༤. དེ་ཝ་ཏཱ་ཝ་གྒོ
༡. སེ་ཁ་སུ་ཏྟ་ཝ་ཎྞ་ནཱ
༣༡. ཙ་ཏུ་ཏྠ་སྶ པ་ཋ་མེ སེ་ཁ་སྶཱཏི ས་ཏྟ་ཝི་དྷ་སྶ སེ་ཁ་སྶ. པུ་ཐུ་ཛྫ་ནེ པ་ན ཝ་ཏྟ་བྦ་མེ་ཝ ན་ཏྠི. པ་རི་ཧཱ་ནཱ་ཡཱཏི ཨུ་པ་རཱུ་པ་རི་གུ་ཎ་པ་རི་ཧཱ་ནཱ་ཡ.
༢-༣. ཨ་པ་རི་ཧཱ་ན་སུ་ཏྟ་དྭ་ཡ་ཝ་ཎྞ་ནཱ
༣༢-༣༣. དུ་ཏི་ཡེ ས་ཏྠུ་གཱ་ར་ཝ་ཏཱཏི ས་ཏྠ་རི ག་རུ་བྷཱ་ཝོ. དྷ་མྨ་གཱ་ར་ཝ་ཏཱཏི ན་ཝ་ཝི་དྷེ ལོ་ཀུ་ཏྟ་ར་དྷ་མྨེ ག་རུ་བྷཱ་ཝོ. ས་ངྒྷ་གཱ་ར་ཝ་ཏཱཏི ས་ངྒྷེ ག་རུ་བྷཱ་ཝོ. སི་ཀྑཱ་གཱ་ར་ཝ་ཏཱཏི ཏཱི་སུ སི་ཀྑཱ་སུ ག་རུ་བྷཱ་ཝོ. ཨ་པྤ་མཱ་ད་གཱ་ར་ཝ་ཏཱཏི ཨ་པྤ་མཱ་དེ ག་རུ་བྷཱ་ཝོ. པ་ཊི་ས་ནྠཱ་ར་གཱ་ར་ཝ་ཏཱཏི དྷ་མྨཱ་མི་ས་ཝ་སེ་ན དུ་ཝི་དྷེ པ་ཊི་ས་ནྠཱ་རེ ག་རུ་བྷཱ་ཝོ. ས་ཏྠཱ ག་རུ ཨ་སྶཱ་ཏི ས་ཏྠུ་ག་རུ. དྷ་མྨོ ག་རུ ཨ་སྶཱ་ཏི དྷ་མྨ་ག་རུ. ཏི་བྦ་གཱ་ར་ཝོཏི བ་ཧ་ལ་གཱ་ར་ཝོ. པ་ཊི་ས་ནྠཱ་རེ གཱ་ར་ཝོ ཨ་སྶཱ་ཏི པ་ཊི་ས་ནྠཱ་ར་གཱ་ར་ཝོ. ཏ་ཏི་ཡེ ས་པྤ་ཏི་སྶོཏི ས་ཛེ་ཊྛ་ཀོ ས་གཱ་ར་ཝོ. ཧི་རོ་ཏྟ་པྤཾ པ་ནེ་ཏྠ མི་སྶ་ཀཾ ཀ་ཐི་ཏཾ.
༤. མ་ཧཱ་མོ་གྒ་ལླཱ་ན་སུ་ཏྟ་ཝ་ཎྞ་ནཱ
༣༤. ཙ་ཏུ་ཏྠེ ཏི་སྶོ ནཱ་མ བྷི་ཀྑཱུཏི ཐེ་ར་སྶེ་ཝ ས་དྡྷི་ཝི་ཧཱ་རི་ཀོ. མ་ཧི་དྡྷི་ཀོ མ་ཧཱ་ནུ་བྷཱ་ཝོཏི ཨི་ཛ྄ཛྷ་ན་ཊྛེ་ན མ་ཧ་ཏཱི ཨི་དྡྷི ཨ་སྶཱ་ཏི མ་ཧི་དྡྷི་ཀོ. ཨ་ནུ་ཕ་ར་ཎ་ཊྛེ་ན མ་ཧཱ ཨཱ་ནུ་བྷཱ་ཝོ ཨ་སྶཱ་ཏི མ་ཧཱ་ནུ་བྷཱ་ཝོ. ཙི་ར་སྶཾ ཁོ, མཱ་རི་ས མོ་གྒ་ལླཱ་ན, ཨི་མཾ པ་རི་ཡཱ་ཡ་མ་ཀཱ་སཱིཏི ཨེ་ཝ་རཱུ་པཾ ལོ་ཀེ པ་ཀ་ཏི་ཡཱ པི་ཡ་ས་མུ་དཱ་ཧཱ་ར་ཝ་ཙ་ནཾ ཧོ་ཏི. ལོ་ཀི་ཡཱ ཧི ཙི་ར་སྶཾ ཨཱ་ག་ཏ་མྤི ཨ་ནཱ་ག་ཏ་པུ་བྦ་མྤི མ་ནཱ་པ་ཛཱ་ཏི་ཡཾ ཨཱ་ག་ཏཾ དི་སྭཱ ‘‘ཀུ་ཏོ བྷ་ཝཾ ཨཱ་ག་ཏོ, ཙི་ར་སྶཾ བྷ་ཝཾ ཨཱ་ག་ཏོ, ཀ་ཐཾ ཏེ ཨི་དྷཱ་ག་མ་ན་མ་གྒོ ཉཱ་ཏོ, ཀིཾ མ་གྒ་མཱུ་ལ༹ྷོ་སཱི’’ཏི་ཨཱ་དཱི་ནི ཝ་ད་ནྟི. ཨ་ཡཾ པ་ན ཨཱ་ག་ཏ་པུ་བྦ་ཏྟཱ་ཡེ་ཝ ཨེ་ཝ་མཱ་ཧ. ཐེ་རོ ཧི ཀཱ་ལེ་ན ཀཱ་ལཾ བྲ་ཧྨ་ལོ་ཀཾ ག་ཙྪ་ཏི་ཡེ་ཝ. ཏ་ཏྠ པ་རི་ཡཱ་ཡ་མ་ཀཱ་སཱིཏི ཝཱ་རཾ ཨ་ཀཱ་སི. ཡ་དི་དཾ ཨི་དྷཱ་ག་མ་ནཱ་ཡཱཏི ཡོ ཨ་ཡཾ ཨི་དྷཱ་ག་མ་ནཱ་ཡ ཝཱ་རོ, ཏཾ ཙི་ར་སྶཾ ཨ་ཀཱ་སཱི་ཏི ཝུ་ཏྟཾ ཧོ་ཏི. ཨི་ད་མཱ་ས་ནཾ པ་ཉྙ་ཏྟནྟི མ་ཧཱ་ར་ཧཾ བྲ་ཧྨ་པ་ལླ་ངྐཾ པ་ཉྙཱ་པེ་ཏྭཱ ཨེ་ཝ་མཱ་ཧ. ཨ་ཝེ་ཙྩ་པྤ་སཱ་དེ་ནཱཏི ཨ་དྷི་ག་ཏེ་ན ཨ་ཙ་ལེ་ན མ་གྒ་པྤ་སཱ་དེ་ན. ཨི་མ་སྨིཾ སུ་ཏྟེ སོ་ཏཱ་པ་ཏྟི་མ་གྒ་ཉཱ་ཎཾ ཀ་ཐི་ཏཾ.
༥. ཝི་ཛྫཱ་བྷཱ་གི་ཡ་སུ་ཏྟ་ཝ་ཎྞ་ནཱ
༣༥. པ་ཉྩ་མེ ཝི་ཛྫཱ་བྷཱ་གི་ཡཱཏི ཝི་ཛྫཱ་ཀོ་ཊྛཱ་སི་ཀཱ. ཨ་ནི་ཙྩ་ས་ཉྙཱཏི ཨ་ནི་ཙྩཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ. ཨ་ནི་ཙྩེ དུ་ཀྑ་ས་ཉྙཱཏི དུ་ཀྑཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ. དུ་ཀྑེ ཨ་ན་ཏྟ་ས་ཉྙཱཏི ཨ་ན་ཏྟཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ. པ་ཧཱ་ན་ས་ཉྙཱཏི པ་ཧཱ་ནཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ. ཝི་རཱ་ག་ས་ཉྙཱཏི ཝི་རཱ་གཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ. ནི་རོ་དྷ་ས་ཉྙཱཏི ནི་རོ་དྷཱ་ནུ་པ་སྶ་ནཱ་ཉཱ་ཎེ ཨུ་པྤ་ནྣ་ས་ཉྙཱ.
༦. ཝི་ཝཱ་ད་མཱུ་ལ་སུ་ཏྟ་ཝ་ཎྞ་ནཱ
༣༦. ཚ་ཊྛེ ཝི་ཝཱ་ད་མཱུ་ལཱ་ནཱིཏི ཝི་ཝཱ་ད་སྶ མཱུ་ལཱ་ནི. ཀོ་དྷ་ནོཏི ཀུ་ཛ྄ཛྷ་ན་ལ་ཀྑ་ཎེ་ན ཀོ་དྷེ་ན ས་མ་ནྣཱ་ག་ཏོ. ཨུ་པ་ནཱ་ཧཱིཏི ཝེ་ར་ཨ་པྤ་ཊི་ནི་སྶ་གྒ་ལ་ཀྑ་ཎེ་ན ཨུ་པ་ནཱ་ཧེ་ན ས་མ་ནྣཱ་ག་ཏོ. ཨ་ཧི་ཏཱ་ཡ དུ་ཀྑཱ་ཡ དེ་ཝ་མ་ནུ་སྶཱ་ནནྟི དྭི་ནྣཾ བྷི་ཀྑཱུ་ནཾ ཝི་ཝཱ་དོ ཀ་ཐཾ དེ་ཝ་མ་ནུ་སྶཱ་ནཾ ཨ་ཧི་ཏཱ་ཡ དུ་ཀྑཱ་ཡ སཾ་ཝ་ཏྟ་ཏི? ཀོ་ས་མྦ་ཀ་ཀྑ་ནྡྷ་ཀེ ཝི་ཡ དྭཱི་སུ བྷི་ཀྑཱུ་སུ ཝི་ཝཱ་དཾ ཨཱ་པ་ནྣེ་སུ ཏ་སྨིཾ ཝི་ཧཱ་རེ ཏེ་སཾ ཨ་ནྟེ་ཝཱ་སི་ཀཱ ཝི་ཝ་ད་ནྟི, ཏེ་སཾ ཨོ་ཝཱ་དཾ ག་ཎྷ་ནྟོ བྷི་ཀྑུ་ནི་ས་ངྒྷོ ཝི་ཝ་ད་ཏི. ཏ་ཏོ ཏེ་སཾ ཨུ་པ་ཊྛཱ་ཀཱ ཝི་ཝ་ད་ནྟི, ཨ་ཐ མ་ནུ་སྶཱ་ནཾ ཨཱ་ར་ཀྑ་དེ་ཝ་ཏཱ དྭེ ཀོ་ཊྛཱ་སཱ ཧོ་ནྟི. ཏ་ཐཱ དྷ་མྨ་ཝཱ་དཱི་ནཾ ཨཱ་ར་ཀྑ་དེ་ཝ་ཏཱ དྷ་མྨ་ཝཱ་དི་ནི་ཡོ ཧོ་ནྟི, ཨ་དྷ་མྨ་ཝཱ་དཱི་ནཾ ཨ་དྷ་མྨ་ཝཱ་དི་ནི་ཡོ. ཏ་ཏོ ཨཱ་ར་ཀྑ་དེ་ཝ་ཏཱ་ནཾ མི་ཏྟཱ བྷུ་མྨ་དེ་ཝ་ཏཱ བྷི་ཛྫ་ནྟི. ཨེ་ཝཾ པ་ར་མྤ་རཱ་ཡ ཡཱ་ཝ བྲ་ཧྨ་ལོ་ཀཱ ཋ་པེ་ཏྭཱ ཨ་རི་ཡ་སཱ་ཝ་ཀེ ས་བྦེ དེ་ཝ་མ་ནུ་སྶཱ དྭེ ཀོ་ཊྛཱ་སཱ ཧོ་ནྟི. དྷ་མྨ་ཝཱ་དཱི་ཧི པ་ན ཨ་དྷ་མྨ་ཝཱ་དི་ནོ་ཝ བ་ཧུ་ཏ་རཱ ཧོ་ནྟི. ཏ་ཏོ ཡཾ བ་ཧུ་ཀེ་ཧི ག་ཧི་ཏཾ, ཏཾ ག་ཙྪ་ནྟི. དྷ་མྨཾ ཝི་སྶ་ཛྫེ་ཏྭཱ བ་ཧུ་ཏ་རཱ་ཝ ཨ་དྷ་མྨཾ ག་ཎྷ་ནྟི. ཏེ ཨ་དྷ་མྨཾ པུ་ར་ཀྑ་ཏྭཱ ཝི་ཧ་ར་ནྟཱ ཨ་པཱ་ཡེ ནི་བྦ་ཏྟ་ནྟི. ཨེ་ཝཾ དྭི་ནྣཾ བྷི་ཀྑཱུ་ནཾ ཝི་ཝཱ་དོ དེ་ཝ་མ་ནུ་སྶཱ་ནཾ ཨ་ཧི་ཏཱ་ཡ དུ་ཀྑཱ་ཡ ཧོ་ཏི. ཨ་ཛ྄ཛྷ་ཏྟཾ ཝཱཏི ཏུ་མྷཱ་ཀཾ ཨ་བྦྷ་ནྟ་ར་པ་རི་སཱ་ཡ. བ་ཧི་དྡྷཱཏི པ་རེ་སཾ པ་རི་སཱ་ཡ.
མ་ཀྑཱིཏི པ་རེ་སཾ གུ་ཎ་མ་ཀྑ་ན་ལ་ཀྑ་ཎེ་ན མ་ཀྑེ་ན ས་མ་ནྣཱ་ག་ཏོ. པ་ལཱ༹་སཱིཏི ཡུ་ག་གྒཱ་ཧ་ལ་ཀྑ་ཎེ་ན པ་ལཱ༹་སེ་ན ས་མ་ནྣཱ་ག་ཏོ. ཨི་སྶུ་ཀཱིཏི པ་ར་སྶ ས་ཀྐཱ་རཱ་དཱི་ནི ཨི་སྶཱ་ཡ་ན་ལ་ཀྑ་ཎཱ་ཡ ཨི་སྶཱ་ཡ ས་མ་ནྣཱ་ག་ཏོ. མ་ཙྪ་རཱིཏི ཨཱ་ཝཱ་ས་མ་ཙྪ་རི་ཡཱ་དཱི་ཧི ས་མ་ནྣཱ་ག་ཏོ. ས་ཋོཏི ཀེ་རཱ་ཊི་ཀོ. མཱ་ཡཱ་ཝཱིཏི ཀ་ཏ་པ་ཊི་ཙྪཱ་ད་ཀོ. པཱ་པི་ཙྪོཏི ཨ་ས་ནྟ་ས་མྦྷཱ་ཝ་ནི་ཙྪ་ཀོ དུ་སྶཱི་ལོ. མི་ཙྪཱ་དི་ཊྛཱིཏི ན་ཏྠི་ཀ་ཝཱ་དཱི, ཨ་ཧེ་ཏུ་ཝཱ་དཱི, ཨ་ཀི་རི་ཡ་ཝཱ་དཱི. ས་ནྡི་ཊྛི་པ་རཱ་མཱ་སཱིཏི ས་ཡཾ དི་ཊྛ་མེ་ཝ པ་རཱ་མ་ས་ཏི. ཨཱ་དྷཱ་ན་གྒཱ་ཧཱིཏི ད་ལ༹ྷ་གྒཱ་ཧཱི. དུ་པྤ་ཊི་ནི་སྶ་གྒཱིཏི ན ས་ཀྐཱ ཧོ་ཏི ག་ཧི་ཏཾ ཝི་སྶ་ཛྫཱ་པེ་ཏུཾ. ཨི་མ་སྨིཾ སུ་ཏྟེ ཝ་ཊྚ་མེ་ཝ ཀ་ཐི་ཏཾ.
༧. དཱ་ན་སུ་ཏྟ་ཝ་ཎྞ་ནཱ
༣༧. ས་ཏྟ་མེ ཝེ་ལུ༹་ཀ་ཎྜ་ཀཱིཏི ཝེ་ལུ༹་ཀ་ཎྜ་ཀ་ན་ག་ར་ཝཱ་སི་ནཱི. ཚ་ལ༹་ངྒ་ས་མ་ནྣཱ་ག་ཏནྟི ཚ་ཧི གུ་ཎ་ངྒེ་ཧི ས་མ་ནྣཱ་ག་ཏཾ. ད་ཀྑི་ཎཾ པ་ཏི་ཊྛཱ་པེ་ཏཱིཏི དཱ་ནཾ དེ་ཏི. པུ་བྦེ་ཝ དཱ་ནཱ སུ་མ་ནོཏི དཱ་ནཾ ད་སྶཱ་མཱི་ཏི མཱ་ས་ཌྜྷ་མཱ་ས་ཏོ པ་ཊྛཱ་ཡ སོ་མ་ན་སྶ་པྤ་ཏྟོ ཧོ་ཏི. ཨེ་ཏྠ ཧི པུ་བྦེ་ཙེ་ཏ་ནཱ ད་སྶཱ་མཱི་ཏི ཙི་ཏྟུ་པྤཱ་ད་ཀཱ་ལ་ཏོ པ་ཊྛཱ་ཡ ‘‘ཨི་ཏོ ཨུ་ཊྛི་ཏེ་ན དཱ་ནཾ ད་སྶཱ་མཱི’’ཏི ཁེ་ཏྟ་གྒ་ཧ་ཎཾ ཨཱ་དིཾ ཀ་ཏྭཱ ཙི་ནྟེ་ནྟ་སྶ ལ་བྦྷ་ཏི. ད་དཾ ཙི་ཏྟཾ པ་སཱ་དེ་ཏཱིཏི ཨེ་ཝཾ ཝུ་ཏྟཱ མུ་ཉྩ་ཙེ་ཏ་ནཱ པ་ན དཱ་ན་ཀཱ་ལེ་ཡེ་ཝ ལ་བྦྷ་ཏི. ད་ཏྭཱ ཨ་ཏྟ་མ་ནོ ཧོ་ཏཱིཏི ཨ་ཡཾ པ་ན ཨ་པ་ར་ཙེ་ཏ་ནཱ ཨ་པ་རཱ་པ་རཾ ཨ་ནུ་སྶ་ར་ནྟ་སྶ ལ་བྦྷ་ཏི. ཝཱི་ཏ་རཱ་གཱཏི ཝི་ག་ཏ་རཱ་གཱ ཁཱི་ཎཱ་ས་ཝཱ. རཱ་ག་ཝི་ན་ཡཱ་ཡ ཝཱ པ་ཊི་པ་ནྣཱཏི རཱ་ག་ཝི་ན་ཡ་པ་ཊི་པ་དཾ པ་ཊི་པ་ནྣཱ. ཨུ་ཀྐ་ཊྛ་དེ་ས་ནཱ ཙེ་སཱ, ན ཀེ་ཝ་ལཾ པ་ན ཁཱི་ཎཱ་ས་ཝཱ་ནཾ, ཨ་ནཱ་གཱ་མི-ས་ཀ་དཱ་གཱ་མི-སོ་ཏཱ་པ་ནྣཱ་ན་མྤི ཨ་ནྟ་མ་སོ ཏ་ད་ཧུ་པ་བྦ་ཛི་ཏ་སྶ བྷ་ཎྜ་གཱ་ཧ་ཀ་སཱ་མ་ཎེ་ར་སྶཱ་པི དི་ནྣཱ ད་ཀྑི་ཎཱ ཚ་ལ༹་ངྒ་ས་མ་ནྣཱ་ག་ཏཱ་ཝ ཧོ་ཏི. སོ་པི ཧི སོ་ཏཱ་པ་ཏྟི་མ་གྒ་ཏྠ་མེ་ཝ པ་བྦ་ཛི་ཏོ.
ཡ་ཉྙ་སྶ ས་མྤ་དཱཏི དཱ་ན་སྶ པ་རི་པུ་ཎྞ་ཏཱ. ས་ཉྙ་ཏཱཏི སཱི་ལ་ས་ཉྙ་མེ་ན ས་ཉྙ་ཏཱ. ས་ཡཾ ཨཱ་ཙ་མ་ཡི་ཏྭཱ་ནཱཏི ཨ་ཏྟ་ནཱ་ཝ ཧ་ཏྠ་པཱ་དེ དྷོ་ཝི་ཏྭཱ མུ་ཁཾ ཝི་ཀྑཱ་ལེ་ཏྭཱ. ས་ཀེ་ཧི པཱ་ཎི་བྷཱིཏི ཨ་ཏྟ་ནོ ཧ་ཏྠེ་ཧི. ས་ཡེ་ཧཱི་ཏི་པི པཱ་ཋོ. ས་དྡྷོཏི ར་ཏ་ན་ཏྟ་ཡ་གུ་ཎེ ས་དྡ་ཧ་ནྟོ. མུ་ཏྟེ་ན ཙེ་ཏ་སཱཏི ལཱ་བྷ་མ་ཙྪ་རི་ཡཱ་དཱི་ཧི ཝི་མུ་ཏྟེ་ན ཙི་ཏྟེ་ན. ཨ་བྱཱ་པ་ཛ྄ཛྷཾ སུ་ཁཾ ལོ་ཀནྟི ནི་དྡུ་ཀྑཾ ཨུ་ལཱ༹་ར་སུ་ཁ་སོ་མ་ན་སྶཾ དེ་ཝ་ལོ་ཀཾ.
༨. ཨ་ཏྟ་ཀཱ་རཱི་སུ་ཏྟ་ཝ་ཎྞ་ནཱ
༣༨. ཨ་ཊྛ་མེ ཨ་དྡ་སཾ ཝཱ ཨ་སྶོ་སིཾ ཝཱཏི ཨ་ཀྑཱི་ནི ཨུ་མྨཱི་ལེ་ཏྭཱ མཱ ཨ་དྡ་སཾ, ཨ་སུ་ཀ་སྨིཾ ནཱ་མ ཋཱ་ནེ ཝ་ས་ཏཱི་ཏི མཱ ཨ་སྶོ་སིཾ, ཀ་ཐེ་ནྟ་སྶ ཝཱ ཝ་ཙ་ནཾ མཱ ཨ་སྶོ་སིཾ. ཀ་ཐ་ཉྷི ནཱ་མཱཏི ཀེ་ན ནཱ་མ ཀཱ་ར་ཎེ་ན. ཨཱ་ར་མྦྷ་དྷཱ་ཏཱུཏི ཨཱ་ར་བྷ་ན་ཝ་སེ་ན པ་ཝ་ཏྟ་ཝཱི་རི་ཡཾ. ནི་ཀྐ་མ་དྷཱ་ཏཱུཏི ཀོ་ས་ཛྫ་ཏོ ནི་ཀྑ་མ་ན་ས་བྷཱ་ཝཾ ཝཱི་རི་ཡཾ. པ་ར་ཀྐ་མ་དྷཱ་ཏཱུཏི པ་ར་ཀྐ་མ་ས་བྷཱ་ཝོ. ཐཱ་མ་དྷཱ་ཏཱུཏི ཐཱ་མ་ས་བྷཱ་ཝོ. ཋི་ཏི་དྷཱ་ཏཱུཏི ཋི་ཏི་ས་བྷཱ་ཝོ. ཨུ་པ་ཀྐ་མ་དྷཱ་ཏཱུཏི ཨུ་པ་ཀྐ་མ་ས་བྷཱ་ཝོ. ས་བྦཾ ཙེ་ཏཾ ཏེ་ན ཏེ་ནཱ་ཀཱ་རེ་ན པ་ཝ་ཏྟ་སྶ ཝཱི་རི་ཡ་སྶེ་ཝ ནཱ་མཾ.
༩-༡༠. ནི་དཱ་ན་སུ་ཏྟཱ་དི་ཝ་ཎྞ་ནཱ
༣༩-༤༠. ན་ཝ་མེ ཀ་མྨཱ་ནནྟི ཝ་ཊྚ་གཱ་མི་ཀ་མྨཱ་ནཾ. ས་མུ་ད་ཡཱ་ཡཱཏི པི་ཎྜ་ཀ་ར་ཎ་ཏྠཱ་ཡ. ནི་དཱ་ནནྟི པ་ཙྩ་ཡོ. ལོ་བྷ་ཛེ་ནཱཏི ལོ་བྷ་ཏོ ཛཱ་ཏེ་ན. ན པ་ཉྙཱ་ཡ་ནྟཱིཏི ‘‘ཨེ་ཝ་རཱུ་པེ་ན ཀ་མྨེ་ན ནི་བྦ་ཏྟཱ’’ཏི ན དི་སྶ་ནྟི. སུ་ཀྐ་པ་ཀྑེ ཀ་མྨཱ་ནནྟི ཝི་ཝ་ཊྚ་གཱ་མི་ཀ་མྨཱ་ནཾ. ཨི་ཏི ཨི་མ་སྨིཾ སུ་ཏྟེ ཝ་ཊྚ་ཝི་ཝ་ཊྚཾ ཀ་ཐི་ཏཾ. ད་ས་མེ ནི་ཙུ་ལ་ཝ་ནེཏི མ་ཧཱ་མུ་ཙ་ལི་ནྡ་ཝ་ནེ. ས་དྡྷ་མྨོཏི སཱ་ས་ན་ས་དྡྷ་མྨོ.
༡༡. དཱ་རུ་ཀྑ་ནྡྷ་སུ་ཏྟ་ཝ་ཎྞ་ནཱ
༤༡. ཨེ་ཀཱ་ད་ས་མེ ཙེ་ཏོ་ཝ་སི་པྤ་ཏྟོཏི ཙི་ཏྟ་ཝ་སི་བྷཱ་ཝཾ པ་ཏྟོ. པ་ཐ་ཝཱི་ཏྭེ་ཝ ཨ་དྷི་མུ་ཙྩེ་ཡྻཱཏི ཐ་དྡྷཱ་ཀཱ་རཾ པ་ཐ་ཝཱི་དྷཱ་ཏཱུ་ཏི ས་ལླ་ཀྑེ་ཡྻ. ཡཾ ནི་སྶཱ་ཡཱཏི ཡཾ ཝི་ཛྫ་མཱ་ནཾ ཐ་དྡྷཱ་ཀཱ་རཾ པ་ཐ་ཝཱི་དྷཱ་ཏུཾ ནི་སྶཱ་ཡ ཨ་མུཾ དཱ་རུ་ཀྑ་ནྡྷཾ པ་ཐ་ཝཱི་ཏྭེ་ཝ ཨ་དྷི་མུ་ཙྩེ་ཡྻ, སཱ ཨེ་ཏྠ པ་ཐ་ཝཱི་དྷཱ་ཏུ ཨ་ཏྠཱི་ཏི. ཨི་མི་ནཱ ན་ཡེ་ན སེ་ས་པ་དཱ་ནི་པི ཝེ་དི་ཏ་བྦཱ་ནི. ཡ་ཐེ་ཝ ཧི ཏ་སྨིཾ ཐ་དྡྷཱ་ཀཱ་རཱ པ་ཐ་ཝཱི་དྷཱ་ཏུ ཨ་ཏྠི, ཨེ་ཝཾ ཡཱུ་སཱ་ཀཱ་རཱ ཨཱ་པོ་དྷཱ་ཏུ, ཨུ་ཎྷཱ་ཀཱ་རཱ ཏེ་ཛོ་དྷཱ་ཏུ, ཝི་ཏྠ་མྦྷ་ནཱ་ཀཱ་རཱ ཝཱ་ཡོ་དྷཱ་ཏུ, ར་ཏྟ་ཝ་ཎྞ་མྷི སཱ་རེ པ་དུ་མ་པུ་པྥ་ཝ་ཎྞཱ སུ་བྷ་དྷཱ་ཏུ, པཱུ་ཏི་བྷཱུ་ཏེ ཙུ་ཎྞེ ཙེ་ཝ ཕེ་གྒུ་པ་པ་ཊི་ཀཱ་སུ ཙ ཨ་མ་ནུ་ཉྙ་ཝ་ཎྞཱ ཨ་སུ་བྷ་དྷཱ་ཏུ, ཏཾ ནི་སྶཱ་ཡ ཨ་མུཾ དཱ་རུ་ཀྑ་ནྡྷཾ ཨ་སུ་བྷ་ནྟྭེ་ཝ ཨ་དྷི་མུ་ཙྩེ་ཡྻ ས་ལླ་ཀྑེ་ཡྻཱ་ཏི. ཨི་མ་སྨིཾ སུ་ཏྟེ མི་སྶ་ཀ་ཝི་ཧཱ་རོ ནཱ་མ ཀ་ཐི་ཏོ.
༡༢. ནཱ་གི་ཏ་སུ་ཏྟ་ཝ་ཎྞ་ནཱ
༤༢. དྭཱ་ད་ས་མེ གཱ་མ་ནྟ་ཝི་ཧཱ་རིནྟི གཱ་མ་ནྟ་སེ་ནཱ་ས་ན་ཝཱ་སིཾ. ས་མཱ་ཧི་ཏཾ ནི་སི་ནྣནྟི ཏ་སྨིཾ གཱ་མ་ནྟ་སེ་ནཱ་ས་ནེ ས་མཱ་དྷིཾ ཨ་པྤེ་ཏྭཱ ནི་སི་ནྣཾ. ཨི་དཱ་ནི་མནྟི ཨི་དཱ་ནི ཨི་མཾ. ས་མཱ་དྷི་མྷཱ ཙཱ་ཝེ་སྶ་ཏཱིཏི ས་མཱ་དྷི་ཏོ ཨུ་ཊྛཱ་པེ་སྶ་ཏི. ན ཨ་ཏྟ་མ་ནོ ཧོ་མཱིཏི ན ས་ཀ་མ་ནོ ཧོ་མི. པ་ཙ་ལཱ་ཡ་མཱ་ནནྟི ནི་དྡཱ་ཡ་མཱ་ནཾ. ཨེ་ཀ་ཏྟནྟི ཨེ་ཀ་ས་བྷཱ་ཝཾ, ཨེ་ཀ་གྒ་ཏཱ་བྷཱུ་ཏཾ ཨ་ར་ཉྙ་ས་ཉྙཾ་ཡེ་ཝ ཙི་ཏྟེ ཀ་རི་སྶ་ཏཱི་ཏི ཨ་ཏྠོ. ཨ་ནུ་ར་ཀྑི་སྶ་ཏཱིཏི ཨ་ནུ་གྒ་ཎྷི་སྶ་ཏི. ཨ་ཝི་མུ་ཏྟཾ ཝཱ ཙི་ཏྟཾ ཝི་མོ་ཙེ་སྶ་ཏཱིཏི ཨ་ཉྙ་སྨིཾ ཀཱ་ལེ ཨ་ཝི་མུ་ཏྟཾ ཙི་ཏྟཾ ཨི་དཱ་ནི པ་ཉྩ་ཧི ཝི་མུ་ཏྟཱི་ཧི ཝི་མོ་ཙ་ཡི་སྶ་ཏི. རི་ཉྩ་ཏཱིཏི ཝ་ཛྫེ་ཏི ཝི་སྶ་ཛྫེ་ཏི. པ་ཊི་པ་ཎཱ་མེ་ཏྭཱཏི པ་ནུ་དི་ཏྭཱ ཝི་སྶ་ཛྫེ་ཏྭཱ. ཨུ་ཙྩཱ་ར་པ་སྶཱ་ཝ་ཀ་མྨཱ་ཡཱཏི ཨུ་ཙྩཱ་ར་པ་སྶཱ་ཝ་ཀ་ར་ཎ་ཏྠཱ་ཡ. ཨི་མི་ནཱ ཨེ་ཏྟ་ཀེ་ན ཋཱ་ནེ་ན ས་ཏྠཱ་རཱ ཨ་ར་ཉྙ་སེ་ནཱ་ས་ན་སྶ ཝ་ཎྞོ ཀ་ཐི་ཏོ. སུ་ཏྟ་སྶ པ་ན པ་ཋ་མ་ཀོ་ཊྛཱ་སེ ཡཾ ཝ་ཏྟ་བྦཾ, ཏཾ ཧེ་ཊྛཱ ཝུ་ཏྟ་མེ་ཝཱ་ཏི.
དེ་ཝ་ཏཱ་ཝ་གྒོ ཙ་ཏུ་ཏྠོ.