཾ ཨཱ་ག་ཏཱ, ཨ་ཧཾ པ་ཙྪ་ཏོ’’ཏི. སོ་པི དུ་ཏི་ཡ་ཏྠེ་རོ ཝི་ཡ བྷུ་ཉྫི་ཏྭཱ ཀ་ཏ་བྷ་ཏྟ་ཀི་ཙྩོ པ་ཏྟཾ དྷོ་ཝི་ཏྭཱ ཝོ་ད་ཀཾ ཀ་ཏྭཱ ཐ་ཝི་ཀཱ་ཡ ཨོ་སཱ་པེ་ཏྭཱ ཨཱ་ས་ནཱ་ནི ཨུ་ཀྑི་པི་ཏྭཱ པ་ཊི་སཱ་མེ་ཏི; པཱ་ནཱི་ཡ་གྷ་ཊེ ཝཱ པ་རི་བྷོ་ཛ་ནཱི་ཡ་གྷ་ཊེ ཝཱ ཨ་ཝ་སེ་སཾ ཨུ་ད་ཀཾ ཚ་ཌྜེ་ཏྭཱ གྷ་ཊེ ནི་ཀུ་ཛྫི་ཏྭཱ ཨ་ཝ་ཀྐཱ་ར་པཱ་ཏི་ཡཾ ས་ཙེ ཨ་ཝ་སེ་ས་བྷ་ཏྟཾ ཧོ་ཏི, ཏཾ ཝུ་ཏྟ་ན་ཡེ་ན ཛ་ཧི་ཏྭཱ པཱ་ཏིཾ དྷོ་ཝི་ཏྭཱ པ་ཊི་སཱ་མེ་ཏི; བྷ་ཏྟ་གྒཾ ས་མྨ་ཛྫ་ཏི. ཏ་ཏོ ཀ་ཙ་ཝ་རཾ ཚ་ཌྜེ་ཏྭཱ ས་མྨ་ཛྫ་ནིཾ ཨུ་ཀྑི་པི་ཏྭཱ ཨུ་པ་ཙི་ཀཱ་ཧི མུ་ཏྟ་ཊྛཱ་ནེ ཋ་པེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཝ་ས་ན་ཊྛཱ་ནཾ པ་ཝི་ས་ཏི. ཨི་དཾ ཐེ་རཱ་ནཾ བ་ཧི་ཝི་ཧཱ་རེ ཨ་ར་ཉྙེ བྷ་ཏྟ་ཀི་ཙྩ་ཀ་ར་ཎ་ཊྛཱ་ནེ བྷོ་ཛ་ན་སཱ་ལཱ་ཡཾ ཝ་ཏྟཾ. ཨི་དཾ ས་ནྡྷཱ་ཡ, ‘‘ཡོ པ་ཙྪཱ’’ཏི་ཨཱ་དི ཝུ་ཏྟཾ.
ཡོ པ་སྶ་ཏཱིཏི་ཨཱ་དི པ་ན ནེ་སཾ ཨ་ནྟོ་ཝི་ཧཱ་རེ ཝ་ཏྟ་ནྟི ཝེ་དི་ཏ་བྦཾ. ཏ་ཏྠ ཝ་ཙྩ་གྷ་ཊནྟི ཨཱ་ཙ་མ་ན་ཀུ་མྦྷིཾ. རི་ཏྟནྟི རི་ཏྟ་ཀཾ. ཏུ་ཙྪནྟི ཏ་སྶེ་ཝ ཝེ་ཝ་ཙ་ནཾ. ཨ་ཝི་ས་ཡ྄ཧནྟི ཨུ་ཀྑི་པི་ཏུཾ ཨ་ས་ཀྐུ་ཎེ་ཡྻཾ, ཨ་ཏི་བྷཱ་རི་ཡཾ. ཧ་ཏྠ་ཝི་ཀཱ་རེ་ནཱཏི ཧ་ཏྠ་ས་ཉྙཱ་ཡ. ཏེ ཀི་ར པཱ་ནཱི་ཡ་གྷ་ཊཱ་དཱི་སུ ཡཾ་ཀི་ཉྩི ཏུ་ཙྪ་ཀཾ ག་ཧེ་ཏྭཱ པོ་ཀྑ་ར་ཎིཾ ག་ནྟྭཱ ཨ་ནྟོ ཙ བ་ཧི ཙ དྷོ་ཝི་ཏྭཱ ཨུ་ད་ཀཾ པ་རི་སྶཱ་ཝེ་ཏྭཱ ཏཱི་རེ ཋ་པེ་ཏྭཱ ཨ་ཉྙཾ བྷི་ཀྑུཾ ཧ་ཏྠ་ཝི་ཀཱ་རེ་ན ཨཱ་མ་ནྟེ་ནྟི, ཨོ་དི་སྶ ཝཱ ཨ་ནོ་དི་སྶ ཝཱ ས་དྡཾ ན ཀ་རོ་ནྟི. ཀ་སྨཱ ཨོ་དི་སྶ ས་དྡཾ ན ཀ་རོ་ནྟི? ཏཾ བྷི་ཀྑུཾ ས་དྡོ བཱ་དྷེ་ཡྻཱ་ཏི. ཀ་སྨཱ ཨ་ནོ་དི་སྶ ས་དྡཾ ན ཀ་རོ་ནྟི? ཨ་ནོ་དི་སྶ ས་དྡེ དི་ནྣེ, ‘‘ཨ་ཧཾ པུ་རེ, ཨ་ཧཾ པུ་རེ’’ཏི དྭེ་པི ནི་ཀྑ་མེ་ཡྻུཾ, ཏ་ཏོ དྭཱི་ཧི ཀ་ཏྟ་བྦ་ཀ་མྨེ ཏ་ཏི་ཡ་སྶ ཀ་མྨ་ཙྪེ་དོ བྷ་ཝེ་ཡྻ. སཾ་ཡ་ཏ་པ་ད་ས་དྡོ པ་ན ཧུ་ཏྭཱ ཨ་པ་ར་སྶ བྷི་ཀྑུ་ནོ དི་ཝཱ་ཊྛཱ་ན་ས་ནྟི་ཀཾ ག་ནྟྭཱ ཏེ་ན དི་ཊྛ་བྷཱ་ཝཾ ཉ་ཏྭཱ ཧ་ཏྠ་ས་ཉྙཾ ཀ་རོ་ཏི, ཏཱ་ཡ ས་ཉྙཱ་ཡ ཨི་ཏ་རོ ཨཱ་ག་ཙྪ་ཏི, ཏ་ཏོ དྭེ ཛ་ནཱ ཧ་ཏྠེ་ན ཧ་ཏྠཾ སཾ་སི་བྦ་ནྟཱ དྭཱི་སུ ཧ་ཏྠེ་སུ ཋ་པེ་ཏྭཱ ཨུ་པ་ཊྛ་པེ་ནྟི. ཏཾ ས་ནྡྷཱ་ཡཱ་ཧ – ‘‘ཧ་ཏྠ་ཝི་ཀཱ་རེ་ན དུ་ཏི་ཡཾ ཨཱ་མ་ནྟེ་ཏྭཱ ཧ་ཏྠ་ཝི་ལ་ངྒྷ་ཀེ་ན ཨུ་པ་ཊྛ་པེ་མཱ’’ཏི.
པ་ཉྩཱ་ཧི་ཀཾ ཁོ པ་ནཱཏི ཙཱ་ཏུ་དྡ་སེ པ་ནྣ་ར་སེ ཨ་ཊྛ་མི་ཡ་ནྟི ཨི་དཾ ཏཱ་ཝ པ་ཀ་ཏི་དྷ་མྨ་སྶ་ཝ་ན་མེ་ཝ, ཏཾ ཨ་ཁ་ཎྜཾ ཀ་ཏྭཱ པ་ཉྩ་མེ པ་ཉྩ་མེ དི་ཝ་སེ དྭེ ཐེ་རཱ ནཱ་ཏི་ཝི་ཀཱ་ལེ ནྷཱ་ཡི་ཏྭཱ ཨ་ནུ་རུ་དྡྷ་ཏྠེ་ར་སྶ ཝ་ས་ན་ཊྛཱ་ནཾ ག་ཙྪ་ནྟི. ཏ་ཏྠ ཏ་ཡོ་པི ནི་སཱི་དི་ཏྭཱ ཏི་ཎྞཾ པི་ཊ་ཀཱ་ནཾ ཨ་ཉྙ་ཏ་ར་སྨིཾ ཨ་ཉྙ་མ་ཉྙཾ པ་ཉྷཾ པུ་ཙྪ་ནྟི, ཨ་ཉྙ་མ་ཉྙཾ ཝི་སྶ་ཛྫེ་ནྟི, ཏེ་སཾ ཨེ་ཝཾ ཀ་རོ་ནྟཱ་ནཾ་ཡེ་ཝ ཨ་རུ་ཎཾ ཨུ་གྒ་ཙྪ་ཏི. ཏཾ ས་ནྡྷཱ་ཡེ་ཏཾ ཝུ་ཏྟཾ. ཨེ་ཏྟཱ་ཝ་ཏཱ ཐེ་རེ་ན བྷ་ག་ཝ་ཏཱ ཨ་པྤ་མཱ་ད་ལ་ཀྑ་ཎཾ པུ་ཙྪི་ཏེ་ན པ་མཱ་ད་ཊྛཱ་ནེ་སུ་ཡེ་ཝ ཨ་པྤ་མཱ་ད་ལ་ཀྑ་ཎཾ ཝི་སྶ་ཛྫི་ཏཾ ཧོ་ཏི. ཨ་ཉྙེ་ས་ཉྷི བྷི་ཀྑཱུ་ནཾ བྷི་ཀྑཱ་ཙཱ་རཾ པ་ཝི་ས་ན་ཀཱ་ལོ, ནི་ཀྑ་མ་ན་ཀཱ་ལོ, ནི་ཝཱ་ས་ན་པ་རི་ཝ་ཏྟ་ནཾ, ཙཱི་ཝ་ར་པཱ་རུ་པ་ནཾ, ཨ་ནྟོ་གཱ་མེ པི་ཎྜཱ་ཡ ཙ་ར་ཎཾ དྷ་མྨ་ཀ་ཐ་ནཾ, ཨ་ནུ་མོ་ད་ནཾ, གཱ་མ་ཏོ ནི་ཀྑ་མི་ཏྭཱ བྷ་ཏྟ་ཀི་ཙྩ་ཀ་ར་ཎཾ, པ་ཏྟ་དྷོ་ཝ་ནཾ, པ་ཏྟ་ཨོ་སཱ་པ་ནཾ, པ་ཏྟ་ཙཱི་ཝ་ར་པ་ཊི་སཱ་མ་ན་ནྟི པ་པ་ཉྩ་ཀ་ར་ཎ་ཊྛཱ་ནཱ་ནི ཨེ་ཏཱ་ནི. ཏ་སྨཱ ཐེ་རོ ཨ་མྷཱ་ཀཾ ཨེ་ཏྟ་ཀཾ ཋཱ་ནཾ མུ་ཉྩི་ཏྭཱ པ་མཱ་ད་ཀཱ་ལོ ནཱ་མ ན་ཏྠཱི་ཏི ད་སྶེ་ནྟོ པ་མཱ་ད་ཊྛཱ་ནེ་སུ་ཡེ་ཝ ཨ་པྤ་མཱ་ད་ལ་ཀྑ་ཎཾ ཝི་སྶ་ཛྫེ་སི.
༣༢༨. ཨ་ཐ་སྶ བྷ་ག་ཝཱ སཱ་དྷུ་ཀཱ་རཾ ད་ཏྭཱ པ་ཋ་མ་ཛ྄ཛྷཱ་ནཾ པུ་ཙྪ་ནྟོ པུ་ན ཨ་ཏྠི པ་ན ཝོཏི་ཨཱ་དི་མཱ་ཧ. ཏ་ཏྠ ཨུ་ཏྟ་རི མ་ནུ་སྶ་དྷ་མྨཱཏི མ་ནུ་སྶ་དྷ་མྨ་ཏོ ཨུ་ཏྟ་རི. ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོཏི ཨ་རི་ཡ་བྷཱ་ཝ་ཀ་ར་ཎ་ས་མ་ཏྠོ ཉཱ་ཎ་ཝི་སེ་སོ. ཀི་ཉྷི ནོ སི་ཡཱ, བྷ་ནྟེཏི ཀ་སྨཱ, བྷ་ནྟེ, ནཱ་དྷི་ག་ཏོ བྷ་ཝི་སྶ་ཏི, ཨ་དྷི་ག་ཏོ་ཡེ་ཝཱ་ཏི. ཡཱ་ཝ དེ་ཝཱཏི ཡཱ་ཝ ཨེ་ཝ.
༣༢༩. ཨེ་ཝཾ པ་ཋ་མ་ཛ྄ཛྷཱ་ནཱ་དྷི་ག་མེ བྱཱ་ཀ་ཏེ དུ་ཏི་ཡ་ཛ྄ཛྷཱ་ནཱ་དཱི་ནི པུ་ཙྪ་ནྟོ ཨེ་ཏ་སྶ པ་ན ཝོཏི་ཨཱ་དི་མཱ་ཧ. ཏ་ཏྠ ས་མ་ཏི་ཀྐ་མཱ་ཡཱཏི ས་མ་ཏི་ཀྐ་མ་ཏྠཱ་ཡ. པ་ཊི་པྤ་སྶ་དྡྷི་ཡཱཏི པ་ཊི་པྤ་སྶ་དྡྷ་ཏྠཱ་ཡ. སེ་སཾ ས་བྦ་ཏྠ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པ་ཙྪི་མ་པ་ཉྷེ པ་ན ལོ་ཀུ་ཏྟ་ར་ཉཱ་ཎ་ད་སྶ་ན་ཝ་སེ་ན ཨ་དྷི་ག་ཏཾ ནི་རོ་དྷ་ས་མཱ་པ་ཏྟིཾ པུ་ཙྪ་ནྟོ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སོཏི ཨཱ་ཧ. ཐེ་རོ་པི པུ་ཙྪཱ་ནུ་རཱུ་པེ་ནེ་ཝ བྱཱ་ཀཱ་སི. ཏ་ཏྠ ཡ་སྨཱ ཝེ་ད་ཡི་ཏ་སུ་ཁ་ཏོ ཨ་ཝེ་ད་ཡི་ཏ་སུ་ཁཾ ས་ནྟ་ཏ་རཾ པ་ཎཱི་ཏ་ཏ་རཾ ཧོ་ཏི, ཏ་སྨཱ ཨ་ཉྙཾ ཕཱ་སུ་ཝི་ཧཱ་རཾ ཨུ་ཏྟ་རི་ཏ་རཾ ཝཱ པ་ཎཱི་ཏ་ཏ་རཾ ཝཱ ན ས་མ་ནུ་པ་སྶཱ་མཱཏི ཨཱ་ཧ.
༣༣༠. དྷ་མྨི་ཡཱ ཀ་ཐཱ་ཡཱཏི སཱ་མ་གྒི་ར་སཱ་ནི་སཾ་ས་པྤ་ཊི་སཾ་ཡུ་ཏྟཱ་ཡ དྷ་མྨི་ཡཱ ཀ་ཐཱ་ཡ. ས་བྦེ་པི ཏེ ཙ་ཏཱུ་སུ ས་ཙྩེ་སུ པ་རི་ནི་ཊྛི་ཏ་ཀི་ཙྩཱ, ཏེ་ན ཏེ་སཾ པ་ཊི་ཝེ་དྷ་ཏྠཱ་ཡ ཀི་ཉྩི ཀ་ཐེ་ཏ་བྦཾ ན་ཏྠི. སཱ་མ་གྒི་ར་སེ་ན པ་ན ཨ་ཡ་ཉྩ ཨ་ཡ་ཉྩ ཨཱ་ནི་སཾ་སོ་ཏི སཱ་མ་གྒི་ར་སཱ་ནི་སཾ་ས་མེ་ཝ ནེ་སཾ བྷ་ག་ཝཱ ཀ་ཐེ་སི. བྷ་ག་ཝ་ནྟཾ ཨ་ནུ་སཾ་ཡཱ་ཡི་ཏྭཱཏི ཨ་ནུ་ག་ནྟྭཱ. ཏེ ཀི་ར བྷ་ག་ཝ་ཏོ པ་ཏྟ་ཙཱི་ཝ་རཾ ག་ཧེ་ཏྭཱ ཐོ་ཀཾ ཨ་ག་མཾ་སུ, ཨ་ཐ བྷ་ག་ཝཱ ཝི་ཧཱ་ར་སྶ པ་རི་ཝེ་ཎ་པ་རི་ཡ་ནྟཾ ག་ཏ་ཀཱ་ལེ, ‘‘ཨཱ་ཧ་ར་ཐ མེ པ་ཏྟ་ཙཱི་ཝ་རཾ, ཏུ་མྷེ ཨི་དྷེ་ཝ ཏི་ཊྛ་ཐཱ’’ཏི པ་ཀྐཱ་མི. ཏ་ཏོ པ་ཊི་ནི་ཝ་ཏྟི་ཏྭཱཏི ཏ་ཏོ ཋི་ཏ་ཊྛཱ་ན་ཏོ ནི་ཝ་ཏྟི་ཏྭཱ. ཀིཾ ནུ ཁོ མ་ཡཾ ཨཱ་ཡ་སྨ་ཏོཏི བྷ་ག་ཝ་ནྟཾ ནི་སྶཱ་ཡ པ་བྦ་ཛྫཱ་དཱི་ནི ཨ་དྷི་ག་ནྟྭཱ་པི ཨ་ཏྟ་ནོ གུ་ཎ་ཀ་ཐཱ་ཡ ཨ་ཊྚི་ཡ་མཱ་ནཱ ཨ་དྷི་ག་མ་པྤི་ཙྪ་ཏཱ་ཡ ཨཱ་ཧཾ་སུ. ཨི་མཱ་ས་ཉྩ ཨི་མཱ་ས་ཉྩཱཏི པ་ཋ་མ་ཛ྄ཛྷཱ་ནཱ་དཱི་ནཾ ལོ་ཀི་ཡ་ལོ་ཀུ་ཏྟ་རཱ་ནཾ. ཙེ་ཏ་སཱ ཙེ་ཏོ པ་རི་ཙྩ ཝི་དི་ཏོཏི ཨ་ཛྫ མེ ཨཱ་ཡ་སྨ་ནྟོ ལོ་ཀི་ཡ་ས་མཱ་པ་ཏྟི་ཡཱ ཝཱི་ཏི་ནཱ་མེ་སུཾ, ཨ་ཛྫ ལོ་ཀུ་ཏྟ་རཱ་ཡཱ་ཏི ཨེ་ཝཾ ཙི་ཏྟེ་ན ཙི་ཏྟཾ པ་རི་ཙྪི་ནྡི་ཏྭཱ ཝི་དི་ཏཾ. དེ་ཝ་ཏཱ་པི མེཏི, བྷ་ནྟེ ཨ་ནུ་རུ་དྡྷ, ཨ་ཛྫ ཨ་ཡྻོ ན་ནྡི་ཡ་ཏྠེ་རོ, ཨ་ཛྫ ཨ་ཡྻོ ཀི་མི་ལ་ཏྠེ་རོ ཨི་མཱ་ཡ ཙ ཨི་མཱ་ཡ ཙ ས་མཱ་པ་ཏྟི་ཡཱ ཝཱི་ཏི་ནཱ་མེ་སཱི་ཏི ཨེ་ཝ་མཱ་རོ་ཙེ་སུ་ནྟི ཨ་ཏྠོ. པ་ཉྷཱ་བྷི་པུ་ཊྛེ་ནཱཏི ཏ་མྤི མ་ཡཱ ས་ཡཾ ཝི་དི་ཏ་ནྟི ཝཱ དེ་ཝ་ཏཱ་ཧི ཨཱ་རོ་ཙི་ཏ་ནྟི ཝཱ ཨེ་ཏྟ་ཀེ་ནེ་ཝ མུ་ཁཾ མེ ས་ཛྫ་ནྟི ཀ་ཐཾ ས་མུ་ཊྛཱ་པེ་ཏྭཱ ཨ་པུ་ཊྛེ་ནེ་ཝ མེ ན ཀ་ཐི་ཏཾ. བྷ་ག་ཝ་ཏཱ པ་ན པ་ཉྷཱ་བྷི་པུ་ཊྛེ་ན པ་ཉྷཾ ཨ་བྷི་པུ་ཙྪི་ཏེ་ན ས་ཏཱ བྱཱ་ཀ་ཏཾ, ཏ་ཏྲ མེ ཀིཾ ན རོ་ཙ་ཐཱ་ཏི ཨཱ་ཧ.
༣༣༡. དཱི་གྷོཏི ‘‘མ་ཎི མཱ་ཎི་ཝ་རོ དཱི་གྷོ, ཨ་ཐོ སེ་རཱི་ས་ཀོ ས་ཧཱ’’ཏི (དཱི. ནི. ༣.༢༩༣) ཨེ་ཝཾ ཨཱ་ག་ཏོ ཨ་ཊྛ་ཝཱི་ས་ཏི་ཡཱ ཡ་ཀྑ་སེ་ནཱ་པ་ཏཱི་ནཾ ཨ་བྦྷ་ནྟ་རོ ཨེ་ཀོ དེ་ཝ་རཱ་ཛཱ. པ་ར་ཛ་ནོཏི ཏ་སྶེ་ཝ ཡ་ཀྑ་སྶ ནཱ་མཾ. ཡེ་ན བྷ་ག་ཝཱ ཏེ་ནུ་པ་ས་ངྐ་མཱིཏི སོ ཀི་ར ཝེ་སྶ་ཝ་ཎེ་ན པེ་སི་ཏོ ཨེ་ཏཾ ཋཱ་ནཾ ག་ཙྪ་ནྟོ བྷ་ག་ཝ་ནྟཾ ས་ཡཾ པ་ཏྟ་ཙཱི་ཝ་རཾ ག་ཧེ་ཏྭཱ གི་ཉྫ་ཀཱ་ཝ་ས་ཐ་ཏོ གོ་སི་ངྒ་སཱ་ལ་ཝ་ན་སྶ ཨ་ནྟ་རེ དི་སྭཱ བྷ་ག་ཝཱ ཨ་ཏྟ་ནཱ པ་ཏྟ་ཙཱི་ཝ་རཾ ག་ཧེ་ཏྭཱ གོ་སི་ངྒ་སཱ་ལ་ཝ་ནེ ཏི་ཎྞཾ ཀུ་ལ་པུ་ཏྟཱ་ནཾ ས་ནྟི་ཀཾ ག་ཙྪ་ཏི. ཨ་ཛྫ མ་ཧ་ཏཱི དྷ་མྨ་དེ་ས་ནཱ བྷ་ཝི་སྶ་ཏི. མ་ཡཱ་པི ཏ་སྶཱ དེ་ས་ནཱ་ཡ བྷཱ་གི་ནཱ བྷ་ཝི་ཏ་བྦ་ནྟི ཨ་དི་སྶ་མཱ་ནེ་ན ཀཱ་ཡེ་ན ས་ཏྠུ པ་དཱ་ནུ་པ་དི་ཀོ ག་ནྟྭཱ ཨ་ཝི་དཱུ་རེ ཋ་ཏྭཱ དྷ་མྨཾ སུ་ཏྭཱ ས་ཏྠ་རི ག་ཙྪ་ནྟེ་པི ན ག་ཏོ, – ‘‘ཨི་མེ ཐེ་རཱ ཀིཾ ཀ་རི་སྶ་ནྟཱི’’ཏི ད་སྶ་ན་ཏྠཾ པ་ན ཏ་ཏྠེ་ཝ ཋི་ཏོ. ཨ་ཐ ཏེ དྭེ ཐེ་རེ ཨ་ནུ་རུ་དྡྷ་ཏྠེ་རཾ པ་ལི་ཝེ་ཋེ་ནྟེ དི་སྭཱ, – ‘‘ཨི་མེ ཐེ་རཱ བྷ་ག་ཝ་ནྟཾ ནི་སྶཱ་ཡ པ་བྦ་ཛྫཱ་ད་ཡོ ས་བྦ་གུ་ཎེ ཨ་དྷི་ག་ནྟྭཱ་པི བྷ་ག་ཝ་ཏོ་ཝ མ་ཙྪ་རཱ་ཡ་ནྟི, ན ས་ཧ་ནྟི, ཨ་ཏི་ཝི་ཡ ནི་ལཱི་ཡ་ནྟི པ་ཊི་ཙྪཱ་དེ་ནྟི, ན དཱ་ནི ཏེ་སཾ པ་ཊི་ཙྪཱ་དེ་ཏུཾ ད་སྶཱ་མི, པ་ཐ་ཝི་ཏོ ཡཱ་ཝ བྲ་ཧྨ་ལོ་ཀཱ ཨེ་ཏེ་སཾ གུ་ཎེ པ་ཀཱ་སེ་སྶཱ་མཱི’’ཏི ཙི་ནྟེ་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི.
ལཱ་བྷཱ ཝ་ཏ, བྷ་ནྟེཏི ཡེ, བྷ་ནྟེ, ཝ་ཛྫི་ར་ཊྛ་ཝཱ་སི་ནོ བྷ་ག་ཝ་ནྟ་ཉྩ ཨི་མེ ཙ ཏ་ཡོ ཀུ་ལ་པུ་ཏྟེ པ་སྶི་ཏུཾ ལ་བྷ་ནྟི, ཝ་ནྡི་ཏུཾ ལ་བྷ་ནྟི, དེ་ཡྻ་དྷ་མྨཾ དཱ་ཏུཾ ལ་བྷ་ནྟི, དྷ་མྨཾ སོ་ཏུཾ ལ་བྷ་ནྟི, ཏེ་སཾ ལཱ་བྷཱ, བྷ་ནྟེ, ཝ་ཛྫཱི་ན་ནྟི ཨ་ཏྠོ. ས་དྡཾ སུ་ཏྭཱཏི སོ ཀི་ར ཨ་ཏྟ་ནོ ཡ་ཀྑཱ་ནུ་བྷཱ་ཝེ་ན མ་ཧ་ནྟཾ ས་དྡཾ ཀ་ཏྭཱ ས་ཀ་ལཾ ཝ་ཛྫི་ར་ཊྛཾ ཨ་ཛ྄ཛྷོ་ཏྠ་ར་ནྟོ ཏཾ ཝཱ་ཙཾ ནི་ཙྪཱ་རེ་སི. ཏེ་ན ཙ་སྶ ཏེ་སུ རུ་ཀྑ་པ་བྦ་ཏཱ་དཱི་སུ ཨ་དྷི་ཝ་ཏྠཱ བྷུ་མྨཱ དེ་ཝ་ཏཱ ས་དྡཾ ཨ་སྶོ་སུཾ. ཏཾ ས་ནྡྷཱ་ཡ ཝུ་ཏྟཾ – ‘‘ས་དྡཾ སུ་ཏྭཱ’’ཏི. ཨ་ནུ་སྶཱ་ཝེ་སུནྟི མ་ཧ་ནྟཾ ས་དྡཾ སུ་ཏྭཱ སཱ་ཝེ་སུཾ. ཨེ་ས ན་ཡོ ས་བྦ་ཏྠ. ཡཱ་ཝ བྲ་ཧྨ་ལོ་ཀཱཏི ཡཱ་ཝ ཨ་ཀ་ནི་ཊྛ་བྲ་ཧྨ་ལོ་ཀཱ. ཏ་ཉྩེ་པི ཀུ་ལནྟི, ‘‘ཨ་མྷཱ་ཀཾ ཀུ་ལ་ཏོ ནི་ཀྑ་མི་ཏྭཱ ཨི་མེ ཀུ་ལ་པུ་ཏྟཱ པ་བྦ་ཛི་ཏཱ ཨེ་ཝཾ སཱི་ལ་ཝ་ནྟོ གུ་ཎ་ཝ་ནྟོ ཨཱ་ཙཱ་ར་ས་མྤ་ནྣཱ ཀ་ལྱཱ་ཎ་དྷ་མྨཱ’’ཏི ཨེ་ཝཾ ཏ་ཉྩེ་པི ཀུ་ལཾ ཨེ་ཏེ ཏ་ཡོ ཀུ་ལ་པུ་ཏྟེ པ་ས་ནྣ་ཙི་ཏྟཾ ཨ་ནུ་སྶ་རེ་ཡྻཱ་ཏི ཨེ་ཝཾ ས་བྦ་ཏྠ ཨ་ཏྠོ ད་ཊྛ་བྦོ. ཨི་ཏི བྷ་ག་ཝཱ ཡ་ཐཱ་ནུ་ས་ནྡྷི་ནཱ་ཝ དེ་ས་ནཾ ནི་ཊྛ་པེ་སཱི་ཏི.
པ་པ་ཉྩ་སཱུ་ད་ནི་ཡཱ མ་ཛ྄ཛྷི་མ་ནི་ཀཱ་ཡ་ཊྛ་ཀ་ཐཱ་ཡ
ཙཱུ་ལ༹་གོ་སི་ངྒ་སུ་ཏྟ་ཝ་ཎྞ་ནཱ ནི་ཊྛི་ཏཱ.