༢. ཨ་བྷི་དྷ་མྨ་བྷཱ་ཛ་ནཱི་ཡཾ
༡༥༥. དྭཱ་ད་སཱ་ཡ་ཏ་ནཱ་ནི – ཙ་ཀྑཱ་ཡ་ཏ་ནཾ, སོ་ཏཱ་ཡ་ཏ་ནཾ, གྷཱ་ནཱ་ཡ་ཏ་ནཾ, ཛི་ཝ྄ཧཱ་ཡ་ཏ་ནཾ, ཀཱ་ཡཱ་ཡ་ཏ་ནཾ, མ་ནཱ་ཡ་ཏ་ནཾ, རཱུ་པཱ་ཡ་ཏ་ནཾ, ས་དྡཱ་ཡ་ཏ་ནཾ, ག་ནྡྷཱ་ཡ་ཏ་ནཾ, ར་སཱ་ཡ་ཏ་ནཾ, ཕོ་ཊྛ་བྦཱ་ཡ་ཏ་ནཾ, དྷ་མྨཱ་ཡ་ཏ་ནཾ.
༡༥༦. ཏ་ཏྠ ཀ་ཏ་མཾ ཙ་ཀྑཱ་ཡ་ཏ་ནཾ? ཡཾ ཙ་ཀྑུ [ཙ་ཀྑུཾ (སཱི. སྱཱ. ཀ.) དྷ. ས. ༥༩༦-༥༩༩] ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ ཨ་ཏྟ་བྷཱ་ཝ་པ་རི་ཡཱ་པ་ནྣོ ཨ་ནི་ད་སྶ་ནོ ས་པྤ་ཊི་གྷོ, ཡེ་ན ཙ་ཀྑུ་ནཱ ཨ་ནི་ད་སྶ་ནེ་ན ས་པྤ་ཊི་གྷེ་ན རཱུ་པཾ ས་ནི་ད་སྶ་ནཾ ས་པྤ་ཊི་གྷཾ པ་སྶི ཝཱ པ་སྶ་ཏི ཝཱ པ་སྶི་སྶ་ཏི ཝཱ པ་སྶེ ཝཱ, ཙ་ཀྑུ་མྤེ་ཏཾ ཙ་ཀྑཱ་ཡ་ཏ་ན་མྤེ་ཏཾ ཙ་ཀྑུ་དྷཱ་ཏུ་པེ་སཱ ཙ་ཀྑུ་ནྡྲི་ཡ་མྤེ་ཏཾ ལོ་ཀོ་པེ་སོ དྭཱ་རཱ་པེ་སཱ ས་མུ་དྡོ་པེ་སོ པ་ཎྜ་ར་མྤེ་ཏཾ ཁེ་ཏྟ་མྤེ་ཏཾ ཝ་ཏྠུ་མྤེ་ཏཾ ནེ་ཏྟ་མྤེ་ཏཾ ན་ཡ་ན་མྤེ་ཏཾ ཨོ་རི་མཾ ཏཱི་ར་མྤེ་ཏཾ སུ་ཉྙོ གཱ་མོ་པེ་སོ. ཨི་དཾ ཝུ་ཙྩ་ཏི ‘‘ཙ་ཀྑཱ་ཡ་ཏ་ནཾ’’.
༡༥༧. ཏ་ཏྠ ཀ་ཏ་མཾ སོ་ཏཱ་ཡ་ཏ་ནཾ? ཡཾ སོ་ཏཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ ཨ་ཏྟ་བྷཱ་ཝ་པ་རི་ཡཱ་པ་ནྣོ ཨ་ནི་ད་སྶ་ནོ ས་པྤ་ཊི་གྷོ, ཡེ་ན སོ་ཏེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན ས་དྡཾ ཨ་ནི་ད་སྶ་ནཾ ས་པྤ་ཊི་གྷཾ སུ་ཎི ཝཱ སུ་ཎཱ་ཏི ཝཱ སུ་ཎི་སྶ་ཏི ཝཱ སུ་ཎེ ཝཱ, སོ་ཏ་མྤེ་ཏཾ སོ་ཏཱ་ཡ་ཏ་ན་མྤེ་ཏཾ སོ་ཏ་དྷཱ་ཏུ་པེ་སཱ སོ་ཏི་ནྡྲི་ཡ་མྤེ་ཏཾ ལོ་ཀོ་པེ་སོ དྭཱ་རཱ་པེ་སཱ ས་མུ་དྡོ་པེ་སོ པ་ཎྜ་ར་མྤེ་ཏཾ ཁེ་ཏྟ་མྤེ་ཏཾ ཝ་ཏྠུ་མྤེ་ཏཾ ཨོ་རི་མཾ ཏཱི་ར་མྤེ་ཏཾ སུ་ཉྙོ གཱ་མོ་པེ་སོ. ཨི་དཾ ཝུ་ཙྩ་ཏི ‘‘སོ་ཏཱ་ཡ་ཏ་ནཾ’’.
༡༥༨. ཏ་ཏྠ ཀ་ཏ་མཾ གྷཱ་ནཱ་ཡ་ཏ་ནཾ? ཡཾ གྷཱ་ནཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ ཨ་ཏྟ་བྷཱ་ཝ་པ་རི་ཡཱ་པ་ནྣོ ཨ་ནི་ད་སྶ་ནོ ས་པྤ་ཊི་གྷོ, ཡེ་ན གྷཱ་ནེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན ག་ནྡྷཾ ཨ་ནི་ད་སྶ་ནཾ ས་པྤ་ཊི་གྷཾ གྷཱ་ཡི ཝཱ གྷཱ་ཡ་ཏི ཝཱ གྷཱ་ཡི་སྶ་ཏི ཝཱ གྷཱ་ཡེ ཝཱ, གྷཱ་ན་མྤེ་ཏཾ གྷཱ་ནཱ་ཡ་ཏ་ན་མྤེ་ཏཾ གྷཱ་ན་དྷཱ་ཏུ་པེ་སཱ གྷཱ་ནི་ནྡྲི་ཡ་མྤེ་ཏཾ ལོ་ཀོ་པེ་སོ དྭཱ་རཱ་པེ་སཱ ས་མུ་དྡོ་པེ་སོ པ་ཎྜ་ར་མྤེ་ཏཾ ཁེ་ཏྟ་མྤེ་ཏཾ ཝ་ཏྠུ་མྤེ་ཏཾ ཨོ་རི་མཾ ཏཱི་ར་མྤེ་ཏཾ སུ་ཉྙོ གཱ་མོ་པེ་སོ. ཨི་དཾ ཝུ་ཙྩ་ཏི ‘‘གྷཱ་ནཱ་ཡ་ཏ་ནཾ’’.
༡༥༩. ཏ་ཏྠ ཀ་ཏ་མཾ ཛི་ཝ྄ཧཱ་ཡ་ཏ་ནཾ? ཡཱ ཛི་ཝ྄ཧཱ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ ཨ་ཏྟ་བྷཱ་ཝ་པ་རི་ཡཱ་པ་ནྣོ ཨ་ནི་ད་སྶ་ནོ ས་པྤ་ཊི་གྷོ, ཡཱ་ཡ ཛི་ཝ྄ཧཱ་ཡ ཨ་ནི་ད་སྶ་ནཱ་ཡ ས་པྤ་ཊི་གྷཱ་ཡ ར་སཾ ཨ་ནི་ད་སྶ་ནཾ ས་པྤ་ཊི་གྷཾ སཱ་ཡི ཝཱ སཱ་ཡ་ཏི ཝཱ སཱ་ཡི་སྶ་ཏི ཝཱ སཱ་ཡེ ཝཱ, ཛི་ཝ྄ཧཱ་པེ་སཱ ཛི་ཝ྄ཧཱ་ཡ་ཏ་ན་མྤེ་ཏཾ ཛི་ཝ྄ཧཱ་དྷཱ་ཏུ་པེ་སཱ ཛཱི་ཝ྄ཧི་ནྡྲི་ཡ་མྤེ་ཏཾ ལོ་ཀོ་པེ་སོ དྭཱ་རཱ་པེ་སཱ ས་མུ་དྡོ་པེ་སོ པ་ཎྜ་ར་མྤེ་ཏཾ ཁེ་ཏྟ་མྤེ་ཏཾ ཝ་ཏྠུ་མྤེ་ཏཾ ཨོ་རི་མཾ ཏཱི་ར་མྤེ་ཏཾ སུ་ཉྙོ གཱ་མོ་པེ་སོ. ཨི་དཾ ཝུ་ཙྩ་ཏི ‘‘ཛི་ཝ྄ཧཱ་ཡ་ཏ་ནཾ’’.
༡༦༠. ཏ་ཏྠ ཀ་ཏ་མཾ ཀཱ་ཡཱ་ཡ་ཏ་ནཾ? ཡོ ཀཱ་ཡོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ ཨ་ཏྟ་བྷཱ་ཝ་པ་རི་ཡཱ་པ་ནྣོ ཨ་ནི་ད་སྶ་ནོ ས་པྤ་ཊི་གྷོ, ཡེ་ན ཀཱ་ཡེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན ཕོ་ཊྛ་བྦཾ ཨ་ནི་ད་སྶ་ནཾ ས་པྤ་ཊི་གྷཾ ཕུ་སི ཝཱ ཕུ་ས་ཏི ཝཱ ཕུ་སི་སྶ་ཏི ཝཱ ཕུ་སེ ཝཱ, ཀཱ་ཡོ་པེ་སོ ཀཱ་ཡཱ་ཡ་ཏ་ན་མྤེ་ཏཾ ཀཱ་ཡ་དྷཱ་ཏུ་པེ་སཱ ཀཱ་ཡི་ནྡྲི་ཡ་མྤེ་ཏཾ ལོ་ཀོ་པེ་སོ དྭཱ་རཱ་པེ་སཱ ས་མུ་དྡོ་པེ་སོ པ་ཎྜ་ར་མྤེ་ཏཾ ཁེ་ཏྟ་མྤེ་ཏཾ ཝ་ཏྠུ་མྤེ་ཏཾ ཨོ་རི་མཾ ཏཱི་ར་མྤེ་ཏཾ སུ་ཉྙོ གཱ་མོ་པེ་སོ. ཨི་དཾ ཝུ་ཙྩ་ཏི ‘‘ཀཱ་ཡཱ་ཡ་ཏ་ནཾ’’.
༡༦༡. ཏ་ཏྠ ཀ་ཏ་མཾ མ་ནཱ་ཡ་ཏ་ནཾ? ཨེ་ཀ་ཝི་དྷེ་ན མ་ནཱ་ཡ་ཏ་ནཾ – ཕ་སྶ་ས་མྤ་ཡུ་ཏྟཾ.
དུ་ཝི་དྷེ་ན མ་ནཱ་ཡ་ཏ་ནཾ – ཨ་ཏྠི ས་ཧེ་ཏུ་ཀཾ, ཨ་ཏྠི ཨ་ཧེ་ཏུ་ཀཾ.
ཏི་ཝི་དྷེ་ན མ་ནཱ་ཡ་ཏ་ནཾ – ཨ་ཏྠི ཀུ་ས་ལཾ, ཨ་ཏྠི ཨ་ཀུ་ས་ལཾ, ཨ་ཏྠི ཨ་བྱཱ་ཀ་ཏཾ.
ཙ་ཏུ་བྦི་དྷེ་ན མ་ནཱ་ཡ་ཏ་ནཾ – ཨ་ཏྠི ཀཱ་མཱ་ཝ་ཙ་རཾ, ཨ་ཏྠི རཱུ་པཱ་ཝ་ཙ་རཾ, ཨ་ཏྠི ཨ་རཱུ་པཱ་ཝ་ཙ་རཾ, ཨ་ཏྠི ཨ་པ་རི་ཡཱ་པ་ནྣཾ.
པ་ཉྩ་ཝི་དྷེ་ན མ་ནཱ་ཡ་ཏ་ནཾ – ཨ་ཏྠི སུ་ཁི་ནྡྲི་ཡ་ས་མྤ་ཡུ་ཏྟཾ, ཨ་ཏྠི དུ་ཀྑི་ནྡྲི་ཡ་ས་མྤ་ཡུ་ཏྟཾ, ཨ་ཏྠི སོ་མ་ན་སྶི་ནྡྲི་ཡ་ས་མྤ་ཡུ་ཏྟཾ, ཨ་ཏྠི དོ་མ་ན་སྶི་ནྡྲི་ཡ་ས་མྤ་ཡུ་ཏྟཾ, ཨ་ཏྠི ཨུ་པེ་ཀྑི་ནྡྲི་ཡ་ས་མྤ་ཡུ་ཏྟཾ.
ཚ་བྦི་དྷེ་ན མ་ནཱ་ཡ་ཏ་ནཾ – ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎཾ, གྷཱ་ན་ཝི་ཉྙཱ་ཎཾ, ཛི་ཝ྄ཧཱ་ཝི་ཉྙཱ་ཎཾ, ཀཱ་ཡ་ཝི་ཉྙཱ་ཎཾ, མ་ནོ་ཝི་ཉྙཱ་ཎཾ. ཨེ་ཝཾ ཚ་བྦི་དྷེ་ན མ་ནཱ་ཡ་ཏ་ནཾ.
ས་ཏྟ་ཝི་དྷེ་ན མ་ནཱ་ཡ་ཏ་ནཾ – ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎཾ, གྷཱ་ན་ཝི་ཉྙཱ་ཎཾ, ཛི་ཝ྄ཧཱ་ཝི་ཉྙཱ་ཎཾ, ཀཱ་ཡ་ཝི་ཉྙཱ་ཎཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ. ཨེ་ཝཾ ས་ཏྟ་ཝི་དྷེ་ན མ་ནཱ་ཡ་ཏ་ནཾ.
ཨ་ཊྛ་ཝི་དྷེ་ན མ་ནཱ་ཡ་ཏ་ནཾ – ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎཾ, གྷཱ་ན་ཝི་ཉྙཱ་ཎཾ, ཛི་ཝ྄ཧཱ་ཝི་ཉྙཱ་ཎཾ, ཀཱ་ཡ་ཝི་ཉྙཱ་ཎཾ ཨ་ཏྠི སུ་ཁ་ས་ཧ་ག་ཏཾ, ཨ་ཏྠི དུ་ཀྑ་ས་ཧ་ག་ཏཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ. ཨེ་ཝཾ ཨ་ཊྛ་ཝི་དྷེ་ན མ་ནཱ་ཡ་ཏ་ནཾ.
ན་ཝ་ཝི་དྷེ་ན མ་ནཱ་ཡ་ཏ་ནཾ – ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎཾ, གྷཱ་ན་ཝི་ཉྙཱ་ཎཾ, ཛི་ཝ྄ཧཱ་ཝི་ཉྙཱ་ཎཾ, ཀཱ་ཡ་ཝི་ཉྙཱ་ཎཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ ཨ་ཏྠི ཀུ་ས་ལཾ, ཨ་ཏྠི ཨ་ཀུ་ས་ལཾ, ཨ་ཏྠི ཨ་བྱཱ་ཀ་ཏཾ. ཨེ་ཝཾ ན་ཝ་ཝི་དྷེ་ན མ་ནཱ་ཡ་ཏ་ནཾ.
ད་ས་ཝི་དྷེ་ན མ་ནཱ་ཡ་ཏ་ནཾ – ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎཾ, གྷཱ་ན་ཝི་ཉྙཱ་ཎཾ, ཛི་ཝ྄ཧཱ་ཝི་ཉྙཱ་ཎཾ, ཀཱ་ཡ་ཝི་ཉྙཱ་ཎཾ ཨ་ཏྠི སུ་ཁ་ས་ཧ་ག་ཏཾ, ཨ་ཏྠི དུ་ཀྑ་ས་ཧ་ག་ཏཾ, མ་ནོ་དྷཱ་ཏུ, མ་ནོ་ཝི་ཉྙཱ་ཎ་དྷཱ་ཏུ ཨ་ཏྠི ཀུ་ས་ལཾ, ཨ་ཏྠི ཨ་ཀུ་ས་ལཾ, ཨ་ཏྠི ཨ་བྱཱ་ཀ་ཏཾ. ཨེ་ཝཾ ད་ས་ཝི་དྷེ་ན མ་ནཱ་ཡ་ཏ་ནཾ.
ཨེ་ཀ་ཝི་དྷེ་ན མ་ནཱ་ཡ་ཏ་ནཾ – ཕ་སྶ་ས་མྤ་ཡུ་ཏྟཾ.
དུ་ཝི་དྷེ་ན མ་ནཱ་ཡ་ཏ་ནཾ – ཨ་ཏྠི ས་ཧེ་ཏུ་ཀཾ, ཨ་ཏྠི ཨ་ཧེ་ཏུ་ཀཾ.
ཏི་ཝི་དྷེ་ན མ་ནཱ་ཡ་ཏ་ནཾ – ཨ་ཏྠི སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ, ཨ་ཏྠི དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཾ, ཨ་ཏྠི ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ…པེ…. ཨེ་ཝཾ བ་ཧུ་ཝི་དྷེ་ན མ་ནཱ་ཡ་ཏ་ནཾ. ཨི་དཾ ཝུ་ཙྩ་ཏི ‘‘མ་ནཱ་ཡ་ཏ་ནཾ’’.
༡༦༢. ཏ་ཏྠ ཀ་ཏ་མཾ རཱུ་པཱ་ཡ་ཏ་ནཾ? ཡཾ རཱུ་པཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཝ་ཎྞ་ནི་བྷཱ ས་ནི་ད་སྶ་ནཾ ས་པྤ་ཊི་གྷཾ ནཱི་ལཾ པཱི་ཏ་ཀཾ ལོ་ཧི་ཏ་ཀཾ [པཱི་ཏཾ ལོ་ཧི་ཏཾ (སཱི.)] ཨོ་དཱ་ཏཾ ཀཱ་ལ༹་ཀཾ མ་ཉྫི་ཊྛ་ཀཾ [མ་ཉྫེ་ཊྛ་ཀཾ (སཱི. སྱཱ.)] ཧ་རི ཧ་རི་ཝ་ཎྞཾ ཨ་མྦ་ངྐུ་ར་ཝ་ཎྞཾ དཱི་གྷཾ ར་སྶཾ ཨ་ཎུཾ ཐཱུ་ལཾ ཝ་ཊྚཾ པ་རི་མ་ཎྜ་ལཾ ཙ་ཏུ་ར་སྶཾ ཚ་ལ༹ཾ་སཾ ཨ་ཊྛཾ་སཾ སོ་ལ༹་སཾ་སཾ ནི་ནྣཾ ཐ་ལཾ ཚཱ་ཡཱ ཨཱ་ཏ་པོ ཨཱ་ལོ་ཀོ ཨ་ནྡྷ་ཀཱ་རོ ཨ་བྦྷཱ མ་ཧི་ཀཱ དྷཱུ་མོ ར་ཛོ ཙ་ནྡ་མ་ཎྜ་ལ་སྶ ཝ་ཎྞ་ནི་བྷཱ སཱུ་རི་ཡ་མ་ཎྜ་ལ་སྶ [སུ་རི་ཡ་མ་ཎྜ་ལ་སྶ (སཱི. སྱཱ. ཀཾ.)] ཝ་ཎྞ་ནི་བྷཱ ཏཱ་ར་ཀ་རཱུ་པཱ་ནཾ ཝ་ཎྞ་ནི་བྷཱ ཨཱ་དཱ་ས་མ་ཎྜ་ལ་སྶ ཝ་ཎྞ་ནི་བྷཱ མ་ཎི་ས་ངྑ་མུ་ཏྟ་ཝེ་ལུ༹་རི་ཡ་སྶ ཝ་ཎྞ་ནི་བྷཱ ཛཱ་ཏ་རཱུ་པ་ར་ཛ་ཏ་སྶ ཝ་ཎྞ་ནི་བྷཱ, ཡཾ ཝཱ པ་ན་ཉྙ་མྤི ཨ་ཏྠི རཱུ་པཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཝ་ཎྞ་ནི་བྷཱ ས་ནི་ད་སྶ་ནཾ ས་པྤ་ཊི་གྷཾ, ཡཾ རཱུ་པཾ ས་ནི་ད་སྶ་ནཾ ས་པྤ་ཊི་གྷཾ ཙ་ཀྑུ་ནཱ ཨ་ནི་ད་སྶ་ནེ་ན ས་པྤ་ཊི་གྷེ་ན པ་སྶི ཝཱ པ་སྶ་ཏི ཝཱ པ་སྶི་སྶ་ཏི ཝཱ པ་སྶེ ཝཱ, རཱུ་པ་མྤེ་ཏཾ རཱུ་པཱ་ཡ་ཏ་ན་མྤེ་ཏཾ རཱུ་པ་དྷཱ་ཏུ་པེ་སཱ. ཨི་དཾ ཝུ་ཙྩ་ཏི ‘‘རཱུ་པཱ་ཡ་ཏ་ནཾ’’.
༡༦༣. ཏ་ཏྠ ཀ་ཏ་མཾ ས་དྡཱ་ཡ་ཏ་ནཾ? ཡོ ས་དྡོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ བྷེ་རི་ས་དྡོ མུ་དི་ངྒ་ས་དྡོ [མུ་ཏི་ངྒ་ས་དྡྷོ (སཱི.)] ས་ངྑ་ས་དྡོ པ་ཎ་ཝ་ས་དྡོ གཱི་ཏ་ས་དྡོ ཝཱ་དི་ཏ་ས་དྡོ ས་མྨ་ས་དྡོ པཱ་ཎི་ས་དྡོ ས་ཏྟཱ་ནཾ ནི་གྒྷོ་ས་ས་དྡོ དྷཱ་ཏཱུ་ནཾ ས་ནྣི་གྷཱ་ཏ་ས་དྡོ ཝཱ་ཏ་ས་དྡོ ཨུ་ད་ཀ་ས་དྡོ མ་ནུ་སྶ་ས་དྡོ ཨ་མ་ནུ་སྶ་ས་དྡོ, ཡོ ཝཱ པ་ན་ཉྙོ་པི ཨ་ཏྠི ས་དྡོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ, ཡཾ ས་དྡཾ ཨ་ནི་ད་སྶ་ནཾ ས་པྤ་ཊི་གྷཾ སོ་ཏེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན སུ་ཎི ཝཱ སུ་ཎཱ་ཏི ཝཱ སུ་ཎི་སྶ་ཏི ཝཱ སུ་ཎེ ཝཱ, ས་དྡོ་པེ་སོ ས་དྡཱ་ཡ་ཏ་ན་མྤེ་ཏཾ ས་དྡ་དྷཱ་ཏུ་པེ་སཱ. ཨི་དཾ ཝུ་ཙྩ་ཏི ‘‘ས་དྡཱ་ཡ་ཏ་ནཾ’’.
༡༦༤. ཏ་ཏྠ ཀ་ཏ་མཾ ག་ནྡྷཱ་ཡ་ཏ་ནཾ? ཡོ ག་ནྡྷོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ མཱུ་ལ་ག་ནྡྷོ སཱ་ར་ག་ནྡྷོ ཏ་ཙ་ག་ནྡྷོ པ་ཏྟ་ག་ནྡྷོ པུ་པྥ་ག་ནྡྷོ ཕ་ལ་ག་ནྡྷོ ཨཱ་མ་ག་ནྡྷོ ཝི་སྶ་ག་ནྡྷོ སུ་ག་ནྡྷོ དུ་གྒ་ནྡྷོ, ཡོ ཝཱ པ་ན་ཉྙོ་པི ཨ་ཏྠི ག་ནྡྷོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ, ཡཾ ག་ནྡྷཾ ཨ་ནི་ད་སྶ་ནཾ ས་པྤ་ཊི་གྷཾ གྷཱ་ནེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན གྷཱ་ཡི ཝཱ གྷཱ་ཡ་ཏི ཝཱ གྷཱ་ཡི་སྶ་ཏི ཝཱ གྷཱ་ཡེ ཝཱ, ག་ནྡྷོ་པེ་སོ ག་ནྡྷཱ་ཡ་ཏ་ན་མྤེ་ཏཾ ག་ནྡྷ་དྷཱ་ཏུ་པེ་སཱ. ཨི་དཾ ཝུ་ཙྩ་ཏི ‘‘ག་ནྡྷཱ་ཡ་ཏ་ནཾ’’.
༡༦༥. ཏ་ཏྠ ཀ་ཏ་མཾ ར་སཱ་ཡ་ཏ་ནཾ? ཡོ ར་སོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ མཱུ་ལ་ར་སོ ཁ་ནྡྷ་ར་སོ ཏ་ཙ་ར་སོ པ་ཏྟ་ར་སོ པུ་པྥ་ར་སོ ཕ་ལ་ར་སོ ཨ་མྦི་ལཾ མ་དྷུ་རཾ ཏི་ཏྟ་ཀཾ ཀ་ཊུ་ཀཾ ལོ་ཎི་ཀཾ [ལ་པི་ལ་ཀཾ (སཱི.), ལ་མྤི་ཀཾ (ཀ. སཱི.)] ཁཱ་རི་ཀཾ ལ་མྦི་ཀཾ ཀ་སཱ་ཝོ སཱ་དུ ཨ་སཱ་དུ, ཡོ ཝཱ པ་ན་ཉྙོ་པི ཨ་ཏྠི ར་སོ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ ཨ་ནི་ད་སྶ་ནོ ས་པྤ་ཊི་གྷོ, ཡཾ ར་སཾ ཨ་ནི་ད་སྶ་ནཾ ས་པྤ་ཊི་གྷཾ ཛི་ཝ྄ཧཱ་ཡ ཨ་ནི་ད་སྶ་ནཱ་ཡ ས་པྤ་ཊི་གྷཱ་ཡ སཱ་ཡི ཝཱ སཱ་ཡ་ཏི ཝཱ སཱ་ཡི་སྶ་ཏི ཝཱ སཱ་ཡེ ཝཱ, ར་སོ་པེ་སོ ར་སཱ་ཡ་ཏ་ན་མྤེ་ཏཾ ར་ས་དྷཱ་ཏུ་པེ་སཱ. ཨི་དཾ ཝུ་ཙྩ་ཏི ‘‘ར་སཱ་ཡ་ཏ་ནཾ’’.
༡༦༦. ཏ་ཏྠ ཀ་ཏ་མཾ ཕོ་ཊྛ་བྦཱ་ཡ་ཏ་ནཾ? པ་ཐ་ཝཱི་དྷཱ་ཏུ ཏེ་ཛོ་དྷཱ་ཏུ ཝཱ་ཡོ་དྷཱ་ཏུ ཀ་ཀྑ་ལ༹ཾ མུ་དུ་ཀཾ ས་ཎྷཾ ཕ་རུ་སཾ སུ་ཁ་ས་མྥ་སྶཾ དུ་ཀྑ་ས་མྥ་སྶཾ ག་རུ་ཀཾ ལ་ཧུ་ཀཾ, ཡཾ ཕོ་ཊྛ་བྦཾ ཨ་ནི་ད་སྶ་ནཾ ས་པྤ་ཊི་གྷཾ ཀཱ་ཡེ་ན ཨ་ནི་ད་སྶ་ནེ་ན ས་པྤ་ཊི་གྷེ་ན ཕུ་སི ཝཱ ཕུ་ས་ཏི ཝཱ ཕུ་སི་སྶ་ཏི ཝཱ ཕུ་སེ ཝཱ, ཕོ་ཊྛ་བྦོ་པེ་སོ ཕོ་ཊྛ་བྦཱ་ཡ་ཏ་ན་མྤེ་ཏཾ ཕོ་ཊྛ་བྦ་དྷཱ་ཏུ་པེ་སཱ. ཨི་དཾ ཝུ་ཙྩ་ཏི ‘‘ཕོ་ཊྛ་བྦཱ་ཡ་ཏ་ནཾ’’.
༡༦༧. ཏ་ཏྠ ཀ་ཏ་མཾ དྷ་མྨཱ་ཡ་ཏ་ནཾ? ཝེ་ད་ནཱ་ཀྑ་ནྡྷོ, ས་ཉྙཱ་ཀྑ་ནྡྷོ, ས་ངྑཱ་ར་ཀྑ་ནྡྷོ, ཡ་ཉྩ རཱུ་པཾ ཨ་ནི་ད་སྶ་ན་ཨ་པྤ་ཊི་གྷཾ དྷ་མྨཱ་ཡ་ཏ་ན་པ་རི་ཡཱ་པ་ནྣཾ, ཨ་ས་ངྑ་ཏཱ ཙ དྷཱ་ཏུ.
ཏ་ཏྠ ཀ་ཏ་མོ ཝེ་ད་ནཱ་ཀྑ་ནྡྷོ? ཨེ་ཀ་ཝི་དྷེ་ན ཝེ་ད་ནཱ་ཀྑ་ནྡྷོ – ཕ་སྶ་ས་མྤ་ཡུ་ཏྟོ. དུ་ཝི་དྷེ་ན ཝེ་ད་ནཱ་ཀྑ་ནྡྷོ – ཨ་ཏྠི ས་ཧེ་ཏུ་ཀོ, ཨ་ཏྠི ཨ་ཧེ་ཏུ་ཀོ. ཏི་ཝི་དྷེ་ན ཝེ་ད་ནཱ་ཀྑ་ནྡྷོ – ཨ་ཏྠི ཀུ་ས་ལོ, ཨ་ཏྠི ཨ་ཀུ་ས་ལོ, ཨ་ཏྠི ཨ་བྱཱ་ཀ་ཏོ…པེ… ཨེ་ཝཾ ད་ས་ཝི་དྷེ་ན ཝེ་ད་ནཱ་ཀྑ་ནྡྷོ…པེ… ཨེ་ཝཾ བ་ཧུ་ཝི་དྷེ་ན ཝེ་ད་ནཱ་ཀྑ་ནྡྷོ. ཨ་ཡཾ ཝུ་ཙྩ་ཏི ‘‘ཝེ་ད་ནཱ་ཀྑ་ནྡྷོ’’.
ཏ་ཏྠ ཀ་ཏ་མོ ས་ཉྙཱ་ཀྑ་ནྡྷོ? ཨེ་ཀ་ཝི་དྷེ་ན ས་ཉྙཱ་ཀྑ་ནྡྷོ – ཕ་སྶ་ས་མྤ་ཡུ་ཏྟོ. དུ་ཝི་དྷེ་ན ས་ཉྙཱ་ཀྑ་ནྡྷོ – ཨ་ཏྠི ས་ཧེ་ཏུ་ཀོ, ཨ་ཏྠི ཨ་ཧེ་ཏུ་ཀོ. ཏི་ཝི་དྷེ་ན ས་ཉྙཱ་ཀྑ་ནྡྷོ – ཨ་ཏྠི ཀུ་ས་ལོ, ཨ་ཏྠི ཨ་ཀུ་ས་ལོ, ཨ་ཏྠི ཨ་བྱཱ་ཀ་ཏོ…པེ… ཨེ་ཝཾ ད་ས་ཝི་དྷེ་ན ས་ཉྙཱ་ཀྑ་ནྡྷོ…པེ… ཨེ་ཝཾ བ་ཧུ་ཝི་དྷེ་ན ས་ཉྙཱ་ཀྑ་ནྡྷོ. ཨ་ཡཾ ཝུ་ཙྩ་ཏི ‘‘ས་ཉྙཱ་ཀྑ་ནྡྷོ’’.
ཏ་ཏྠ ཀ་ཏ་མོ ས་ངྑཱ་ར་ཀྑ་ནྡྷོ? ཨེ་ཀ་ཝི་དྷེ་ན ས་ངྑཱ་ར་ཀྑ་ནྡྷོ – ཙི་ཏྟ་ས་མྤ་ཡུ་ཏྟོ. དུ་ཝི་དྷེ་ན ས་ངྑཱ་ར་ཀྑ་ནྡྷོ – ཨ་ཏྠི ཧེ་ཏུ, ཨ་ཏྠི ན ཧེ་ཏུ. ཏི་ཝི་དྷེ་ན ས་ངྑཱ་ར་ཀྑ་ནྡྷོ – ཨ་ཏྠི ཀུ་ས་ལོ, ཨ་ཏྠི ཨ་ཀུ་ས་ལོ, ཨ་ཏྠི ཨ་བྱཱ་ཀ་ཏོ…པེ… ཨེ་ཝཾ ད་ས་ཝི་དྷེ་ན ས་ངྑཱ་ར་ཀྑ་ནྡྷོ…པེ… ཨེ་ཝཾ བ་ཧུ་ཝི་དྷེ་ན ས་ངྑཱ་ར་ཀྑ་ནྡྷོ. ཨ་ཡཾ ཝུ་ཙྩ་ཏི ‘‘ས་ངྑཱ་ར་ཀྑ་ནྡྷོ’’.
ཏ་ཏྠ ཀ་ཏ་མཾ རཱུ་པཾ ཨ་ནི་ད་སྶ་ན་ཨ་པྤ་ཊི་གྷཾ དྷ་མྨཱ་ཡ་ཏ་ན་པ་རི་ཡཱ་པ་ནྣཾ? ཨི་ཏྠི་ནྡྲི་ཡཾ པུ་རི་སི་ནྡྲི་ཡཾ…པེ… ཀ་བ་ལཱི༹་ཀཱ་རོ ཨཱ་ཧཱ་རོ. ཨི་དཾ ཝུ་ཙྩ་ཏི རཱུ་པཾ ‘‘ཨ་ནི་ད་སྶ་ན་ཨ་པྤ་ཊི་གྷཾ དྷ་མྨཱ་ཡ་ཏ་ན་པ་རི་ཡཱ་པ་ནྣཾ’’.
ཏ་ཏྠ ཀ་ཏ་མཱ ཨ་ས་ངྑ་ཏཱ དྷཱ་ཏུ? རཱ་ག་ཀྑ་ཡོ, དོ་ས་ཀྑ་ཡོ, མོ་ཧ་ཀྑ་ཡོ – ཨ་ཡཾ ཝུ་ཙྩ་ཏི ‘‘ཨ་ས་ངྑ་ཏཱ དྷཱ་ཏུ’’.
ཨི་དཾ ཝུ་ཙྩ་ཏི དྷ་མྨཱ་ཡ་ཏ་ནཾ.
ཨ་བྷི་དྷ་མྨ་བྷཱ་ཛ་ནཱི་ཡཾ.