༦. ཨུ་ཏྟ་ར་ཏྠེ་ར་ཨ་པ་དཱ་ན་ཝ་ཎྞ་ནཱ
ཚ་ཊྛཱ་པ་དཱ་ནེ སུ་མེ་དྷོ ནཱ་མ ས་མྦུ་དྡྷོཏི་ཨཱ་དི་ཀཾ ཨཱ་ཡ་སྨ་ཏོ ཨུ་ཏྟ་ར་སཱ་མ་ཎེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ སུ་མེ་དྷ་སྶ བྷ་ག་ཝ་ཏོ ཀཱ་ལེ ཝི་ཛྫཱ་དྷ་རོ ཧུ་ཏྭཱ ཨཱ་ཀཱ་སེ་ན ཝི་ཙ་ར་ཏི. ཏེ་ན ཙ ས་མ་ཡེ་ན ས་ཏྠཱ ཏ་སྶེ་ཝ ཨ་ནུ་གྒ་ཎྷ་ན་ཏྠཾ ཝ་ན་ནྟ་རེ ཨ་ཉྙ་ཏ་ར་སྨིཾ རུ་ཀྑ་མཱུ་ལེ ནི་སཱི་དི ཚ་བྦ་ཎྞ་བུ་དྡྷ་རཾ་སི་ཡོ ཝི་སྶ་ཛྫེ་ནྟོ. སོ ཨ་ནྟ་ལི་ཀྑེ་ན ག་ཙྪ་ནྟོ བྷ་ག་ཝ་ནྟཾ དི་སྭཱ པ་ས་ནྣ་མཱ་ན་སོ ཨཱ་ཀཱ་ས་ཏོ ཨོ་རུ་ཡ྄ཧ སུ་ཝི་སུ་དྡྷེ་ཧི ཝི་པུ་ལེ་ཧི ཀ་ཎི་ཀཱ་ར་པུ་པྥེ་ཧི བྷ་ག་ཝ་ནྟཾ པཱུ་ཛེ་སི, པུ་པྥཱ་ནི བུ་དྡྷཱ་ནུ་བྷཱ་ཝེ་ན ས་ཏྠུ ཨུ་པ་རི ཚ་ཏྟཱ་ཀཱ་རེ་ན ཨ་ཊྛཾ་སུ, སོ ཏེ་ན བྷི་ཡྻོ་སོ་མ་ཏྟཱ་ཡ པ་ས་ནྣ་ཙི་ཏྟོ ཧུ་ཏྭཱ ཨ་པ་ར་བྷཱ་གེ ཀཱ་ལཾ ཀ་ཏྭཱ ཏཱ་ཝ་ཏིཾ་སེ་སུ ནི་བྦ་ཏྟི་ཏྭཱ དི་བྦ་ས་མྤ་ཏྟིཾ ཨ་ནུ་བྷ་ཝ་ནྟོ ཡཱ་ཝ་ཏཱ་ཡུ་ཀཾ ཏ་ཏྠ ཋ་ཏྭཱ ཏ་ཏོ ཙུ་ཏོ དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ རཱ་ཛ་ག་ཧེ བྲཱ་ཧྨ་ཎ་མ་ཧཱ་སཱ་ལ་སྶ པུ་ཏྟོ ཧུ་ཏྭཱ ནི་བྦ་ཏྟི, ཨུ་ཏྟ་རོཏི་སྶ ནཱ་མཾ ཨ་ཧོ་སི. སོ ཝི་ཉྙུ་ཏཾ པ་ཏྟོ བྲཱ་ཧྨ་ཎ་ཝི་ཛྫཱ་སུ ནི་པྥ་ཏྟིཾ ག་ནྟྭཱ ཛཱ་ཏི་ཡཱ རཱུ་པེ་ན ཝི་ཛྫཱ་ཡ ཝ་ཡེ་ན སཱི་ལཱ་ཙཱ་རེ་ན ཙ ལོ་ཀ་སྶ ས་མྦྷཱ་ཝ་ནཱི་ཡོ ཛཱ་ཏོ.
ཏ་སྶ ཏཾ ས་མྤ་ཏྟིཾ དི་སྭཱ ཝ་སྶ་ཀཱ་རོ མ་ག་དྷ་མ་ཧཱ་མ་ཏྟོ ཨ་ཏྟ་ནོ དྷཱི་ཏ་རཾ དཱ་ཏུ་ཀཱ་མོ ཧུ་ཏྭཱ ཨ་ཏྟ་ནོ ཨ་དྷི་པྤཱ་ཡཾ པ་ཝེ་དེ་སི. སོ ནི་སྶ་ར་ཎ་ཛ྄ཛྷཱ་ས་ཡ་ཏཱ་ཡ ཏཾ པ་ཊི་ཀྑི་པི་ཏྭཱ ཀཱ་ལེ་ན ཀཱ་ལཾ དྷ་མྨ་སེ་ནཱ་པ་ཏིཾ པ་ཡི་རུ་པཱ་ས་ནྟོ ཏ་སྶ ས་ནྟི་ཀེ དྷ་མྨཾ སུ་ཏྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏྭཱ ཝ་ཏྟ་ས་མྤ་ནྣོ ཧུ་ཏྭཱ ཐེ་རཾ ཨུ་པ་ཊྛ་ཧ་ཏི.
ཏེ་ན ཙ ས་མ་ཡེ་ན ཐེ་ར་སྶ ཨ་ཉྙ་ཏ་རོ ཨཱ་བཱ་དྷོ ཨུ་པྤ་ནྣོ, ཏ་སྶ བྷེ་ས་ཛྫ་ཏྠཱ་ཡ ཨུ་ཏྟ་རོ སཱ་མ་ཎེ་རོ པཱ་ཏོ་ཝ པ་ཏྟ་ཙཱི་ཝ་ར་མཱ་དཱ་ཡ ཝི་ཧཱ་ར་ཏོ ནི་ཀྑ་ནྟོ ཨ་ནྟ་རཱ་མ་གྒེ ཏ་ལཱ༹་ཀ་སྶ ས་མཱི་པེ པ་ཏྟཾ ཋ་པེ་ཏྭཱ ཨུ་ད་ཀ་ས་མཱི་པཾ ག་ནྟྭཱ མུ་ཁཾ དྷོ་ཝ་ཏི. ཨ་ཐ ཨ་ཉྙ་ཏ་རོ ཨུ་མ་ངྒ་ཙོ་རོ ཀ་ཏ་ཀ་མྨོ ཨཱ་ར་ཀྑ་པུ་རི་སེ་ཧི ཨ་ནུ་བ་དྡྷོ ཨ་གྒ་མ་གྒེ་ན ན་ག་ར་ཏོ ནི་ཀྑ་མི་ཏྭཱ པ་ལཱ་ཡ་ནྟོ ཨ་ཏྟ་ནཱ ག་ཧི་ཏཾ ར་ཏ་ན་བྷ་ཎྜི་ཏཾ སཱ་མ་ཎེ་ར་སྶ པ་ཏྟེ པ་ཀྑི་པི་ཏྭཱ པ་ལཱ་ཡི. སཱ་མ་ཎེ་རོ་པི པ་ཏྟ་ས་མཱི་པཾ ཨུ་པ་ག་ཏོ. ཙོ་རཾ ཨ་ནུ་བ་ནྡྷ་ནྟཱ རཱ་ཛ་པུ་རི་སཱ སཱ་མ་ཎེ་ར་སྶ པ་ཏྟེ བྷ་ཎྜི་ཀཾ དི་སྭཱ ‘‘ཨ་ཡཾ ཙོ་རོ, ཨི་མི་ནཱ ཙོ་རི་ཡཾ ཀ་ཏ’’ནྟི སཱ་མ་ཎེ་རཾ པ་ཙྪཱ་བཱ་ཧཾ བ་ནྡྷི་ཏྭཱ ཝ་སྶ་ཀཱ་ར་སྶ བྲཱ་ཧྨ་ཎ་སྶ ད་སྶེ་སུཾ. ཝ་སྶ་ཀཱ་རོ ཙ ཏ་དཱ ར་ཉྙོ ཝི་ནི་ཙྪ་ཡེ ནི་ཡུ་ཏྟོ ཧུ་ཏྭཱ ཚེ་ཛྫ་བྷེ་ཛྫཾ ཨ་ནུ་སཱ་ས་ཏི, སོ ‘‘པུ་བྦེ མ་མ ཝ་ཙ་ནཾ ནཱ་དི་ཡི, སུ་དྡྷ་པཱ་ས་ཎྜི་ཡེ་སུ པ་བྦ་ཛཱི’’ཏི (ཐེ་ར་གཱ. ཨ་ཊྛ. ༡.ཨུ་ཏྟ་ར་ཏྠེ་ར་གཱ་ཐཱ་ཝ་ཎྞ་ནཱ) ཀ་མྨཾ ཨ་སོ་དྷེ་ཏྭཱ གྷཱ་ཏུ་ཀཱ་མ་ཏྟཱ་ཝ ཛཱི་ཝ་ནྟ་མེ་ཝ ཏཾ སཱུ་ལེ ཨུ་ཏྟཱ་སེ་སི.
ཨ་ཐ་སྶ བྷ་ག་ཝཱ ཉཱ་ཎ་པ་རི་པཱ་ཀཾ ཨོ་ལོ་ཀེ་ཏྭཱ ཏཾ ཋཱ་ནཾ ག་ནྟྭཱ ཝི་པྥུ་ར་ནྟ་ཧ་ཏྠ་ན་ཁ་མ་ཎི་མ་ཡཱུ་ཁ་ས་མྦྷི་ནྣ་སི་ཏཱ་བྷ་ཏཱ་ཡ པ་གྒྷ་ར་ནྟ་ཛཱ་ཏི་ཧི་ངྒུ་ལ་ཀ་སུ་ཝ་ཎྞ་ར་ས་དྷཱ་རཾ ཝི་ཡ ཛཱ་ལཱ་གུ་ཎྛི་ཏ་མུ་དུ་ཏ་ལུ་ན་དཱི་གྷ་ངྒུ་ལི་ཧ་ཏྠཾ ཨུ་ཏྟ་ར་སྶ སཱི་སེ ཋ་པེ་ཏྭཱ ‘‘ཨུ་ཏྟ་ར, ཨི་དཾ ཏེ པུ་རི་མ་ཀ་མྨ་སྶ ཕ་ལཾ ཨུ་པྤ་ནྣཾ, ཏ་ཏྠ ཏ་ཡཱ པ་ཙྩ་ཝེ་ཀྑ་ཎ་བ་ལེ་ན ཨ་དྷི་ཝཱ་ས་ནཱ ཀཱ་ཏ་བྦཱ’’ཏི ཝ་ཏྭཱ ཨ་ཛ྄ཛྷཱ་ས་ཡཱ་ནུ་རཱུ་པཾ དྷ་མྨཾ དེ་སེ་སི. ཨུ་ཏྟ་རོ ཨ་མ་ཏཱ་བྷི་སེ་ཀ་ས་དི་སེ་ན ས་ཏྠུ ཧ་ཏྠ་ས་མྥ་སྶེ་ན ས་ཉྫཱ་ཏ་པྤ་སཱ་ད་སོ་མ་ན་སྶ་ཏཱ་ཡ ཨུ་ལཱ༹་ར་པཱི་ཏི་པཱ་མོ་ཛྫཾ པ་ཊི་ལ་བྷི་ཏྭཱ ཡ་ཐཱ་པ་རི་ཙི་ཏཾ ཝི་པ་སྶ་ནཱ་མ་གྒཾ ས་མཱ་རཱུ་ལ༹ྷོ ཉཱ་ཎ་སྶ པ་རི་པཱ་ཀཾ ག་ཏ་ཏྟཱ ས་ཏྠུ ཙ དེ་ས་ནཱ་ཝི་ལཱ་སེ་ན ཏཱ་ཝ་དེ་ཝ མ་གྒ་པ་ཊི་པཱ་ཊི་ཡཱ ས་བྦེ ཀི་ལེ་སེ ཁེ་པེ་ཏྭཱ ཚ་ལ༹་བྷི་ཉྙོ ཨ་ཧོ་སི. ཚ་ལ༹་བྷི་ཉྙོ པ་ན ཧུ་ཏྭཱ སཱུ་ལ་ཏོ ཨུ་ཊྛ་ཧི་ཏྭཱ པ་རཱ་ནུ་དྡ་ཡཱ་ཡ ཨཱ་ཀཱ་སེ ཋ་ཏྭཱ པཱ་ཊི་ཧཱ་རི་ཡཾ ད་སྶེ་སི. མ་ཧཱ་ཛ་ནོ ཨ་ཙྪ་རི་ཡ་བྦྷུ་ཏ་ཙི་ཏྟ་ཛཱ་ཏོ ཨ་ཧོ་སི. ཏཱ་ཝ་དེ་ཝ་སྶ ཝ་ཎོ སཾ་རཱུ་ལ༹ྷི, སོ བྷི་ཀྑཱུ་ཧི, ‘‘ཨཱ་ཝུ་སོ, ཏཱ་དི་ས་དུ་ཀྑཾ ཨ་ནུ་བྷ་ཝ་ནྟོ ཀ་ཐཾ ཏྭཾ ཝི་པ་སྶ་ནཾ ཨ་ནུ་ཡུ་ཉྫི་ཏུཾ ཨ་ས་ཀྑཱི’’ཏི པུ་ཊྛོ, ‘‘པ་གེ་ཝ མེ, ཨཱ་ཝུ་སོ, སཾ་སཱ་རེ ཨཱ་དཱི་ན་ཝོ, ས་ངྑཱ་རཱ་ན་ཉྩ ས་བྷཱ་ཝོ སུ་དི་ཊྛོ, ཨེ་ཝཱ་ཧཾ ཏཱ་དི་སཾ དུ་ཀྑཾ ཨ་ནུ་བྷ་ཝ་ནྟོ་པི ཨ་ས་ཀྑིཾ ཝི་པ་སྶ་ནཾ ཝ་ཌྜྷེ་ཏྭཱ ཝི་སེ་སཾ ཨ་དྷི་ག་ནྟུ’’ནྟི ཨཱ་ཧ. ‘‘པུ་བྦ་ཛཱ་ཏི་ཡཱ ད་ཧ་ར་ཀཱ་ལེ མ་ཀྑི་ཀཾ ག་ཧེ་ཏྭཱ ནི་མྦ་སཱུ་ལ་ཀཾ ག་ཧེ་ཏྭཱ སཱུ་ལཱ་རོ་པ་ན་ཀཱི་ལ༹ཾ པ་ཊི་ཙྩ ཨེ་ཝཾ ཨ་ནེ་ཀ་ཛཱ་ཏི་ས་ཏེ་སུ སཱུ་ལཱ་རོ་པ་ན་དུ་ཀྑ་མ་ནུ་བྷ་ཝི་ཏྭཱ ཨི་མཱ་ཡ པ་རི་ཡོ་སཱ་ན་ཛཱ་ཏི་ཡཱ ཨེ་ཝ་རཱུ་པཾ དུ་ཀྑ་མ་ནུ་བྷཱུ་ཏ’’ནྟི ཨཱ་ཧ.
༥༥. ཨ་ཐ ཨ་པ་ར་བྷཱ་གེ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ སུ་མེ་དྷོ ནཱ་མ ས་མྦུ་དྡྷོཏི་ཨཱ་དི་མཱ་ཧ. ཏ་ཏྠ ཨ་ནུ་ཏྟཱ་ན་པ་ད་ཝ་ཎྞ་ན་མེ་ཝ ཀ་རི་སྶཱ་མ.
༥༧. ཝི་ཛྫཱ་དྷ་རོ ཏ་དཱ ཨཱ་སིནྟི བཱ་ཧི་ར་ཀ་མ་ནྟཱ་དི་ཝི་ཛྫཱ་སི་དྡྷི་ཡཱ ཨཱ་ཀཱ་ས་གཱ་མི་ས་མ་ཏྠོ ཧུ་ཏྭཱ ཙ་ར་ཎ་ཝ་སེ་ན ཏཾ ཝི་ཛྫཾ ར་ཀྑི་ཏྭཱ ཨ་ཝི་ནཱ་སེ་ཏྭཱ པ་རི་ཧ་ར་ཎ་ཝ་སེ་ན ཝི་ཛྫཱ་དྷ་ར་ཡོ་ནི ཨཱ་སིཾ ཨ་ཧོ་སི་ནྟི ཨ་ཏྠོ. ཨ་ནྟ་ལི་ཀྑ་ཙ་རོ ཨ་ཧནྟི ཨ་ནྟཾ པ་རི་ཡོ་སཱ་ནཾ ཀོ་ཊིཾ ལི་ཁ་ཏེ སཾ་ཀ་རི་སྶ་ཏཱི་ཏི ཨ་ནྟ་ལི་ཀྑཾ. ཨ་ཐ ཝཱ ཨ་ནྟཾ པ་རི་ཡོ་སཱ་ནཾ ལི་ཁྱ་ཏེ ཨོ་ལོ་ཀི་ཡ་ཏེ ཨེ་ཏེ་ནཱ་ཏི ཨ་ནྟ་ལི་ཀྑཾ, ཏ་སྨིཾ ཨ་ནྟ་ལི་ཀྑེ, ཨཱ་ཀཱ་སེ ཙ་ར་ཎ་སཱི་ལོ ཨ་ཧ་ནྟི ཨ་ཏྠོ. ཏི་སཱུ་ལཾ སུ་ཀ་ཏཾ ག་ཡ྄ཧཱཏི ཏི་ཁི་ཎཾ སཱུ་ལཾ, ཨ་གྒཾ ཨཱ་ཝུ་དྷཾ. ཏི་སཱུ་ལཾ སུ་ནྡ་རཾ ཀ་ཏཾ, ཀོ་ཊྚ་ན་གྷཾ་ས་ན་མ་དྡ་ན་པ་ཧ་ར་ཎ་ཝ་སེ་ན སུ་ཊྛུ ཀ་ཏཾ སཱུ་ལཱ་ཝུ་དྷཾ ག་ཡ྄ཧ ག་ཧེ་ཏྭཱ ཨ་མྦ་ར་ཏོ ག་ཙྪཱ་མཱི་ཏི ཨ་ཏྠོ. སེ་སཾ ས་བྦཾ ཧེ་ཊྛཱ ཝུ་ཏྟ་ན་ཡ་ཏྟཱ་ཝ ན་ཡཱ་ནུ་ཡོ་གེ་ན སུ་ཝི་ཉྙེ་ཡྻ་མེ་ཝཱ་ཏི.
ཨུ་ཏྟ་ར་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.