༡. ལ་ཀུ་ཎྜ་ཀ་བྷ་དྡི་ཡ་ཏྠེ་ར་ཨ་པ་དཱ་ན་ཝ་ཎྞ་ནཱ
པ་ཉྩ་པ་ཉྙཱ་ས་མ་ཝ་གྒེ པ་ཋ་མཱ་པ་དཱ་ནེ པ་དུ་མུ་ཏྟ་རོ ནཱ་མ ཛི་ནོཏི་ཨཱ་དི་ཀཾ ཨཱ་ཡ་སྨ་ཏོ ལ་ཀུ་ཎྜ་ཀ་བྷ་དྡི་ཡ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ པ་དུ་མུ་ཏྟ་ར་སྶ བྷ་ག་ཝ་ཏོ ཀཱ་ལེ ཧཾ་ས་ཝ་ཏཱི་ན་ག་རེ མ་ཧཱ་བྷོ་ག་ཀུ་ལེ ནི་བྦ་ཏྟི་ཏྭཱ ཝི་ཉྙུ་ཏཾ པ་ཏྟོ ས་ཏྠུ དྷ་མྨཾ སུ་ཎ་ནྟོ ནི་སི་ནྣོ ས་ཏྠཱ་རཾ ཨེ་ཀཾ བྷི་ཀྑུཾ མ་ཉྫུ་སྶ་རཱ་ནཾ ཨ་གྒ་ཊྛཱ་ནེ ཋ་པེ་ནྟཾ དི་སྭཱ ས་ཡ་མྤི ཏཾ ཋཱ་ན་ནྟ་རཾ པ་ཏྠེ་ནྟོ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ས་པྤི་ས་ཀྑ་རཱ་དི་མ་དྷུ་ར་ར་ས་ས་མྨི་སྶཾ མ་ཧཱ་དཱ་ནཾ ད་ཏྭཱ ‘‘ཨ་ཧ་མྤི, བྷ་ནྟེ, ཨ་ནཱ་ག་ཏེ ཨ་ཡཾ བྷི་ཀྑུ ཝི་ཡ ཨེ་ཀ་སྶ བུ་དྡྷ་སྶ སཱ་ས་ནེ མ་ཉྫུ་སྶ་རཱ་ནཾ ཨ་གྒོ བྷ་ཝེ་ཡྻ’’ནྟི པ་ཎི་དྷཱ་ནཾ ཨ་ཀཱ་སི. བྷ་ག་ཝཱ ཏ་སྶ ཨ་ན་ནྟ་རཱ་ཡཾ དི་སྭཱ བྱཱ་ཀ་རི་ཏྭཱ པ་ཀྐཱ་མི.
སོ ཡཱ་ཝ་ཏཱ་ཡུ་ཀཾ པུ་ཉྙཱ་ནི ཀ་ཏྭཱ དེ་ཝ་མ་ནུ་སྶེ་སུ སཾ་ས་ར་ནྟོ ཨུ་བྷ་ཡ་ས་མྤ་ཏྟི་ཡོ ཨ་ནུ་བྷ་ཝི་ཏྭཱ ཕུ་སྶ་བྷ་ག་ཝ་ཏོ ཀཱ་ལེ ཙི་ཏྲ་ཀོ་ཀི་ལོ ཧུ་ཏྭཱ ནི་བྦ་ཏྟོ རཱ་ཛུ་ཡྻཱ་ན་ཏོ མ་དྷུ་རཾ ཨ་མྦ་ཕ་ལཾ ཏུ་ཎྜེ་ནཱ་དཱ་ཡ ག་ཙྪ་ནྟོ ས་ཏྠཱ་རཾ དི་སྭཱ པ་ས་ནྣ་མཱ་ན་སོ ‘‘ད་སྶཱ་མི བུ་དྡྷ་སྶཱ’’ཏི ཙི་ཏྟཾ ཨུ་པྤཱ་དེ་སི. ས་ཏྠཱ ཏ་སྶ ཙི་ཏྟཱ་ཙཱ་རཾ ཉ་ཏྭཱ པ་ཏྟཾ ག་ཧེ་ཏྭཱ ནི་སཱི་དི. ཀོ་ཀི་ལོ ད་ས་བ་ལ་སྶ པ་ཏྟེ ཨ་མྦ་པ་ཀྐཾ ཋ་པེ་སི. ས་ཏྠཱ ཏ་སྶ སོ་མ་ན་སྶུ་པྤཱ་ད་ན་ཏྠཾ ཏ་སྶ པ་སྶ་ནྟ་སྶེ་ཝ ཏཾ པ་རི་བྷུ་ཉྫི. ཨ་ཐ སོ ཀོ་ཀི་ལོ པ་ས་ནྣ་མཱ་ན་སོ ཏེ་ནེ་ཝ པཱི་ཏི་སུ་ཁེ་ན ས་ཏྟཱ་ཧཾ ཝཱི་ཏི་ནཱ་མེ་སི. ཏེ་ནེ་ཝ པུ་ཉྙ་ཀ་མྨེ་ན ཨུ་པྤ་ནྣུ་པྤ་ནྣ་བྷ་ཝེ མ་ཉྫུ་སྶ་རོ ཨ་ཧོ་སི. ཀ་སྶ་པ་ས་མྨཱ་ས་མྦུ་དྡྷ་ཀཱ་ལེ ཝ་ཌྜྷ་ཀི་ཀུ་ལེ ནི་བྦ་ཏྟེ་ཏྭཱ ཛེ་ཊྛ་ཀ་ཝ་ཌྜྷ་ཀཱི ཧུ་ཏྭཱ པཱ་ཀ་ཊོ ཨ་ཧོ་སི. པ་རི་ནི་བྦུ་ཏེ བྷ་ག་ཝ་ཏི ཏ་སྶ ས་རཱི་ར་དྷཱ་ཏུ་ཡོ ནི་ད་ཧི་ཏུཾ ས་ཏྟ་ཡོ་ཛ་ན་པྤ་མཱ་ཎེ ཐཱུ་པེ ཨཱ་ར་དྡྷེ སོ ཨཱ་ཧ – ‘‘ཡོ་ཛ་ནཱ་ཝ་ཊྚཾ ཡོ་ཛ་ནུ་བྦེ་དྷཾ ཀ་རོ་མཱ’’ཏི. ཏེ ས་བྦེ ཏ་སྶ ཝ་ཙ་ནེ ཨ་ཊྛཾ་སུ. ཨི་ཏི ཨ་པྤ་མཱ་ཎ་སྶ བུ་དྡྷ་སྶ ཨོ་ར་པྤ་མཱ་ཎཾ ཙེ་ཏི་ཡཾ ཀཱ་རེ་སི, ཏེ་ན ཀ་མྨེ་ན ནི་བྦ་ཏྟ་ཊྛཱ་ནེ ཨ་ཉྙེ་ཧི ཧཱི་ན་པྤ་མཱ་ཎོ ཨ་ཧོ་སི. སོ ཨ་མྷཱ་ཀཾ བྷ་ག་ཝ་ཏོ ཀཱ་ལེ ཀུ་ལ་གེ་ཧེ ནི་བྦ་ཏྟི་ཏྭཱ ཨ་ཏི་ར་སྶ་ཏཱ་ཡ ཙ སུ་ཝ་ཎྞ་པ་ཊི་མཱ ཝི་ཡ སུ་ནྡ་ར་ས་རཱི་ར་ཏཱ་ཡ ཙ ལ་ཀུ་ཎྜ་ཀ་བྷ་དྡི་ཡོཏི པ་ཉྙཱ་ཡི་ཏྠ. སོ ཨ་པ་ར་བྷཱ་གེ ས་ཏྠུ དྷ་མྨ་དེ་ས་ནཾ སུ་ཏྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏྭཱ བ་ཧུ་སྶུ་ཏོ དྷ་མྨ་ཀ་ཐི་ཀོ ཧུ་ཏྭཱ མ་དྷུ་རེ་ན ས་རེ་ན པ་རེ་སཾ དྷ་མྨཾ ཀ་ཐེ་སི.
ཨ་ཐེ་ཀ་སྨིཾ ཨུ་སྶ་ཝ་དི་ཝ་སེ ཨེ་ཀེ་ན བྲཱ་ཧྨ་ཎེ་ན ས་དྡྷིཾ ར་ཐེ་ན ག་ཙྪ་ནྟཱི ཨེ་ཀཱ ག་ཎི་ཀཱ ཐེ་རཾ དི་སྭཱ ད་ནྟ་ཝི་དཾ་ས་ཀཾ ཧ་སི. ཐེ་རོ ཏ་སྶཱ ད་ནྟ་ཊྛི་ཀེ ནི་མི་ཏྟཾ ག་ཧེ་ཏྭཱ ཛྷཱ་ནཾ ཨུ་པྤཱ་དེ་ཏྭཱ ཏཾ པཱ་ད་ཀཾ ཀ་ཏྭཱ ཝི་པ་སྶ་ནཾ ཝ་ཌྜྷེ་ཏྭཱ ཨ་ནཱ་གཱ་མཱི ཨ་ཧོ་སི, སོ ཨ་བྷི་ཎྷཾ ཀཱ་ཡ་ག་ཏཱ་ཡ ས་ཏི་ཡཱ ཝི་ཧ་ར་ནྟོ ཨེ་ཀ་དི་ཝ་སཾ ཨཱ་ཡ་སྨ་ཏཱ དྷ་མྨ་སེ་ནཱ་པ་ཏི་ནཱ ཨོ་ཝ་དི་ཡ་མཱ་ནོ ཨ་ནུ་སཱ་སི་ཡ་མཱ་ནོ ཨ་ར་ཧ་ཏྟེ པ་ཏི་ཊྛ་ཧི. ཨེ་ཀ་ཙྩེ བྷི་ཀྑཱུ ཙ སཱ་མ་ཎེ་རཱ ཙ ཏ་སྶ ཨ་ར་ཧ་ཏྟ་པྤ་ཏྟ་བྷཱ་ཝཾ ཨ་ཛཱ་ན་ནྟོ ཀ་ཎྞེ་སུ ག་ཧེ་ཏྭཱ ཀ་ཌྜྷ་ནྟི, སཱི་སེ བཱ་ཧཱ་ཡ ཧ་ཏྠ་པཱ་དཱ་དཱི་སུ ཝཱ ག་ཧེ་ཏྭཱ ཙཱ་ལེ་ཏྭཱ ཀཱི་ལ༹་ནྟཱ ཝི་ཧེ་ཋེ་སུཾ. ཨ་ཐ བྷ་ག་ཝཱ སུ་ཏྭཱ – ‘‘མཱ, བྷི་ཀྑ་ཝེ, མ་མ པུ་ཏྟཾ ཝི་ཧེ་ཋེ་ཐཱ’’ཏི ཨཱ་ཧ. ཏ་ཏོ པ་ཊྛཱ་ཡ ཏཾ ‘‘ཨ་ར་ཧཱ’’ཏི ཛཱ་ནི་ཏྭཱ ན ཝི་ཧེ་ཋེ་སུཾ.
༡༢. སོ ཨ་ར་ཧཱ ཧུ་ཏྭཱ ས་ཉྫཱ་ཏ་སོ་མ་ན་སྶོ ཨ་ཏྟ་ནོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ པ་དུ་མུ་ཏྟ་རོ ནཱ་མ ཛི་ནོཏི་ཨཱ་དི་མཱ་ཧ. མ་ཉྫུ་ནཱ་བྷི་ནི་ཀཱུ་ཛ་ཧནྟི མ་དྷུ་རེ་ན པེ་མ་ནི་ཡེ་ན ས་རེ་ན ཨ་བྷི་ནི་ཀཱུ་ཛིཾ ས་དྡཾ ནི་ཙྪཱ་རེ་སིཾ ཨ་ཧ་ནྟི ཨ་ཏྠོ. སེ་ས་མེ་ཏྠ སུ་ཝི་ཉྙེ་ཡྻ་མེ་ཝཱ་ཏི.
ལ་ཀུ་ཎྜ་ཀ་བྷ་དྡི་ཡ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.