༥. དྷ་མྨི་ཀ་ཝ་གྒོ
༡. ནཱ་ག་སུ་ཏྟ་ཝ་ཎྞ་ནཱ
༤༣. པ་ཉྩ་མ་སྶ པ་ཋ་མེ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིནྟི ཨི་དཾ ‘‘ཨཱ་ཡཱ་མཱ་ན་ནྡཱ’’ཏི ཐེ་རཾ ཨཱ་མ་ནྟེ་ཏྭཱ ག་ཏ་ཏྟཱ ཝུ་ཏྟཾ, ས་ཏྠཱ པ་ན ཨ་ནཱུ་ནེ་ཧི པ་ཉྩ་ཧི བྷི་ཀྑུ་ས་ཏེ་ཧི པ་རི་ཝུ་ཏོ ཏ་ཏྠ ཨ་ག་མཱ་སཱི་ཏི ཝེ་དི་ཏ་བྦོ. ཏེ་ནུ་པ་ས་ངྐ་མཱིཏི ཏེ་ཧེ་ཝ པ་ཉྩ་ཧི བྷི་ཀྑུ་ས་ཏེ་ཧི པ་རི་ཝུ་ཏོ ཨུ་པ་ས་ངྐ་མི. པ་རི་སི་ཉྩི་ཏྭཱཏི ཝོ་ཧཱ་ར་ཝ་ཙ་ན་མེ་ཏཾ, ནྷཱ་ཡི་ཏྭཱ་ཏི ཨ་ཏྠོ. པུ་བྦཱ་པ་ཡ་མཱ་ནོཏི ར་ཏྟ་དུ་པ་ཊྚཾ ནི་ཝཱ་སེ་ཏྭཱ ཨུ་ཏྟ་རཱ་ས་ངྒ་ཙཱི་ཝ་རཾ དྭཱི་ཧི ཧ་ཏྠེ་ཧི ག་ཧེ་ཏྭཱ པ་ཙྪི་མ་ལོ་ཀ་དྷཱ་ཏུཾ པི་ཊྛི་ཏོ ཀ་ཏྭཱ པུ་ར་ཏྠི་མ་ལོ་ཀ་དྷཱ་ཏུཾ ཨ་བྷི་མུ་ཁོ ཝོ་ད་ཀ་བྷཱ་ཝེ་ན ག་ཏྟཱ་ནི པུ་བྦ་ས་དི་སཱ་ནི ཀུ་རུ་མཱ་ནོ ཨ་ཊྛཱ་སཱི་ཏི ཨ་ཏྠོ. བྷི་ཀྑུ་ས་ངྒྷོ་པི ཏེ་ན ཏེ་ན ཋཱ་ནེ་ན ཨོ་ཏ་རི་ཏྭཱ ནྷ་ཏྭཱ པ་ཙྩུ་ཏྟ་རི་ཏྭཱ ས་ཏྠཱ་རཾ་ཡེ་ཝ པ་རི་ཝཱ་རེ་ཏྭཱ ཨ་ཊྛཱ་སི. ཨི་ཏི ཏ་སྨིཾ ས་མ་ཡེ ཨཱ་ཀཱ་ས་ཏོ པ་ཏ་མཱ་ནཾ ར་ཏྟ་སུ་ཝ་ཎྞ་ཀུ་ཎྜ་ལཾ ཝི་ཡ སཱུ་རི་ཡོ པ་ཙྪི་མ་ལོ་ཀ་དྷཱ་ཏུཾ པ་ཊི་པ་ཛྫི, པ་རི་སུ་དྡྷ་ར་ཛ་ཏ་མ་ཎྜ་ལོ ཝི་ཡ པཱ་ཙཱི་ན་ལོ་ཀ་དྷཱ་ཏུ་ཏོ ཙ་ནྡོ ཨ་བྦྷུ་གྒ་ཉྪི, མ་ཛ྄ཛྷ་ཊྛཱ་ནེ་པི པ་ཉྩ་བྷི་ཀྑུ་ས་ཏ་པ་རི་ཝཱ་རོ ས་མྨཱ་ས་མྦུ་དྡྷོ ཚ་བྦ་ཎྞ་བུ་དྡྷ་ར་སྨི་ཡོ ཝི་སྶ་ཛྫེ་ཏྭཱ པུ་བྦ་ཀོ་ཊྛ་ཀ་ན་དཱི་ཏཱི་རེ ལོ་ཀཾ ཨ་ལ་ངྐུ་རུ་མཱ་ནོ ཨ་ཊྛཱ་སི.
ཏེ་ན ཁོ པ་ན ས་མ་ཡེ་ན…པེ… སེ་ཏོ ནཱ་མ ནཱ་གོཏི སེ་ཏ་ཝ་ཎྞ་ཏཱ་ཡ ཨེ་ཝཾ ལ་དྡྷ་ནཱ་མོ ཧ་ཏྠི་ནཱ་གོ. མ་ཧཱ་ཏཱུ་རི་ཡ་ཏཱ་ལི༹་ཏ་ཝཱ་དི་ཏེ་ནཱཏི མ་ཧ་ནྟེ་ན ཏཱུ་རི་ཡ་ཏཱ་ལི༹་ཏ་ཝཱ་དི་ཏེ་ན. ཏ་ཏྠ པ་ཋ་མཾ ས་ངྒྷ་ཊྚ་ནཾ ཏཱ་ལི༹་ཏཾ ནཱ་མ ཧོ་ཏི, ཏ་ཏོ པ་རཾ ཝཱ་དི་ཏཾ. ཛ་ནོཏི ཧ་ཏྠི་ད་སྶ་ན་ཏྠཾ ས་ནྣི་པ་ཏི་ཏ་མ་ཧཱ་ཛ་ནོ. དི་སྭཱ ཨེ་ཝ་མཱ་ཧཱཏི ཨ་ངྒ་པ་ཙྩ་ངྒཱ་ནི གྷཾ་སི་ཏྭཱ ནྷཱ་པེ་ཏྭཱ ཨུ་ཏྟཱ་རེ་ཏྭཱ བ་ཧི་ཏཱི་རེ ཋ་པེ་ཏྭཱ ག་ཏྟཱ་ནི ཝོ་ད་ཀཱ་ནི ཀ་ཏྭཱ ཧ་ཏྠཱ་ལ་ངྐཱ་རེ་ན ཨ་ལ་ངྐ་ཏཾ ཏཾ མ་ཧཱ་ནཱ་གཾ དི་སྭཱ ཨི་དཾ ‘‘ཨ་བྷི་རཱུ་པོ ཝ་ཏ, བྷོ’’ཏི པ་སཾ་སཱ་ཝ་ཙ་ན་མཱ་ཧ. ཀཱ་ཡུ་པ་པ་ནྣོཏི ས་རཱི་ར་ས་མྤ་ཏྟི་ཡཱ ཨུ་པ་པ་ནྣོ, པ་རི་པུ་ཎྞ་ངྒ་པ་ཙྩ་ངྒོ་ཏི ཨ་ཏྠོ. ཨཱ་ཡ་སྨཱ ཨུ་དཱ་ཡཱིཏི པ་ཊི་ས་མྦྷི་དཱ་པྤ་ཏྟོ ཀཱ་ལུ༹་དཱ་ཡི་ཏྠེ་རོ. ཨེ་ཏ་ད་ཝོ་ཙཱཏི ཏཾ མ་ཧཱ་ཛ་ནཾ ཧ་ཏྠི་སྶ ཝ་ཎྞཾ བྷ་ཎ་ནྟཾ དི་སྭཱ ‘‘ཨ་ཡཾ ཛ་ནོ ཨ་ཧེ་ཏུ་ཀ་པ་ཊི་ས་ནྡྷི་ཡཾ ནི་བྦ་ཏྟ་ཧ་ཏྠི་ནོ ཝ་ཎྞཾ ཀ་ཐེ་ཏི, ན བུ་དྡྷ་ཧ་ཏྠི་སྶ. ཨ་ཧཾ དཱ་ནི ཨི་མི་ནཱ ཧ་ཏྠི་ནཱ་གེ་ན ཨུ་པ་མཾ ཀ་ཏྭཱ བུ་དྡྷ་ནཱ་ག་སྶ ཝ་ཎྞཾ ཀ་ཐེ་སྶཱ་མཱི’’ཏི ཙི་ནྟེ་ཏྭཱ ཨེ་ཏཾ ‘‘ཧ་ཏྠི་མེ་ཝ ནུ ཁོ, བྷ་ནྟེ’’ཏི་ཨཱ་དི་ཝ་ཙ་ནཾ ཨ་ཝོ་ཙ. ཏ་ཏྠ མ་ཧ་ནྟནྟི ཨཱ་རོ་ཧ་ས་མྤ་ནྣཾ. བྲ་ཧ་ནྟནྟི པ་རི་ཎཱ་ཧ་ས་མྤ་ནྣཾ. ཨེ་ཝ་མཱ་ཧཱཏི ཨེ་ཝཾ ཝ་ད་ཏི. ཨ་ཐ བྷ་ག་ཝཱ ཡ་སྨཱ ཨ་ཡཾ ནཱ་ག་ས་དྡོ ཧ་ཏྠི་མྷི་ཙེ་ཝ ཨ་སྶ་གོ་ཎ་ཨུ་ར་ག་རུ་ཀྑ་མ་ནུ་སྶེ་སུ ཙཱ་པི པ་ཝ་ཏྟ་ཏི, ཏ་སྨཱ ཧ་ཏྠི་མྤི ཁོཏི་ཨཱ་དི་མཱ་ཧ.
ཨཱ་གུནྟི པཱ་པ་ཀཾ ལཱ་མ་ཀཾ ཨ་ཀུ་ས་ལ་དྷ་མྨཾ. ཏ་མ་ཧཾ ནཱ་གོ་ཏི བྲཱུ་མཱིཏི ཏཾ ཨ་ཧཾ ཨི་མེ་ཧི ཏཱི་ཧི དྭཱ་རེ་ཧི ད་ས་ནྣཾ ཨ་ཀུ་ས་ལ་ཀ་མྨ་པ་ཐཱ་ནཾ དྭཱ་ད་ས་ནྣ་ཉྩ ཨ་ཀུ་ས་ལ་ཙི་ཏྟཱ་ནཾ ཨ་ཀ་ར་ཎ་ཏོ ནཱ་གོ་ཏི ཝ་དཱ་མི. ཨ་ཡ་ཉྷི ན ཨཱ་གུཾ ཀ་རོ་ཏཱི་ཏི ཨི་མི་ནཱ ཨ་ཏྠེ་ན ནཱ་གོ. ཨི་མཱ་ཧི གཱ་ཐཱ་ཧི ཨ་ནུ་མོ་དཱ་མཱིཏི ཨི་མཱ་ཧི ཙ་ཏུ་ས་ཊྛི་པ་དཱ་ཧི སོ་ལ༹་ས་ཧི གཱ་ཐཱ་ཧི ཨ་ནུ་མོ་དཱ་མི ཨ་བྷི་ན་ནྡཱ་མི.
མ་ནུ་སྶ་བྷཱུ་ཏནྟི དེ་ཝཱ་དི་བྷཱ་ཝཾ ཨ་ནུ་པ་ག་ནྟྭཱ མ་ནུ་སྶ་མེ་ཝ བྷཱུ་ཏཾ. ཨ་ཏྟ་ད་ནྟནྟི ཨ་ཏྟ་ནཱ་ཡེ་ཝ ད་ནྟཾ, ན ཨ་ཉྙེ་ཧི ད་མ་ཐཾ ཨུ་པ་ནཱི་ཏཾ. བྷ་ག་ཝཱ ཧི ཨ་ཏྟ་ནཱ ཨུ་པྤཱ་དི་ཏེ་ནེ་ཝ མ་གྒ་ད་མ་ཐེ་ན ཙ་ཀྑུ་ཏོ་པི ད་ནྟོ, སོ་ཏ་ཏོ་པི, གྷཱ་ན་ཏོ་པི, ཛི་ཝ྄ཧཱ་ཏོ་པི, ཀཱ་ཡ་ཏོ་པི, མ་ན་ཏོ་པཱི་ཏི ཨི་མེ་སུ ཚ་སུ ཋཱ་ནེ་སུ ད་ནྟོ ས་ནྟོ ནི་བྦུ་ཏོ པ་རི་ནི་བྦུ་ཏོ. ཏེ་ནཱ་ཧ – ‘‘ཨ་ཏྟ་ད་ནྟ’’ནྟི. ས་མཱ་ཧི་ཏནྟི དུ་ཝི་དྷེ་ནཱ་པི ས་མཱ་དྷི་ནཱ ས་མཱ་ཧི་ཏཾ. ཨི་རི་ཡ་མཱ་ནནྟི ཝི་ཧ་ར་མཱ་ནཾ. བྲ་ཧྨ་པ་ཐེཏི སེ་ཊྛ་པ་ཐེ, ཨ་མ་ཏ་པ་ཐེ, ནི་བྦཱ་ན་པ་ཐེ. ཙི་ཏྟ་སྶཱུ་པ་ས་མེ ར་ཏནྟི པ་ཋ་མ་ཛ྄ཛྷཱ་ནེ་ན པ་ཉྩ ནཱི་ཝ་ར་ཎཱ་ནི ཝཱུ་པ་ས་མེ་ཏྭཱ, དུ་ཏི་ཡ་ཛ྄ཛྷཱ་ནེ་ན ཝི་ཏ་ཀྐ་ཝི་ཙཱ་རེ, ཏ་ཏི་ཡ་ཛ྄ཛྷཱ་ནེ་ན པཱི་ཏིཾ, ཙ་ཏུ་ཏྠ་ཛ྄ཛྷཱ་ནེ་ན སུ་ཁ་དུ་ཀྑཾ ཝཱུ་པ་ས་མེ་ཏྭཱ ཏ་སྨིཾ ཙི་ཏྟ་སྶཱུ་པ་ས་མེ ར་ཏཾ ཨ་བྷི་ར་ཏཾ.
ན་མ་སྶ་ནྟཱིཏི ཀཱ་ཡེ་ན ན་མ་སྶ་ནྟི, ཝཱ་ཙཱ་ཡ ན་མ་སྶ་ནྟི, མ་ན་སཱ ན་མ་སྶ་ནྟི, དྷ་མྨཱ་ནུ་དྷ་མྨ་པ་ཊི་པ་ཏྟི་ཡཱ ན་མ་སྶ་ནྟི, ས་ཀྐ་རོ་ནྟི ག་རུཾ ཀ་རོ་ནྟི. ས་བྦ་དྷ་མྨཱ་ན་པཱ་ར་གུནྟི ས་བྦེ་སཾ ཁ་ནྡྷཱ་ཡ་ཏ་ན་དྷཱ་ཏུ་དྷ་མྨཱ་ནཾ ཨ་བྷི་ཉྙཱ་པཱ་ར་གཱུ, པ་རི་ཉྙཱ་པཱ་ར་གཱུ, པ་ཧཱ་ན་པཱ་ར་གཱུ, བྷཱ་ཝ་ནཱ་པཱ་ར་གཱུ, ས་ཙྪི་ཀི་རི་ཡཱ་པཱ་ར་གཱུ, ས་མཱ་པ་ཏྟི་པཱ་ར་གཱུ་ཏི ཚ་བྦི་དྷེ་ན པཱ་ར་ག་མ་ནེ་ན པཱ་ར་ག་ཏཾ པཱ་ར་པྤ་ཏྟཾ མ་ཏྠ་ཀ་པྤ་ཏྟཾ. དེ་ཝཱ་པི ཏཾ ན་མ་སྶ་ནྟཱིཏི དུ་ཀྑ་པྤ་ཏྟཱ སུ་བྲ་ཧྨ་དེ་ཝ་པུ་ཏྟཱ་ད་ཡོ སུ་ཁ་པྤ་ཏྟཱ ཙ ས་བྦེ་ཝ ད་ས་ས་ཧ་སྶ་ཙ་ཀྐ་ཝཱ་ལ༹་ཝཱ་སི་ནོ དེ་ཝཱ་པི ཏུ་མྷེ ན་མ་སྶ་ནྟི. ཨི་ཏི མེ ཨ་ར་ཧ་ཏོ སུ་ཏནྟི ཨི་ཏི མ་ཡཱ ཙ་ཏཱུ་ཧི ཀཱ་ར་ཎེ་ཧི ཨ་ར་ཧཱ་ཏི ལ་དྡྷ་ཝོ་ཧཱ་རཱ་ནཾ ཏུ་མྷཱ་ཀཾ་ཡེ་ཝ ས་ནྟི་ཀེ སུ་ཏ་ནྟི དཱི་པེ་ཏི.
ས་བྦ་སཾ་ཡོ་ཛ་ནཱ་ཏཱི་ཏནྟི ས་བྦཱ་ནི ད་ས་ཝི་དྷ་སཾ་ཡོ་ཛ་ནཱ་ནི ཨ་ཏི་ཀྐ་ནྟཾ. ཝ་ནཱ ནི་བྦ་ན་མཱ་ག་ཏནྟི ཀི་ལེ་ས་ཝ་ན་ཏོ ནི་བྦ་ནཾ ཀི་ལེ་ས་ཝ་ན་ར་ཧི་ཏཾ ནི་བྦཱ་ནཾ ཨཱ་ག་ཏཾ ས་མྤ་ཏྟཾ. ཀཱ་མེ་ཧི ནེ་ཀྑ་མྨ་ར་ཏནྟི དུ་ཝི་དྷེ་ཧི ཀཱ་མེ་ཧི ནི་ཀྑ་ནྟ་ཏྟཱ པ་བྦ་ཛྫཱ ཨ་ཊྛ ས་མཱ་པ་ཏྟི་ཡོ ཙ་ཏྟཱ་རོ ཙ ཨ་རི་ཡ་མ་གྒཱ ཀཱ་མེ་ཧི ནེ་ཀྑ་མྨཾ ནཱ་མ, ཏ་ཏྠ ར་ཏཾ ཨ་བྷི་ར་ཏཾ. མུ་ཏྟཾ སེ་ལཱ་ཝ ཀ་ཉྩ་ནནྟི སེ་ལ་དྷཱ་ཏུ་ཏོ མུ་ཏྟཾ ཀ་ཉྩ་ན་ས་དི་སཾ.
ས་བྦེ ཨ་ཙྩ་རུ་ཙཱིཏི ས་བྦ་ས་ཏྟེ ཨ་ཏི་ཀྐ་མི་ཏྭཱ པ་ཝ་ཏྟ་རུ་ཙི. ཨ་ཊྛ་མ་ཀ་ཉྷི ཨ་ཏི་ཀྐ་མི་ཏྭཱ པ་ཝ་ཏྟ་རུ་ཙི་ཏཱ་ཡ སོ་ཏཱ་པ་ནྣོ ཨ་ཙྩ་རུ་ཙི ནཱ་མ, སོ་ཏཱ་པ་ནྣཾ ཨ་ཏི་ཀྐ་མི་ཏྭཱ པ་ཝ་ཏྟ་རུ་ཙི་ཏཱ་ཡ ས་ཀ་དཱ་གཱ་མཱི…པེ… ཁཱི་ཎཱ་ས་ཝཾ ཨ་ཏི་ཀྐ་མི་ཏྭཱ པ་ཝ་ཏྟ་རུ་ཙི་ཏཱ་ཡ པ་ཙྩེ་ཀ་ས་མྦུ་དྡྷོ, པ་ཙྩེ་ཀ་ས་མྦུ་དྡྷཾ ཨ་ཏི་ཀྐ་མི་ཏྭཱ པ་ཝ་ཏྟ་རུ་ཙི་ཏཱ་ཡ ས་མྨཱ་ས་མྦུ་དྡྷོ ཨ་ཙྩ་རུ་ཙི ནཱ་མ. ཧི་མ་ཝཱ་ཝ་ཉྙེ སི་ལུ་ཙྩ་ཡེཏི ཡ་ཐཱ ཧི་མ་ཝཱ པ་བྦ་ཏ་རཱ་ཛཱ ཨ་ཉྙེ པ་བྦ་ཏེ ཨ་ཏི་རོ་ཙ་ཏི, ཨེ་ཝཾ ཨ་ཏི་རོ་ཙ་ཏཱི་ཏི ཨ་ཏྠོ. ས་ཙྩ་ནཱ་མོཏི ཏ་ཙྪ་ནཱ་མོ བྷཱུ་ཏ་ནཱ་མོ ཨཱ་གུཾ ཨ་ཀ་ར་ཎེ་ནེ་ཝ ནཱ་གོ་ཏི ཨེ་ཝཾ ཨ་ཝི་ཏ་ཐ་ནཱ་མོ.
སོ་ར་ཙྩནྟི སུ་ཙི་སཱི་ལཾ. ཨ་ཝི་ཧིཾ་སཱཏི ཀ་རུ་ཎཱ ཙ ཀ་རུ་ཎཱ་པུ་བྦ་བྷཱ་གོ ཙ. པཱ་དཱ ནཱ་ག་སྶ ཏེ དུ་ཝེཏི ཏེ བུ་དྡྷ་ནཱ་ག་སྶ དུ་ཝེ པུ་རི་མ་པཱ་དཱ.
ཏ་པོཏི དྷུ་ཏ་ས་མཱ་དཱ་ནཾ. བྲ་ཧྨ་ཙ་རི་ཡནྟི ཨ་རི་ཡ་མ་གྒ་སཱི་ལཾ. ཙ་ར་ཎཱ ནཱ་ག་སྶ ཏྱཱ་པ་རེཏི ཏེ བུ་དྡྷ་ནཱ་ག་སྶ ཨ་པ་རེ དྭེ པ་ཙྪི་མ་པཱ་དཱ. ས་དྡྷཱ་ཧ་ཏྠོཏི ས་དྡྷཱ་མ་ཡཱ་ཡ སོ་ཎྜཱ་ཡ ས་མ་ནྣཱ་ག་ཏོ. ཨུ་པེ་ཀྑཱ་སེ་ཏ་ད་ནྟ་ཝཱཏི ཚ་ལ༹་ངྒུ་པེ་ཀྑཱ་མ་ཡེ་ཧི སེ་ཏ་ད་ནྟེ་ཧི ས་མ་ནྣཱ་ག་ཏོ.
ས་ཏི གཱི་ཝཱཏི ཡ་ཐཱ ནཱ་ག་སྶ ཨ་ངྒ་པ་ཙྩ་ངྒ་སྨིཾ སི་རཱ་ཛཱ་ལཱ་ནཾ གཱི་ཝཱ པ་ཏི་ཊྛཱ, ཨེ་ཝཾ བུ་དྡྷ་ནཱ་ག་སྶ སོ་ར་ཙྩཱ་དཱི་ནཾ དྷ་མྨཱ་ནཾ ས་ཏི. ཏེ་ན ཝུ་ཏྟཾ – ‘‘ས་ཏི གཱི་ཝཱ’’ཏི. སི་རོ པ་ཉྙཱཏི ཡ་ཐཱ ཧ་ཏྠི་ནཱ་ག་སྶ སི་རོ ཨུ་ཏྟ་མ་ངྒོ, ཨེ་ཝཾ བུ་དྡྷ་ནཱ་ག་སྶ ས་བྦ་ཉྙུ་ཏ་ཉཱ་ཎཾ. ཏེ་ན ཧི སོ ས་བྦ་དྷ་མྨེ ཛཱ་ནཱ་ཏི. ཏེ་ན ཝུ་ཏྟཾ – ‘‘སི་རོ པ་ཉྙཱ’’ཏི. ཝཱི་མཾ་སཱ དྷ་མྨ་ཙི་ནྟ་ནཱཏི ཡ་ཐཱ ཧ་ཏྠི་ནཱ་ག་སྶ ཨ་གྒ་སོ་ཎྜོ ཝཱི་མཾ་སཱ ནཱ་མ ཧོ་ཏི. སོ ཏཱ་ཡ ཐ་དྡྷ་མུ་དུ་ཀཾ ཁཱ་དི་ཏ་བྦཱ་ཁཱ་དི་ཏ་བྦ་ཉྩ ཝཱི་མཾ་ས་ཏི, ཏ་ཏོ པ་ཧཱ་ཏ་བྦཾ པ་ཛ་ཧ་ཏི, ཨཱ་དཱ་ཏ་བྦཾ ཨཱ་དི་ཡ་ཏི, ཨེ་ཝ་མེ་ཝ བུ་དྡྷ་ནཱ་ག་སྶ དྷ་མྨ་ཀོ་ཊྛཱ་ས་པ་རི་ཙྪེ་ད་ཀ་ཉཱ་ཎ་ས་ངྑཱ་ཏཱ དྷ་མྨ་ཙི་ནྟ་ནཱ ཝཱི་མཾ་སཱ. ཏེ་ན ཧི ཉཱ་ཎེ་ན སོ བྷ་བྦཱ་བྷ་བྦེ ཛཱ་ནཱ་ཏི. ཏེ་ན ཝུ་ཏྟཾ – ‘‘ཝཱི་མཾ་སཱ དྷ་མྨ་ཙི་ནྟ་ནཱ’’ཏི. དྷ་མྨ་ཀུ་ཙྪི་ས་མཱ་ཏ་པོཏི དྷ་མྨོ ཝུ་ཙྩ་ཏི ཙ་ཏུ་ཏྠ་ཛ྄ཛྷཱ་ན་ས་མཱ་དྷི, ཀུ་ཙྪི་ཡེ་ཝ ས་མཱ་ཏ་པོ ཀུ་ཙྪི་ས་མཱ་ཏ་པོ. ས་མཱ་ཏ་པོ ནཱ་མ ས་མཱ་ཏ་པ་ན་ཊྛཱ་ནཾ. དྷ་མྨོ ཀུ་ཙྪི་ས་མཱ་ཏ་པོ ཨ་སྶཱ་ཏི དྷ་མྨ་ཀུ་ཙྪི་ས་མཱ་ཏ་པོ. ཙ་ཏུ་ཏྠ་ཛ྄ཛྷཱ་ན་ས་མཱ་དྷི་སྨིཾ ཋི་ཏ་སྶ ཧི ཏེ ཏེ ཨི་དྡྷི་ཝི་དྷཱ་དི་དྷ་མྨཱ ཨི་ཛ྄ཛྷ་ནྟི, ཏ་སྨཱ སོ ཀུ་ཙྪི་ས་མཱ་ཏ་པོ་ཏི ཝུ་ཏྟོ. ཝི་ཝེ་ཀོཏི ཀཱ་ཡ་ཙི་ཏྟ་ཨུ་པ་དྷི་ཝི་ཝེ་ཀོ. ཡ་ཐཱ ནཱ་ག་སྶ ཝཱ་ལ་དྷི མ་ཀྑི་ཀཱ ཝཱ་རེ་ཏི, ཨེ་ཝཾ ཏ་ཐཱ་ག་ཏ་སྶ ཝི་ཝེ་ཀོ ག་ཧ་ཊྛ་པ་བྦ་ཛི་ཏེ ཝཱ་རེ་ཏི. ཏ་སྨཱ སོ ཝཱ་ལ་དྷཱིཏི ཝུ་ཏྟོ.
ཛྷཱ་ཡཱིཏི དུ་ཝི་དྷེ་ན ཛྷཱ་ནེ་ན ཛྷཱ་ཡཱི. ཨ་སྶཱ་ས་ར་ཏོཏི ནཱ་ག་སྶ ཧི ཨ་སྶཱ་ས་པ་སྶཱ་སཱ ཝི་ཡ བུ་དྡྷ་ནཱ་ག་སྶ ཕ་ལ་ས་མཱ་པ་ཏྟི, ཏ་ཏྠ ར་ཏོ, ཨ་སྶཱ་ས་པ་སྶཱ་སེ་ཧི ཝི་ཡ ཏཱ་ཡ ཝི་ནཱ ན ཝ་ཏྟ་ཏཱི་ཏི ཨ་ཏྠོ. ས་བྦ་ཏྠ སཾ་ཝུ་ཏོཏི ས་བྦ་དྭཱ་རེ་སུ སཾ་ཝུ་ཏོ. ཨ་ན་ཝ་ཛྫཱ་ནཱིཏི ས་མྨཱ་ཨཱ་ཛཱི་ཝེ་ན ཨུ་པྤ་ནྣ་བྷོ་ཛ་ནཱ་ནི. སཱ་ཝ་ཛྫཱ་ནཱིཏི པ་ཉྩ་ཝི་དྷ་མི་ཙྪཱ་ཛཱི་ཝ་ཝ་སེ་ན ཨུ་པྤ་ནྣ་བྷོ་ཛ་ནཱ་ནི.
ཨ་ཎུཾ་ཐཱུ་ལནྟི ཁུ་དྡ་ཀ་ཉྩ མ་ཧ་ནྟ་ཉྩ. ས་བྦཾ ཚེ་ཏྭཱ་ན བ་ནྡྷ་ནནྟི ས་བྦཾ ད་ས་ཝི་དྷ་མྤི སཾ་ཡོ་ཛ་ནཾ ཚི་ནྡི་ཏྭཱ་ན. ནུ་པ་ལི་པྤ་ཏི ལོ་ཀེ་ནཱཏི ལོ་ཀེ་ན ས་དྡྷིཾ ཏ་ཎྷཱ་མཱ་ན་དི་ཊྛི་ལེ་པེ་ཧི ན ལི་པྤ་ཏི. མ་ཧཱ་གི་ནཱིཏི མ་ཧཱ་ཨ་གྒི. ཝི་ཉྙཱུ་ཧི དེ་སི་ཏཱཏི ཨི་དྷ པ་ཊི་ས་མྦྷི་དཱ་པྤ་ཏྟོ ཀཱ་ལུ༹་དཱ་ཡི་ཏྠེ་རོ་ཝ ཝི་ཉྙཱུ པ་ཎྜི་ཏོ, ཏེ་ན དེ་སི་ཏཱ་ཏི ཨ་ཏྠོ. ཝི་ཉྙ་སྶ་ནྟི མ་ཧཱ་ནཱ་གཱ, ནཱ་གཾ ནཱ་གེ་ན དེ་སི་ཏནྟི ཨུ་དཱ་ཡི་ཏྠེ་ར་ནཱ་གེ་ན དེ་སི་ཏཾ བུ་དྡྷ་ནཱ་གཾ ཨི་ཏ་རེ ཁཱི་ཎཱ་ས་ཝཱ ནཱ་གཱ ཝི་ཛཱ་ནི་སྶ་ནྟི.
ས་རཱི་རཾ ཝི་ཛ་ཧཾ ནཱ་གོ, པ་རི་ནི་བྦི་སྶ་ཏཱིཏི བོ་དྷི་པ་ལླ་ངྐེ ཀི་ལེ་ས་པ་རི་ནི་བྦཱ་ནེ་ན པ་རི་ནི་བྦུ་ཏོ, ཡ་མ་ཀ་སཱ་ལ་ནྟ་རེ ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ པ་རི་ནི་བྦཱ་ཡི་སྶ་ཏི. ཨེ་ཝཾ པ་ཊི་ས་མྦྷི་དཱ་པྤ་ཏྟོ ཨུ་དཱ་ཡི་ཏྠེ་རོ སོ་ལ༹་ས་ཧི གཱ་ཐཱ་ཧི ཙ་ཏུ་ས་ཊྛི་ཡཱ པ་དེ་ཧི ད་ས་བ་ལ་སྶ ཝ་ཎྞཾ ཀ་ཐེ་ནྟོ དེ་ས་ནཾ ནི་ཊྛཱ་པེ་སི. བྷ་ག་ཝཱ ཨ་ནུ་མོ་དི. དེ་ས་ནཱ་ཝ་སཱ་ནེ ཙ་ཏུ་རཱ་སཱི་ཏི་པཱ་ཎ་ས་ཧ་སྶཱ་ནི ཨ་མ་ཏ་པཱ་ནཾ པི་ཝིཾ་སཱུ་ཏི.
༢. མི་ག་སཱ་ལཱ་སུ་ཏྟ་ཝ་ཎྞ་ནཱ
༤༤. དུ་ཏི་ཡེ ཀ་ཐཾ ཀ་ཐཾ ནཱ་མཱཏི ཀེ་ན ཀེ་ན ཀཱ་ར་ཎེ་ན. ཨ་ཉྙེ་ཡྻོཏི ཨཱ་ཛཱ་ནི་ཏ་བྦོ. ཡ་ཏྲ ཧི ནཱ་མཱཏི ཡ་སྨིཾ ནཱ་མ དྷ་མྨེ. ས་མ་ས་མ་ག་ཏི་ཀཱཏི ས་མ་བྷཱ་ཝེ་ནེ་ཝ ས་མ་ག་ཏི་ཀཱ. བྷ་ཝི་སྶ་ནྟཱིཏི ཛཱ་ཏཱ. ས་ཀ་དཱ་གཱ་མི་པ་ཏྟོ ཏུ་སི་ཏཾ ཀཱ་ཡཾ ཨུ་པ་པ་ནྣོཏི ས་ཀ་དཱ་གཱ་མི་པུ་གྒ་ལོ ཧུ་ཏྭཱ ཏུ་སི་ཏ་བྷ་ཝ་ནེ་ཡེ་ཝ ནི་བྦ་ཏྟོ. ཀ་ཐཾ ཀ་ཐཾ ནཱ་མཱཏི ཀེ་ན ཀེ་ན ནུ ཁོ ཀཱ་ར་ཎེ་ན, ཀིཾ ནུ ཁོ ཛཱ་ནི་ཏྭཱ དེ་སི་ཏོ, ཨུ་དཱ་ཧུ ཨ་ཛཱ་ནི་ཏྭཱ་ཏི. ཐེ་རོ ཀཱ་ར་ཎཾ ཨ་ཛཱ་ན་ནྟོ ཨེ་ཝཾ ཁོ པ་ནེ་ཏཾ བྷ་གི་ནི བྷ་ག་ཝ་ཏཱ བྱཱ་ཀ་ཏནྟི ཨཱ་ཧ.
ཨ་མྨ་ཀཱ ཨ་མྨ་ཀ་པ་ཉྙཱཏི ཨི་ཏྠཱི ཧུ་ཏྭཱ ཨི་ཏྠི་ས་ཉྙཱ་ཡ ཨེ་ཝ ས་མ་ནྣཱ་ག་ཏཱ. ཀེ ཙ པུ་རི་ས་པུ་གྒ་ལ་པ་རོ་པ་རི་ཡ་ཉཱ་ཎེཏི ཨེ་ཏྠ པུ་རི་ས་པུ་གྒ་ལ་པ་རོ་པ་རི་ཡ་ཉཱ་ཎཾ ཝུ་ཙྩ་ཏི པུ་རི་ས་པུ་གྒ་ལཱ་ནཾ ཏི་ཀྑ་མུ་དུ་ཝ་སེ་ན ཨི་ནྡྲི་ཡ་པ་རོ་པ་རི་ཡ་ཉཱ་ཎཾ. ཏ་སྨཱ ཀཱ ཙ བཱ་ལཱ མི་ག་སཱ་ལཱ, ཀེ ཙ པུ་རི་ས་པུ་གྒ་ལཱ་ནཾ ཨི་ནྡྲི་ཡ་པ་རོ་པ་རི་ཡ་ཉཱ་ཎེ ཨ་པྤ་ཊི་ཧ་ཏ་ཝི་ས་ཡཱ ས་མྨཱ་ས་མྦུ་དྡྷཱ, ཨུ་བྷ་ཡ་མེ་ཏཾ དཱུ་རེ སུ་ཝི་དཱུ་རེ་ཏི ཨ་ཡ་མེ་ཏྠ ས་ངྑེ་པོ.
ཨི་དཱ་ནི མི་ག་སཱ་ལཱ་ཡ ཨ་ཏྟ་ནོ དཱུ་ར་བྷཱ་ཝཾ ད་སྶེ་ནྟོ ཚ་ཡི་མེ, ཨཱ་ན་ནྡཱཏི་ཨཱ་དི་མཱ་ཧ. སོ་ར་ཏོ ཧོ་ཏཱིཏི པཱ་པ་ཏོ སུ་ཊྛུ ཨོ་ར་ཏོ ཝི་ར་ཏོ ཧོ་ཏི. སུ་ར་ཏོ་ཏི་པི པཱ་ཋོ. ཨ་བྷི་ན་ནྡ་ནྟི ས་བྲ་ཧྨ་ཙཱ་རཱི ཨེ་ཀ་ཏྟ་ཝཱ་སེ་ནཱཏི ཏེ་ན ས་དྡྷིཾ ཨེ་ཀ་ཏོ་ཝཱ་སེ་ན ས་བྲ་ཧྨ་ཙཱ་རཱི ཨ་བྷི་ན་ནྡ་ནྟི ཏུ་སྶ་ནྟི. ཨེ་ཀ་ནྟ་ཝཱ་སེ་ནཱ་ཏི་པི པཱ་ཋོ, ས་ཏ་ཏ་ཝཱ་སེ་ནཱ་ཏི ཨ་ཏྠོ. ས་ཝ་ནེ་ན་པི ཨ་ཀ་ཏཾ ཧོ་ཏཱིཏི སོ་ཏ་བྦ་ཡུ་ཏྟ་ཀཾ ཨ་སུ་ཏཾ ཧོ་ཏི. བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏཱིཏི ཨེ་ཏྠ བཱ་ཧུ་ས་ཙྩཾ ཝུ་ཙྩ་ཏི ཝཱི་རི་ཡཾ, ཝཱི་རི་ཡེ་ན ཀ་ཏྟ་བྦ་ཡུ་ཏྟ་ཀཾ ཨ་ཀ་ཏཾ ཧོ་ཏཱི་ཏི ཨ་ཏྠོ. དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏཱིཏི དི་ཊྛི་ཡཱ པ་ཊི་ཝི་ཛ྄ཛྷི་ཏ་བྦཾ ཨ་པྤ་ཊི་ཝི་དྡྷཾ ཧོ་ཏི. སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏཱིཏི ཀཱ་ལཱ་ནུ་ཀཱ་ལཾ དྷ་མྨ་སྶ་ཝ་ནཾ ནི་སྶཱ་ཡ པཱི་ཏི་པཱ་མོ་ཛྫཾ ན ལ་བྷ་ཏི. ཧཱ་ན་གཱ་མཱི་ཡེ་ཝ ཧོ་ཏཱིཏི པ་རི་ཧཱ་ནི་མེ་ཝ ག་ཙྪ་ཏི.
པ་མཱ་ཎི་ཀཱཏི པུ་གྒ་ལེ་སུ པ་མཱ་ཎ་གྒཱ་ཧ་ཀཱ. པ་མི་ན་ནྟཱིཏི པ་མེ་ཏུཾ ཏུ་ལེ་ཏུཾ ཨཱ་ར་བྷ་ནྟི. ཨེ་ཀོ ཧཱི་ནོཏི ཨེ་ཀོ གུ་ཎེ་ཧི ཧཱི་ནོ. ཨེ་ཀོ པ་ཎཱི་ཏོཏི ཨེ་ཀོ གུ་ཎེ་ཧི པ་ཎཱི་ཏོ. ཏཾ ཧཱིཏི ཏཾ པ་མཱ་ཎ་ཀ་ར་ཎཾ.
ཨ་བྷི་ཀྐ་ནྟ་ཏ་རོཏི སུ་ནྡ་ར་ཏ་རོ. པ་ཎཱི་ཏ་ཏ་རོཏི ཨུ་ཏྟ་མ་ཏ་རོ. དྷ་མྨ་སོ་ཏོ ནི་བྦ་ཧ་ཏཱིཏི སཱུ་རཾ ཧུ་ཏྭཱ པ་ཝ་ཏྟ་མཱ་ན་ཝི་པ་སྶ་ནཱ་ཉཱ་ཎཾ ནི་བྦ་ཧ་ཏི, ཨ་རི་ཡ་བྷཱུ་མིཾ ས་མྤཱ་པེ་ཏི. ཏ་ད་ནྟ་རཾ ཀོ ཛཱ་ནེ་ཡྻཱཏི ཏཾ ཨ་ནྟ་རཾ ཏཾ ཀཱ་ར་ཎཾ ཨ་ཉྙ་ཏྲ ཏ་ཐཱ་ག་ཏེ་ན ཀོ ཛཱ་ནེ་ཡྻཱ་ཏི ཨ་ཏྠོ.
ཀོ་དྷ་མཱ་ནོཏི ཀོ་དྷོ ཙ མཱ་ནོ ཙ. ལོ་བྷ་དྷ་མྨཱཏི ལོ་བྷོ་ཡེ་ཝ. ཝ་ཙཱི་ས་ངྑཱ་རཱཏི ཨཱ་ལཱ་པ་ས་ལླཱ་པ་ཝ་སེ་ན ཝ་ཙ་ནཱ་ནེ་ཝ. ཡོ ཝཱ པ་ན་སྶ མཱ་དི་སོཏི ཡོ ཝཱ པ་ན ཨ་ཉྙོ་པི མ་ཡཱ ས་དི་སོ ས་མྨཱ་ས་མྦུ་དྡྷོ་ཡེ་ཝ ཨ་སྶ, སོ པུ་གྒ་ལེ་སུ པ་མཱ་ཎཾ ག་ཎྷེ་ཡྻཱ་ཏི ཨ་ཏྠོ. ཁ་ཉྙ་ཏཱིཏི གུ་ཎ་ཁ་ཎ་ནཾ པཱ་པུ་ཎཱ་ཏི. ཨི་མེ ཁོ, ཨཱ་ན་ནྡ, ཚ པུ་གྒ་ལཱཏི དྭེ སོ་ར་ཏཱ, དྭེ ཨ་དྷི་ག་ཏ་ཀོ་དྷ་མཱ་ན་ལོ་བྷ་དྷ་མྨཱ, དྭེ ཨ་དྷི་ག་ཏ་ཀོ་དྷ་མཱ་ན་ཝ་ཙཱི་ས་ངྑཱ་རཱ་ཏི ཨི་མེ ཚ པུ་གྒ་ལཱ. ག་ཏིནྟི ཉཱ་ཎ་ག་ཏིཾ. ཨེ་ཀ་ངྒ་ཧཱི་ནཱཏི ཨེ་ཀེ་ཀེ་ན གུ་ཎ་ངྒེ་ན ཧཱི་ནཱ. པཱུ་ར་ཎོ སཱི་ལེ་ན ཝི་སེ་སཱི ཨ་ཧོ་སི, ཨི་སི་ད་ཏྟོ པ་ཉྙཱ་ཡ. པཱུ་ར་ཎ་སྶ སཱི་ལཾ ཨི་སི་ད་ཏྟ་སྶ པ་ཉྙཱ་ཋཱ་ནེ ཋི་ཏཾ, ཨི་སི་ད་ཏྟ་སྶ པ་ཉྙཱ པཱུ་ར་ཎ་སྶ སཱི་ལ་ཊྛཱ་ནེ ཋི་ཏཱ་ཏི.
༣. ཨི་ཎ་སུ་ཏྟ་ཝ་ཎྞ་ནཱ
༤༥. ཏ་ཏི་ཡེ དཱ་ལི་དྡི་ཡནྟི ད་ལི་དྡ་བྷཱ་ཝོ. ཀཱ་མ་བྷོ་གི་ནོཏི ཀཱ་མེ བྷུ་ཉྫ་ན་ཀ་ས་ཏྟ་སྶ. ཨ་སྶ་ཀོཏི ཨ་ཏྟ་ནོ ས་ནྟ་ཀེ་ན ར་ཧི་ཏོ. ཨ་ནཱ་ལ༹ྷི་ཀོཏི ན ཨ་ཌྜྷོ. ཨི་ཎཾ ཨཱ་དི་ཡ་ཏཱིཏི ཛཱི་ཝི་ཏུཾ ཨ་ས་ཀྐོ་ནྟོ ཨི་ཎཾ ཨཱ་དི་ཡ་ཏི. ཝ་ཌྜྷིཾ པ་ཊི་སྶུ་ཎཱ་ཏཱིཏི དཱ་ཏུཾ ཨ་ས་ཀྐོ་ནྟོ ཝ་ཌྜྷིཾ ད་སྶཱ་མཱི་ཏི པ་ཊི་ཛཱ་ནཱ་ཏི. ཨ་ནུ་ཙ་ར་ནྟི་པི ནནྟི པ་རི་ས་མ་ཛ྄ཛྷ་ག་ཎ་མ་ཛ྄ཛྷཱ་དཱི་སུ ཨཱ་ཏ་པ་ཋ་པ་ན་པཾ་སུ་ཨོ་ཀི་ར་ཎཱ་དཱི་ཧི ཝི་པྤ་ཀཱ་རཾ པཱ་པེ་ནྟོ པ་ཙྪ་ཏོ པ་ཙྪ་ཏོ ཨ་ནུ་བ་ནྡྷ་ནྟི. ས་དྡྷཱ ན་ཏྠཱིཏི ཨོ་ཀ་པྤ་ན་ཀ་ས་དྡྷཱ་མ་ཏྟ་ཀ་མྤི ན་ཏྠི. ཧི་རཱི ན་ཏྠཱིཏི ཧི་རཱི་ཡ་ནཱ་ཀཱ་ར་མ་ཏྟ་ཀ་མྤི ན་ཏྠི. ཨོ་ཏྟ་པྤཾ ན་ཏྠཱིཏི བྷཱ་ཡ་ནཱ་ཀཱ་ར་མ་ཏྟ་ཀ་མྤི ན་ཏྠི. ཝཱི་རི་ཡཾ ན་ཏྠཱིཏི ཀཱ་ཡི་ཀ་ཝཱི་རི་ཡ་མ་ཏྟ་ཀ་མྤི ན་ཏྠི. པ་ཉྙཱ ན་ཏྠཱིཏི ཀ་མྨ་སྶ་ཀ་ཏ་པ་ཉྙཱ་མ་ཏྟ་ཀ་མྤི ན་ཏྠི. ཨི་ཎཱ་དཱ་ན་སྨིཾ ཝ་དཱ་མཱིཏི ཨི་ཎ་གྒ་ཧ་ཎཾ ཝ་དཱ་མི. མཱ མཾ ཛ་ཉྙཱུཏི མཱ མཾ ཛཱ་ནཱ་ཏུ.
དཱ་ལི་དྡི་ཡཾ དུ་ཀྑནྟི དྷ་ན་ད་ལི་དྡ་བྷཱ་ཝོ དུ་ཀྑཾ. ཀཱ་མ་ལཱ་བྷཱ་བྷི་ཛ་པྤི་ནནྟི ཀཱ་མ་ལཱ་བྷཾ པ་ཏྠེ་ནྟཱ་ནཾ. པཱ་པ་ཀ་མྨ་ཝི་ནི་བྦ་ཡོཏི པཱ་པ་ཀ་མྨ་ཝ་ཌྜྷ་ཀོ. སཾ་ས་པྤ་ཏཱིཏི པ་རི་པྥ་ནྡ་ཏི. ཛཱ་ནནྟི ཛཱ་ན་ནྟོ. ཡ་སྶ ཝི་པྤ་ཊི་སཱ་ར་ཛཱཏི ཡེ ཨ་སྶ ཝི་པྤ་ཊི་སཱ་ར་ཏོ ཛཱ་ཏཱ. ཡོ་ནི་མ་ཉྙ་ཏ་རནྟི ཨེ་ཀཾ ཏི་ར་ཙྪཱ་ན་ཡོ་ནིཾ. ད་དཾ ཙི་ཏྟཾ པ་སཱ་ད་ཡནྟི ཙི་ཏྟཾ པ་སཱ་དེ་ནྟོ ད་ད་མཱ་ནོ.
ཀ་ཊ་གྒཱ་ཧོཏི ཛ་ཡ་གྒཱ་ཧོ, ཨ་ན་པ་རཱ་དྷ་གྒཱ་ཧོ ཧོ་ཏི. གྷ་ར་མེ་སི་ནོཏི གྷ་རཱ་ཝཱ་སཾ པ་རི་ཡེ་ས་ནྟ་སྶ ཝ་ས་མཱ་ན་སྶ ཝཱ. ཙཱ་གོ པུ་ཉྙཾ པ་ཝ་ཌྜྷ་ཏཱིཏི ཙཱ་གོ་ཏི ས་ངྑཾ ག་ཏཾ པུ་ཉྙཾ ཝ་ཌྜྷ་ཏི. ཙཱ་གཱ པུ་ཉྙ་ནྟི ཝཱ པཱ་ཋོ. པ་ཏི་ཊྛི་ཏཱཏི པ་ཏི་ཊྛི་ཏ་ས་དྡྷཱ ནཱ་མ སོ་ཏཱ་པ་ནྣ་སྶ ས་དྡྷཱ. ཧི་རི་མ་ནོཏི ཧི་རི་ས་མྤ་ཡུ་ཏྟ་ཙི་ཏྟོ. ནི་རཱ་མི་སཾ སུ་ཁནྟི ཏཱི་ཎི ཛྷཱ་ནཱ་ནི ནི་སྶཱ་ཡ ཨུ་པྤ་ཛྫ་ན་ཀ་སུ་ཁཾ. ཨུ་པེ་ཀྑནྟི ཙ་ཏུ་ཏྠ་ཛ྄ཛྷཱ་ནུ་པེ་ཀྑཾ. ཨཱ་ར་དྡྷ་ཝཱི་རི་ཡོཏི པ་རི་པུ་ཎྞ་པ་གྒ་ཧི་ཏ་ཝཱི་རི་ཡོ. ཛྷཱ་ནཱ་ནི ཨུ་པ་ས་མྤ་ཛྫཱཏི ཙ་ཏྟཱ་རི ཛྷཱ་ནཱ་ནི པ་ཏྭཱ. ཨེ་ཀོ་དི ནི་པ་ཀོ ས་ཏོཏི ཨེ་ཀ་གྒ་ཙི་ཏྟོ ཀ་མྨ་སྶ་ཀ་ཏ་ཉཱ་ཎ་ས་ཏཱི་ཧི ཙ ས་མ་ནྣཱ་ག་ཏོ.
ཨེ་ཝཾ ཉ་ཏྭཱ ཡ་ཐཱ་བྷཱུ་ཏནྟི ཨེ་ཝཾ ཨེ་ཏྟ་ཀཾ ཀཱ་ར་ཎཾ ཡ་ཐཱ་ས་བྷཱ་ཝཾ ཛཱ་ནི་ཏྭཱ. ས་བྦ་སཾ་ཡོ་ཛ་ན་ཀྑ་ཡེཏི ནི་བྦཱ་ནེ. ས་བྦ་སོཏི ས་བྦཱ་ཀཱ་རེ་ན. ཨ་ནུ་པཱ་དཱ་ཡཱཏི ཨ་གྒ་ཧེ་ཏྭཱ. ས་མྨཱ ཙི་ཏྟཾ ཝི་མུ་ཙྩ་ཏཱིཏི ཨི་དཾ ཝུ་ཏྟཾ ཧོ་ཏི – ས་བྦ་སཾ་ཡོ་ཛ་ན་ཀྑ་ཡ་ས་ངྑཱ་ཏེ ནི་བྦཱ་ནེ ས་བྦ་སོ ཨ་ནུ་པཱ་དི་ཡི་ཏྭཱ ས་མྨཱ ཧེ་ཏུ་ནཱ ན་ཡེ་ན མ་གྒ་ཙི་ཏྟཾ ཝི་མུ་ཙྩ་ཏི. ‘‘ཨེ་ཏཾ ཉ་ཏྭཱ ཡ་ཐཱ་བྷཱུ་ཏཾ, ས་བྦ་སཾ་ཡོ་ཛ་ན་ཀྑ་ཡ’’ནྟི་པི པཱ་ལི༹་ཡཾ ལི་ཁི་ཏཾ, ཏ་སྶ ཨེ་ཏཾ ས་བྦ་སཾ་ཡོ་ཛ་ན་ཀྑ་ཡ་ས་ངྑཱ་ཏཾ ནི་བྦཱ་ནཾ ཡ་ཐཱ་བྷཱུ་ཏཾ ཉ་ཏྭཱ་ཏི ཨ་ཏྠོ. པུ་རི་མ་པ་ཙྪི་མེ་ཧི པ་ན ས་དྡྷིཾ ན གྷ་ཊཱི་ཡ་ཏི.
ཏ་སྶ ས་མྨཱ ཝི་མུ་ཏྟ་སྶཱཏི ཏ་སྶ ས་མྨཱ ཝི་མུ་ཏྟ་སྶ ཁཱི་ཎཱ་ས་ཝ་སྶ. ཉཱ་ཎཾ ཧོ་ཏཱིཏི པ་ཙྩ་ཝེ་ཀྑ་ཎ་ཉཱ་ཎཾ ཧོ་ཏི. ཏཱ་དི་ནོཏི ཏཾ་ས་ཎྛི་ཏ་སྶ. ཨ་ཀུ་པྤཱཏི ཨ་ཀུ་པྤཱ་ར་མྨ་ཎ་ཏྟཱ ཀུ་པྤ་ཀཱ་ར་ཎཱ་ནཾ ཀི་ལེ་སཱ་ན་ཉྩ ཨ་བྷཱ་ཝེ་ན ཨ་ཀུ་པྤཱ. ཝི་མུ་ཏྟཱིཏི མ་གྒ་ཝི་མུ་ཏྟི་པི ཕ་ལ་ཝི་མུ་ཏྟི་པི. བྷ་ཝ་སཾ་ཡོ་ཛ་ན་ཀྑ་ཡེཏི བྷ་ཝ་སཾ་ཡོ་ཛ་ན་ཀྑ་ཡ་ས་ངྑཱ་ཏེ ནི་བྦཱ་ནེ བྷ་ཝ་སཾ་ཡོ་ཛ་ནཱ་ན་ཉྩ ཁ་ཡ་ནྟེ ཨུ་པྤ་ནྣཱ. ཨེ་ཏཾ ཁོ པ་ར་མཾ ཉཱ་ཎནྟི ཨེ་ཏཾ མ་གྒ་ཕ་ལ་ཉཱ་ཎཾ པ་ར་མ་ཉཱ་ཎཾ ནཱ་མ. སུ་ཁ་མ་ནུ་ཏྟ་རནྟི ཨེ་ཏ་དེ་ཝ མ་གྒ་ཕ་ལ་སུ་ཁཾ ཨ་ནུ་ཏྟ་རཾ སུ་ཁཾ ནཱ་མ. ཨཱ་ཎ་ཎྱ་མུ་ཏྟ་མནྟི ས་བྦེ་སཾ ཨ་ཎ་ཎཱ་ནཾ ཁཱི་ཎཱ་ས་ཝོ ཨུ་ཏྟ་མ་ཨ་ཎ་ཎོ, ཏ་སྨཱ ཨ་ར་ཧ་ཏྟ་ཕ་ལཾ ཨཱ་ཎ་ཎྱ་མུ་ཏྟ་མ་ནྟི ཨ་ར་ཧ་ཏྟ་ཕ་ལེ་ན དེ་ས་ནཱ་ཡ ཀཱུ་ཊཾ ག་ཎྷི. ཨི་མ་སྨི་ཉྩ སུ་ཏྟེ ཝ་ཊྚ་མེ་ཝ ཀ་ཐེ་ཏྭཱ གཱ་ཐཱ་སུ ཝ་ཊྚ་ཝི་ཝ་ཊྚཾ ཀ་ཐི་ཏ་ནྟི.
༤. མ་ཧཱ་ཙུ་ནྡ་སུ་ཏྟ་ཝ་ཎྞ་ནཱ
༤༦. ཙ་ཏུ་ཏྠེ ཙེ་ཏཱི་སཱུཏི ཙེ་ཏི་ར་ཊྛེ. ས་ཡཾ་ཛཱ་ཏི་ཡནྟི ཨེ་ཝཾ་ནཱ་མ་ཀེ ནི་ག་མེ. མ་ཧཱ་ཙུ་ནྡོཏི དྷ་མྨ་སེ་ནཱ་པ་ཏི་སྶ ཀ་ནི་ཊྛ་བྷཱ་ཏི་ཀོ. དྷ་མྨེ ཡོ་གོ ཨ་ནུ་ཡོ་གོ ཨེ་ཏེ་ས་ནྟི དྷ་མྨ་ཡོ་གཱ. དྷ་མྨ་ཀ་ཐི་ཀཱ་ནཾ ཨེ་ཏཾ ནཱ་མཾ. ཛྷཱ་ཡ་ནྟཱི་ཏི ཛྷཱ་ཡཱི. ཨ་པ་སཱ་དེ་ནྟཱིཏི གྷ་ཊྚེ་ནྟི ཧིཾ་ས་ནྟི. ཛྷཱ་ཡ་ནྟཱིཏི ཙི་ནྟེ་ནྟི. པ་ཛ྄ཛྷཱ་ཡ་ནྟཱིཏི་ཨཱ་དཱི་ནི ཨུ་པ་ས་གྒ་ཝ་སེ་ན ཝ་ཌྜྷི་ཏཱ་ནི. ཀི་མི་མེ ཛྷཱ་ཡ་ནྟཱིཏི ཀིཾ ནཱ་མ ཨི་མེ ཛྷཱ་ཡ་ནྟི. ཀི་ནྟི་མེ ཛྷཱ་ཡ་ནྟཱིཏི ཀི་མ་ཏྠཾ ཨི་མེ ཛྷཱ་ཡ་ནྟི. ཀ་ཐཾ ཨི་མེ ཛྷཱ་ཡ་ནྟཱིཏི ཀེ་ན ཀཱ་ར་ཎེ་ན ཨི་མེ ཛྷཱ་ཡ་ནྟི. ཨ་མ་ཏཾ དྷཱ་ཏུཾ ཀཱ་ཡེ་ན ཕུ་སི་ཏྭཱ ཝི་ཧ་ར་ནྟཱིཏི མ་ར་ཎ་ཝི་ར་ཧི་ཏཾ ནི་བྦཱ་ན་དྷཱ་ཏུཾ ས་ནྡྷཱ་ཡ ཀ་མྨ་ཊྛཱ་ནཾ ག་ཧེ་ཏྭཱ ཝི་ཧ་ར་ནྟཱ ཨ་ནུ་ཀྐ་མེ་ན ཏཾ ནཱ་མ་ཀཱ་ཡེ་ན ཕུ་སི་ཏྭཱ ཝི་ཧ་ར་ནྟི. ག་མྦྷཱི་རཾ ཨ་ཏྠ་པ་དནྟི གུ་ལ༹ྷཾ པ་ཊི་ཙྪ་ནྣཾ ཁ་ནྡྷ་དྷཱ་ཏུ་ཨཱ་ཡ་ཏ་ནཱ་དི་ཨ་ཏྠཾ. པ་ཉྙཱ་ཡ ཨ་ཏི་ཝི་ཛ྄ཛྷ པ་སྶ་ནྟཱིཏི ས་ཧ་ཝི་པ་སྶ་ནཱ་ཡ མ་གྒ་པ་ཉྙཱ་ཡ པ་ཊི་ཝི་ཛ྄ཛྷི་ཏྭཱ པ་སྶ་ནྟི. ཨི་མ་སྨིཾ པ་ན་ཏྠེ ས་མྨ་ས་ན་པ་ཊི་ཝེ་དྷ་པ་ཉྙཱ་པི ཨུ་གྒ་ཧ་པ་རི་པུ་ཙྪཱ་པ་ཉྙཱ་པི ཝ་ཊྚ་ཏི་ཡེ་ཝཱ་ཏི.
༥-༦. ས་ནྡི་ཊྛི་ཀ་སུ་ཏྟ་དྭ་ཡ་ཝ་ཎྞ་ནཱ
༤༧-༤༨. པ་ཉྩ་མེ ས་ནྟཾ ཝཱ ཨ་ཛ྄ཛྷ་ཏྟནྟི ནི་ཡ་ཀ་ཛ྄ཛྷ་ཏྟེ ཝི་ཛྫ་མཱ་ནཾ. ལོ་བྷོཏི་ཨཱ་དཱི་ཧི ཏཱི་ཎི ཨ་ཀུ་ས་ལ་མཱུ་ལཱ་ནི ད་སྶི་ཏཱ་ནི. ལོ་བྷ་དྷ་མྨཱཏི་ཨཱ་དཱི་ཧི ཏཾ་ས་མྤ་ཡུ་ཏྟ་ཀཱ དྷ་མྨཱ. ཚ་ཊྛེ ཀཱ་ཡ་ས་ནྡོ་སནྟི ཀཱ་ཡ་དྭཱ་ར་སྶ དུ་སྶ་ནཱ་ཀཱ་རཾ. སེ་ས་དྭ་ཡེ་པི ཨེ་སེ་ཝ ན་ཡོ. ཨི་མེ་སུ དྭཱི་སུ སུ་ཏྟེ་སུ པ་ཙྩ་ཝེ་ཀྑ་ཎཱ་ཝ ཀ་ཐི་ཏཱ.
༧. ཁེ་མ་སུ་ཏྟ་ཝ་ཎྞ་ནཱ
༤༩. ས་ཏྟ་མེ ཝུ་སི་ཏ་ཝཱཏི ཝུ་ཏྠ་བྲ་ཧྨ་ཙ་རི་ཡ་ཝཱ་སོ. ཀ་ཏ་ཀ་ར་ཎཱི་ཡོཏི ཙ་ཏཱུ་ཧི མ་གྒེ་ཧི ཀ་ཏྟ་བྦཾ ཀ་ཏྭཱ ཋི་ཏོ. ཨོ་ཧི་ཏ་བྷཱ་རོཏི ཁ་ནྡྷ་བྷཱ་རཾ ཀི་ལེ་ས་བྷཱ་རཾ ཨ་བྷི་ས་ངྑཱ་ར་བྷཱ་ར་ཉྩ ཨོ་ཏཱ་རེ་ཏྭཱ ཋི་ཏོ. ཨ་ནུ་པྤ་ཏྟ་ས་ད་ཏྠོཏི ས་ད་ཏྠོ ཝུ་ཙྩ་ཏི ཨ་ར་ཧ་ཏྟཾ, ཏཾ པ་ཏྟོ་ཏི ཨ་ཏྠོ. པ་རི་ཀྑཱི་ཎ་བྷ་ཝ་སཾ་ཡོ་ཛ་ནོཏི ཁཱི་ཎ་བྷ་ཝ་བ་ནྡྷ་ནོ. ས་མྨ་ད་ཉྙཱ ཝི་མུ་ཏྟོཏི ས་མྨཱ ཧེ་ཏུ་ནཱ ཀཱ་ར་ཎེ་ན ཛཱ་ནི་ཏྭཱ ཝི་མུ་ཏྟོ. ཏ་སྶ ན ཨེ་ཝཾ ཧོ་ཏི ཨ་ཏྠི མེ སེ་ཡྻོ་ཏི ཝཱཏི་ཨཱ་དཱི་ཧི སེ་ཡྻ་སྶ སེ་ཡྻོ་ཧ་མ་སྨཱི་ཏི མཱ་ནཱ་ད་ཡོ ཏ་ཡོ མཱ་ནཱ པ་ཊི་ཀྑི་ཏྟཱ. ན ཧི ཁཱི་ཎཱ་ས་ཝ་སྶ ‘‘ཨ་ཏྠི མ་ཡ྄ཧཾ སེ་ཡྻོ, ཨ་ཏྠི ས་དི་སོ, ཨ་ཏྠི ཧཱི་ནོ’’ཏི མཱ་ནོ ཧོ་ཏི. ན་ཏྠི མེ སེ་ཡྻོཏི་ཨཱ་དཱི་ཧི་པི ཏེ་ཡེ་ཝ པ་ཊི་ཀྑི་ཏྟཱ. ན ཧི ཁཱི་ཎཱ་ས་ཝ་སྶ ‘‘ཨ་ཧ་མེ་ཝ སེ་ཡྻོ, ཨ་ཧཾ ས་དི་སོ, ཨ་ཧཾ ཧཱི་ནོ, ཨ་ཉྙེ སེ་ཡྻཱ་ད་ཡོ ན་ཏྠཱི’’ཏི ཨེ་ཝཾ མཱ་ནོ ཧོ་ཏི.
ཨ་ཙི་ར་པ་ཀྐ་ནྟེ་སཱུཏི ཨ་ར་ཧ་ཏྟཾ བྱཱ་ཀ་རི་ཏྭཱ ཨ་ཙི་རཾ་ཡེ་ཝ པ་ཀྐ་ནྟེ་སུ. ཨ་ཉྙཾ བྱཱ་ཀ་རོ་ནྟཱིཏི ཨ་ར་ཧ་ཏྟཾ ཀ་ཐེ་ནྟི. ཧ་ས་མཱ་ན་ཀཱ མ་ཉྙེ ཨ་ཉྙཾ བྱཱ་ཀ་རོ་ནྟཱིཏི ཧ་ས་མཱ་ནཱ ཝི་ཡ ཀ་ཐེ་ནྟི. ཝི་གྷཱ་ཏཾ ཨཱ་པ་ཛྫ་ནྟཱིཏི དུ་ཀྑཾ ཨཱ་པ་ཛྫ་ནྟི.
ན ཨུ་སྶེ་སུ ན ཨོ་མེ་སུ, ས་མ་ཏྟེ ནོ་པ་ནཱི་ཡ་རེཏི ཨེ་ཏྠ ཨུ་སྶཱཏི ཨུ་སྶི་ཏ་ཏཱ སེ་ཡྻ་པུ་གྒ་ལཱ. ཨོ་མཱཏི ཧཱི་ནཱ. ས་མ་ཏྟོཏི ས་དི་སོ. ཨི་ཏི ཨི་མེ་སུ ཏཱི་སུ་པི སེ་ཡྻ་ཧཱི་ན་ས་དི་སེ་སུ ཁཱི་ཎཱ་ས་ཝཱ མཱ་ནེ་ན ན ཨུ་པ་ནཱི་ཡ་རེ, ན ཨུ་པ་ནེ་ནྟི, ན ཨུ་པ་ག་ཙྪ་ནྟཱི་ཏི ཨ་ཏྠོ. ཁཱི་ཎཱ ཛཱ་ཏཱིཏི ཁཱི་ཎཱ ཏེ་སཾ ཛཱ་ཏི. ཝུ་སི་ཏཾ བྲ་ཧྨ་ཙ་རི་ཡནྟི ཝུ་ཏྠཾ མ་གྒ་བྲ་ཧྨ་ཙ་རི་ཡཾ. ཙ་ར་ནྟི སཾ་ཡོ་ཛ་ན་ཝི་པྤ་མུ་ཏྟཱཏི ས་བྦ་སཾ་ཡོ་ཛ་ནེ་ཧི ཝི་མུ་ཏྟཱ ཧུ་ཏྭཱ ཙ་ར་ནྟི. སུ་ཏྟེ་པི གཱ་ཐཱ་ཡ་མྤི ཁཱི་ཎཱ་ས་ཝོ ཀ་ཐི་ཏོ.
༨. ཨི་ནྡྲི་ཡ་སཾ་ཝ་ར་སུ་ཏྟ་ཝ་ཎྞ་ནཱ
༥༠. ཨ་ཊྛ་མེ ཧ་ཏཱུ་པ་ནི་སཾ ཧོ་ཏཱིཏི ཧ་ཏཱུ་པ་ནི་སྶ་ཡཾ ཧོ་ཏི. སཱི་ལ་ཝི་པ་ནྣ་སྶཱཏི ཝི་པ་ནྣ་སཱི་ལ་སྶ. ཡ་ཐཱ་བྷཱུ་ཏ་ཉཱ་ཎ་ད་སྶ་ནནྟི ཏ་རུ་ཎ་ཝི་པ་སྶ་ནཱ་ཉཱ་ཎཾ. ནི་བྦི་དཱ་ཝི་རཱ་གོཏི ཨེ་ཏྠ ནི་བྦི་དཱ བ་ལ་ཝ་ཝི་པ་སྶ་ནཱ, ཝི་རཱ་གོ ཨ་རི་ཡ་མ་གྒོ. ཝི་མུ་ཏྟི་ཉཱ་ཎ་ད་སྶ་ནནྟི ཨེ་ཏྠ ཝི་མུ་ཏྟཱིཏི ཨ་ར་ཧ་ཏྟ་ཕ་ལཾ, ཉཱ་ཎ་ད་སྶ་ནནྟི པ་ཙྩ་ཝེ་ཀྑ་ཎ་ཉཱ་ཎཾ. ཨུ་པ་ནི་སྶ་ཡ་ས་མྤ་ནྣཾ ཧོ་ཏཱིཏི ས་མྤ་ནྣ་ཨུ་པ་ནི་སྶ་ཡཾ ཧོ་ཏི. ཨི་མ་སྨིཾ སུ་ཏྟེ སཱི་ལཱ་ནུ་ར་ཀྑ་ཎ་ཨི་ནྡྲི་ཡ་སཾ་ཝ་རོ ཀ་ཐི་ཏོ.
༩. ཨཱ་ན་ནྡ་སུ་ཏྟ་ཝ་ཎྞ་ནཱ
༥༡. ན་ཝ་མེ ཀི་ཏྟཱ་ཝ་ཏཱཏི ཀི་ཏྟ་ཀེ་ན. ཨ་སྶུ་ཏ་ཉྩེ་ཝཱཏི ཨ་ཉྙ་སྨིཾ ཀཱ་ལེ ཨ་སྶུ་ཏ་པུ་བྦཾ. ན ས་མྨོ་སཾ ག་ཙྪ་ནྟཱིཏི ཝི་ནཱ་སཾ ན ག་ཙྪ་ནྟི. ཙེ་ཏ་སོ ས་མྥུ་ཊྛ་པུ་བྦཱཏི ཙི་ཏྟེ་ན ཕུ་སི་ཏ་པུ་བྦཱ. ས་མུ་དཱ་ཙ་ར་ནྟཱིཏི མ་ནོ་དྭཱ་རེ ཙ་ར་ནྟི. ཨ་ཝི་ཉྙཱ་ཏ་ཉྩ ཝི་ཛཱ་ནཱ་ཏཱིཏི ཨ་ཉྙ་སྨིཾ ཀཱ་ལེ ཨ་ཝི་ཉྙཱ་ཏ་ཀཱ་ར་ཎཾ ཛཱ་ནཱ་ཏི. པ་རི་ཡཱ་པུ་ཎཱ་ཏཱིཏི ཝ་ལ༹་ཉྫེ་ཏི ཀ་ཐེ་ཏི. དེ་སེ་ཏཱིཏི པ་ཀཱ་སེ་ཏི. པ་རཾ ཝཱ་ཙེ་ཏཱིཏི པ་རཾ ཨུ་གྒ་ཎྷཱ་པེ་ཏི.
ཨཱ་ག་ཏཱ་ག་མཱཏི དཱི་གྷཱ་དཱི་སུ ཡོ ཀོ་ཙི ཨཱ་ག་མོ ཨཱ་ག་ཏོ ཨེ་ཏེ་ས་ནྟི ཨཱ་ག་ཏཱ་ག་མཱ. དྷ་མྨ་དྷ་རཱཏི སུ་ཏྟ་ནྟ་པི་ཊ་ཀ་དྷ་རཱ. ཝི་ན་ཡ་དྷ་རཱཏི ཝི་ན་ཡ་པི་ཊ་ཀ་དྷ་རཱ. མཱ་ཏི་ཀཱ་དྷ་རཱཏི དྭེ་པཱ་ཏི་མོ་ཀྑ་དྷ་རཱ. པ་རི་པུ་ཙྪ་ཏཱིཏི ཨ་ནུ་ས་ནྡྷི་པུ་བྦཱ་པ་རཾ པུ་ཙྪ་ཏི. པ་རི་པ་ཉྷ་ཏཱིཏི ཨི་ད་ཉྩི་ད་ཉྩ པུ་ཙྪི་སྶཱ་མཱི་ཏི པ་རི་ཏུ་ལ་ཏི པ་རི་ཙྪི་ནྡ་ཏི. ཨི་དཾ, བྷ་ནྟེ, ཀ་ཐནྟི, བྷ་ནྟེ, ཨི་དཾ ཨ་ནུ་ས་ནྡྷི་པུ་བྦཱ་པ་རཾ ཀ་ཐཾ ཧོ་ཏཱི་ཏི པུ་ཙྪ་ཏི. ཨི་མ་སྶ ཀྭ་ཏྠོཏི ཨི་མ་སྶ བྷཱ་སི་ཏ་སྶ ཀོ ཨ་ཏྠོ་ཏི པུ་ཙྪ་ཏི. ཨ་ཝི་ཝ་ཊནྟི ཨ་ཝི་ཝ་རི་ཏཾ. ཝི་ཝ་ར་ནྟཱིཏི པཱ་ཀ་ཊཾ ཀ་རོ་ནྟི. ཀ་ངྑཱ་ཋཱ་ནི་ཡེ་སཱུཏི ཀ་ངྑཱ་ཡ ཀཱ་ར་ཎ་བྷཱུ་ཏེ་སུ. ཏ་ཏྠ ཡ་སྨིཾ དྷ་མྨེ ཀ་ངྑཱ ཨུ་པྤ་ཛྫ་ཏི, སྭེ་ཝ ཀ་ངྑཱ་ཋཱ་ནི་ཡོ ནཱ་མཱ་ཏི ཝེ་དི་ཏ་བྦོ.
༡༠. ཁ་ཏྟི་ཡ་སུ་ཏྟ་ཝ་ཎྞ་ནཱ
༥༢. ད་ས་མེ བྷོ་གཱ་དྷི་པྤཱ་ཡཱཏི བྷོ་ག་སཾ་ཧ་ར་ཎ་ཏྠཾ ཋ་པི་ཏཱ་དྷི་པྤཱ་ཡཱ པ་ཝ་ཏྟ་ཨ་ཛ྄ཛྷཱ་ས་ཡཱ. པ་ཉྙཱུ་པ་ཝི་ཙཱ་རཱཏི པ་ཉྙ་ཝ་ནྟོ བྷ་ཝེ་ཡྻཱ་མཱ་ཏི ཨེ་ཝཾ པ་ཉྙ་ཏྠཱ་ཡ པ་ཝ་ཏྟཱུ་པ་ཝི་ཙཱ་རཱ. ཨ་ཡ་མེ་ཝ ནེ་སཾ ཝི་ཙཱ་རོ ཙི་ཏྟེ ཨུ་པ་ཝི་ཙ་ར་ཏི. བ་ལཱ་དྷི་ཊྛཱ་ནཱཏི བ་ལ་ཀཱ་ཡཱ་དྷི་ཊྛཱ་ནཱ. བ་ལ་ཀཱ་ཡ་ཉྷི ལ་དྡྷཱ ཏེ ལ་དྡྷ་པ་ཏི་ཊྛཱ ནཱ་མ ཧོ་ནྟི. པ་ཐ་ཝི་བྷི་ནི་ཝེ་སཱཏི པ་ཐ་ཝི་སཱ་མི་ནོ བྷ་ཝི་སྶཱ་མཱ་ཏི ཨེ་ཝཾ པ་ཐ་ཝི་ཨ་ཏྠཱ་ཡ ཀ་ཏ་ཙི་ཏྟཱ་བྷི་ནི་ཝེ་སཱ. ཨི་སྶ་རི་ཡ་པ་རི་ཡོ་སཱ་ནཱཏི ར་ཛྫཱ་བྷི་སེ་ཀ་པ་རི་ཡོ་སཱ་ནཱ. ཨ་བྷི་སེ་ཀ་ཉྷི པ་ཏྭཱ ཏེ པ་རི་ཡོ་སཱ་ན་པྤ་ཏྟཱ ནཱ་མ ཧོ་ནྟི. ཨི་མི་ནཱ ན་ཡེ་ན ས་བྦ་ཏྠ ཨ་ཏྠོ ཝེ་དི་ཏ་བྦོ.
སེ་ས་པ་དེ་སུ པ་ནེ་ཏྠ ཨ་ཡ་མ་དྷི་པྤཱ་ཡོ – བྲཱ་ཧྨ་ཎཱ ཏཱ་ཝ མ་ནྟེ ལ་བྷི་ཏྭཱ ལ་དྡྷ་པ་ཏི་ཊྛཱ ནཱ་མ ཧོ་ནྟི, ག་ཧ་པ་ཏི་ཀཱ ཡཾ་ཀི་ཉྩི སི་པྤཾ, ཨི་ཏྠཱི ཀུ་ལ་དཱ་ཡ་ཛྫ་སཱ་མི་ཀཾ པུ་ཏྟཾ, ཙོ་རཱ ཡཾ་ཀི་ཉྩི ཨཱ་ཝུ་དྷ་ས་ཏྠཾ, ས་མ་ཎཱ སཱི་ལ་པ་རི་པུ་ཎྞཱ ལ་དྡྷ་པ་ཏི་ཊྛཱ ནཱ་མ ཧོ་ནྟི. ཏ་སྨཱ མ་ནྟཱ་དྷི་ཊྛཱ་ནཱཏི་ཨཱ་དཱི་ནི ཝུ་ཏྟཱ་ནི.
བྲཱ་ཧྨ་ཎཱ་ན་ཉྩ ‘‘ཡ་ཉྙཾ ཡ་ཛི་སྶཱ་མཱ’’ཏི ཙི་ཏྟཾ ཨ་བྷི་ནི་ཝི་ས་ཏི, བྲ་ཧྨ་ལོ་ཀེ པ་ཏྟེ པ་རི་ཡོ་སཱ་ན་པྤ་ཏྟཱ ནཱ་མ ཧོ་ནྟི. ཏ་སྨཱ ཏེ ཡ་ཉྙཱ་བྷི་ནི་ཝེ་སཱ བྲ་ཧྨ་ལོ་ཀ་པ་རི་ཡོ་སཱ་ནཱཏི ཝུ་ཏྟཱ. ཀ་མྨ་ནྟ་ཀ་ར་ཎ་ཏྠཱ་ཡ མ་ནོ ཨེ་ཏེ་སཾ ཨ་བྷི་ནི་ཝི་ས་ཏཱི་ཏི ཀ་མྨ་ནྟཱ་བྷི་ནི་ཝེ་སཱ. ཀ་མྨེ ནི་ཊྛི་ཏེ པ་རི་ཡོ་སཱ་ན་པྤ་ཏྟཱ ནཱ་མ ཧོ་ནྟཱི་ཏི ནི་ཊྛི་ཏ་ཀ་མྨ་ནྟ་པ་རི་ཡོ་སཱ་ནཱ.
པུ་རི་སཱ་དྷི་པྤཱ་ཡཱཏི པུ་རི་སེ་སུ པ་ཝ་ཏྟ་ཨ་ཛ྄ཛྷཱ་ས་ཡཱ. ཨ་ལ་ངྐཱ་ར་ཏྠཱ་ཡ མ་ནོ ཨུ་པ་ཝི་ཙ་ར་ཏི ཨེ་ཏི་སྶཱ་ཏི ཨ་ལ་ངྐཱ་རཱུ་པ་ཝི་ཙཱ་རཱ. ཨ་ས་པ་ཏྟཱི ཧུ་ཏྭཱ ཨེ་ཀི་ཀཱ་ཝ གྷ་རེ ཝ་སེ་ཡྻ་ནྟི ཨེ་ཝ་མ་སྶཱ ཙི་ཏྟཾ ཨ་བྷི་ནི་ཝི་ས་ཏཱི་ཏི ཨ་ས་པ་ཏྟཱི་བྷི་ནི་ཝེ་སཱ. གྷ་རཱ་ཝཱ་སི་སྶ་རི་ཡེ ལ་དྡྷེ པ་རི་ཡོ་སཱ་ན་པྤ་ཏྟཱ ནཱ་མ ཧོ་ནྟཱི་ཏི ཨི་སྶ་རི་ཡ་པ་རི་ཡོ་སཱ་ནཱ.
པ་ར་བྷ་ཎྜ་སྶ ཨཱ་དཱ་ནེ ཨ་དྷི་པྤཱ་ཡོ ཨེ་ཏེ་ས་ནྟི ཨཱ་དཱ་ནཱ་དྷི་པྤཱ་ཡཱ. ག་ཧ་ནེ ནི་ལཱི་ཡ་ན་ཊྛཱ་ནེ ཨེ་ཏེ་སཾ མ་ནོ ཨུ་པ་ཝི་ཙ་ར་ཏཱི་ཏི ག་ཧ་ནཱུ་པ་ཝི་ཙཱ་རཱ. ཨ་ནྡྷ་ཀཱ་ར་ཏྠཱ་ཡ ཨེ་ཏེ་སཾ ཙི་ཏྟཾ ཨ་བྷི་ནི་ཝི་ས་ཏཱི་ཏི ཨ་ནྡྷ་ཀཱ་རཱ་བྷི་ནི་ཝེ་སཱ. ཨ་ད་སྶ་ན་པྤ་ཏྟཱ པ་རི་ཡོ་སཱ་ན་པྤ་ཏྟཱ ཧོ་ནྟཱི་ཏི ཨ་ད་སྶ་ན་པ་རི་ཡོ་སཱ་ནཱ.
ཨ་དྷི་ཝཱ་ས་ན་ཀྑ་ནྟི་ཡ་ཉྩ སུ་ཙི་བྷཱ་ཝ་སཱི་ལེ ཙ ཨ་དྷི་པྤཱ་ཡོ ཨེ་ཏེ་ས་ནྟི ཁ་ནྟི་སོ་ར་ཙྩཱ་དྷི་པྤཱ་ཡཱ. ཨ་ཀི་ཉྩ་ན་བྷཱ་ཝེ ནི་གྒ་ཧ་ཎ་བྷཱ་ཝེ ཙི་ཏྟཾ ཨེ་ཏེ་སཾ ཨ་བྷི་ནི་ཝི་ས་ཏཱི་ཏི ཨཱ་ཀི་ཉྩ་ཉྙཱ་བྷི་ནི་ཝེ་སཱ. ནི་བྦཱ་ན་པྤ་ཏྟཱ པ་རི་ཡོ་སཱ་ན་པྤ་ཏྟཱ ཧོ་ནྟཱི་ཏི ནི་བྦཱ་ན་པ་རི་ཡོ་སཱ་ནཱ.
༡༡. ཨ་པྤ་མཱ་ད་སུ་ཏྟ་ཝ་ཎྞ་ནཱ
༥༣. ཨེ་ཀཱ་ད་ས་མེ ས་མ་དྷི་གྒ་ཡ྄ཧཱཏི སུ་ཊྛུ ག་ཎྷི་ཏྭཱ. ཛ་ངྒ་ལཱ་ནཾ པཱ་ཎཱ་ནནྟི པ་ཐ་ཝཱི་ཏ་ལ་ཙཱ་རཱི་ནཾ ས་པཱ་ད་ཀ་པཱ་ཎཱ་ནཾ. པ་ད་ཛཱ་ཏཱ་ནཱིཏི པ་དཱ་ནི. ས་མོ་དྷཱ་ནཾ ག་ཙྪ་ནྟཱིཏི ཨོ་དྷཱ་ནཾ ཨུ་པ་ནི་ཀྑེ་པཾ ག་ཙྪ་ནྟི. ཨ་གྒ་མ་ཀྑཱ་ཡ་ཏཱིཏི སེ་ཊྛཾ ཨ་ཀྑཱ་ཡ་ཏི. པ་བྦ་ཛ་ལཱ་ཡ་ཀོཏི པ་བྦ་ཛ་ཏི་ཎ་ཙྪེ་ད་ཀོ. ཨོ་དྷུ་ནཱ་ཏཱིཏི ཧེ་ཊྛཱ མུ་ཁཾ དྷུ་ནཱ་ཏི. ནི་དྷུ་ནཱ་ཏཱིཏི ཨུ་བྷོ་ཧི པ་སྶེ་ཧི དྷུ་ནཱ་ཏི. ནི་ཙྪཱ་དེ་ཏཱིཏི བཱ་ཧཱ་ཡ ཝཱ པ་ཧ་ར་ཏི, རུ་ཀྑེ ཝཱ པ་ཧ་ར་ཏི. ཨ་མྦ་པི་ཎྜི་ཡཱཏི ཨ་མྦ་ཕ་ལ་པི་ཎྜི་ཡཱ. ཝ་ཎྚཱུ་པ་ནི་བ་ནྡྷ་ནཱ་ནཱིཏི ཝ་ཎྚེ ཨུ་པ་ནི་བ་ནྡྷ་ནཱ་ནི, ཝ་ཎྚེ ཝཱ པ་ཏི་ཊྛི་ཏཱ་ནི. ཏ་ད་ནྭ་ཡཱ་ནི བྷ་ཝ་ནྟཱིཏི ཝ་ཎྚཱ་ནུ་ཝ་ཏྟ་ཀཱ་ནི བྷ་ཝ་ནྟི, ཨ་མྦ་པི་ཎྜི་ད་ཎྜ་ཀཱ་ནུ་ཝ་ཏྟ་ཀཱ་ནི བྷ་ཝ་ནྟཱི་ཏི་པི ཨ་ཏྠོ. ཁུ་དྡ་རཱ་ཛཱ་ནོཏི ཁུ་དྡ་ཀ་རཱ་ཛཱ་ནོ, པ་ཀ་ཏི་རཱ་ཛཱ་ནོ ཝཱ.
༡༢. དྷ་མྨི་ཀ་སུ་ཏྟ་ཝ་ཎྞ་ནཱ
༥༤. དྭཱ་ད་ས་མེ ས་བྦ་སོཏི ས་བྦེ་སུ. ས་ཏྟ་སུ ཝི་ཧཱ་རེ་སཱུཏི ས་ཏྟ་སུ པ་རི་ཝེ་ཎེ་སུ. པ་རི་བྷཱ་ས་ཏཱིཏི པ་རི་བྷ་ཝ་ཏི བྷ་ཡཾ ཨུ་པ་དཾ་སེ་ཏི. ཝི་ཧིཾ་ས་ཏཱིཏི ཝི་ཧེ་ཋེ་ཏི. ཝི་ཏུ་ད་ཏཱིཏི ཝི་ཛ྄ཛྷ་ཏི. རོ་སེ་ཏི ཝཱ་ཙཱ་ཡཱཏི ཝཱ་ཙཱ་ཡ གྷ་ཊྚེ་ཏི. པ་ཀྐ་མ་ནྟཱིཏི དི་སཱ པ་ཀྐ་མ་ནྟི. ན ས་ཎྛ་ཧ་ནྟཱིཏི ན་པྤ་ཏི་ཊྛ་ཧ་ནྟི. རི་ཉྩ་ནྟཱིཏི ཚ་ཌྜེ་ནྟི ཝི་སྶ་ཛྫེ་ནྟི. པ་བྦཱ་ཛེ་ཡྻཱ་མཱཏི ནཱི་ཧ་རེ་ཡྻཱ་མ. ཧ་ནྡཱཏི ཝ་ཝ་སྶ་གྒ་ཏྠེ ནི་པཱ་ཏོ. ཨ་ལནྟི ཡུ་ཏྟ་མེ་ཏཾ, ཡཾ ཏཾ པ་བྦཱ་ཛེ་ཡྻུ་ནྟི ཨ་ཏྠོ. ཀིཾ ཏེ ཨི་མི་ནཱཏི ཀིཾ ཏ་ཝ ཨི་མི་ནཱ ཛཱ་ཏི་བྷཱུ་མི་ཡཾ ཝཱ་སེ་ན. ཏཱི་ར་ད་སྶིཾ ས་ཀུ་ཎནྟི དི་སཱ་ཀཱ་ཀཾ. མུ་ཉྩ་ནྟཱིཏི དི་སཱ་ད་སྶ་ན་ཏྠཾ ཝི་སྶ་ཛྫེ་ནྟི. སཱ་མ་ནྟཱཏི ཨ་ཝི་དཱུ་རེ. ས་མ་ནྟཱ་ཏི་པི པཱ་ཋོ, ས་མ་ནྟ་ཏོ་ཏི ཨ་ཏྠོ. ཨ་བྷི་ནི་ཝེ་སོཏི པ་ཏྠ་རི་ཏྭཱ ཋི་ཏ་སཱ་ཁཱ་ནཾ ནི་ཝེ་སོ. མཱུ་ལ་ས་ནྟཱ་ན་ཀཱ་ནནྟི མཱུ་ལཱ་ནཾ ནི་ཝེ་སོ.
ཨཱ་ལ༹ྷ་ཀ་ཐཱ་ལི་ཀཱཏི ཏ་ཎྜུ་ལཱ་ལ༹ྷ་ཀ་སྶ བྷ་ཏྟ་པ་ཙ་ན་ཐཱ་ལི་ཀཱ. ཁུ་དྡཾ མ་དྷུནྟི ཁུ་དྡ་མ་ཀྑི་ཀཱ་ཧི ཀ་ཏཾ ད་ཎྜ་ཀ་མ་དྷུཾ. ཨ་ནེ་ལ་ཀནྟི ནི་དྡོ་སཾ. ན ཙ སུ་དཾ ཨ་ཉྙ་མ་ཉྙ་སྶ ཕ་ལཱ་ནི ཧིཾ་ས་ནྟཱིཏི ཨ་ཉྙ་མ་ཉྙ་སྶ ཀོ་ཊྛཱ་སེ ཕ་ལཱ་ནི ན ཧིཾ་ས་ནྟི. ཨ་ཏྟ་ནོ ཀོ་ཊྛཱ་སེ་ཧི མཱུ་ལཾ ཝཱ ཏ་ཙཾ ཝཱ པ་ཏྟཾ ཝཱ ཚི་ནྡ་ནྟོ ནཱ་མ ན་ཏྠི, ཨ་ཏྟ་ནོ ཨ་ཏྟ་ནོ སཱ་ཁཱ་ཡ ཧེ་ཊྛཱ པ་ཏི་ཏཱ་ནེ་ཝ པ་རི་བྷུ་ཉྫ་ནྟི. ཨ་ཉྙ་སྶ ཀོ་ཊྛཱ་ས་ཏོ ཨ་ཉྙ་ས ཀོ་ཊྛཱ་སཾ པ་རི་ཝ་ཏྟི་ཏྭཱ ག་ཏ་མྤི ‘‘ན ཨ་མྷཱ་ཀཾ སཱ་ཁཱ་ཡ ཕ་ལ’’ནྟི ཉ་ཏྭཱ ནོ ཁཱ་ད་ནྟི. ཡཱ་ཝ་ད་ཏྠཾ བྷ་ཀྑི་ཏྭཱཏི ཀ་ཎྛ་པྤ་མཱ་ཎེ་ན ཁཱ་དི་ཏྭཱ. སཱ་ཁཾ བྷ་ཉྫི་ཏྭཱཏི ཚ་ཏྟ་པྤ་མཱ་ཎ་མ་ཏྟཾ ཚི་ནྡི་ཏྭཱ ཚཱ་ཡཾ ཀ་ཏྭཱ པ་ཀྐཱ་མི. ཡ་ཏྲ ཧི ནཱ་མཱཏི ཡོ ཧི ནཱ་མ. པ་ཀྐ་མི་སྶ་ཏཱིཏི པ་ཀྐ་ནྟོ. ནཱ་དཱ་སཱིཏི དེ་ཝ་ཏཱ་ཡ ཨཱ་ནུ་བྷཱ་ཝེ་ན ཕ་ལ་མེ་ཝ ན ག་ཎྷི. ཨེ་ཝ་ཉྷི སཱ ཨ་དྷི་ཊྛཱ་སི.
ཏེ་ནུ་པ་ས་ངྐ་མཱིཏི ཛ་ན་པ་ད་ཝཱ་སཱི་ཧི ག་ནྟྭཱ, ‘‘མ་ཧཱ་རཱ་ཛ, རུ་ཀྑོ ཕ་ལཾ ན ག་ཎྷི, ཨ་མྷཱ་ཀཾ ནུ ཁོ དོ་སོ ཏུ་མྷཱ་ཀ’’ནྟི ཝུ་ཏྟེ ‘‘ནེ་ཝ མ་ཡ྄ཧཾ དོ་སོ ཨ་ཏྠི, ན ཛཱ་ན་པ་དཱ་ནཾ, ཨ་མྷཱ་ཀཾ ཝི་ཛི་ཏེ ཨ་དྷ་མྨོ ནཱ་མ ན ཝ་ཏྟ་ཏི, ཀེ་ན ནུ ཁོ ཀཱ་ར་ཎེ་ན རུ་ཀྑོ ན ཕ་ལི་ཏོ, ས་ཀྐཾ ཨུ་པ་ས་ངྐ་མི་ཏྭཱ པུ་ཙྪི་སྶཱ་མཱི’’ཏི ཙི་ནྟེ་ཏྭཱ ཡེ་ན ས་ཀྐོ དེ་ཝཱ་ན་མི་ནྡོ ཏེ་ནུ་པ་ས་ངྐ་མི. པ་ཝ་ཏྟེ་སཱིཏི པ་རི་ཝ་ཏྟེ་སི. ཨུ་མྨཱུ་ལ་མ་ཀཱ་སཱིཏི ཨུ་དྡྷཾ་མཱུ་ལཾ ཨ་ཀཱ་སི. ཨ་པི ནུ ཏྭནྟི ཨ་པི ནུ ཏ་ཝ. ཨ་ཊྛི་ཏཱ་ཡེ་ཝཱཏི ཨ་ཊྛི་ཏཱ་ཡ ཨེ་ཝ. ས་ཙྪ་ཝཱི་ནཱིཏི ས་མཱ་ན་ཙྪ་ཝཱི་ནི པ་ཀ་ཏི་ཊྛཱ་ནེ ཋི་ཏཱ་ནི. ན པ་ཙྩ་ཀྐོ་ས་ཏཱིཏི ན་པྤ་ཊི་ཀྐོ་ས་ཏི. རོ་ས་ནྟནྟི གྷ་ཊྚེ་ནྟཾ. བྷ་ཎྜ་ནྟནྟི པ་ཧ་ར་ནྟཾ.
སུ་ནེ་ཏྟོཏི ནེ་ཏྟཱ ཝུ་ཙྩ་ནྟི ཨ་ཀྑཱི་ནི, ཏེ་སཾ སུ་ནྡ་ར་ཏཱ་ཡ སུ་ནེ་ཏྟོ. ཏི་ཏྠ་ཀ་རོཏི སུ་ག་ཏི་ཨོ་གཱ་ཧ་ན་ཏི་ཏྠ་སྶ ཀཱ་ར་ཀོ. ཝཱི་ཏ་རཱ་གོཏི ཝི་ཀྑ་མྦྷ་ན་ཝ་སེ་ན ཝི་ག་ཏ་རཱ་གོ. པ་ས་ཝ་ཏཱིཏི པ་ཊི་ལ་བྷ་ཏི. དི་ཊྛི་ས་མྤ་ནྣནྟི ད་སྶ་ན་ས་མྤ་ནྣཾ, སོ་ཏཱ་པ་ནྣ་ནྟི ཨ་ཏྠོ. ཁ་ནྟིནྟི ཨ་ཏྟ་ནོ གུ་ཎ་ཁ་ཎ་ནཾ. ཡ་ཐཱ་མཾ ས་བྲ་ཧྨ་ཙཱ་རཱི་སཱུཏི ཡ་ཐཱ ཨི་མཾ ས་བྲ་ཧྨ་ཙཱ་རཱི་སུ ཨ་ཀྐོ་ས་ན་པ་རི་བྷཱ་ས་ནཾ, ཨ་ཉྙཾ ཨེ་ཝ་རཱུ་པཾ གུ་ཎ་ཁ་ནྟིཾ ན ཝ་དཱ་མཱི་ཏི ཨ་ཏྠོ. ན ནོ ས་མ་ས་བྲ་ཧྨ་ཙཱ་རཱི་སཱུཏི ཨེ་ཏྠ ས་མ་ཛ་ནོ ནཱ་མ ས་ཀ་ཛ་ནོ ཝུ་ཙྩ་ཏི. ཏ་སྨཱ ན ནོ ས་ཀེ་སུ ས་མཱ་ན་བྲ་ཧྨ་ཙཱ་རཱི་སུ ཙི་ཏྟཱ་ནི པ་དུ་ཊྛཱ་ནི བྷ་ཝི་སྶ་ནྟཱི་ཏི ཨ་ཡ་མེ་ཏྠ ཨ་ཏྠོ.
ཛོ་ཏི་པཱ་ལོ ཙ གོ་ཝི་ནྡོཏི ནཱ་མེ་ན ཛོ་ཏི་པཱ་ལོ ཋཱ་ནེ་ན མ་ཧཱ་གོ་ཝི་ནྡོ. ས་ཏྟ་པུ་རོ་ཧི་ཏོཏི རེ་ཎུ་ཨཱ་དཱི་ནཾ ས་ཏྟ་ནྣཾ རཱ་ཛཱུ་ནཾ པུ་རོ་ཧི་ཏོ. ཨ་ཧིཾ་ས་ཀཱ ཨ་ཏཱི་ཏཾ་སེཏི ཨེ་ཏེ ཚ ས་ཏྠཱ་རོ ཨ་ཏཱི་ཏཾ་སེ ཨ་ཧིཾ་ས་ཀཱ ཨ་ཧེ་སུཾ. ནི་རཱ་མ་ག་ནྡྷཱཏི ཀོ་དྷཱ་མ་ག་ནྡྷེ་ན ནི་རཱ་མ་ག་ནྡྷཱ. ཀ་རུ་ཎེ་ཝི་མུ་ཏྟཱཏི ཀ་རུ་ཎ་ཛ྄ཛྷཱ་ནེ ཨ་དྷི་མུ་ཏྟཱ, ཀ་རུ་ཎཱ་ཡ ཙ ཀ་རུ་ཎཱ་པུ་བྦ་བྷཱ་གེ ཙ ཋི་ཏཱ. ཡེ་ཏེཏི ཨེ་ཏེ, ཨ་ཡ་མེ་ཝ ཝཱ པཱ་ཋོ. ན སཱ་དྷུ་རཱུ་པཾ ཨཱ་སཱི་དེཏི སཱ་དྷུ་ས་བྷཱ་ཝཾ ན གྷ་ཊྚེ་ཡྻ. དི་ཊྛི་ཊྛཱ་ན་པྤ་ཧཱ་ཡི་ནནྟི དྭཱ་ས་ཊྛི་དི་ཊྛི་ག་ཏ་པྤ་ཧཱ་ཡི་ནཾ. ས་ཏྟ་མོཏི ཨ་ར་ཧ་ཏྟ་ཏོ པ་ཊྛཱ་ཡ ས་ཏྟ་མོ. ཨ་ཝཱི་ཏ་རཱ་གོཏི ཨ་ཝི་ག་ཏ་རཱ་གོ. ཨེ་ཏེ་ན ཨ་ནཱ་གཱ་མི་བྷཱ་ཝཾ པ་ཊི་ཀྑི་པ་ཏི. པ་ཉྩི་ནྡྲི་ཡཱ མུ་དཱུཏི པ་ཉྩ ཝི་པ་སྶ་ནི་ནྡྲི་ཡཱ་ནི མུ་དཱུ་ནི. ཏ་སྶ ཧི ཏཱ་ནི ས་ཀ་དཱ་གཱ་མིཾ ཨུ་པཱ་དཱ་ཡ མུ་དཱུ་ནི ནཱ་མ ཧོ་ནྟི. ཝི་པ་སྶ་ནཱཏི ས་ངྑཱ་ར་པ་རི་གྒ་ཧ་ཉཱ་ཎཾ. པུ་བྦེ་ཝ ཨུ་པ་ཧ་ཉྙ་ཏཱིཏི པ་ཋ་མ་ཏ་ར་ཉྙེ་ཝ ཨུ་པ་ཧ་ཉྙ་ཏི. ཨ་ཀྑ་ཏོཏི གུ་ཎ་ཁ་ཎ་ནེ་ན ཨ་ཀྑ་ཏོ ཨ་ནུ་པ་ཧ་ཏོ ཧུ་ཏྭཱ. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
དྷ་མྨི་ཀ་ཝ་གྒོ པ་ཉྩ་མོ.