༤. པ་ཋ་མ་ཨུ་པ་སྶ་ཡ་དཱ་ཡ་ཀ་ཝི་མཱ་ན་ཝ་ཎྞ་ནཱ

ཙ་ནྡོ ཡ་ཐཱ ཝི་ག་ཏ་ཝ་ལཱ་ཧ་ཀེ ན་བྷེཏི ཨུ་པ་སྶ་ཡ་དཱ་ཡ་ཀ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ. ཏེ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ གཱ་མ་ཀཱ་ཝཱ་སེ ཝ་སྶཾ ཝ་སི་ཏྭཱ ཝུ་ཏྠ་ཝ་སྶོ པ་ཝཱ་རེ་ཏྭཱ བྷ་ག་ཝ་ནྟཾ ཝ་ནྡི་ཏུཾ རཱ་ཛ་ག་ཧཾ ག་ཙྪ་ནྟོ ཨ་ནྟ་རཱ་མ་གྒེ སཱ་ཡཾ ཨ་ཉྙ་ཏ་རཾ གཱ་མཾ པ་ཝི་སི་ཏྭཱ ཝ་ས་ན་ཊྛཱ་ནཾ པ་རི་ཡེ་ས་ནྟོ ཨ་ཉྙ་ཏ་རཾ ཨུ་པཱ་ས་ཀཾ དི་སྭཱ པུ་ཙྪི – ‘‘ཨུ་པཱ་ས་ཀ, ཨི་མ་སྨིཾ གཱ་མེ ཨ་ཏྠི ཀི་ཉྩི པ་བྦ་ཛི་ཏཱ་ནཾ ཝ་ས་ན་ཡོ་གྒ་ཊྛཱ་ན’’ནྟི. ཨུ་པཱ་ས་ཀོ པ་ས་ནྣ་ཙི་ཏྟོ གེ་ཧཾ ག་ནྟྭཱ བྷ་རི་ཡཱ་ཡ ས་དྡྷིཾ མ་ནྟེ་ཏྭཱ ཐེ་ར་སྶ ཝ་ས་ན་ཡོ་གྒཾ ཋཱ་ནཾ པ་རི་ཙྪི་ནྡི་ཏྭཱ ཏ་ཏྠ ཨཱ་ས་ནཾ པ་ཉྙཱ་པེ་ཏྭཱ པཱ་དོ་ད་ཀཾ པཱ་ད་པཱི་ཋཾ ཨུ་པ་ཊྛ་པེ་ཏྭཱ ཐེ་རཾ པ་ཝེ་སེ་ཏྭཱ ཏ་སྨིཾ པཱ་དེ དྷོ་ཝ་ནྟེ པ་དཱི་པཾ ཨུ་ཛྫཱ་ལེ་ཏྭཱ མ་ཉྩེ པ་ཙྩ་ཏྠ་ར་ཎཱ་ནི པ་ཉྙཱ་པེ་ཏྭཱ ཨ་དཱ་སི. སྭཱ་ཏ་ནཱ་ཡ ཙ ནི་མ་ནྟེ་ཏྭཱ ཐེ་ར་སྶ དུ་ཏི་ཡ་དི་ཝ་སེ བྷོ་ཛེ་ཏྭཱ པཱ་ན་ཀ་ཏྠཱ་ཡ གུ་ལ༹་པི་ཎྜ་ཉྩ ད་ཏྭཱ ཐེ་རཾ ག་ཙྪ་ནྟཾ ཨ་ནུ་ག་ནྟྭཱ ནི་ཝ་ཏྟི. སོ ཨ་པ་རེ་ན ས་མ་ཡེ་ན ས་ཧ བྷ་རི་ཡཱ་ཡ ཀཱ་ལཾ ཀ་ཏྭཱ ཏཱ་ཝ་ཏིཾ་ས་བྷ་ཝ་ནེ དྭཱ་ད་ས་ཡོ་ཛ་ནི་ཀེ ཀ་ན་ཀ་ཝི་མཱ་ནེ ནི་བྦ་ཏྟི. ཏཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ དྭཱི་ཧི གཱ་ཐཱ་ཧི པ་ཊི་པུ་ཙྪི –

༡༠༦༩. ‘‘ཙ་ནྡོ ཡ་ཐཱ ཝི་ག་ཏ་ཝ་ལཱ་ཧ་ཀེ ན་བྷེ, ཨོ་བྷཱ་ས་ཡཾ ག་ཙྪ་ཏི ཨ་ནྟ་ལི་ཀྑེ;

ཏ་ཐཱུ་པ་མཾ ཏུ་ཡ྄ཧ་མི་དཾ ཝི་མཱ་ནཾ, ཨོ་བྷཱ་ས་ཡཾ ཏི་ཊྛ་ཏི ཨ་ནྟ་ལི་ཀྑེ.

༡༠༧༠. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ, མ་ནུ་སྶ་བྷཱུ་ཏོ ཀི་མ་ཀཱ་སི པུ་ཉྙཾ;

ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.

སོ དེ་ཝ་པུ་ཏྟོ ཨི་མཱ་ཧི གཱ་ཐཱ་ཧི བྱཱ་ཀཱ་སི –

༡༠༧༡. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ’’.

༡༠༧༢. ‘‘ཨ་ཧ་ཉྩ བྷ་རི་ཡཱ ཙ མ་ནུ་སྶ་ལོ་ཀེ, ཨུ་པ་སྶ་ཡཾ ཨ་ར་ཧ་ཏོ ཨ་ད་མྷ;

ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟཱ, ས་ཀྐ་ཙྩ དཱ་ནཾ ཝི་པུ་ལཾ ཨ་ད་མྷ.

༡༠༧༣. ‘‘ཏེ་ན མེ་ཏཱ་དི་སོ ཝ་ཎྞོ…པེ… ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.

ཏ་ཏྠ གཱ་ཐཱ་སུ ཡཾ ཝ་ཏྟ་བྦཾ, ཏཾ ཧེ་ཊྛཱ ཝུ་ཏྟ་ན་ཡ་མེ་ཝ;

པ་ཋ་མ་ཨུ་པ་སྶ་ཡ་དཱ་ཡ་ཀ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.