(༦) ༡. ནཱི་ཝ་ར་ཎ་ཝ་གྒོ
༡. ཨཱ་ཝ་ར་ཎ་སུ་ཏྟ་ཝ་ཎྞ་ནཱ
༥༡. དུ་ཏི་ཡ་སྶ པ་ཋ་མེ ཨཱ་ཝ་ར་ཎ་ཝ་སེ་ན ཨཱ་ཝ་ར་ཎཱ. ནཱི་ཝ་ར་ཎ་ཝ་སེ་ན ནཱི་ཝ་ར་ཎཱ. ཙེ་ཏོ ཨ་ཛ྄ཛྷཱ་རུ་ཧ་ནྟཱི་ཏི ཙེ་ཏ་སོ ཨ་ཛ྄ཛྷཱ་རུ་ཧཱ. ཝི་པ་སྶ་ནཱ་པ་ཉྙ་ཉྩ མ་གྒ་པ་ཉྙ་ཉྩ ཨུ་པྤ་ཏྟི་ནི་ཝཱ་ར་ཎ་ཊྛེ་ན དུ་བྦ་ལཾ ཀ་རོ་ནྟཱི་ཏི པ་ཉྙཱ་ཡ དུ་བྦ་ལཱི་ཀ་ར་ཎཱ. ཡཱ ཝཱ ཨེ་ཏེ་ཧི ས་དྡྷིཾ ཝོ་ཀི་ཎྞཱ པ་ཉྙཱ ཨུ་པྤ་ཛྫ་ཏི, ཏཾ དུ་བྦ་ལཾ ཀ་རོ་ནྟཱི་ཏི་པི པ་ཉྙཱ་ཡ དུ་བྦ་ལཱི་ཀ་ར་ཎཱ. ཨ་བ་ལཱ་ཡཱཏི པ་ཉྩ་ནཱི་ཝ་ར་ཎ་པ་རི་ཡོ་ན་དྡྷ་ཏྟཱ ཨ་པ་ག་ཏ་བ་ལཱ་ཡ. ཨུ་ཏྟ་རི ཝཱ མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སནྟི ད་ས་ཀུ་ས་ལ་ཀ་མྨ་པ་ཐ་ས་ངྑཱ་ཏཱ མ་ནུ་སྶ་དྷ་མྨཱ ཨུ་ཏྟ་རི ཨ་རི་ཡ་བྷཱ་ཝཾ ཀཱ་ཏུཾ ས་མ་ཏྠཾ ཉཱ་ཎ་ད་སྶ་ན་ཝི་སེ་སཾ. ཧཱ་ར་ཧཱ་རི་ནཱིཏི ཧ་རི་ཏ་བྦཾ ཧ་རི་ཏུཾ ས་མ་ཏྠཱ. ན་ངྒ་ལ་མུ་ཁཱ་ནཱིཏི མཱ་ཏི་ཀཱ་མུ་ཁཱ་ནི. ཏཱ་ནི ཧི ན་ངྒ་ལ་ས་རི་ཀྑ་ཀ་ཏྟཱ ན་ངྒ་ལེ་ཧི ཙ ཁ་ཏ་ཏྟཱ ན་ངྒ་ལ་མུ་ཁཱ་ནཱི་ཏི ཝུ་ཙྩ་ནྟི.
ཨེ་ཝ་མེ་ཝ ཁོཏི ཨེ་ཏྠ སོ་ཏཾ ཝི་ཡ ཝི་པ་སྶ་ནཱ་ཉཱ་ཎཾ ད་ཊྛ་བྦཾ, ཨུ་བྷ་ཏོ ན་ངྒ་ལ་མུ་ཁཱ་ནཾ ཝི་ཝ་ར་ཎ་ཀཱ་ལོ ཝི་ཡ ཚ་སུ དྭཱ་རེ་སུ སཾ་ཝ་ར་སྶ ཝི་སྶ་ཊྛ་ཀཱ་ལོ, མ་ཛ྄ཛྷེ་ན་དི་ཡཱ རུ་ཀྑ་པཱ་དེ ཀོ་ཊྚེ་ཏྭཱ པ་ལཱ་ལ་ཏི་ཎ་མ་ཏྟི་ཀཱ་ཧི ཨཱ་ཝ་ར་ཎེ ཀ་ཏེ ཨུ་ད་ཀ་སྶ ཝི་ཀྑི་ཏྟ་ཝི་ས་ཊ་བྱཱ་དི་ཎྞ་ཀཱ་ལོ ཝི་ཡ པ་ཉྩ་ཧི ནཱི་ཝ་ར་ཎེ་ཧི པ་རི་ཡོ་ན་དྡྷ་ཀཱ་ལོ, ཨེ་ཝཾ ཨཱ་ཝ་ར་ཎེ ཀ་ཏེ ཝི་ཧ་ཏ་ཝེ་ག་སྶ ཨུ་ད་ཀ་སྶ ཏི་ཎ་པ་ལཱ་ལཱ་དཱི་ནི པ་རི་ཀ་ཌྜྷི་ཏྭཱ ས་མུ་དྡཾ པཱ་པུ་ཎི་ཏུཾ ཨ་ས་མ་ཏྠ་ཀཱ་ལོ ཝི་ཡ ཝི་པ་སྶ་ནཱ་ཉཱ་ཎེ་ན ས་བྦཱ་ཀུ་ས་ལེ ཝི་དྡྷཾ་སེ་ཏྭཱ ནི་བྦཱ་ན་སཱ་ག་རཾ པཱ་པུ་ཎི་ཏུཾ ཨ་ས་མ་ཏྠ་ཀཱ་ལོ ཝེ་དི་ཏ་བྦོ. སུ་ཀྐ་པ་ཀྑེ ཝུ་ཏྟ་ཝི་པ་ལླཱ་སེ་ན ཡོ་ཛ་ནཱ ཀཱ་ཏ་བྦཱ. ཨི་མ་སྨིཾ སུ་ཏྟེ ཝ་ཊྚ་ཝི་ཝ་ཊྚཾ ཀ་ཐི་ཏཾ. དུ་ཏི་ཡཾ ཨུ་ཏྟཱ་ན་ཏྠ་མེ་ཝ.
༣. པ་དྷཱ་ནི་ཡ་ངྒ་སུ་ཏྟ་ཝ་ཎྞ་ནཱ
༥༣. ཏ་ཏི་ཡེ པ་དྷཱ་ནི་ཡ་ངྒཱ་ནཱིཏི པ་དྷཱ་ནཾ ཝུ་ཙྩ་ཏི པ་ད་ཧ་ན་བྷཱ་ཝོ, པ་དྷཱ་ན་མ་སྶ ཨ་ཏྠཱི་ཏི པ་དྷཱ་ནི་ཡོ, པ་དྷཱ་ནི་ཡ་སྶ བྷི་ཀྑུ་ནོ ཨ་ངྒཱ་ནཱི་ཏི པ་དྷཱ་ནི་ཡ་ངྒཱ་ནི. ས་དྡྷོཏི ས་དྡྷཱ་ཡ ས་མ་ནྣཱ་ག་ཏོ. ས་དྡྷཱ པ་ནེ་སཱ ཨཱ་ག་མ་ས་དྡྷཱ ཨ་དྷི་ག་མ་ས་དྡྷཱ ཨོ་ཀ་པྤ་ན་ས་དྡྷཱ པ་སཱ་ད་ས་དྡྷཱ་ཏི ཙ་ཏུ་བྦི་དྷཱ. ཏ་ཏྠ ས་བྦ་ཉྙུ་བོ་དྷི་ས་ཏྟཱ་ནཾ ས་དྡྷཱ, ཨ་བྷི་ནཱི་ཧཱ་ར་ཏོ པ་ཊྛཱ་ཡ ཨཱ་ག་ཏ་ཏྟཱ ཨཱ་ག་མ་ས་དྡྷཱ ནཱ་མ. ཨ་རི་ཡ་སཱ་ཝ་ཀཱ་ནཾ པ་ཊི་ཝེ་དྷེ་ན ཨ་དྷི་ག་ཏ་ཏྟཱ ཨ་དྷི་ག་མ་ས་དྡྷཱ ནཱ་མ. བུ་དྡྷོ དྷ་མྨོ ས་ངྒྷོ་ཏི ཝུ་ཏྟེ ཨ་ཙ་ལ་བྷཱ་ཝེ་ན ཨོ་ཀ་པྤ་ནཾ ཨོ་ཀ་པྤ་ན་ས་དྡྷཱ ནཱ་མ. པ་སཱ་དུ་པྤ་ཏྟི པ་སཱ་ད་ས་དྡྷཱ ནཱ་མ. ཨི་དྷ ཨོ་ཀ་པྤ་ན་ས་དྡྷཱ ཨ་དྷི་པྤེ་ཏཱ. བོ་དྷིནྟི ཙ་ཏུ་མ་གྒ་ཉཱ་ཎཾ. ཏཾ སུ་པྤ་ཊི་ཝི་དྡྷཾ ཏ་ཐཱ་ག་ཏེ་ནཱ་ཏི ས་དྡ་ཧ་ཏི. དེ་ས་ནཱ་སཱི་ས་མེ་ཝ ཙེ་ཏཾ, ཨི་མི་ནཱ པ་ན ཨ་ངྒེ་ན ཏཱི་སུ་པི ར་ཏ་ནེ་སུ ས་དྡྷཱ ཨ་དྷི་པྤེ་ཏཱ. ཡ་སྶ ཧི བུ་དྡྷཱ་དཱི་སུ པ་སཱ་དོ བ་ལ་ཝཱ, ཏ་སྶ པ་དྷཱ་ན་ཝཱི་རི་ཡཾ ཨི་ཛ྄ཛྷ་ཏི.
ཨ་པྤཱ་བཱ་དྷོཏི ཨ་རོ་གོ. ཨ་པྤཱ་ཏ་ངྐོཏི ནི་དྡུ་ཀྑོ. ས་མ་ཝེ་པཱ་ཀི་ནི་ཡཱཏི ས་མ་ཝི་པཱ་ཀི་ནི་ཡཱ. ག་ཧ་ཎི་ཡཱཏི ཀ་མྨ་ཛ་ཏེ་ཛོ་དྷཱ་ཏུ་ཡཱ. ནཱ་ཏི་སཱི་ཏཱ་ཡ ནཱ་ཙྩུ་ཎྷཱ་ཡཱཏི ཨ་ཏི་སཱི་ཏ་ལ་གྒ་ཧ་ཎི་ཀོ ཧི སཱི་ཏ་བྷཱི་རུ་ཀོ ཧོ་ཏི, ཨ་ཙྩུ་ཎྷ་གྒ་ཧ་ཎི་ཀོ ཨུ་ཎྷ་བྷཱི་རུ་ཀོ, ཏེ་སཾ པ་དྷཱ་ནཾ ན ཨི་ཛ྄ཛྷ་ཏི, མ་ཛ྄ཛྷི་མ་གྒ་ཧ་ཎི་ཀ་སྶ ཨི་ཛ྄ཛྷ་ཏི. ཏེ་ནཱ་ཧ – མ་ཛ྄ཛྷི་མཱ་ཡ པ་དྷཱ་ན་ཀྑ་མཱ་ཡཱཏི. ཡ་ཐཱ་བྷཱུ་ཏཾ ཨ་ཏྟཱ་ནཾ ཨཱ་ཝི་ཀ་ཏྟཱཏི ཡ་ཐཱ་བྷཱུ་ཏཾ ཨ་ཏྟ་ནོ ཨ་གུ་ཎཾ པ་ཀཱ་སེ་ཏཱ. ཨུ་ད་ཡ་ཏྠ་གཱ་མི་ནི་ཡཱཏི ཨུ་ད་ཡ་ཉྩ ཨ་ཏྠ་ཉྩ ག་ནྟུཾ པ་རི་ཙྪི་ནྡི་ཏུཾ ས་མ་ཏྠཱ་ཡ. ཨེ་ཏེ་ན པ་ཉྙཱ་ས་ལ་ཀྑ་ཎ་པ་རི་གྒཱ་ཧ་ཀཾ ཨུ་ད་ཡ་བྦ་ཡ་ཉཱ་ཎཾ ཝུ་ཏྟཾ. ཨ་རི་ཡཱ་ཡཱཏི པ་རི་སུ་དྡྷཱ་ཡ. ནི་བྦེ་དྷི་ཀཱ་ཡཱཏི ཨ་ནི་བྦི་དྡྷ་པུ་བྦེ ལོ་བྷ་ཀྑ་ནྡྷཱ་ད་ཡོ ནི་བྦི་ཛ྄ཛྷི་ཏུཾ ས་མ་ཏྠཱ་ཡ. ས་མྨཱ དུ་ཀྑ་ཀྑ་ཡ་གཱ་མི་ནི་ཡཱཏི ཏ་ད་ངྒ་ཝ་སེ་ན ཀི་ལེ་སཱ་ནཾ པ་ཧཱི་ན་ཏྟཱ ཡཾ དུ་ཀྑཾ ཁཱི་ཡ་ཏི, ཏ་སྶ དུ་ཀྑ་སྶ ཁ་ཡ་གཱ་མི་ནི་ཡཱ. ཨི་ཏི ས་བྦེ་ཧི་པི ཨི་མེ་ཧི པ་དེ་ཧི ཝི་པ་སྶ་ནཱ་པ་ཉྙཱ་ཝ ཀ་ཐི་ཏཱ. དུ་པྤ་ཉྙ་སྶ ཧི པ་དྷཱ་ནཾ ན ཨི་ཛ྄ཛྷ་ཏི.
༤. ས་མ་ཡ་སུ་ཏྟ་ཝ་ཎྞ་ནཱ
༥༤. ཙ་ཏུ་ཏྠེ པ་དྷཱ་ནཱ་ཡཱཏི ཝཱི་རི་ཡ་ཀ་ར་ཎ་ཏྠཱ་ཡ. ན སུ་ཀ་རཾ ཨུ་ཉྪེ་ན པ་གྒ་ཧེ་ན ཡཱ་པེ་ཏུནྟི ན ས་ཀྐཱ ཧོ་ཏི པ་ཏྟཾ ག་ཧེ་ཏྭཱ ཨུ་ཉྪཱ་ཙ་རི་ཡཱ་ཡ ཡཱ་པེ་ཏུཾ. ཨི་མ་སྨི་མྤི སུ་ཏྟེ ཝ་ཊྚ་ཝི་ཝ་ཊྚ་མེ་ཝ ཀ་ཐི་ཏཾ.
༥. མཱ་ཏཱ་པུ་ཏྟ་སུ་ཏྟ་ཝ་ཎྞ་ནཱ
༥༥. པ་ཉྩ་མེ པ་རི་ཡཱ་དཱ་ཡ ཏི་ཊྛ་ཏཱིཏི པ་རི་ཡཱ་དི་ཡི་ཏྭཱ ག་ཧེ་ཏྭཱ ཁེ་པེ་ཏྭཱ ཏི་ཊྛ་ཏི. ཨུ་གྒྷཱ་ཏི་ཏཱཏི ཨུ་དྡྷུ་མཱ་ཏཱ.
ཨ་སི་ཧ་ཏྠེ་ནཱཏི སཱི་ས་ཙྪེ་ད་ན་ཏྠཱ་ཡ ཨ་སིཾ ཨཱ་དཱ་ཡ ཨཱ་ག་ཏེ་ནཱ་པི. པི་སཱ་ཙེ་ནཱཏི ཁཱ་དི་ཏུཾ ཨཱ་ག་ཏ་ཡ་ཀྑེ་ནཱ་པི. ཨཱ་སཱི་དེཏི གྷ་ཊྚེ་ཡྻ. མ་ཉྫུ་ནཱཏི མུ་དུ་ཀེ་ན. ཀཱ་མོ་གྷ་ཝུ་ལ༹ྷཱ་ནནྟི ཀཱ་མོ་གྷེ་ན ཝུ་ལ༹ྷཱ་ནཾ ཀ་ཌྜྷི་ཏཱ་ནཾ. ཀཱ་ལཾ ག་ཏི བྷ་ཝཱ་བྷ་ཝནྟི ཝ་ཊྚ་ཀཱ་ལཾ ག་ཏི་ཉྩ པུ་ན་པྤུ་ན་བྦྷ་ཝེ ཙ. པུ་ར་ཀྑ་ཏཱཏི པུ་རེ་ཙཱ་རི་ཀཱ པུ་ར་ཏོ ག་ཏཱ་ཡེ་ཝ. ཡེ ཙ ཀཱ་མེ པ་རི་ཉྙཱ་ཡཱཏི ཡེ པ་ཎྜི་ཏཱ དུ་ཝི་དྷེ་པི ཀཱ་མེ ཏཱི་ཧི པ་རི་ཉྙཱ་ཧི པ་རི་ཛཱ་ནི་ཏྭཱ. ཙ་ར་ནྟི ཨ་ཀུ་ཏོ་བྷ་ཡཱཏི ཁཱི་ཎཱ་ས་ཝཱ་ནཾ ཀུ་ཏོ་ཙི བྷ་ཡཾ ནཱ་མ ན་ཏྠི, ཏ་སྨཱ ཏེ ཨ་ཀུ་ཏོ་བྷ་ཡཱ ཧུ་ཏྭཱ ཙ་ར་ནྟི. པཱ་ར་ངྒ་ཏཱཏི པཱ་རཾ ཝུ་ཙྩ་ཏི ནི་བྦཱ་ནཾ, ཏཾ ཨུ་པ་ག་ཏཱ, ས་ཙྪི་ཀ་ཏྭཱ ཋི་ཏཱ་ཏི ཨ་ཏྠོ. ཨཱ་ས་ཝ་ཀྑ་ཡནྟི ཨ་ར་ཧ་ཏྟཾ. ཨི་མ་སྨིཾ སུ་ཏྟེ ཝ་ཊྚ་མེ་ཝ ཀ་ཐེ་ཏྭཱ གཱ་ཐཱ་སུ ཝ་ཊྚ་ཝི་ཝ་ཊྚཾ ཀ་ཐི་ཏཾ.
༦. ཨུ་པ་ཛ྄ཛྷཱ་ཡ་སུ་ཏྟ་ཝ་ཎྞ་ནཱ
༥༦. ཚ་ཊྛེ མ་དྷུ་ར་ཀ་ཛཱ་ཏོཏི ས་ཉྫཱ་ཏ་ག་རུ་བྷཱ་ཝོ. དི་སཱ ཙ མེ ན པ་ཀྑཱ་ཡ་ནྟཱིཏི ཙ་ཏ་སྶོ དི་སཱ ཙ ཨ་ནུ་དི་སཱ ཙ མ་ཡ྄ཧཾ ན ཨུ་པ་ཊྛ་ཧ་ནྟཱི་ཏི ཝ་ད་ཏི. དྷ་མྨཱ ཙ མཾ ན་པྤ་ཊི་བྷ་ནྟཱིཏི ས་མ་ཐ་ཝི་པ་སྶ་ནཱ་དྷ་མྨཱ་པི མེ ན ཨུ་པ་ཊྛ་ཧ་ནྟི. ཨ་ན་བྷི་ར་ཏོ ཙ བྲ་ཧྨ་ཙ་རི་ཡཾ ཙ་རཱ་མཱིཏི ཨུ་ཀྐ་ཎྛི་ཏོ ཧུ་ཏྭཱ བྲ་ཧྨ་ཙ་རི་ཡ་ཝཱ་སཾ ཝ་སཱ་མི. ཡེ་ན བྷ་ག་ཝཱ ཏེ་ནུ་པ་ས་ངྐ་མཱིཏི ཏ་སྶ ཀ་ཐཾ སུ་ཏྭཱ ‘‘བུ་དྡྷ་ཝེ་ནེ་ཡྻ་པུ་གྒ་ལོ ཨ་ཡ’’ནྟི ཏཾ ཀཱ་ར་ཎཾ བྷ་ག་ཝ་ཏོ ཨཱ་རོ་ཙེ་ཏུཾ ཨུ་པ་ས་ངྐ་མི. ཨ་ཝི་པ་སྶ་ཀ་སྶ ཀུ་ས་ལཱ་ནཾ དྷ་མྨཱ་ནནྟི ཀུ་ས་ལ་དྷ་མྨེ ཨ་ཝི་པ་སྶ་ནྟ་སྶ, ཨ་ནེ་ས་ནྟ་སྶ ཨ་ག་ཝེ་ས་ནྟ་སྶཱ་ཏི ཨ་ཏྠོ. བོ་དྷི་པ་ཀྑི་ཡཱ་ནཾ དྷ་མྨཱ་ནནྟི ས་ཏི་པ་ཊྛཱ་ནཱ་དཱི་ནཾ ས་ཏྟ་ཏིཾ་ས་དྷ་མྨཱ་ནཾ.
༧. ཨ་བྷི་ཎྷ་པ་ཙྩ་ཝེ་ཀྑི་ཏ་བྦ་ཋཱ་ན་སུ་ཏྟ་ཝ་ཎྞ་ནཱ
༥༧. ས་ཏྟ་མེ ཛ་རཱ་དྷ་མྨོ་མྷཱིཏི ཛ་རཱ་ས་བྷཱ་ཝོ ཨ་མྷི. ཛ་རཾ ཨ་ན་ཏཱི་ཏོཏི ཛ་རཾ ཨ་ན་ཏི་ཀྐ་ནྟོ, ཨ་ནྟོ་ཛ་རཱ་ཡ ཨེ་ཝ ཙ་རཱ་མི. སེ་ས་པ་དེ་སུ་པི ཨེ་སེ་ཝ ན་ཡོ. ཀ་མྨ་སྶ་ཀོཏི་ཨཱ་དཱི་སུ ཀ་མྨཾ མ་ཡ྄ཧཾ ས་ཀཾ ཨ་ཏྟ་ནོ ས་ནྟ་ཀ་ནྟི ཀ་མྨ་སྶ་ཀོ ཨ་མྷི. ཀ་མྨ་སྶ དཱ་ཡཱ་དོ་ཏི ཀ་མྨ་དཱ་ཡཱ་དོ, ཀ་མྨཾ མ་ཡ྄ཧཾ དཱ་ཡ་ཛྫཾ ས་ནྟ་ཀ་ནྟི ཨ་ཏྠོ. ཀ་མྨཾ མ་ཡ྄ཧཾ ཡོ་ནི ཀཱ་ར་ཎ་ནྟི ཀ་མྨ་ཡོ་ནི. ཀ་མྨཾ མ་ཡ྄ཧཾ བ་ནྡྷཱུ་ཏི ཀ་མྨ་བ་ནྡྷུ, ཀ་མྨ་ཉཱ་ཏ་ཀོ་ཏི ཨ་ཏྠོ. ཀ་མྨཾ མ་ཡ྄ཧཾ པ་ཊི་ས་ར་ཎཾ པ་ཏི་ཊྛཱ་ཏི ཀ་མྨ་པ་ཊི་ས་ར་ཎོ. ཏ་སྶ དཱ་ཡཱ་དོ བྷ་ཝི་སྶཱ་མཱིཏི ཏ་སྶ ཀ་མྨ་སྶ དཱ་ཡཱ་དོ ཏེ་ན དི་ནྣ་ཕ་ལ་པ་ཊི་གྒཱ་ཧ་ཀོ བྷ་ཝི་སྶཱ་མཱི་ཏི ཨ་ཏྠོ. ཡོ་བྦ་ན་མ་དོཏི ཡོ་བྦ་ནཾ ཨཱ་ར་བྦྷ ཨུ་པྤ་ནྣ་མ་དོ. སེ་སེ་སུ་པི ཨེ་སེ་ཝ ན་ཡོ. མ་གྒོ ས་ཉྫཱ་ཡ་ཏཱིཏི ལོ་ཀུ་ཏྟ་ར་མ་གྒོ ས་ཉྫཱ་ཡ་ཏི. སཾ་ཡོ་ཛ་ནཱ་ནི ས་བྦ་སོ པ་ཧཱི་ཡ་ནྟཱིཏི ད་ས སཾ་ཡོ་ཛ་ནཱ་ནི ས་བྦ་སོ པ་ཧཱི་ཡ་ནྟི. ཨ་ནུ་ས་ཡཱ བྱ་ནྟཱི་ཧོ་ནྟཱིཏི ས་ཏྟ ཨ་ནུ་ས་ཡཱ ཝི་ག་ཏ་ནྟཱ པ་རི་ཙྪི་ནྣཱ པ་རི་ཝ་ཊུ་མཱ ཧོ་ནྟི. ཨེ་ཝ་མེ་ཏྠ ཧེ་ཊྛཱ པ་ཉྩ་སུ ཋཱ་ནེ་སུ ཝི་པ་སྶ་ནཱ ཀ་ཐི་ཏཱ, ཨི་མེ་སུ པ་ཉྩ་སུ ལོ་ཀུ་ཏྟ་ར་མ་གྒོ.
ཨི་དཱ་ནི གཱ་ཐཱ་ཧི ཀཱུ་ཊཾ ག་ཎྷ་ནྟོ བྱཱ་དྷི་དྷ་མྨཱཏི་ཨཱ་དི་མཱ་ཧ. ཏ་ཏྠ ཉ་ཏྭཱ དྷ་མྨཾ ནི་རཱུ་པ་དྷིནྟི ཨུ་པ་དྷི་ར་ཧི་ཏཾ ཨ་ར་ཧ་ཏྟ་མ་གྒཾ ཉ་ཏྭཱ. ས་བྦེ མ་དེ ཨ་བྷི་བྷོ་སྨཱིཏི ས་བྦེ ཨི་མེ ཏ་ཡོ་པི མ་དེ ཨ་དྷི་བྷ་ཝིཾ, ཨ་ཏི་ཀྐ་མྨ ཋི་ཏོ་སྨཱི་ཏི ཨ་ཏྠོ. ནེ་ཀྑ་མྨཾ ད་ཊྛུ ཁེ་མ་ཏོཏི པ་བྦ་ཛྫཾ ཁེ་མ་ཏོ དི་སྭཱ. ཏ་སྶ མེ ཨ་ཧུ ཨུ་སྶཱ་ཧོ, ནི་བྦཱ་ནཾ ཨ་བྷི་པ་སྶ་ཏོཏི ཏ་སྶ མ་ཡ྄ཧཾ ནི་བྦཱ་ནཾ ཨ་བྷི་པ་སྶ་ནྟ་སྶ ཝཱ་ཡཱ་མོ ཨ་ཧོ་སི. ཨ་ནི་ཝ་ཏྟི བྷ་ཝི་སྶཱ་མཱིཏི པ་བྦ་ཛྫ་ཏོ ཨ་ནི་ཝ་ཏྟི་ཀོ བྷ་ཝི་སྶཱ་མི, བྲ་ཧྨ་ཙ་རི་ཡ་ཝཱ་ས་ཏོ ཨ་ནི་ཝ་ཏྟི་ཀོ, ས་བྦ་ཉྙུ་ཏ་ཉྙཱ་ཎ་ཏོ ཨ་ནི་ཝ་ཏྟི་ཀོ བྷ་ཝི་སྶཱ་མི. བྲ་ཧྨ་ཙ་རི་ཡ་པ་རཱ་ཡ་ཎོཏི མ་གྒ་བྲ་ཧྨ་ཙ་རི་ཡ་པ་རཱ་ཡ་ཎོ. ཨི་མི་ནཱ ལོ་ཀུ་ཏྟ་རོ ཨ་ཊྛ་ངྒི་ཀོ མ་གྒོ ཀ་ཐི་ཏོ་ཏི.
༨. ལི་ཙྪ་ཝི་ཀུ་མཱ་ར་ཀ་སུ་ཏྟ་ཝ་ཎྞ་ནཱ
༥༨. ཨ་ཊྛ་མེ ས་ཛྫཱ་ནི དྷ་ནཱུ་ནཱིཏི ས་ཛི་ཡཱ་ནི ཨཱ་རོ་པི་ཏ་དྷ་ནཱུ་ནི. ཨ་དྡ་སཱུཏི ཨ་དྡ་སཾ་སུ. བྷ་ཝི་སྶ་ནྟི ཝ་ཛྫཱིཏི ཝ་ཌྜྷི་སྶ་ནྟི ཝ་ཛྫི་རཱ་ཛཱ་ནོ. ཨ་པཱ་ནུ་བྷཱཏི ཨ་ཝ་ཌྜྷི་ནི་སྶི་ཏཱ མཱ་ན་ཐ་དྡྷཱ. པ་ཙྪཱ་ལི་ཡཾ ཁི་པ་ནྟཱིཏི པ་ཙྪ་ཏོ ག་ནྟྭཱ པི་ཊྛིཾ པཱ་དེ་ན པ་ཧ་ར་ནྟི. ར་ཊྛི་ཀ་སྶཱཏི་ཨཱ་དཱི་སུ ར་ཊྛཾ བྷུ་ཉྫ་ཏཱི་ཏི ར་ཊྛི་ཀོ. པི་ཏ་རཱ ད་ཏྟཾ སཱ་པ་ཏེ་ཡྻཾ བྷུ་ཉྫ་ཏཱི་ཏི པེ་ཏྟ་ནི་ཀོ. སེ་ནཱ་ཡ པ་ཏི ཛེ་ཊྛ་ཀོ་ཏི སེ་ནཱ་པ་ཏི་ཀོ. གཱ་མ་གཱ་མ་ཎི་ཀ་སྶཱཏི གཱ་མཱ་ནཾ གཱ་མ་ཎི་ཀ་སྶ, གཱ་མ་སཱ་མི་ཀ་སྶཱ་ཏི ཨ་ཏྠོ. པཱུ་ག་གཱ་མ་ཎི་ཀ་སྶཱཏི ག་ཎ་ཛེ་ཊྛ་ཀ་སྶ. ཀུ་ལེ་སཱུཏི ཏེ་སུ ཏེ་སུ ཀུ་ལེ་སུ. པ་ཙྩེ་ཀཱ་དྷི་པ་ཙྩཾ ཀཱ་རེ་ནྟཱིཏི པ་ཙྩེ་ཀཾ ཛེ་ཊྛ་ཀ་ཊྛཱ་ནཾ ཀཱ་རེ་ནྟི. ཀ་ལྱཱ་ཎེ་ན མ་ན་སཱ ཨ་ནུ་ཀ་མྤ་ནྟཱིཏི སུ་ནྡ་རེ་ན ཙི་ཏྟེ་ན ཨ་ནུ་གྒ་ཎྷ་ནྟི. ཁེ་ཏྟ་ཀ་མྨ་ནྟ་སཱ་མ་ནྟ་ས་བྱོ་ཧཱ་རེཏི ཡེ ཙ ཨ་ཏྟ་ནོ ཁེ་ཏྟ་ཀ་མྨ་ནྟཱ་ནཾ སཱ་མ་ནྟཱ ཨ་ན་ནྟ་ར་ཀྑེ་ཏྟ་སཱ་མི་ནོ, ཏེ ཙ ར་ཛྫུ་ད་ཎྜེ་ཧི བྷཱུ་མི་པྤ་མཱ་ཎ་གྒཱ་ཧ་ཀེ ས་བྦོ་ཧཱ་རེ ཙ. བ་ལི་པ་ཊི་གྒཱ་ཧི་ཀཱ དེ་ཝ་ཏཱཏི ཀུ་ལ་པྤ་ཝེ་ཎི་ཡཱ ཨཱ་ག་ཏཱ ཨཱ་ར་ཀྑ་དེ་ཝ་ཏཱ. ས་ཀྐ་རོ་ཏཱིཏི ཏཱ དེ་ཝ་ཏཱ ཨ་གྒ་ཡཱ་གུ་བྷ་ཏྟཱ་དཱི་ཧི ས་ཀྐ་རོ་ཏི.
ཀི་ཙྩ་ཀ་རོཏི ཨུ་པྤ་ནྣཱ་ནཾ ཀི་ཙྩཱ་ནཾ ཀཱ་ར་ཀོ. ཡེ ཙ་སྶ ཨ་ནུ་ཛཱི་ཝི་ནོཏི ཡེ ཙ ཨེ་ཏཾ ཨུ་པ་ནི་སྶཱ་ཡ ཛཱི་ཝ་ནྟི. ཨུ་བྷི་ནྣ་ཉྩེ་ཝ ཨ་ཏྠཱ་ཡཱཏི ཨུ་བྷི་ནྣ་མྤི ཧི་ཏ་ཏྠཱ་ཡ པ་ཊི་པ་ནྣོ ཧོ་ཏཱི་ཏི ཨ་ཏྠོ. པུ་བྦ་པེ་ཏཱ་ནནྟི པ་ར་ལོ་ཀ་ག་ཏཱ་ནཾ. དི་ཊྛེ དྷ་མྨེ ཙ ཛཱི་ཝ་ཏནྟི ཡེ ཙ དི་ཊྛེ དྷ་མྨེ ཛཱི་ཝ་ནྟི. ཨི་ཏི པ་ད་དྭ་ཡེ་ནཱ་པི ཨ་ཏཱི་ཏ་པ་ཙྩུ་པྤ་ནྣེ ཉཱ་ཏ་ཡོ ད་སྶེ་ཏི. ཝི་ཏྟི་ས་ཉྫ་ན་ནོཏི ཏུ་ཊྛི་ཛ་ན་ནོ. གྷ་ར་མཱ་ཝ་སནྟི གྷ་རཱ་ཝཱ་སཾ ཝ་ས་ནྟོ. པུ་ཛྫོ ཧོ་ཏི པ་སཾ་སི་ཡོཏི པཱུ་ཛེ་ཏ་བྦོ ཙ པ་སཾ་སི་ཏ་བྦོ ཙ ཧོ་ཏཱི་ཏི.
༩-༡༠. ཝུ་ཌྜྷ་པ་བྦ་ཛི་ཏ་སུ་ཏྟ་དྭ་ཡ་ཝ་ཎྞ་ནཱ
༥༩-༦༠. ན་ཝ་མེ ནི་པུ་ཎོཏི ས་ཎྷོ སུ་ཁུ་མ་ཀཱ་ར་ཎ་ཉྙཱུ. ཨཱ་ཀ་པྤ་ས་མྤ་ནྣོཏི ས་མ་ཎཱ་ཀ་པྤེ་ན ས་མྤ་ནྣོ. ད་ས་མེ པ་ད་ཀྑི་ཎ་གྒཱ་ཧཱིཏི དི་ནྣོ་ཝཱ་དཾ པ་ད་ཀྑི་ཎ་ཏོ ག་ཎྷ་ནྟོ. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
ནཱི་ཝ་ར་ཎ་ཝ་གྒོ པ་ཋ་མོ.