༦. བྷི་ཀྑཱ་དཱ་ཡ་ཀ་ཝི་མཱ་ན་ཝ་ཎྞ་ནཱ
ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནནྟི བྷི་ཀྑཱ་དཱ་ཡ་ཀ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ. ཏེ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཨ་དྡྷཱ་ན་མ་གྒ་པ་ཊི་པ་ནྣོ ཨ་ཉྙ་ཏ་རཾ གཱ་མཾ པི་ཎྜཱ་ཡ པ་ཝི་ཊྛོ ཨེ་ཀ་སྶ གྷ་ར་དྡྷཱ་རེ ཨ་ཊྛཱ་སི. ཏ་ཏྠ ཨ་ཉྙ་ཏ་རོ པུ་རི་སོ དྷོ་ཏ་ཧ་ཏྠ་པཱ་དོ ‘‘བྷུ་ཉྫི་སྶཱ་མཱི’’ཏི ནི་སི་ནྣོ བྷོ་ཛ་ནཾ ཨུ་པ་ནེ་ཏྭཱ པཱ་ཏི་ཡཱ པ་ཀྑི་ཏྟེ ཏཾ བྷི་ཀྑུཾ དི་སྭཱ པཱ་ཏི་ཡཱ བྷ་ཏྟཾ ཏ་སྶ བྷི་ཀྑུ་ནོ པ་ཏྟེ ཨཱ་ཀི་ར་ནྟོ ཏེ་ན ‘‘ཨེ་ཀ་དེ་ས་མེ་ཝ དེ་ཧཱི’’ཏི ཝུ་ཏྟོ་པི ས་བྦ་མེ་ཝ ཨཱ་ཀི་རི. སོ བྷི་ཀྑུ ཨ་ནུ་མོ་ད་ནཾ ཝ་ཏྭཱ པ་ཀྐཱ་མི. སོ པུ་རི་སོ ‘‘ཚཱ་ཏ་ཛ྄ཛྷ་ཏྟ་སྶ བྷི་ཀྑུ་ནོ མ་ཡཱ ཨ་བྷུ་ཉྫི་ཏྭཱ བྷ་ཏྟཾ དི་ནྣ’’ནྟི ཨ་ནུ་སྶ་ར་ནྟོ ཨུ་ལཱ༹་རཾ པཱི་ཏི་སོ་མ་ན་སྶཾ པ་ཊི་ལ་བྷི. སོ ཨ་པ་ར་བྷཱ་གེ ཀཱ་ལཾ ཀ་ཏྭཱ ཏཱ་ཝ་ཏིཾ་སེ་སུ དྭཱ་ད་ས་ཡོ་ཛ་ནི་ཀེ ཀ་ན་ཀ་ཝི་མཱ་ནེ ནི་བྦ་ཏྟི. ཏཾ ཨཱ་ཡ་སྨཱ མ་ཧཱ་མོ་གྒ་ལླཱ་ན་ཏྠེ་རོ དེ་ཝ་ཙཱ་རི་ཀཾ ཙ་ར་ནྟོ མ་ཧ་ཏི་ཡཱ དེ་ཝི་དྡྷི་ཡཱ ཝི་རོ་ཙ་མཱ་ནཾ དི་སྭཱ ཨི་མཱ་ཧི གཱ་ཐཱ་ཧི པ་ཊི་པུ་ཙྪི –
༡༠༨༡. ‘‘ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནཾ, ས་མ་ནྟ་ཏོ དྭཱ་ད་ས ཡོ་ཛ་ནཱ་ནི;
ཀཱུ་ཊཱ་གཱ་རཱ ས་ཏྟ་ས་ཏཱ ཨུ་ལཱ༹་རཱ, ཝེ་ལུ༹་རི་ཡ་ཐ་མྦྷཱ རུ་ཙ་ཀ་ཏྠ་ཏཱ སུ་བྷཱ.
༡༠༨༢. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ…པེ…
ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
སོ་པི ཏ་སྶ ཨི་མཱ་ཧི གཱ་ཐཱ་ཧི བྱཱ་ཀཱ་སི –
༡༠༨༣. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ’’.
༡༠༨༤. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏོ, དི་སྭཱ་ན བྷི་ཀྑུཾ ཏ་སི་ཏཾ ཀི་ལ་ནྟཾ;
ཨེ་ཀཱ་ཧཾ བྷི་ཀྑཾ པ་ཊི་པཱ་ད་ཡི་སྶཾ, ས་མ་ངྒི བྷ་ཏྟེ་ན ཏ་དཱ ཨ་ཀཱ་སིཾ.
༡༠༨༥. ‘‘ཏེ་ན མེ་ཏཱ་དི་སོ ཝ་ཎྞོ…པེ… ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.
༡༠༨༤. ཏ་ཏྠ ཨེ་ཀཱ་ཧཾ བྷི་ཀྑནྟི ཨེ་ཀཾ ཨ་ཧཾ བྷི་ཀྑཱ་མ་ཏྟཾ, ཨེ་ཀཾ བྷ་ཏྟ་ཝ་ཌྜྷི་ཏ་ཀ་ནྟི ཨ་ཏྠོ. པ་ཊི་པཱ་ད་ཡི་སྶནྟི པ་ཊི་པཱ་དེ་སིཾ ཨ་དཱ་སིཾ. ས་མ་ངྒི བྷ་ཏྟེ་ནཱཏི བྷ་ཏྟེ་ན ས་མ་ངྒཱི་བྷཱུ་ཏཾ, ལ་དྡྷ་བྷི་ཀྑ་ནྟི ཨ་ཏྠོ. ཨེ་ཝཾ མ་ཧཱ་ཐེ་རོ ཏེ་ན དེ་ཝ་པུ་ཏྟེ་ན ཨ་ཏྟ་ནོ སུ་ཙ་རི་ཏ་ཀ་མྨེ པ་ཀཱ་སི་ཏེ ས་པ་རི་ཝཱ་ར་སྶ ཏ་སྶ དྷ་མྨཾ དེ་སེ་ཏྭཱ མ་ནུ་སྶ་ལོ་ཀ་མཱ་ག་ཏོ, ཏཾ པ་ཝ་ཏྟིཾ ས་མྨཱ་ས་མྦུ་དྡྷ་སྶ ཀ་ཐེ་སི. ས་ཏྠཱ ཏཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་མ་ཧཱ་ཛ་ན་སྶ དྷ་མྨཾ དེ་སེ་སི. སཱ དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.
བྷི་ཀྑཱ་དཱ་ཡ་ཀ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.