༡. ཝཱ་ད་ཡུ་ཏྟི་ཝ་ཎྞ་ནཱ

༢༨༢. ཨི་དཱ་ནི ས་བྦ་མ་ཏྠཱི་ཏི་ཝཱ་ད་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ‘‘ཡཾ ཀི་ཉྩི རཱུ་པཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཾ…པེ… ཨ་ཡཾ ཝུ་ཙྩ་ཏི རཱུ་པ་ཀྑ་ནྡྷོ’’ཏི་ཨཱ་དི་ཝ་ཙ་ན་ཏོ (ཝི་བྷ. ༢) ‘‘ས་བྦེ་པི ཨ་ཏཱི་ཏཱ་དི་བྷེ་དཱ དྷ་མྨཱ ཁ་ནྡྷ་ས་བྷཱ་ཝཾ ན ཝི་ཛ་ཧ་ནྟི, ཏ་སྨཱ ས་བྦཾ ཨ་ཏྠི་ཡེ་ཝ ནཱ་མཱ’’ཏི ལ་དྡྷི, སེ་ཡྻ་ཐཱ་པི ཨེ་ཏ་ར་ཧི ས་བྦ་མ་ཏྠི་ཝཱ་དཱ་ནཾ, ཏེ་སཾ ལ་དྡྷི་ཝི་སོ་དྷ་ན་ཏྠཾ ས་བྦ་མ་ཏྠཱིཏི པུ་ཙྪཱ ས་ཀ་ཝཱ་དི་སྶ, ཝུ་ཏྟ་པྤ་ཀཱ་རཱ་ཡ ལ་དྡྷི་ཡཱ ཋ་ཏྭཱ པ་ཊི་ཉྙཱ ཨི་ཏ་ར་སྶ. ས་བྦ་ཐཱཏི ས་བྦ་སྨིཾ ས་རཱི་རེ ས་བྦ་མ་ཏྠཱི་ཏི པུ་ཙྪ་ཏི. ས་བྦ་དཱཏི ས་བྦ་སྨིཾ ཀཱ་ལེ ས་བྦ་མ་ཏྠཱི་ཏི པུ་ཙྪ་ཏི. ས་བྦེ་ན ས་བྦནྟི ས་བྦེ་ནཱ་ཀཱ་རེ་ན ས་བྦ་མ་ཏྠཱི་ཏི པུ་ཙྪ་ཏི. ས་བྦེ་སཱུཏི ས་བྦེ་སུ དྷ་མྨེ་སུ ས་བྦ་མ་ཏྠཱི་ཏི པུ་ཙྪ་ཏི. ཨ་ཡོ་གནྟི ཨ་ཡུ་ཏྟཾ. ནཱ་ནཱ་ས་བྷཱ་ཝཱ་ན་ཉྷི ཡོ་གོ ཧོ་ཏི, ན ཨེ་ཀ་ས་བྷཱ་ཝ་སྶ. ཨི་ཏི ཨི་མ་སྨིཾ པ་ཉྷེ རཱུ་པཾ ཝེ་ད་ནཱ་ཡ, ཝེ་ད་ནཾ ཝཱ རཱུ་པེ་ན ཨ་ནཱ་ནཾ ཨེ་ཀ་ལ་ཀྑ་ཎ་མེ་ཝ ཀ་ཏྭཱ ས་བྦ་མ་ཏྠཱི་ཏི པུ་ཙྪ་ཏི. ཡ་མྤི ན་ཏྠི ཏ་མྤ་ཏྠཱིཏི ཡ་མྤི ཚ་ཊྛ་ཁ་ནྡྷཱ་དི་ཀཾ ས་ས་ཝི་སཱ་ཎཱ་དི་ཀཾ ཝཱ ཀི་ཉྩི ན་ཏྠཱི་ཏི སི་དྡྷཾ, ཏ་མྤི ཏེ ཨ་ཏྠཱི་ཏི པུ་ཙྪ་ཏི. ས་བྦ་མ་ཏྠཱི་ཏི ཡཱ དི་ཊྛི སཱ དི་ཊྛི མི་ཙྪཱ་དི་ཊྛཱི་ཏི, ཡཱ དི་ཊྛི སཱ དི་ཊྛི ས་མྨཱ་དི་ཊྛཱི་ཏི ཧེ་ཝ་མ་ཏྠཱིཏི ཨི་མི་ནཱ ཨི་དཾ པུ་ཙྪ་ཏི – ཡཱ ཏེ ཨེ་སཱ ས་བྦ་མ་ཏྠཱི་ཏི དི་ཊྛི, སཱ དི་ཊྛི ཨ་ཡཱ་ཐཱ་ཝ་ཀ་ཏྟཱ མི་ཙྪཱ་དི་ཊྛཱི་ཏི ཨེ་ཝཾ ཡཱ ཨ་མྷཱ་ཀཾ དི་ཊྛི, སཱ དི་ཊྛི ཡཱ་ཐཱ་ཝ་ཀ་ཏྟཱ ས་མྨཱ་དི་ཊྛཱི་ཏི ཨེ་ཝཾ ཏ་ཝ ས་མ་ཡེ ཨ་ཏྠཱི་ཏི པུ་ཙྪ་ཏི. ཨི་ཏ་རོ ས་བྦེ་སུ་པི ཨེ་ཏེ་སུ ན་ཡེ་སུ ཝུ་ཏྟ་པྤ་ཀཱ་རཱ་ཡ ཨ་ཏྠི་ཏཱ་ཡ ཨ་བྷཱ་ཝ་ཏོ པ་ཊི་ཀྑི་པ་ཏི. ཨི་མེ་སུ པ་ན ས་བྦེ་སུ་པི ན་ཡེ་སུ ‘‘ཨཱ་ཛཱ་ནཱ་ཧི ནི་གྒ་ཧ’’ནྟི ཨཱ་དིཾ ཀ་ཏྭཱ ས་བྦོ ཀ་ཐཱ་མ་གྒ་བྷེ་དོ ཝི་ཏྠཱ་ར་ཏོ ཝེ་དི་ཏ་བྦོ་ཏི ཨ་ཡཾ ཏཱ་ཝེ་ཏྠ ཝཱ་ད་ཡུ་ཏྟི.