༡. མ་ཧཱ་མོ་གྒ་ལླཱ་ན་ཏྠེ་ར་གཱ་ཐཱ་ཝ་ཎྞ་ནཱ
ས་ཊྛི་ནི་པཱ་ཏེ ཨཱ་ར་ཉྙི་ཀཱཏི་ཨཱ་དི་ཀཱ ཨཱ་ཡ་སྨ་ཏོ མ་ཧཱ་མོ་གྒ་ལླཱ་ན་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཏ་སྶ ཝ་ཏྠུ དྷ་མྨ་སེ་ནཱ་པ་ཏི་ཝ་ཏྠུ་མྷི ཝུ་ཏྟ་མེ་ཝ. ཐེ་རོ ཧི པ་བྦ་ཛི་ཏ་དི་ཝ་ས་ཏོ ས་ཏྟ་མེ དི་ཝ་སེ མ་ག་དྷ་ར་ཊྛེ ཀ་ལླ་ཝཱ་ལ་གཱ་མ་ཀཾ ཨུ་པ་ནི་སྶཱ་ཡ ས་མ་ཎ་དྷ་མྨཾ ཀ་རོ་ནྟོ ཐི་ན་མི་དྡྷེ ཨོ་ཀྐ་ནྟེ ས་ཏྠཱ་རཱ – ‘‘མོ་གྒ་ལླཱ་ན, མོ་གྒ་ལླཱ་ན, མཱ, བྲཱ་ཧྨ་ཎ, ཨ་རི་ཡཾ ཏུ་ཎྷཱི་བྷཱ་ཝཾ པ་མཱ་དོ’’ཏི་ཨཱ་དི་ནཱ (སཾ. ནི. ༢.༢༣༥) སཾ་ཝེ་ཛི་ཏོ ཐི་ན་མི་དྡྷཾ ཝི་ནོ་དེ་ཏྭཱ བྷ་ག་ཝ་ཏཱ ཝུ་ཙྩ་མཱ་ནཾ དྷཱ་ཏུ་ཀ་མྨ་ཊྛཱ་ནཾ སུ་ཎ་ནྟོ ཨེ་ཝ ཝི་པ་སྶ་ནཾ ཝ་ཌྜྷེ་ཏྭཱ པ་ཊི་པཱ་ཊི་ཡཱ ཨུ་པ་རི་མ་གྒ་ཏྟ་ཡཾ ཨུ་པ་ག་ནྟྭཱ ཨ་གྒ་ཕ་ལ་ཀྑ་ཎེ སཱ་ཝ་ཀ་པཱ་ར་མཱི་ཉཱ་ཎ་སྶ མ་ཏྠ་ཀཾ པཱ་པུ་ཎི. ཏེ་ན ཝུ་ཏྟཾ ཨ་པ་དཱ་ནེ (ཨ་པ. ཐེ་ར ༡.༡.༣༧༥-༣༩༧) –
‘‘ཨ་ནོ་མ་ད་སྶཱི བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
ཝི་ཧཱ་སི ཧི་མ་ཝ་ནྟ་མྷི, དེ་ཝ་ས་ངྒྷ་པུ་ར་ཀྑ་ཏོ.
‘‘ཝ་རུ་ཎོ ནཱ་མ ནཱ་མེ་ན, ནཱ་ག་རཱ་ཛཱ ཨ་ཧཾ ཏ་དཱ;
ཀཱ་མ་རཱུ་པཱི ཝི་ཀུ་བྦཱ་མི, མ་ཧོ་ད་དྷི་ནི་ཝཱ་ས་ཧཾ.
‘‘ས་ངྒ་ཎི་ཡཾ ག་ཎཾ ཧི་ཏྭཱ, ཏཱུ་རི་ཡཾ པ་ཊྛ་པེ་ས་ཧཾ;
ས་མྦུ་དྡྷཾ པ་རི་ཝཱ་རེ་ཏྭཱ, ཝཱ་དེ་སུཾ ཨ་ཙྪ་རཱ ཏ་དཱ.
‘‘ཝ་ཛྫ་མཱ་ནེ་སུ ཏཱུ་རེ་སུ, དེ་ཝཱ ཏཱུ་རཱ་ནི ཝ་ཛྫ་ཡུཾ;
ཨུ་བྷི་ནྣཾ ས་དྡཾ སུ་ཏྭཱ་ན, བུ་དྡྷོ་པི ས་མྤ་བུ་ཛ྄ཛྷ་ཐ.
‘‘ནི་མ་ནྟེ་ཏྭཱ་ན ས་མྦུ་དྡྷཾ, ས་ཀཾ བྷ་ཝ་ནུ་པཱ་ག་མིཾ;
ཨཱ་ས་ནཾ པ་ཉྙ་པེ་ཏྭཱ་ན, ཀཱ་ལ་མཱ་རོ་ཙ་ཡིཾ ཨ་ཧཾ.
‘‘ཁཱི་ཎཱ་ས་ཝ་ས་ཧ་སྶེ་ཧི, པ་རི་ཝུ་ཏོ ལོ་ཀ་ནཱ་ཡ་ཀོ;
ཨོ་བྷཱ་སེ་ནྟོ དི་སཱ ས་བྦཱ, བྷ་ཝ་ནཾ མེ ཨུ་པཱ་ག་མི.
‘‘ཨུ་པ་ཝི་ཊྛཾ མ་ཧཱ་ཝཱི་རཾ, དེ་ཝ་དེ་ཝཾ ན་རཱ་ས་བྷཾ;
ས་བྷི་ཀྑུ་ས་ངྒྷཾ ཏ་པྤེ་སིཾ, ཨ་ནྣ་པཱ་ནེ་ན་ཧཾ ཏ་དཱ.
‘‘ཨ་ནུ་མོ་དི མ་ཧཱ་ཝཱི་རོ, ས་ཡ་མྦྷཱུ ཨ་གྒ་པུ་གྒ་ལོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
‘‘ཡོ སོ ས་ངྒྷཾ ཨ་པཱུ་ཛེ་སི, བུ་དྡྷ་ཉྩ ལོ་ཀ་ནཱ་ཡ་ཀཾ;
ཏེ་ན ཙི་ཏྟ་པྤ་སཱ་དེ་ན, དེ་ཝ་ལོ་ཀཾ ག་མི་སྶ་ཏི.
‘‘ས་ཏྟ་ས་ཏྟ་ཏི་ཀྑ་ཏྟུ་ཉྩ, དེ་ཝ་ར་ཛྫཾ ཀ་རི་སྶ་ཏི;
པ་ཐ་བྱཱ ར་ཛྫཾ ཨ་ཊྛ་ས་ཏཾ, ཝ་སུ་དྷཾ ཨཱ་ཝ་སི་སྶ་ཏི.
‘‘པ་ཉྩ་པ་ཉྙཱ་ས་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི;
བྷོ་གཱ ཨ་ས་ངྑི་ཡཱ ཏ་སྶ, ཨུ་པྤ་ཛྫི་སྶ་ནྟི ཏཱ་ཝ་དེ.
‘‘ཨ་པ་རི་མེ་ཡྻེ ཨི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
‘‘ནི་ར་ཡཱ སོ ཙ་ཝི་ཏྭཱ་ན, མ་ནུ་སྶ་ཏྟཾ ག་མི་སྶ་ཏི;
ཀོ་ལི་ཏོ ནཱ་མ ནཱ་མེ་ན, བྲ་ཧྨ་བ་ནྡྷུ བྷ་ཝི་སྶ་ཏི.
‘‘སོ པ་ཙྪཱ པ་བྦ་ཛི་ཏྭཱ་ན, ཀུ་ས་ལ་མཱུ་ལེ་ན ཙོ་དི་ཏོ;
གོ་ཏ་མ་སྶ བྷ་ག་ཝ་ཏོ, དུ་ཏི་ཡོ ཧེ་སྶ་ཏི སཱ་ཝ་ཀོ.
‘‘ཨཱ་ར་དྡྷ་ཝཱི་རི་ཡོ པ་ཧི་ཏ་ཏྟོ, ཨི་དྡྷི་ཡཱ པཱ་ར་མིཾ ག་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
‘‘པཱ་པ་མི་ཏྟོ་པ་ནི་སྶཱ་ཡ, ཀཱ་མ་རཱ་ག་ཝ་སཾ ག་ཏོ;
མཱ་ཏ་རཾ པི་ཏ་ར་ཉྩཱ་པི, གྷཱ་ཏ་ཡིཾ དུ་ཊྛ་མཱ་ན་སོ.
‘‘ཡཾ ཡཾ ཡོ་ནུ་པ་པ་ཛྫཱ་མི, ནི་ར་ཡཾ ཨ་ཐ མཱ་ནུ་སཾ;
པཱ་པ་ཀ་མྨ་ས་མ་ངྒི་ཏཱ, བྷི་ནྣ་སཱི་སོ མ་རཱ་མ་ཧཾ.
‘‘ཨི་དཾ པ་ཙྪི་མ་ཀཾ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཨི་དྷཱ་པི ཨེ་དི་སོ མ་ཡ྄ཧཾ, མ་ར་ཎ་ཀཱ་ལེ བྷ་ཝི་སྶ་ཏི.
‘‘པ་ཝི་ཝེ་ཀ་མ་ནུ་ཡུ་ཏྟོ, ས་མཱ་དྷི་བྷཱ་ཝ་ནཱ་ར་ཏོ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
‘‘དྷ་ར་ཎི་མྤི སུ་ག་མྦྷཱི་རཾ, བ་ཧ་ལཾ དུ་པྤ་དྷཾ་སི་ཡཾ;
ཝཱ་མ་ངྒུ་ཊྛེ་ན ཁོ་བྷེ་ཡྻཾ, ཨི་དྡྷི་ཡཱ པཱ་ར་མིཾ ག་ཏོ.
‘‘ཨ་སྨི་མཱ་ནཾ ན པ་སྶཱ་མི, མཱ་ནོ མ་ཡ྄ཧཾ ན ཝི་ཛྫ་ཏི;
སཱ་མ་ཎེ་རེ ཨུ་པཱ་དཱ་ཡ, ག་རུ་ཙི་ཏྟཾ ཀ་རོ་མ་ཧཾ.
‘‘ཨ་པ་རི་མེ་ཡྻེ ཨི་ཏོ ཀ་པྤེ, ཡཾ ཀ་མྨ་མ་བྷི་ནཱི་ཧ་རིཾ;
ཏཱ་ཧཾ བྷཱུ་མི་མ་ནུ་པྤ་ཏྟོ, པ་ཏྟོ་མྷི ཨཱ་ས་ཝ་ཀྑ་ཡཾ.
‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ན’’ནྟི.
ཨ་ཐ ནཾ ས་ཏྠཱ ཨ་པ་ར་བྷཱ་གེ ཛེ་ཏ་ཝ་ན་མ་ཧཱ་ཝི་ཧཱ་རེ ཨ་རི་ཡ་ག་ཎ་མ་ཛ྄ཛྷེ ནི་སི་ནྣོ ཏེ་ན ཏེ་ན གུ་ཎེ་ན ཨ་ཏྟ་ནོ སཱ་ཝ་ཀེ ཨེ་ཏ་ད་གྒེ ཋ་པེ་ནྟོ ‘‘ཨེ་ཏ་ད་གྒཾ, བྷི་ཀྑ་ཝེ, མ་མ སཱ་ཝ་ཀཱ་ནཾ བྷི་ཀྑཱུ་ནཾ ཨི་དྡྷི་མ་ནྟཱ་ནཾ ཡ་དི་དཾ མ་ཧཱ་མོ་གྒ་ལླཱ་ནོ’’ཏི (ཨ. ནི. ༡.༡༨༨, ༡༩༠) ཨི་དྡྷི་མ་ནྟ་ཏཱ་ཡ ཨེ་ཏ་ད་གྒེ ཋ་པེ་སི. ཏེ་ན ཨེ་ཝཾ ས་ཏྠཱ་རཱ ཨེ་ཏ་ད་གྒེ ཋ་པི་ཏེ་ན སཱ་ཝ་ཀ་པཱ་ར་མི་ཡཱ མ་ཏྠ་ཀཾ པ་ཏྟེ་ན མ་ཧཱ་ཐེ་རེ་ན ཏཾ ཏཾ ནི་མི་ཏྟཾ ཨཱ་ག་མྨ ཏ་ཏྠ ཏ་ཏྠ བྷཱ་སི་ཏཱ གཱ་ཐཱ, ཏཱ ས་ངྒཱི་ཏི་ཀཱ་ལེ དྷ་མྨ་ས་ངྒཱ་ཧ་ཀེ་ཧི –
༡༡༤༩. ‘‘ཨཱ་ར་ཉྙི་ཀཱ པི་ཎྜ་པཱ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དཱ་ལེ་མུ མ་ཙྩུ་ནོ སེ་ནཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཱ.
༡༡༥༠. ‘‘ཨཱ་ར་ཉྙི་ཀཱ པི་ཎྜ་པཱ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དྷུ་ནཱ་མ མ་ཙྩུ་ནོ སེ་ནཾ, ན་ལཱ༹་གཱ་རཾ་ཝ ཀུ་ཉྫ་རོ.
༡༡༥༡. ‘‘རུ་ཀྑ་མཱུ་ལི་ཀཱ སཱ་ཏ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དཱ་ལེ་མུ མ་ཙྩུ་ནོ སེ་ནཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཱ.
༡༡༥༢. ‘‘རུ་ཀྑ་མཱུ་ལི་ཀཱ སཱ་ཏ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དྷུ་ནཱ་མ མ་ཙྩུ་ནོ སེ་ནཾ, ན་ལཱ༹་གཱ་རཾ་ཝ ཀུ་ཉྫ་རོ.
༡༡༥༣. ‘‘ཨ་ཊྛི་ཀ་ངྐ་ལ་ཀུ་ཊི་ཀེ, མཾ་ས་ནྷཱ་རུ་པ་སི་བྦི་ཏེ;
དྷི་ར་ཏྠུ པུ་རེ དུ་གྒ་ནྡྷེ, པ་ར་ག་ཏྟེ མ་མཱ་ཡ་སེ.
༡༡༥༤. .
‘‘ཏ་ཝ ས་རཱི་རཾ ན་ཝ་སོ་ཏཾ, དུ་གྒ་ནྡྷ་ཀ་རཾ པ་རི་བ་ནྡྷཾ;
བྷི་ཀྑུ པ་རི་ཝ་ཛྫ་ཡ་ཏེ ཏཾ, མཱི་ལ༹ྷ་ཉྩ ཡ་ཐཱ སུ་ཙི་ཀཱ་མོ.
༡༡༥༦. ‘‘ཨེ་ཝ་ཉྩེ ཏཾ ཛ་ནོ ཛ་ཉྙཱ, ཡ་ཐཱ ཛཱ་ནཱ་མི ཏཾ ཨ་ཧཾ;
ཨཱ་ར་ཀཱ པ་རི་ཝ་ཛྫེ་ཡྻ, གཱུ་ཐ་ཊྛཱ་ནཾ་ཝ པཱ་ཝུ་སེ.
༡༡༥༧. ‘‘ཨེ་ཝ་མེ་ཏཾ མ་ཧཱ་ཝཱི་ར, ཡ་ཐཱ ས་མ་ཎ བྷཱ་ས་སི;
ཨེ་ཏྠ ཙེ་ཀེ ཝི་སཱི་ད་ནྟི, པ་ངྐ་མྷི་ཝ ཛ་ར་གྒ་ཝོ.
༡༡༥༨. ‘‘ཨཱ་ཀཱ་ས་མྷི ཧ་ལི་དྡི་ཡཱ, ཡོ མ་ཉྙེ་ཐ ར་ཛེ་ཏ་ཝེ;
ཨ་ཉྙེ་ན ཝཱ་པི ར་ངྒེ་ན, ཝི་གྷཱ་ཏུ་ད་ཡ་མེ་ཝ ཏཾ.
༡༡༥༩. ‘‘ཏ་དཱ་ཀཱ་ས་ས་མཾ ཙི་ཏྟཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཾ;
མཱ པཱ་པ་ཙི་ཏྟེ ཨཱ་སཱ་དི, ཨ་གྒི་ཁ་ནྡྷཾ་ཝ པ་ཀྑི་མཱ.
༡༡༦༠. ‘‘པ་སྶ ཙི་ཏྟ་ཀ་ཏཾ བི་མྦཾ, ཨ་རུ་ཀཱ་ཡཾ ས་མུ་སྶི་ཏཾ;
ཨཱ་ཏུ་རཾ བ་ཧུ་ས་ངྐ་པྤཾ, ཡ་སྶ ན་ཏྠི དྷུ་ཝཾ ཋི་ཏི.
༡༡༦༡. ‘‘པ་སྶ ཙི་ཏྟ་ཀ་ཏཾ རཱུ་པཾ, མ་ཎི་ནཱ ཀུ་ཎྜ་ལེ་ན ཙ;
ཨ་ཊྛིཾ ཏ་ཙེ་ན ཨོ་ན་དྡྷཾ, ས་ཧ ཝ་ཏྠེ་ཧི སོ་བྷ་ཏི.
༡༡༦༢. ‘‘ཨ་ལ་ཏྟ་ཀ་ཀ་ཏཱ པཱ་དཱ, མུ་ཁཾ ཙུ་ཎྞ་ཀ་མ་ཀྑི་ཏཾ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༣. ‘‘ཨ་ཊྛཱ་པ་ད་ཀ་ཏཱ ཀེ་སཱ, ནེ་ཏྟཱ ཨ་ཉྫ་ན་མ་ཀྑི་ཏཱ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༤. ‘‘ཨ་ཉྫ་ནཱི་ཝ ན་ཝཱ ཙི་ཏྟཱ, པཱུ་ཏི་ཀཱ་ཡོ ཨ་ལ་ངྐ་ཏོ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༥. ‘‘ཨོ་ད་ཧི མི་ག་ཝོ པཱ་སཾ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, ཀ་དྡ་ནྟེ མི་ག་བ་ནྡྷ་ཀེ.
༡༡༦༦. ‘‘ཚི་ནྣོ པཱ་སོ མི་ག་ཝ་སྶ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, སོ་ཙ་ནྟེ མི་ག་ལུ་དྡ་ཀེ.
༡༡༦༧. ‘‘ཏ་དཱ་སི ཡཾ བྷིཾ་ས་ན་ཀཾ, ཏ་དཱ་སི ལོ་མ་ཧཾ་ས་ནཾ;
ཨ་ནེ་ཀཱ་ཀཱ་ར་ས་མྤ་ནྣེ, སཱ་རི་པུ་ཏྟ་མྷི ནི་བྦུ་ཏེ.
༡༡༦༨. ‘‘ཨ་ནི་ཙྩཱ ཝ་ཏ ས་ངྑཱ་རཱ, ཨུ་པྤཱ་ད་ཝ་ཡ་དྷ་མྨི་ནོ;
ཨུ་པྤ་ཛྫི་ཏྭཱ ནི་རུ་ཛ྄ཛྷ་ནྟི, ཏེ་སཾ ཝཱུ་པ་ས་མོ སུ་ཁོ.
༡༡༦༩. ‘‘སུ་ཁུ་མཾ ཏེ པ་ཊི་ཝི་ཛ྄ཛྷ་ནྟི, ཝཱ་ལ་གྒཾ ཨུ་སུ་ནཱ ཡ་ཐཱ;
ཡེ པ་ཉྩ་ཀྑ་ནྡྷེ པ་སྶ་ནྟི, པ་ར་ཏོ ནོ ཙ ཨ་ཏྟ་ཏོ.
༡༡༧༠. ‘‘ཡེ ཙ པ་སྶ་ནྟི ས་ངྑཱ་རེ, པ་ར་ཏོ ནོ ཙ ཨ་ཏྟ་ཏོ;
པ་ཙྩ་བྱཱ་དྷིཾ་སུ ནི་པུ་ཎཾ, ཝཱ་ལ་གྒཾ ཨུ་སུ་ནཱ ཡ་ཐཱ.
༡༡༧༡. ‘‘ས་ཏྟི་ཡཱ ཝི་ཡ ཨོ་མ་ཊྛོ, ཌ་ཡ྄ཧ་མཱ་ནོ་ཝ མ་ཏྠ་ཀེ;
ཀཱ་མ་རཱ་ག་པྤ་ཧཱ་ནཱ་ཡ, ས་ཏོ བྷི་ཀྑུ པ་རི་བྦ་ཛེ.
༡༡༧༢. ‘‘ས་ཏྟི་ཡཱ ཝི་ཡ ཨོ་མ་ཊྛོ, ཌ་ཡ྄ཧ་མཱ་ནོ་ཝ མ་ཏྠ་ཀེ;
བྷ་ཝ་རཱ་ག་པྤ་ཧཱ་ནཱ་ཡ, ས་ཏོ བྷི་ཀྑུ པ་རི་བྦ་ཛེ.
༡༡༧༣. ‘‘ཙོ་དི་ཏོ བྷཱ་ཝི་ཏ་ཏྟེ་ན, ས་རཱི་ར་ནྟི་མ་དྷཱ་རི་ནཱ;
མི་གཱ་ར་མཱ་ཏུ་པཱ་སཱ་དཾ, པཱ་ད་ངྒུ་ཊྛེ་ན ཀ་མྤ་ཡིཾ.
༡༡༧༤. ‘‘ན་ཡི་དཾ སི་ཐི་ལ་མཱ་ར་བྦྷ, ན་ཡི་དཾ ཨ་པྤེ་ན ཐཱ་མ་སཱ;
ནི་བྦཱ་ན་མ་དྷི་ག་ནྟ་བྦཾ, ས་བྦ་ག་ནྠ་པ་མོ་ཙ་ནཾ.
༡༡༧༥. ‘‘ཨ་ཡ་ཉྩ ད་ཧ་རོ བྷི་ཀྑུ, ཨ་ཡ་མུ་ཏྟ་མ་པོ་རི་སོ;
དྷཱ་རེ་ཏི ཨ་ནྟི་མཾ དེ་ཧཾ, ཛེ་ཏྭཱ མཱ་རཾ ས་ཝཱ་ཧ་ནཾ.
༡༡༧༦. ‘‘ཝི་ཝ་ར་མ་ནུ་པ་བྷ་ནྟི ཝི་ཛྫུ་ཏཱ, ཝེ་བྷཱ་ར་སྶ ཙ པ་ཎྜ་ཝ་སྶ ཙ;
ན་ག་ཝི་ཝ་ར་ག་ཏོ ཛྷཱ་ཡ་ཏི, པུ་ཏྟོ ཨ་པྤ་ཊི་མ་སྶ ཏཱ་དི་ནོ.
༡༡༧༧. ‘‘ཨུ་པ་ས་ནྟོ ཨུ་པ་ར་ཏོ, པ་ནྟ་སེ་ནཱ་ས་ནོ མུ་ནི;
དཱ་ཡཱ་དོ བུ་དྡྷ་སེ་ཊྛ་སྶ, བྲ་ཧྨུ་ནཱ ཨ་བྷི་ཝ་ནྡི་ཏོ.
༡༡༧༨. ‘‘ཨུ་པ་ས་ནྟཾ ཨུ་པ་ར་ཏཾ, པ་ནྟ་སེ་ནཱ་ས་ནཾ མུ་ནིཾ;
དཱ་ཡཱ་དཾ བུ་དྡྷ་སེ་ཊྛ་སྶ, ཝ་ནྡ བྲཱ་ཧྨ་ཎ ཀ་སྶ་པཾ.
༡༡༧༩. ‘‘ཡོ ཙ ཛཱ་ཏི་ས་ཏཾ ག་ཙྪེ, ས་བྦཱ བྲཱ་ཧྨ་ཎ་ཛཱ་ཏི་ཡོ;
སོ་ཏྟི་ཡོ ཝེ་ད་ས་མྤ་ནྣོ, མ་ནུ་སྶེ་སུ པུ་ན་པྤུ་ནཾ.
༡༡༨༠. ‘‘ཨ་ཛ྄ཛྷཱ་ཡ་ཀོ་པི ཙེ ཨ་སྶ, ཏི་ཎྞཾ ཝེ་དཱ་ན པཱ་ར་གཱུ;
ཨེ་ཏ་སྶ ཝ་ནྡ་ནཱ་ཡེ་ཏཾ, ཀ་ལཾ ནཱ་གྒྷ་ཏི སོ་ལ༹་སིཾ.
༡༡༨༡. ‘‘ཡོ སོ ཨ་ཊྛ ཝི་མོ་ཀྑཱ་ནི, པུ་རེ་བྷ་ཏྟཾ ཨ་ཕ་སྶ་ཡི;
ཨ་ནུ་ལོ་མཾ པ་ཊི་ལོ་མཾ, ཏ་ཏོ པི་ཎྜཱ་ཡ ག་ཙྪ་ཏི.
༡༡༨༢. ‘‘ཏཱ་དི་སཾ བྷི་ཀྑུཾ མཱ་སཱ་དི, མཱ་ཏྟཱ་ནཾ ཁ་ཎི བྲཱ་ཧྨ་ཎ;
ཨ་བྷི་པྤ་སཱ་དེ་ཧི མ་ནཾ, ཨ་ར་ཧ་ནྟ་མྷི ཏཱ་དི་ནེ;
ཁི་པྤཾ པ་ཉྫ་ལི་ཀོ ཝ་ནྡ, མཱ ཏེ ཝི་ཛ་ཊི མ་ཏྠ་ཀཾ.
༡༡༨༣. ‘‘ནེ་སོ པ་སྶ་ཏི ས་དྡྷ་མྨཾ, སཾ་སཱ་རེ་ན པུ་ར་ཀྑ་ཏོ;
ཨ་དྷོ་ག་མཾ ཛི་མྷ་པ་ཐཾ, ཀུ་མྨ་གྒ་མ་ནུ་དྷཱ་ཝ་ཏི.
༡༡༨༤. ‘‘ཀི་མཱི་ཝ མཱི་ལ༹ྷ་ས་ལླི་ཏྟོ, ས་ངྑཱ་རེ ཨ་དྷི་མུ་ཙྪི་ཏོ;
པ་གཱ་ལ༹ྷོ ལཱ་བྷ་ས་ཀྐཱ་རེ, ཏུ་ཙྪོ ག་ཙྪ་ཏི པོ་ཊྛི་ལོ.
༡༡༨༥. ‘‘ཨི་མ་ཉྩ པ་སྶ ཨཱ་ཡ་ནྟཾ, སཱ་རི་པུ་ཏྟཾ སུ་ད་སྶ་ནཾ;
ཝི་མུ་ཏྟཾ ཨུ་བྷ་ཏོ་བྷཱ་གེ, ཨ་ཛ྄ཛྷ་ཏྟཾ སུ་ས་མཱ་ཧི་ཏཾ.
༡༡༨༦. ‘‘ཝི་ས་ལླཾ ཁཱི་ཎ་སཾ་ཡོ་གཾ, ཏེ་ཝི་ཛྫཾ མ་ཙྩུ་ཧཱ་ཡི་ནཾ;
ད་ཀྑི་ཎེ་ཡྻཾ མ་ནུ་སྶཱ་ནཾ, པུ་ཉྙ་ཀྑེ་ཏྟཾ ཨ་ནུ་ཏྟ་རཾ.
༡༡༨༧. ‘‘ཨེ་ཏེ ས་མྦ་ཧུ་ལཱ དེ་ཝཱ, ཨི་དྡྷི་མ་ནྟོ ཡ་ས་སྶི་ནོ.
ད་ས དེ་ཝ་ས་ཧ་སྶཱ་ནི, ས་བྦེ བྲ་ཧྨ་པུ་རོ་ཧི་ཏཱ;
མོ་གྒ་ལླཱ་ནཾ ན་མ་སྶ་ནྟཱ, ཏི་ཊྛ་ནྟི པ་ཉྫ་ལཱི་ཀ་ཏཱ.
༡༡༨༨. ‘‘ན་མོ ཏེ པུ་རི་སཱ་ཛ་ཉྙ, ན་མོ ཏེ པུ་རི་སུ་ཏྟ་མ;
ཡ་སྶ ཏེ ཨཱ་ས་ཝཱ ཁཱི་ཎཱ, ད་ཀྑི་ཎེ་ཡྻོ་སི མཱ་རི་ས.
༡༡༨༩. ‘‘པཱུ་ཛི་ཏོ ན་ར་དེ་ཝེ་ན, ཨུ་པྤ་ནྣོ མ་ར་ཎཱ་བྷི་བྷཱུ;
པུ་ཎྜ་རཱི་ཀཾ་ཝ ཏོ་ཡེ་ན, ས་ངྑཱ་རེ་ནུ་པ་ལི་མྤ་ཏི.
༡༡༩༠. ‘‘ཡ་སྶ མུ་ཧུ་ཏྟེ་ན ས་ཧ་སྶ་དྷཱ ལོ་ཀོ, སཾ་ཝི་དི་ཏོ ས་བྲ་ཧྨ་ཀ་པྤོ ཝ་སི;
ཨི་དྡྷི་གུ་ཎེ ཙུ་ཏུ་པ་པཱ་ཏེ ཀཱ་ལེ, པ་སྶ་ཏི དེ་ཝ་ཏཱ ས བྷི་ཀྑུ.
༡༡༩༡. ‘‘སཱ་རི་པུ་ཏྟོ་ཝ པ་ཉྙཱ་ཡ, སཱི་ལེ་ན ཨུ་པ་ས་མེ་ན ཙ;
ཡོ་པི པཱ་ར་ངྒ་ཏོ བྷི་ཀྑུ, ཨེ་ཏཱ་ཝ་པ་ར་མོ སི་ཡཱ.
༡༡༩༢. ‘‘ཀོ་ཊི་ས་ཏ་ས་ཧ་སྶ་སྶ, ཨ་ཏྟ་བྷཱ་ཝཾ ཁ་ཎེ་ན ནི་མྨི་ནེ;
ཨ་ཧཾ ཝི་ཀུ་བྦ་ནཱ་སུ ཀུ་ས་ལོ, ཝ་སཱི་བྷཱུ་ཏོ་མྷི ཨི་དྡྷི་ཡཱ.
༡༡༩༣. ‘‘ས་མཱ་དྷི་ཝི་ཛྫཱ་ཝ་སི་པཱ་ར་མཱི་ག་ཏོ, མོ་གྒ་ལླཱ་ན་གོ་ཏྟོ ཨ་སི་ཏ་སྶ སཱ་ས་ནེ;
དྷཱི་རོ ས་མུ་ཙྪི་ནྡི ས་མཱ་ཧི་ཏི་ནྡྲི་ཡོ, ནཱ་གོ ཡ་ཐཱ པཱུ་ཏི་ལ་ཏཾ་ཝ བ་ནྡྷ་ནཾ.
༡༡༩༤. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༡༡༩༥. ‘‘ཡ་སྶ ཙ་ཏྠཱ་ཡ པ་བྦ་ཛི་ཏོ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༡༡༩༦. ‘‘ཀཱི་དི་སོ ནི་ར་ཡོ ཨཱ་སི, ཡ་ཏྠ དུ་སྶཱི ཨ་པ་ཙྩ་ཐ;
ཝི་དྷུ་རཾ སཱ་ཝ་ཀ་མཱ་ས་ཛྫ, ཀ་ཀུ་ས་ནྡྷ་ཉྩ བྲཱ་ཧྨ་ཎཾ.
༡༡༩༧. ‘‘ས་ཏཾ ཨཱ་སི ཨ་ཡོ་ས་ངྐཱུ, ས་བྦེ པ་ཙྩ་ཏྟ་ཝེ་ད་ནཱ;
ཨཱི་དི་སོ ནི་ར་ཡོ ཨཱ་སི, ཡ་ཏྠ དུ་སྶཱི ཨ་པ་ཙྩ་ཐ;
ཝི་དྷུ་རཾ སཱ་ཝ་ཀ་མཱ་ས་ཛྫ, ཀ་ཀུ་ས་ནྡྷ་ཉྩ བྲཱ་ཧྨ་ཎཾ.
༡༡༩༨. ‘‘ཡོ ཨེ་ཏ་མ་བྷི་ཛཱ་ནཱ་ཏི, བྷི་ཀྑུ བུ་དྡྷ་སྶ སཱ་ཝ་ཀོ;
ཏཱ་དི་སཾ བྷི་ཀྑུ་མཱ་ས་ཛྫ, ཀ་ཎྷ དུ་ཀྑཾ ནི་ག་ཙྪ་སི.