༧. ཨི་དྡྷི་བ་ལ་ཀ་ཐཱ་ཝ་ཎྞ་ནཱ

༦༢༡-༦༢༤. ཨི་དཱ་ནི ཨི་དྡྷི་བ་ལ་ཀ་ཐཱ ནཱ་མ ཧོ་ཏི. ཏ་ཏྠ ཨི་དྡྷི་པཱ་ད་བྷཱ་ཝ་ནཱ་ནི་སཾ་ས་སྶ ཨ་ཏྠཾ ཨ་ཡོ་ནི་སོ ག་ཧེ་ཏྭཱ ‘‘ཨི་དྡྷི་བ་ལེ་ན ས་མ་ནྣཱ་ག་ཏོ ཀ་པྤཾ ཏི་ཊྛེ་ཡྻཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་སཾ་གྷི་ཀཱ་ནཾ; ཏེ ས་ནྡྷཱ་ཡ ཨི་དྡྷི་བ་ལེ་ན ས་མ་ནྣཱ་ག་ཏོ ཀ་པྤཾ ཏི་ཊྛེ་ཡྻཱཏི པུ་ཙྪཱ ས་ཀ་ཝཱ་དི་སྶ. ཏ་ཏྠ ཀ་པྤོ ནཱ་མ མ་ཧཱ་ཀ་པྤོ, ཀ་པྤེ་ཀ་དེ་སོ, ཨཱ་ཡུ་ཀ་པྤོ་ཏི ཏི་ཝི་དྷོ. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཀ་པྤ་སྶ ཨ་ས་ངྑྱེ་ཡྻཱ་ནཱི’’ཏི (ཨ. ནི. ༤.༡༥༦) ཨེ་ཏྠ ཧི མ་ཧཱ་ཀ་པྤོ་ཝ ཀ་པྤོ་ཏི ཝུ་ཏྟོ. ‘‘བྲ་ཧྨ་ཀཱ་ཡི་ཀཱ་ནཾ དེ་ཝཱ་ནཾ ཀ་པྤོ ཨཱ་ཡུ་པྤ་མཱ་ཎ’’ནྟི (ཨ. ནི. ༤.༡༢༣) ཨེ་ཏྠ ཀ་པྤེ་ཀ་དེ་སཱ. ‘‘ཀ་པྤཾ ནི་ར་ཡ་མྷི པ་ཙྩ་ཏི, ཀ་པྤཾ ས་གྒ་མྷི མོ་ད་ཏཱི’’ཏི (ཙཱུ་ལ༹་ཝ. ༣༥༤) ཨེ་ཏྠ ཨཱ་ཡུ་ཀ་པྤོ. ཨཱ་ཡུ་ཀ་པྤ་ནཾ ཨཱ་ཡུ་ཝི་དྷཱ་ནཾ ཀ་མྨ་སྶ ཝི་པཱ་ཀ་ཝ་སེ་ན ཝཱ ཝ་སྶ་ག་ཎ་ནཱ་ཡ ཝཱ ཨཱ་ཡུ་པ་རི་ཙྪེ་དོ་ཏི ཨ་ཏྠོ. ཏེ་སུ མ་ཧཱ་ཀ་པྤཾ ས་ནྡྷཱ་ཡ པུ་ཙྪ་ཏི, ཨི་ཏ་རོ པ་ཊི་ཛཱ་ནཱ་ཏི.

ཨ་ཐ ནཾ ས་ཀ་ཝཱ་དཱི ‘‘ས་ཙེ ཏེ ཨི་དྡྷི་བ་ལེ་ན ས་མ་ནྣཱ་ག་ཏོ, ‘ཡོ ཙི་རཾ ཛཱི་ཝ་ཏི, སོ ཝ་སྶ་ས་ཏཾ ཨ་པྤཾ ཝཱ བྷི་ཡྻོ’ཏི (སཾ. ནི. ༢.༡༤༣) ཨེ་ཝཾ པ་རི་ཙྪི་ནྣཱ ཨཱ་ཡུ་ཀ་པྤཱ ཨུ་དྡྷཾ མ་ཧཱ་ཀ་པྤཾ ཝཱ མ་ཧཱ་ཀ་པྤེ་ཀ་དེ་སཾ ཝཱ ཛཱི་ཝེ་ཡྻ ཨི་དྡྷི་མ་ཡི་ཀེ་ན་སྶ ཨཱ་ཡུ་ནཱ བྷ་ཝི་ཏ་བྦ’’ནྟི ཙོ་དེ་ཏུཾ ཨི་དྡྷི་མ་ཡི་ཀོ སོ ཨཱ་ཡཱུཏི་ཨཱ་དི་མཱ་ཧ. ཨི་ཏ་རོ ‘‘ཛཱི་ཝི་ཏི་ནྡྲི་ཡཾ ནཱ་མ ཨི་དྡྷི་མ་ཡི་ཀཾ ན་ཏྠི, ཀ་མྨ་ས་མུ་ཊྛཱ་ན་མེ་ཝཱ’’ཏི ཝུ་ཏྟ་ཏྟཱ པ་ཊི་ཀྑི་པ་ཏི. ཀོ པ་ནེ་ཏྠ ཨི་དྡྷི་མ་ཏོ ཝི་སེ་སོ, ན་ནུ ཨ་ནི་དྡྷི་མཱ་པི ཨཱ་ཡུ་ཀ་པྤཾ ཏི་ཊྛེ་ཡྻཱ་ཏི? ཨ་ཡཾ ཝི་སེ་སོ – ཨི་དྡྷི་མཱ ཧི ཡཱ་ཝ་ཏཱ་ཡུ་ཀཾ ཛཱི་ཝི་ཏ་པྤ་ཝ་ཏྟི་ཡཱ ཨ་ནྟ་རཱ་ཡ་ཀ་རེ དྷ་མྨེ ཨི་དྡྷི་བ་ལེ་ན པ་ཊི་བཱ་ཧི་ཏྭཱ ཨ་ནྟ་རཱ ཨ་ཀཱ་ལ་མ་ར་ཎཾ ནི་ཝཱ་རེ་ཏུཾ ས་ཀྐོ་ཏི, ཨ་ནི་དྡྷི་མ་ཏོ ཨེ་ཏཾ བ་ལཾ ན་ཏྠི. ཨ་ཡ་མེ་ཏེ་སཾ ཝི་སེ་སོ.

ཨ་ཏཱི་ཏཾ ཨ་ནཱ་ག་ཏནྟི ཨི་དཾ ཨ་ཝི་སེ་སེ་ན ཀ་པྤཾ ཏི་ཊྛེ་ཡྻཱ་ཏི པ་ཊི་ཉྙཱ་ཏ་ཏྟཱ ཙོ་དེ་ཏི. དྭེ ཀ་པྤེཏི་ཨཱ་དི ‘‘ཡ་དི ཨི་དྡྷི་མཱ ཛཱི་ཝི་ཏ་པ་རི་ཙྪེ་དཾ ཨ་ཏི་ཀྐ་མི་ཏུཾ ས་ཀྐོ་ཏི, ན ཀེ་ཝ་ལཾ ཨེ་ཀཾ ཨ་ནེ་ཀེ་པི ཀ་པྤེ ཏི་ཊྛེ་ཡྻཱ’’ཏི ཙོ་ད་ན་ཏྠཾ ཝུ་ཏྟཾ. ཨུ་པྤ་ནྣོ ཕ་སྶོཏི་ཨཱ་དི ན ས་བྦཾ ཨི་དྡྷི་ཡཱ ལ་བྦྷ་ཏི, ཨི་དྡྷི་ཡཱ ཨ་ཝི་ས་ཡོ་པི ཨ་ཏྠཱི་ཏི ད་སྶེ་ཏུཾ ཝུ་ཏྟཾ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.

ཨི་དྡྷི་བ་ལ་ཀ་ཐཱ་ཝ་ཎྞ་ནཱ.