༡. དུ་ཀྑ་ས་ཙྩཾ
༡༩༠. ཏ་ཏྠ ཀ་ཏ་མཾ དུ་ཀྑཾ ཨ་རི་ཡ་ས་ཙྩཾ? ཛཱ་ཏི་པི དུ་ཀྑཱ, ཛ་རཱ་པི དུ་ཀྑཱ, མ་ར་ཎ་མྤི དུ་ཀྑཾ, སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ་པི དུ་ཀྑཱ, ཨ་པྤི་ཡེ་ཧི ས་མྤ་ཡོ་གོ དུ་ཀྑོ, པི་ཡེ་ཧི ཝི་པྤ་ཡོ་གོ དུ་ཀྑོ, ཡཾ པི་ཙྪཾ ན ལ་བྷ་ཏི ཏ་མྤི དུ་ཀྑཾ, སཾ་ཁི་ཏྟེ་ན པ་ཉྩུ་པཱ་དཱ་ན་ཀྑ་ནྡྷཱ དུ་ཀྑཱ.
༡༩༡. ཏ་ཏྠ ཀ་ཏ་མཱ ཛཱ་ཏི? ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷི ཏ་མྷི ས་ཏྟ་ནི་ཀཱ་ཡེ ཛཱ་ཏི ས་ཉྫཱ་ཏི ཨོ་ཀྐ་ནྟི ཨ་བྷི་ནི་བྦ་ཏྟི ཁ་ནྡྷཱ་ནཾ པཱ་ཏུ་བྷཱ་ཝོ ཨཱ་ཡ་ཏ་ནཱ་ནཾ པ་ཊི་ལཱ་བྷོ – ཨ་ཡཾ ཝུ་ཙྩ་ཏི ‘‘ཛཱ་ཏི’’.
༡༩༢. ཏ་ཏྠ ཀ་ཏ་མཱ ཛ་རཱ? ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷི ཏ་མྷི ས་ཏྟ་ནི་ཀཱ་ཡེ ཛ་རཱ ཛཱི་ར་ཎ་ཏཱ ཁ་ཎྜི་ཙྩཾ པཱ་ལི་ཙྩཾ ཝ་ལི་ཏྟ་ཙ་ཏཱ ཨཱ་ཡུ་ནོ སཾ་ཧཱ་ནི ཨི་ནྡྲི་ཡཱ་ནཾ པ་རི་པཱ་ཀོ – ཨ་ཡཾ ཝུ་ཙྩ་ཏི ‘‘ཛ་རཱ’’.
༡༩༣. ཏ་ཏྠ ཀ་ཏ་མཾ མ་ར་ཎཾ? ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷཱ ཏ་མྷཱ ས་ཏྟ་ནི་ཀཱ་ཡཱ ཙུ་ཏི ཙ་ཝ་ན་ཏཱ བྷེ་དོ ཨ་ནྟ་ར་དྷཱ་ནཾ མ་ཙྩུ མ་ར་ཎཾ ཀཱ་ལ་ཀི་རི་ཡཱ ཁ་ནྡྷཱ་ནཾ བྷེ་དོ ཀ་ལེ༹་ཝ་ར་སྶ ནི་ཀྑེ་པོ ཛཱི་ཝི་ཏི་ནྡྲི་ཡ་སྶུ་པ་ཙྪེ་དོ – ཨི་དཾ ཝུ་ཙྩ་ཏི ‘‘མ་ར་ཎཾ’’.
༡༩༤. ཏ་ཏྠ ཀ་ཏ་མོ སོ་ཀོ? ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ སོ་ཀོ སོ་ཙ་ནཱ སོ་ཙི་ཏ་ཏྟཾ ཨ་ནྟོ་སོ་ཀོ ཨ་ནྟོ་པ་རི་སོ་ཀོ ཙེ་ཏ་སོ པ་རི་ཛ྄ཛྷཱ་ཡ་ནཱ དོ་མ་ན་སྶཾ སོ་ཀ་ས་ལླཾ – ཨ་ཡཾ ཝུ་ཙྩ་ཏི ‘‘སོ་ཀོ’’.
༡༩༥. ཏ་ཏྠ ཀ་ཏ་མོ པ་རི་དེ་ཝོ? ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ ཨཱ་དེ་ཝོ པ་རི་དེ་ཝོ ཨཱ་དེ་ཝ་ནཱ པ་རི་དེ་ཝ་ནཱ ཨཱ་དེ་ཝི་ཏ་ཏྟཾ པ་རི་དེ་ཝི་ཏ་ཏྟཾ ཝཱ་ཙཱ པ་ལཱ་པོ ཝི་པྤ་ལཱ་པོ ལཱ་ལ་པྤོ ལཱ་ལ་པྤ་ནཱ ལཱ་ལ་པྤི་ཏ་ཏྟཾ [ལཱ་ལ་པོ ལཱ་ལ་པ་ནཱ ལཱ་ལ་པི་ཏ་ཏྟཾ (སྱཱ.)] – ཨ་ཡཾ ཝུ་ཙྩ་ཏི ‘‘པ་རི་དེ་ཝོ’’.
༡༩༦. ཏ་ཏྠ ཀ་ཏ་མཾ དུ་ཀྑཾ? ཡཾ ཀཱ་ཡི་ཀཾ ཨ་སཱ་ཏཾ ཀཱ་ཡི་ཀཾ དུ་ཀྑཾ ཀཱ་ཡ་ས་མྥ་སྶ་ཛཾ ཨ་སཱ་ཏཾ དུ་ཀྑཾ ཝེ་ད་ཡི་ཏཾ ཀཱ་ཡ་ས་མྥ་སྶ་ཛཱ ཨ་སཱ་ཏཱ དུ་ཀྑཱ ཝེ་ད་ནཱ – ཨི་དཾ ཝུ་ཙྩ་ཏི ‘‘དུ་ཀྑཾ’’.
༡༩༧. ཏ་ཏྠ ཀ་ཏ་མཾ དོ་མ་ན་སྶཾ? ཡཾ ཙེ་ཏ་སི་ཀཾ ཨ་སཱ་ཏཾ ཙེ་ཏ་སི་ཀཾ དུ་ཀྑཾ ཙེ་ཏོ་ས་མྥ་སྶ་ཛཾ ཨ་སཱ་ཏཾ དུ་ཀྑཾ ཝེ་ད་ཡི་ཏཾ ཙེ་ཏོ་ས་མྥ་སྶ་ཛཱ ཨ་སཱ་ཏཱ དུ་ཀྑཱ ཝེ་ད་ནཱ – ཨི་དཾ ཝུ་ཙྩ་ཏི ‘‘དོ་མ་ན་སྶཾ’’.
༡༩༨. ཏ་ཏྠ ཀ་ཏ་མོ ཨུ་པཱ་ཡཱ་སོ? ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ ཨཱ་ཡཱ་སོ ཨུ་པཱ་ཡཱ་སོ ཨཱ་ཡཱ་སི་ཏ་ཏྟཾ ཨུ་པཱ་ཡཱ་སི་ཏ་ཏྟཾ – ཨ་ཡཾ ཝུ་ཙྩ་ཏི ‘‘ཨུ་པཱ་ཡཱ་སོ’’.
༡༩༩. ཏ་ཏྠ ཀ་ཏ་མོ ཨ་པྤི་ཡེ་ཧི ས་མྤ་ཡོ་གོ དུ་ཀྑོ? ཨི་དྷ ཡ་སྶ ཏེ ཧོ་ནྟི ཨ་ནི་ཊྛཱ ཨ་ཀ་ནྟཱ ཨ་མ་ནཱ་པཱ རཱུ་པཱ ས་དྡཱ ག་ནྡྷཱ ར་སཱ ཕོ་ཊྛ་བྦཱ, ཡེ ཝཱ པ་ན་སྶ ཏེ ཧོ་ནྟི ཨ་ན་ཏྠ་ཀཱ་མཱ ཨ་ཧི་ཏ་ཀཱ་མཱ ཨ་ཕཱ་སུ་ཀ་ཀཱ་མཱ ཨ་ཡོ་ག་ཀྑེ་མ་ཀཱ་མཱ; ཡཱ ཏེ་ཧི ས་ངྒ་ཏི ས་མཱ་ག་མོ ས་མོ་དྷཱ་ནཾ མི་སྶཱི་བྷཱ་ཝོ – ཨ་ཡཾ ཝུ་ཙྩ་ཏི ‘‘ཨ་པྤི་ཡེ་ཧི ས་མྤ་ཡོ་གོ དུ་ཀྑོ’’.
༢༠༠. ཏ་ཏྠ ཀ་ཏ་མོ པི་ཡེ་ཧི ཝི་པྤ་ཡོ་གོ དུ་ཀྑོ? ཨི་དྷ ཡ་སྶ ཏེ ཧོ་ནྟི ཨི་ཊྛཱ ཀ་ནྟཱ མ་ནཱ་པཱ རཱུ་པཱ ས་དྡཱ ག་ནྡྷཱ ར་སཱ ཕོ་ཊྛ་བྦཱ, ཡེ ཝཱ པ་ན་སྶ ཏེ ཧོ་ནྟི ཨ་ཏྠ་ཀཱ་མཱ ཧི་ཏ་ཀཱ་མཱ ཕཱ་སུ་ཀ་ཀཱ་མཱ ཡོ་ག་ཀྑེ་མ་ཀཱ་མཱ མཱ་ཏཱ ཝཱ པི་ཏཱ ཝཱ བྷཱ་ཏཱ ཝཱ བྷ་གི་ནཱི ཝཱ མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ; ཡཱ ཏེ་ཧི ཨ་ས་ངྒ་ཏི ཨ་ས་མཱ་ག་མོ ཨ་ས་མོ་དྷཱ་ནཾ ཨ་མི་སྶཱི་བྷཱ་ཝོ – ཨ་ཡཾ ཝུ་ཙྩ་ཏི ‘‘པི་ཡེ་ཧི ཝི་པྤ་ཡོ་གོ དུ་ཀྑོ’’.
༢༠༡. ཏ་ཏྠ ཀ་ཏ་མཾ ཡ་མྤི་ཙྪཾ ན ལ་བྷ་ཏི ཏ་མྤི དུ་ཀྑཾ? ཛཱ་ཏི་དྷ་མྨཱ་ནཾ ས་ཏྟཱ་ནཾ ཨེ་ཝཾ ཨི་ཙྪཱ ཨུ་པྤ་ཛྫ་ཏི – ‘‘ཨ་ཧོ ཝ་ཏ, མ་ཡཾ ན ཛཱ་ཏི་དྷ་མྨཱ ཨ་སྶཱ་མ; ན ཙ, ཝ་ཏ, ནོ ཛཱ་ཏི ཨཱ་ག་ཙྪེ་ཡྻཱ’’ཏི! ན ཁོ པ་ནེ་ཏཾ ཨི་ཙྪཱ་ཡ པ་ཏྟ་བྦཾ. ཨི་ད་མྤི ‘‘ཡ་མྤི་ཙྪཾ ན ལ་བྷ་ཏི ཏ་མྤི དུ་ཀྑཾ’’.
ཛ་རཱ་དྷ་མྨཱ་ནཾ ས་ཏྟཱ་ནཾ…པེ… བྱཱ་དྷི་དྷ་མྨཱ་ནཾ ས་ཏྟཱ་ནཾ…པེ… མ་ར་ཎ་དྷ་མྨཱ་ནཾ ས་ཏྟཱ་ནཾ…པེ… སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་ས་དྷ་མྨཱ་ནཾ ས་ཏྟཱ་ནཾ ཨེ་ཝཾ ཨི་ཙྪཱ ཨུ་པྤ་ཛྫ་ཏི – ‘‘ཨ་ཧོ ཝ་ཏ, མ་ཡཾ ན སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་ས་དྷ་མྨཱ ཨ་སྶཱ་མ; ན ཙ, ཝ་ཏ, ནོ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ཨཱ་ག་ཙྪེ་ཡྻུ’’ནྟི! ན ཁོ པ་ནེ་ཏཾ ཨི་ཙྪཱ་ཡ པ་ཏྟ་བྦཾ. ཨི་ད་མྤི ‘‘ཡ་མྤི་ཙྪཾ ན ལ་བྷ་ཏི ཏ་མྤི དུ་ཀྑཾ’’.
༢༠༢. ཏ་ཏྠ ཀ་ཏ་མེ སཾ་ཁི་ཏྟེ་ན པ་ཉྩུ་པཱ་དཱ་ན་ཀྑ་ནྡྷཱ དུ་ཀྑཱ? སེ་ཡྻ་ཐི་དཾ – རཱུ་པུ་པཱ་དཱ་ན་ཀྑ་ནྡྷོ, ཝེ་ད་ནུ་པཱ་དཱ་ན་ཀྑ་ནྡྷོ, ས་ཉྙུ་པཱ་དཱ་ན་ཀྑ་ནྡྷོ, ས་ངྑཱ་རུ་པཱ་དཱ་ན་ཀྑ་ནྡྷོ, ཝི་ཉྙཱ་ཎུ་པཱ་དཱ་ན་ཀྑ་ནྡྷོ. ཨི་མེ ཝུ་ཙྩ་ནྟི ‘‘སཾ་ཁི་ཏྟེ་ན པ་ཉྩུ་པཱ་དཱ་ན་ཀྑ་ནྡྷཱ དུ་ཀྑཱ’’.
ཨི་དཾ ཝུ་ཙྩ་ཏི ‘‘དུ་ཀྑཾ ཨ་རི་ཡ་ས་ཙྩཾ’’.