༡. ཙི་ཏྟ་ལ་ཏཱ་ཝི་མཱ་ན་ཝ་ཎྞ་ནཱ

ཡ་ཐཱ ཝ་ནཾ ཙི་ཏྟ་ལ་ཏཾ པ་བྷཱ་ས་ཏཱིཏི ཙི་ཏྟ་ལ་ཏཱ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཏེ་ན ས་མ་ཡེ་ན སཱ་ཝ་ཏྠི་ཡཾ ཨ་ཉྙ་ཏ་རོ ཨུ་པཱ་ས་ཀོ ད་ལི་དྡོ ཨ་པྤ་བྷོ་གོ པ་རེ་སཾ ཀ་མྨཾ ཀ་ཏྭཱ ཛཱི་ཝ་ཏི. སོ ས་དྡྷོ པ་ས་ནྣོ ཛི་ཎྞེ ཝུ་ཌྜྷེ མཱ་ཏཱ་པི་ཏ་རོ པོ་སེ་ནྟོ ‘‘ཨི་ཏྠི་ཡོ ནཱ་མ པ་ཏི་ཀུ་ལེ ཋི་ཏཱ ཨི་སྶ་རི་ཡཾ ཀ་རོ་ནྟི, ས་སྶུ་ས་སུ་རཱ་ནཾ མ་ནཱ་པ་ཙཱ་རི་ནི་ཡོ དུ་ལླ་བྷཱ’’ཏི མཱ་ཏཱ་པི་ཏཱུ་ནཾ ཙི་ཏྟ་དུ་ཀྑཾ པ་རི་ཧ་ར་ནྟོ དཱ་ར་པ་རི་གྒ་ཧཾ ཨ་ཀ་ཏྭཱ ས་ཡ་མེ་ཝ ནེ ཨུ་པ་ཊྛ་ཧ་ཏི, སཱི་ལཱ་ནི ར་ཀྑ་ཏི, ཨུ་པོ་ས་ཐཾ ཨུ་པ་ཝ་ས་ཏི, ཡ་ཐཱ་ཝི་བྷ་ཝཾ དཱ་ནཱ་ནི དེ་ཏི. སོ ཨ་པ་ར་བྷཱ་གེ ཀཱ་ལཾ ཀ་ཏྭཱ ཏཱ་ཝ་ཏིཾ་སེ་སུ དྭཱ་ད་ས་ཡོ་ཛ་ནི་ཀེ ཝི་མཱ་ནེ ནི་བྦ་ཏྟི. ཏཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཧེ་ཊྛཱ ཝུ་ཏྟ་ན་ཡེ་ན ག་ནྟྭཱ ཀ་ཏ་ཀ་མྨཾ ཨི་མཱ་ཧི གཱ་ཐཱ་ཧི པ་ཊི་པུ་ཙྪི –

༡༡༡༤. ‘‘ཡ་ཐཱ ཝ་ནཾ ཙི་ཏྟ་ལ་ཏཾ པ་བྷཱ་ས་ཏི, ཨུ་ཡྻཱ་ན་སེ་ཊྛཾ ཏི་ད་སཱ་ན་མུ་ཏྟ་མཾ;

ཏ་ཐཱུ་པ་མཾ ཏུ་ཡ྄ཧ་མི་དཾ ཝི་མཱ་ནཾ, ཨོ་བྷཱ་ས་ཡཾ ཏི་ཊྛ་ཏི ཨ་ནྟ་ལི་ཀྑེ.

༡༡༡༥. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ…པེ…

ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.

༡༡༡༦. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ’’.

༡༡༡༧. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏོ, ད་ལི་དྡོ ཨ་ཏཱ་ཎོ ཀ་པ་ཎོ ཀ་མྨ་ཀ་རོ ཨ་ཧོ་སིཾ;

ཛི་ཎྞེ ཙ མཱ་ཏཱ་པི་ཏ་རོ ཨ་བྷཱ་རིཾ, པི་ཡཱ ཙ མེ སཱི་ལ་ཝ་ནྟོ ཨ་ཧེ་སུཾ;

ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟོ, ས་ཀྐ་ཙྩ དཱ་ནཾ ཝི་པུ་ལཾ ཨ་དཱ་སིཾ.

༡༡༡༨. ‘‘ཏེ་ན མེ་ཏཱ་དི་སོ ཝ་ཎྞོ…པེ…ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི. –

སོ་པི ཏ་སྶ བྱཱ་ཀཱ་སི. སེ་སཾ ཝུ་ཏྟ་ན་ཡ་མེ་ཝ.

ཙི་ཏྟ་ལ་ཏཱ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.