༡. ཨ་བྷི་དྷ་མྨ་བྷཱ་ཛ་ནཱི་ཡཾ

༢༡༩. བཱ་ཝཱི་ས་ཏི་ནྡྲི་ཡཱ་ནི – ཙ་ཀྑུ་ནྡྲི་ཡཾ, སོ་ཏི་ནྡྲི་ཡཾ, གྷཱ་ནི་ནྡྲི་ཡཾ, ཛི་ཝ྄ཧི་ནྡྲི་ཡཾ, ཀཱ་ཡི་ནྡྲི་ཡཾ, མ་ནི་ནྡྲི་ཡཾ, ཨི་ཏྠི་ནྡྲི་ཡཾ, པུ་རི་སི་ནྡྲི་ཡཾ, ཛཱི་ཝི་ཏི་ནྡྲི་ཡཾ, སུ་ཁི་ནྡྲི་ཡཾ, དུ་ཀྑི་ནྡྲི་ཡཾ, སོ་མ་ན་སྶི་ནྡྲི་ཡཾ, དོ་མ་ན་སྶི་ནྡྲི་ཡཾ, ཨུ་པེ་ཀྑི་ནྡྲི་ཡཾ, ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ [ཝི་རི་ཡི་ནྡྲི་ཡཾ (སཱི. སྱཱ.)], ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ, ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ, ཨ་ཉྙི་ནྡྲི་ཡཾ, ཨ་ཉྙཱ་ཏཱ་ཝི་ནྡྲི་ཡཾ.

༢༢༠. ཏ་ཏྠ ཀ་ཏ་མཾ ཙ་ཀྑུ་ནྡྲི་ཡཾ? ཡཾ ཙ་ཀྑུ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ…པེ… སུ་ཉྙོ གཱ་མོ་པེ་སོ – ཨི་དཾ ཝུ་ཙྩ་ཏི ‘‘ཙ་ཀྑུ་ནྡྲི་ཡཾ’’.

ཏ་ཏྠ ཀ་ཏ་མཾ སོ་ཏི་ནྡྲི་ཡཾ…པེ… གྷཱ་ནི་ནྡྲི་ཡཾ…པེ… ཛི་ཝ྄ཧི་ནྡྲི་ཡཾ…པེ… ཀཱ་ཡི་ནྡྲི་ཡཾ? ཡོ ཀཱ་ཡོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ…པེ… སུ་ཉྙོ གཱ་མོ་པེ་སོ – ཨི་དཾ ཝུ་ཙྩ་ཏི ‘‘ཀཱ་ཡི་ནྡྲི་ཡཾ’’.

ཏ་ཏྠ ཀ་ཏ་མཾ མ་ནི་ནྡྲི་ཡཾ? ཨེ་ཀ་ཝི་དྷེ་ན མ་ནི་ནྡྲི་ཡཾ – ཕ་སྶ་ས་མྤ་ཡུ་ཏྟཾ. དུ་ཝི་དྷེ་ན མ་ནི་ནྡྲི་ཡཾ – ཨ་ཏྠི ས་ཧེ་ཏུ་ཀཾ, ཨ་ཏྠི ཨ་ཧེ་ཏུ་ཀཾ. ཏི་ཝི་དྷེ་ན མ་ནི་ནྡྲི་ཡཾ – ཨ་ཏྠི ཀུ་ས་ལཾ, ཨ་ཏྠི ཨ་ཀུ་ས་ལཾ, ཨ་ཏྠི ཨ་བྱཱ་ཀ་ཏཾ. ཙ་ཏུ་བྦི་དྷེ་ན མ་ནི་ནྡྲི་ཡཾ – ཨ་ཏྠི ཀཱ་མཱ་ཝ་ཙ་རཾ, ཨ་ཏྠི རཱུ་པཱ་ཝ་ཙ་རཾ, ཨ་ཏྠི ཨ་རཱུ་པཱ་ཝ་ཙ་རཾ, ཨ་ཏྠི ཨ་པ་རི་ཡཱ་པ་ནྣཾ. པ་ཉྩ་ཝི་དྷེ་ན མ་ནི་ནྡྲི་ཡཾ – ཨ་ཏྠི སུ་ཁི་ནྡྲི་ཡ་ས་མྤ་ཡུ་ཏྟཾ, ཨ་ཏྠི དུ་ཀྑི་ནྡྲི་ཡ་ས་མྤ་ཡུ་ཏྟཾ, ཨ་ཏྠི སོ་མ་ན་སྶི་ནྡྲི་ཡ་ས་མྤ་ཡུ་ཏྟཾ, ཨ་ཏྠི དོ་མ་ན་སྶི་ནྡྲི་ཡ་ས་མྤ་ཡུ་ཏྟཾ, ཨ་ཏྠི ཨུ་པེ་ཀྑི་ནྡྲི་ཡ་ས་མྤ་ཡུ་ཏྟཾ. ཚ་བྦི་དྷེ་ན མ་ནི་ནྡྲི་ཡཾ – ཙ་ཀྑུ་ཝི་ཉྙཱ་ཎཾ…པེ… མ་ནོ་ཝི་ཉྙཱ་ཎཾ. ཨེ་ཝཾ ཚ་བྦི་དྷེ་ན མ་ནི་ནྡྲི་ཡཾ.

ས་ཏྟ་ཝི་དྷེ་ན མ་ནི་ནྡྲི་ཡཾ – ཙ་ཀྑུ་ཝི་ཉྙཱ་ཎཾ…པེ… ཀཱ་ཡ་ཝི་ཉྙཱ་ཎཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ. ཨེ་ཝཾ ས་ཏྟ་ཝི་དྷེ་ན མ་ནི་ནྡྲི་ཡཾ.

ཨ་ཊྛ་ཝི་དྷེ་ན མ་ནི་ནྡྲི་ཡཾ – ཙ་ཀྑུ་ཝི་ཉྙཱ་ཎཾ…པེ… ཀཱ་ཡ་ཝི་ཉྙཱ་ཎཾ ཨ་ཏྠི སུ་ཁ་ས་ཧ་ག་ཏཾ, ཨ་ཏྠི དུ་ཀྑ་ས་ཧ་ག་ཏཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ. ཨེ་ཝཾ ཨ་ཊྛ་ཝི་དྷེ་ན མ་ནི་ནྡྲི་ཡཾ.

ན་ཝ་ཝི་དྷེ་ན མ་ནི་ནྡྲི་ཡཾ – ཙ་ཀྑུ་ཝི་ཉྙཱ་ཎཾ…པེ… ཀཱ་ཡ་ཝི་ཉྙཱ་ཎཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ ཨ་ཏྠི ཀུ་ས་ལཱ, ཨ་ཏྠི ཨ་ཀུ་ས་ལཱ, ཨ་ཏྠི ཨ་བྱཱ་ཀ་ཏཱ. ཨེ་ཝཾ ན་ཝ་ཝི་དྷེ་ན མ་ནི་ནྡྲི་ཡཾ.

ད་ས་ཝི་དྷེ་ན མ་ནི་ནྡྲི་ཡཾ – ཙ་ཀྑུ་ཝི་ཉྙཱ་ཎཾ…པེ… ཀཱ་ཡ་ཝི་ཉྙཱ་ཎཾ ཨ་ཏྠི སུ་ཁ་ས་ཧ་ག་ཏཾ, ཨ་ཏྠི དུ་ཀྑ་ས་ཧ་ག་ཏཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ ཨ་ཏྠི ཀུ་ས་ལཱ, ཨ་ཏྠི ཨ་ཀུ་ས་ལཱ, ཨ་ཏྠི ཨ་བྱཱ་ཀ་ཏཱ. ཨེ་ཝཾ ད་ས་ཝི་དྷེ་ན མ་ནི་ནྡྲི་ཡཾ…པེ… ཨེ་ཝཾ བ་ཧུ་ཝི་དྷེ་ན མ་ནི་ནྡྲི་ཡཾ. ཨི་དཾ ཝུ་ཙྩ་ཏི ‘‘མ་ནི་ནྡྲི་ཡཾ’’.

ཏ་ཏྠ ཀ་ཏ་མཾ ཨི་ཏྠི་ནྡྲི་ཡཾ? ཡཾ ཨི་ཏྠི་ཡཱ ཨི་ཏྠི་ལི་ངྒཾ ཨི་ཏྠི་ནི་མི་ཏྟཾ ཨི་ཏྠི་ཀུ་ཏྟཾ ཨི་ཏྠཱ་ཀ་པྤོ ཨི་ཏྠ་ཏྟཾ ཨི་ཏྠི་བྷཱ་ཝོ – ཨི་དཾ ཝུ་ཙྩ་ཏི ‘‘ཨི་ཏྠི་ནྡྲི་ཡཾ’’.

ཏ་ཏྠ ཀ་ཏ་མཾ པུ་རི་སི་ནྡྲི་ཡཾ? ཡཾ པུ་རི་ས་སྶ པུ་རི་ས་ལི་ངྒཾ པུ་རི་ས་ནི་མི་ཏྟཾ པུ་རི་ས་ཀུ་ཏྟཾ པུ་རི་སཱ་ཀ་པྤོ པུ་རི་ས་ཏྟཾ པུ་རི་ས་བྷཱ་ཝོ – ཨི་དཾ ཝུ་ཙྩ་ཏི ‘‘པུ་རི་སི་ནྡྲི་ཡཾ’’.

ཏ་ཏྠ ཀ་ཏ་མཾ ཛཱི་ཝི་ཏི་ནྡྲི་ཡཾ? ཛཱི་ཝི་ཏི་ནྡྲི་ཡཾ དུ་ཝི་དྷེ་ན – ཨ་ཏྠི རཱུ་པ་ཛཱི་ཝི་ཏི་ནྡྲི་ཡཾ, ཨ་ཏྠི ཨ་རཱུ་པ་ཛཱི་ཝི་ཏི་ནྡྲི་ཡཾ.

ཏ་ཏྠ ཀ་ཏ་མཾ རཱུ་པ་ཛཱི་ཝི་ཏི་ནྡྲི་ཡཾ? ཡོ ཏེ་སཾ རཱུ་པཱི་ནཾ དྷ་མྨཱ་ནཾ ཨཱ་ཡུ ཋི་ཏི ཡ་པ་ནཱ ཡཱ་པ་ནཱ ཨི་རི་ཡ་ནཱ ཝ་ཏྟ་ནཱ པཱ་ལ་ནཱ ཛཱི་ཝི་ཏཾ ཛཱི་ཝི་ཏི་ནྡྲི་ཡཾ – ཨི་དཾ ཝུ་ཙྩ་ཏི ‘‘རཱུ་པ་ཛཱི་ཝི་ཏི་ནྡྲི་ཡཾ’’.

ཏ་ཏྠ ཀ་ཏ་མཾ ཨ་རཱུ་པ་ཛཱི་ཝི་ཏི་ནྡྲི་ཡཾ? ཡོ ཏེ་སཾ ཨ་རཱུ་པཱི་ནཾ དྷ་མྨཱ་ནཾ ཨཱ་ཡུ ཋི་ཏི ཡ་པ་ནཱ ཡཱ་པ་ནཱ ཨི་རི་ཡ་ནཱ ཝ་ཏྟ་ནཱ པཱ་ལ་ནཱ ཛཱི་ཝི་ཏཾ ཛཱི་ཝི་ཏི་ནྡྲི་ཡཾ – ཨི་དཾ ཝུ་ཙྩ་ཏི ‘‘ཨ་རཱུ་པ་ཛཱི་ཝ་ཏི་ནྡྲི་ཡཾ’’. ཨི་དཾ ཝུ་ཙྩ་ཏི ‘‘ཛཱི་ཝི་ཏི་ནྡྲི་ཡཾ’’.

ཏ་ཏྠ ཀ་ཏ་མཾ སུ་ཁི་ནྡྲི་ཡཾ? ཡཾ ཀཱ་ཡི་ཀཾ སཱ་ཏཾ ཀཱ་ཡི་ཀཾ སུ་ཁཾ ཀཱ་ཡ་ས་མྥ་སྶ་ཛཾ སཱ་ཏཾ སུ་ཁཾ ཝེ་ད་ཡི་ཏཾ ཀཱ་ཡ་ས་མྥ་སྶ་ཛཱ སཱ་ཏཱ སུ་ཁཱ ཝེ་ད་ནཱ – ཨི་དཾ ཝུ་ཙྩ་ཏི ‘‘སུ་ཁི་ནྡྲི་ཡཾ’’.

ཏ་ཏྠ ཀ་ཏ་མཾ དུ་ཀྑི་ནྡྲི་ཡཾ? ཡཾ ཀཱ་ཡི་ཀཾ ཨ་སཱ་ཏཾ ཀཱ་ཡི་ཀཾ དུ་ཀྑཾ ཀཱ་ཡ་ས་མྥ་སྶ་ཛཾ ཨ་སཱ་ཏཾ དུ་ཀྑཾ ཝེ་ད་ཡི་ཏཾ ཀཱ་ཡ་ས་མྥ་སྶ་ཛཱ ཨ་སཱ་ཏཱ དུ་ཀྑཱ ཝེ་ད་ནཱ – ཨི་དཾ ཝུ་ཙྩ་ཏི ‘‘དུ་ཀྑི་ནྡྲི་ཡཾ’’.

ཏ་ཏྠ ཀ་ཏ་མཾ སོ་མ་ན་སྶི་ནྡྲི་ཡཾ? ཡཾ ཙེ་ཏ་སི་ཀཾ སཱ་ཏཾ ཙེ་ཏ་སི་ཀཾ སུ་ཁཾ ཙེ་ཏོ་ས་མྥ་སྶ་ཛཾ སཱ་ཏཾ སུ་ཁཾ ཝེ་ད་ཡི་ཏཾ ཙེ་ཏོ་ས་མྥ་སྶ་ཛཱ སཱ་ཏཱ སུ་ཁཱ ཝེ་ད་ནཱ – ཨི་དཾ ཝུ་ཙྩ་ཏི ‘‘སོ་མ་ན་སྶི་ནྡྲི་ཡཾ’’.

ཏ་ཏྠ ཀ་ཏ་མཾ དོ་མ་ན་སྶི་ནྡྲི་ཡཾ? ཡཾ ཙེ་ཏ་སི་ཀཾ ཨ་སཱ་ཏཾ ཙེ་ཏ་སི་ཀཾ དུ་ཀྑཾ ཙེ་ཏོ་ས་མྥ་སྶ་ཛཾ ཨ་སཱ་ཏཾ དུ་ཀྑཾ ཝེ་ད་ཡི་ཏཾ ཙེ་ཏོ་ས་མྥ་སྶ་ཛཱ ཨ་སཱ་ཏཱ དུ་ཀྑཱ ཝེ་ད་ནཱ – ཨི་དཾ ཝུ་ཙྩ་ཏི ‘‘དོ་མ་ན་སྶི་ནྡྲི་ཡཾ’’.

ཏ་ཏྠ ཀ་ཏ་མཾ ཨུ་པེ་ཀྑི་ནྡྲི་ཡཾ? ཡཾ ཙེ་ཏ་སི་ཀཾ ནེ་ཝ སཱ་ཏཾ ནཱ་སཱ་ཏཾ ཙེ་ཏོ་ས་མྥ་སྶ་ཛཾ ཨ་དུ་ཀྑ་མ་སུ་ཁཾ ཝེ་ད་ཡི་ཏཾ ཙེ་ཏོ་ས་མྥ་སྶ་ཛཱ ཨ་དུ་ཀྑ་མ་སུ་ཁཱ ཝེ་ད་ནཱ – ཨི་དཾ ཝུ་ཙྩ་ཏི ‘‘ཨུ་པེ་ཀྑི་ནྡྲི་ཡཾ’’.

ཏ་ཏྠ ཀ་ཏ་མཾ ས་དྡྷི་ནྡྲི་ཡཾ? ཡཱ ས་དྡྷཱ ས་དྡ་ཧ་ནཱ ཨོ་ཀ་པྤ་ནཱ ཨ་བྷི་པྤ་སཱ་དོ ས་དྡྷཱ ས་དྡྷི་ནྡྲི་ཡཾ ས་དྡྷཱ་བ་ལཾ – ཨི་དཾ ཝུ་ཙྩ་ཏི ‘‘ས་དྡྷི་ནྡྲི་ཡཾ’’.

ཏ་ཏྠ ཀ་ཏ་མཾ ཝཱི་རི་ཡི་ནྡྲི་ཡཾ? ཡོ ཙེ་ཏ་སི་ཀོ ཝཱི་རི་ཡཱ་ར་མྦྷོ ནི་ཀྐ་མོ པ་ར་ཀྐ་མོ ཨུ་ཡྻཱ་མོ ཝཱ་ཡཱ་མོ ཨུ་སྶཱ་ཧོ ཨུ་སྶོ་ལ༹ྷཱི ཐཱ་མོ ཋི་ཏི ཨ་སི་ཐི་ལ་པ་ར་ཀྐ་མ་ཏཱ ཨ་ནི་ཀྑི་ཏྟ་ཚ་ནྡ་ཏཱ ཨ་ནི་ཀྑི་ཏྟ་དྷུ་ར་ཏཱ དྷུ་ར་ས་མྤ་གྒཱ་ཧོ ཝཱི་རི་ཡཾ ཝཱི་རི་ཡི་ནྡྲི་ཡཾ ཝཱི་རི་ཡ་བ་ལཾ – ཨི་དཾ ཝུ་ཙྩ་ཏི ‘‘ཝཱི་རི་ཡི་ནྡྲི་ཡཾ’’.

ཏ་ཏྠ ཀ་ཏ་མཾ ས་ཏི་ནྡྲི་ཡཾ? ཡཱ ས་ཏི ཨ་ནུ་སྶ་ཏི པ་ཊི་སྶ་ཏི ས་ཏི ས་ར་ཎ་ཏཱ དྷཱ་ར་ཎ་ཏཱ ཨ་པི་ལཱ་པ་ན་ཏཱ ཨ་ས་མྨུ་སྶ་ན་ཏཱ ས་ཏི ས་ཏི་ནྡྲི་ཡཾ ས་ཏི་བ་ལཾ ས་མྨཱ་ས་ཏི – ཨི་དཾ ཝུ་ཙྩ་ཏི ‘‘ས་ཏི་ནྡྲི་ཡཾ’’.

ཏ་ཏྠ ཀ་ཏ་མཾ ས་མཱ་དྷི་ནྡྲི་ཡཾ? ཡཱ ཙི་ཏྟ་སྶ ཋི་ཏི ས་ཎྛི་ཏི ཨ་ཝ་ཊྛི་ཏི ཨ་ཝི་སཱ་ཧཱ་རོ ཨ་ཝི་ཀྑེ་པོ ཨ་ཝི་སཱ་ཧ་ཊ་མཱ་ན་ས་ཏཱ ས་མ་ཐོ ས་མཱ་དྷི་ནྡྲི་ཡཾ ས་མཱ་དྷི་བ་ལཾ ས་མྨཱ་ས་མཱ་དྷི – ཨི་དཾ ཝུ་ཙྩ་ཏི ‘‘ས་མཱ་དྷི་ནྡྲི་ཡཾ’’.

ཏ་ཏྠ ཀ་ཏ་མཾ པ་ཉྙི་ནྡྲི་ཡཾ? ཡཱ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཝུ་ཙྩ་ཏི ‘‘པ་ཉྙི་ནྡྲི་ཡཾ’’.

ཏ་ཏྠ ཀ་ཏ་མཾ ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ? ཡཱ ཏེ་སཾ དྷ་མྨཱ་ནཾ ཨ་ན་ཉྙཱ་ཏཱ་ནཾ ཨ་དི་ཊྛཱ་ནཾ ཨ་པྤ་ཏྟཱ་ནཾ ཨ་ཝི་དི་ཏཱ་ནཾ ཨ་ས་ཙྪི་ཀ་ཏཱ་ནཾ ས་ཙྪི་ཀི་རི་ཡཱ་ཡ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ མ་གྒ་ངྒཾ མ་གྒ་པ་རི་ཡཱ་པ་ནྣཾ – ཨི་དཾ ཝུ་ཙྩ་ཏི ‘‘ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ’’.

ཏ་ཏྠ ཀ་ཏ་མཾ ཨ་ཉྙི་ནྡྲི་ཡཾ? ཡཱ ཏེ་སཾ དྷ་མྨཱ་ནཾ ཉཱ་ཏཱ་ནཾ དི་ཊྛཱ་ནཾ པ་ཏྟཱ་ནཾ ཝི་དི་ཏཱ་ནཾ ས་ཙྪི་ཀ་ཏཱ་ནཾ ས་ཙྪི་ཀི་རི་ཡཱ་ཡ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ མ་གྒ་ངྒཾ མ་གྒ་པ་རི་ཡཱ་པ་ནྣཾ – ཨི་དཾ ཝུ་ཙྩ་ཏི ཨ་ཉྙི་ནྡྲི་ཡཾ.

ཏ་ཏྠ ཀ་ཏ་མཾ ཨ་ཉྙཱ་ཏཱ་ཝི་ནྡྲི་ཡཾ? ཡཱ ཏེ་སཾ དྷ་མྨཱ་ནཾ ཨ་ཉྙཱ་ཏཱ་ཝཱི་ནཾ དི་ཊྛཱ་ནཾ པ་ཏྟཱ་ནཾ ཝི་དི་ཏཱ་ནཾ ས་ཙྪི་ཀ་ཏཱ་ནཾ ས་ཙྪི་ཀི་རི་ཡཱ་ཡ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ མ་གྒ་ངྒཾ མ་གྒ་པ་རི་ཡཱ་པ་ནྣཾ – ཨི་དཾ ཝུ་ཙྩ་ཏི ‘‘ཨ་ཉྙཱ་ཏཱ་ཝི་ནྡྲི་ཡཾ’’.

ཨ་བྷི་དྷ་མྨ་བྷཱ་ཛ་ནཱི་ཡཾ.