སི་ཁཱི བུ་དྡྷོ

ཏ་སྶ ཨ་པ་ར་བྷཱ་གེ ཨི་ཏོ ཨེ་ཀ་ཏྟིཾ་ས་ཀ་པྤེ སི་ཁཱི ཙ ཝེ་སྶ་བྷཱུཙཱ་ཏི དྭེ བུ་དྡྷཱ ཨ་ཧེ་སུཾ. སི་ཁི་སྶཱཔི བྷ་ག་ཝ་ཏོ ཏ་ཡོ སཱ་ཝ་ཀ་ས་ནྣི་པཱ་ཏཱ. པ་ཋ་མ་ས་ནྣི་པཱ་ཏེ བྷི་ཀྑུ་ས་ཏ་ས་ཧ་སྶཾ ཨ་ཧོ་སི, དུ་ཏི་ཡེ ཨ་སཱི་ཏི་ས་ཧ་སྶཱ་ནི, ཏ་ཏི་ཡེ ས་ཏྟ་ཏི་ས་ཧ་སྶཱ་ནི. ཏ་དཱ བོ་དྷི་ས་ཏྟོ ཨ་རི་ནྡ་མོ ནཱ་མ རཱ་ཛཱ ཧུ་ཏྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ས་ཙཱི་ཝ་རཾ མ་ཧཱ་དཱ་ནཾ པ་ཝ་ཏྟེ་ཏྭཱ ས་ཏྟ་ར་ཏ་ན་པ་ཊི་མ་ཎྜི་ཏཾ ཧ་ཏྠི་ར་ཏ་ནཾ ད་ཏྭཱ ཧ་ཏྠི་པྤ་མཱ་ཎཾ ཀ་ཏྭཱ ཀ་པྤི་ཡ་བྷ་ཎྜཾ ཨ་དཱ་སི. སོ་པི ནཾ ས་ཏྠཱ ‘‘ཨི་ཏོ ཨེ་ཀ་ཏྟིཾ་ས་ཀ་པྤེ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏ་སྶ པ་ན བྷ་ག་ཝ་ཏོ ཨ་རུ་ཎ་ཝ་ཏཱི ནཱ་མ ན་ག་རཾ ཨ་ཧོ་སི, ཨ་རུ་ཎོ ནཱ་མ ཁ་ཏྟི་ཡོ པི་ཏཱ, པ་བྷཱ་ཝ་ཏཱི ནཱ་མ མཱ་ཏཱ, ཨ་བྷི་བྷཱུ ཙ ས་མྦྷ་ཝོ ཙ དྭེ ཨ་གྒ་སཱ་ཝ་ཀཱ, ཁེ་མ་ངྐ་རོ ནཱ་མུ་པ་ཊྛཱ་ཀོ, ས་ཁི་ལཱ ཙ པ་དུ་མཱ ཙ དྭེ ཨ་གྒ་སཱ་ཝི་ཀཱ, པུ་ཎྜ་རཱི་ཀ་རུ་ཀྑོ བོ་དྷི, ས་རཱི་རཾ ས་ཏྟ་ཏི་ཧ་ཏྠུ་བྦེ་དྷཾ ཨ་ཧོ་སི, ས་རཱི་ར་པྤ་བྷཱ ཡོ་ཛ་ན་ཏྟ་ཡཾ ཕ་རི་ཏྭཱ ཨ་ཊྛཱ་སི, ས་ཏྟ་ཏི ཝ་སྶ་ས་ཧ་སྶཱ་ནི ཨཱ་ཡཱུ་ཏི.

‘‘ཝི་པ་སྶི་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;

སི་ཁི་ཝ྄ཧ་ཡོ ཨཱ་སི ཛི་ནོ, ཨ་ས་མོ ཨ་པྤ་ཊི་པུ་གྒ་ལོ’’ཏི. (བུ. ཝཾ. ༢༢.༡);