༥. མུ་ཎྜ་རཱ་ཛ་ཝ་གྒོ
༡. ཨཱ་དི་ཡ་སུ་ཏྟ་ཝ་ཎྞ་ནཱ
༤༡. པ་ཉྩ་མ་སྶ པ་ཋ་མེ བྷོ་གཱ་ནཾ ཨཱ་དི་ཡཱཏི བྷོ་གཱ་ནཾ ཨཱ་དཱ་ཏ་བྦ་ཀཱ་ར་ཎཱ་ནི. ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧཱིཏི ཨུ་ཊྛཱ་ན་ས་ངྑཱ་ཏེ་ན ཝཱི་རི་ཡེ་ན ཨ་དྷི་ག་ཏེ་ཧི. བཱ་ཧཱ་བ་ལ་པ་རི་ཙི་ཏེ་ཧཱིཏི བཱ་ཧུ་བ་ལེ་ན ས་ཉྩི་ཏེ་ཧི. སེ་དཱ་ཝ་ཀྑི་ཏྟེ་ཧཱིཏི སེ་དཾ ཨ་ཝ་ཀྑི་པེ་ཏྭཱ ཨུ་པྤཱ་དི་ཏེ་ཧི. དྷ་མྨི་ཀེ་ཧཱིཏི དྷ་མྨ་ཡུ་ཏྟེ་ཧི. དྷ་མྨ་ལ་དྡྷེ་ཧཱིཏི ད་ས་ཀུ་ས་ལ་ཀ་མྨཾ ཨ་ཀོ་པེ་ཏྭཱ ལ་དྡྷེ་ཧི. པཱི་ཎེ་ཏཱིཏི པཱི་ཎི་ཏཾ ཐཱུ་ལཾ ཀ་རོ་ཏི. སེ་ས་མེ་ཏྠ ཙ་ཏུ་ཀྐ་ནི་པཱ་ཏེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. དུ་ཏི་ཡཾ ཨུ་ཏྟཱ་ན་ཏྠ་མེ་ཝ.
༣. ཨི་ཊྛ་སུ་ཏྟ་ཝ་ཎྞ་ནཱ
༤༣. ཏ་ཏི་ཡེ ཨཱ་ཡུ་སཾ་ཝ་ཏྟ་ནི་ཀཱ པ་ཊི་པ་དཱཏི དཱ་ན་སཱི་ལཱ་དི་ཀཱ པུ་ཉྙ་པ་ཊི་པ་དཱ. སེ་སེ་སུ་པི ཨེ་སེ་ཝ ན་ཡོ. ཨ་ཏྠཱ་བྷི་ས་མ་ཡཱཏི ཨ་ཏྠ་སྶ ཨ་བྷི་ས་མཱ་ག་མེ་ན, ཨ་ཏྠ་པྤ་ཊི་ལཱ་བྷེ་ནཱ་ཏི ཝུ་ཏྟཾ ཧོ་ཏི.
༤. མ་ནཱ་པ་དཱ་ཡཱི་སུ་ཏྟ་ཝ་ཎྞ་ནཱ
༤༤. ཙ་ཏུ་ཏྠེ ཨུ་གྒོཏི གུ་ཎེ་ཧི ཨུ་གྒ་ཏ་ཏྟཱ ཨེ་ཝཾ་ལ་དྡྷ་ནཱ་མོ. སཱ་ལ་པུ་པྥ་ཀཾ ཁཱ་ད་ནཱི་ཡནྟི ཙ་ཏུ་མ་དྷུ་ར་ཡོ་ཛི་ཏེ་ན སཱ་ལི་པི་ཊྛེ་ན ཀ་ཏཾ སཱ་ལ་པུ་པྥ་ས་དི་སཾ ཁཱ་ད་ནཱི་ཡཾ. ཏ་ཉྷི པ་ཉྙཱ་ཡ་མཱ་ན་ཝ་ཎྚ་པ་ཏྟ་ཀེ་ས་རཾ ཀ་ཏྭཱ ཛཱི་ར་ཀཱ་དི་ས་མྦྷཱ་ར་ཡུ་ཏྟེ ས་པྤི་མྷི པ་ཙི་ཏྭཱ ས་པྤིཾ ཝི་ནི་ཝ་ཏྟེ་ཏྭཱ ཀོ་ལུ་མྦེ པཱུ་རེ་ཏྭཱ ག་ནྡྷ་ཝཱ་སཾ གཱ་ཧཱ་པེ་ཏྭཱ པི་ད་ཧི་ཏྭཱ ལ་ཉྪེ་ཏྭཱ ཋ་པི་ཏཾ ཧོ་ཏི. ཏཾ སོ ཡཱ་གུཾ པི་ཝི་ཏྭཱ ནི་སི་ནྣ་སྶ བྷ་ག་ཝ་ཏོ ཨ་ནྟ་ར་བྷ་ཏྟེ དཱ་ཏུ་ཀཱ་མོ ཨེ་ཝ་མཱ་ཧ. པ་ཊི་གྒ་ཧེ་སི བྷ་ག་ཝཱཏི དེ་ས་ནཱ་མ་ཏྟ་མེ་ཏཾ, ཨུ་པཱ་ས་ཀོ པ་ན ཏཾ བྷ་ག་ཝ་ཏོ ཙ པ་ཉྩ་ནྣ་ཉྩ བྷི་ཀྑུ་ས་ཏཱ་ནཾ ཨ་དཱ་སི. ཡ་ཐཱ ཙ ཏཾ, ཨེ་ཝཾ སཱུ་ཀ་ར་མཾ་སཱ་དཱི་ནི་པི. ཏ་ཏྠ ས་མྤ་ནྣ་ཀོ་ལ་ཀནྟི ས་མྤ་ནྣ་བ་ད་རཾ. སཱུ་ཀ་ར་མཾ་སནྟི མ་དྷུ་ར་ར་སེ་ཧི བ་ད་རེ་ཧི ས་དྡྷིཾ ཛཱི་ར་ཀཱ་དི་ས་མྦྷཱ་རེ་ཧི ཡོ་ཛེ་ཏྭཱ པ་ཀྐཾ ཨེ་ཀ་སཾ་ཝ་ཙྪ་རི་ཀ་སཱུ་ཀ་ར་མཾ་སཾ. ནི་བྦ་ཏྟ་ཏེ་ལ་ཀནྟི ཝི་ནི་ཝ་ཏྟི་ཏ་ཏེ་ལཾ. ནཱ་ལི་ཡ་སཱ་ཀནྟི སཱ་ལི་པི་ཊྛེ་ན ས་དྡྷིཾ མ་དྡི་ཏྭཱ ཛཱི་ར་ཀཱ་དི་སཾ་ཡུ་ཏྟེ ས་པྤི་མྷི པ་ཙི་ཏྭཱ ཙ་ཏུ་མ་དྷུ་རེ་ན ཡོ་ཛེ་ཏྭཱ ཝཱ་སཾ གཱ་ཧཱ་པེ་ཏྭཱ ཋ་པི་ཏཾ ནཱ་ལི་ཡ་སཱ་ཀཾ. ནེ་ཏཾ བྷ་ག་ཝ་ཏོ ཀ་པྤ་ཏཱིཏི ཨེ་ཏྠ ཨ་ཀ་པྤི་ཡཾ ཨུ་པཱ་དཱ་ཡ ཀ་པྤི་ཡ་མྤི ན ཀ་པྤ་ཏཱི་ཏི ཝུ་ཏྟཾ, སེ་ཊྛི པ་ན ས་བྦ་མྤི ཏཾ ཨཱ་ཧ་རཱ་པེ་ཏྭཱ རཱ་སིཾ ཀ་ཏྭཱ ཡཾ ཡཾ ཨ་ཀ་པྤི་ཡཾ, ཏཾ ཏཾ ཨ་ནྟ་རཱ་པ་ཎཾ པ་ཧི་ཎི་ཏྭཱ ཀ་པྤི་ཡཾ ཨུ་པ་བྷོ་ག་པ་རི་བྷོ་ག་བྷ་ཎྜཾ ཨ་དཱ་སི. ཙ་ནྡ་ན་ཕ་ལ་ཀཾ ནཱ་ཏི་མ་ཧ་ནྟཾ དཱི་གྷ་ཏོ ཨ་ཌྜྷ་ཏེ་ཡྻ་ར་ཏ་ནཾ, ཏི་རི་ཡཾ དི་ཡ་ཌྜྷ་ར་ཏ་ནཾ, སཱ་ར་ཝ་ར་བྷ་ཎྜ་ཏྟཱ པ་ན མ་ཧ་གྒྷཾ ཨ་ཧོ་སི. བྷ་ག་ཝཱ ཏཾ པ་ཊི་གྒ་ཧེ་ཏྭཱ ཁ་ཎྜཱ་ཁ་ཎྜི་ཀཾ ཚེ་དཱ་པེ་ཏྭཱ བྷི་ཀྑཱུ་ནཾ ཨ་ཉྫ་ན་པི་ས་ན་ཏྠཱ་ཡ དཱ་པེ་སི.
ཨུ་ཛྫུ་བྷཱུ་ཏེ་སཱུཏི ཀཱ་ཡ་ཝཱ་ཙཱ་ཙི་ཏྟེ་ཧི ཨུ་ཛུ་ཀེ་སུ. ཚ་ནྡ་སཱཏི པེ་མེ་ན. ཙ་ཏྟནྟི་ཨཱ་དཱི་སུ པ་རི་ཙྩཱ་ག་ཝ་སེ་ན ཙ་ཏྟཾ. མུ་ཏྟ་ཙཱ་ག་ཏཱ་ཡ མུ་ཏྟཾ. ཨ་ན་པེ་ཀྑ་ཙི་ཏྟ་ཏཱ་ཡ ཙི་ཏྟེ་ན ན ཨུ་གྒ་ཧི་ཏ་ནྟི ཨ་ནུ་གྒ་ཧཱི་ཏཾ. ཁེ་ཏྟཱུ་པ་མེཏི ཝི་རུ་ཧ་ན་ཊྛེ་ན ཁེ་ཏྟ་ས་དི་སེ.
ཨ་ཉྙ་ཏ་རཾ མ་ནོ་མ་ཡནྟི སུ་དྡྷཱ་ཝཱ་སེ་སུ ཨེ་ཀཾ ཛྷཱ་ན་མ་ནེ་ན ནི་བྦ་ཏྟཾ དེ་ཝ་ཀཱ་ཡཾ. ཡ་ཐཱ་དྷི་པྤཱ་ཡོཏི ཡ་ཐཱ་ཛ྄ཛྷཱ་ས་ཡོ. ཨི་མི་ནཱ ཀིཾ པུ་ཙྪ་ཏི? ཏ་སྶ ཀི་ར མ་ནུ་སྶ་ཀཱ་ལེ ཨ་ར་ཧ་ཏྟ་ཏྠཱ་ཡ ཨ་ཛ྄ཛྷཱ་ས་ཡོ ཨ་ཧོ་སི, ཏཾ པུ་ཙྪཱ་མཱི་ཏི པུ་ཙྪ་ཏི. དེ་ཝ་པུ་ཏྟོ་པི ཨ་ར་ཧ་ཏྟཾ པ་ཏྟ་ཏཱ་ཡ ཏ་གྒྷ མེ བྷ་ག་ཝཱ ཡ་ཐཱ་དྷི་པྤཱ་ཡོཏི ཨཱ་ཧ. ཡ་ཏྠ ཡ་ཏྠཱུ་པ་པ་ཛྫ་ཏཱིཏི ཏཱི་སུ ཝཱ ཀུ་ལ་ས་མྤ་ཏྟཱི་སུ ཚ་སུ ཝཱ ཀཱ་མ་ས་གྒེ་སུ ཡ་ཏྠ ཡ་ཏྠ ཨུ་པྤ་ཛྫ་ཏི, ཏ་ཏྠ ཏ་ཏྠ དཱི་གྷཱ་ཡུ ཡ་ས་ཝཱ ཧོ་ཏཱི་ཏི. པ་ཉྩ་མཾ ཙ་ཏུ་ཀྐ་ནི་པཱ་ཏེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཚ་ཊྛ་ས་ཏྟ་མཱ་ནི ཨུ་ཏྟཱ་ན་ཏྠཱ་ནེ་ཝ.
༨. ཨ་ལ་བྦྷ་ནཱི་ཡ་ཋཱ་ན་སུ་ཏྟ་ཝ་ཎྞ་ནཱ
༤༨. ཨ་ཊྛ་མེ ཨ་ལ་བྦྷ་ནཱི་ཡཱ་ནཱིཏི ཨ་ལ་དྡྷ་བྦཱ་ནི, ན ས་ཀྐཱ ལ་བྷི་ཏུཾ. ཋཱ་ནཱ་ནཱིཏི ཀཱ་ར་ཎཱ་ནི. ཛ་རཱ་དྷ་མྨཾ མཱ ཛཱི་རཱིཏི ཡཾ མ་ཡ྄ཧཾ ཛ་རཱ་ས་བྷཱ་ཝཾ, ཏཾ མཱ ཛཱི་ར་ཏུ. སེ་ས་པ་དེ་སུ་པི ཨེ་སེ་ཝ ན་ཡོ. ན་ཙྪཱ་དེ་ཡྻཱཏི ན རུ་ཙྩེ་ཡྻ. ཨ་བྦུ་ཧཱིཏི ནཱི་ཧ་རི.
ཡ་ཏོཏི ཡ་སྨིཾ ཀཱ་ལེ. ཨཱ་པ་དཱ་སཱུཏི ཨུ་པ་དྡ་ཝེ་སུ. ན ཝེ་དྷ་ཏཱིཏི ན ཀ་མྤ་ཏི ནཱ་ནུ་སོ་ཙ་ཏི. ཨ་ཏྠ་ཝི་ནི་ཙྪ་ཡ་ཉྙཱུཏི ཀཱ་ར་ཎ་ཏྠ་ཝི་ནི་ཙྪ་ཡེ ཀུ་ས་ལོ. པུ་རཱ་ཎནྟི ནི་བྦི་ཀཱ་ར་ཏཱ་ཡ པོ་རཱ་ཎ་ཀ་མེ་ཝ. ཛ་པྤེ་ནཱཏི ཝ་ཎྞ་བྷ་ཎ་ནེ་ན. མ་ནྟེ་ནཱཏི མ་ཧཱ་ནུ་བྷཱ་ཝ་མ་ནྟ་པ་རི་ཝ་ཏྟ་ནེ་ན. སུ་བྷཱ་སི་ཏེ་ནཱཏི སུ་བྷཱ་སི་ཏ་ཀ་ཐ་ནེ་ན. ཨ་ནུ་པྤ་དཱ་ནེ་ནཱཏི ས་ཏ་སྶ ཝཱ ས་ཧ་སྶ་སྶ ཝཱ དཱ་ནེ་ན. པ་ཝེ་ཎི་ཡཱ ཝཱཏི ཀུ་ལ་ཝཾ་སེ་ན ཝཱ, ‘‘ཨི་དཾ ཨ་མྷཱ་ཀཾ པ་ཝེ་ཎི་ཡཱ ཨཱ་ཙི་ཎྞཾ, ཨི་དཾ ཨ་ནཱ་ཙི་ཎྞ’’ནྟི ཨེ་ཝཾ པ་ཝེ་ཎི་ཀ་ཐ་ནེ་ནཱ་ཏི ཨ་ཏྠོ. ཡ་ཐཱ ཡ་ཐཱ ཡ་ཏྠ ལ་བྷེ་ཐ ཨ་ཏྠནྟི ཨེ་ཏེ་སུ ཛ་པྤཱ་དཱི་སུ ཡེ་ན ཡེ་ན ཡ་ཏྠ ཡ་ཏྠ ཋཱ་ནེ ཛ་རཱ་དྷ་མྨཱ་དཱི་ནཾ ཨ་ཛཱི་ར་ཎ་ཏཱ་དི་ཨ་ཏྠཾ ལ་བྷེ་ཡྻ. ཏ་ཐཱ ཏ་ཐཱ ཏ་ཏྠ པ་ར་ཀྐ་མེ་ཡྻཱཏི ཏེ་ན ཏེ་ན ཏ་སྨིཾ ཏ་སྨིཾ ཋཱ་ནེ པ་ར་ཀྐ་མཾ ཀ་རེ་ཡྻ. ཀ་མྨཾ ད་ལ༹ྷནྟི ཝ་ཊྚ་གཱ་མི་ཀ་མྨཾ མ་ཡཱ ཐི་རཾ ཀ་ཏྭཱ ཨཱ་ཡཱུ་ཧི་ཏཾ, སྭཱ་ཧཾ ཨི་དཱ་ནི ཀི་ནྟི ཀ་རོ་མཱི་ཏི ཨེ་ཝཾ པ་ཙྩ་ཝེ་ཀྑི་ཏྭཱ ཨ་དྷི་ཝཱ་སེ་ཡྻཱ་ཏི.
༩. ཀོ་ས་ལ་སུ་ཏྟ་ཝ་ཎྞ་ནཱ
༤༩. ན་ཝ་མེ ཨུ་པ་ཀ་ཎྞ་ཀེཏི ཀ་ཎྞ་མཱུ་ལེ. དུ་མྨ་ནོཏི དུ་ཊྛུ་མ་ནོ. པ་ཏྟ་ཀྑ་ནྡྷོཏི པ་ཏི་ཏ་ཀྑ་ནྡྷོ. པ་ཛ྄ཛྷཱ་ཡ་ནྟོཏི ཙི་ནྟ་ཡ་ནྟོ. ཨ་པྤ་ཊི་བྷཱ་ནོཏི ནི་པྤ་ཊི་བྷཱ་ནོ ཧུ་ཏྭཱ. སེ་སཾ ཧེ་ཊྛཱ ཝུ་ཏྟ་ན་ཡ་མེ་ཝ.
༡༠. ནཱ་ར་ད་སུ་ཏྟ་ཝ་ཎྞ་ནཱ
༥༠. ད་ས་མེ ཨ་ཛ྄ཛྷོ་མུ་ཙྪི་ཏོཏི ཨ་དྷི་ཨོ་མུ་ཙྪི་ཏོ གི་ལི་ཏྭཱ པ་རི་ནི་ཊྛ་པེ་ཏྭཱ ག་ཧ་ཎ་ས་བྷཱ་ཝཱ་ཡ ཨ་ཏི་རེ་ཀ་མུ་ཙྪཱ་ཡ ཏ་ཎྷཱ་ཡ ས་མ་ནྣཱ་ག་ཏོ. མ་ཧ་ཙྩཱ རཱ་ཛཱ་ནུ་བྷཱ་ཝེ་ནཱཏི མ་ཧ་ཏཱ རཱ་ཛཱ་ནུ་བྷཱ་ཝེ་ན, ཨ་ཊྛཱ་ར་ས་ཧི སེ་ནཱི་ཧི པ་རི་ཝཱ་རི་ཏོ མ་ཧ་ཏི་ཡཱ རཱ་ཛི་དྡྷི་ཡཱ པཱ་ཡཱ་སཱི་ཏི ཨ་ཏྠོ. ཏ་གྒྷཱཏི ཨེ་ཀཾ་ས་ཏྠེ ནི་པཱ་ཏོ, ཨེ་ཀཾ་སེ་ནེ་ཝ སོ་ཀ་ས་ལླ་ཧ་ར་ཎོ་ཏི ཨ་ཏྠོ. ཨི་ཏི རཱ་ཛཱ ཨི་མཾ ཨོ་ཝཱ་དཾ སུ་ཏྭཱ ཏ་སྨིཾ ཋི་ཏོ དྷ་མྨེ་ན ས་མེ་ན ར་ཛྫཾ ཀཱ་རེ་ཏྭཱ ས་གྒ་པ་རཱ་ཡ་ཎོ ཨ་ཧོ་སི.
མུ་ཎྜ་རཱ་ཛ་ཝ་གྒོ པ་ཉྩ་མོ.