༣. ག་ཡཱ་ཀ་སྶ་པ་ཏྠེ་ར་ཨ་པ་དཱ་ན་ཝ་ཎྞ་ནཱ

ཏ་ཏི་ཡཱ་པ་དཱ་ནེ ཨ་ཛི་ན་ཙ་མྨ་ཝ་ཏྠོ་ཧནྟི་ཨཱ་དི་ཀཾ ཨཱ་ཡ་སྨ་ཏོ ག་ཡཱ་ཀ་སྶ་པ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཾ ཀུ་ས་ལཾ ཨུ་པ་ཙི་ན་ནྟོ ཨི་ཏོ ཨེ་ཀ་ཏིཾ་ས་ཀ་པྤེ སི་ཁི་སྶ བྷ་ག་ཝ་ཏོ ཀཱ་ལེ ཀུ་ལ་གེ་ཧེ ནི་བྦ་ཏྟོ ཝི་ཉྙུ་ཏཾ པ་ཏྟོ ནི་སྶ་ར་ཎ་ཛ྄ཛྷཱ་ས་ཡ་ཏཱ་ཡ གྷ་རཱ་ཝཱ་སཾ པ་ཧཱ་ཡ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ ཨ་ར་ཉྙཱ་ཡ་ཏ་ནེ ཨ་སྶ་མཾ མཱ་པེ་ཏྭཱ ཝ་ན་མཱུ་ལ་ཕ་ལཱ་ཧཱ་རོ ཝ་ས་ཏི. ཏེ་ན ཙ ས་མ་ཡེ་ན བྷ་ག་ཝཱ ཨེ་ཀོ ཨ་དུ་ཏི་ཡོ ཏ་སྶ ཨ་སྶ་མ་ས་མཱི་པེ་ནཱ་ག་ཙྪི, སོ བྷ་ག་ཝ་ནྟཾ དི་སྭཱ པ་ས་ནྣ་མཱ་ན་སོ ཨུ་པ་ས་ངྐ་མི་ཏྭཱ ཝ་ནྡི་ཏྭཱ ཨེ་ཀ་མ་ནྟཾ ཋི་ཏོ ཝེ་ལཾ ཨོ་ལོ་ཀེ་ནྟོ མ་ནོ་ཧ་རཱ་ནི ཀོ་ལ་ཕ་ལཱ་ནི ས་ཏྠུ ཨུ་པ་ནེ་སི. སོ ཏེ་ན པུ་ཉྙ་ཀ་མྨེ་ན དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ བྲཱ་ཧྨ་ཎ་ཀུ་ལེ ནི་བྦ་ཏྟི་ཏྭཱ ཝ་ཡ་པྤ་ཏྟོ ནི་སྶ་ར་ཎ་ཛ྄ཛྷཱ་ས་ཡ་ཏཱ་ཡ གྷ་རཱ་ཝཱ་སཾ པ་ཧཱ་ཡ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ དྭཱི་ཧི ཏཱ་པ་ས་ས་ཏེ་ཧི ས་དྡྷིཾ ག་ཡཱ་ཡ ཝི་ཧ་ར་ཏི. ག་ཡཱ་ཡ ཝ་ས་ན་ཏོ ཧི་སྶ ཀ་སྶ་པ་གོ་ཏྟ་ཏཱ་ཡ ཙ ག་ཡཱ་ཀ་སྶ་པོཏི ས་མ་ཉྙཱ ཨ་ཧོ་སི. སོ བྷ་ག་ཝ་ཏོ ས་དྡྷིཾ པ་རི་སཱ་ཡ ཨེ་ཧི་བྷི་ཀྑཱུ་པ་ས་མྤ་དཾ ད་ཏྭཱ ན་དཱི་ཀ་སྶ་པ་སྶ ཝུ་ཏྟ་ན་ཡེ་ན ཨཱ་དི་ཏྟ་པ་རི་ཡཱ་ཡ དེ་ས་ནཱ་ཡ ཨོ་ཝ་དི་ཡ་མཱ་ནོ ཨ་ར་ཧ་ཏྟེ པ་ཏི་ཊྛཱ་སི.

༣༥. སོ ཨ་ར་ཧ་ཏྟཾ པ་ཏྭཱ སོ་མ་ན་སྶ་ཛཱ་ཏོ ཨ་ཏྟ་ནོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཨ་ཛི་ན་ཙ་མྨ་ཝ་ཏྠོ་ཧནྟི་ཨཱ་དི་མཱ་ཧ. ཏ་ཏྠ ཨ་ཛི་ན་ཙ་མྨ་ཝ་ཏྠོཏི ཏཱ་པ་ས་པ་བྦ་ཛི་ཏ་ཏྟཱ ཨ་ཛི་ན་ཙ་མྨ་ནི་ཝཱ་ས་ན་པཱ་ཝུ་ར་ཎོ་ཏི ཨ་ཏྠོ. ཁཱ་རི་བྷཱ་ར་དྷ་རོཏི ཏཱ་པ་ས་ཀཱ་ལེ ཏཱ་པ་ས་པ་རི་ཀྑཱ་ར་པ་རི་པུ་ཎྞ་ཀཱ་ཛ་དྷ་རོ་ཏི ཨ་ཏྠོ. ཁཱ་རི་ཀ་ཏཱ་པ་ས་པ་རི་ཀྑཱ་རེ པཱུ་རེ་ཏྭཱ. ཀོ་ལཾ ཨ་ཧཱ་སི ཨ་སྶ་མནྟི ཀོ་ལ་ཕ་ལཾ ཨ་སྶ་མེ པཱུ་རེ་ཏྭཱ ཨ་སྶ་མེ ནི་སི་ནྣོ་ཏི ཨ་ཏྠོ. ཨ་གོ་པ་ཡིནྟི པཱ་ཋེ ཀོ་ལ་ཕ་ལཾ པ་རི་ཡེ་སི་ཏྭཱ ཨ་སྶ་མཾ གོ་པེ་སིཾ ར་ཀྑི་ནྟི ཨ་ཏྠོ. སེ་སཾ ས་བྦཾ ཨུ་ཏྟཱ་ན་ཏྠ་མེ་ཝཱ་ཏི.

ག་ཡཱ་ཀ་སྶ་པ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.