༡༢. ཙཱུ་ལ༹་བྱཱུ་ཧ་སུ་ཏྟ་ནི་དྡེ་ས་ཝ་ཎྞ་ནཱ
དྭཱ་ད་ས་མེ ཙཱུ་ལ༹་བྱཱུ་ཧ་སུ་ཏྟ་ནི་དྡེ་སེ ས་ཀཾ་ས་ཀཾ་དི་ཊྛི་པ་རི་བྦ་སཱ་ནཱཏི ཨི་ད་མྤི ཏ་སྨིཾ་ཡེ་ཝ མ་ཧཱ་ས་མ་ཡེ ‘‘ས་བྦེ་པི་མེ དི་ཊྛི་ག་ཏི་ཀཱ ‘སཱ་དྷུ་རཱུ་པཱ་མྷཱ’ཏི བྷ་ཎ་ནྟི, ཀིཾ ནུ ཁོ སཱ་དྷུ་རཱུ་པཱ་ཝ ཨི་མེ ཨ་ཏྟ་ནོ ཨེ་ཝ དི་ཊྛི་ཡཱ པ་ཏི་ཊྛ་ཧ་ནྟི, ཨུ་དཱ་ཧུ ཨ་ཉྙ་མྤི དི་ཊྛིཾ ག་ཎྷ་ནྟཱི’’ཏི ཨུ་པྤ་ནྣ་ཙི་ཏྟཱ་ནཾ ཨེ་ཀ་ཙྩཱ་ནཾ དེ་ཝ་ཏཱ་ནཾ ཏ་མ་ཏྠཾ པ་ཀཱ་སེ་ཏུཾ པུ་རི་མ་ན་ཡེ་ནེ་ཝ ནི་མྨི་ཏ་བུ་དྡྷེ་ན ཨ་ཏྟཱ་ནཾ པུ་ཙྪཱ་པེ་ཏྭཱ ཝུ་ཏྟཾ.
༡༡༣. ཏ་ཏྠ ཨཱ་དི་ཏོ དྭེ་པི གཱ་ཐཱ པུ་ཙྪཱ་གཱ་ཐཱ་ཡེ་ཝ. ཏཱ་སུ ས་ཀཾ ས་ཀཾ དི་ཊྛི་པ་རི་བྦ་སཱ་ནཱཏི ཨ་ཏྟ་ནོ ཨ་ཏྟ་ནོ དི་ཊྛི་ཡཱ ཝ་ས་མཱ་ནཱ. ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟཱིཏི ཏཾ དི་ཊྛིཾ བ་ལ་ཝ་གྒཱ་ཧཾ ག་ཧེ་ཏྭཱ ‘‘ཏ་ཏྠ ཀུ་ས་ལཱ་མྷཱ’’ཏི པ་ཊི་ཛཱ་ན་མཱ་ནཱ པུ་ཐུ པུ་ཐུ ཝ་ད་ནྟི, ཨེ་ཀཾ ན ཝ་ད་ནྟི. ཡོ ཨེ་ཝཾ ཛཱ་ནཱ་ཏི ས ཝེ་དི དྷ་མྨཾ, ཨི་དཾ པ་ཊི་ཀྐོ་ས་མ་ཀེ་ཝ་ལཱི སོཏི ཏ་ཉྩ དི་ཊྛིཾ ས་ནྡྷཱ་ཡ ཡོ ཨེ་ཝཾ ཛཱ་ནཱ་ཏི, སོ དྷ་མྨཾ ཝེ་དི་ཡི. ཨི་དཾ པ་ན པ་ཊི་ཀྐོ་ས་ནྟོ ཧཱི་ནོ ཧོ་ཏཱི་ཏི ཙ ཝ་ད་ནྟི.
ནཱ་ནཱ ཝ་ད་ནྟཱིཏི ནཱ་ནཱ་ཀཱ་ར་ཎཾ བྷ་ཎ་ནྟི. ཝི་ཝི་དྷཾ ཝ་ད་ནྟཱིཏི ནཱ་ནཱ་ཝི་དྷཾ བྷ་ཎ་ནྟི. ཨ་ཉྙོ་ཉྙཾ ཝ་ད་ནྟཱིཏི ཨེ་ཀཾ ཨ་ཝ་ཏྭཱ ཨ་ཉྙཾ ཨ་ཉྙཾ ག་ཧེ་ཏྭཱ ཝ་ད་ནྟི. ཨ་ཀེ་ཝ་ལཱི སོཏི ཡོ ཨ་ཀུ་ས་ལོ ཨ་ཡཾ. ཨ་ས་མ་ཏྟོཏི ན པ་རི་པཱུ་རོ. ཨ་པ་རི་པུ་ཎྞོཏི ན ས་མྤུ་ཎྞོ.
༡༡༤. བཱ་ལོཏི ཧཱི་ནོ. ཨ་ཀྐུ་ས་ལོཏི ཨ་ཝི་དྭཱ.
༡༡༥. ཨི་དཱ་ནི ཏི་སྶོ ཝི་སྶ་ཛྫ་ན་གཱ་ཐཱ ཧོ་ནྟཱི་ཏི. ཏཱ པུ་རི་མ་ཌྜྷེ་ན ཝུ་ཏྟ་མ་ཏྠཾ པ་ཙྪི་མ་ཌྜྷེ་ན པ་ཊི་བྱཱུ་ཧི་ཏྭཱ ཋི་ཏཱ. ཏེ་ན བྱཱུ་ཧེ་ན ཨུ་ཏྟ་ར་སུ་ཏྟ་ཏོ ཙ ཨ་པྤ་ཀ་ཏྟཱ ཨི་དཾ སུ་ཏྟཾ ‘‘ཙཱུ་ལ༹་བྱཱུ་ཧ’’ནྟི ནཱ་མཾ ལ་བྷི. ཏ་ཏྠ པ་ཋ་མ་གཱ་ཐཱ་ཡཾ ཏཱ་ཝ པ་ར་སྶ ཙེ དྷ་མྨནྟི པ་ར་སྶ དི་ཊྛིཾ. ས་བྦེ་ཝི་མེ བཱ་ལཱཏི ཨེ་ཝཾ ས་ནྟེ ས་བྦེ་ཝ ཨི་མེ བཱ་ལཱ ཧོ་ནྟཱི་ཏི ཨ་དྷི་པྤཱ་ཡོ. ཀིཾ་ཀཱ་ར་ཎཱ? ས་བྦེ་ཝི་མེ དི་ཊྛི་པ་རི་བྦ་སཱ་ནཱཏི.
༡༡༦. ས་ནྡི་ཊྛི་ཡཱ ཙེ་ཝ ན ཝཱི་ཝ་དཱ་ཏཱ, སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱཏི ས་ཀཱ་ཡ དི་ཊྛི་ཡཱ ཨ་ན་ཝཱི་ཝ་དཱ་ཏཱ ཨ་ཝོ་དཱ་ཏཱ སཾ་ཀི་ལི་ཊྛཱ་ཝ ས་མཱ་ནཱ སཾ་སུ་དྡྷ་པ་ཉྙཱ ཙ ཀུ་ས་ལཱ ཙ མུ་ཏི་མ་ནྟོ ཙ ཏེ ཧོ་ནྟི ཙེ. ཨ་ཐ ཝཱ ‘‘ས་ནྡི་ཊྛི་ཡཱ ཙེ ཝ་དཱ་ཏཱ’’ཏི པཱ་ཋོ, ཏ་སྶ་ཏྠོ – ས་ཀཱ་ཡ པ་ན དི་ཊྛི་ཡཱ ཝོ་དཱ་ཏཱ སཾ་སུ་དྡྷ་པ་ཉྙཱ ཀུ་ས་ལཱ མུ་ཏི་མ་ནྟོ ཧོ་ནྟི ཙེ, ན ཏེ་སཾ ཀོ་ཙཱིཏི ཨེ་ཝཾ ས་ནྟེ ཏེ་སཾ ཨེ་ཀོ་པི ནི་ཧཱི་ན་པ་ཉྙོ ན ཧོ་ཏི, ཀིཾ་ཀཱ་ར་ཎཱ? དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱ, ཡ་ཐཱ ཨི་ཏ་རེ་ས་ནྟི.
༡༡༧. ན ཝཱ་ཧ་མེ་ཏནྟི གཱ་ཐཱ་ཡ ས་ངྑེ་པ་ཏྠོ – ཡཾ ཏེ མི་ཐུ དྭེ དྭེ ཛ་ནཱ ཨ་ཉྙ་མ་ཉྙཾ ‘‘བཱ་ལོ’’ཏི ཨཱ་ཧུ, ཨ་ཧཾ ཨེ་ཏཾ ཏ་ཐི་ཡནྟི ཏ་ཙྪ་ནྟི ནེ་ཝ བྲཱུ་མི. ཀིཾ་ཀཱ་ར་ཎཱ? ཡ་སྨཱ ས་བྦེ་ཝ ཏེ ས་ཀཾ ས་ཀཾ དི་ཊྛིཾ ‘‘ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ཨ་ཀཾ་སུ, ཏེ་ན ཙ ཀཱ་ར་ཎེ་ན པ་རཾ ‘‘བཱ་ལོ’’ཏི ད་ཧ་ནྟི. ཨེ་ཏྠ ཙ ཏ་ཐི་ཡཾ, ཏ་ཐེ་ཝ་ནྟི (སུ. ནི. ཨ་ཊྛ. ༢.༨༨༩) དྭེ་པི པཱ་ཋཱ.
ཏ་ཙྪནྟི ཨ་ཏུ་ཙྪཾ. ཏ་ཐནྟི ཨ་ཝི་པ་རཱི་ཏཾ, བྷཱུ་ཏནྟི ས་ནྟཾ. ཡཱ་ཐཱ་ཝནྟི སཾ་ཝི་ཛྫ་མཱ་ནཾ. ཨ་ཝི་པ་རི་ཏནྟི ན ཝི་ས་ངྐེ་ཏཾ.
༡༡༨. ཡ་མཱ་ཧཱུཏི པུ་ཙྪཱ་གཱ་ཐཱ་ཡ ‘‘ཡཾ དི་ཊྛིས་ཙྩཾ ཏ་ཐི་ཡ’’ནྟི ཨེ་ཀེ ཨཱ་ཧུ.
༡༡༩. ཨེ་ཀ་ཉྷི ས་ཙྩནྟི ཝི་སྶ་ཛྫ་ན་གཱ་ཐཱ་ཡ ཨེ་ཀཾ ས་ཙྩཾ ནི་རོ་དྷོ མ་གྒོ ཝཱ. ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནནྟི ཡ་མྷི ས་ཙྩེ པ་ཛཱ་ན་ནྟོ པ་ཛཱ ནོ ཝི་ཝ་དེ་ཡྻུཾ. ས་ཡཾ ཐུ་ན་ནྟཱིཏི ཨ་ཏྟ་ནཱ ཝ་ད་ནྟི.
༡༢༠. ཀ་སྨཱ ནཱུཏི པུ་ཙྪཱ་གཱ་ཐཱ་ཡ པ་ཝཱ་དི་ཡཱ་སེཏི ཝཱ་དི་ནོ. ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟཱིཏི ཏེ ཝཱ་དི་ནོ ཨུ་དཱ་ཧུ ཨ་ཏྟ་ནོ ཏ་ཀྐ་མ་ཏྟཾ ཨ་ནུ་ག་ཙྪ་ནྟི.
ཏ་ཀྐ་པ་རི་ཡཱ་ཧ་ཏནྟི ཝི་ཏ་ཀྐེ་ན ས་མ་ནྟ་ཏོ ཨཱ་ཧ་ཏཾ. ཝཱི་མཾ་སཱ་ནུ་ཙ་རི་ཏནྟི ཨ་ཏྟ་ནོ ཨུ་པ་ཊྛི་ཏ་པ་ཉྙཱ་ཡ ཝི་ཙ་རི་ཏཾ. ས་ཡཾ་པ་ཊི་བྷཱ་ནནྟི ཨ་ཏྟ་ནོ པ་ཊི་བྷཱ་ནཾ.
༡༢༡. ན ཧེ་ཝཱཏི ཝི་སྶ་ཛྫ་ན་གཱ་ཐཱ་ཡ ཨ་ཉྙ་ཏྲ ས་ཉྙཱ་ཡ ནི་ཙྩཱ་ནཱིཏི ཋ་པེ་ཏྭཱ ས་ཉྙཱ་མ་ཏྟེ་ན ནི་ཙྩ་ནྟི ག་ཧི་ཏ་གྒ་ཧ་ཎཱ་ནི. ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱཏི ཨ་ཏྟ་ནོ ནི་ཙྩ་ས་ངྐ་པྤ་མ་ཏྟཾ དི་ཊྛཱི་སུ ཛ་ནེ་ཏྭཱ.
ཡ་སྨཱ པ་ན དི་ཊྛཱི་སུ ཝི་ཏ་ཀྐཾ ཛ་ནེ་ནྟཱ དི་ཊྛི་ཡོ ས་ཉྫ་ནེ་ནྟི, ཏ་སྨཱ ཝུ་ཏྟཾ ‘‘དི་ཊྛི་ག་ཏཱ་ནི ཛ་ནེ་ནྟི ས་ཉྫ་ནེ་ནྟཱི’’ཏི་ཨཱ་དི. ཛ་ནེ་ནྟཱིཏི ཨུ་པ་རཱུ་པ་རི དི་ཊྛིཾ ཨུ་པྤཱ་དེ་ནྟཱ ཛ་ནེ་ནྟི. ས་ཉྫ་ནེ་ནྟཱིཏི་ཨཱ་དཱི་ནི ཨུ་པ་ས་གྒ་ཝ་སེ་ན པ་དཾ ཝ་ཌྜྷེ་ཏྭཱ ཝུ་ཏྟཱ་ནི. མ་ཡ྄ཧཾ ས་ཙྩནྟི མ་མ ཝ་ཙ་ནཾ ཏ་ཙྪཾ.
༡༢༢. ཨི་དཱ་ནི ཨེ་ཝཾ ནཱ་ནཱ་ས་ཙྩེ་སུ ཨ་ས་ནྟེ་སུ ཏ་ཀྐ་མ་ཏྟཾ ཨ་ནུ་སྶ་ར་ནྟཱ་ནཾ དི་ཊྛི་ག་ཏི་ཀཱ་ནཾ ཝི་པྤ་ཊི་པ་ཏྟིཾ ད་སྶེ་ཏུཾ ‘‘དི་ཊྛེ སུ་ཏེ’’ཏི་ཨཱ་དི་ཀཱ གཱ་ཐཱ་ཡོ ཨ་བྷཱ་སི. ཏ་ཏྠ དི་ཊྛེཏི དི་ཊྛཾ, དི་ཊྛ་སུ་དྡྷི་ནྟི ཨ་དྷི་པྤཱ་ཡོ. ཨེ་ས ན་ཡོ སུ་ཏཱ་དཱི་སུ. ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱིཏི ཨེ་ཏེ དི་ཊྛི་དྷ་མྨེ ནི་སྶ་ཡི་ཏྭཱ སུ་དྡྷི་བྷཱ་ཝ་ས་ངྑཱ་ཏཾ ཝི་མཱ་ནཾ ཨ་ས་མྨཱ་ནཾ པ་སྶ་ནྟོ་པི. ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧཱཏི ཨེ་ཝཾ ཝི་མཱ་ན་ད་སྶཱི་པི ཏ་སྨིཾ དི་ཊྛི་ཝི་ནི་ཙྪ་ཡེ ཋ་ཏྭཱ ཏུ་ཊྛི་ཛཱ་ཏོ ཧཱ་ས་ཛཱ་ཏོ ཧུ་ཏྭཱ པ་རོ ‘‘ཧཱི་ནོ ཙ ཨ་ཝི་དྭཱ ཙཱ’’ཏི ཨེ་ཝཾ ཝ་ད་ཏི་ཡེ་ཝ.
ན ས་མྨཱ་ནེ་ཏཱི་ཏི་པི ཝི་མཱ་ན་ད་སྶཱིཏི ན བ་ཧུ་མཱ་ནཾ ཀ་རོ་ཏཱི་ཏི ཨེ་ཝ་མྤི ཝི་མཱ་ན་ད་སྶཱི ན བ་ཧུ་མཱ་ན་ད་སྶཱི. དོ་མ་ན་སྶཾ ཛ་ནེ་ཏཱིཏི པ་ཋ་མཾ དི་ཊྛི་ནི་སྶ་ཡཾ ཨ་ལླཱི་ཡི་ཏྭཱ དོ་མ་ན་སྶཾ པ་ཏྭཱ པ་ཙྪཱ དི་ཊྛི་ཝི་ནི་ཙྪ་ཡེ ཋི་ཏ་ཀཱ་ལེ སོ་མ་ན་སྶཾ ཨུ་པྤཱ་དེ་ཏཱི་ཏི ཨ་ཏྠོ.
ཝི་ནི་ཙྪ་ཡ་དི་ཊྛི་ཡཱ ཋ་ཏྭཱཏི ས་ནྣི་ཊྛཱ་ནཾ ཀ་ཏྭཱ ག་ཧི་ཏ་དི་ཊྛི་ཡཱ ཋ་ཏྭཱ.
༡༢༣. ཨེ་ཝཾ ས་ནྟེ ཡེ་ནེ་ཝཱཏི གཱ་ཐཱ. ཏ་ཏྠ ས་ཡ་མ་ཏྟ་ནཱཏི ས་ཡ་མེ་ཝ ཨ་ཏྟཱ་ནཾ. ཝི་མཱ་ནེ་ཏཱིཏི ག་ར་ཧ་ཏི. ཏ་དེ་ཝ པཱ་ཝཱཏི ཏ་དེ་ཝ ཝ་ཙ་ནཾ དི་ཊྛིཾ ཝ་ད་ཏི, ཏཾ ཝཱ པུ་གྒ་ལཾ.
༡༢༤. ཨ་ཏི་སཱ་ར་དི་ཊྛི་ཡཱཏི གཱ་ཐཱ་ཡ་ཏྠོ – སོ ཨེ་ཝཾ ཏཱ་ཡ ལ་ཀྑ་ཎཱ་ཏི་སཱ་རི་ནི་ཡཱ ཨ་ཏི་སཱ་ར་དི་ཊྛི་ཡཱ ས་མ་ཏྟོ པ་རི་པུ་ཎྞོ ཨུ་དྡྷུ་མཱ་ཏོ, ཏེ་ན ཙ དི་ཊྛིམཱ་ནེ་ན མ་ཏྟོ ‘‘པ་རི་པུ་ཎྞོ ཨ་ཧཾ ཀེ་ཝ་ལཱི’’ཏི ཨེ་ཝཾ པ་རི་པུ་ཎྞ་མཱ་ནཱི. ས་ཡ་མེ་ཝ ཨ་ཏྟཱ་ནཾ མ་ན་སཱ ‘‘ཨ་ཧཾ པ་ཎྜི་ཏོ’’ཏི ཨ་བྷི་སི་ཉྩ་ཏི. ཀིཾ་ཀཱ་ར་ཎཱ? དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱཏི.
ས་བྦཱ ཏཱ དི་ཊྛི་ཡོ ལ་ཀྑ་ཎཱ་ཏི་ཀྐ་ནྟཱཏི ཏཱ ས་བྦཱ དྭཱ་ས་ཊྛི་དི་ཊྛི་ཡོ ལ་ཀྑ་ཎཾ ཨ་ཏཱི་ཏཱ ཨ་ཏི་ས་ར་ནྟཱི་ཏི ཨ་ཏི་ཀྐ་ནྟཱ. ཨ་ནོ་མོཏི ཨ་ནཱུ་ནོ.
༡༢༥. པ་ར་སྶ ཙེཏི གཱ་ཐཱ་ཡ ས་མྦ་ནྡྷོ ཨ་ཏྠོ ཙ – ཀི་ཉྩ བྷི་ཡྻོ? ཡོ སོ ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ ‘‘བཱ་ལོ པ་རོ ཨ་ཀྐུ་ས་ལོ’’ཏི ཙཱ་ཧ, ཏ་སྶ པ་ར་སྶ ཙེ ཧི ཝ་ཙ་སཱ སོ ཏེ་ན ཝུ་ཙྩ་མཱ་ནོ ནི་ཧཱི་ནོ ཧོ་ཏི, ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོ, སོ་པི ཏེ་ནེ་ཝ ས་ཧ ནི་ཧཱི་ན་པ་ཉྙོ ཧོ་ཏི. སོ་པི ཧི ཏཾ ‘‘བཱ་ལོ’’ཏི ཝ་ད་ཏི. ཨ་ཐ ཏ་སྶ ཝ་ཙ་ནཾ ཨ་པྤ་མཱ་ཎཾ, སོ པ་ན ས་ཡ་མེ་ཝ ཝེ་ད་གཱུ ཙ དྷཱི་རོ ཙ ཧོ་ཏི. ཨེ་ཝཾ ས་ནྟེ ན ཀོ་ཙི བཱ་ལོ ས་མ་ཎེ་སུ ཨ་ཏྠི. ས་བྦེ་པི ཧི ཏེ ཨ་ཏྟ་ནོ ཨི་ཙྪཱ་ཡ པ་ཎྜི་ཏཱ.
ཝཱ་ཙཱ་ཡཱཏི ཀ་ཐ་ནེ་ན. ཝ་ཙ་ནེ་ནཱཏི བྷཱ་སི་ཏེ་ན. ནི་ནྡི་ཏ་ཀཱ་ར་ཎཱཏི ག་ར་ཧ་ཧེ་ཏུ་ནཱ. ག་ར་ཧི་ཏ་ཀཱ་ར་ཎཱཏི ཨ་ཝ་ཉྙཱ་ཏ་ཧེ་ཏུ་ནཱ. ཨུ་པ་ཝ་དི་ཏ་ཀཱ་ར་ཎཱཏི ཨུ་པ་ཝཱ་ད་ཧེ་ཏུ་ནཱ.
༡༢༦. ཨ་ཉྙཾ ཨི་ཏོཏི གཱ་ཐཱ་ཡ ས་མྦ་ནྡྷོ ཨ་ཏྠོ ཙ – ‘‘ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ. ན ཀོ་ཙི བཱ་ལོ ས་མ་ཎེ་སུ ཨ་ཏྠཱི’’ཏི ཨེ་ཝ་ཉྷི ཝུ་ཏྟེ་པི སི་ཡཱ ཀ་སྶ་ཙི ‘‘ཀ་སྨཱ’’ཏི. ཏ་ཏྠ ཝུ་ཙྩ་ཏེ – ཡ་སྨཱ ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེ. ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟི, ཡེ ཨི་ཏོ ཨ་ཉྙཾ དི་ཊྛིཾ ཨ་བྷི་ཝ་ད་ནྟི, ཏེ ཨ་པ་ར་དྡྷཱ ཝི་ར་དྡྷཱ སུ་དྡྷི་མ་གྒཾ, ཨ་ཀེ་ཝ་ལི་ནོ ཙ ཏེ་ཏི ཨེ་ཝཾ པུ་ཐུ་ཏི་ཏྠི་ཡཱ ཡ་སྨཱ ཝ་ད་ནྟཱི་ཏི ཝུ་ཏྟཾ ཧོ་ཏི. ཀ་སྨཱ པ་ནེ་ཝཾ ཝ་ད་ནྟཱི་ཏི ཙེ? ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱ, ཡ་སྨཱ ས་ཀེ་ན དི་ཊྛི་རཱ་གེ་ན ཏེ ཨ་བྷི་ར་ཏྟཱ་ཏི ཝུ་ཏྟཾ ཧོ་ཏི.
ཏེ སུ་དྡྷི་མ་གྒནྟི ཏེ ཨ་ཉྙ་ཏི་ཏྠི་ཡཱ ཨ་ཀི་ལི་ཊྛ་མ་གྒཾ. ཝི་སུ་དྡྷི་མ་གྒནྟི ནི་དྡོ་ས་མ་གྒཾ. པ་རི་སུ་དྡྷི་མ་གྒནྟི སུ་ཀྐ་མ་གྒཾ. ཝོ་དཱ་ཏ་མ་གྒནྟི པ་ཎྜ་ར་མ་གྒཾ. པ་རི་ཡོ་དཱ་ཏ་མ་གྒནྟི པ་བྷཱ་ཝ་ནྟ་མ་གྒཾ. ཝི་ར་དྡྷཱཏི ཝུ་ཏྟ་ཝི་དྷི་ནཱ མ་གྒེ་ན ཝི་ར་ཛ྄ཛྷི་ཏྭཱ ཋི་ཏཱ. ཨ་པ་ར་དྡྷཱཏི ཨ་པ་ར་ཛ྄ཛྷི་ཏྭཱ ཋི་ཏཱ. ཁ་ལི་ཏཱཏི པ་རི་ཧཱི་ནཱ. ག་ལི་ཏཱཏི ཏ་ཏོ བྷ་ཊྛཱ. ཨ་ཉྙཱ་ཡཱཏི ཨ་ཉྙཱ་ཎེ་ན. ཨ་པ་ར་དྡྷཱཏི པ་རཱ་ཛ་ཡ་མཱ་པ་ནྣཱ. ཨ་ཐ ཝཱ ‘‘ཉཱ་ཡཱ་པ་ར་དྡྷཱ’’ཏི་པི པཱ་ཋོ. ཉཱ་ཡེ་ན མ་གྒེ་ན ཝི་ར་དྡྷཱ་ཏི ཨ་ཏྠོ.
༡༢༧. ཨེ་ཝཾ ཨ་བྷི་ར་ཏྟཱ ཙ – ཨི་དྷེ་ཝ སུ་དྡྷིནྟི གཱ་ཐཱ. ཏ་ཏྠ ས་ཀཱ་ཡ་ནེཏི ས་ཀ་མ་གྒེ. ད་ལ༹ྷཾ ཝ་དཱ་ནཱཏི ད་ལ༹ྷ་ཝཱ་དཱ.
ཐི་ར་ཝཱ་དཱཏི ས་ནྣི་ཊྛཱ་ན་ཝཱ་དཱ. བ་ལི་ཀ་ཝཱ་དཱཏི བ་ལ་ཝ་ནྟ་ཝཱ་དཱ. ཨ་ཝ་ཊྛི་ཏ་ཝཱ་དཱཏི པ་ཏི་ཊྛ་ཧི་ཏྭཱ ཀ་ཐི་ཏ་ཝཱ་དཱ.
༡༢༨. ཡེ ཨེ་ཝ་ཉྩ ད་ལ༹ྷ་ཝཱ་དཱ, ཏེ་སུ ཡོ ཀོ་ཙི ཏི་ཏྠི་ཡོ ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོ ཀ་མེ་ཏྠ བཱ་ལོ་ཏི པ་རཾ ད་ཧེ་ཡྻ, ས་ངྑེ་པ་ཏོ ཏ་ཏྠ ས་སྶ་ཏུ་ཙྪེ་ད་ས་ངྑཱ་ཏེ ཝི་ཏྠཱ་ར་ཏོ ན་ཏྠི་ཀ་ཨི་སྶ་ར་ཀཱ་ར་ཀ་ནི་ཡ་ཏི་ཨཱ་དི་བྷེ་དེ ས་ཀེ ཨ་ཡ་ནེ ‘‘ཨི་ད་མེ་ཝ ས་ཙྩ’’ནྟི ད་ལ༹ྷཾ ཝ་དཱ་ནོ ཀཾ པ་རཾ ཨེ་ཏྠ དི་ཊྛི་ག་ཏེ ‘‘བཱ་ལོ’’ཏི ས་ཧ དྷ་མྨེ་ན པ་སྶེ་ཡྻ, ན་ནུ ས་བྦོ་པི ཏ་སྶ མ་ཏེ་ན པ་ཎྜི་ཏོ ཨེ་ཝ སུ་པྤ་ཊི་པ་ནྣོ ཨེ་ཝ ཙ. ཨེ་ཝཾ ས་ནྟེ ས་ཡ་མེ་ཝ སོ མེ་དྷ་ག་མཱ་ཝ་ཧེ་ཡྻ, པ་རཾ ཝ་དཾ བཱ་ལ་མ་སུ་དྡྷི་དྷ་མྨཾ. སོ་པི པ་རཾ ‘‘བཱ་ལོ ཙ ཨ་སུ་དྡྷི་དྷ་མྨོ ཙ ཨ་ཡ’’ནྟི ཝ་ད་ནྟོ ཨ་ཏྟ་ནཱ་ཝ ཀ་ལ་ཧཾ ཨཱ་ཝ་ཧེ་ཡྻ. ཀ་སྨཱ? ཡ་སྨཱ ས་བྦོ་པི ཏ་སྶ མ་ཏེ་ན པ་ཎྜི་ཏོ་ཡེ་ཝ སུ་པྤ་ཊི་པ་ནྣོ་ཡེ་ཝ ཙ.
༡༢༩. ཨེ་ཝཾ ས་བྦ་ཐཱ་པི ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡ, ཨུ་དྡྷཾ ས ལོ་ཀ་སྨིཾ ཝི་ཝཱ་ད་མེ་ཏཱིཏི དི་ཊྛི་ཡཱ ཋ་ཏྭཱ ས་ཡ་ཉྩ ས་ཏྠཱ་རཱ་དིཾ མི་ནི་ཏྭཱ སོ བྷི་ཡྻོ ཝི་ཝཱ་ད་མེ་ཏཱི་ཏི. ཨེ་ཝཾ པ་ན ཝི་ནི་ཙྪ་ཡེ་སུ ཨཱ་དཱི་ན་ཝཾ ཉ་ཏྭཱ ཨ་རི་ཡ་མ་གྒེ་ན ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནི, ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེཏི ཨ་ར་ཧ་ཏྟ་ནི་ཀཱུ་ཊེ་ན དེ་ས་ནཾ ནི་ཊྛཱ་པེ་སི.
ས་ཡཾ པ་མཱ་ཡཱཏི ཨ་ཏྟ་ནཱ མི་ནི་ཏྭཱ. པ་མི་ནི་ཏྭཱཏི པ་མཱ་ཎཾ ཀ་ཏྭཱ. ‘‘པ་ཝི་ནེ་ཏྭཱ’’ཏི་པི པཱ་ཋོ, ཏཾ ན སུ་ནྡ་རཾ. ཨུ་དྡྷཾ ཝཱ་དེ་ན ས་དྡྷིནྟི ཨ་ཏྟ་ནོ ཨུ་པ་རི ཀ་ཐེ་ནྟེ་ན ས་ཧ. དེ་ས་ནཱ་པ་རི་ཡོ་སཱ་ནེ པུ་རཱ་བྷེ་ད་སུ་ཏྟེ (མ་ཧཱ་ནི. ༨༣) ཝུ་ཏྟ་ས་དི་སོ ཨེ་ཝ ཨ་བྷི་ས་མ་ཡོ ཨ་ཧོ་སཱི་ཏི.
ས་དྡྷ་མྨ་པྤ་ཛྫོ་ཏི་ཀཱ་ཡ མ་ཧཱ་ནི་དྡེ་ས་ཊྛ་ཀ་ཐཱ་ཡ
ཙཱུ་ལ༹་བྱཱུ་ཧ་སུ་ཏྟ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.