༥-༦. ས་ངྒཱ་ར་ཝ་སུ་ཏྟཱ་དི་ཝ་ཎྞ་ནཱ

༡༡༧-༡༡༨. པ་ཉྩ་མེ ཨོ་རི་མཾ ཏཱི་རནྟི ལོ་ཀི་ཡཾ ཨོ་རི་མ་ཏཱི་རཾ. པཱ་རི་མཾ ཏཱི་རནྟི ལོ་ཀུ་ཏྟ་རཾ པཱ་རི་མ་ཏཱི་རཾ. པཱ་ར་གཱ་མི་ནོཏི ནི་བྦཱ་ན་གཱ་མི་ནོ. ཏཱི་ར་མེ་ཝཱ་ནུ་དྷཱ་ཝ་ཏཱིཏི ས་ཀྐཱ་ཡ་དི་ཊྛི་ཏཱི་རཾ་ཡེ་ཝ ཨ་ནུ་དྷཱ་ཝ་ཏི. དྷ་མྨེ དྷ་མྨཱ་ནུ་ཝ་ཏྟི་ནོཏི ས་མྨཱ ཨ་ཀྑཱ་ཏེ ན་ཝ་ཝི་དྷེ ལོ་ཀུ་ཏྟ་ར་དྷ་མྨེ ཨ་ནུ་དྷ་མྨ་ཝ་ཏྟི་ནོ, ཏ་སྶ དྷ་མྨ་སྶཱ་ནུ་ཙྪ་ཝི་ཀཱ་ཡ ས་ཧ་སཱི་ལཱ་ཡ པུ་བྦ་བྷཱ་ག་པ་ཊི་པ་ཏྟི་ཡཱ པ་ཝ་ཏྟ་མཱ་ནཱ. མ་ཙྩུ་དྷེ་ཡྻཾ སུ་དུ་ཏྟ་རནྟི མ་ཙྩུ་ནོ ཋཱ་ན་བྷཱུ་ཏཾ ཏེ་བྷཱུ་མ་ཀ་ཝ་ཊྚཾ སུ་དུ་ཏྟ་རཾ ཏ་རི་ཏྭཱ. པཱ་ར་མེ་སྶ་ནྟཱིཏི ནི་བྦཱ་ནཾ པཱ་པུ་ཎི་སྶ་ནྟི.

ཨོ་ཀཱ ཨ་ནོ་ཀ་མཱ་ག་མྨཱཏི ཝ་ཊྚ་ཏོ ཝི་ཝ་ཊྚཾ ཨཱ་ག་མྨ. ཝི་ཝེ་ཀེ ཡ་ཏྠ དཱུ་ར་མནྟི ཡ་སྨིཾ ཀཱ་ཡ་ཙི་ཏྟ་ཨུ་པ་དྷི་ཝི་ཝེ་ཀེ དུ་ར་བྷི་ར་མཾ, ཏ་ཏྲཱ་བྷི་ར་ཏི་མི་ཙྪེ་ཡྻ. ཧི་ཏྭཱ ཀཱ་མེཏི དུ་ཝི་དྷེ་པི ཀཱ་མེ པ་ཧཱ་ཡ. ཨ་ཀི་ཉྩ་ནོཏི ནི་པྤ་ལི་བོ་དྷོ. ཨཱ་དཱ་ན་པ་ཊི་ནི་སྶ་གེཏི ག་ཧ་ཎ་པ་ཊི་ནི་སྶ་གྒ་ས་ངྑཱ་ཏེ ནི་བྦཱ་ནེ. ཨ་ནུ་པཱ་དཱ་ཡ ཡེ ར་ཏཱཏི ཙ་ཏཱུ་ཧི ཨུ་པཱ་དཱ་ནེ་ཧི ཀི་ཉྩི་པི ཨ་ནུ་པཱ་དི་ཡི་ཏྭཱ ཡེ ཨ་བྷི་ར་ཏཱ. པ་རི་ནི་བྦུ་ཏཱཏི ཏེ ཨ་པ་ཙྩ་ཡ་པ་རི་ནི་བྦཱ་ནེ་ན པ་རི་ནི་བྦུ་ཏཱ ནཱ་མཱ་ཏི ཝེ་དི་ཏ་བྦཱ. ཚ་ཊྛཾ བྷི་ཀྑཱུ་ནཾ དེ་སི་ཏཾ.