༢༢. བཱ་ཝཱི་ས་ཏི་མ་ཝ་གྒོ

(༢༡༥) ༨. ཨ་བྱཱ་ཀ་ཏ་ཀ་ཐཱ

༩༠༡. ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ་ནྟི? ཨཱ་མ་ནྟཱ. སུ་པི་ན་ནྟེ་ན པཱ་ཎཾ ཧ་ནེ་ཡྻཱ་ཏི? ཨཱ་མ་ནྟཱ. ཧ་ཉྩི སུ་པི་ན་ནྟེ་ན པཱ་ཎཾ ཧ་ནེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ’’ནྟི.

སུ་པི་ན་ནྟེ་ན ཨ་དི་ནྣཾ ཨཱ་དི་ཡེ་ཡྻ…པེ… མུ་སཱ བྷ་ཎེ་ཡྻ, པི་སུ་ཎཾ བྷ་ཎེ་ཡྻ, ཕ་རུ་སཾ བྷ་ཎེ་ཡྻ, ས་མྥཾ པ་ལ་པེ་ཡྻ, ས་ནྡྷིཾ ཚི་ནྡེ་ཡྻ, ནི་ལློ་པཾ ཧ་རེ་ཡྻ, ཨེ་ཀཱ་གཱ་རི་ཀཾ ཀ་རེ་ཡྻ, པ་རི་པ་ནྠེ ཏི་ཊྛེ་ཡྻ, པ་ར་དཱ་རཾ ག་ཙྪེ་ཡྻ, གཱ་མ་གྷཱ་ཏ་ཀཾ ཀ་རེ་ཡྻ, ནི་ག་མ་གྷཱ་ཏ་ཀཾ ཀ་རེ་ཡྻ, སུ་པི་ན་ནྟེ་ན མེ་ཐུ་ནཾ དྷ་མྨཾ པ་ཊི་སེ་ཝེ་ཡྻ, སུ་པི་ན་ག་ཏ་སྶ ཨ་སུ་ཙི མུ་ཙྩེ་ཡྻ, སུ་པི་ན་ནྟེ་ན དཱ་ནཾ ད་དེ་ཡྻ, ཙཱི་ཝ་རཾ ད་དེ་ཡྻ, པི་ཎྜ་པཱ་ཏཾ ད་དེ་ཡྻ, སེ་ནཱ་ས་ནཾ ད་དེ་ཡྻ, གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻ, ཁཱ་ད་ནཱི་ཡཾ ད་དེ་ཡྻ, བྷོ་ཛ་ནཱི་ཡཾ ད་དེ་ཡྻ, པཱ་ནཱི་ཡཾ ད་དེ་ཡྻ, ཙེ་ཏི་ཡཾ ཝ་ནྡེ་ཡྻ, ཙེ་ཏི་ཡེ མཱ་ལཾ ཨཱ་རོ་པེ་ཡྻ, ག་ནྡྷཾ ཨཱ་རོ་པེ་ཡྻ, ཝི་ལེ་པ་ནཾ ཨཱ་རོ་པེ་ཡྻ…པེ… ཙེ་ཏི་ཡཾ ཨ་བྷི་ད་ཀྑི་ཎཾ ཀ་རེ་ཡྻཱ་ཏི? ཨཱ་མ་ནྟཱ. ཧ་ཉྩི སུ་པི་ན་ནྟེ་ན ཙེ་ཏི་ཡཾ ཨ་བྷི་ད་ཀྑི་ཎཾ ཀ་རེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ’’ནྟི.

༩༠༢. ན ཝ་ཏྟ་བྦཾ – ‘‘ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ’’ནྟི? ཨཱ་མ་ནྟཱ. ན་ནུ སུ་པི་ན་ག་ཏ་སྶ ཙི་ཏྟཾ ཨ་བྦོ་ཧཱ་རི་ཡཾ ཝུ་ཏྟཾ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི སུ་པི་ན་ག་ཏ་སྶ ཙི་ཏྟཾ ཨ་བྦོ་ཧཱ་རི་ཡཾ ཝུ་ཏྟཾ བྷ་ག་ཝ་ཏཱ, ཏེ་ན ཝ་ཏ རེ ཝ་ཏྟ་བྦེ – ‘‘ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ’’ནྟི.

ཨ་བྱཱ་ཀ་ཏ་ཀ་ཐཱ ནི་ཊྛི་ཏཱ.