༣. མུ་དི་ཏཱ

༦༦༣. ཀ་ཐ་ཉྩ བྷི་ཀྑུ མུ་དི་ཏཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཏི? སེ་ཡྻ་ཐཱ་པི ནཱ་མ ཨེ་ཀཾ པུ་གྒ་ལཾ པི་ཡཾ མ་ནཱ་པཾ དི་སྭཱ མུ་དི་ཏོ ཨ་སྶ, ཨེ་ཝ་མེ་ཝ ས་བྦེ ས་ཏྟེ མུ་དི་ཏཱ་ཡ ཕ་ར་ཏི.

ཏ་ཏྠ ཀ་ཏ་མཱ མུ་དི་ཏཱ? ཡཱ ས་ཏྟེ་སུ མུ་དི་ཏཱ མུ་དི་ཏཱ་ཡ་ནཱ མུ་དི་ཏཱ་ཡི་ཏ་ཏྟཾ མུ་དི་ཏཱ་ཙེ་ཏོ་ཝི་མུ་ཏྟི – ཨ་ཡཾ ཝུ་ཙྩ་ཏི ‘‘མུ་དི་ཏཱ’’.

ཏ་ཏྠ ཀ་ཏ་མཾ ཙི་ཏྟཾ? ཡཾ ཙི་ཏྟཾ མ་ནོ མཱ་ན་སཾ…པེ… ཏ་ཛྫཱ་མ་ནོ་ཝི་ཉྙཱ་ཎ་དྷཱ་ཏུ – ཨི་དཾ ཝུ་ཙྩ་ཏི ‘‘ཙི་ཏྟཾ’’. ཨི་དཾ ཙི་ཏྟཾ ཨི་མཱ་ཡ མུ་དི་ཏཱ་ཡ ས་ཧ་ག་ཏཾ ཧོ་ཏི ས་ཧ་ཛཱ་ཏཾ སཾ་ས་ཊྛཾ ས་མྤ་ཡུ་ཏྟཾ. ཏེ་ན ཝུ་ཙྩ་ཏི ‘‘མུ་དི་ཏཱ་ས་ཧ་ག་ཏེ་ན ཙེ་ཏ་སཱ’’ཏི.

༦༦༤. ‘‘ཨེ་ཀཾ དི་ས’’ནྟི པུ་ར་ཏྠི་མཾ ཝཱ དི་སཾ པ་ཙྪི་མཾ ཝཱ དི་སཾ ཨུ་ཏྟ་རཾ ཝཱ དི་སཾ ད་ཀྑི་ཎཾ ཝཱ དི་སཾ ཨུ་དྡྷཾ ཝཱ ཨ་དྷོ ཝཱ ཏི་རི་ཡཾ ཝཱ ཝི་དི་སཾ ཝཱ.

༦༦༥. ‘‘ཕ་རི་ཏྭཱ’’ཏི ཕ་རི་ཏྭཱ ཨ་དྷི་མུ་ཙྩི་ཏྭཱ.

༦༦༦. ‘‘ཝི་ཧ་ར་ཏཱི’’ཏི…པེ… ཏེ་ན ཝུ་ཙྩ་ཏི ‘‘ཝི་ཧ་ར་ཏཱི’’ཏི.

༦༦༧. ‘‘ཏ་ཐཱ དུ་ཏི་ཡ’’ནྟི ཡ་ཐེ་ཝ ཨེ་ཀཾ དི་སཾ ཏ་ཐཱ དུ་ཏི་ཡཾ དི་སཾ ཏ་ཐཱ ཏ་ཏི་ཡཾ དི་སཾ ཏ་ཐཱ ཙ་ཏུ་ཏྠཾ དི་སཾ ཏ་ཐཱ ཨུ་དྡྷཾ ཏ་ཐཱ ཨ་དྷོ ཏ་ཐཱ ཏི་རི་ཡཾ ཏ་ཐཱ ཝི་དི་སཾ.

༦༦༨. ‘‘ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀ’’ནྟི ས་བྦེ་ན ས་བྦཾ ས་བྦ་ཐཱ ས་བྦཾ ཨ་སེ་སཾ ནི་སྶེ་སཾ. པ་རི་ཡཱ་དཱ་ཡ་ཝ་ཙ་ན་མེ་ཏཾ – ‘‘ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀ’’ནྟི.

༦༦༩. ‘‘མུ་དི་ཏཱ་ས་ཧ་ག་ཏེ་ན ཙེ་ཏ་སཱ’’ཏི ཏ་ཏྠ ཀ་ཏ་མཱ མུ་དི་ཏཱ? ཡཱ ས་ཏྟེ་སུ མུ་དི་ཏཱ མུ་དི་ཏཱ་ཡ་ནཱ མུ་དི་ཏཱ་ཡི་ཏ་ཏྟཾ མུ་དི་ཏཱ་ཙེ་ཏོ་ཝི་མུ་ཏྟི – ཨ་ཡཾ ཝུ་ཙྩ་ཏི ‘‘མུ་དི་ཏཱ’’.

༦༧༠. ‘‘ཝི་པུ་ལེ་ནཱ’’ཏི ཡཾ ཝི་པུ་ལཾ ཏཾ མ་ཧ་གྒ་ཏཾ, ཡཾ མ་ཧ་གྒ་ཏཾ ཏཾ ཨ་པྤ་མཱ་ཎཾ, ཡཾ ཨ་པྤ་མཱ་ཎཾ སོ ཨ་ཝེ་རོ, ཡོ ཨ་ཝེ་རོ སོ ཨ་བྱཱ་པ་ཛྫོ.

༦༧༡. ‘‘ཕ་རི་ཏྭཱ’’ཏི ཕ་རི་ཏྭཱ ཨ་དྷི་མུ་ཙྩི་ཏྭཱ.

༦༧༢. ‘‘ཝི་ཧ་ར་ཏཱི’’ཏི …པེ… ཏེ་ན ཝུ་ཙྩ་ཏི ‘‘ཝི་ཧ་ར་ཏཱི’’ཏི.