༢༠. ཝཱི་ས་ཏི་མ་ཝ་གྒོ
(༡༩༤) ༡. ཨ་ས་ཉྩི་ཙྩ་ཀ་ཐཱ
༨༥༧. ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི་ཏི? ཨཱ་མ་ནྟཱ. ཨ་ས་ཉྩི་ཙྩ པཱ་ཎཾ ཧ་ནྟྭཱ པཱ་ཎཱ་ཏི་པཱ་ཏཱི ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི་ཏི? ཨཱ་མ་ནྟཱ. ཨ་ས་ཉྩི་ཙྩ ཨ་དི་ནྣཾ ཨཱ་དི་ཡི་ཏྭཱ…པེ… མུ་སཱ བྷ་ཎི་ཏྭཱ མུ་སཱ་ཝཱ་དཱི ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཨ་ས་ཉྩི་ཙྩ པཱ་ཎཾ ཧ་ནྟྭཱ པཱ་ཎཱ་ཏི་པཱ་ཏཱི ན ཧོ་ཏཱི་ཏི? ཨཱ་མ་ནྟཱ. ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ན ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཨ་ས་ཉྩི་ཙྩ ཨ་དི་ནྣཾ ཨཱ་དི་ཡི་ཏྭཱ…པེ… མུ་སཱ བྷ་ཎི་ཏྭཱ མུ་སཱ་ཝཱ་དཱི ན ཧོ་ཏཱི་ཏི? ཨཱ་མ་ནྟཱ. ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ན ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༨༥༨. ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི་ཏི? ཨཱ་མ་ནྟཱ. ‘‘ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི’’ཏི – ཨ་ཏྠེ་ཝ སུ་ཏྟ་ནྟོ་ཏི? ན་ཏྠི. ‘‘ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི’’ཏི – ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཧ་ཉྩི ‘‘ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི’’ཏི – ཨ་ཏྠེ་ཝ སུ་ཏྟ་ནྟོ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཏྭཱ ཨཱ་ན་ནྟ་རི་ཀོ ཧོ་ཏཱི’’ཏི.
༨༥༩. ན ཝ་ཏྟ་བྦཾ – ‘‘མཱ་ཏུ་གྷཱ་ཏ་ཀོ ཨཱ་ན་ནྟ་རི་ཀོ’’ཏི? ཨཱ་མ་ནྟཱ. ན་ནུ མཱ་ཏཱ ཛཱི་ཝི་ཏཱ ཝོ་རོ་པི་ཏཱ་ཏི? ཨཱ་མ་ནྟཱ. ཧ་ཉྩི མཱ་ཏཱ ཛཱི་ཝི་ཏཱ ཝོ་རོ་པི་ཏཱ, ཏེ་ན ཝ་ཏ རེ ཝ་ཏྟ་བྦེ – ‘‘མཱ་ཏུ་གྷཱ་ཏ་ཀོ ཨཱ་ན་ནྟ་རི་ཀོ’’ཏི.
ན ཝ་ཏྟ་བྦཾ – ‘‘པི་ཏུ་གྷཱ་ཏ་ཀོ ཨཱ་ན་ནྟ་རི་ཀོ’’ཏི? ཨཱ་མ་ནྟཱ. ན་ནུ པི་ཏཱ ཛཱི་ཝི་ཏཱ ཝོ་རོ་པི་ཏོ་ཏི? ཨཱ་མ་ནྟཱ. ཧ་ཉྩི པི་ཏཱ ཛཱི་ཝི་ཏཱ ཝོ་རོ་པི་ཏོ, ཏེ་ན ཝ་ཏ རེ ཝ་ཏྟ་བྦེ – ‘‘པི་ཏུ་གྷཱ་ཏ་ཀོ ཨཱ་ན་ནྟ་རི་ཀོ’’ཏི.
ན ཝ་ཏྟ་བྦཾ – ‘‘ཨ་ར་ཧ་ནྟ་གྷཱ་ཏ་ཀོ ཨཱ་ན་ནྟ་རི་ཀོ’’ཏི? ཨཱ་མ་ནྟཱ. ན་ནུ ཨ་ར་ཧཱ ཛཱི་ཝི་ཏཱ ཝོ་རོ་པི་ཏོ་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ཛཱི་ཝི་ཏཱ ཝོ་རོ་པི་ཏོ, ཏེ་ན ཝ་ཏ རེ ཝ་ཏྟ་བྦེ – ‘‘ཨ་ར་ཧ་ནྟ་གྷཱ་ཏ་ཀོ ཨཱ་ན་ནྟ་རི་ཀོ’’ཏི.
ན ཝ་ཏྟ་བྦཾ – ‘‘རུ་ཧི་རུ་པྤཱ་ད་ཀོ ཨཱ་ན་ནྟ་རི་ཀོ’’ཏི? ཨཱ་མ་ནྟཱ. ན་ནུ ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དི་ཏ་ནྟི? ཨཱ་མ་ནྟཱ. ཧ་ཉྩི ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དི་ཏཾ, ཏེ་ན ཝ་ཏ རེ ཝ་ཏྟ་བྦེ – ‘‘རུ་ཧི་རུ་པྤཱ་ད་ཀོ ཨཱ་ན་ནྟ་རི་ཀོ’’ཏི.
༨༦༠. ས་ངྒྷ་བྷེ་ད་ཀོ ཨཱ་ན་ནྟ་རི་ཀོ་ཏི? ཨཱ་མ་ནྟཱ. ས་བྦེ ས་ངྒྷ་བྷེ་ད་ཀཱ ཨཱ་ན་ནྟ་རི་ཀཱ་ཏི? ན ཧེ་ཝཾ ཝ་ཏྟ་བྦེ…པེ… ས་བྦེ ས་ངྒྷ་བྷེ་ད་ཀཱ ཨཱ་ན་ནྟ་རི་ཀཱ་ཏི? ཨཱ་མ་ནྟཱ. དྷ་མྨ་ས་ཉྙཱི ས་ངྒྷ་བྷེ་ད་ཀོ ཨཱ་ན་ནྟ་རི་ཀོ་ཏི? ན ཧེ་ཝཾ ཝ་ཏྟ་བྦེ…པེ….
༨༦༡. དྷ་མྨ་ས་ཉྙཱི ས་ངྒྷ་བྷེ་ད་ཀོ ཨཱ་ན་ནྟ་རི་ཀོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཨ་ཏྠུ་པཱ་ལི, ས་ངྒྷ་བྷེ་ད་ཀོ ཨཱ་པཱ་ཡི་ཀོ ནེ་ར་ཡི་ཀོ ཀ་པྤ་ཊྛོ ཨ་ཏེ་ཀི་ཙྪོ; ཨ་ཏྠུ་པཱ་ལི, ས་ངྒྷ་བྷེ་ད་ཀོ ན ཨཱ་པཱ་ཡི་ཀོ ན ནེ་ར་ཡི་ཀོ ན ཀ་པྤ་ཊྛོ ན ཨ་ཏེ་ཀི་ཙྪོ’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘དྷ་མྨ་ས་ཉྙཱི ས་ངྒྷ་བྷེ་ད་ཀོ ཨཱ་ན་ནྟ་རི་ཀོ’’ཏི.
༨༦༢. ན ཝ་ཏྟ་བྦཾ – ‘‘དྷ་མྨ་ས་ཉྙཱི ས་ངྒྷ་བྷེ་ད་ཀོ ཨཱ་ན་ནྟ་རི་ཀོ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ཨཱ་པཱ་ཡི་ཀོ ནེ་ར་ཡི་ཀོ, ཀ་པྤ་ཊྛོ ས་ངྒྷ་བྷེ་ད་ཀོ;
ཝ་གྒ་ར་ཏོ ཨ་དྷ་མྨ་ཊྛོ, ཡོ་ག་ཀྑེ་མཱ པ་དྷཾ་ས་ཏི;
ས་ངྒྷཾ ས་མ་གྒཾ བྷེ་ཏྭཱ་ན, ཀ་པྤཾ ནི་ར་ཡ་མྷི པ་ཙྩ་ཏཱི’’ཏི [ཙཱུ་ལ༹་ཝ. ༣༥༤; ཨ. ནི. ༡༠.༣༩; ཨི་ཏི་ཝུ. ༡༨].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་ངྒྷ་བྷེ་ད་ཀོ ཨཱ་ན་ནྟ་རི་ཀོ་ཏི.
ཨ་ས་ཉྩི་ཙྩ་ཀ་ཐཱ ནི་ཊྛི་ཏཱ.
༢༠. ཝཱི་ས་ཏི་མ་ཝ་གྒོ
(༡༩༥) ༢. ཉཱ་ཎ་ཀ་ཐཱ
༨༦༣. ན་ཏྠི པུ་ཐུ་ཛྫ་ན་སྶ ཉཱ་ཎ་ནྟི? ཨཱ་མ་ནྟཱ. ན་ཏྠི པུ་ཐུ་ཛྫ་ན་སྶ པ་ཉྙཱ པ་ཛཱ་ན་ནཱ ཝི་ཙ་ཡོ པ་ཝི་ཙ་ཡོ དྷ་མྨ་ཝི་ཙ་ཡོ ས་ལླ་ཀྑ་ཎཱ ཨུ་པ་ལ་ཀྑ་ཎཱ པ་ཙྩུ་པ་ལ་ཀྑ་ཎཱ་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ཏྠི པུ་ཐུ་ཛྫ་ན་སྶ པ་ཉྙཱ པ་ཛཱ་ན་ནཱ ཝི་ཙ་ཡོ…པེ… པ་ཙྩུ་པ་ལ་ཀྑ་ཎཱ་ཏི? ཨཱ་མ་ནྟཱ. ཧ་ཉྩི ཨ་ཏྠི པུ་ཐུ་ཛྫ་ན་སྶ པ་ཉྙཱ པ་ཛཱ་ན་ནཱ ཝི་ཙ་ཡོ…པེ… པ་ཙྩུ་པ་ལ་ཀྑ་ཎཱ, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི པུ་ཐུ་ཛྫ་ན་སྶ ཉཱ་ཎ’’ནྟི.
༨༦༤. ན་ཏྠི པུ་ཐུ་ཛྫ་ན་སྶ ཉཱ་ཎ་ནྟི? ཨཱ་མ་ནྟཱ. པུ་ཐུ་ཛྫ་ནོ པ་ཋ་མཾ ཛྷཱ་ནཾ ས་མཱ་པ་ཛྫེ་ཡྻཱ་ཏི? ཨཱ་མ་ནྟཱ. ཧ་ཉྩི པུ་ཐུ་ཛྫ་ནོ པ་ཋ་མཾ ཛྷཱ་ནཾ ས་མཱ་པ་ཛྫེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི པུ་ཐུ་ཛྫ་ན་སྶ ཉཱ་ཎ’’ནྟི.
པུ་ཐུ་ཛྫ་ནོ དུ་ཏི་ཡཾ ཛྷཱ་ནཾ…པེ… ཏ་ཏི་ཡཾ ཛྷཱ་ནཾ…པེ… ཙ་ཏུ་ཏྠཾ ཛྷཱ་ནཾ…པེ… ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མཱ་པ་ཛྫེ་ཡྻ, ཝི་ཉྙཱ་ཎ་ཉྩཱ་ཡ་ཏ་ནཾ ཨཱ་ཀི་ཉྩ་ཉྙཱ་ཡ་ཏ་ནཾ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མཱ་པ་ཛྫེ་ཡྻ, པུ་ཐུ་ཛྫ་ནོ དཱ་ནཾ ད་དེ་ཡྻ …པེ… ཙཱི་ཝ་རཾ ད་དེ་ཡྻ, པི་ཎྜ་པཱ་ཏཾ ད་དེ་ཡྻ, སེ་ནཱ་ས་ནཾ ད་དེ་ཡྻ, གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻཱ་ཏི? ཨཱ་མ་ནྟཱ. ཧ་ཉྩི པུ་ཐུ་ཛྫ་ནོ གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻ, ནོ ཙ ཝ་ཏ རེ ཝ་ཏྟ་བྦེ – ན་ཏྠི པུ་ཐུ་ཛྫ་ན་སྶ ཉཱ་ཎ’’ནྟི.
༨༦༥. ཨ་ཏྠི པུ་ཐུ་ཛྫ་ན་སྶ ཉཱ་ཎ་ནྟི? ཨཱ་མ་ནྟཱ. པུ་ཐུ་ཛྫ་ནོ ཏེ་ན ཉཱ་ཎེ་ན དུ་ཀྑཾ པ་རི་ཛཱ་ནཱ་ཏི, ས་མུ་ད་ཡཾ པ་ཛ་ཧ་ཏི, ནི་རོ་དྷཾ ས་ཙྪི་ཀ་རོ་ཏི, མ་གྒཾ བྷཱ་ཝེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཉཱ་ཎ་ཀ་ཐཱ ནི་ཊྛི་ཏཱ.
༢༠. ཝཱི་ས་ཏི་མ་ཝ་གྒོ
(༡༩༦) ༣. ནི་ར་ཡ་པཱ་ལ་ཀ་ཐཱ
༨༦༦. ན་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི? ཨཱ་མ་ནྟཱ. ན་ཏྠི ནི་ར་ཡེ་སུ ཀ་མྨ་ཀཱ་ར་ཎཱ་ཏི? ན ཧེ་ཝཾ ཝ་ཏྟ་བྦེ…པེ… ཨ་ཏྠི ནི་ར་ཡེ་སུ ཀ་མྨ་ཀཱ་ར་ཎཱ་ཏི? ཨཱ་མ་ནྟཱ. ཨ་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི? ན ཧེ་ཝཾ ཝ་ཏྟ་བྦེ…པེ….
ཨ་ཏྠི མ་ནུ་སྶེ་སུ ཀ་མྨ་ཀཱ་ར་ཎཱ, ཨ་ཏྠི ཙ ཀཱ་ར་ཎི་ཀཱ་ཏི? ཨཱ་མ་ནྟཱ. ཨ་ཏྠི ནི་ར་ཡེ་སུ ཀ་མྨ་ཀཱ་ར་ཎཱ, ཨ་ཏྠི ཙ ཀཱ་ར་ཎི་ཀཱ་ཏི? ན ཧེ་ཝཾ ཝ་ཏྟ་བྦེ…པེ… ཨ་ཏྠི ནི་ར་ཡེ་སུ ཀ་མྨ་ཀཱ་ར་ཎཱ, ན་ཏྠི ཙ ཀཱ་ར་ཎི་ཀཱ་ཏི? ཨཱ་མ་ནྟཱ. ཨ་ཏྠི མ་ནུ་སྶེ་སུ ཀ་མྨ་ཀཱ་ར་ཎཱ, ན་ཏྠི ཙ ཀཱ་ར་ཎི་ཀཱ་ཏི? ན ཧེ་ཝཾ ཝ་ཏྟ་བྦེ…པེ….
༨༦༧. ཨ་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ན ཝེ་སྶ་བྷཱུ ནོ་པི ཙ པེ་ཏྟི་རཱ་ཛཱ,
སོ་མོ ཡ་མོ ཝེ་སྶ་ཝ་ཎོ ཙ རཱ་ཛཱ;
ས་ཀཱ་ནི ཀ་མྨཱ་ནི ཧ་ན་ནྟི ཏ་ཏྠ, ཨི་ཏོ པ་ཎུ་ནྣཾ [པ་ཎུ་ཎྞཾ (སྱཱ. ཀ.), པ་ནུ་ནྣཾ (སཱི.)] པ་ར་ལོ་ཀ་པ་ཏྟ’’ནྟི.
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི.
༨༦༨. ན་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ པ་ཉྩ་ཝི་དྷ་བ་ནྡྷ་ནཾ ནཱ་མ ཀཱ་ར་ཎཾ ཀཱ་རེ་ནྟི [ཀ་རོ་ནྟི (མ. ནི. ༣.༢༥༠; ཨ. ནི. ༣.༣༦)] – ཏ་ཏྟཾ ཨ་ཡོ་ཁཱི་ལཾ ཧ་ཏྠེ ག་མེ་ནྟི, ཏ་ཏྟཾ ཨ་ཡོ་ཁཱི་ལཾ དུ་ཏི་ཡེ ཧ་ཏྠེ ག་མེ་ནྟི, ཏ་ཏྟཾ ཨ་ཡོ་ཁཱི་ལཾ པཱ་དེ ག་མེ་ནྟི, ཏ་ཏྟཾ ཨ་ཡོ་ཁཱི་ལཾ དུ་ཏི་ཡེ པཱ་དེ ག་མེ་ནྟི, ཏ་ཏྟཾ ཨ་ཡོ་ཁཱི་ལཾ མ་ཛ྄ཛྷེ་ཨུ་ར་སྨིཾ ག་མེ་ནྟི; སོ ཏ་ཏྠ དུ་ཀྑཱ ཏི་བྦཱ ཀ་ཊུ་ཀཱ ཝེ་ད་ནཱ ཝེ་དེ་ཏི; ན ཙ ཏཱ་ཝ ཀཱ་ལཾ ཀ་རོ་ཏི ཡཱ་ཝ ན ཏཾ པཱ་པ་ཀ་མྨཾ བྱ་ནྟཱི་ཧོ་ཏཱི’’ཏི [མ. ནི. ༣.༢༥༠; ཨ. ནི. ༣.༣༦]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཨ་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི.
ན་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ སཾ་ཝེ་སེ་ཏྭཱ ཀུ་ཋཱ་རཱི་ཧི [ཀུ་དྷཱ་རཱི་ཧི (ས་བྦ་ཏྠ)] ཏ་ཙྪ་ནྟི…པེ… ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ ཨུ་དྡྷ་མྤཱ་དཾ ཨ་དྷོ་སི་རཾ ཋ་པེ་ཏྭཱ ཝཱ་སཱི་ཧི ཏ་ཙྪ་ནྟི…པེ… ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ ར་ཐེ ཡོ་ཛེ་ཏྭཱ ཨཱ་དི་ཏྟཱ་ཡ པ་ཐ་ཝི་ཡཱ ས་མྤ་ཛྫ་ལི་ཏཱ་ཡ ས་ཛོ་ཏི་བྷཱུ་ཏཱ་ཡ [ས་ཉྫོ་ཏི་བྷཱུ་ཏཱ་ཡ (སྱཱ.)] སཱ་རེ་ནྟི་པི པ་ཙྩཱ་སཱ་རེ་ནྟི་པི…པེ… ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ མ་ཧ་ནྟཾ ཨ་ངྒཱ་ར་པ་བྦ་ཏཾ ཨཱ་དི་ཏྟཾ ས་མྤ་ཛྫ་ལི་ཏཾ ས་ཛོ་ཏི་བྷཱུ་ཏཾ ཨཱ་རོ་པེ་ནྟི་པི ཨོ་རོ་པེ་ནྟི་པི…པེ… ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ ཨུ་དྡྷ་མྤཱ་དཾ ཨ་དྷོ་སི་རཾ ག་ཧེ་ཏྭཱ ཏ་ཏྟཱ་ཡ ལོ་ཧ་ཀུ་མྦྷི་ཡཱ པ་ཀྑི་པ་ནྟི ཨཱ་དི་ཏྟཱ་ཡ ས་མྤ་ཛྫ་ལི་ཏཱ་ཡ ས་ཛོ་ཏི་བྷཱུ་ཏཱ་ཡ. སོ ཏ་ཏྠ ཕེ་ཎུ་དྡེ་ཧ་ཀཾ པ་ཙྩ་ཏི, སོ ཏ་ཏྠ ཕེ་ཎུ་དྡེ་ཧ་ཀཾ པ་ཙྩ་མཱ་ནོ ས་ཀི་མྤི ཨུ་དྡྷཾ ག་ཙྪ་ཏི, ས་ཀི་མྤི ཨ་དྷོ ག་ཙྪ་ཏི, ས་ཀི་མྤི ཏི་རི་ཡཾ ག་ཙྪ་ཏི. སོ ཏ་ཏྠ དུ་ཀྑཱ ཏི་བྦཱ ཀ་ཊུ་ཀཱ ཝེ་ད་ནཱ ཝེ་ད་ཡ་ཏི, ན ཙ ཏཱ་ཝ ཀཱ་ལཾ ཀ་རོ་ཏི ཡཱ་ཝ ན ཏཾ པཱ་པ་ཀ་མྨཾ བྱ་ནྟཱི་ཧོ་ཏི. ཏ་མེ་ནཾ, བྷི་ཀྑ་ཝེ, ནི་ར་ཡ་པཱ་ལཱ མ་ཧཱ་ནི་ར་ཡེ པ་ཀྑི་པ་ནྟི! སོ ཁོ པ་ན, བྷི་ཀྑ་ཝེ, མ་ཧཱ་ནི་ར་ཡོ –
‘‘ཙ་ཏུ་ཀྐ་ཎྞོ ཙ་ཏུ་དྭཱ་རོ, ཝི་བྷ་ཏྟོ བྷཱ་ག་སོ མི་ཏོ;
ཨ་ཡོ་པཱ་ཀཱ་ར་པ་རི་ཡ་ནྟོ, ཨ་ཡ་སཱ པ་ཊི་ཀུ་ཛྫི་ཏོ.
‘‘ཏ་སྶ ཨ་ཡོ་མ་ཡཱ བྷཱུ་མི, ཛ་ལི་ཏཱ ཏེ་ཛ་སཱ ཡུ་ཏཱ;
ས་མ་ནྟཱ ཡོ་ཛ་ན་ས་ཏཾ, ཕ་རི་ཏྭཱ ཏི་ཊྛ་ཏི ས་བྦ་དཱ’’ཏི [མ. ནི. ༣.༢༥༠; ཨ. ནི. ༣.༣༦; པེ. ཝ. ༧༡].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཨ་ཏྠི ནི་ར་ཡེ་སུ ནི་ར་ཡ་པཱ་ལཱ་ཏི.
ནི་ར་ཡ་པཱ་ལ་ཀ་ཐཱ ནི་ཊྛི་ཏཱ.
༢༠. ཝཱི་ས་ཏི་མ་ཝ་གྒོ
(༡༩༧) ༤. ཏི་ར་ཙྪཱ་ན་ཀ་ཐཱ
༨༦༩. ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི? ཨཱ་མ་ནྟཱ. ཨ་ཏྠི ཏི་ར་ཙྪཱ་ན་ག་ཏེ་སུ དེ་ཝཱ་ཏི? ན ཧེ་ཝཾ ཝ་ཏྟ་བྦེ…པེ… ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི? ཨཱ་མ་ནྟཱ. དེ་ཝ་ལོ་ཀོ ཏི་ར་ཙྪཱ་ན་ཡོ་ནཱི་ཏི? ན ཧེ་ཝཾ ཝ་ཏྟ་བྦེ…པེ… ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི? ཨཱ་མ་ནྟཱ. ཨ་ཏྠི ཏ་ཏྠ ཀཱི་ཊཱ པ་ཊ་ངྒཱ མ་ཀ་སཱ མ་ཀྑི་ཀཱ ཨ་ཧཱི ཝི་ཙྪི་ཀཱ ས་ཏ་པ་དཱི ག་ཎྜུ་པྤཱ་དཱ་ཏི [ག་ཎྜུ་པཱ་དཱ་ཏི (སྱཱ. ཀཾ. པཱི.)]? ན ཧེ་ཝཾ ཝ་ཏྟ་བྦེ…པེ….
༨༧༠. ན་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི? ཨཱ་མ་ནྟཱ. ན་ནུ ཨ་ཏྠི ཏ་ཏྠ ཨེ་རཱ་ཝ་ཎོ ནཱ་མ ཧ་ཏྠི་ནཱ་གོ ས་ཧ་སྶ་ཡུ་ཏྟཾ དི་བྦཾ ཡཱ་ན་ནྟི? ཨཱ་མ་ནྟཱ. ཧ་ཉྩི ཨ་ཏྠི ཏ་ཏྠ ཨེ་རཱ་ཝ་ཎོ ནཱ་མ ཧ་ཏྠི་ནཱ་གོ ས་ཧ་སྶ་ཡུ་ཏྟཾ དི་བྦཾ ཡཱ་ནཾ, ཏེ་ན ཝ་ཏ རེ ཝ་ཏྟ་བྦེ – ‘‘ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ’’ཏི.
༨༧༡. ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི? ཨཱ་མ་ནྟཱ. ཨ་ཏྠི ཏ་ཏྠ ཧ་ཏྠི་བ་ནྡྷཱ ཨ་སྶ་བ་ནྡྷཱ [ཧ་ཏྠི་བྷ་ཎྜཱ ཨ་སྶ་བྷ་ཎྜཱ (?)] ཡཱ་ཝ་སི་ཀཱ ཀཱ་ར་ཎི་ཀཱ བྷ་ཏྟ་ཀཱ་ར་ཀཱ་ཏི? ན ཧེ་ཝཾ ཝ་ཏྟ་བྦེ. ཏེ་ན ཧི ན་ཏྠི དེ་ཝེ་སུ ཏི་ར་ཙྪཱ་ན་ག་ཏཱ་ཏི.
ཏི་ར་ཙྪཱ་ན་ཀ་ཐཱ ནི་ཊྛི་ཏཱ.
༢༠. ཝཱི་ས་ཏི་མ་ཝ་གྒོ
(༡༩༨) ༥. མ་གྒ་ཀ་ཐཱ
༨༧༢. པ་ཉྩ་ངྒི་ཀོ མ་གྒོ་ཏི? ཨཱ་མ་ནྟཱ. ན་ནུ ཨ་ཊྛ་ངྒི་ཀོ མ་གྒོ ཝུ་ཏྟོ བྷ་ག་ཝ་ཏཱ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷཱི་ཏི? ཨཱ་མ་ནྟཱ. ཧ་ཉྩི ཨ་ཊྛ་ངྒི་ཀོ མ་གྒོ ཝུ་ཏྟོ བྷ་ག་ཝ་ཏཱ, སེ་ཡྻ་ཐི་དཾ – ས་མྨཱ་དི་ཊྛི …པེ… ས་མྨཱ་ས་མཱ་དྷི, ནོ ཙ ཝ་ཏ རེ ཝ་ཏྟ་བྦེ – ‘‘པ་ཉྩ་ངྒི་ཀོ མ་གྒོ’’ཏི.
པ་ཉྩ་ངྒི་ཀོ མ་གྒོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘མ་གྒཱ་ནཾ ཨ་ཊྛ་ངྒི་ཀོ སེ་ཊྛོ, ས་ཙྩཱ་ནཾ ཙ་ཏུ་རོ པ་དཱ;
ཝི་རཱ་གོ སེ་ཊྛོ དྷ་མྨཱ་ནཾ, དྭི་པ་དཱ་ན་ཉྩ ཙ་ཀྑུ་མཱ’’ཏི [དྷ. པ. ༢༧༣ དྷ་མྨ་པ་དེ].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཨ་ཊྛ་ངྒི་ཀོ མ་གྒོ་ཏི.
༨༧༣. ས་མྨཱ་ཝཱ་ཙཱ མ་གྒ་ངྒཾ, སཱ ཙ ན མ་གྒོ་ཏི? ཨཱ་མ་ནྟཱ. ས་མྨཱ་དི་ཊྛི མ་གྒ་ངྒཾ, སཱ ཙ ན མ་གྒོ་ཏི? ན ཧེ་ཝཾ ཝ་ཏྟ་བྦེ…པེ… ས་མྨཱ་ཝཱ་ཙཱ མ་གྒ་ངྒཾ, སཱ ཙ ན མ་གྒོ་ཏི? ཨཱ་མ་ནྟཱ. ས་མྨཱ་ས་ངྐ་པྤོ…པེ… ས་མྨཱ་ཝཱ་ཡཱ་མོ…པེ… ས་མྨཱ་ས་ཏི…པེ… ས་མྨཱ་ས་མཱ་དྷི མ་གྒ་ངྒཾ, སོ ཙ ན མ་གྒོ་ཏི? ན ཧེ་ཝཾ ཝ་ཏྟ་བྦེ…པེ….
ས་མྨཱ་ཀ་མྨ་ནྟོ…པེ… ས་མྨཱ་ཨཱ་ཛཱི་ཝོ མ་གྒ་ངྒཾ, སོ ཙ ན མ་གྒོ་ཏི? ཨཱ་མ་ནྟཱ. ས་མྨཱ་དི་ཊྛི…པེ… ས་མྨཱ་ས་མཱ་དྷི མ་གྒ་ངྒཾ, སོ ཙ ན མ་གྒོ་ཏི? ན ཧེ་ཝཾ ཝ་ཏྟ་བྦེ…པེ….
ས་མྨཱ་དི་ཊྛི མ་གྒ་ངྒཾ, སཱ ཙ མ་གྒོ་ཏི? ཨཱ་མ་ནྟཱ. ས་མྨཱ་ཝཱ་ཙཱ མ་གྒ་ངྒཾ, སཱ ཙ མ་གྒོ་ཏི? ན ཧེ་ཝཾ ཝ་ཏྟ་བྦེ…པེ… ས་མྨཱ་དི་ཊྛི མ་གྒ་ངྒཾ, སཱ ཙ མ་གྒོ་ཏི? ཨཱ་མ་ནྟཱ. ས་མྨཱ་ཀ་མྨ་ནྟོ…པེ… ས་མྨཱ་ཨཱ་ཛཱི་ཝོ མ་གྒ་ངྒཾ, སོ ཙ མ་གྒོ་ཏི? ན ཧེ་ཝཾ ཝ་ཏྟ་བྦེ…པེ….
ས་མྨཱ་ས་ངྐ་པྤོ…པེ… ས་མྨཱ་ཝཱ་ཡཱ་མོ…པེ… ས་མྨཱ་ས་ཏི…པེ… ས་མྨཱ་ས་མཱ་དྷི མ་གྒ་ངྒཾ, སོ ཙ མ་གྒོ་ཏི? ཨཱ་མ་ནྟཱ. ས་མྨཱ་ཝཱ་ཙཱ…པེ… ས་མྨཱ་ཀ་མྨ་ནྟོ…པེ… ས་མྨཱ་ཨཱ་ཛཱི་ཝོ མ་གྒ་ངྒཾ, སོ ཙ མ་གྒོ་ཏི? ན ཧེ་ཝཾ ཝ་ཏྟ་བྦེ…པེ….
༨༧༤. ཨ་རི་ཡོ ཨ་ཊྛ་ངྒི་ཀོ མ་གྒོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘པུ་བྦེ་ཝ ཁོ པ་ན་སྶ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨཱ་ཛཱི་ཝོ སུ་པ་རི་སུ་དྡྷོ ཧོ་ཏི; ཨེ་ཝ་མ་སྶཱ་ཡཾ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏཱི’’ཏི [མ. ནི. ༣.༤༣༡]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི པ་ཉྩ་ངྒི་ཀོ མ་གྒོ་ཏི.
༨༧༥. པ་ཉྩ་ངྒི་ཀོ མ་གྒོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཡ་སྨིཾ ཁོ, སུ་བྷ་དྡ, དྷ་མྨ་ཝི་ན་ཡེ ཨ་རི་ཡོ ཨ་ཊྛ་ངྒི་ཀོ མ་གྒོ ན ཨུ་པ་ལ་བྦྷ་ཏི, ས་མ་ཎོ་པི ཏ་ཏྠ ན ཨུ་པ་ལ་བྦྷ་ཏི, དུ་ཏི་ཡོ་པི ཏ་ཏྠ ས་མ་ཎོ ན ཨུ་པ་ལ་བྦྷ་ཏི, ཏ་ཏི་ཡོ་པི ཏ་ཏྠ ས་མ་ཎོ ན ཨུ་པ་ལ་བྦྷ་ཏི, ཙ་ཏུ་ཏྠོ་པི ཏ་ཏྠ ས་མ་ཎོ ན ཨུ་པ་ལ་བྦྷ་ཏི. ཡ་སྨི་ཉྩ ཁོ, སུ་བྷ་དྡ, དྷ་མྨ་ཝི་ན་ཡེ ཨ་རི་ཡོ ཨ་ཊྛ་ངྒི་ཀོ མ་གྒོ ཨུ་པ་ལ་བྦྷ་ཏི, ས་མ་ཎོ་པི ཏ་ཏྠ ཨུ་པ་ལ་བྦྷ་ཏི, དུ་ཏི་ཡོ་པི…པེ… ཏ་ཏི་ཡོ་པི…པེ… ཙ་ཏུ་ཏྠོ་པི ཏ་ཏྠ ས་མ་ཎོ ཨུ་པ་ལ་བྦྷ་ཏི. ཨི་མ་སྨིཾ ཁོ, སུ་བྷ་དྡ, དྷ་མྨ་ཝི་ན་ཡེ ཨ་རི་ཡོ ཨ་ཊྛ་ངྒི་ཀོ མ་གྒོ ཨུ་པ་ལ་བྦྷ་ཏི. ཨི་དྷེ་ཝ, སུ་བྷ་དྡ, ས་མ་ཎོ, ཨི་དྷ དུ་ཏི་ཡོ ས་མ་ཎོ, ཨི་དྷ ཏ་ཏི་ཡོ ས་མ་ཎོ, ཨི་དྷ ཙ་ཏུ་ཏྠོ ས་མ་ཎོ. སུ་ཉྙཱ པ་ར་པྤ་ཝཱ་དཱ ས་མ་ཎེ་བྷི ཨ་ཉྙེ་ཧཱི’’ཏི [དཱི. ནི. ༢.༢༡༤]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཨ་ཊྛ་ངྒི་ཀོ མ་གྒོ་ཏི.
མ་གྒ་ཀ་ཐཱ ནི་ཊྛི་ཏཱ.
༢༠. ཝཱི་ས་ཏི་མ་ཝ་གྒོ
(༡༩༩) ༦. ཉཱ་ཎ་ཀ་ཐཱ
༨༧༦. དྭཱ་ད་ས་ཝ་ཏྠུ་ཀཾ ཉཱ་ཎཾ ལོ་ཀུ་ཏྟ་ར་ནྟི? ཨཱ་མ་ནྟཱ. དྭཱ་ད་ས ལོ་ཀུ་ཏྟ་ར་ཉཱ་ཎཱ་ནཱི་ཏི? ན ཧེ་ཝཾ ཝ་ཏྟ་བྦེ…པེ… དྭཱ་ད་ས ལོ་ཀུ་ཏྟ་ར་ཉཱ་ཎཱ་ནཱི་ཏི? ཨཱ་མ་ནྟཱ. དྭཱ་ད་ས སོ་ཏཱ་པ་ཏྟི་མ་གྒཱ་ཏི? ན ཧེ་ཝཾ ཝ་ཏྟ་བྦེ…པེ… དྭཱ་ད་ས སོ་ཏཱ་པ་ཏྟི་མ་གྒཱ་ཏི? ཨཱ་མ་ནྟཱ. དྭཱ་ད་ས སོ་ཏཱ་པ་ཏྟི་ཕ་ལཱ་ནཱི་ཏི? ན ཧེ་ཝཾ ཝ་ཏྟ་བྦེ…པེ… དྭཱ་ད་ས ས་ཀ་དཱ་གཱ་མི་མ་གྒཱ…པེ… ཨ་ནཱ་གཱ་མི་མ་གྒཱ…པེ… ཨ་ར་ཧ་ཏྟ་མ་གྒཱ་ཏི? ན ཧེ་ཝཾ ཝ་ཏྟ་བྦེ…པེ… དྭཱ་ད་ས ཨ་ར་ཧ་ཏྟ་མ་གྒཱ་ཏི? ཨཱ་མ་ནྟཱ. དྭཱ་ད་ས ཨ་ར་ཧ་ཏྟ་ཕ་ལཱ་ནཱི་ཏི? ན ཧེ་ཝཾ ཝ་ཏྟ་བྦེ…པེ….
༨༧༧. ན ཝ་ཏྟ་བྦཾ – ‘‘དྭཱ་ད་ས་ཝ་ཏྠུ་ཀཾ ཉཱ་ཎཾ ལོ་ཀུ་ཏྟ་ར’’ནྟི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཨི་དཾ དུ་ཀྑཾ ཨ་རི་ཡ་ས་ཙྩ’’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑཾ ཨ་རི་ཡ་ས་ཙྩཾ པ་རི་ཉྙེ་ཡྻ’ནྟི མེ, བྷི་ཀྑ་ཝེ…པེ… པ་རི་ཉྙཱ་ཏ་ནྟི མེ, བྷི་ཀྑ་ཝེ…པེ… ‘ཨི་དཾ དུ་ཀྑ་ས་མུ་ད་ཡཾ [དུ་ཀྑ་ས་མུ་ད་ཡོ (སྱཱ. ཀཾ. པཱི.)] ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩཾ པ་ཧཱ་ཏ་བྦ’ནྟི མེ, བྷི་ཀྑ་ཝེ…པེ… པ་ཧཱི་ན་ནྟི མེ, བྷི་ཀྑ་ཝེ…པེ… ‘ཨི་དཾ དུ་ཀྑ་ནི་རོ་དྷཾ [དུ་ཀྑ་ནི་རོ་དྷཱ (སྱཱ. ཀཾ. པཱི.)] ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩཾ ས་ཙྪི་ཀཱ་ཏ་བྦ’ནྟི མེ, བྷི་ཀྑ་ཝེ…པེ… ས་ཙྪི་ཀ་ཏ་ནྟི མེ, བྷི་ཀྑ་ཝེ…པེ… ‘ཨི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ བྷཱ་ཝེ་ཏ་བྦ’ནྟི མེ, བྷི་ཀྑ་ཝེ…པེ… བྷཱ་ཝི་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དཱི’’ཏི [མ་ཧཱ་ཝ. ༡༥; སཾ. ནི. ༥.༡༠༨༡; པ་ཊི. མ. ༢.༣༠]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི དྭཱ་ད་ས་ཝ་ཏྠུ་ཀཾ ཉཱ་ཎཾ ལོ་ཀུ་ཏྟ་ར་ནྟི.
ཉཱ་ཎ་ཀ་ཐཱ ནི་ཊྛི་ཏཱ.
ཝཱི་ས་ཏི་མ་ཝ་གྒོ.
ཏ་སྶུ་དྡཱ་ནཾ –
མཱ་ཏུ་གྷཱ་ཏ་ཀོ ཨཱ་ན་ནྟ་རི་ཀོ པི་ཏུ་གྷཱ་ཏ་ཀོ ཨཱ་ན་ནྟ་རི་ཀོ ཨ་ར་ཧ་ནྟ་གྷཱ་ཏ་ཀོ ཨཱ་ན་ནྟ་རི་ཀོ རུ་ཧི་རུ་པྤཱ་ད་ཀོ ཨཱ་ན་ནྟ་རི་ཀོ ས་ངྒྷ་བྷེ་ད་ཀོ ཨཱ་ན་ནྟ་རི་ཀོ, ན་ཏྠི པུ་ཐུ་ཛྫ་ན་སྶ ཉཱ་ཎཾ, ན་ཏྠི ནི་ར་ཡེ་སུ ནི་ར་ཡ་པཱ་ལཱ, ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ, པ་ཉྩ་ངྒི་ཀོ མ་གྒོ, དྭཱ་ད་ས་ཝ་ཏྠུ་ཀཾ ཉཱ་ཎཾ ལོ་ཀུ་ཏྟ་ར་ནྟི.
ཙ་ཏུ་ཏྠོ པ་ཎྞཱ་ས་ཀོ.
ཏ་སྶུ་དྡཱ་ནཾ –
ནི་གྒ་ཧོ, པུ་ཉྙ་ས་ཉྩ་ཡོ, ཨ་ཊྛཱ་སི, ཨ་ཏཱི་ཏེ་ན ཙ མཱ་ཏུ་གྷཱ་ཏ་ཀོ.