༥. ཝི་ཉྙཱ་ཎ་ཀྑ་ནྡྷོ
༢༦. ཏ་ཏྠ ཀ་ཏ་མོ ཝི་ཉྙཱ་ཎ་ཀྑ་ནྡྷོ? ཡཾ ཀི་ཉྩི ཝི་ཉྙཱ་ཎཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ཨོ་ལཱ༹་རི་ཀཾ ཝཱ སུ་ཁུ་མཾ ཝཱ ཧཱི་ནཾ ཝཱ པ་ཎཱི་ཏཾ ཝཱ ཡཾ དཱུ་རེ ས་ནྟི་ཀེ ཝཱ, ཏ་དེ་ཀ་ཛ྄ཛྷཾ ཨ་བྷི་ས་ཉྙཱུ་ཧི་ཏྭཱ ཨ་བྷི་ས་ངྑི་པི་ཏྭཱ – ཨ་ཡཾ ཝུ་ཙྩ་ཏི ཝི་ཉྙཱ་ཎ་ཀྑ་ནྡྷོ.
༢༧. ཏ་ཏྠ ཀ་ཏ་མཾ ཝི་ཉྙཱ་ཎཾ ཨ་ཏཱི་ཏཾ? ཡཾ ཝི་ཉྙཱ་ཎཾ ཨ་ཏཱི་ཏཾ ནི་རུ་དྡྷཾ ཝི་ག་ཏཾ ཝི་པ་རི་ཎ་ཏཾ ཨ་ཏྠ་ངྒ་ཏཾ ཨ་བྦྷ་ཏྠ་ངྒ་ཏཾ ཨུ་པྤ་ཛྫི་ཏྭཱ ཝི་ག་ཏཾ ཨ་ཏཱི་ཏཾ ཨ་ཏཱི་ཏཾ་སེ་ན ས་ངྒ་ཧི་ཏཾ, ཙ་ཀྑུ་ཝི་ཉྙཱ་ཎཾ སོ་ཏ་ཝི་ཉྙཱ་ཎཾ གྷཱ་ན་ཝི་ཉྙཱ་ཎཾ ཛི་ཝ྄ཧཱ་ཝི་ཉྙཱ་ཎཾ ཀཱ་ཡ་ཝི་ཉྙཱ་ཎཾ མ་ནོ་ཝི་ཉྙཱ་ཎཾ – ཨི་དཾ ཝུ་ཙྩ་ཏི ཝི་ཉྙཱ་ཎཾ ཨ་ཏཱི་ཏཾ.
ཏ་ཏྠ ཀ་ཏ་མཾ ཝི་ཉྙཱ་ཎཾ ཨ་ནཱ་ག་ཏཾ? ཡཾ ཝི་ཉྙཱ་ཎཾ ཨ་ཛཱ་ཏཾ ཨ་བྷཱུ་ཏཾ ཨ་ས་ཉྫཱ་ཏཾ ཨ་ནི་བྦ་ཏྟཾ ཨ་ན་བྷི་ནི་བྦ་ཏྟཾ ཨ་པཱ་ཏུ་བྷཱུ་ཏཾ ཨ་ནུ་པྤ་ནྣཾ ཨ་ས་མུ་པྤ་ནྣཾ ཨ་ནུ་ཊྛི་ཏཾ ཨ་ས་མུ་ཊྛི་ཏཾ ཨ་ནཱ་ག་ཏཾ ཨ་ནཱ་ག་ཏཾ་སེ་ན ས་ངྒ་ཧི་ཏཾ, ཙ་ཀྑུ་ཝི་ཉྙཱ་ཎཾ སོ་ཏ་ཝི་ཉྙཱ་ཎཾ གྷཱ་ན་ཝི་ཉྙཱ་ཎཾ ཛི་ཝ྄ཧཱ་ཝི་ཉྙཱ་ཎཾ ཀཱ་ཡ་ཝི་ཉྙཱ་ཎཾ མ་ནོ་ཝི་ཉྙཱ་ཎཾ – ཨི་དཾ ཝུ་ཙྩ་ཏི ཝི་ཉྙཱ་ཎཾ ཨ་ནཱ་ག་ཏཾ.
ཏ་ཏྠ ཀ་ཏ་མཾ ཝི་ཉྙཱ་ཎཾ པ་ཙྩུ་པྤ་ནྣཾ? ཡཾ ཝི་ཉྙཱ་ཎཾ ཛཱ་ཏཾ བྷཱུ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ ཨུ་པྤ་ནྣཾ ས་མུ་པྤ་ནྣཾ ཨུ་ཊྛི་ཏཾ ས་མུ་ཊྛི་ཏཾ པ་ཙྩུ་པྤ་ནྣཾ པ་ཙྩུ་པྤ་ནྣཾ་སེ་ན ས་ངྒ་ཧི་ཏཾ, ཙ་ཀྑུ་ཝི་ཉྙཱ་ཎཾ སོ་ཏ་ཝི་ཉྙཱ་ཎཾ གྷཱ་ན་ཝི་ཉྙཱ་ཎཾ ཛི་ཝ྄ཧཱ་ཝི་ཉྙཱ་ཎཾ ཀཱ་ཡ་ཝི་ཉྙཱ་ཎཾ མ་ནོ་ཝི་ཉྙཱ་ཎཾ – ཨི་དཾ ཝུ་ཙྩ་ཏི ཝི་ཉྙཱ་ཎཾ པ་ཙྩུ་པྤ་ནྣཾ.
༢༨. ཏ་ཏྠ ཀ་ཏ་མཾ ཝི་ཉྙཱ་ཎཾ ཨ་ཛ྄ཛྷ་ཏྟཾ? ཡཾ ཝི་ཉྙཱ་ཎཾ ཏེ་སཾ ཏེ་སཾ ས་ཏྟཱ་ནཾ ཨ་ཛ྄ཛྷ་ཏྟཾ པ་ཙྩ་ཏྟཾ ནི་ཡ་ཀཾ པཱ་ཊི་པུ་གྒ་ལི་ཀཾ ཨུ་པཱ་དི་ནྣཾ, ཙ་ཀྑུ་ཝི་ཉྙཱ་ཎཾ སོ་ཏ་ཝི་ཉྙཱ་ཎཾ གྷཱ་ན་ཝི་ཉྙཱ་ཎཾ ཛི་ཝ྄ཧཱ་ཝི་ཉྙཱ་ཎཾ ཀཱ་ཡ་ཝི་ཉྙཱ་ཎཾ མ་ནོ་ཝི་ཉྙཱ་ཎཾ – ཨི་དཾ ཝུ་ཙྩ་ཏི ཝི་ཉྙཱ་ཎཾ ཨ་ཛ྄ཛྷ་ཏྟཾ.
ཏ་ཏྠ ཀ་ཏ་མཾ ཝི་ཉྙཱ་ཎཾ བ་ཧི་དྡྷཱ? ཡཾ ཝི་ཉྙཱ་ཎཾ ཏེ་སཾ ཏེ་སཾ པ་ར་ས་ཏྟཱ་ནཾ པ་ར་པུ་གྒ་ལཱ་ནཾ ཨ་ཛ྄ཛྷ་ཏྟཾ པ་ཙྩ་ཏྟཾ ནི་ཡ་ཀཾ པཱ་ཊི་པུ་གྒ་ལི་ཀཾ ཨུ་པཱ་དི་ནྣཾ, ཙ་ཀྑུ་ཝི་ཉྙཱ་ཎཾ སོ་ཏ་ཝི་ཉྙཱ་ཎཾ གྷཱ་ན་ཝི་ཉྙཱ་ཎཾ ཛི་ཝ྄ཧཱ་ཝི་ཉྙཱ་ཎཾ ཀཱ་ཡ་ཝི་ཉྙཱ་ཎཾ མ་ནོ་ཝི་ཉྙཱ་ཎཾ – ཨི་དཾ ཝུ་ཙྩ་ཏི ཝི་ཉྙཱ་ཎཾ བ་ཧི་དྡྷཱ.
༢༩. ཏ་ཏྠ ཀ་ཏ་མཾ ཝི་ཉྙཱ་ཎཾ ཨོ་ལཱ༹་རི་ཀཾ སུ་ཁུ་མཾ? ཨ་ཀུ་ས་ལཾ ཝི་ཉྙཱ་ཎཾ ཨོ་ལཱ༹་རི་ཀཾ, ཀུ་ས་ལཱ་བྱཱ་ཀ་ཏཱ ཝི་ཉྙཱ་ཎཱ སུ་ཁུ་མཱ. ཀུ་ས་ལཱ་ཀུ་ས་ལཱ ཝི་ཉྙཱ་ཎཱ ཨོ་ལཱ༹་རི་ཀཱ, ཨ་བྱཱ་ཀ་ཏཾ ཝི་ཉྙཱ་ཎཾ སུ་ཁུ་མཾ. དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ ཨོ་ལཱ༹་རི་ཀཾ, སུ་ཁཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ སུ་ཁུ་མཱ. སུ་ཁ་དུ་ཀྑཱ་ཧི ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ ཨོ་ལཱ༹་རི་ཀཱ, ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ སུ་ཁུ་མཾ. ཨ་ས་མཱ་པ་ནྣ་སྶ ཝི་ཉྙཱ་ཎཾ ཨོ་ལཱ༹་རི་ཀཾ, ས་མཱ་པ་ནྣ་སྶ ཝི་ཉྙཱ་ཎཾ སུ་ཁུ་མཾ. སཱ་ས་ཝཾ ཝི་ཉྙཱ་ཎཾ ཨོ་ལཱ༹་རི་ཀཾ, ཨ་ནཱ་ས་ཝཾ ཝི་ཉྙཱ་ཎཾ སུ་ཁུ་མཾ. ཏཾ ཏཾ ཝཱ པ་ན ཝི་ཉྙཱ་ཎཾ ཨུ་པཱ་དཱ་ཡུ་པཱ་དཱ་ཡ ཝི་ཉྙཱ་ཎཾ ཨོ་ལཱ༹་རི་ཀཾ སུ་ཁུ་མཾ ད་ཊྛ་བྦཾ.
༣༠. ཏ་ཏྠ ཀ་ཏ་མཾ ཝི་ཉྙཱ་ཎཾ ཧཱི་ནཾ པ་ཎཱི་ཏཾ? ཨ་ཀུ་ས་ལཾ ཝི་ཉྙཱ་ཎཾ ཧཱི་ནཾ, ཀུ་ས་ལཱ་བྱཱ་ཀ་ཏཱ ཝི་ཉྙཱ་ཎཱ པ་ཎཱི་ཏཱ. ཀུ་ས་ལཱ་ཀུ་ས་ལཱ ཝི་ཉྙཱ་ཎཱ ཧཱི་ནཱ, ཨ་བྱཱ་ཀ་ཏཾ ཝི་ཉྙཱ་ཎཾ པ་ཎཱི་ཏཾ. དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ ཧཱི་ནཾ, སུ་ཁཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ པ་ཎཱི་ཏཱ. སུ་ཁ་དུ་ཀྑཱ་ཧི ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ ཧཱི་ནཱ, ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ པ་ཎཱི་ཏཾ. ཨ་ས་མཱ་པ་ནྣ་སྶ ཝི་ཉྙཱ་ཎཾ ཧཱི་ནཾ, ས་མཱ་པ་ནྣ་སྶ ཝི་ཉྙཱ་ཎཾ པ་ཎཱི་ཏཾ. སཱ་ས་ཝཾ ཝི་ཉྙཱ་ཎཾ ཧཱི་ནཾ, ཨ་ནཱ་ས་ཝཾ ཝི་ཉྙཱ་ཎཾ པ་ཎཱི་ཏཾ. ཏཾ ཏཾ ཝཱ པ་ན ཝི་ཉྙཱ་ཎཾ ཨུ་པཱ་དཱ་ཡུ་པཱ་དཱ་ཡ ཝི་ཉྙཱ་ཎཾ ཧཱི་ནཾ པ་ཎཱི་ཏཾ ད་ཊྛ་བྦཾ.
༣༡. ཏ་ཏྠ ཀ་ཏ་མཾ ཝི་ཉྙཱ་ཎཾ དཱུ་རེ? ཨ་ཀུ་ས་ལཾ ཝི་ཉྙཱ་ཎཾ ཀུ་ས་ལཱ་བྱཱ་ཀ་ཏེ་ཧི ཝི་ཉྙཱ་ཎེ་ཧི དཱུ་རེ; ཀུ་ས་ལཱ་བྱཱ་ཀ་ཏཱ ཝི་ཉྙཱ་ཎཱ ཨ་ཀུ་ས་ལཱ ཝི་ཉྙཱ་ཎཱ དཱུ་རེ; ཀུ་ས་ལཾ ཝི་ཉྙཱ་ཎཾ ཨ་ཀུ་ས་ལཱ་བྱཱ་ཀ་ཏེ་ཧི ཝི་ཉྙཱ་ཎེ་ཧི དཱུ་རེ; ཨ་ཀུ་ས་ལཱ་བྱཱ་ཀ་ཏཱ ཝི་ཉྙཱ་ཎཱ ཀུ་ས་ལཱ ཝི་ཉྙཱ་ཎཱ དཱུ་རེ; ཨ་བྱཱ་ཀ་ཏཾ ཝི་ཉྙཱ་ཎཾ ཀུ་ས་ལཱ་ཀུ་ས་ལེ་ཧི ཝི་ཉྙཱ་ཎེ་ཧི དཱུ་རེ; ཀུ་ས་ལཱ་ཀུ་ས་ལཱ ཝི་ཉྙཱ་ཎཱ ཨ་བྱཱ་ཀ་ཏཱ ཝི་ཉྙཱ་ཎཱ དཱུ་རེ. དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ སུ་ཁཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟེ་ཧི ཝི་ཉྙཱ་ཎེ་ཧི དཱུ་རེ; སུ་ཁཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཱ ཝི་ཉྙཱ་ཎཱ དཱུ་རེ; སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ དུ་ཀྑཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟེ་ཧི ཝི་ཉྙཱ་ཎེ་ཧི དཱུ་རེ; དུ་ཀྑཱ་ཡ ཙ ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཱ ཝི་ཉྙཱ་ཎཱ དཱུ་རེ; ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ སུ་ཁ་དུ་ཀྑཱ་ཧི ཝེ་ད་ནཱ་ཧི ས་མྤ་ཡུ་ཏྟེ་ཧི ཝི་ཉྙཱ་ཎེ་ཧི དཱུ་རེ; སུ་ཁ་དུ་ཀྑཱ་ཧི ཝེ་ད་ནཱ་ཧི ས་མྤ་ཡུ་ཏྟཱ ཝི་ཉྙཱ་ཎཱ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཱ ཝི་ཉྙཱ་ཎཱ དཱུ་རེ. ཨ་ས་མཱ་པ་ནྣ་སྶ ཝི་ཉྙཱ་ཎཾ ས་མཱ་པ་ནྣ་སྶ ཝི་ཉྙཱ་ཎཱ དཱུ་རེ; ས་མཱ་པ་ནྣ་སྶ ཝི་ཉྙཱ་ཎཾ ཨ་ས་མཱ་པ་ནྣ་སྶ ཝི་ཉྙཱ་ཎཱ དཱུ་རེ. སཱ་ས་ཝཾ ཝི་ཉྙཱ་ཎཾ ཨ་ནཱ་ས་ཝཱ ཝི་ཉྙཱ་ཎཱ དཱུ་རེ; ཨ་ནཱ་ས་ཝཾ ཝི་ཉྙཱ་ཎཾ སཱ་ས་ཝཱ ཝི་ཉྙཱ་ཎཱ དཱུ་རེ – ཨི་དཾ ཝུ་ཙྩ་ཏི ཝི་ཉྙཱ་ཎཾ དཱུ་རེ.
ཏ་ཏྠ ཀ་ཏ་མཾ ཝི་ཉྙཱ་ཎཾ ས་ནྟི་ཀེ? ཨ་ཀུ་ས་ལཾ ཝི་ཉྙཱ་ཎཾ ཨ་ཀུ་ས་ལ་སྶ ཝི་ཉྙཱ་ཎ་སྶ ས་ནྟི་ཀེ; ཀུ་ས་ལཾ ཝི་ཉྙཱ་ཎཾ ཀུ་ས་ལ་སྶ ཝི་ཉྙཱ་ཎ་སྶ ས་ནྟི་ཀེ; ཨ་བྱཱ་ཀ་ཏཾ ཝི་ཉྙཱ་ཎཾ ཨ་བྱཱ་ཀ་ཏ་སྶ ཝི་ཉྙཱ་ཎ་སྶ ས་ནྟི་ཀེ. དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟ་སྶ ཝི་ཉྙཱ་ཎ་སྶ ས་ནྟི་ཀེ; སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟ་སྶ ཝི་ཉྙཱ་ཎ་སྶ ས་ནྟི་ཀེ; ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཾ ཝི་ཉྙཱ་ཎཾ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟ་སྶ ཝི་ཉྙཱ་ཎ་སྶ ས་ནྟི་ཀེ. ཨ་ས་མཱ་པ་ནྣ་སྶ ཝི་ཉྙཱ་ཎཾ ཨ་ས་མཱ་པ་ནྣ་སྶ ཝི་ཉྙཱ་ཎ་སྶ ས་ནྟི་ཀེ; ས་མཱ་པ་ནྣ་སྶ ཝི་ཉྙཱ་ཎཾ ས་མཱ་པ་ནྣ་སྶ ཝི་ཉྙཱ་ཎ་སྶ ས་ནྟི་ཀེ. སཱ་ས་ཝཾ ཝི་ཉྙཱ་ཎཾ སཱ་ས་ཝ་སྶ ཝི་ཉྙཱ་ཎ་སྶ ས་ནྟི་ཀེ; ཨ་ནཱ་ས་ཝཾ ཝི་ཉྙཱ་ཎཾ ཨ་ནཱ་ས་ཝ་སྶ ཝི་ཉྙཱ་ཎ་སྶ ས་ནྟི་ཀེ – ཨི་དཾ ཝུ་ཙྩ་ཏི ཝི་ཉྙཱ་ཎཾ ས་ནྟི་ཀེ. ཏཾ ཏཾ ཝཱ པ་ན ཝི་ཉྙཱ་ཎཾ ཨུ་པཱ་དཱ་ཡུ་པཱ་དཱ་ཡ ཝི་ཉྙཱ་ཎཾ དཱུ་རེ ས་ནྟི་ཀེ ད་ཊྛ་བྦཾ.
སུ་ཏྟ་ནྟ་བྷཱ་ཛ་ནཱི་ཡཾ.