༡. ཏཱ་ལ་པུ་ཊ་ཏྠེ་ར་གཱ་ཐཱ་ཝ་ཎྞ་ནཱ
པ་ཉྙཱ་ས་ནི་པཱ་ཏེ ཀ་དཱ ནུ་ཧནྟི་ཨཱ་དི་ཀཱ ཨཱ་ཡ་སྨ་ཏོ ཏཱ་ལ་པུ་ཊ་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཾ ཀུ་ས་ལཾ ཨུ་པ་ཙི་ནི་ཏྭཱ ཨི་མ་སྨིཾ བུ་དྡྷུ་པྤཱ་དེ རཱ་ཛ་ག་ཧེ ཨ་ཉྙ་ཏ་ར་སྨིཾ ན་ཊ་ཀུ་ལེ ནི་བྦ་ཏྟི་ཏྭཱ ཝི་ཉྙུ་ཏཾ པ་ཏྟོ ཀུ་ལཱ་ནུ་རཱུ་པེ་སུ ན་ཙྩ་ཊྛཱ་ནེ་སུ ནི་པྥ་ཏྟིཾ ག་ནྟྭཱ ས་ཀ་ལ་ཛ་མྦུ་དཱི་པེ པཱ་ཀ་ཊོ ན་ཊ་གཱ་མ་ཎི ཨ་ཧོ་སི. སོ པ་ཉྩ་ས་ཏ་མཱ་ཏུ་གཱ་མ་པ་རི་ཝཱ་རོ མ་ཧ་ཏཱ ན་ཊ་ཝི་བྷ་ཝེ་ན གཱ་མ་ནི་ག་མ་རཱ་ཛ་དྷཱ་ནཱི་སུ ས་མ་ཛྫཾ ད་སྶེ་ཏྭཱ, མ་ཧ་ནྟཾ པཱུ་ཛཱ་ས་ཀྐཱ་རཾ ལ་བྷི་ཏྭཱ, ཝི་ཙ་ར་ནྟོ རཱ་ཛ་ག་ཧཾ ཨཱ་ག་ནྟྭཱ, ན་ག་ར་ཝཱ་སཱི་ནཾ ས་མ་ཛྫཾ ད་སྶེ་ཏྭཱ, ལ་དྡྷ་ས་མྨཱ་ན་ས་ཀྐཱ་རོ ཉཱ་ཎ་སྶ པ་རི་པཱ་ཀཾ ག་ཏ་ཏྟཱ ས་ཏྠུ ས་ནྟི་ཀཾ ག་ནྟྭཱ, ཝ་ནྡི་ཏྭཱ ཨེ་ཀ་མ་ནྟཾ ནི་སི་ནྣོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏ་མེ་ཏཾ, བྷ་ནྟེ, པུ་བྦ་ཀཱ་ནཾ ཨཱ་ཙ་རི་ཡ་པཱ་ཙ་རི་ཡཱ་ནཾ ན་ཊཱ་ནཾ བྷཱ་ས་མཱ་ནཱ་ནཾ ‘ཡོ སོ ན་ཊོ ར་ངྒ་མ་ཛ྄ཛྷེ ས་མ་ཛྫ་མ་ཛ྄ཛྷེ ས་ཙྩཱ་ལི་ཀེ་ན ཛ་ནཾ ཧཱ་སེ་ཏི ར་མེ་ཏི, སོ ཀཱ་ཡ་སྶ བྷེ་དཱ པ་རཾ མ་ར་ཎཱ པ་ཧཱ་སཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫ་ཏཱི’ཏི, ཨི་དྷ བྷ་ག་ཝཱ ཀི་མཱ་ཧཱ’’ཏི. ཨ་ཐ ནཾ བྷ་ག་ཝཱ ཏི་ཀྑ་ཏྟུཾ པ་ཊི་ཀྑི་པི ‘‘མཱ མཾ ཨེ་ཏཾ པུ་ཙྪཱི’’ཏི. ཙ་ཏུ་ཏྠ་ཝཱ་རཾ པུ་ཊྛོ ཨཱ་ཧ – ‘‘གཱ་མ་ཎི, ཨི་མེ ས་ཏྟཱ པ་ཀ་ཏི་ཡཱ་པི རཱ་ག་བ་ནྡྷ་ན་བ་དྡྷཱ དོ་ས་བ་ནྡྷ་ན་བ་དྡྷཱ མོ་ཧ་བ་ནྡྷ་ན་བ་དྡྷཱ ཏེ་སཾ བྷི་ཡྻོ་པི ར་ཛ་ནཱི་ཡེ དོ་ས་ནཱི་ཡེ མོ་ཧ་ནཱི་ཡེ དྷ་མྨེ ཨུ་པ་སཾ་ཧ་ར་ནྟོ པ་མཱ་དེ་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ནི་ར་ཡེ ཨུ་པ་པ་ཛྫ་ཏི. ས་ཙེ པ་ན་སྶ ཨེ་ཝཾ་དི་ཊྛི ཧོ་ཏི ‘ཡོ སོ ན་ཊོ ར་ངྒ་མ་ཛ྄ཛྷེ ས་མ་ཛྫ་མ་ཛ྄ཛྷེ ས་ཙྩཱ་ལི་ཀེ་ན ཛ་ནཾ ཧཱ་སེ་ཏི ར་མེ་ཏི, སོ ཀཱ་ཡ་སྶ བྷེ་དཱ པ་རཾ མ་ར་ཎཱ པ་ཧཱ་སཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫ་ཏཱི’’’ཏི སཱ་སྶ ཧོ་ཏི མི་ཙྪཱ་དི་ཊྛི. མི་ཙྪཱ་དི་ཊྛི་སྶ ཙ དྭི་ནྣཾ ག་ཏཱི་ནཾ ཨ་ཉྙ་ཏ་རཱ ག་ཏི ཨི་ཙྪི་ཏ་བྦཱ, ནི་ར་ཡ་སྶ ཝཱ ཏི་ར་ཙྪཱ་ན་ཡོ་ནི་ཡཱ ཝཱ་ཏི. ཏཾ སུ་ཏྭཱ ཏཱ་ལ་པུ་ཊོ གཱ་མ་ཎི པ་རོ་དི. ན་ནུ གཱ་མ་ཎི པ་གེ་ཝ མ་ཡཱ པ་ཊི་ཀྑི་ཏྟོ ‘‘མཱ མཾ ཨེ་ཏཾ པུ་ཙྪཱི’’ཏི (སཾ. ནི. ༤.༣༥༤)? ‘‘ནཱ་ཧཾ, བྷ་ནྟེ, ཨེ་ཏཾ རོ་དཱ་མི, ཡཾ མཾ བྷ་ག་ཝཱ ན་ཊཱ་ནཾ ཨ་བྷི་ས་མྤ་རཱ་ཡཾ ཨེ་ཝ་མཱ་ཧཱ’’ཏི. ཨ་པི ཙཱ་ཧཾ, བྷ་ནྟེ, པུ་བྦ་ཀེ་ཧི ཨཱ་ཙ་རི་ཡ་པཱ་ཙ་རི་ཡེ་ཧི ན་ཊེ་ཧི ཝ་ཉྩི་ཏོ ‘‘ན་ཊོ མ་ཧཱ་ཛ་ན་སྶ ན་ཊ་ས་མ་ཛྫཾ ད་སྶེ་ཏྭཱ སུ་ག་ཏིཾ ཨུ་པ་པ་ཛྫ་ཏཱི’’ཏི. སོ ས་ཏྠུ ས་ནྟི་ཀེ དྷ་མྨཾ སུ་ཏྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏྭཱ ལ་དྡྷཱུ་པ་ས་མྤ་ནྣོ ཝི་པ་སྶ་ནཱ་ཡ ཀ་མྨཾ ཀ་རོ་ནྟོ ན་ཙི་ར་སྶེ་ཝ ཨ་ར་ཧ་ཏྟཾ པཱ་པུ་ཎི, ཨ་དྷི་ག་ཏཱ་ར་ཧ་ཏྟོ པ་ན ཨ་ར་ཧ་ཏྟ་པྤ་ཏྟི་ཏོ པུ་བྦེ ཡེ་ནཱ་ཀཱ་རེ་ན ཨ་ཏྟ་ནོ ཙི་ཏྟཾ ནི་གྒ་ཎྷ་ན་ཝ་སེ་ན ཡོ་ནི་སོ་མ་ན་སི་ཀཱ་རོ ཨུ་ད་པཱ་དི, ཏཾ ཨ་ནེ་ཀ་དྷཱ ཝི་བྷ་ཛི་ཏྭཱ ད་སྶེ་ཏུཾ –
༡༠༩༤. ‘‘ཀ་དཱ ནུ་ཧཾ པ་བྦ་ཏ་ཀ་ནྡ་རཱ་སུ, ཨེ་ཀཱ་ཀི་ཡོ ཨ་དྡུ་ཏི་ཡོ ཝི་ཧ་སྶཾ;
ཨ་ནི་ཙྩ་ཏོ ས་བྦ་བྷ་ཝཾ ཝི་པ་སྶཾ, ཏཾ མེ ཨི་དཾ ཏཾ ནུ ཀ་དཱ བྷ་ཝི་སྶ་ཏི.
༡༠༩༥. ‘‘ཀ་དཱ ནུ་ཧཾ བྷི་ནྣ་པ་ཊ་ནྡྷ་རོ མུ་ནི, ཀཱ་སཱ་ཝ་ཝ་ཏྠོ ཨ་མ་མོ ནི་རཱ་སོ;
རཱ་ག་ཉྩ དོ་ས་ཉྩ ཏ་ཐེ་ཝ མོ་ཧཾ, ཧ་ནྟྭཱ སུ་ཁཱི པ་ཝ་ན་ག་ཏོ ཝི་ཧ་སྶཾ.
༡༠༩༦. ‘‘ཀ་དཱ ཨ་ནི་ཙྩཾ ཝ་དྷ་རོ་ག་ནཱི་ལ༹ཾ, ཀཱ་ཡཾ ཨི་མཾ མ་ཙྩུ་ཛ་རཱ་ཡུ་པ་དྡུ་ཏཾ;
ཝི་པ་སྶ་མཱ་ནོ ཝཱི་ཏ་བྷ་ཡོ ཝི་ཧ་སྶཾ, ཨེ་ཀོ ཝ་ནེ ཏཾ ནུ ཀ་དཱ བྷ་ཝི་སྶ་ཏི.
༡༠༩༧. ‘‘ཀ་དཱ ནུ་ཧཾ བྷ་ཡ་ཛ་ན་ནིཾ དུ་ཁཱ་ཝ་ཧཾ, ཏ་ཎྷཱ་ལ་ཏཾ བ་ཧུ་ཝི་དྷཱ་ནུ་ཝ་ཏྟ་ནིཾ;
པ་ཉྙཱ་མ་ཡཾ ཏི་ཁི་ཎ་མ་སིཾ ག་ཧེ་ཏྭཱ, ཚེ་ཏྭཱ ཝ་སེ ཏ་མྤི ཀ་དཱ བྷ་ཝི་སྶ་ཏི.
༡༠༩༨. ‘‘ཀ་དཱ ནུ པ་ཉྙཱ་མ་ཡ་མུ་གྒ་ཏེ་ཛཾ, ས་ཏྠཾ ཨི་སཱི་ནཾ ས་ཧ་སཱ་དི་ཡི་ཏྭཱ;
མཱ་རཾ ས་སེ་ནཾ ས་ཧ་སཱ བྷ་ཉྫི་སྶཾ, སཱི་ཧཱ་ས་ནེ ཏཾ ནུ ཀ་དཱ བྷ་ཝི་སྶ་ཏི.
༡༠༩༩. ‘‘ཀ་དཱ ནུ་ཧཾ ས་བྦྷི ས་མཱ་ག་མེ་སུ, དི་ཊྛོ བྷ་ཝེ དྷ་མྨ་ག་རཱུ་ཧི ཏཱ་དི་བྷི;
ཡཱ་ཐཱ་ཝ་ད་སྶཱི་ཧི ཛི་ཏི་ནྡྲི་ཡེ་ཧི, པ་དྷཱ་ནི་ཡོ ཏཾ ནུ ཀ་དཱ བྷ་ཝི་སྶ་ཏི.
༡༡༠༠. ‘‘ཀ་དཱ ནུ མཾ ཏ་ནྡི ཁུ་དཱ པི་པཱ་སཱ, ཝཱ་ཏཱ་ཏ་པཱ ཀཱི་ཊ་ས་རཱི་ས་པཱ ཝཱ;
ན བཱ་དྷ་ཡི་སྶ་ནྟི ན ཏཾ གི་རི་བྦ་ཛེ, ཨ་ཏྠ་ཏྠི་ཡཾ ཏཾ ནུ ཀ་དཱ བྷ་ཝི་སྶ་ཏི.
༡༡༠༡. ‘‘ཀ་དཱ ནུ ཁོ ཡཾ ཝི་དི་ཏཾ མ་ཧེ་སི་ནཱ, ཙ་ཏྟཱ་རི ས་ཙྩཱ་ནི སུ་དུ་དྡ་སཱ་ནི;
ས་མཱ་ཧི་ཏ་ཏྟོ ས་ཏི་མཱ ཨ་ག་ཙྪཾ, པ་ཉྙཱ་ཡ ཏཾ ཏཾ ནུ ཀ་དཱ བྷ་ཝི་སྶ་ཏི.
༡༡༠༢. ‘‘ཀ་དཱ ནུ རཱུ་པེ ཨ་མི་ཏེ ཙ ས་དྡེ, ག་ནྡྷེ ར་སེ ཕུ་སི་ཏ་བྦེ ཙ དྷ་མྨེ;
ཨཱ་དི་ཏྟ་ཏོ་ཧཾ ས་མ་ཐེ་ཧི ཡུ་ཏྟོ, པ་ཉྙཱ་ཡ ད་ཙྪཾ ཏ་དི་དཾ ཀ་དཱ མེ.
༡༡༠༣. ‘‘ཀ་དཱ ནུ་ཧཾ དུ་བྦ་ཙ་ནེ་ན ཝུ་ཏྟོ, ཏ་ཏོ ནི་མི་ཏྟཾ ཝི་མ་ནོ ན ཧེ་སྶཾ;
ཨ་ཐོ པ་ས་ཏྠོ་པི ཏ་ཏོ ནི་མི་ཏྟཾ, ཏུ་ཊྛོ ན ཧེ་སྶཾ ཏ་དི་དཾ ཀ་དཱ མེ.
༡༡༠༤. ‘‘ཀ་དཱ ནུ ཀ་ཊྛེ ཙ ཏི་ཎེ ལ་ཏཱ ཙ, ཁ་ནྡྷེ ཨི་མེ་ཧཾ ཨ་མི་ཏེ ཙ དྷ་མྨེ;
ཨ་ཛ྄ཛྷ་ཏྟི་ཀཱ་ནེ་ཝ ཙ བཱ་ཧི་རཱ་ནི ཙ, ས་མཾ ཏུ་ལེ་ཡྻཾ ཏ་དི་དཾ ཀ་དཱ མེ.
༡༡༠༥. ‘‘ཀ་དཱ ནུ མཾ པཱ་ཝུ་ས་ཀཱ་ལ་མེ་གྷོ, ན་ཝེ་ན ཏོ་ཡེ་ན ས་ཙཱི་ཝ་རཾ ཝ་ནེ;
ཨི་སི་པྤ་ཡཱ་ཏ་མྷི པ་ཐེ ཝ་ཛ་ནྟཾ, ཨོ་ཝ་སྶ་ཏེ ཏཾ ནུ ཀ་དཱ བྷ་ཝི་སྶ་ཏི.
༡༡༠༦. ‘‘ཀ་དཱ མ་ཡཱུ་ར་སྶ སི་ཁ་ཎྜི་ནོ ཝ་ནེ, དི་ཛ་སྶ སུ་ཏྭཱ གི་རི་ག་བྦྷ་རེ རུ་ཏཾ;
པ་ཙྩུ་ཊྛ་ཧི་ཏྭཱ ཨ་མ་ཏ་སྶ པ་ཏྟི་ཡཱ, སཾ་ཙི་ནྟ་ཡེ ཏཾ ནུ ཀ་དཱ བྷ་ཝི་སྶ་ཏི.
༡༡༠༧. ‘‘ཀ་དཱ ནུ ག་ངྒཾ ཡ་མུ་ནཾ ས་ར་སྶ་ཏིཾ, པཱ་ཏཱ་ལ་ཁི་ཏྟཾ ཝ་ལ༹་ཝཱ་མུ་ཁ་ཉྩ;
ཨ་ས་ཛྫ་མཱ་ནོ པ་ཏ་རེ་ཡྻ་མི་དྡྷི་ཡཱ, ཝི་བྷིཾ་ས་ནཾ ཏཾ ནུ ཀ་དཱ བྷ་ཝི་སྶ་ཏི.
༡༡༠༨. ‘‘ཀ་དཱ ནུ ནཱ་གོ་ཝ ཨ་ས་ངྒ་ཙཱ་རཱི, པ་དཱ་ལ་ཡེ ཀཱ་མ་གུ་ཎེ་སུ ཚ་ནྡཾ;
ནི་བྦ་ཛྫ་ཡཾ ས་བྦ་སུ་བྷཾ ནི་མི་ཏྟཾ, ཛྷཱ་ནེ ཡུ་ཏོ ཏཾ ནུ ཀ་དཱ བྷ་ཝི་སྶ་ཏི.
༡༡༠༩. ‘‘ཀ་དཱ ཨི་ཎ་ཊྚོ་ཝ ད་ལི་དྡ་ཀོ ནི་དྷིཾ, ཨཱ་རཱ་དྷ་ཡི་ཏྭཱ དྷ་ནི་ཀེ་ཧི པཱི་ལི༹་ཏོ;
ཏུ་ཊྛོ བྷ་ཝི་སྶཾ ཨ་དྷི་ག་མྨ སཱ་ས་ནཾ, མ་ཧེ་སི་ནོ ཏཾ ནུ ཀ་དཱ བྷ་ཝི་སྶ་ཏི.
༡༡༡༠. ‘‘བ་ཧཱུ་ནི ཝ་སྶཱ་ནི ཏ་ཡཱ་མྷི ཡཱ་ཙི་ཏོ, ཨ་གཱ་ར་ཝཱ་སེ་ན ཨ་ལཾ ནུ ཏེ ཨི་དཾ;
ཏཾ དཱ་ནི མཾ པ་བྦ་ཛི་ཏཾ ས་མཱ་ནཾ, ཀིཾ་ཀཱ་ར་ཎཱ ཙི་ཏྟ ཏུ་ཝཾ ན ཡུ་ཉྫ་སི.
༡༡༡༡. ‘‘ན་ནུ ཨ་ཧཾ ཙི་ཏྟ ཏ་ཡཱ་མྷི ཡཱ་ཙི་ཏོ, གི་རི་བྦ་ཛེ ཙི་ཏྲ་ཚ་དཱ ཝི་ཧ་ངྒ་མཱ;
མ་ཧི་ནྡ་གྷོ་ས་ཏྠ་ནི་ཏཱ་བྷི་ག་ཛྫི་ནོ, ཏེ ཏཾ ར་མེ་སྶ་ནྟི ཝ་ན་མྷི ཛྷཱ་ཡི་ནཾ.
༡༡༡༢. ‘‘ཀུ་ལ་མྷི མི་ཏྟེ ཙ པི་ཡེ ཙ ཉཱ་ཏ་ཀེ, ཁི་ཌྜཱ་ར་ཏིཾ ཀཱ་མ་གུ་ཎ་ཉྩ ལོ་ཀེ;
ས་བྦཾ པ་ཧཱ་ཡ ཨི་མ་མ་ཛ྄ཛྷུ་པཱ་ག་ཏོ, ཨ་ཐོ་པི ཏྭཾ ཙི་ཏྟ ན མ་ཡ྄ཧ ཏུ་སྶ་སི.
༡༡༡༣. ‘‘མ་མེ་ཝ ཨེ་ཏཾ ན ཧི ཏྭཾ པ་རེ་སཾ, ས་ནྣཱ་ཧ་ཀཱ་ལེ པ་རི་དེ་ཝི་ཏེ་ན ཀིཾ;
ས་བྦཾ ཨི་དཾ ཙ་ལ་མི་ཏི པེ་ཀྑ་མཱ་ནོ, ཨ་བྷི་ནི་ཀྑ་མིཾ ཨ་མ་ཏ་པ་དཾ ཛི་གཱི་སཾ.
༡༡༡༤. ‘‘སུ་ཡུ་ཏྟ་ཝཱ་དཱི དྭི་པ་དཱ་ན་མུ་ཏྟ་མོ, མ་ཧཱ་བྷི་ས་ཀྐོ ན་ར་ད་མྨ་སཱ་ར་ཐི;
ཙི་ཏྟཾ ཙ་ལཾ མ་ཀྐ་ཊ་ས་ནྣི་བྷཾ ཨི་ཏི, ཨ་ཝཱི་ཏ་རཱ་གེ་ན སུ་དུ་ནྣི་ཝཱ་ར་ཡཾ.
༡༡༡༥. ‘‘ཀཱ་མཱ ཧི ཙི་ཏྲཱ མ་དྷུ་རཱ མ་ནོ་ར་མཱ, ཨ་ཝི་དྡ་སཱུ ཡ་ཏྠ སི་ཏཱ པུ་ཐུ་ཛྫ་ནཱ;
ཏེ དུ་ཀྑ་མི་ཙྪ་ནྟི པུ་ན་བྦྷ་ཝེ་སི་ནོ, ཙི་ཏྟེ་ན ནཱི་ཏཱ ནི་ར་ཡེ ནི་རཱ་ཀ་ཏཱ.
༡༡༡༦. ‘‘མ་ཡཱུ་ར་ཀོ་ཉྩཱ་བྷི་རུ་ཏ་མྷི ཀཱ་ན་ནེ, དཱི་པཱི་ཧི བྱ་གྒྷེ་ཧི པུ་ར་ཀྑ་ཏོ ཝ་སཾ;
ཀཱ་ཡེ ཨ་པེ་ཀྑཾ ཛ་ཧ མཱ ཝི་རཱ་དྷ་ཡ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༡༧. ‘‘བྷཱ་ཝེ་ཧི ཛྷཱ་ནཱ་ནི ཙ ཨི་ནྡྲི་ཡཱ་ནི ཙ, བ་ལཱ་ནི བོ་ཛ྄ཛྷ་ངྒ་ས་མཱ་དྷི་བྷཱ་ཝ་ནཱ;
ཏི་སྶོ ཙ ཝི་ཛྫཱ ཕུ་ས བུ་དྡྷ་སཱ་ས་ནེ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༡༨. ‘‘བྷཱ་ཝེ་ཧི མ་གྒཾ ཨ་མ་ཏ་སྶ པ་ཏྟི་ཡཱ, ནི་ཡྻཱ་ནི་ཀཾ ས་བྦ་དུ་ཁ་ཀྑ་ཡོ་ག་དྷཾ;
ཨ་ཊྛ་ངྒི་ཀཾ ས་བྦ་ཀི་ལེ་ས་སོ་དྷ་ནཾ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༡༩. ‘‘དུ་ཀྑ་ནྟི ཁ་ནྡྷེ པ་ཊི་པ་སྶ ཡོ་ནི་སོ, ཡ་ཏོ ཙ དུ་ཀྑཾ ས་མུ་དེ་ཏི ཏཾ ཛ་ཧ;
ཨི་དྷེ་ཝ དུ་ཀྑ་སྶ ཀ་རོ་ཧི ཨ་ནྟཾ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༢༠. ‘‘ཨ་ནི་ཙྩཾ དུ་ཀྑ་ནྟི ཝི་པ་སྶ ཡོ་ནི་སོ, སུ་ཉྙཾ ཨ་ན་ཏྟཱ་ཏི ཨ་གྷཾ ཝ་དྷ་ནྟི ཙ;
མ་ནོ་ཝི་ཙཱ་རེ ཨུ་པ་རུ་ནྡྷ ཙེ་ཏ་སོ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༢༡. ‘‘མུ་ཎྜོ ཝི་རཱུ་པོ ཨ་བྷི་སཱ་པ་མཱ་ག་ཏོ, ཀ་པཱ་ལ་ཧ་ཏྠོ་ཝ ཀུ་ལེ་སུ བྷི་ཀྑ་སུ;
ཡུ་ཉྫ་སྶུ ས་ཏྠུ་ཝ་ཙ་ནེ མ་ཧེ་སི་ནོ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༢༢. ‘‘སུ་སཾ་ཝུ་ཏ་ཏྟོ ཝི་སི་ཁ་ནྟ་རེ ཙ་རཾ, ཀུ་ལེ་སུ ཀཱ་མེ་སུ ཨ་ས་ངྒ་མཱ་ན་སོ;
ཙ་ནྡོ ཡ་ཐཱ དོ་སི་ན་པུ་ཎྞ་མཱ་སི་ཡཱ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༢༣. ‘‘ཨཱ་ར་ཉྙི་ཀོ ཧོ་ཧི ཙ པི་ཎྜ་པཱ་ཏི་ཀོ, སོ་སཱ་ནི་ཀོ ཧོ་ཧི ཙ པཾ་སུ་ཀཱུ་ལི་ཀོ;
ནེ་ས་ཛྫི་ཀོ ཧོ་ཧི ས་དཱ དྷུ་ཏེ ར་ཏོ, ཨི་ཏི་སྶུ མཾ ཙི་ཏྟ པུ་རེ ནི་ཡུ་ཉྫ་སི.
༡༡༢༤. ‘‘རོ་པེ་ཏྭ རུ་ཀྑཱ་ནི ཡ་ཐཱ ཕ་ལེ་སཱི, མཱུ་ལེ ཏ་རུཾ ཚེ་ཏྟུ ཏ་མེ་ཝ ཨི་ཙྪ་སི;
ཏ་ཐཱུ་པ་མཾ ཙི་ཏྟ་མི་དཾ ཀ་རོ་སི, ཡཾ མཾ ཨ་ནི་ཙྩ་མྷི ཙ་ལེ ནི་ཡུ་ཉྫ་སི.
༡༡༢༥. ‘‘ཨ་རཱུ་པ དཱུ་ར་ངྒ་མ ཨེ་ཀ་ཙཱ་རི, ན ཏེ ཀ་རི་སྶཾ ཝ་ཙ་ནཾ ཨི་དཱ་ནི་ཧཾ;
དུ་ཀྑཱ ཧི ཀཱ་མཱ ཀ་ཊུ་ཀཱ མ་ཧ་བྦྷ་ཡཱ, ནི་བྦཱ་ན་མེ་ཝཱ་བྷི་མ་ནོ ཙ་རི་སྶཾ.
༡༡༢༦. ‘‘ནཱ་ཧཾ ཨ་ལ་ཀྑྱཱ ཨ་ཧི་རི་ཀྐ་ཏཱ་ཡ ཝཱ,
ན ཙི་ཏྟ་ཧེ་ཏཱུ ན ཙ དཱུ་ར་ཀ་ནྟ་ནཱ;
ཨཱ་ཛཱི་ཝ་ཧེ་ཏཱུ ཙ ཨ་ཧཾ ན ནི་ཀྑ་མིཾ,
ཀ་ཏོ ཙ ཏེ ཙི་ཏྟ པ་ཊི་སྶ་ཝོ མ་ཡཱ.
༡༡༢༧. ‘‘ཨ་པྤི་ཙྪ་ཏཱ ས་པྤུ་རི་སེ་ཧི ཝ་ཎྞི་ཏཱ, མ་ཀྑ་པྤ་ཧཱ་ནཾ ཝཱུ་པ་ས་མོ དུ་ཁ་སྶ;
ཨི་ཏི་སྶུ མཾ ཙི་ཏྟ ཏ་དཱ ནི་ཡུ་ཉྫ་སི, ཨི་དཱ་ནི ཏྭཾ ག་ཙྪ་སི པུ་བྦ་ཙི་ཎྞཾ.
༡༡༢༨. ‘‘ཏ་ཎྷཱ ཨ་ཝི་ཛྫཱ ཙ པི་ཡཱ་པི་ཡ་ཉྩ, སུ་བྷཱ་ནི རཱུ་པཱ་ནི སུ་ཁཱ ཙ ཝེ་ད་ནཱ;
མ་ནཱ་པི་ཡཱ ཀཱ་མ་གུ་ཎཱ ཙ ཝ་ནྟཱ, ཝ་ནྟེ ཨ་ཧཾ ཨཱ་ཝ་མི་ཏུཾ ན ཨུ་སྶ་ཧེ.
༡༡༢༩. ‘‘ས་བྦ་ཏྠ ཏེ ཙི་ཏྟ ཝ་ཙོ ཀ་ཏཾ མ་ཡཱ, བ་ཧཱུ་སུ ཛཱ་ཏཱི་སུ ན་མེ་སི ཀོ་པི་ཏོ;
ཨ་ཛ྄ཛྷ་ཏྟ་ས་མྦྷ་ཝོ ཀ་ཏ་ཉྙུ་ཏཱ་ཡ ཏེ, དུ་ཀྑེ ཙི་རཾ སཾ་ས་རི་ཏཾ ཏ་ཡཱ ཀ་ཏེ.
༡༡༣༠. ‘‘ཏྭ་ཉྙེ་ཝ ནོ ཙི་ཏྟ ཀ་རོ་སི བྲཱ་ཧྨ་ཎོ, ཏྭཾ ཁ་ཏྟི་ཡོ རཱ་ཛ་ད་སཱི ཀ་རོ་སི;
ཝེ་སྶཱ ཙ སུ་དྡཱ ཙ བྷ་ཝཱ་མ ཨེ་ཀ་དཱ, དེ་ཝ་ཏྟ་ནཾ ཝཱ་པི ཏ་ཝེ་ཝ ཝཱ་ཧ་སཱ.
༡༡༣༡. ‘‘ཏ་ཝེ་ཝ ཧེ་ཏཱུ ཨ་སུ་རཱ བྷ་ཝཱ་མ་སེ, ཏྭཾ་མཱུ་ལ་ཀཾ ནེ་ར་ཡི་ཀཱ བྷ་ཝཱ་མ་སེ;
ཨ་ཐོ ཏི་ར་ཙྪཱ་ན་ག་ཏཱ་པི ཨེ་ཀ་དཱ, པེ་ཏ་ཏྟ་ནཾ ཝཱ་པི ཏ་ཝེ་ཝ ཝཱ་ཧ་སཱ.
༡༡༣༢. ‘‘ན་ནུ དུ་བྦྷི་སྶ་སི མཾ པུ་ན་པྤུ་ནཾ, མུ་ཧུཾ མུ་ཧུཾ ཙཱ་ར་ཎི་ཀཾ་ཝ ད་སྶ་ཡཾ;
ཨུ་མྨ་ཏྟ་ཀེ་ནེ་ཝ མ་ཡཱ པ་ལོ་བྷ་སི, ཀི་ཉྩཱ་པི ཏེ ཙི་ཏྟ ཝི་རཱ་དྷི་ཏཾ མ་ཡཱ.
༡༡༣༣. ‘‘ཨི་དཾ པུ་རེ ཙི་ཏྟ་མ་ཙཱ་རི ཙཱ་རི་ཀཾ, ཡེ་ནི་ཙྪ་ཀཾ ཡ་ཏྠ་ཀཱ་མཾ ཡ་ཐཱ་སུ་ཁཾ;
ཏ་ད་ཛྫ་ཧཾ ནི་གྒ་ཧེ་སྶཱ་མི ཡོ་ནི་སོ, ཧ་ཏྠི་པྤ་བྷི་ནྣཾ ཝི་ཡ ཨ་ངྒུ་ས་གྒ་ཧོ.
༡༡༣༤. ‘‘ས་ཏྠཱ ཙ མེ ལོ་ཀ་མི་མཾ ཨ་དྷི་ཊྛ་ཧི, ཨ་ནི་ཙྩ་ཏོ ཨ་དྡྷུ་ཝ་ཏོ ཨ་སཱ་ར་ཏོ;
པ་ཀྑ་ནྡ མཾ ཙི་ཏྟ ཛི་ན་སྶ སཱ་ས་ནེ, ཏཱ་རེ་ཧི ཨོ་གྷཱ མ་ཧ་ཏཱ སུ་དུ་ཏྟ་རཱ.
༡༡༣༥. ‘‘ན ཏེ ཨི་དཾ ཙི་ཏྟ ཡ་ཐཱ པུ་རཱ་ཎ་ཀཾ, ནཱ་ཧཾ ཨ་ལཾ ཏུ་ཡ྄ཧ ཝ་སེ ནི་ཝ་ཏྟི་ཏུཾ;
མ་ཧེ་སི་ནོ པ་བྦ་ཛི་ཏོ་མྷི སཱ་ས་ནེ, ན མཱ་དི་སཱ ཧོ་ནྟི ཝི་ནཱ་ས་དྷཱ་རི་ནོ.
༡༡༣༦. ‘‘ན་གཱ ས་མུ་དྡཱ ས་རི་ཏཱ ཝ་སུ་ནྡྷ་རཱ, དི་སཱ ཙ་ཏ་སྶོ ཝི་དི་སཱ ཨ་དྷོ དི་ཝཱ;
ས་བྦེ ཨ་ནི་ཙྩཱ ཏི་བྷ་ཝཱ ཨུ་པ་དྡུ་ཏཱ, ཀུ་ཧིཾ ག་ཏོ ཙི་ཏྟ སུ་ཁཾ ར་མི་སྶ་སི.
༡༡༣༧. ‘‘དྷི་ཏི་པྤ་རཾ ཀིཾ མ་མ ཙི་ཏྟ ཀཱ་ཧི་སི, ན ཏེ ཨ་ལཾ ཙི་ཏྟ ཝ་སཱ་ནུ་ཝ་ཏྟ་ཀོ;
ན ཛཱ་ཏུ བྷ་སྟཾ ཨུ་བྷ་ཏོ་མུ་ཁཾ ཚུ་པེ, དྷི་ར་ཏྠུ པཱུ་རཾ ན་ཝ་སོ་ཏ་ས་ནྡ་ནིཾ.
༡༡༣༨. ‘‘ཝ་རཱ་ཧ་ཨེ་ཎེ་ཡྻ་ཝི་གཱ་ལ༹ྷ་སེ་ཝི་ཏེ, པ་བྦྷཱ་ར་ཀུ་ཊྚེ པ་ཀ་ཏེ་ཝ སུ་ནྡ་རེ;
ན་ཝ་མྦུ་ནཱ པཱ་ཝུ་ས་སི་ཏྟ་ཀཱ་ན་ནེ, ཏ་ཧིཾ གུ་ཧཱ་གེ་ཧ་ག་ཏོ ར་མི་སྶ་སི.
༡༡༣༩. ‘‘སུ་ནཱི་ལ་གཱི་ཝཱ སུ་སི་ཁཱ སུ་པེ་ཁུ་ནཱ, སུ་ཙི་ཏྟ་པ་ཏྟ་ཙྪ་ད་ནཱ ཝི་ཧ་ངྒ་མཱ;
སུ་མ་ཉྫུ་གྷོ་ས་ཏྠ་ནི་ཏཱ་བྷི་ག་ཛྫི་ནོ, ཏེ ཏཾ ར་མེ་སྶ་ནྟི ཝ་ན་མྷི ཛྷཱ་ཡི་ནཾ.
༡༡༤༠. ‘‘ཝུ་ཊྛ་མྷི དེ་ཝེ ཙ་ཏུ་ར་ངྒུ་ལེ ཏི་ཎེ, སཾ་པུ་པྥི་ཏེ མེ་གྷ་ནི་བྷ་མྷི ཀཱ་ན་ནེ;
ན་ག་ནྟ་རེ ཝི་ཊ་པི་ས་མོ ས་ཡི་སྶཾ, ཏཾ མེ མུ་དཱུ ཧེ་ཧི་ཏི ཏཱུ་ལ་ས་ནྣི་བྷཾ.
༡༡༤༡. ‘‘ཏ་ཐཱ ཏུ ཀ་སྶཱ་མི ཡ་ཐཱ་པི ཨི་སྶ་རོ, ཡཾ ལ་བྦྷ་ཏི ཏེ་ན་པི ཧོ་ཏུ མེ ཨ་ལཾ;
ན ཏཱ་ཧཾ ཀ་སྶཱ་མི ཡ་ཐཱ ཨ་ཏ་ནྡི་ཏོ, བི་ལཱ༹་ར་བྷ་སྟཾ་ཝ ཡ་ཐཱ སུ་མ་དྡི་ཏཾ.
༡༡༤༢. ‘‘ཏ་ཐཱ ཏུ ཀ་སྶཱ་མི ཡ་ཐཱ་པི ཨི་སྶ་རོ, ཡཾ ལ་བྦྷ་ཏི ཏེ་ན་པི ཧོ་ཏུ མེ ཨ་ལཾ;
ཝི་རི་ཡེ་ན ཏཾ མ་ཡ྄ཧ ཝ་སཱ་ན་ཡི་སྶཾ, ག་ཛཾ་ཝ མ་ཏྟཾ ཀུ་ས་ལ་ངྐུ་ས་གྒ་ཧོ.
༡༡༤༣. ‘‘ཏ་ཡཱ སུ་ད་ནྟེ་ན ཨ་ཝ་ཊྛི་ཏེ་ན ཧི, ཧ་ཡེ་ན ཡོ་གྒཱ་ཙ་རི་ཡོ་ཝ ཨུ་ཛྫུ་ནཱ;
པ་ཧོ་མི མ་གྒཾ པ་ཊི་པ་ཛྫི་ཏུཾ སི་ཝཾ, ཙི་ཏྟཱ་ནུ་ར་ཀྑཱི་ཧི ས་དཱ ནི་སེ་ཝི་ཏཾ.
༡༡༤༤. ‘‘ཨཱ་ར་མྨ་ཎེ ཏཾ བ་ལ་སཱ ནི་བ་ནྡྷི་སཾ, ནཱ་གཾ་ཝ ཐ་མྦྷ་མྷི ད་ལ༹ྷཱ་ཡ ར་ཛྫུ་ཡཱ;
ཏཾ མེ སུ་གུ་ཏྟཾ ས་ཏི་ཡཱ སུ་བྷཱ་ཝི་ཏཾ, ཨ་ནི་སྶི་ཏཾ ས་བྦ་བྷ་ཝེ་སུ ཧེ་ཧི་སི.
༡༡༤༥. ‘‘པ་ཉྙཱ་ཡ ཚེ་ཏྭཱ ཝི་པ་ཐཱ་ནུ་སཱ་རི་ནཾ, ཡོ་གེ་ན ནི་གྒ་ཡ྄ཧ པ་ཐེ ནི་ཝེ་སི་ཡ;
དི་སྭཱ ས་མུ་ད་ཡཾ ཝི་བྷ་ཝ་ཉྩ ས་མྦྷ་ཝཾ, དཱ་ཡཱ་ད་ཀོ ཧེ་ཧི་སི ཨ་གྒ་ཝཱ་དི་ནོ.
༡༡༤༦. ‘‘ཙ་ཏུ་བྦི་པ་ལླཱ་ས་ཝ་སཾ ཨ་དྷི་ཊྛི་ཏཾ, གཱ་མ་ཎྜ་ལཾ་ཝ པ་རི་ནེ་སི ཙི་ཏྟ མཾ;
ན་ནུ སཾ་ཡོ་ཛ་ན་བ་ནྡྷ་ན་ཙྪི་དཾ, སཾ་སེ་ཝ་སེ ཀཱ་རུ་ཎི་ཀཾ མ་ཧཱ་མུ་ནིཾ.
༡༡༤༧. ‘‘མི་གོ ཡ་ཐཱ སེ་རི སུ་ཙི་ཏྟ་ཀཱ་ན་ནེ, ར་མྨཾ གི་རིཾ པཱ་ཝུ་ས་ཨ་བྦྷ་མཱ་ལི་ནིཾ;
ཨ་ནཱ་ཀུ་ལེ ཏ་ཏྠ ན་གེ ར་མི་སྶཾ, ཨ་སཾ་ས་ཡཾ ཙི་ཏྟ པ་རཱ བྷ་ཝི་སྶ་སི.
༡༡༤༨. ‘‘ཡེ ཏུ་ཡ྄ཧ ཚ་ནྡེ་ན ཝ་སེ་ན ཝ་ཏྟི་ནོ,
ན་རཱ ཙ ནཱ་རཱི ཙ ཨ་ནུ་བྷོ་ནྟི ཡཾ སུ་ཁཾ;
ཨ་ཝི་དྡ་སཱུ མཱ་ར་ཝ་སཱ་ནུ་ཝ་ཏྟི་ནོ,
བྷ་ཝཱ་བྷི་ན་ནྡཱི ཏ་ཝ ཙི་ཏྟ སཱ་ཝ་ཀཱ’’ཏི.
ཏ་ཏྠ ཀ་དཱ ནུ་ཧནྟི ཀ་དཱ ནུ ཨ་ཧཾ. པ་བྦ་ཏ་ཀ་ནྡ་རཱ་སཱུཏི པ་བྦ་ཏེ་སུ ཙ ཀ་ནྡ་རེ་སུ ཙ, པ་བྦ་ཏ་སྶ ཝཱ ཀ་ནྡ་རཱ་སུ. ཨེ་ཀཱ་ཀི་ཡོཏི ཨེ་ཀ་ཀོ. ཨ་དྡུ་ཏི་ཡོཏི ནི་ཏྟ་ཎྷོ. ཏ་ཎྷཱ ཧི པུ་རི་ས་སྶ དུ་ཏི་ཡཱ ནཱ་མ. ཝི་ཧ་སྶནྟི ཝི་ཧ་རི་སྶཱ་མི. ཨ་ནི་ཙྩ་ཏོ ས་བྦ་བྷ་ཝཾ ཝི་པ་སྶནྟི ཀཱ་མ་བྷ་ཝཱ་དི་བྷེ་དཾ ས་བྦ་མྤི བྷ་ཝཾ ‘‘ཧུ་ཏྭཱ ཨ་བྷཱ་ཝ་ཊྛེ་ན ཨ་ནི་ཙྩ’’ནྟི ཝི་པ་སྶ་ནྟོ ཀ་དཱ ནུ ཝི་ཧ་རི་སྶ་ནྟི ཡོ་ཛ་ནཱ. ནི་ད་སྶ་ན་མ་ཏྟ་ཉྩེ་ཏཾ, ‘‘ཡ་ད་ནི་ཙྩཾ ཏཾ དུ་ཀྑཾ, ཡཾ དུ་ཀྑཾ ཏ་ད་ན་ཏྟཱ’’ཏི ཝ་ཙ་ན་ཏོ (སཾ. ནི. ༣.༡༥) ཨི་ཏ་ར་མྤི ལ་ཀྑ་ཎ་དྭ་ཡཾ ཝུ་ཏྟ་མེ་ཝཱ་ཏི ད་ཊྛ་བྦཾ. ཏཾ མེ ཨི་དཾ ཏཾ ནུ ཀ་དཱ བྷ་ཝི་སྶ་ཏཱིཏི ཏཾ ཨི་དཾ མེ པ་རི་ཝི་ཏ་ཀྐི་ཏཾ ཀ་དཱ ནུ བྷ་ཝི་སྶ་ཏི, ཀ་དཱ ནུ ཁོ མ་ཏྠ་ཀཾ པཱ་པུ་ཎི་སྶ་ཏཱི་ཏི ཨ་ཏྠོ. ཏཾ ནཱུཏི ཙེ་ཏྠ ཏནྟི ནི་པཱ་ཏ་མ་ཏྟཾ. ཨ་ཡ་ཉྷེ་ཏྠ ས་ངྑེ་པ་ཏྠོ – ཀ་དཱ ནུ ཁོ ཨ་ཧཾ མ་ཧཱ་ག་ཛོ ཝི་ཡ ས་ངྑ་ལི་ཀ་བ་ནྡྷ་ནཾ, གི་ཧི་བ་ནྡྷ་ནཾ ཚི་ནྡི་ཏྭཱ པ་བྦ་ཛི་ཏྭཱ ཀཱ་ཡ་ཝི་ཝེ་ཀཾ པ་རི་བྲཱུ་ཧ་ཡ་ནྟོ ཨེ་ཀཱ་ཀཱི པ་བྦ་ཏ་ཀ་ནྡ་རཱ་སུ ཨ་དུ་ཏི་ཡོ ས་བྦ་ཏྠ ནི་ར་པེ་ཀྑོ ས་བྦ་ས་ངྑཱ་ར་ག་ཏཾ ཨ་ནི་ཙྩཱ་དི་ཏོ ཝི་པ་སྶ་ནྟོ ཝི་ཧ་རི་སྶཱ་མཱི་ཏི.
བྷི་ནྣ་པ་ཊ་ནྡྷ་རོཏི བྷི་ནྣ་ཝ་ཏྠ་དྷ་རོ, གཱ་ཐཱ་སུ་ཁ་ཏྠཾ ན་ཀཱ་རཱ་ག་མཾ ཀ་ཏྭཱ ཝུ་ཏྟཾ. ས་ཏྠ་ཀ་ཙྪི་ནྣ་ཨ་གྒྷ་ཕ་སྶ་ཝ་ཎྞ་བྷི་ནྣཾ པ་ཊ་ཙཱི་ཝ་རཾ དྷཱ་རེ་ནྟོ་ཏི ཨ་ཏྠོ. མུ་ནཱིཏི པ་བྦ་ཛི་ཏོ. ཨ་མ་མོཏི ཀུ་ལེ ཝཱ ག་ཎེ ཝཱ མ་མ་ཏྟཱ་བྷཱ་ཝེ་ན ཨ་མ་མོ. ཀ་ཏྠ་ཙི་པི ཨཱ་ར་མྨ་ཎེ ཨཱ་སཱི་ས་ནཱ་ཡ ཨ་བྷཱ་ཝེ་ན ནི་རཱ་སོ. ཧ་ནྟྭཱ སུ་ཁཱི པ་ཝ་ན་ག་ཏོ ཝི་ཧ་སྶནྟི རཱ་གཱ་དི་ཀེ ཀི་ལེ་སེ ཨ་རི་ཡ་མ་གྒེ་ན ས་མུ་ཙྪི་ནྡི་ཏྭཱ མ་གྒ་སུ་ཁེ་ན ཕ་ལ་སུ་ཁེ་ན སུ་ཁཱི མ་ཧཱ་ཝ་ན་ག་ཏོ ཀ་དཱ ནུ ཁོ ཨ་ཧཾ ཝི་ཧ་རི་སྶཱ་མི.
ཝ་དྷ་རོ་ག་ནཱི་ལ༹ནྟི མ་ར་ཎ་སྶ ཙ རོ་ག་སྶ ཙ ཀུ་ལཱ་ཝ་ཀ་བྷཱུ་ཏཾ. ཀཱ་ཡཾ ཨི་མནྟི ཨི་མཾ ཁ་ནྡྷ་པ་ཉྩ་ཀ་ས་ངྑཱ་ཏཾ ཀཱ་ཡཾ. ཁ་ནྡྷ་པ་ཉྩ་ཀོ་པི ཧི ‘‘ཨ་ཝི་ཛྫཱ་ག་ཏ་སྶ, བྷི་ཀྑ་ཝེ, པུ་རི་ས་པུ་གྒ་ལ་སྶ ཏ་ཎྷཱ་ནུ་ག་ཏ་སྶ ཨ་ཡ་མེ་ཝ ཀཱ་ཡོ བ་ཧི་དྡྷཱ ནཱ་མ་རཱུ་པ’’ནྟི་ཨཱ་དཱི་སུ ཀཱ་ཡོ ཝུ་ཙྩ་ཏི. མ་ཙྩུ་ཛ་རཱ་ཡུ་པ་དྡུ་ཏནྟི མ་ར་ཎེ་ན ཙེ་ཝ ཛ་རཱ་ཡ ཙ པཱི་ལི༹་ཏཾ, ཝི་པ་སྶ་མཱ་ནོ ཨ་ཧཾ བྷ་ཡ་ཧེ་ཏུ་པ་ཧཱ་ནེ་ན ཝཱི་ཏ་བྷ་ཡོ, ཏཾ ནུ ཀ་དཱ བྷ་ཝི་སྶ་ཏཱི་ཏི ཨ་ཏྠོ.
བྷ་ཡ་ཛ་ན་ནིནྟི པ་ཉྩ་ཝཱི་ས་ཏི་ཡཱ མ་ཧཱ་བྷ་ཡཱ་ནཾ ཨུ་པྤཱ་ད་ཀཱ་ར་ཎ་བྷཱུ་ཏཾ ཀཱ་ཡི་ཀ་སྶ ཙ ཙེ་ཏ་སི་ཀ་སྶ ཙ ས་ཀ་ལ་སྶ་པི ཝ་ཊྚ་དུ་ཀྑ་སྶ ཨཱ་ཝ་ཧ་ན་ཏོ དུ་ཁཱ་ཝ་ཧཾ. ཏ་ཎྷཱ་ལ་ཏཾ བ་ཧུ་ཝི་དྷཱ་ནུ་ཝ་ཏྟ་ནིནྟི བ་ཧུ་ཝི་དྷ་ཉྩ ཨཱ་ར་མྨ་ཎཾ བྷ་ཝ་མེ་ཝ ཝཱ ཨ་ནུ་ཝ་ཏྟ་ཏི ས་ནྟ་ནོ་ཏཱི་ཏི བ་ཧུ་ཝི་དྷཱ་ནུ་ཝ་ཏྟ་ནིཾ, ཏ་ཎྷཱ་ས་ངྑཱ་ཏ་ལ་ཏཾ. པ་ཉྙཱ་མ་ཡནྟི མ་གྒ་པ་ཉྙཱ་མ་ཡཾ སུ་ནི་སི་ཏཾ ཨ་སི་ཁ་གྒཾ ཝཱི་རི་ཡ་པ་གྒ་ཧི་ཏེ་ན ས་དྡྷཱ་ཧ་ཏྠེ་ན ག་ཧེ་ཏྭཱ ས་མུ་ཙྪི་ནྡི་ཏྭཱ ‘‘ཀ་དཱ ནུ་ཧཾ ཝ་སེ’’ཏི ཡཾ པ་རི་ཝི་ཏ་ཀྐི་ཏཾ, ཏ་མྤི ཀ་དཱ བྷ་ཝི་སྶ་ཏཱི་ཏི ཡོ་ཛ་ནཱ.
ཨུ་གྒ་ཏེ་ཛནྟི ས་མ་ཐ་ཝི་པ་སྶ་ནཱ་ཝ་སེ་ན ནི་སི་ཏ་ཏཱ་ཡ ཏི་ཀྑ་ཏེ་ཛཾ. ས་ཏྠཾ ཨི་སཱི་ནནྟི བུ་དྡྷ་པ་ཙྩེ་ཀ་བུ་དྡྷ་ཨ་རི་ཡ་སཱ་ཝ་ཀ་ཨི་སཱི་ནཾ ས་ཏྠ་བྷཱུ་ཏཾ. མཱ་རཾ ས་སེ་ནཾ ས་ཧ་སཱ བྷ་ཉྫི་སྶནྟི ཀི་ལེ་ས་སེ་ནཱ་ཡ ས་སེ་ནཾ ཨ་བྷི་ས་ངྑཱ་རཱ་དི་མཱ་རཾ ས་ཧ་སཱ སཱི་གྷ་མེ་ཝ བྷ་ཉྫི་སྶཱ་མི. སཱི་ཧཱ་ས་ནེཏི ཐི་རཱ་ས་ནེ, ཨ་པ་རཱ་ཛི་ཏ་པ་ལླ་ངྐེ་ཏི ཨ་ཏྠོ.
ས་བྦྷི ས་མཱ་ག་མེ་སུ དི་ཊྛོ བྷ་ཝེཏི དྷ་མྨ་གཱ་ར་ཝ་ཡུ་ཏྟ་ཏཱ་ཡ དྷ་མྨ་ག་རཱུ་ཧི ཏཱ་དི་ལ་ཀྑ་ཎ་པྤ་ཏྟི་ཡཱ ཏཱ་དཱི་ཧི ཨ་ཝི་པ་རཱི་ཏ་ད་སྶི་ཏཱ་ཡ ཡཱ་ཐཱ་ཝ་ད་སྶཱི་ཧི ཨ་རི་ཡ་མ་གྒེ་ནེ་ཝ པཱ་པ་ཛི་ཏི་ནྡྲི་ཡ་ཏཱ་ཡ ཛི་ཏི་ནྡྲི་ཡེ་ཧི བུ་དྡྷཱ་དཱི་ཧི སཱ་དྷཱུ་ཧི ས་མཱ་ག་མེ་སུ ‘‘ཀ་དཱ ནུ ཨ་ཧཾ པ་དྷཱ་ནི་ཡོ་ཏི དི་ཊྛོ བྷ་ཝེ་ཡྻ’’ནྟི ཡཾ མེ པ་རི་ཝི་ཏ་ཀྐི་ཏཾ, ཏཾ ནུ ཀ་དཱ བྷ་ཝི་སྶ་ཏཱི་ཏི ཡོ་ཛ་ནཱ. ཨི་མི་ནཱ ན་ཡེ་ན ས་བྦ་ཏྠ པ་ད་ཡོ་ཛ་ནཱ ཝེ་དི་ཏ་བྦཱ, པ་ད་ཏྠ་མ་ཏྟ་མེ་ཝ ཝ་ཎྞ་ཡི་སྶཱ་མ.
ཏ་ནྡཱིཏི ཨཱ་ལ་སི་ཡཾ. ཁུ་དཱཏི ཛི་གྷ་ཙྪཱ. ཀཱི་ཊ་ས་རཱི་ས་པཱཏི ཀཱི་ཊ་ཉྩེ་ཝ ས་རཱི་ས་པཱ ཙ. ན བཱ་དྷ་ཡི་སྶ་ནྟཱིཏི མཾ ན བྱཱ་དྷ་ཡི་སྶ་ནྟི སུ་ཁ་དུ་ཀྑ་སོ་མ་ན་སྶ་དོ་མ་ན་སྶཱ་ནཾ ཛྷཱ་ནེ་ཧི པ་ཊི་བཱ་ཧི་ཏ་ཏྟཱ་ཏི ཨ་དྷི་པྤཱ་ཡོ. གི་རི་བྦ་ཛེཏི པ་བྦ་ཏ་ཀ་ནྡ་རཱ་ཡ. ཨ་ཏྠ་ཏྠི་ཡནྟི ས་ད་ཏྠ་ས་ངྑཱ་ཏེ་ན ཨ་ཏྠེ་ན ཨ་ཏྠི་ཀཾ.
ཡཾ ཝི་དི་ཏཾ མ་ཧེ་སི་ནཱཏི ཡཾ ཙ་ཏུ་ས་ཙྩཾ མ་ཧེ་སི་ནཱ ས་མྨཱ་ས་མྦུ་དྡྷེ་ན ས་ཡ་མྦྷཱུ་ཉཱ་ཎེ་ན ཉཱ་ཏཾ པ་ཊི་ཝི་དྡྷཾ, ཏཱ་ནི ཙ་ཏྟཱ་རི ས་ཙྩཱ་ནི ཨ་ནུ་པ་ཙི་ཏ་ཀུ་ས་ལ་ས་མྦྷཱ་རེ་ཧི སུ་ཊྛུ དུ་དྡ་སཱ་ནི མ་གྒ་ས་མཱ་དྷི་ནཱ ས་མཱ་ཧི་ཏ་ཏྟོ, ས་མྨཱ་ས་ཏི་ཡཱ ས་ཏི་མཱ, ཨ་རི་ཡ་མ་གྒ་པ་ཉྙཱ་ཡ ཨ་ཧཾ ཨ་ག་ཙྪཾ པ་ཊི་ཝི་ཛ྄ཛྷི་སྶཾ ཨ་དྷི་ག་མི་སྶ་ནྟི ཨ་ཏྠོ.
རཱུ་པེཏི ཙ་ཀྑུ་ཝི་ཉྙེ་ཡྻ་རཱུ་པེ. ཨ་མི་ཏེཏི ཉཱ་ཎེ་ན ཨ་མི་ཏེ, ཨ་པ་རི་ཙྪི་ནྣེ ཨ་པ་རི་ཉྙཱ་ཏེ་ཏི ཨ་ཏྠོ. ཕུ་སི་ཏ་བྦེཏི, ཕོ་ཊྛ་བྦེ. དྷ་མྨེཏི མ་ནོ་ཝི་ཉྙེ་ཡྻ་དྷ་མྨེ. ཨ་མི་ཏེཏི ཝཱ ཨ་པ་རི་མཱ་ཎེ ནཱི་ལཱ་དི་ཝ་སེ་ན ཨ་ནེ་ཀ་བྷེ་ད་བྷི་ནྣེ རཱུ་པེ བྷེ་རི་ས་དྡཱ་དི་ཝ་སེ་ན, མཱུ་ལ་ར་སཱ་དི་ཝ་སེ་ན, ཀ་ཀྑ་ལ༹་མུ་དུ་ཏཱ་དི་ཝ་སེ་ན, སུ་ཁ་དུ་ཀྑཱ་དི་ཝ་སེ་ན ཙ, ཨ་ནེ་ཀ་བྷེ་ད་ས་དྡཱ་དི་ཀེ ཙཱ་ཏི ཨ་ཏྠོ. ཨཱ་དི་ཏྟ་ཏོཏི ཨེ་ཀཱ་ད་ས་ཧི ཨ་གྒཱི་ཧི ཨཱ་དི་ཏྟ་བྷཱ་ཝ་ཏོ. ས་མ་ཐེ་ཧི ཡུ་ཏྟོཏི ཛྷཱ་ན་ཝི་པ་སྶ་ནཱ་མ་གྒ་ས་མཱ་དྷཱི་ཧི ས་མ་ནྣཱ་ག་ཏོ. པ་ཉྙཱ་ཡ ད་ཙྪནྟི ཝི་པ་སྶ་ནཱ་པ་ཉྙཱ་ས་ཧི་ཏཱ་ཡ མ་གྒ་པ་ཉྙཱ་ཡ ད་ཀྑི་སྶཾ.
དུ་བྦ་ཙ་ནེ་ན ཝུ་ཏྟོཏི དུ་རུ་ཏྟ་ཝ་ཙ་ནེ་ན གྷ་ཊྚི་ཏོ. ཏ་ཏོ ནི་མི་ཏྟནྟི ཕ་རུ་ས་ཝཱ་ཙཱ་ཧེ་ཏུ. ཝི་མ་ནོ ན ཧེ་སྶནྟི དོ་མ་ན་སྶི་ཏོ ན བྷ་ཝེ་ཡྻཾ. ཨ་ཐོཏི ཨ་ཐ. པ་ས་ཏྠོཏི ཀེ་ན་ཙི པ་སཾ་སི་ཏོ.
ཀ་ཊྛེཏི དཱ་རུ་ཀྑ་ནྡྷེ. ཏི་ཎེཏི ཏི་ཎཱ་ནཾ ཁ་ནྡྷེ. ཨི་མེཏི ཨི་མེ མ་མ ས་ནྟ་ཏི་པ་རི་ཡཱ་པ་ནྣེ པ་ཉྩ ཁ་ནྡྷེ. ཨ་མི་ཏེ ཙ དྷ་མྨེཏི ཏ་ཏོ ཨ་ཉྙེ་ན ཨི་ནྡྲི་ཡ་ཀྑ་ནྡྷེ་ན ཨ་མི་ཏེ རཱུ་པ་དྷ་མྨེ. ཏེ་ནཱ་ཧ – ‘‘ཨ་ཛ྄ཛྷ་ཏྟི་ཀཱ་ནེ་ཝ ཙ བཱ་ཧི་རཱ་ནི ཙཱ’’ཏི. ས་མཾ ཏུ་ལེ་ཡྻནྟི ཨ་ནི་ཙྩཱ་དི་ཝ་སེ་ན ཙེ་ཝ ཨ་སཱ་རཱ་དི་ཨུ་པ་མཱ་ཝ་སེ་ན ཙ ས་བྦཾ ས་མ་མེ་ཝ ཀ་ཏྭཱ ཏཱི་རེ་ཡྻཾ.
ཨི་སི་པྤ་ཡཱ་ཏ་མྷི པ་ཐེ ཝ་ཛ་ནྟནྟི བུ་དྡྷཱ་དཱི་ཧི མ་ཧེ་སཱི་ཧི ས་མྨ་དེ་ཝ པ་ཡཱ་ཏེ ས་མ་ཐ་ཝི་པ་སྶ་ནཱ་མ་གྒེ ཝ་ཛ་ནྟཾ པ་ཊི་པ་ཛྫ་ནྟཾ. པཱ་ཝུ་ས་ས་མ་ཡེ ཀཱ་ལ་མེ་གྷོ ན་ཝེ་ན ཏོ་ཡེ་ན ཝ་སྶོ་ད་ཀེ་ན ས་ཙཱི་ཝ་རཾ པ་ཝ་ནེ ཀ་དཱ ནུ ཨོ་ཝ་སྶ་ཏི, ཏེ་མེ་ཏཱི་ཏི ཨ་ཏྟ་ནོ ཨ་བྦྷོ་ཀཱ་སི་ཀ་བྷཱ་ཝ་པ་རི་ཝི་ཏ་ཀྐི་ཏཾ ད་སྶེ་ཏི.
མ་ཡཱུ་ར་སྶ སི་ཁ་ཎྜི་ནོ ཝ་ནེ དི་ཛ་སྶཱཏི མཱ་ཏུ་ཀུ་ཙྪི་ཏོ ཨ་ཎྜ་ཀོ་ས་ཏོ ཙཱ་ཏི དྭི་ཀྑ་ཏྟུཾ ཛཱ་ཡ་ན་ཝ་སེ་ན དི་ཛ་སྶ, སི་ཁཱ་ས་མྦྷ་ཝེ་ན སི་ཁ་ཎྜི་ནོ ཙ མ་ཡཱུ་ར་སྶ ཝ་ནེ ཀ་དཱ པ་ན གི་རི་ག་བྦྷ་རེ རུ་ཏཾ ཀེ་ཀཱ་ར་ཝཾ སུ་ཏྭཱ ཝེ་ལཾ ས་ལླ་ཀྑི་ཏྭཱ ས་ཡ་ན་ཏོ ཝུ་ཊྛ་ཧི་ཏྭཱ ཨ་མ་ཏ་སྶ པ་ཏྟི་ཡཱ ནི་བྦཱ་ནཱ་དྷི་ག་མཱ་ཡ. སཾ་ཙི་ནྟ་ཡེཏི ཝུ་ཙྩ་མཱ་ནེ བྷ་ཝེ ཨ་ནི་ཙྩཱ་དི་ཏོ མ་ན་སི ཀ་རེ་ཡྻཾ ཝི་པ་སྶེ་ཡྻ་ནྟི ཨ་ཏྠོ.
ག་ངྒཾ ཡ་མུ་ནཾ ས་ར་སྶ་ཏིནྟི ཨེ་ཏཱ མ་ཧཱ་ན་དི་ཡོ ཨ་ས་ཛྫ་མཱ་ནོ བྷཱ་ཝ་ནཱ་མ་ཡཱ་ཡ ཨི་དྡྷི་ཡཱ ཀ་དཱ ནུ པ་ཏ་རེ་ཡྻ་ནྟི ཡོ་ཛ་ནཱ. པཱ་ཏཱ་ལ་ཁི་ཏྟཾ བ་ལ༹་ཝཱ་མུ་ཁ་ཉྩཱཏི པཱ་ཏཱ་ཡ ཨ་ལཾ པ་རི་ཡ་ཏྟ་ནྟི པཱ་ཏཱ་ལཾ, ཏ་དེ་ཝ ཁི་ཏྟཾ, པ་ཐ་ཝི་ཡཱ ས་ཎྛ་ཧ་ན་ཀཱ་ལེ ཏ་ཐཱ ཋི་ཏ་ནྟི པཱ་ཏཱ་ལ་ཁི་ཏྟཾ. ཡོ་ཛ་ན་ས་ཏི་ཀཱ་དི་བྷེ་དཱ་ནི ས་མུ་དྡ་སྶ ཨ་ནྟོ་པ་ཐ་ཝི་ཡཱ ཏཱི་ར་ཊྛཱ་ནཱ་ནི, ཡེ་སུ ཀཱ་ནི་ཙི ནཱ་གཱ་དཱི་ནཾ ཝ་ས་ན་ཊྛཱ་ནཱ་ནི ཧོ་ནྟི, ཀཱ་ནི་ཙི སུ་ཉྙཱ་ནི་ཡེ་ཝ ཧུ་ཏྭཱ ཏི་ཊྛ་ནྟི. བ་ལ༹་ཝཱ་མུ་ཁ་ནྟི མ་ཧཱ་ས་མུ་དྡེ མ་ཧ་ནྟཾ ཨཱ་ཝ་ཊྚ་མུ་ཁཾ. མ་ཧཱ་ནི་ར་ཡ་དྭཱ་ར་སྶ ཧི ཝི་ཝ་ཊ་ཀཱ་ལེ མ་ཧཱ་ཨ་གྒི་ཀྑ་ནྡྷོ ཏ་ཏོ ནི་ཀྑ་ནྟོ ཏ་ད་བྷི་མུ་ཁཾ ཨ་ནེ་ཀ་ཡོ་ཛ་ན་ས་ཏཱ་ཡཱ་མ་ཝི་ཏྠཱ་རཾ ཧེ་ཊྛཱ ས་མུ་དྡ་པ་དེ་སཾ ཌ་ཧ་ཏི, ཏ་སྨིཾ ད་ཌྜྷེ ཨུ་པ་རི ཨུ་ད་ཀཾ ཨཱ་ཝ་ཊྚཱ་ཀཱ་རེ་ན པ་རི་བྦྷ་མ་ནྟཾ མ་ཧ་ཏཱ ས་དྡེ་ན ཧེ་ཊྛཱ ནི་པ་ཏ་ཏི. ཏ་ཏྠ བ་ལ༹་ཝཱ་མུ་ཁ་ས་མ་ཉྙཱ, ཨི་ཏི ཏ་ཉྩ པཱ་ཏཱ་ལ་ཁི་ཏྟཾ བ་ལ༹་ཝཱ་མུ་ཁ་ཉྩ ཝི་བྷིཾ་ས་ནཾ བྷ་ཡཱ་ན་ཀཾ ཨ་ས་ཛྫ་མཱ་ནོ ཨི་དྡྷི་ཡཱ ཀ་དཱ ནུ པ་ཏ་རེ་ཡྻ་ནྟི ཡཾ པ་རི་ཝི་ཏ་ཀྐི་ཏཾ, ཏཾ ཀ་དཱ ནུ བྷ་ཝི་སྶ་ཏི, བྷཱ་ཝ་ནཱ་མ་ཡཾ ཨི་དྡྷིཾ ནི་བྦ་ཏྟེ་ཏྭཱ ཀ་དཱ ནུ ཨེ་ཝཾ ཨི་དྡྷིཾ ཝ་ལ༹་ཉྫི་སྶཱ་མཱི་ཏི ཨ་ཏྠོ.
ནཱ་གོ་ཝ ཨ་ས་ངྒ་ཙཱ་རཱི པ་དཱ་ལ་ཡེཏི ཡ་ཐཱ མ་ཏྟ་ཝཱ་ར་ཎོ ད་ལ༹ྷ་ཐ་མྦྷཾ བྷི་ནྡི་ཏྭཱ ཨ་ཡ་ས་ངྑ་ལི་ཀཾ ཝི་དྡྷཾ་སེ་ཏྭཱ ཨ་ས་ངྒ་ཙཱ་རཱི ཝ་ནཾ པ་ཝི་སི་ཏྭཱ ཨེ་ཀོ ཨ་དུ་ཏི་ཡོ ཧུ་ཏྭཱ ཨ་ཏྟ་ནོ རུ་ཙི་ཝ་སེ་ན ཙ་ར་ཏི, ཨེ་ཝ་མ་ཧཾ ཀ་དཱ ནུ ས་བྦ་སུ་བྷཾ ནི་མི་ཏྟཾ ནི་བྦ་ཛྫ་ཡཾ ནི་ར་ཝ་སེ་ས་ཏོ ཝ་ཛྫ་ཡ་ནྟོ ཀཱ་མ་ཙྪ་ནྡ་ཝ་སོ ཨ་ཧུ་ཏྭཱ ཛྷཱ་ནེ ཡུ་ཏོ པ་ཡུ་ཏྟོ ཀཱ་མ་གུ་ཎེ་སུ ཚ་ནྡཾ ས་མྨ་དེ་ཝ པ་དཱ་ལེ་ཡྻཾ ཚི་ནྡེ་ཡྻཾ པ་ཛ་ཧེ་ཡྻ་ནྟི ཡཾ པ་རི་ཝི་ཏ་ཀྐི་ཏཾ, ཏཾ ནུ ཀ་དཱ བྷ་ཝི་སྶ་ཏི.
ཨི་ཎ་ཊྚོ་ཝ ད་ལི་དྡ་ཀོ ནི་དྷིཾ ཨཱ་རཱ་དྷ་ཡི་ཏྭཱཏི ཡ་ཐཱ ཀོ་ཙི ད་ལི་དྡོ ཛཱི་ཝི་ཀ་པ་ཀ་ཏོ ཨི་ཎཾ ག་ཧེ་ཏྭཱ ཏཾ སོ་དྷེ་ཏུཾ ཨ་ས་ཀྐོ་ནྟོ ཨི་ཎ་ཊྚོ ཨི་ཎེ་ན ཨ་ཊྚི་ཏོ དྷ་ནི་ཀེ་ཧི པཱི་ལི༹་ཏོ ནི་དྷིཾ ཨཱ་རཱ་དྷ་ཡི་ཏྭཱ ཨ་དྷི་ག་ནྟྭཱ ཨི་ཎ་ཉྩ སོ་དྷེ་ཏྭཱ སུ་ཁེ་ན ཙ ཛཱི་ཝ་ནྟོ ཏུ་ཊྛོ བྷ་ཝེ་ཡྻ, ཨེ་ཝཾ ཨ་ཧ་མྤི ཀ་དཱ ནུ ཨི་ཎ་ས་དི་སཾ ཀཱ་མ་ཙྪ་ནྡཾ པ་ཧཱ་ཡ མ་ཧེ་སི་ནོ ཨ་རི་ཡ་དྷ་ན་ས་མྤུ་ཎྞ་ཏཱ་ཡ མ་ཎི་ཀ་ན་ཀཱ་དི་ར་ཏ་ན་ས་མྤུ་ཎྞ་ནི་དྷི་ས་དི་སཾ བུ་དྡྷ་སྶ སཱ་ས་ནཾ ཨ་དྷི་ག་ནྟྭཱ ཏུ་ཊྛོ བྷ་ཝེ་ཡྻ་ནྟི ཡཾ པ་རི་ཝི་ཏ་ཀྐི་ཏཾ, ཏཾ ཀ་དཱ ནུ བྷ་ཝི་སྶ་ཏཱི་ཏི.
ཨེ་ཝཾ པ་བྦ་ཛྫ་ཏོ པུ་བྦེ ནེ་ཀྑ་མྨ་ཝི་ཏ་ཀྐ་ཝ་སེ་ན པ་ཝ་ཏྟཾ ཨ་ཏྟ་ནོ ཝི་ཏ་ཀྐ་པ་ཝ་ཏྟིཾ ད་སྶེ་ཏྭཱ ཨི་དཱ་ནི པ་བྦ་ཛི་ཏྭཱ ཡེ་ཧཱ་ཀཱ་རེ་ཧི ཨ་ཏྟཱ་ནཾ ཨོ་ཝ་དི་ཏྭཱ ཨ་དྷི་ག་ཙྪི, ཏེ ད་སྶེ་ནྟོ ‘‘བ་ཧཱུ་ནི ཝ་སྶཱ་ནཱི’’ཏི་ཨཱ་དི་ཀཱ གཱ་ཐཱ ཨ་བྷཱ་སི. ཏ་ཏྠ བ་ཧཱུ་ནི ཝ་སྶཱ་ནི ཏ་ཡཱ་མྷི ཡཱ་ཙི་ཏོ, ཨ་གཱ་ར་ཝཱ་སེ་ན ཨ་ལཾ ནུ ཏེ ཨི་དནྟི ཨ་ནེ་ཀ་སཾ་ཝ་ཙྪ་རཱ་ནི ཝི་ཝི་དྷ་དུ་ཀྑཱ་ནུ་བ་ནྡྷེ་ན ཨ་གཱ་ར་མ་ཛ྄ཛྷེ ཝཱ་སེ་ན ཨ་ལཾ པ་རི་ཡ་ཏྟ་མེ་ཝ ཏེ་ཏི, ཨ་མྦྷོ ཙི་ཏྟ, ཨི་དཾ ཏ་ཡཱ ཨ་ནེ་ཀཱ་ནི སཾ་ཝ་ཙྪ་རཱ་ནི ཨ་ཧཾ ཨ་མྷི ན་ནུ ཡཱ་ཙི་ཏོ. ཏཾ དཱ་ནི མཾ པ་བྦ་ཛི་ཏཾ ས་མཱ་ནནྟི ཏཾ མཾ ཏ་ཡཱ ཏ་ཐཱ ཨུ་སྶཱ་ཧ་ནེ་ན པ་བྦ་ཛི་ཏཾ ས་མཱ་ནཾ ཀེ་ན ཀཱ་ར་ཎེ་ན ཙི་ཏྟ ཏུ་ཝཾ ན ཡུ་ཉྫ་སི, ས་མ་ཐ་ཝི་པ་སྶ་ནཾ ཚ་ཌྜེ་ཏྭཱ ནི་ཧཱི་ནེ ཨཱ་ལ་སི་ཡེ ནི་ཡོ་ཛེ་སཱི་ཏི ཨ་ཏྠོ.
ན་ནུ ཨ་ཧཾ, ཙི་ཏྟ, ཏ་ཡཱ་མྷི ཡཱ་ཙི་ཏོ་ཏི, ཨ་མྦྷོ ཙི་ཏྟ, ཨ་ཧཾ ཏ་ཡཱ ན་ནུ ཡཱ་ཙི་ཏོ ཨ་མྷི ཨཱ་ཡཱ་ཙི་ཏོ མ་ཉྙེ. ཡ་དི ཡཱ་ཙི་ཏོ, ཀ་སྨཱ ཨི་དཱ་ནི ཏ་ད་ནུ་རཱུ་པཾ ན པ་ཊི་པ་ཛྫ་སཱི་ཏི ཨ་དྷི་པྤཱ་ཡོ. ‘‘གི་རི་བྦ་ཛེ’’ཏི་ཨཱ་དི་ནཱ ཡཱ་ཙི་ཏཱ་ཀཱ་རཾ ད་སྶེ་ཏི. ཙི་ཏྲ་ཚ་དཱ ཝི་ཧ་ངྒ་མཱ ཝི་ཙི་ཏྲ་པེ་ཁུ་ཎ་པ་ཀྑི་ནོ, མ་ཡཱུ་རཱ་ཏི ཨ་ཏྠོ. མ་ཧི་ནྡ་གྷོ་ས་ཏྠ་ནི་ཏཱ་བྷི་ག་ཛྫི་ནོཏི ཛ་ལ་གྷོ་ས་ཏྠ་ནི་ཏེ་ན ཧེ་ཏུ་ནཱ སུ་ཊྛུ ག་ཛྫ་ན་སཱི་ལཱ. ཏེ ཏཾ ར་མེ་སྶ་ནྟི ཝ་ན་མྷི ཛྷཱ་ཡི་ནནྟི ཏེ མ་ཡཱུ་རཱ ཏཾ ཝ་ནེ ཛྷཱ་ན་པ་སུ་ཏཾ ར་མེ་སྶ་ནྟཱི་ཏི ན་ནུ ཏ་ཡཱ ཡཱ་ཙི་ཏོ་ཏི ད་སྶེ་ཏི.
ཀུ་ལ་མྷཱིཏི ཀུ་ལ་པ་རི་ཝ་ཊྚེ. ཨི་མ་མ་ཛ྄ཛྷུ་པཱ་ག་ཏོཏི ཨི་མཾ ཨ་ར་ཉྙ་ཊྛཱ་ནཾ པ་བྦ་ཛྫཾ ཝཱ ཨ་ཛ྄ཛྷུ་པཱ་ག་ཏོ. ཨ་ཐོ་པི ཏྭཾ, ཙི་ཏྟ, ན མ་ཡ྄ཧ ཏུ་སྶ་སཱིཏི ཏྭཾ ཨ་ནུ་ཝ་ཏྟི་ཏྭཱ ཋི་ཏ་མྤི མཾ ནཱ་རཱ་དྷེ་སྶ་སཱི་ཏི ཨ་ཏྠོ.
མ་མེ་ཝ ཨེ་ཏཾ ན ཧི ཏྭཾ པ་རེ་སནྟི ཨེ་ཏཾ, ཙི་ཏྟ, མ་མེ་ཝ ཏ་སྨཱ ཏྭཾ པ་རེ་སཾ ན ཧོ་སི. ཏྭཾ པ་ན ཨ་ཉྙེ་སཾ ཝི་ཡ ཀ་ཏྭཱ ས་ནྣཱ་ཧ་ཀཱ་ལེ ཀི་ལེ་ས་མཱ་རེ ཡུ་ཛ྄ཛྷི་ཏུཾ བྷཱ་ཝ་ནཱ་ས་ནྣཱ་ཧ་ཀཱ་ལེ ན་ཏི ཝ་ཏྭཱ པ་རི་དེ་ཝི་ཏེ་ན ཀིཾ པ་ཡོ་ཛ་ནཾ, ཨི་དཱ་ནི ཏཾ ཨ་ཉྙ་ཐཱ ཝ་ཏྟི་ཏུཾ ན ད་སྶཱ་མཱི་ཏི ཨ་དྷི་པྤཱ་ཡོ. ས་བྦཾ ཨི་དཾ ཙ་ལ་མི་ཏི པེ་ཀྑ་མཱ་ནོཏི ཡ་སྨཱ ‘‘ཨི་དཾ ཙི་ཏྟཾ ཨ་ཉྙ་ཉྩ ས་བྦཾ ཏེ་བྷཱུ་མ་ཀ་ས་ངྑཱ་རཾ ཙ་ལཾ ཨ་ན་ཝ་ཊྛི་ཏ’’ནྟི པ་ཉྙཱ་ཙ་ཀྑུ་ནཱ ཨོ་ལོ་ཀེ་ནྟོ གེ་ཧ་ཏོ ཀཱ་མེ་ཧི ཙ ཨ་བྷི་ནི་ཀྑ་མིཾ ཨ་མ་ཏ་པ་དཾ ནི་བྦཱ་ནཾ ཛི་གཱི་སཾ པ་རི་ཡེ་ས་ནྟོ, ཏ་སྨཱ, ཙི་ཏྟ, ཨ་ན་ནུ་ཝ་ཏྟ་ནྟོ ནི་བྦཱ་ནཾ པ་རི་ཡེ་ས་ན་མེ་ཝ ཀ་རོ་མཱི་ཏི ཨ་དྷི་པྤཱ་ཡོ.
ཨ་ཝཱི་ཏ་རཱ་གེ་ན སུ་དུ་ནྣི་ཝཱ་ར་ཡཾ ཙི་ཏྟཾ ཙ་ལཾ མ་ཀྐ་ཊ་ས་ནྣི་བྷཾ ཝ་ན་མ་ཀྐ་ཊ་ས་དི་སཾ ཨི་ཏི སུ་ཡུ་ཏྟ་ཝཱ་དཱི སུ་བྷཱ་སི་ཏ་ཝཱ་དཱི དྭི་པ་དཱ་ན་མུ་ཏྟ་མོ མ་ཧཱ་བྷི་ས་ཀྐོ ན་ར་ད་མྨ་སཱ་ར་ཐཱི་ཏི ཡོ་ཛ་ནཱ.
ཨ་ཝི་དྡ་སཱུ ཡ་ཏྠ སི་ཏཱ པུ་ཐུ་ཛྫ་ནཱཏི ཡ་ཏྠ ཡེ་སུ ཝ་ཏྠུ་ཀཱ་མེ་སུ ཀི་ལེ་ས་ཀཱ་མེ་སུ ཙ སི་ཏཱ པ་ཊི་བ་དྡྷཱ ཏེ ཨ་ནྡྷ་པུ་ཐུ་ཛྫ་ནཱ ཏེ་ན ཀཱ་མ་རཱ་གེ་ན པུ་ན་བྦྷ་ཝེ་སི་ནོ ཨེ་ཀ་ནྟེ་ནེ་ཝ དུ་ཀྑ་མི་ཙྪ་ནྟི. ཨི་ཙྪ་ནྟཱ ཙ ཙི་ཏྟེ་ན ནཱི་ཏཱ ནི་ར་ཡེ ནི་རཱ་ཀ་ཏཱཏི ཙི་ཏྟ་ཝ་སི་ཀཱ ནི་ར་ཡ་སཾ་ཝ་ཏྟ་ནི་ཀཾ ཀ་མྨཾ ཀ་རོ་ནྟཱ ཧི་ཏ་སུ་ཁ་ཏོ ནི་རཱ་ཀ་ཏཱ ཧུ་ཏྭཱ ཨ་ཏྟ་ནོ ཙི་ཏྟེ་ནེ་ཝ ནི་ར་ཡེ ནཱི་ཏཱ ན ཨ་ཉྙ་ཐཱ་ཏི ཙི་ཏྟ་སྶེ་ཝ ནི་གྒ་ཧེ་ཏ་བྦ་ཏཾ ད་སྶེ་ཏི.
པུ་ན་པི ཙི་ཏྟཾ་ཡེ་ཝ ནི་གྒ་ཧེ་ཏུཾ མ་ནྟེ་ནྟོ ‘‘མ་ཡཱུ་ར་ཀོ་ཉྩཱ་བྷི་རུ་ཏ་མྷཱི’’ཏི་ཨཱ་དི་མཱ་ཧ. ཏ་ཏྠ མ་ཡཱུ་ར་ཀོ་ཉྩཱ་བྷི་རུ་ཏ་མྷཱིཏི སི་ཁཱི་ཧི སཱ་ར་སེ་ཧི ཙ ཨ་བྷི་ཀཱུ་ཛི་ཏེ. དཱི་པཱི་ཧི བྱ་གྒྷེ་ཧི པུ་ར་ཀྑ་ཏོ ཝ་སནྟི མེ་ཏྟཱ་ཝི་ཧཱ་རི་ཏཱ་ཡ ཨེ་ཝ་རཱུ་པེ་ཧི ཏི་ར་ཙྪཱ་ན་ག་ཏེ་ཧི པུ་ར་ཀྑ་ཏོ པ་རི་ཝཱ་རི་ཏོ ཧུ་ཏྭཱ ཝ་ནེ ཝ་ས་ནྟོ, ཨེ་ཏེ་ན སུ་ཉྙ་བྷཱ་ཝ་པ་རི་བྲཱུ་ཧ་ན་མཱ་ཧ. ཀཱ་ཡེ ཨ་པེ་ཀྑཾ ཛ་ཧཱཏི ས་བྦ་སོ ཀཱ་ཡེ ནི་ར་པེ་ཀྑོ ཛ་ཧ, ཨེ་ཏེ་ན པ་ཧི་ཏ་ཏྟ་ཏཾ ཝ་ད་ཏི. མཱ ཝི་རཱ་དྷ་ཡཱཏི ཨི་མཾ སུ་དུ་ལླ་བྷཾ ན་ཝ་མཾ ཁ་ཎཾ མཱ ཝི་རཱ་དྷེ་ཧི. ཨི་ཏི་སྶུ མཾ, ཙི་ཏྟ, པུ་རེ ནི་ཡུ་ཉྫ་སཱིཏི ཨེ་ཝ་ཉྷི ཏྭཾ, ཙི་ཏྟ, མཾ པ་བྦ་ཛྫ་ཏོ པུ་བྦེ ས་མྨཱ་པ་ཊི་པ་ཏྟི་ཡཾ ཨུ་ཡྻོ་ཛེ་སཱི་ཏི ཨ་ཏྠོ.
བྷཱ་ཝེ་ཧཱིཏི ཨུ་པྤཱ་དེ་ཧི ཝ་ཌྜྷེ་ཧི ཙ. ཛྷཱ་ནཱ་ནཱིཏི པ་ཋ་མཱ་དཱི་ནི ཙ་ཏྟཱ་རི ཛྷཱ་ནཱ་ནི. ཨི་ནྡྲི་ཡཱ་ནཱིཏི ས་དྡྷཱ་དཱི་ནི པ་ཉྩི་ནྡྲི་ཡཱ་ནི. བ་ལཱ་ནཱིཏི ཏཱ་ནི་ཡེ་ཝ པ་ཉྩ བ་ལཱ་ནི. བོ་ཛ྄ཛྷ་ངྒ་ས་མཱ་དྷི་བྷཱ་ཝ་ནཱཏི ས་ཏྟ བོ་ཛ྄ཛྷ་ངྒེ ཙ་ཏ་སྶོ ས་མཱ་དྷི་བྷཱ་ཝ་ནཱ ཙ. ཏི་སྶོ ཙ ཝི་ཛྫཱཏི པུ་བྦེ་ནི་ཝཱ་ས་ཉཱ་ཎཱ་དི་ཀཱ ཏི་སྶོ ཝི་ཛྫཱ ཙ. ཕུ་ས པཱ་པུ་ཎཱ་ཧི བུ་དྡྷ་སཱ་ས་ནེ ས་མྨཱ་ས་མྦུ་དྡྷ་ཨོ་ཝཱ་དེ ཋི་ཏོ.
ནི་ཡྻཱ་ནི་ཀནྟི ཝ་ཊྚ་དུ་ཀྑ་ཏོ ནི་ཡ྄ཧཱ་ན་ཝ་ཧཾ. ས་བྦ་དུ་ཀྑ་ཀྑ་ཡོ་ག་དྷནྟི ཨ་མ་ཏོ་ག་དྷཾ ནི་བྦཱ་ན་པ་ཏི་ཊྛཾ ནི་བྦཱ་ནཱ་ར་མྨ་ཎཾ. ས་བྦ་ཀི་ལེ་ས་སོ་དྷ་ནནྟི ཨ་ན་ཝ་སེ་ས་ཀི་ལེ་ས་མ་ལ་ཝི་སོ་དྷ་ནཾ.
ཁ་ནྡྷེཏི ཨུ་པཱ་དཱ་ན་ཀྑ་ནྡྷེ. པ་ཊི་པ་སྶ ཡོ་ནི་སོཏི རོ་ག་ཏོ ག་ཎྜ་ཏོ ས་ལླ་ཏོ ཨ་གྷ་ཏོ ཨཱ་བཱ་དྷ་ཏོ་ཏི ཨེ་ཝ་མཱ་དཱི་ཧི ཝི་ཝི་དྷེ་ཧི པ་ཀཱ་རེ་ཧི ཝི་པ་སྶ་ནཱ་ཉཱ་ཎེ་ན ས་མྨཱ ཨུ་པཱ་ཡེ་ན ན་ཡེ་ན པ་སྶ. ཏཾ ཛ་ཧཱཏི ཏཾ དུ་ཀྑ་སྶ ས་མུ་ད་ཡཾ ཏ་ཎྷཾ པ་ཛ་ཧ, ས་མུ་ཙྪི་ནྡ. ཨི་དྷེ་ཝཱཏི ཨི་མ་སྨིཾ་ཡེ་ཝ ཨ་ཏྟ་བྷཱ་ཝེ.
ཨ་ནི་ཙྩནྟི་ཨཱ་དི ཨ་ནྟ་ཝ་ནྟ་ཏོ ཨ་ནི་ཙྩ་ནྟི་ཀ་ཏོ ཏཱ་ཝ་ཀཱ་ལི་ཀ་ཏོ ནི་ཙྩ་པ་ཊི་ཀྑེ་པ་ཏོ ཙ ཨ་ནི་ཙྩ་ནྟི ཝཱ པ་སྶ. དུ་ཀྑནྟི ཏེ ཨུ་ད་ཡ་བྦ་ཡ་པ་ཊི་པཱི་ལ༹་ན་ཏོ ས་པྤ་ཊི་བྷ་ཡ་ཏོ དུ་ཀྑ་མ་ཏོ སུ་ཁ་པ་ཊི་ཀྑེ་པ་ཏོ དུ་ཀྑ་ནྟི ཝཱ པ་སྶ. སུ་ཉྙནྟི ཨ་ཝ་ས་ཝ་ཏྟ་ན་ཏོ ཨ་སཱ་མི་ཀ་ཏོ ཨ་སཱ་ར་ཏོ ཨ་ཏྟ་པ་ཊི་ཀྑེ་པ་ཏོ ཙ སུ་ཉྙཾ, ཏ་ཏོ ཨེ་ཝ ཨ་ན་ཏྟཱཏི. ཝི་ག་ར་ཧི་ཏ་བྦ་ཏོ ཨ་ཝ་ཌྜྷི་ཨཱ་བཱ་དྷ་ན་ཏོ ཙ ཨ་གྷནྟི ཙ ཝ་དྷནྟི ཙ ཝི་པ་སྶ ཡོ་ནི་སོ་ཏི ཡོ་ཛ་ནཱ. མ་ནོ་ཝི་ཙཱ་རེ ཨུ་པ་རུ་ནྡྷ ཙེ་ཏ་སོཏི མ་ནོ་ཝི་ཙཱ་ར་ས་ཉྙི་ནོ གེ་ཧ་སི་ཏ་སོ་མ་ན་སྶུ་པ་ཝི་ཙཱ་རཱ་དི་ཀེ ཨ་ཊྛཱ་ར་ས ཙེ་ཏ་སོ ཨུ་པ་རུ་ནྡྷ ཝཱ་རེ་ཧི ནི་རོ་དྷེ་ཧི.
མུ་ཎྜོཏི མུ་ཎྜ་བྷཱ་ཝཾ ཨུ་པ་ག་ཏོ, ཨོ་ཧཱ་རི་ཏ་ཀེ་ས་མ་སྶུ་ཀོ. ཝི་རཱུ་པོཏི ཏེ་ན མུ་ཎྜ་བྷཱ་ཝེ་ན པ་རཱུ་ལ༹ྷ་ལོ་མ་ཏཱ་ཡ ཚི་ནྣ་བྷི་ནྣ་ཀཱ་སཱ་ཡ ཝ་ཏྠ་ཏཱ་ཡ ཝི་རཱུ་པོ ཝེ་ཝ་ཎྞི་ཡཾ ཨུ་པ་ག་ཏོ. ཨ་བྷི་སཱ་པ་མཱ་ག་ཏོཏི ‘‘པི་ཎྜོ་ལོ ཝི་ཙ་ར་ཏི པ་ཏྟ་པཱ་ཎཱི’’ཏི ཨ་རི་ཡེ་ཧི ཀཱ་ཏ་བྦཾ ཨ་བྷི་སཱ་པཾ ཨུ་པ་ག་ཏོ. ཝུ་ཏྟ་ཉྷེ་ཏཾ – ‘‘ཨ་བྷི་སཱ་པོ་ཡཾ, བྷི་ཀྑ་ཝེ, ལོ་ཀ་སྨིཾ པི་ཎྜོ་ལོ ཝི་ཙ་ར་སི པ་ཏྟ་པཱ་ཎཱི’’ཏི (སཾ. ནི. ༣.༨༠). ཏེ་ནཱ་ཧ ‘‘ཀ་པཱ་ལ་ཧ་ཏྠོ་ཝ ཀུ་ལེ་སུ བྷི་ཀྑ་སཱུ’’ཏི. ཡུ་ཉྫ་སྶུ ས་ཏྠུ་ཝ་ཙ་ནེཏི ས་མྨཱ་ས་མྦུ་དྡྷ་སྶ ཨོ་ཝཱ་དེ ཡོ་གཾ ཀ་རོ་ཧི ཨ་ནུ་ཡུ་ཉྫ་སྶུ.
སུ་སཾ་ཝུ་ཏ་ཏྟོཏི སུ་ཊྛུ ཀཱ་ཡ་ཝཱ་ཙཱ་ཙི་ཏྟེ་ཧི ས་མྨ་དེ་ཝ སཾ་ཝུ་ཏོ. ཝི་སི་ཁ་ནྟ་རེ ཙ་རནྟི བྷི་ཀྑཱ་ཙ་རི་ཡཱ་ཡ ཨི་ཙྪཱ་ཝི་སེ་སེ་སུ ཙ་ར་ནྟོ. ཙ་ནྡོ ཡ་ཐཱ དོ་སི་ན་པུ་ཎྞ་མཱ་སི་ཡཱཏི ཝི་ག་ཏ་དོ་སཱ་ཡ པུ་ཎྞ་མཱ་ཡ ཀུ་ལེ་སུ ནི་ཙྩ་ན་ཝ་སཱ་ཡ པཱ་སཱ་དི་ཀ་ཏཱ་ཡ ཙ་ནྡི་མཱ ཝི་ཡ ཙ་རཱ་ཏི ཡོ་ཛ་ནཱ.
ས་དཱ དྷུ་ཏེ ར་ཏོཏི ས་བྦ་ཀཱ་ལ་ཉྩ དྷུ་ཏ་གུ་ཎེ ཨ་བྷི་ར་ཏོ. ཏ་ཐཱུ་པ་མཾ ཙི་ཏྟ་མི་དཾ ཀ་རོ་སཱིཏི ཡ་ཐཱ ཀོ་ཙི པུ་རི་སོ ཕ་ལཱ་ནི ཨི་ཙྪ་ནྟོ ཕ་ལ་རུ་ཀྑེ རོ་པེ་ཏྭཱ ཏ་ཏོ ཨ་ལ་དྡྷ་ཕ་ལོ་ཝ ཏེ མཱུ་ལ་ཏོ ཚི་ནྡི་ཏུཾ ཨི་ཙྪ་ཏི, ཙི་ཏྟ, ཏྭཾ ཏ་ཐཱུ་པ་མཾ ཏ་པྤ་ཊི་བྷཱ་གཾ ཨི་དཾ ཀ་རོ་སི. ཡཾ མཾ ཨ་ནི་ཙྩ་མྷི ཙ་ལེ ནི་ཡུ་ཉྫ་སཱིཏི ཡཾ མཾ པ་བྦ་ཛྫཱ་ཡ ནི་ཡོ་ཛེ་ཏྭཱ པ་བྦ་ཛི་ཏྭཱ ཨ་དྡྷཱ་ག་ཏཾ པ་བྦ་ཛྫཱ་ཕ་ལཾ ཨ་ནི་ཙྩ་མྷི ཙ་ལེ སཾ་སཱ་ར་མུ་ཁེ ནི་ཡུ་ཉྫ་སི ནི་ཡོ་ཛ་ན་ཝ་སེ་ན པ་ཝ་ཏྟེ་སི.
རཱུ་པཱ་བྷཱ་ཝ་ཏོ ཨ་རཱུ་པཱ. ཙི་ཏྟ་སྶ ཧི ཏཱ་དི་སཾ ས་ཎྛཱ་ནཾ ནཱི་ལཱ་དི་ཝ་ཎྞ་བྷེ་དོ ཝཱ ན་ཏྠི, ཏ་སྨཱ ཝུ་ཏྟཾ ཨ་རཱུ་པཱ་ཏི. དཱུ་ར་ཊྛཱ་ན་པྤ་ཝ་ཏྟི་ཡཱ དཱུ་ར་ངྒ་མ. ཡ་དི་པི ཙི་ཏྟ་སྶ མ་ཀྐ་ཊ་སུ་ཏྟ་མ་ཏྟ་མྤི པུ་ར་ཏྠི་མཱ་དི་དི་སཱ་བྷཱ་གེ་ན ག་མ་ནཾ ནཱ་མ ན་ཏྠི, དཱུ་རེ ས་ནྟཾ པ་ན ཨཱ་ར་མྨ་ཎཾ ས་མྤ་ཊི་ཙྪ་ཏཱི་ཏི དཱུ་ར་ངྒ་མ. ཨེ་ཀོ་ཡེ་ཝ ཧུ་ཏྭཱ ཙ་ར་ཎ་ཝ་སེ་ན པ་ཝ་ཏྟ་ན་ཏོ ཨེ་ཀ་ཙཱ་རི, ཨ་ནྟ་མ་སོ དྭེ ཏཱི་ཎི་པི ཙི་ཏྟཱ་ནི ཨེ་ཀ་ཏོ ཨུ་པྤ་ཛྫི་ཏུཾ ས་མ་ཏྠཱ་ནི ནཱ་མ ན་ཏྠི, ཨེ་ཀ་མེ་ཝ པ་ན ཙི་ཏྟཾ ཨེ་ཀ་སྨིཾ ས་ནྟཱ་ནེ ཨུ་པྤ་ཛྫ་ཏི. ཏ་སྨིཾ ནི་རུ་དྡྷེ ཨ་པ་ར་མྤི ཨེ་ཀ་མེ་ཝ ཨུ་པྤ་ཛྫ་ཏི, ཏ་སྨཱ ཨེ་ཀ་ཙཱ་རི. ན ཏེ ཀ་རི་སྶཾ ཝ་ཙ་ནཾ ཨི་དཱ་ནི་ཧནྟི ཡ་དི་པི པུ་བྦེ ཏ་ཝ ཝ་སེ ཨ་ནུ་ཝ་ཏྟིཾ, ཨི་དཱ་ནི པ་ན ས་ཏྠུ ཨོ་ཝཱ་དཾ ལ་དྡྷ་ཀཱ་ལ་ཏོ པ་ཊྛཱ་ཡ ཙི་ཏྟ་ཝ་སི་ཀོ ན བྷ་ཝི་སྶཱ་མི. ཀ་སྨཱ་ཏི ཙེ? དུ་ཀྑཱ ཧི ཀཱ་མཱ ཀ་ཊུ་ཀཱ མ་ཧ་བྦྷ་ཡཱ ཀཱ་མཱ ནཱ་མེ་ཏེ ཨ་ཏཱི་ཏེ་པི དུ་ཀྑཱ, ཨཱ་ཡ་ཏི་མྤི ཀ་ཊུ་ཀ་ཕ་ལཱ, ཨ་ཏྟཱ་ནུ་ཝཱ་དཱ་དི་བྷེ་དེ་ན མ་ཧ་ཏཱ བྷ་ཡེ་ན ཨ་ནུ་བ་ནྡྷ་ནྟཱ མ་ཧ་བྦྷ་ཡཱ. ནི་བྦཱ་ན་མེ་ཝཱ་བྷི་མ་ནོ ཙ་རི་སྶཾ ཏ་སྨཱ ནི་བྦཱ་ན་མེ་ཝ ཨུ་དྡི་སྶ ཨ་བྷི་མུ་ཁ་ཙི་ཏྟོ ཝི་ཧ་རི་སྶཾ.
ཏ་མེ་ཝ ནི་བྦཱ་ནཱ་བྷི་མུ་ཁ་བྷཱ་ཝཾ ད་སྶེ་ནྟོ ‘‘ནཱ་ཧཾ ཨ་ལ་ཀྑྱཱ’’ཏི་ཨཱ་དི་མཱ་ཧ. ཏ་ཏྠ ནཱ་ཧཾ ཨ་ལ་ཀྑྱཱཏི ཨ་ལ་ཀྑི་ཀ་ཏཱ་ཡ ནི་སྶི་རཱི་ཀ་ཏཱ་ཡ ནཱ་ཧཾ གེ་ཧ་ཏོ ནི་ཀྑ་མི་ནྟི ཡོ་ཛ་ནཱ.
ཨ་ཧི་རི་ཀྐ་ཏཱ་ཡཱཏི ཡ་ཐཱ་ཝ་ཛྫཾ ཀེ་ལི༹ཾ ཀ་རོ་ནྟོ ཝི་ཡ ནི་ལླ་ཛྫ་ཏཱ་ཡ. ཙི་ཏྟ་ཧེ་ཏཱུཏི ཨེ་ཀ་དཱ ནི་ག་ཎྛོ, ཨེ་ཀ་དཱ པ་རི་བྦཱ་ཛ་ཀཱ་དི་ཀོ ཧོ་ནྟོ ཨ་ན་ཝ་ཊྛི་ཏ་ཙི་ཏྟོ པུ་རི་སོ ཝི་ཡ ཙི་ཏྟ་ཝ་སི་ཀོ ཧུ་ཏྭཱ. དཱུ་ར་ཀ་ནྟ་ནཱཏི རཱ་ཛཱ་དཱི་ཧི མེ་ཏྟཾ ཀ་ཏྭཱ ཏེ་སུ དུ་བྦྷི་ཏྭཱ དུ་བྦྷི་བྷཱ་ཝེ་ན. ཨཱ་ཛཱི་ཝ་ཧེ་ཏཱུཏི ཨཱ་ཛཱི་ཝ་ཀཱ་ར་ཎཱ ཛཱི་ཝི་ཀཱ་པ་ཀ་ཏོ ཧུ་ཏྭཱ ཨཱ་ཛཱི་ཝི་ཀཱ་བྷ་ཡེ་ན ཨ་ཧཾ ན ནི་ཀྑ་མིཾ ན པ་བྦ་ཛིཾ. ཀ་ཏོ ཙ ཏེ, ཙི་ཏྟ, པ་ཊི་སྶ་ཝོ མ་ཡཱཏི, ‘‘པ་བྦ་ཛི་ཏ་ཀཱ་ལ་ཏོ པ་ཊྛཱ་ཡ ན ཏ་ཝ ཝ་སེ ཝ་ཏྟཱ་མི, མ་མེ་ཝ པ་ན ཝ་སེ ཝ་ཏྟཱ་མཱི’’ཏི, ཙི་ཏྟ, མ་ཡཱ ན་ནུ པ་ཊི་ཉྙཱ ཀ་ཏཱ་ཏི ད་སྶེ་ཏི.
ཨ་པྤི་ཙྪ་ཏཱ ས་པྤུ་རི་སེ་ཧི ཝ་ཎྞི་ཏཱཏི ‘‘པ་ཙྩ་ཡེ་སུ ས་བྦ་སོ ཨ་པྤི་ཙྪཱ ནཱ་མ སཱ་དྷཱུ’’ཏི བུ་དྡྷཱ་དཱི་ཧི པ་ས་ཊྛཱ, ཏ་ཐཱ མ་ཀྑ་པྤ་ཧཱ་ནཾ པ་རེ་སཾ གུ་ཎེ མ་ཀྑ་ན་སྶ པ་ཧཱ་ནཾ ཝཱུ་པ་ས་མོ ས་བྦ་སྶ དུ་ཀྑ་སྶ ཝཱུ་པ་ས་མོ ནི་བྦཱ་པ་ནཾ ས་པྤུ་རི་སེ་ཧི ཝ་ཎྞི་ཏཾ. ཨི་ཏི་སྶུ མཾ, ཙི་ཏྟ, ཏ་དཱ ནི་ཡུ་ཉྫ་སི, ‘‘ས་མྨ, ཏ་ཡཱ ཏེ་སུ གུ་ཎེ་སུ པ་ཏི་ཊྛཱ་ཏ་བྦ’’ནྟི, ཙི་ཏྟ, ཏྭཾ ཨེ་ཝཾ ཏ་དཱ ནི་ཡུ་ཉྫ་སི. ཨི་དཱ་ནི ཏྭཾ ག་ཙྪ་སི པུ་བྦ་ཙི་ཎྞཾ ཨི་དཱ་ནི མཾ ཏྭཾ པ་ཧཱ་ཡ ཨ་ཏྟ་ནོ པུ་རི་མཱ་ཙི་ཎྞཾ མ་ཧི་ཙྪ་ཏཱ་དིཾ པ་ཊི་པ་ཛྫ་སི, ཀིཾ ནཱ་མེ་ཏ་ནྟི ཨ་དྷི་པྤཱ་ཡོ.